Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2025 թվականի հունվարի 17-ին Երևան քաղաքում

Երևան քաղաքի առաջին ատյանի ընդհանուր իրավասության քրեական
դատարանը (այսուհետ նաև` Դատարան)` հետևյալ կազմով

Նախագահությամբ դատավոր՝ Տիգրան Ոսկանյանի
Քարտուղարությամբ՝ Սյուզաննա Բադալյանի

Մասնակցությամբ
Մեղադրող՝ Դավիթ Թադևոսյանի
Մեղադրյալ` Ավետիս Զաքարյանի

Դռնբաց դատական նիստում քննեց քրեական գործն ըստ մեղադրանքի Ավետիս Արտաշեսի Զաքարյանի (ծնված՝ 18.08.1991 թվականին, ազգությամբ հայ, ՀՀ քաղաքացի, միջնակարգ կրթությամբ, ըստ բանավոր հայտարարության՝ աշխատում է որպես բանվոր, ամուսնացած, խնամքին անչափահաս երեխա, դատվածություն ունեցող, հաշվառված և փաստացի բնակվող՝ Արարատի մարզ, գյուղ Մարմարաշեն, 9-րդ փողոց, 10-րդ տուն հասցեում)՝ ՀՀ քրեական օրենսգրքի 344-րդ հոդվածի 2-րդ մասով,
1.Գործի դատավարական նախապատմությունը.
2024 թվականի հոկտեմբերի 25-ին՝ ՀՀ քննչական կոմիտեի ՃՏՀ քննության բաժնում նախաձեռնվել է թիվ 60655524 քրեական վարույթը:
2024 թվականի դեկտեմբերի 09-ին՝ Երևան քաղաքի Շենգավիթ վարչական շրջանի դատախազության դատախազ Դ.Թադևոսյանի որոշմամբ՝ Ավետիս Արտաշեսի Զաքարյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
2024 թվականի դեկտեմբերի 10-ին՝ ՀՀ քննչական կոմիտեի ՃՏՀ քննության բաժնի քննիչ Հ.Կիրակոսյանի որոշմամբ՝ մեղադրյալ Ավետիս Արտաշեսի Զաքարյանի նկատմամբ կիրառվել է այլընտրանքային խափանման միջոց՝ բացակայելու արգելքը:
Թիվ 60655524 քրեական վարույթի նյութերն ըստ մեղադրանքի Ավետիս Արտաշեսի Զաքարյանի՝ ՀՀ քրեական օրենսգրքի 344-րդ հոդվածի 2-րդ մասով, 2024 թվականի դեկտեմբերի 26-ի գրությամբ Երևան քաղաքի Շենգավիթ վարչական շրջանի դատախազությունից ուղարկվել է Երևան քաղաքի առաջին ատյանի ընդհանուր իրավասության քրեական դատարան, մուտքագրվել է 27.12.2024 թվականին և նույն օրն էլ համակարգչային ծրագրի միջոցով իրականացվող գործերի բաշխմամբ, գործը մակագրվել է դատավոր Տիգրան Ոսկանյանին:
Քրեական գործին շնորհվել է թիվ ԵԴ1/3955/01/24 համարը:
Քրեական գործը դատավորին հանձնվել է 2024 թվականի դեկտեմբերի 30-ին։
2025 թվականի հունվարի 03-ին որոշում է կայացվել Ավետիս Արտաշեսի Զաքարյանի վերաբերյալ ՀՀ քրեական օրենսգրքի 344-րդ հոդվածի 2-րդ մասով թիվ ԵԴ1/3955/01/24 քրեական գործը վարույթ ստանձնելու և նախնական դատալսումների նշանակելու մասին:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ մինչդատական վարույթի ընթացքում ընտրված խափանման միջոցը` բացակայելու արգելքը, թողնել անփոփոխ:
2. Մեղադրանքի փաստական նկարագրությունը.
Ավետիս Արտաշեսի Զաքարյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հանրային քրեական հետապնդում է հարուցվել այն բանի համար, որ նա, չունենալով տրանսպորտային միջոցներ վարելու իրավունք, ոչ սթափ վիճակում վարել է տրանսպորտային միջոց:
Այսպես.
Ավետիս Զաքարյանը, օրենքով սահմանված կարգով 2022 թվականի հոկտեմբերի 08-ից 1 տարի ժամկետով զրկված լինելով տրանսպորտային միջոցներ վարելու իրավունքից, և զրկման ժամկետը լրանալուց հետո սահմանված կարգով այն չվերականգնելով, 2024 թվականի հոկտեմբերի 07-ին՝ ժամը 01:45-ի սահմաններում, գտնվելով ոչ սթափ վիճակում՝ մեկ լիտր արտաշնչած օդի մեջ 0.363 մգ/լ մաքուր ալկոհոլի պարունակությամբ, Երևան քաղաքի Թամանցիների փողոցում վարել է «Opel» մակնիշի, 37 MQ 959 հաշվառման համարանիշի տրանսպորտային միջոցը:
3.Դատաքննությամբ հետազոտված թույլատրելի ապացույցները.
Մեղադրյալ Ավետիս Արտաշեսի Զաքարյանը հիմնական դատալսումների ժամանակ հայտնեց, որ ընդունում է իրեն առաջադրված մեղադրանքը և զղջում կատարած արարքի համար:
(Տե՛ս դատական նիստի արձանագրություն)
Հետազոտվել են.
Վարչական իրավախախտման վերաբերյալ թիվ 8180165151 արձանագրությունը, համաձայն որի՝ 2022 թվականի հոկտեմբերի 08-ին՝ ժամը 01:47-ին, Երևան քաղաքի Թաիրով 14 հասցեում ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 2-րդ վաշտի պարեկ Ռաֆիկ Պողոսյանի /կրծքանշան թիվ 06541/ կողմից կազմվել է վարչական իրավախախտման վերաբերյալ թիվ 8180165151 արձանագրությունը, համաձայն որի՝ Ավետիս Արտաշեսի Զաքարյանը (ծնված՝ 18.08.1991թ.), ժամը՝ 01:20-ին Երևան քաղաքի Թամանցիների փողոցում՝ ոչ սթափ վիճակում վարել է Օպել մակնիշի 36 TA 607 հաշվառման համարանիշի տրանսպորտային միջոցը:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է հասցեատերը հրաժարվում է ստորագրելուց և բացատրություն տալուց գրառումը:
Նույն օրը կայացված թիվ 8180165151 որոշման համաձայն Ավետիս Զաքարյանը 1 (մեկ) տարի ժամկետով զրկվել է տրանսպորտային միջոցներ վարելու իրավունքից:
Որոշման պատճենը և կատարման կարգի մասին քաղվածքն ստացա հատվածում առկա է Հասցեատերը հրաժարվել է որոշման օրինակը ստանալուց գրառումը:
(Տե՛ս դատական նիստի արձանագրություն, գ.թ. 8)
Ալկոհոլի պարունակության ստուգման կտրոնի պատճենը, համաձայն որի՝ ստուգաչափման սարքի համարն է՝ 91100950, զննման համարը՝ 00769, զննման ամսաթիվը՝ 08.10.2022թ., զննման ժամը՝ 01:24:00, վերջին ստուգաչափման ամսաթիվը՝ 27.06.2022թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.590մգ/լ, վարորդի անունն է՝ Ավետիս, ազգանունը՝ Զաքարյան, տրանսպորտային միջոցի համարանիշը՝ 36 TA 607, Վ/Վ՝ RF461837, Պ/Ծ ազգանունը՝ Գրիգորյան, կրծքանշանի համարը՝ 09165, ստորաբաժանում՝ 4-րդ գումարտակ, 2-րդ վաշտ:
(Տե՛ս դատական նիստի արձանագրություն, գ.թ. 9)
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ից կողմից տրված թիվ 073344 ստուգաչափման վկայականի պատճենը, համաձայն որի՝ վկայականը ուժի մեջ է 2022 թվականի հունիսի 27-ից մինչև 2023 թվականի հունիսի 27-ը, ստուգաչափման սարքի գործարանային համարն է 91100950, տեսակը՝ Jupiter X/RP, չափման տիրույթը՝ 0.00÷1.200մգ/լ÷1.920մգ/լ, ճշտության դասը, կարգը /սխալանքը/ ±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Ա.Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
(Տե՛ս դատական նիստի արձանագրություն, գ.թ. 10-11)
Վարչական իրավախախտման վերաբերյալ թիվ 8180412950 արձանագրությունը, համաձայն որի՝ 2024 թվականի հոկտեմբերի 07-ին՝ ժամը 01:55-ին, Երևան քաղաքի Թամանցիների փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի կրտսեր պարեկ Ռաֆիկ Աթայանի /կրծքանշան թիվ 05425/ կողմից կազմվել է վարչական իրավախախտման վերաբերյալ թիվ 8180412950 արձանագրությունը, համաձայն որի՝ Ավետիս Արտաշեսի Զաքարյանը (ծնված՝ 18.08.1991թ.) չունենալով տրանսպորտային միջոցներ վարելու իրավունք՝ ժամը 01:45-ին Երևան քաղաքի Թամանցիների փողոցում՝ ոչ սթափ վիճակում վարել է Օպել մակնիշի 37 MQ 959 հաշվառման համարանիշի տրանսպորտային միջոցը:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
(Տե՛ս դատական նիստի արձանագրություն, գ.թ. 4)
Ալկոհոլի պարունակության ստուգման կտրոնի պատճենը, համաձայն որի՝ ստուգաչափման սարքի համարն է՝ 91100997, զննման համարը՝ 04367, զննման ամսաթիվը՝ 07.10.2024թ., զննման ժամը՝ 01:49:27, վերջին ստուգաչափման ամսաթիվը՝ 23.09.2024թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.363 մգ/լ, վարորդի անունն է՝ Ավետիս, ազգանունը՝ Զաքարյան, տրանսպորտային միջոցի համարանիշը՝ 37 MQ 959, Վ/Վ RF461837, Պ/Ծ ազգանունը՝ Աթոյան, կրծքանշանի համարը՝ 05425, ստորաբաժանում՝ 2-րդ գումարտակ, 3-րդ վաշտ:
(Տե՛ս դատական նիստի արձանագրություն, գ.թ. 5)
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ից կողմից տրված թիվ 135703 ստուգաչափման վկայականի պատճենը, համաձայն որի՝ վկայականը ուժի մեջ է 2024 թվականի սեպտեմբերի 23-ից մինչև 2025 թվականի սեպտեմբերի 23-ը, ստուգաչափման սարքի գործարանային համարն է 91100997, տեսակը՝ Jupiter X/RP, չափման տիրույթը՝ 0.00÷2.000մգ/լ, ճշտության դասը, կարգը /սխալանքը/ ±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Ա.Մանուկյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
(Տե՛ս դատական նիստի արձանագրություն, գ.թ. 6)
ՀՀ ՆԳՆ ոստիկանության Ճանապարհային ոստիկանություն ծառայության էլեկտրոնային ռեգիստրից արտատպված տեղեկատվությունը, համաձայն որի՝ Ավետիս Արտաշեսի Զաքարյանի անվամբ հաշվառված թիվ RF461837 վարորդական վկայականը գտնվում է զրկված վիճակում, սկիզբ՝ 08.10.2022թ., ավարտ՝ 09.10.2023թ.:
(Տե՛ս դատական նիստի արձանագրություն, գ.թ. 7)
Զննում կատարելու մասին 06.12.2024 թվականի արձանագրությունը:
(Տե՛ս դատական նիստի արձանագրություն, գ.թ. 17-18)
Արտավարութային փաստաթուղթ ճանաչելու մասին 06.12.2024 թվականի արձանագրությունը:
(Տե՛ս դատական նիստի արձանագրություն, գ.թ. 19-20)
4.Դատարանի փաստական վերլուծությունները և Դատարանի կողմից հաստատված փաստական հանգամանքները:
Հետազոտված ապացույցների հիման վրա դատարանի կողմից հաստատված են համարվում հետևյալ փաստական հանգամանքները.
Ավետիս Արտաշեսի Զաքարյանը, օրենքով սահմանված կարգով 2022 թվականի հոկտեմբերի 08-ից 1 տարի ժամկետով զրկված լինելով տրանսպորտային միջոցներ վարելու իրավունքից, և զրկման ժամկետը լրանալուց հետո սահմանված կարգով այն չվերականգնելով, 2024 թվականի հոկտեմբերի 07-ին՝ ժամը 01:45-ի սահմաններում, գտնվելով ոչ սթափ վիճակում՝ մեկ լիտր արտաշնչած օդի մեջ 0.363 մգ/լ մաքուր ալկոհոլի պարունակությամբ, Երևան քաղաքի Թամանցիների փողոցում վարել է «Opel» մակնիշի, 37 MQ 959 հաշվառման համարանիշի տրանսպորտային միջոցը:
5.Դատարանի իրավական վերլուծությունը.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Ավետիս Արտաշեսի Զաքարյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Ավետիս Արտաշեսի Զաքարյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը հաստատված համարելով հանցագործության և դրա կատարման մեջ Ավետիս Արտաշեսի Զաքարյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
ՀՀ քրեական դատավարության օրենսգրքի 348-րդ հոդվածի համաձայն՝ ի թիվս այլի դատավճռում պետք է շարադրվեն հետևյալ հարցերի պատասխանները․
-ապացուցված են արդյո՞ք դատապարտված մեղադրյալի պատասխանատվությունը և պատիժը մեղմացնող կամ ծանրացնող հանգամանքները.
-ինչ պատիժ պետք է նշանակվի դատապարտված մեղադրյալի նկատմամբ.
-դատապարտված մեղադրյալը արդյո՞ք պետք է կրի իր նկատմամբ նշանակված պատիժը։
Նշված հարցերի լուծման ընթացքում դատարանը պետք է ղեկավարվի ՀՀ քրեական օրենսգրքի Ընդհանուր մասի մի շարք դրույթներով:
ՀՀ քրեական օրենսգրքի 7-րդ հոդվածի համաձայն՝ «1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը»:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»:
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները»:
Դատարանի համոզմամբ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Հետևաբար, կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 55-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից:
Դատարանը արձանագրում է, որ սույն քրեական գործով լրացուցիչ դատալսումների ընթացքում պատժի հարցերի քննարկման փուլում հանրային մեղադրողը միջնորդեց Ավետիս Արտաշեսի Զաքարյանի նկատմամբ ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարման համար որպես պատիժ նշանակել հանրային աշխատանքներ: Մեղադրյալը հայտնեց, որ համաձայն է հանրային աշխատանքներ կատարելուն:
ՀՀ քրեական օրենսգրքի 344-րդ հոդվածի 2-րդ մասի համաձայն՝
«2. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված կամ տրանսպորտային միջոց վարելու իրավունք չունեցող անձի կողմից հարբած (ոչ սթափ) վիճակում տրանսպորտային միջոց վարելը կամ այդ անձի կողմից սթափության վիճակի զննություն անցնելուց հրաժարվելը կամ խուսափելը`
պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:»:
ՀՀ քրեական օրենսգրքի 60-րդ հոդվածի համաձայն՝
«1. Հանրային աշխատանքները դատարանի նշանակած և իրավասու մարմնի որոշած վայրում չվարձատրվող, դատապարտյալի ուսումնառությունից կամ աշխատանքից ազատ ժամանակահատվածում նրա կողմից հանրության համար օգտակար այնպիսի աշխատանքների կատարումն է, որոնք չեն վտանգում նրա ֆիզիկական կամ հոգեկան առողջությունը։
2. Հանրային աշխատանքները դատապարտյալի համաձայնությամբ ոչ ավելի, քան օրական 4 ժամ տևողությամբ սահմանվում են ոչ մեծ և միջին ծանրության հանցագործությունների համար՝ 60-270 ժամ տևողությամբ:
3. Հանրային աշխատանքների նվազագույն տևողությունը սույն օրենսգրքով նախատեսված դեպքերում կարող է պակաս լինել 60 ժամից:
4. Հանրային աշխատանքները կարող են նշանակվել սույն օրենսգրքի Հատուկ մասով, ինչպես նաև սույն օրենսգրքի 59-րդ հոդվածի 8-րդ մասի 2-րդ կետով նախատեսված դեպքերում։
5. Հանրային աշխատանքներ չեն նշանակվում դատավճիռ կայացնելու պահին 15 տարին չլրացած անչափահասի, ինչպես նաև զինվորական ծառայության մեջ գտնվող անձի նկատմամբ:
(...)»:
Վերոգրյալի հաշվառմամբ՝ Դատարանը, որպես մեղադրյալ Ավետիս Արտաշեսի Զաքարյանի անձը բնութագրող, պատասխանատվությունը և պատիժը մեղմացնող հանգամանքներ է արձանագրում՝ մեղքն ընդունելը, կատարածի համար զղջալը, խնամքին անչափահաս երեխայի առկայությունը:
Մեղադրյալի պատասխանատվությունը և պատիժը ծանրացնող հանգամանքների վերաբերյալ Դատարանն արձանագրում է հետևյալը.
ՀՀ քրեական օրենսգրքի 71-րդ հոդվածի համաձայն՝
«1. Քրեական պատասխանատվությունը կամ պատիժը ծանրացնող հանգամանքներ են՝
1) հանցանքը դատվածություն ունեցող անձի կողմից կատարելը,
(…)»:
-ըստ «ԷԿԵՆԳ» ՓԲԸ փոխգործելության հարթակի միջոցով 17.01.2025 թվականին ստացված դատվածության և հետախուզման առկայության ձև 8 տեղեկանքի՝ Ավետիս Արտաշեսի Զաքարյանը Երևան քաղաքի առաջին ատյանի ընդհանուր իրավասության քրեական դատարանի 24.07.2024 թվականի դատավճռով դատապարտվել է տուգանքի՝ 375.000 (երեք հարյուր յոթանասունհինգ հազար) ՀՀ դրամի չափով,
-ըստ «Դատալեքս» դատական տեղեկատվական համակարգից արտատպված թիվ ԵԴ1/1186/01/24 քրեական գործի՝ Ավետիս Արտաշեսի Զաքարյանի վերաբերյալ Երևան քաղաքի առաջին ատյանի ընդհանուր իրավասության քրեական դատարանի 24.07.2024 թվականի դատավճիռը 12.09.2024 թվականին ուղարկվել է կատարման,
- ըստ ՀՀ ԱՆ պրոբացիայի ծառայության Արարատի մարզային մարմնի պետի պարտականությունների ժամանակավոր կատարող Կ.Միրզոյանի կողմից Դատարանին հասցեագրած գրության՝ Ավետիս Արտաշեսի Զաքարյանի վերաբերյալ թիվ ԵԴ1/1186/01/24 գործով 2024 թվականի հուլիսի 24-ի դատավճիռը չի բողոքարկվել և 2024 թվականի սեպտեմբերի 12-ին մտել է օրինական ուժի մեջ: 2024 թվականի հոկտեմբերի 1-ին դատավճիռը ստացվել է ՀՀ ԱՆ պրոբացիայի ծառայությունում: 2024 թվականի հոկտեմբերի 9-ին ներկայացել է ՀՀ ԱՆ պրոբացիայի ծառայության Արարատի մարզային մարմին և նույն օրը սահմանված կարգով վերցվել է հաշվառման: 2024 թվականի հոկտեմբերի 30-ին միջնորդություն է ներկայացվել դատարան վերջինիս գույքի բռնագանձման վերաբերյալ:
-սույն քրեական վարույթով մեղադրյալ Ավետիս Արտաշեսի Զաքարյանի նկատմամբ հանրային քրեական հետապնդում է հարուցվել այն բանի համար, որ նա չունենալով տրանսպորտային միջոցներ վարելու իրավունք, ոչ սթափ վիճակում, 2024 թվականի հոկտեմբերի 07-ին՝ ժամը 01:45-ի սահմաններում, վարել է «Opel» մակնիշի, 37 MQ 959 հաշվառման համարանիշի տրանսպորտային միջոցը:
Դատարանն արձանագրում է, որ սույն հանցանքը կատարելու պահին, մեղադրյալ Ավետիս Արտաշեսի Զաքարյանն ունեցել է դեռևս չկրած պատիժ, ուստի Դատարանը որպես պատասխանատվությունը և պատիժը ծանրացնող հանգամանք է դիտարկում հանցանքը դատվածություն ունեցող անձի կողմից կատարելը:
ՀՀ վճռաբեկ դատարանի ձևավորած իրավական դիրքորոշումների լույսի ներքո անդրադառնալով մեղադրյալ Ավետիս Արտաշեսի Զաքարյանի նկատմամբ նշանակվող պատժի տեսակի և չափի հարցերին, Դատարանն արձանագրում է, որ մեղադրյալը չունի բավարար ֆինանսական միջոցներ, չի վճարել նախկին դատավճռով որպես պատիժ նշանակված տուգանքը, ուստի ելնելով մեղադրյալի գույքային դրությունից, վերջինիս նկատմամբ տուգանք պատժատեսակը նպատակահարմար չէ նշանակել՝ այդ դեպքում դրա կատարումը հնարավոր չի լինի ապահովել և, ըստ այդմ, հնարավոր չի լինի հասնել պատժի նպատակներին:
Դատարանը գտնում է, որ սույն քրեական գործի հանգամանքների պայմաններում միակ իրավաչափ պատիժը, որը հնարավորություն կտա միաժամանակ պատժի նպատակներին հասնել, մեղադրյալ Ավետիս Արտաշեսի Զաքարյանի նկատմամբ ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության համար 90 (իննսուն) ժամ տևողությամբ հանրային աշխատանքների ձևով պատժի նշանակումն է, որը նա պետք է կրի: Սահմանված պատիժը տվյալ դեպքում համաչափ է կատարված կոնկրետ հանցագործությունների բնույթին, վտանգավորության աստիճանին, այն կատարելու հանգամանքներին, հանցավորի անձին և բավարար է պատժի նպատակների նվաճման տեսանկյունից:
Միաժամանակ անդրադառնալով ՀՀ քրեական օրենսգրքի 75-րդ հոդվածի կիրառելիության հարցին՝ Դատարանն արձանագրում է հետևյալը.
ՀՀ քրեական օրենսգրքի 75-րդ հոդվածի համաձայն՝
«1. Եթե դատավճիռ կայացնելուց հետո, բայց մինչև պատիժը լրիվ կրելը դատապարտյալը նոր հանցանք է կատարել, ապա դատարանը նոր դատավճռով նշանակված պատժին լրիվ կամ մասնակիորեն գումարում է նախորդ դատավճռով նշանակված պատժի չկրած մասը:
(…)»:
-17.01.2025 թվականին Դատարանում ստացվել է ՀՀ ԱՆ պրոբացիայի ծառայության Արարատի մարզային մարմնի պետի պարտականությունների ժամանակավոր կատարող Կ.Միրզոյանի գրությունը համաձայն որի՝
«Ավետիս Արտաշեսի Զաքարյանը թիվ ԵԴ1/1186/01/24 գործով 2024 թվականի հուլիսի 24-ի դատավճռով մեղավոր է ճանաչվել ՀՀ քրեական օրենսգրքի 344-րդ հոդվածի 2-րդ մասով և դատապարտվել է տուգանքի՝ 375.000 (երեք հարյուր յոթանասունհինգ հազար) ՀՀ դրամի չափով:
Դատավճիռը չի բողոքարկվել և 2024 թվականի սեպտեմբերի 12-ին մտել է օրինական ուժի մեջ: 2024 թվականի հոկտեմբերի 1-ին դատավճիռը ստացվել է ՀՀ ԱՆ պրոբացիայի ծառայությունում:
Ավետիս Արտաշեսի Զաքարյանը 2024 թվականի հոկտեմբերի 9-ին ներկայացել է ՀՀ ԱՆ պրոբացիայի ծառայության Արարատի մարզային մարմին և նույն օրը սահմանված կարգով վերցվել է հաշվառման:
2024 թվականի հոկտեմբերի 30-ին միջնորդություն է ներկայացվել դատարան վերջինիս գույքի բռնագանձման վերաբերյալ:
2024 թվականի նոյեմբերի 13-ին միջնորդության հիման վրա հարուցվել է դատական վարույթ»:
Դատարանն արձանագրում է, որ սույն դատավճռի կայացման պահին, մեղադրյալ Ավետիս Արտաշեսի Զաքարյանի վերաբերյալ առկա է օրինական ուժի մեջ մտած դատավճռով դեռևս չկրած պատիժ, սակայն նկատի ունենալով, որ ՀՀ ԱՆ պրոբացիայի ծառայության կողմից ներկայացվել է Ավետիս Արտաշեսի Զաքարյանի նկատմամբ Երևան քաղաքի առաջին ատյանի ընդհանուր իրավասության դատարանի 24.07.2024 թվականի թիվ ԵԴ1/1186/01/24 դատավճռով նշանակված տուգանքի չափին համարժեք գույք բռնագանձելու վերաբերյալ միջնորդություն, որպիսի միջնորդության հիման վրա հարուցված դատական վարույթի արդյունքում կայացված և/կամ կայացվող որոշման արդյունքների վերաբերյալ թե՛ միջնորդություն ներկայացրած մարմինը՝ ՀՀ ԱՆ պրոբացիայի ծառայությունը, թե՛ Դատարանը որևէ տեղեկատվություն չունի, ուստի Դատարանը ՀՀ քրեական օրենսգրքի 75-րդ մասով սահմանված կարգով դատավճիռների համակցության գումարման հարցին չի անդրադառնում:
ՀՀ քրեական դատավարության 348-րդ հոդվածի համաձայն դատավճռում պետք է շարադրվեն նաև հետևյալ հարցերի պատասխանները․
-գույքային հայցը ենթակա է արդյոք բավարարման, ում օգտին և ինչ չափով, ինչպես նաև պատճառված գույքային վնասը ենթակա է արդյոք հատուցման, եթե գույքային հայց չի հարուցվել.
-որ գույքն է ենթակա բռնագրավման, ինչ չափով և ինչպիսի հիմքով․
-վերացվելու է արդյոք կիրառված գույքի արգելադրումը, իսկ եթե այդպիսին կիրառված չէ, ապա ենթակա է արդյոք կիրառման.
-ինչպես պետք է պահպանվեն և տնօրինվեն ապացույցները.
-դատապարտված մեղադրյալի նկատմամբ վերացվելու, փոխվելու կամ կիրառվելու է արդյոք որևէ խափանման միջոց.
- ում վրա և ինչ չափով պետք է դրվեն վարութային ծախսերը։
Դատարանն արձանագրում է, որ սույն քրեական գործով գույքային հայց, գույք բռնագրավելու անհրաժեշտություն, արգելադրված գույք, ապացույցների պահպանման և տնօրինման հարցեր, վարութային ծախսեր առկա չեն, ուստի դրանց անդրադառնալու անհրաժեշտությունը բացակայում է:
Քննարկելով մեղադրյալի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 30-31-րդ, 33-րդ, 347-350-րդ, 352-353-րդ, 364-րդ հոդվածներով, Դատարանը՝

Վ Ճ Ռ Ե Ց
Ավետիս Արտաշեսի Զաքարյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ պատիժ նշանակել հանրային աշխատանքներ՝ 90 (իննսուն) ժամ տևողությամբ:
Ավետիս Արտաշեսի Զաքարյանի նկատմամբ ընտրված բացակայելու արգելք խափանման միջոցը թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
Դատավճիռը կարող է բողոքարկվել ՀՀ վերաքննիչ քրեական դատարան` այն ստանալու օրվանից հետո՝ մեկամսյա ժամկետում:

ԴԱՏԱՎՈՐ ՏԻԳՐԱՆ ՈՍԿԱՆՅԱՆ