Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

ԵԴ1/3943/01/24

«03» փետրվարի 2025թ. ք. Երևան

Երևան քաղաքի առաջին ատյանի ընդհանուր իրավասության քրեական դատարանը՝

նախագահությամբ դատավոր՝ Ա. Մելիքսեթյանի,
քարտուղարությամբ՝ Ս․ Ջավադյանի,

մասնակցությամբ՝
հանրային մեղադրող՝ Դ․ Ներսիսյանի,

դռնբաց դատական նիստում քննելով քրեական գործն ըստ մեղադրանքի՝
Կարեն Յուրիի Գրիգորյանի՝ (ծնված՝ 28․03․1978թ․, ազգությամբ հայ, ՀՀ քաղաքացի, միջնակարգ կրթությամբ, նախկինում դատված, ամուսնալուծված, չի աշխատում, հաշվառված՝ ք․ Երևան, Մարգարյան փողոց, 43-րդ շենք, բնակարան 69 հասցեում) ՀՀ քրեական օրենսգրքի 469-րդ հոդվածի 1-ին մասով,

Պ Ա Ր Զ Ե Ց

1.Գործի դատավարական պատմությունը.
1.1․ 2023թ. սեպտեբերի 27-ին ՀՀ քրեական օրենսգրքի 457-րդ հոդվածի 1-ին մասի հատկանիշներով նախաձեռնվել է թիվ 48-0076-23 քրեական վարույթը:
1.2․ 2024թ. սեպտեմբերի 02-ին ՀՀ քրեական օրենսգրքի 469-րդ հոդվածի 1-ին մասի հատկանիշներով նախաձեռնվել է թիվ 70917724 քրեական վարույթը:
1.3․ 2024թ. սեպտեմբերի 10-ին որոշում է կայացվել թիվ 48-0076-23 և թիվ 70917724 քրեական վարույթները միացնելու և նախաքննությունը թիվ 70917724 քրեական վարույթի համարի ներքո շարունակելու մասին։
1.4․ 2024թ. հոկտեմբերի 30-ին որոշում է կայացվել Կարեն Յուրիի Գրիգորյանի նկատմամբ ՀՀ քրեական օրենսգրքի 469-րդ հոդվածի 1-ին մասով հանրային քրեական հետապնդում հարուցելու մասին:
1.5․ 2024թ. դեկտեմբերի 17-ին որոշում է կայացվել մեղադրյալ Կարեն Յուրիի Գրիգորյանի կողմից ենթադրյալ հանցանք կատարելու կապակցությամբ քննվող թիվ 70917724 քրեական վարույթից նոր քրեական վարույթ անջատելու և նոր վարույթին 58232424 համարը շնորհելու մասին։
1.6․ 2024 թվականի դեկտեմբերի 27-ին Երևան քաղաքի առաջին ատյանի ընդհանուր իրավասության քրեական դատարան մուտք է եղել ՀՀ գլխավոր դատախազությունից ստացված նախաքննական 58232424 համարով քրեական գործն ըստ մեղադրանքի՝ Կարեն Յուրիի Գրիգորյանի՝ ՀՀ քրեական օրենսգրքի 469-րդ հոդվածի 1-ին մասով, քրեական գործին շնորհվել է ԵԴ1/3943/01/24 դատական գործի համարը, աշխատակազմին է հանձնվել 2024 թվականի դեկտեմբերի 30-ին:
1.7․ 2025թ. հունվարի 03-ին Դատարանը կայացրել է թիվ ԵԴ1/3943/01/24 քրեական գործով վարույթ ստանձնելու և նախնական դատալասումներ նշանակելու մասին որոշում:

2. Մեղադրանքի փաստական նկարագրությունը.
Կարեն Յուրիի Գրիգորյանը, ՀՀ պետական սահմանն ապօրինի հատելու դիտավորությամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, 2021 թվականի նոյեմբերի 18-ից մինչև 2023 թվականի սեպտեմբերի 19-ն ընկած ժամանակահատվածում, քննությամբ չպարզված տարածքից ապօրինի՝ առանց սահմանված փաստաթղթերի և պատշաճ թույլտվության հատել է ՀՀ պետական սահմանը, իսկ 2023 թվականի սեպտեմբերի 19-ին մուտք է գործել Հայաստանի Հանրապետություն:

3. Դատաքննությամբ հետազոտված թույլատրելի ապացույցները.
3.1․ Դատափաստաթղթաբանական փորձաքննության թիվ 24-0192 եզրակացությունն այն մասին, որ փորձաքննությանը ներկայացված ԳՐԻԳՈՐՅԱՆ ԿԱՐԵՆ ՅՈՒՐԻԻ» անվամբ լրացված «BA 3599632» սերիա-համարի ՀՀ քաղաքացու 40-րդ էջում կարմրագույն ներկանյութով կատարված «...ՍՏԱՆ ՀԱԿ 023 Բագրա-ն 17 03 23 7 ARMENIA BS 023 Bagra...» գրառումներով ուղղանկյուն կնիքի դրոշմի հիմնական անփոփոխ գրառումները և պատկերները իրենց տեղակայումներով և չափսային առանձնահատկություններով չեն համապատասխանում որպես համեմատական նմուշ ներկայացված «ՀԱՅԱՍՏԱՆ ՀԱԿ 023 Բագրատաշեն 17 03 - 22 7 ARMENIA BS 023 Bagratashen» գրառումներով ուղղանկյուն կնիքի դրոշմի հիմնական անփոփոխ գրառումների, պատկերների տեղակայումներին և չափսային առանձնահատկություններին և չի կատարվել համեմատական նմուշի կնիքով:
3․2․ 2024 թվականի հոկտեմբերի 25-ի որոշմամբ իրեղեն ապացույց ճանաչված՝ Կարեն Յուրիի Գրիգորյանի անվամբ լրացված «BA 3599632» սերիա համարի ՀՀ քաղաքացու անձնագիրը և դրա 40-րդ էջում առկա կարմրագույն ներկանյութով կատարված «Բագրատաշեն» անցման կետով ՀՀ տարածքը լքելու վերաբերյալ կնիքը:
3․3․ 2024 թվականի հոկտեմբերի 25-ին զննում կատարելու մասին արձանագրությունն այն մասին, որ ՀՀ ԱԱԾ սահմանապահ զորքերի օպերատիվ բաժնի ավագ սպա, մայոր Հ. Գրիգորյանը ՀՀ ԱԱԾ սահմանապահ զորքերի հրամանատարի 1-ին տեղակալ-շտաբի պետ, գնդապետ Է.Հունանյանին զեկուցագիր է ներկայացրել այն մասին, որ 2023 թվականի սեպտեմբերի 19-ին՝ ժամը 01:39-ի սահմաններում, Մոսկվա-Երևան թիվ 4323 չվերթով ՀՀ ժամանած ուղևորը սահմանային վերահսկողության ժամանակ մոտեցել է թիվ 17 խցիկին և ներկայացրել է ՀՀ քաղաքացու կենսաչափական անձնագիր՝ Կարեն Յուրիի Գրիգորյան (ծնվ 28.03.1978թ. անձ. BA3599632) տվյալներով, «Զվարթնոց» ՍվԲ ավագ հսկիչ, ենթասպա Անահիտ Հովհաննիսյանը և վերջինիս տվյալները ՍԷԿՏ համակարգ մուտքագրելիս պարզել է, որ ուղևորը գտնվում է հետախուզման մեջ, այն է՝ թաքնված է դատախազության և քննչական մարմիններից՝ խափանման միջոցը կալանք: Փաստաթղթի ստուգման ընթացքում Կ.Գրիգորյանի անձնագրի 40-րդ էջում հայտնաբերվել է 17.03.22 նշագրմամբ 023 համարի կեղծ «Բագրատաշեն» ամսաթիվ կնիք: ՍԷԿՏ տվյալներով պարզվել է, որ 17.03.2022թ.–ին, Կ.Գրիգորյանը «Բագրատաշեն» անցակետով սահմանահատում չի կատարել: Կազմվել է անձանց և փաստաթղթերի հատուկ ստուգում (ԱԿՏ թիվ 3/190901)։ Արդյունքում պարզվել է, որ անձնագրի 40-րդ էջում առկա 023 համարի «Բագրատաշեն» ամսաթիվ կնիքը պարունակում է ամբողջական կեղծման հատկանիշներ՝ ուլտրամանուշակագույն լույսի ներքո չի արտացոլվում:
Հիշյալ հանգամանքը պարզաբանելու նպատակով վերջինս առանձնացվել է ուղևորահոսքից և կասեցվել է նրա սահմանահատումը, ինչի վերաբերյալ ՍԷԿՏ համակարգում կատարվել է համապատասխան գրառում: ՀՀ պետական սահմանն ապօրինի հատելու հանգամանքները պարզաբանելու նպատակով Կ.Գրիգորյանի հետ իրականացվել է հարցումային աշխատանք, որի ընթացքում նա պնդել է, որ ՀՀ պետական սահմանը հատել է «Բագրատաշեն» անցակետով և սահմանված կարգով: Կ.Գրիգորյանը հետախուզման մեջ գտնվելու կապակցությամբ, 2023 թվականի սեպտեմբերի 19-ին՝ ժամը 05:45-ին, ուղեբեռով և կեղծիք պարունակող անձնագրով, թիվ 619 ԱԿՏ-ով փոխանցվել է ՀՀ ՆԳՆ և Ոստիկանության «Զվարթնոց» օ/կ գծային բաժնի ՔՀԲ օպերլիազոր, լեյտենանտ՝ Գարիկ Աբրահամյանին:
ՀՀ ԱԱԾ սահմանապահ զորքերի օպերատիվ բաժնի ավագ սպա, մայոր Հարություն Գրիգորյանն առերևույթ հանցանքի մասին հաղորդում է ներկայացրել այն մասին, որ 2023 թվականի սեպտեմբերի 19-ին՝ ժամը 01:39-ին, Մոսկվա-Երևան թիվ 4323 չվերթով ՀՀ ժամանած ուղևորը սահմանային վերահսկողության ժամանակ ներկայացրել է ՀՀ քաղաքացու կենսաչափական անձնագիր՝ Կարեն Յուրիի Գրիգորյան (ծնվ.28.03.1978թ. անձ. BA3599632) տվյալներով, «Զվարթնոց» ՍՎԲ ավագ հսկիչ, ենթասպա Անահիտ Հովհաննիսյանը վերջինիս տվյալները ՍԷԿՏ համակարգ մուտքագրելիս պարզել է, որ ուղևորը գտնվում է հետախուզման մեջ՝ խափանման միջոցը կալանք: Փաստաթղթի ստուգման ընթացքում Կ.Գրիգորյանի անձնագրի 40-րդ էջում հայտնաբերվել է 17.03.22 նշագրմամբ 023 համարի կեղծ «Բագրատաշեն» ամսաթիվ կնիք: ՍԷԿՏ տվյալներով պարզվել է, որ 17.03.2022թ.-ին, Կ.Գրիգորյանը «Բագրատաշեն» անցակետով սահմանահատում չի կատարել: Կազմվել է անձանց և փաստաթղթերի հատուկ ստուգում (ԱԿՏ թիվ 3/190901)։ Արդյունքում պարզվել է, որ անձնագրի 40-րդ էջում առկա 23 համարի «Բագրատաշեն» ամսաթիվ կնիքը պարունակում է ամբողջական կեղծման հատկանիշներ՝ ուլտրամանուշակագույն լույսի ներքո չի արտացոլվում։ ՀՀ պետական սահմանն ապօրինի հատելու հանգամանքները պարզաբանելու ժամանակ Կ.Գրիգորյանը պնդել է, որ ՀՀ պետական սահմանը հատել է «Բագրատաշեն» անցակետով: Վերջինս 2023 թվականի սեպտեմբերի 19-ին՝ ժամը 05:45-ին, թիվ 619_ԱԿՏ-ով փոխանցվել է ՀՀ ՆԳՆ Ոստիկանության «Զվարթնոց» օ/կ գծային բաժին:
Անձանց և փաստաթղթերը հատուկ ստուգման ենթարկելու մասին թիվ 3/190901 ակտի զննությամբ պարզվեց, որ ենթասպա Անահիտ Հովհաննիսյանը ստուգման է ենթարկել ՀՀ քաղաքացի, 28.03.1978 թվականին ծնված Կարեն Յուրիի Գրիգորյանի՝ թիվ BA 3599632 համարի անձնագիրը տրված 28.07.2021 թվականին, ինչի արդյունքում պարզվել է, որ հիշյալ անձնագրի 40-րդ էջում առկա 023 համարի «Բագրատաշեն» ամսաթիվ կնիքը պարունակում է ամբողջական կեղծման հատկանիշներ՝ ՈՒՄ լույսի ներքո չի արտացոլվում: Հատուկ ստուգմամբ անձնագրում կեղծիքի այլ տարրեր չեն հայտնաբերվել։
Կարեն Գևորգյանի վերաբերյալ առկա սահմանահատումների պատմության զննությամբ՝ ի թիվս այլ տվյալների, պարզվեց, որ Կարեն Գրիգորյանը՝ ծնված 28.03.1978 թվականին, 2020 թվականի սեպտեմբերի 03-ին «Զվարթնոց» անցակետով՝ թիվ AR 0609181 սերիական համարի անձնագրի օգտագործմամբ դուրս է եկել ՀՀ պետական սահմանից, իսկ 2020 թվականի սեպտեմբերի 09-ին՝ նույն անձնագրի օգտագործմամբ «Բագրատաշեն» անցակետով մուտք է գործել ՀՀ: Կարեն Գևորգյանը 2023 թվականի սեպտեմբերի 19-ին՝ ժամը 01:39-ին, «Զվարթնոց» անցակետով՝ թիվ BA 3599632 անձնագրի օգտագործմամբ մուտք է գործել ՀՀ:
Տավուշի մարզի առաջին ատյանի ընդհանուր իրավասության դատարանի թիվ ՏԴ/0196/01/20 դատավճռի և որոշումների զննությամբ պարզվեց, որ 09.09.2020թ. ՀՀ ՊԵԿ քննչական վարչության 3-րդ բաժնի հատկապես կարևոր գործերով քննիչ Ա. Պետրոսյանը որոշել է ՀՀ քրեական օրենսգրքի 267.1 հոդվածի 1-ին մասով հարուցել թիվ 84102620 քրեական գործն այն փաստի կապակցությամբ, որ 09.09.2020թ.-ին՝ ժամը 07:30-ի սահմաններում, ՀՀ ՊԵԿ ՄԴՊ վարչության և ՀՀ ոստիկանության ՔՈԳ վարչության ԹԱՇԴՊ վարչության աշխատակիցները՝ ստացած տվյալներն իրացնելիս, ՀՀ ՊԵԿ Արևելյան մաքսատուն-վարչության Բագրատաշենի մաքսային կետ-բաժնում մաքսային զննության են ենթարկել Վրաստանից ՀՀ մուտք գործած կարեն Յուրիի Գրիգորյանին, որի արդյունքում վերջինս իր բաճկոնի և սպորտային համազգեստի ի գրպաններից կամավոր դուրս է բերել և ներկայացրել մաքսանենգությամբ՝ մաքսային հսկողությունից թաքցնելու եղանակով, ՀՀ տեղափոխված 6 հատ պոլիէթիլենային «զիւպ» փաթեթավորված, սպիտակ գույնի, բյուրեղանման զանգվածներ, ընդհանուր 358 գրամ, ինչի կապակցությամբ Կ. Գրիգորյանը հայտարարել է, որ դա հանդիսանում է «մեթամֆետամին» /կրիստալ/ տեսակի թմրամիջոց: 11.09.2020թ. Կարեն Յուրիի Գրիգորյանին մեղադրանք է առաջադրվել ՀՀ քրեական օրենսգրքի 267.1 հոդվածի 4-րդ մասի 1-ին կետով և 268 հոդվածի 3-րդ մասով: Մեղադրական եզրակացությունը հաստատվել է 18.12.2020թ. և գործն ուղարկվել է Տավուշի մարզի առաջին ատյանի ընդհանուր իրավասության դատարան: Դատարանը նկարագրված արարքի կատարման համար Կարեն Գրիգորյանի նկատմամբ որպես պատիժ է նշանակել ազատազրկում՝ 8 տարի 4 ամիս ժամկետով։
Հիշյալ դատավճիռը Կարեն Գրիգորյանը բողոքարկել է ՀՀ վերաքննիչ քրեական դատարան:
ՀՀ վերաքննիչ քրեական դատարանը 2022 թվականի հունիսի 14-ի որոշմամբ բողքը մասնակիորեն բավարարել է և Կարեն Գրիգորյանի նկատմամբ վերջնական պատիժ է նշանակել 8 տարի ժամկետով ազատազրկում:
ՀՀ ոստիկանության Երևան քաղաքի վարչության Նոր նորքի բաժնի պետ Ի. Մեսրոպյանը, ուսումնասիրելով դատապարտյալ Կարեն Յուրիի Գրիգորյանի վերաբերյալ Տավուշի մարզի առաջին ատյանի ընդհանուր իրավասության դատարանի թիվ ՏԴ/0196/01/20 քրեական գործով դատապարտյալի օրինական ուժի մեջ մտած դատավճիռը, դատապարտյալին հայտնաբերելու և ազատազրկման ձևով նշանակված պատիժը կրելու նպատակով ՀՀ ԱՆ համապատասխան քրեակատարողական հիմնարկ ներկայացնելու համար 26.10.2022թ. թիվ ԴԴԱ-15-Ե-8422/22 գրությամբ ուղարկված կարգադրությունը և դրա հիման վրա ոստիկանության Նոր Նորքի բաժնի ծառայողների կողմից իրականացված միջոցառումները, այն է՝ Կարեն Յուրիի Գրիգորյանի /ծնված 28.03.1978թ./ հաշվառված՝ ք. Երևան, Աջափնյակ, Մարգարյան 1-ին նրբանցք, 2-րդ շենք, բնակարան 6 և բնակության վայրը՝ քաղաք Երևան, Նոր Նորք, Գալշոյան փողոց, 17/4 շենք, բնակարան 203 հասցեներ կատարված այցելությունների վերաբերյալ կազմված արձանագրությունները, պարզվել է, որ Կարեն Գրիգորյանը չի բնակվում նշված հասցեներում, այդ իսկ պատճառով հնարավոր չի եղել, ի կատար ածել դատարանի դատավճիռը և կարգադրությունը:
Հաշվի առնելով վերոգրյալը՝ 2022 թվականի դեկտեմբերի 30-ին որոշում է կայացվել Կարեն Գրիգորյանի նկատմամբ հետախուզում հայտարարելու մասին:
3․4․ Զննության ենթարկված և 2024 թվականի հոկտեմբերի 25-ի որոշմամբ արտավարութային փաստաթուղթ ճանաչված ներքոհիշյալ փաստաթղթերը՝ ՀՀ ԱԱԾ սահմանապահ զորքերի օպերատիվ բաժնի ավագ սպա, մայոր Հ.Գրիգորյանի կողմից ՀՀ ԱԱԾ սահմանապահ զորքերի հրամանատարի 1-ին տեղակալ-շտաբի պետ, գնդապետ Է.Հունանյանին ներկայացրած զեկուցագրիրը, ՀՀ ԱԱԾ սահմանապահ զորքերի օպերատիվ բաժնի ավագ սպա, մայոր Հարություն Գրիգորյանի կողմից ներկայացված առերևույթ հանցանքի մասին հաղորդումը, անձանց և փաստաթղթերը հատուկ ստուգման ենթարկելու մասին թիվ 3/190901 ակտը, Կարեն Գևորգյանի վերաբերյալ առկա սահմանահատումների պատմությունը, Տավուշի մարզի առաջին ատյանի ընդհանուր իրավասության դատարանի թիվ ՏԴ/0196/01/20 դատավճիռը և դրան կից որոշումները։
3.6․ Մեղադրյալ Կարեն Յուրիի Գրիգորյանի դատարանում տված ցուցմունքը, որի ընթացքում ի պատասխան հանրային մեղադրողի հարցերի՝ հայտնեց, որ 2022 թվականի մարտի 17-ին վրացական տաքսի մեքենայով, մակնիշը՝ Mercedes-Benz C-Class, գնացել է Բագրատաշենի անցակետ, լուսաբացին՝ մոտավորապես ժամը 05։00-ին, վարորդը իր և նրա աձնագրերը տվել է, ինքն այդ ժամանակ նույնիսկ մեքենայից չի իջել, հետո երկու անձնագրերը ետ է վերցրել, գնացել է կանգնել Վրաստանի անցակետում, մեքենայից իջել, մոտեցել սահմանապահին, տվել անձնագիրը, նա վերցրել է անձնագիրը նայել, հավանաբար, քանի որ անձնագիրը նոր է եղել, ասել է, որ ինքը սպասի։ Հարցրել է,թե արդյոք որևէ խնդիր կա, բայց նրան պատասխանել է, որ ոչ, պարզապես սպասի։ Նկարել է անձնագիրը և որևէ մեկին ուղարկել, մոտ 10-15 րոպե սպասել է, նրան ինչ որ զանգ է եկել, որից հետո իրեն ասել է, որ մոտենա։ Ինքը մոտեցել է, անձնագրում խփել են կնիքը և ինքը քայլելով մոտեցել է մեքենային, նստել և գնացել։ Այդտեղից միանգամից գնացել է Բաթումի սահման, այնտեղից էլ՝ Թուրքիայի հանրապետություն։
Չնայած, որ իր օգտին կլիներ վաղեմության ժամկետների առումով, եթե ինքն ասեր, օրինակ գնացել է 2021 թվականին, սակայն ցանկանում է ճշմարտությունն ասել, ստելու ոչինչ չունի։ Եղել է նաև դեպքեր, երբ անձնագիրն իր մոտ չի եղել, օրինակ եղել է մեքենայի մեջ։ Քանի որ իր անձնագրում այլևս կնիք խփելու համար ազատ էջեր չեն մնացել, այդ պատճառով է նոր անձնագիր ստացել։ Եղել են դեպքեր նաև, երբ օրերով ման է եկել անձնագիրը և չի գտել, որոշ ժամանակ անց միայն՝ գտել, որքանով, որ հիշում է՝ նման դեպք եղել է 2021 թվականի աշնանը։ Տեղյակ չէ իր անձնագրում հայտնաբերած կեղծ կնիքի մասին, հնարավոր է, որ իրեն տեղափողող տաքսիի վարորդի և սահմանի աշխատակիցների պատճառով է հայտնվել այդ կեղծ կնիքն իր անձնագրում։ Տրամաբանությունը կարող է այն լինել, որ օրինակ, սահմանի աշխատակիցները տաքսիի վարորդի հետ որևէ գործարքի մեջ են եղել, տեսել են, որ իր նկատմամբ ՍԷԿՏ համակարգում առկա է սահմանափակում, բայց իրեն էլ վարորդի հետ թողել են, որ անցնի։
Զվարթնոց օդանավակայան վայրէջք կատարելիս մոտեցել է աշխատակցին և ասել, որ ինքը հետախուզման մեջ է գտնվում և իրեն պետք է դիմավորեն, հետո առանց հերթի սպասելու իրեն մոտեցրել են համապատասխան պատուհանին, անձնագիրը փոխանցել է նրանց, բացել նայել են, հետո իրեն բարձրացրել են վերև։ Այնտեղ արդեն մեկ ուրիշ աշխատակից իրեն հարցեր է ուղղել, թե ինչպես է գնացել, ինքն էլ պատասխանել է, որ Բագրատաշենի անցակետով է լքել սահմանը։ Հետո անձնագիրը ետ է վերադարձրել իրեն, դրել է գրպանը, իրեն ոստիկանության աշխատակիցները դուրս են ուղեկցել և դրսում Մաշտոցի ոստիկանության աշխատակիցներն իրեն դիմավորել են և տեղափոխել բաժին։
Գրեթե համոզված է, որ սահմանապահ զորքերի աշխատակիցներն են կեղծ կնիք դրել, քանի որ այլ կերպ ինքը չէր կարող անցնել ՀՀ սահմանը և հայտնվել Վրաստանի անցակետում։ Ինչ վերաբերում է հանրային մեղադրողի այն հարցին, թե, օրինակ, չէր կարող արդյոք բեռնախցիկի մեջ գտնվելով անցնել ՀՀ սահմանը, պատասխանեց որ դա անհնար է, քանի որ անխտիր բոլոր ավտոմեքենաների բեռնախցիկները բացում և ստուգում են։ Վրաստանի սահմանն ապօրինի կերպով հնարավոր է միայն անցնել գետով կամ անտառով, իսկ, եթե ինքն այդկերպ անցած լիներ, ապա Թուրքիայի սահմանին իրեն կբռնեին, քանի որ չէր երևա, թե ինքն ինչպես է մուտք գործել Վրաստան։ Եղել են նույնիսկ դեպքեր, երբ Վրաստան գնալիս, Հայաստանի անցակետում աշխատակիցը մոռացել է կնիք խփել, ճանապարհից ինքն է ետ վերադարձել և տեսյակ պահել, որ կնիքը չկա անձնագրում, և իրեն ասել են, որ դա խնդիր չէ, քանի որ համակարգչով, ամե դեպքում, երևում է, որ ինքն անցել է սահմանը։ Մեղավոր է, որ իմանալով, որ իր վերաբերյալ առկա է սահմանափակում, անցել է սահմանը։
Իրեն ուղեկցող տաքսիի վարորդի անձնական տվյալները չունի, չի կարող հիշել նաև մեքենային պետհամարիշերը։

4. Դատարանի փաստական վերլուծությունները և դատարանի կողմից հաստատված փաստական հանգամանքները.
Հետազոտված ապացույցների հիման վրա Դատարանի կողմից հաստատվել են հետևյալ փաստական հանգամանքները.
Կարեն Յուրիի Գրիգորյանը, ՀՀ պետական սահմանն ապօրինի հատելու դիտավորությամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, 2021 թվականի նոյեմբերի 18-ից մինչև 2023 թվականի սեպտեմբերի 19-ն ընկած ժամանակահատվածում, քննությամբ չպարզված տարածքից ապօրինի՝ առանց սահմանված փաստաթղթերի և պատշաճ թույլտվության հատել է ՀՀ պետական սահմանը:

5. Դատարանի իրավական վերլուծությունները.
5.1. Վերլուծելով մեղադրյալ Կարեն Յուրիի Գրիգորյանին առաջադրված մեղադրանքը և հիմնվելով հետազոտված թույլատրելի ապացույցների վրա` Դատարանը գտնում է, որ.
- ապացուցված է մեղադրյալ Կարեն Յուրիի Գրիգորյանին վերագրվող փաստական հանգամանքները,
- ապացուցված է վերոգրյալ արարքի քրեական հակաիրավականությունը, որը նախատեսված է ՀՀ քրեական օրենսգրքի 469-րդ հոդվածի 1-ին մասով,
- ապացուցված է մեղադրյալ Կարեն Յուրիի Գրիգորյանի կողմից ՀՀ քրեական օրենսգրքի 469-րդ հոդվածի 1-ին մասով նախատեսված վերոգրյալ արարքը կատարելը.
- ապացուցված է մեղադրյալ Կարեն Յուրիի Գրիգորյանի մեղավորությունը ՀՀ քրեական օրենսգրքի 469-րդ հոդվածի 1-ին մասով նախատեսված արարքը կատարելու մեջ:
Այս համատեքստում Դատարանի համար արժանահավատ չէ մեղադրյալի ցուցմունքը, քանի որ վերջինիս կողմից հայտնած հանգամանքները ոչ միայն չեն հաստատվում օբյեկտիվ այլ ապացույցներով, այլ նաև իրատեսակ չէ մեղադրյալի հայտնած այն հանգամանքը, որ սահմանապահ զորքերի աշխատակիցներն են կեղծ կնիք դրել, մյուս կողմից Դատարանն իրատեսակ է համարում մեղադրյալի կողմից կեղծիքի մասին առնվազն տեղեկացված լինելը, հետևաբար նաև սահմանը հատելու ապօրինի լինելը գիտակցելու հանգամանքը քանզի վերջինս ՀՀ սահմանը հատելու պահին ունեցել է դատավարական կարգավիճակ, այլ կերպ՝ Դատարանի գնահատմամբ մեղադրյալը նման ցուցմունք տալով փորձում է խուսափել քրեական պատասխանատվությունից

5.2. Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ Սահմանադրության 71-րդ հոդվածի համաձայն
«1. Հանցանք կատարած անձի պատժի հիմքը նրա մեղքն է:
2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին»:

ՀՀ քրեական օրենսգրքի 7-րդ հոդվածի 1-ին մասի համաձայն`
«1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»:

ՀՀ քրեական օրենսգրքի 55-րդ հոդվածի 2-րդ մասի համաձայն՝
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»:

ՀՀ քրեական օրենսգրքի 69-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ»:
5.3. Վերոհիշյալ իրավադրույթների համատեքստում Դատարանը մեղադրյալի պատասխանատվությունը և պատիժը մեղմացնող և ծանրացնող հանգամանքներ Դատարանը չի արձանագրում:
5.4. Քննարկելով այն հարցը, թե ինչ պատժատեսակ և պատժաչափ պետք է նշանակվի մեղադրյալի նկատմամբ, հաշվի առնելով կատարած հանցանքի բնույթը և հանրության համար վտանգավորության աստիճանը, դրա կատարման եղանակը, հանցավոր մտադրության իրականացման աստիճանը, մեղքի ձևը, հանցանքը կատարելուց հետո նրա դրսևորած վարքագիծը, նրա արարքի սոցիալական հետևանքները, ինչպես նաև հանցանքի անմիջական օբյեկտի բնույթը և այդ ոլորտում պետության քրեական քաղաքականության ուղղվածությունը, դրանք համադրելով մեղադրյալի անձը բնութագրող տվյալների հետ, Դատարանը գտնում է, որ մեղադրյալը ենթակա է ազատազրկման ձևով պատժի:
Դատարանի նման եզրահանգումը, ի թիվս այլնի, պայմանավորված է նաև մեղադրյալի՝ հանցանքը կատարելու շարժառիթով, այն է՝ վերջինս, ապօրինի հատելով ՀՀ սահմանը, քրեական պատասխանատվությունից խուսափելու նպատակ է հեապնդել, ինչն էապես բարձրացնում է արարքի հանրային վտանգավորության աստիճանը։
Դատարանը գտնում է, որ ՀՀ քրեական օրենսգրքի 469-րդ հոդվածի 1-ին մասով նախատեսված հանցագործության կատարման համար մեղադրյալի նկատմամբ պետք է նշանակվի ազատազրկում՝ 3 /երեք/ ամիս ժամկետով, որով կապահովվի ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին և բավարար կլինի սոցիալական արդարությունը վերականգնելու, պատժի ենթարկված անձին վերասոցիալականացնելու և հանցագործությունները կանխելու համար:
5.5 Անդրադառնալով պատիժը մեղադրյալի կողմից կրելու հարցին՝ Դատարանն արձանագրում է, որ մեղադրյալը պատիժը պետք է կրի, միևնույն ժամանակ վերը նշված հանգամանքը համադրելով պատիժները գումարելիս դրանց ժամկետները որոշելու և հանցանքների համակցությամբ պատիժ նշանակելու վերաբերյալ կանոնների հետ, Դատարանը փաստում է, որ Կարեն Յուրիի Գրիգորյանը սույն գործով իրեն մեղսագրվող հանցանքները կատարել է նախքան առաջին գործով` Երևան քաղաքի առաջին ատյանի ընդհանուր իրավասության քրեական դատարանի կողմից 17.11.2021թ. թիվ ՏԴ/0196/01/20 գործով դատավճիռը կայացնելը: Հետևաբար, մեղադրյալ Կարեն Յուրիի Գրիգորյանի նկատմամբ պատիժը պետք է նշանակվի ՀՀ քրեական օրենսգրքի 74-րդ հոդվածով սահմանված կարգով` պատիժները լրիվ գումարելու միջոցով: Այսպիսով՝ ՀՀ քրեական օրենսգրքի 74-րդ հոդվածի 11-րդ մասի համաձայն՝ թիվ ՏԴ/0196/01/20 գործով ՀՀ վերաքննիչ քրեական դատարանի՝ 2022 թվականի հունիսի 14-ի որոշմամբ նշանակված 8 (ութ) տարի 1 /մեկ/ ամիս ժամկետով ազատազրկման ձևով նշանակված պատժին պետք է լրիվ գումարել Երևան քաղաքի առաջին ատյանի ընդհանուր իրավասության քրեական դատարանի 2025թ. փետրվարի 03-ի թիվ ԵԴ1/3943/01/24 դատավճռով 3 (երեք) ամիս ժամկետով ազատազրկման ձևով նշանակված պատիժը և Կարեն Յուրիի Գրիգորյանի նկատմամբ վերջնական պատիժ նշանակել ազատազրկում 8 (ութ) տարի 4 (չորս) ամիս ժամկետով՝ պատժի կրման սկիզբ համարելով 2023 թվականի սեպտեմբերի 19-ը:
5.6. Դատարանն արձանագրում է, որ սույն գործով գույքային հայց չի հարուցվել, բռնագրավման ենթակա գույքի, ինչպես նաև գույքի արգելադրման վերաբերյալ տվյալներ գործում առկա չեն:
5.7. Անդրադառնալով ապացույցների տնօրինման հարցին՝ Դատարանը գտնում է, որ 2024 թվականի հոկտեմբերի 25-ի որոշմամբ իրեղեն ապացույց ճանաչված Կարեն Յուրիի Գրիգորյանի անվամբ լրացված BA 3599632 սերիա համարի ՀՀ քաղաքացու անձնագիրը պետք է վերադարձնել վարույթն իրականացնող մարմնին՝ թիվ 58232424 վարույթով տնօրինելու նպատակով։
5.8. Քննարկելով վարութային ծախսերի հարցը՝ Դատարանը, ղեկավարվելով ՀՀ քրեական դատավարության օրենսգրքի 167-րդ հոդվածով, վարութային ծախսերի հատուցման պարտականությունը, որը կազմում է 72․000 /յոթանասուներկու հազար/ ՀՀ դրամ, չի դնում մեղադրյալի վրա, քանզի առկա չեն բավարար տվյալներ մեղադրյալի ՝ վճարունակ լինելը հավաստելու համար, ավելին՝ վերջինս ազատազրկման ձևով պատիժ է կրում քրեակատարողական հիմնարկում:
5.9. Քննարկելով խափանման միջոցի հարցը` Դատարանը արձանագրում է, որ մեղադրյալի նկատմամբ ընտրված խափանման միջոց առկա չէ, և նկատի ունենալով, մեղադրյալը քրեակատարողական հիմնարկում պատիժ է կրում, գտնում է, որ վերջինիս նկատմամբ խափանման միջոց ընտրելու անհրաժեշտություն առկա չէ:
Վերոգրյալի հիման վրա և ղեկավարվելով Հայաստանի Հանրապետության քրեական դատավարության օրենսգրքի 100-րդ, 167-րդ, 347-350-րդ, 352-353-րդ, 364-րդ հոդվածներով, Դատարանը`

Վ Ճ Ռ Ե Ց

Կարեն Յուրիի Գրիգորյանին մեղավոր ճանաչել ՀՀ քրեական օրենսգրքի 469-րդ հոդվածի 1-ին մասով նախատեսված հանցանքում և պատիժ նշանակել ազատազրկում 3 /երեք/ ամիս ժամկետով:
ՀՀ քրեական օրենսգրքի 74-րդ հոդվածի կիրառմամբ դատավճռով 3 (երեք) ամիս ժամկետով ազատազրկման ձևով նշանակված պատժին լրիվ գումարել ՀՀ վերաքննիչ քրեական դատարանի՝ 2022 թվականի հունիսի 14-ի թիվ ՏԴ/0196/01/20 որոշմամբ 8 (ութ) տարի 1 /մեկ/ ամիս ժամկետով ազատազրկման ձևով նշանակված պատիժը և Կարեն Յուրիի Գրիգորյանի նկատմամբ վերջնական պատիժ նշանակել ազատազրկում 8 (ութ) տարի 4 (չորս) ամիս ժամկետով՝ պատժի կրման սկիզբ համարելով 2023 թվականի սեպտեմբերի 19-ը:
Դատավճիռն օրինական ուժի մեջ մտնելուց հետո իրեղեն ապացույց ճանաչված Կարեն Յուրիի Գրիգորյանի անվամբ լրացված BA 3599632 սերիա համարի ՀՀ քաղաքացու անձնագիրը վերադարձնել վարույթն իրականացնող մարմնին։
Խափանման միջոցի և վարութային ծախսերի հարցերը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ դատական ակտը ստանալուց հետո մեկ ամսվա ընթացքում:


ԴԱՏԱՎՈՐ՝ Ա․ ՄԵԼԻՔՍԵԹՅԱՆ