ԵԴ1/3947/01/24




Ո Ր Ո Շ Ու Մ
ՔՐԵԱԿԱՆ ՀԵՏԱՊՆԴՈւՄԸ ԴԱԴԱՐԵՑՆԵԼՈւ ԵՎ ՔՐԵԱԿԱՆ ԳՈՐԾԻ ՎԱՐՈւՅԹԸ ԿԱՐՃԵԼՈւ ՄԻՋՆՈՐԴՈՒԹՅՈՒՆԸ ՔՆՆՈՒԹՅԱՆ ԱՌՆԵԼՈՒ ՎԵՐԱԲԵՐՅԱԼ

Երևան քաղաքի առաջին ատյանի ընդհանուր իրավասության քրեական դատարանը.

Նախագահությամբ՝ դատավոր Ն.Բաղդասարյանի

Քարտուղարությամբ՝ Ա. Սարգսյանի

Մասնակցությամբ`
Հանրային մեղադրող Օ.Սիրեկանյանի,
Մեղադրյալ Գ. Սարիբեկյանի,
Պաշտպան Ռ.Սիրեկանյանի
Տուժողներ Ն.Գրիգորյանի,
Տ.Մինասյանի,


2025 թվականի դեկտեմբերի 24-ին, Երևան քաղաքում, դռնբաց դատական նիստում քննության առնելով քրեական գործն ըստ մեղադրանքի`
Գևորգ Արմենի Սարիբեկյանի՝ ծնված 1999 թվականի հունիսի 16-ին Գյումրի քաղաքում, ազգությամբ հայ, ՀՀ քաղաքացի, թերի բարձրագույն կրթությամբ, ամուրի, նախկինում չդատված, հաշվառված և փաստացի բնակվել է՝ ք. Գյումրի, Կոմիտերների 1-ին նրբանցք, 9-րդ տուն հասցեում, մեղադրանք է ներկայացվել երկու դրվագով ՀՀ քրեական օրենսգրքի 255-րդ հոդվածի 1-ին մասով, որպես խափանման միջոց ընտրված է բացակայելու արգելքը,

Պ Ա Ր Զ Ե Ց՝
17.08.2024թ. ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնում կազմվել է արձանագրություն՝ ՀՀ քրեական օրենսգրքի 255-րդ հոդվածի 1-ին մասով թիվ 17119024 քրեական վարույթը նախաձեռնելու մասին։
17.08.2024թ. Նարինե Ռուբիկի Գրիգորյանը թիվ 17119024 քրեական վարույթով ճանաչվել է տուժող։
22.08.2024թ. ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնում կազմվել է արձանագրություն՝ ՀՀ քրեական օրենսգրքի 255-րդ հոդվածի 1-ին մասով թիվ 17-1010-24 քրեական վարույթը նախաձեռնելու մասին։
Տիգրանուհի Լևոնի Մինասյանը թիվ 17-1010-24 քրեական վարույթով ճանաչվել է տուժող։
18.10.2024թ. թիվ 17-1010-24 քրեական վարույթը միացվել է թիվ 17119024 քրեական վարույթին:
19.11.2024թ. հսկող դատախազի կողմից որոշում է կայացվել թիվ 17119024 քրեական վարույթով Գևորգ Արմենի Սարիբեկյանի նկատմամբ ՀՀ քրեական օրենսգրքի 255-րդ հոդվածի 1-ին մասով երկու դրվագով հանրային քրեական հետապնդում հարուցելու մասին, այն բանի համար, որ նա՝ հափշտակություն կատարելու նախնական դիտավորությամբ, խաբեության եղանակով, կատարել է հափշտակություններ.
Այսպես՝
Գևորգ Արմենի Սարիբեկյանը, ուրիշի գույքը խաբեությամբ հափշտակելու ուղղակի դիտավորությամբ, 2024 թվականի նախաքննությամբ չպարզված օրը, «Facebook» սոցիալական էլեկտրոնային հարթակում «ID Electronix» գրառմամբ էջով տեղադրել է կենցաղային իրեր վաճառելու վերաբերյալ իրականությանը չհամապատասխանող հայտարարություն, ինչը տեսնելով Նարինե Ռուբիկի Գրիգորյանը «Facebook» սոցիալական կայքէջով 2024 թվականի օգոստոսի 11-ին կապ է հաստատել Գևորգ Արմենի Սարիբեկյանի հետ և պայմանավորվածություն ձեռք բերել վերջինիցս կենցաղային իրեր գնելու վերաբերյալ, ինչի արդյուքնում Նարինե Գրիգորյանը 2024 թվականի օգոստոսի 12-ին՝ ժամը 18։44-ին, իր՝ «Իդրամ» էլեկտրոնային դրամապանակից կատարել է 10.000 ՀՀ դրամի փոխանցում Գևորգ Սարիբեկյանի կողմից շահագործվող Ռայա Խաչատուրի Սարիբեկյանին պատկանող 4454280001360339 բանկային քարտին։ Այնուհետև 2024 թվականի օգոստոսի 13-ին՝ ժամը 09։28-ին, նույն եղանակով Ռայա Խաչատուրի Սարիբեկյանին պատկանող 4454280001360339 բանկային քարտի հաշվեհամարին է փոխանցել կրկին 10.000 ՀՀ դրամ գումար։ Գևորգ Սարիբեկյանը վերջինիս տեղեկացրել է, որ կաթսաները կստանա 2024 թվականի օգոստոսի 15-ին՝ «ՀայՓոստ» ՓԲ ընկերության միջոցով, ինչը Նարինե Ռուբիկի Գրիգորյանը չի ստացել, այսինքն Գևորգ Սարիբեկյանը խաբեության եղանակով հափշտակել է վերջինիս պատկանող 20.000 ՀՀ դրամ գումարը՝ պատճառելով նույնքան գույքային վնաս:
Բացի այդ, Գևորգ Արմենի Սարիբեկյանը, ուրիշի գույքը խաբեությամբ հափշտակելու ուղղակի դիտավորությամբ, 2024 թվականի նախաքննությամբ չպարզված օրը, «Facebook» սոցիալական էլեկտրոնային հարթակում «ID Electronix» գրառմամաբ էջով տեղադրել է կենցաղային իրեր վաճառելու վերաբերյալ իրականությանը չհամապատասխանող հայտարարություն, ինչը տեսնելով, Տիգրանուհի Լևոնի Մինասյանը «Facebook» սոցիալական էջով 2024 թվականի օգոստոսի 15-ին կապ է հաստատել Գևորգ Արմենի Սարիբեկյանի հետ, որից հետո պայմանավորվածություն է ձեռք բերել վերջինիցս կենցաղային իրեր գնելու վերաբերյալ։ Տիգրանուհի Լևոնի Մինասյանը 2024 թվականի օգոստոսի 15-ին՝ ժամը 16։30-ին, վճարային տերմինալի միջոցով կատարել է 10.000 ՀՀ դրամի փոխանցում Գևորգ Սարիբեկյանի կողմից շահագործվող Ռայա Խաչատուրի Սարիբեկյանին պատկանող 2470097634150000 հաշվեհամարին։ Գևորգ Սարիբեկյանը վերջինիս տեղեկացրել է, որ կաթսաները կստանա 2024 թվականի օգոստոսի 20-ին, սակայն Տիգրանուհի Մինասյանը այդպես էլ չի ստացել, այսինքն Գևորգ Սարիբեկյանը խաբեության եղանակով հափշտակել է վերջինիս պատկանող 10.000 ՀՀ դրամ գումարը՝ պատճառելով նույնքան գույքային վնաս։
22.11.2024թ. թիվ 17119024 քրեական վարույթով Գևորգ Արմենի Սարիբեկյանի նկատմամբ որպես խափանման միջոց է կիրառվել բացակայելու արգելքը։
27․12․2024թ․ թիվ 17119024 քրեական վարույթը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարան, և դրան շնորհվել է ԵԴ1/3947/01/24 հերթական համարը: Քրեական գործը մակագրվել և 30.12.2024թ. հանձնվել է նույն դատարանի դատավոր Ն. Բաղդասարյանիս։
«Վարույթ ստանձնելու և նախնական դատալսումներ նշանակելու մասին» դատարանի 30.12.2024թ. որոշմամբ նշանակվել են նախնական դատալսումներ:
Դատարան է ստացվել տուժող Նարինե Գրիգորյանի դիմումը, որով վերջինս հայտնել է, որ որևէ բողոք և պահանջ չունի մեղադրյալից, հաշտվել է նրա հետ, չի առրկում, որ քրեական գործի վարույթը կարճվի, հաշտությունը կամավոր է:
Տուժող Տիգրանուհի Մինասյանը դատական նիստի ընթացքում կատարված հեռախոսազանգի միջոցով հայտնել է, որ հատուցվել է իրեն պատճառված վնասը, չի առարկում, որպեսզի հաշտության հիմքով քրեական գործի վարույթը կարճվի, հաշտությունը կամավոր է:
Պաշտպան Ռ.Սիրեկանյանը հայտնել է, որ տուժողներին պատճառված վնասը հատուցվել է, տուժողները հաշտվել են մեղադրյալի հետ, միջնորդել է քրեական գործի վարույթը կարճել՝ հաշտության հիմքով:
Մեղադրյալ Գ.Սարիբեկյանը հայտնել է, որ հաշտվել է տուժողների հետ, համաձայն է, որպեսզի քրեական հետապնդումը դադարեցվի հաշտության հիմքով:
Հանրային մեղադրող Օ.Սիրեկանյանը միջնորդության դեմ չի առարկել:

Դատարանի պատճառաբանություններն ու եզրահանգումը.
Քննարկելով ներկայացված միջնորդությունը, լսելով կողմերի դիրքորոշումները դրա վերաբերյալ՝ դատարանը գտնում է, որ մեղադրյալ Գևորգ Սարիբեկյանի նկատմամբ երկու դրվագով՝ ՀՀ քրեական օրենսգրքի 255-րդ հոդվածի 1-ին մասով քրեական հետապնդումը ենթակա է դադարեցման և թիվ ԵԴ1/3947/01/24 քրեական գործի վարույթը՝ կարճման՝ ՀՀ քրեական օրենսգրքի 82-րդ հոդվածով սահմանված տուժողի և հանցանք կատարած անձի հաշտության հիմքով՝ հետևյալ պատճառաբանությամբ.
ՀՀ քրեական օրենսգրքի 82-րդ հոդվածի 1-ին մասի համաձայն՝
«1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ»:
Վերը մեջբերված նորմի վերլուծությունից երևում է, որ տուժողի հետ հաշտության հիմքով անձին քրեական պատասխանատվությունից ազատելը համապատասխան պայմանների առկայության դեպքում իմպերատիվ բնույթ է կրում, բացի այդ քննարկվող հիմքը կիրառելի է ոչ միայն ոչ մեծ, այլ նաև միջին ծանրության հանցագործությունների նկատմամբ, ինչպես նաև տուժողին պատճառված վնասը հատուցելու կամ այլ կերպ հարթելու վերաբերյալ պայման նախատեսված չէ։
ՀՀ քրեական դատավարության օրենսգրքի 12-րդ հոդվածի համաձայն.
«1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(…)
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից.
(…)
4. Սույն հոդվածի 1-ին մաuի 11-14-րդ կետերով նախատեսված հանգամանքների առկայությունը քրեական հետապնդումը բացառող չէ, եթե անձն առարկում է դրա դեմ այն հիմքով, որ չի կատարել իրեն մեղսագրվող արարքը: (…)»։
Նույն օրենսգրքի 13-րդ հոդվածի 1-ին մասի 3-րդ կետի համաձայն.
«Քրեական վարույթը ենթակա է կարճման, եթե` (…) մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները.»։
ՀՀ քրեական դատավարության օրենսգրքի 315-րդ հոդվածի համաձայն`
«1. Սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:
2. Քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
3. Քրեական հետապնդումը դադարեցնելու և վարույթը կարճելու մասին որոշման պատճենն ուղարկվում է հանրային մեղադրողին և վարույթի մասնավոր մասնակիցներին:»։
Դատարանն արձանագրում է, որ Գևորգ Սարիբեկյանին մեղսագրվում է երկու դրվագով ՀՀ քրեական օրենսգրքի 255-րդ հոդվածի 1-ին մասով նախատեսված հանցանքների կատարում, որոնց համար նախատեսված ազատազրկման ձևով պատժի առավելագույն ժամկետը չի գերազանցում 2 /երկու/ տարի ժամկետով ազատազրկումը, հետևաբար՝ նշված հանցանքները դասվում են ոչ մեծ ծանրության հանցագործությունների թվին, տուժողներ Ն.Գրիգորյանը և Տ.Մինասյանը հայտնել են, որ հաշտվել են միմյանց հետ, հետևաբար առկա է ինքնուրույն և ազատ կամարտահայտության վրա հիմնված փոխադարձ համաձայնություն։ Մեղադրյալ Գևորգ Սարիբեկյանը նախկինում դատված չի եղել, ՀՀ քրեական օրենսգրքի 3-րդ հոդվածի 1-ին մասի 2-րդ կետի համատեքստում համարվում է առաջին անգամ հանցանք կատարած անձ, ինչպես նաև առկա չեն նույն հիմքով քրեական պատասխանատվությունից ազատված լինելու վերաբերյալ տվյալներ: Այսինքն, սույն գործով առկա է ՀՀ քրեական օրենսգրքի 82-րդ հոդվածի 1-ին մասով նախատեսված՝ տուժողի և հանցանք կատարած անձի հաշտության հիմքով մեղադրյալ Գևորգ Սարիբեկյանին երկու դրվագով ՀՀ քրեական օրենսգրքի 255-րդ հոդվածի 1-ին մասով նախատեսված հանցանքներ կատարելու համար քրեական պատասխանատվությունից ազատելու հիմքը, որը դասվում է քրեական հետապնդումը բացառող հանգամանքների շարքին։
Վերոգրյալի հիման վրա՝ դատարանը գտնում է, որ մեղադրյալ Գևորգ Սարիբեկյանին պետք է ազատել երկու դրվագով ՀՀ քրեական օրենսգրքի 255-րդ հոդվածի 1-ին մասով նախատեսված քրեական պատասխանատվությունից՝ ՀՀ քրեական օրենսգրքի 82-րդ հոդվածի 1-ին մասի հիմքով, նրա նկատմամբ քրեական հետապնդումը դադարեցնել և քրեական գործի վարույթը կարճել:
Անդրադառնալով մեղադրյալի նկատմամբ կիրառված խափանման միջոցի հարցին՝ դատարանը գտնում է, որ նրա նկատմամբ որպես խափանման միջոց կիրառված բացակայելու արգելքը պետք է վերացնել:
Քննարկելով ապացույցների պահպանման և տնօրինման հարցը, ղեկավարվելով ՀՀ քրեական դատավարության օրենսգրքի 99-րդ հոդվածով՝ դատարանը գտնում է, որ արտավարութային փաստաթուղթ ճանաչված փաստաթղթերի պատճենները, պետք է պահել վարույթի նյութերի հետ՝ դրանք պահելու ամբողջ ընթացքում:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով, 270-րդ, 315-րդ հոդվածներով՝ դատարանը.

Ո Ր Ո Շ Ե Ց՝
Միջնորդությունը բավարարել:
Մեղադրյալ Գևորգ Արմենի Սարիբեկյանի նկատմամբ երկու դրվագով ՀՀ քրեական օրենսգրքի 255-րդ հոդվածի 1-ին մասով քրեական հետապնդումը դադարեցնել՝ տուժողների և հանցանք կատարած անձի հաշտության հիմքով:
Խափանման միջոց բացակայելու արգելքը վերացնել:
Արտավարութային փաստաթուղթ ճանաչված փաստաթղթերի պատճենները պահել վարույթի նյութերի հետ՝ դրանք պահելու ամբողջ ընթացքում:
Թիվ ԵԴ1/3947/01/24 /17119024/քրեական գործի վարույթը կարճել:
Սույն որոշումը կարող է բողոքարկվել ՀՀ վերաքննիչ քրեական դատարան՝ ստանալու օրվանից՝ մեկամսյա ժամկետում:


ԴԱՏԱՎՈՐ՝ Ն. Ռ. ԲԱՂԴԱՍԱՐՅԱՆ