ԵԴ1/3962/01/24



Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
Երևան քաղաքի առաջին ատյանի ընդհանուր իրավասության
քրեական դատարանը (այսուհետ նաև՝ Դատարան)՝

Նախագահող դատավոր Հ.Ավագյան
Քարտուղարությամբ` Մ․Թովմասյանի
Մասնակցությամբ՝
Հանրային մեղադրող Ա.Կոստանյանի
Տուժող Ա.Գևորգյանի
Պաշտպան Է.Բեգլարյանի
Մեղադրյալ Ա.Գյուրջյանի

2025 թվականի մարտի 14-ին, դռնբաց դատական նիստում, Երևան քաղաքում, համաձայնեցման վարույթի կիրառմամբ քննելով քրեական գործն ըստ մեղադրանքի`
Աբրահամ Սողոմոնի Գյուրջյանի՝ (ծնված՝ 1956 թվականի մարտի 11-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատապարտված, աշխատում է «Մաստեր Շին» ՍՊԸ-ում որպես ավագ աշխղեկ, հաշվառված և բնակվում է Երևան քաղաքի Բաշինջաղյան փողոցի 6-րդ շենքի 18-րդ բնակարանում) հանրային քրեական հետապնդում է հարուցվել ՀՀ քրեական օրենսգրքի 355-րդ հոդվածի 2-րդ մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1. Գործի դատավարական նախապատմությունը.
2023 թվականի փետրվարի 16-ին ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնում նախաձեռնվել է թիվ 17127423 քրեական վարույթը՝ ՀՀ քրեական օրենսգրքի 355-րդ հոդվածի 1-ին մասի հատկանիշներով:
2023 թվականի փետրվարի 22-ին մահացած տուժող Արտակ Արամի Գևորգյանի փոխարեն տուժող է ճանաչվել վերջինի եղբայրը՝ Արշակ Արամի Գևորգյանը:
Երևան քաղաքի Ավան և Նոր Նորք վարչական շրջանների դատախազության դատախազ Ա.Կոստանյանի 2024 թվականի դեկտեմբերի 25-ի որոշմամբ Աբրահամ Սողոմոնի Գյուրջյանի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 355-րդ հոդվածի 2-րդ մասով:
Նույն օրը մեղադրանքը ներկայացվել է Աբրահամ Գյուրջյանին, և նրա նկատմամբ որպես խափանման միջոց է կիրառվել բացակայելու արգելքը։
2024 թվականի դեկտեմբերի 27-ին վարույթի նյութերը հաստատված մեղադրական եզրակացությամբ ուղարկվել են Դատարան, որտեղ գործին շնորհվել է ԵԴ1/3962/01/24 համարը:
2025 թվականի հունվարի 3-ին Դատարանի դատավոր Հ․Ավագյանը որոշում է կայացրել վարույթը ստանձնելու և նախնական դատալսումներ նշանակելու մասին։

2. Համաձայնեցման վարույթի կիրառություն.
Նախնական դատական լսումների ընթացքում մեղադրյալ Աբրահամ Սողոմոնի Գյուրջյանը միջնորդել է կիրառել համաձայնեցման վարույթ և հայտարարել է, որ մեղադրանքն իրեն պարզ է, համաձայն է մեղադրանքի հետ, միջնորդությունը ներկայացրել է կամավոր, խորհրդակցել է պաշտպանի հետ, գիտակցում է համաձայնեցման վարույթ կիրառելու հետևանքները:
Պաշտպան Է.Բեգլարյանը հայտարարել է, որ իր կողմից մեղադրյալին պարզաբանվել է համաձայնեցման վարույթ կիրառելու հետևանքները և միանում է միջնորդությանը։
Տուժող Ա.Գևորգյանը հայտարարել է, որ մեղադրյալ Աբրահամ Գյուրջյանի դեմ բողոք-պահանջ չունի և չի առարկում համաձայնեցման վարույթ կիրառելու միջնորդության դեմ։
Հանրային մեղադրող Ա.Կոստանյանը նույնպես համաձայնեցման վարույթ կիրառելու միջնորդության դեմ առարկություն չի ներկայացրել:
Համոզվելով, որ առկա է ՀՀ քրեական դատավարության օրենսգրքի 458-րդ հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 458-րդ հոդվածի 2-րդ մասով նախատեսված՝ համաձայնցեման վարույթի կիրառումը բացառող հանգամանքները, ինչպես նաև՝ մեղադրյալը համաձայն է իրեն մեղսագրվող արարքին, միջնորդությունը ներկայացրել է կամավոր և գիտակցում է իր միջնորդության բնույթը և հետևանքները՝ Դատարանը որոշում է կայացրել մեղադրյալ Աբրահամ Գյուրջյանի միջնորդությունը բավարարելու մասին։

3. Դատարանի իրավական վերլուծությունները.
ՀՀ քրեական դատավարության օրենսգրքի 463-րդ հոդվածի համաձայն՝
«1. Համաձայնեցման վարույթի արդյունքով դատարանը կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները:
2. Մեղադրական դատավճիռը պարունակում է համաձայնության մասին արձանագրության տեքստի բառացի շարադրանքը:
3. Մեղադրական դատավճռով դատարանը նշանակում է համաձայնության մասին արձանագրությամբ համաձայնեցված պատիժը (պատժատեսակն ու պատժաչափը), սահմանում է բռնագրավման ենթակա գույքը և դրա չափը:
4. Եթե առկա է գույքային հայց, ապա այն թողնվում է առանց լուծման:
5. Սույն օրենսգրքի 167-րդ հոդվածի 1-ին մասով նախատեսված վարութային ծախսերը մեղադրյալից ենթակա չեն բռնագանձման:
6. Դատավճիռը հրապարակելուց հետո դատավորը կողմերին պարզաբանում է նաև դատավճիռը բողոքարկելու` սույն օրենսգրքով նախատեսված սահմանափակումները»:
Կողմերի միջև կնքված համաձայնության մասին արձանագրությունն ունի հետևյալ բառացի շարադրանքը.
«(․․․) Սույն արձանագրությունը կազմվել է Երևան քաղաքի Ավան և Նոր Նորք վարչական շրջանների դատախազությունում:
Մասնակցությամբ՝ Երևան քաղաքի Ավան և Նոր Նորք վարչական շրջանների դատախազության դատախազ, երկրորդ դասի խորհրդական Արսեն Կոստանյանի:
Աբրահամ Սողոմոնի Գյուրջյանը ծնվել է 1956թ. մարտի 11-ին, հաշվառված է և բնակվում է Բաշինջաղյան 6 շենք, բնակարան 18 հասցեում կնոջ՝ Նարինե Գուրգենի Գյուրջյանի հետ /ծնված՝ 1960թ. մարտի 2-ին/, ազգությամբ հայ է, ՀՀ քաքաղացի, ունի բարձրագույն կրթություն, նախկինում չի դատապարտվել:
Պաշտպանի կողմից ներկայացվել են «Հորիզոն-95» ՍՊ և «Մաստեր Շին» ՍՊ ընկերությունների տնօրենների ստորագրությամբ վավերացված Ա. Գյուրջյանի բնութագրերը: Համաձայն «Հորիզոն-95» ՍՊ գլխավոր տնօրեն Ա. Խաչատրյանի կողմից 2025 թվականի փետրվարի 17-ին տրված բնութագրի՝ Ա. Գյուրջյանը 2006 թվականից մինչև 2020 թվականները աշխատել է «Հորիզոն-95» շինարարական ընկերությունում՝ նախ որպես ավագ աշխղեկ, հետո՝ տեղամասի պետ, իսկ «Մաստեր Շին» ՍՊ ընկերության տնօրեն Լ. Պետրոսյանի կողմից տրված բնութագրի համաձայն՝ Ա. Գյուրջյանը 2020 թվականի հոկտեմբերի 14-ից մինչև 2023 թվականի դեկտեմբերի 30-ն ընկած ժամանակահատվածում աշխատել է «Մաստեր Շին» ՍՊԸ-ում որպես ավազ աշխղեկ:
Հիշյալ երկու բնութագրերում էլ Ա.Գյուրջյանը բնութագրվել է դրականորեն, ըստ դրանց՝ Ա. Գյուրջյանը կատարել է մեծածավալ շինարարական աշխատանքներ, ճշտապահ է, հանձնարարականները կատարել է հետևողական և պատշաճ ձևով, առանձնանում է իր մարդկային բարձր որակներով, եղել է հուսալի և վստահելի աշխատող, վայելել է շրջապատի և գործընկերների հարգանքը:
Պաշտպանի կողմից միաժամանակ ներկայացվել են «Ս.Վ. Մալայանի անվան ակնաբուժական կենտրոն» ՓԲԸ-ից տրամադրված եզրակացության, ինչպես նաև «Ուիգմոր Քլինիք» ՓԲԸ-ից և «Էրեբունի» բժշկական կենտրոնից տրամադրված՝ Ա.Գյուրջյանի կլինիկական ախտորոշումների քաղվածքների պատճենները:
Համաձայն «16.01.2025թ.» թվագրմամբ «Ուիգմոր Քլինիք» ՓԲԸ-ից ստացված «Եզրակացության» մեջ որպես եզրափակիչ ախտորոշում նշված է. «ՕՍ սկսվող բարդացած կատարակտ, երկրորդային բ/ա գլաուկոմա I a, ցանցենու կենտրոնական խորիոռետինալ դիստրոֆիա»:
Համաձայն «28.06.2023թ.» թվագրմամբ նույն ՓԲԸ-ից ստացված քաղվածքի «Եզրակացության». «/Աբրահամ Գյուրջյանի/ Սրտի խոռոչները լայնացած չեն: ՁՓ կոնցենտրիկ հիպերտրոֆիա: Միջփորոքային միջնապատի բազալ, մինջին սեգմենտների հիպո-ա-կինեզ: Ձախ փորոքի կծկողականությունը իջած է՝ 40-45%: Միտրալ փականի անբավարարություն 0 աստ: Եռփեղկ փականի անբավարարության 0 աստ, Pmax-15mm HG: Դիաստոլիկ դիսֆունկցիա տիպ 1: Ստորին սիներակը կոլապսվում է: Պերիկարդի խոռոչում և պլևրալ սինուսներում հեղուկ չկա: Աորտան տեսանելի բոլոր հատվածներում նորմայի սահմաններում:
Համաձայն «12.06.2023թ.» թվագրմամբ «Էրեբունի» ԲԿ-ից ստացված քաղվածքի «Եզրակացության». «Սինուսային ռիթմ՝ միջին ՍԿՀ-82զ/ր: Սինուսային տախիկարդիայի 1 կարճատև էպիզոդ (ՍԿՀ՝ 120-123 զ/ր): Պոլիմորֆ փորոքային էքստրասիստոլիա (5000հատ/օր), այդ թվում՝ կուպլետ 2 հատ/օր, տրիգեմինիայի 16 էպիզոդ: Եզակի վերփորոքային էքստրասիստոլիա (1 հատ/օր): Ներնախասրտային հաղորդականության անցողիկ դանդաղում (P-0.10/0.11վ): AV հաղորդականության անցողիկ դանդաղում PQ երկարումով մինչև 0.21 վրկ.:»:
Պաշտպան՝ Էմին Բեգլարյան, ՀՀ փաստաբանների պալատի փաստաբան, արտոնագիր՝ 1400:
Մեղադրյալ Աբրահամ Գյուրջյանի նկատմամբ որպես խափանման միջոց է ընտրվել բացակայելու արգելքը: Թողնել անփոփոխ մինչև դատական ակտի օրինական ուժի մեջ մտնելը:
Աբրահամ Գյուրջյանի նկատմամբ հանրային քրեական հետապնդում է հարուցվել այն բանի համար, որ նա, հանդիսանալով «Մաստեր Շին» ՍՊ ընկերության /այսուհետ նաև՝ Ընկերություն/ ավագ աշխղեկ և լինելով Ընկերության կողմից Երևան քաղաքի Ծարավ Աղբյուր փողոցի թիվ 134/4 հասցեում կառուցվող բնակելի շենքում /այսուհետ նաև՝ Շենք/ իրականացվող շինարարությունում որպես կոլեկտիվ պաշտպանության միջոցների ապահովման պատասխանատու անձ, խախտել է ՀՀ քաղաքաշինության կոմիտեի նախագահի՝ 2022 թվականի օգոստոսի 26-ի՝ թիվ 21-ն հրամանով հաստատված՝ ՀՀՇՆ 13-02-2022՝ «Անվտանգության տեխնիկա շինարարությունում» ՀՀ շինարարական նորմերի 4-րդ՝ «Անվտանգության տեխնիկայի ընդհանուր պահանջներ»-ը գլխի 13-րդ, 83-րդ և 97-րդ կետերի պահանջները, այն է՝ չի ապահովել Շենքի 1-ին հարկի հարթակի վրա «բաց» վիճակում գտնվող վերելակի հորանի բացվածքի շուրջ, որպես մշտապես գործող արտադրական վտանգավոր գործոնների ազդեցության գոտի՝ դրա սահմանագծերին պաշտպանիչ ցանկապատերի տեղադրումը կամ տախտամածով հոծ կերպով փակելը, ինչպես նաև բացվածքի եզրային հատվածներում զսպող անվտանգության համակարգերի (և) կամ ճոպանների հասանելիության համակարգերի տեղադրումը, որի արդյունքում 2023 թվականի փետրվարի 16-ին՝ ժամը 12:50-ի սահմաններում, «Մաստեր Շին» ՍՊԸ-ում փականագործի աշխատանքներ կատարող Արտակ Գևորգյանը, Շենքի պատուհանները տեղադրելու ժամանակ, առանց ամրակապման կանգնած լինելով 8,90 մետր երկարությամբ և 4,20 մետր լայնությամբ հարթակի վրա, Շենքի 1-ին հարկի վերելակի համար թողնված վերը նշված բացվածքից 3,30 մետր բարձրությունից վայր է ընկել նկուղային հարկի բետոնացված հատակին՝ ստանալով համակցված՝ գանգուղեղային, կրծքավանդակի, ողնաշարի, ձախ ստորին վերջույթի փակ բութ, ձախ վերին վերջույթի բաց բութ վնասվածքներ, որոնք էլ անմիջական պատճառ են հանդիսացել 2023 թվականի փետրվարի 22-ին Արտակ Գևորգյանի մահվան համար:
Այսինքն՝ Աբրահամ Սողոմոնի Գյուրջյանին է մեղսագրվում հանցավոր արարքի կատարում՝ նախատեսված ՀՀ քրեական օրենսգրքի 355-րդ հոդվածի 2-րդ մասով։
ՀՀ քրեական օրենսգրքի 70-րդ հոդվածի համաձայն՝ Աբրահամ Սողոմոնի Գյուրջյանի քրեական պատասխանատվությունը կամ պատիժը մեղմացնող հանգամանքներն են՝ հանցանք կատարած անձի կողմից հանցագործությամբ պատճառված վնասը կամովին հատուցելուն կամ այլ կերպ հարթելուն ուղղված գործողություն կատարելը և հանցանք կատարած լինելու պահին վերջինիս 65 տարին լրացած լինելը:
Տուժողի փոխարեն տուժող ճանաչված Արշակ Գևորգյանը, թե նախաքննության ընթացքում տրված ցուցմունքով և թե դատարանում հայտարարել է, որ Ա.Գյուրջյանն ամբողջությամբ հոգացել է իր եղբոր՝ տուժող Արտակ Գևորգյանի հողարկավորության և տապանաքարի տեղադրման հետ կապված բոլոր ծախսերը, մեղադրյալի դեմ որևէ բողոք կամ պահանջ չունի:
Համաձայնեցված պատիժը (պատժատեսակը և պատժաչափը).
Հիմք ընդունելով ՀՀ քրեական օրենսգրքի 355-րդ հոդվածի 2-րդ մասը և ղեկավարվելով ՀՀ քրեական դատավարության օրենսգրքի 460-րդ հոդվածով սահմանված կարգով՝ կողմերը համաձայնվում են մեղադրյալ Աբրահամ Սողոմոնի Գյուրջյանին մեղսագրվող արարքի համար հետևյալ պատժատեսակի և պատժաչափի վերաբերյալ՝
Աբրահամ Սողոմոնի Գյուրջյանի նկատմամբ նշանակել պատիժ՝ ազատազրկում ՀՀ քրեական օրենսգրքի 355-րդ հոդվածի 2-րդ մասով՝ 4 տարի ժամկետով և ՀՀ քրեական օրենսգրքի 84-րդ հոդվածով սահմանված կարգով պատիժը պայմանականորեն չկիրառել՝ սահմանելով փորձաշրջան 5 տարի ժամկետով՝ պարտավորեցնելով առանց դատապարտյալի վարքագծի նկատմամբ վերահսկողություն իրականացնող իրավասու մարմնի համաձայնության Հայաստանի Հանրապետության տարածքը չլքելը, ինչպես նաև բնակության վայրը փոխելու դեպքում դատապարտյալի վարքագծի նկատմամբ վերահսկողություն իրականացնող իրավասու մարմնին սեղմ ժամկետում իր նոր բնակության վայրի հասցեն հայտնելը»։
Այսպիսով, Դատարանն արձանագրում է, որ սույն գործով բանակցությունների ընթացքում կողմերը եկել են համաձայնության, ինչի վերաբերյալ կազմվել է ՀՀ քրեական դատավարության օրենսգրքի 460-րդ հոդվածի 4-րդ մասի պահանջներին բավարարող համաձայնության մասին արձանագրություն։
Միևնույն ժամանակ, գործի քննության ընթացքում ի հայտ չեն եկել այնպիսի փաստական տվյալներ, որոնք կարող էին հիմք հանդիսանալ արձանագրելու, որ մեղադրյալ Աբրահամ Գյուրջյանը համաձայնության մասին արձանագրություն հաստատելիս չի արտահայտել իր իրական կամքը և չի գիտակցել համաձայնության հետևանքները կամ համաձայնությունը կնքվել է բռնության, սպառնալիքի, հարկադրանքի այլ միջոցի ազդեցության հետևանքով։
Հետևաբար, Դատարանը գալիս է այն եզրահանգման, որ սույն գործով պետք է կայացվի մեղադրական դատավճիռ՝ դրանով նախատեսված հարցերը լուծելով ըստ համաձայնության մասին արձանագրության։
Քննության առնելով Աբրահամ Գյուրջյանի նկատմամբ ընտրված խափանման միջոց բացակայելու արգելքի հարցը՝ Դատարանը հանգում է հետևության, որ այն պետք է վերացնել դատավճիռն օրինական ուժի մեջ մտնելուց հետո:
Անդրադառնալով վարութային ծախսերի հարցին և հաշվի առնելով, որ ՀՀ քրեական դատավարության օրենսգրքի 463-րդ հոդվածի 5-րդ մասի համաձայն՝ համաձայնեցման վարույթով դատավճիռ կայացնելիս նույն օրենսգրքի 167-րդ հոդվածի 1-ին մասով նախատեսված վարույթային ծախսերը մեղադրյալից ենթակա չեն բռնագանձման, Դատարանը հանգում է հետևության, որ այդ հարցը պետք է համարել լուծված։
Միաժամանակ Դատարանն արձանագրում է, որ սույն գործով առկա չեն վնասի հատուցման ապահովման կամ քրեադատավարական հարկադրանքի այլ միջոցներ, ինչպես նաև՝ հանցագործությամբ պատճառված վնասները հատուցելու պահանջ, հետևաբար այդ հարցերը ևս պետք է համարվեն լուծված:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33-34-րդ, 99-100-րդ, 167-րդ, 347-350-րդ, 364-րդ, 458-464-րդ հոդվածներով՝ Դատարանը

ՎՃՌԵՑ

Աբրահամ Սողոմոնի Գյուրջյանին մեղավոր ճանաչել ՀՀ քրեական օրենսգրքի 355-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ պատիժ նշանակել ազատազրկումը՝ 4 (չորս) տարի ժամկետով։
ՀՀ քրեական օրենսգրքի 84-րդ հոդվածի կարգով՝ Աբրահամ Սողոմոնի Գյուրջյանի նկատմամբ նշանակված պատիժը պայմանականորեն չկիրառել՝ սահմանելով փորձաշրջան՝ 5 (հինգ) տարի ժամկետով։
Փորձաշրջանի ընթացքում Աբրահամ Սողոմոնի Գյուրջյանի նկատմամբ սահմանել պարտականություններ՝ առանց վերահսկողություն իրականացնող իրավասու մարմնի համաձայնության Հայաստանի Հանրապետության տարածքը չլքել և բնակության վայրը փոխելու դեպքում վերահսկողություն իրականացնող իրավասու մարմնին սեղմ ժամկետում հայտնել իր նոր բնակության վայրի հասցեն։
Աբրահամ Սողոմոնի Գյուրջյանի վարքագծի նկատմամբ վերահսկողությունը հանձնարարել ՀՀ արդարադատության նախարարության պրոբացիայի ծառայության բնակության վայրի ստորաբաժանմանը:
Աբրահամ Սողոմոնի Գյուրջյանի նկատմամբ որպես խափանման միջոց կիրառված բացակայելու արգելքը դատավճիռն օրինական ուժի մեջ մտնելուց հետո վերացնել:
Վարույթային ծախսերի և մյուս վերաբերելի հարցերը համարել լուծված։
Դատավճիռը կարող է բողոքարկվել ՀՀ վերաքննիչ քրեական դատարան` ստանալու օրվանից հետո մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերով):


ԴԱՏԱՎՈՐ` Հ.ԱՎԱԳՅԱՆ