ԵԴ1/3918/01/24

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

08 հունվարի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան),

Նախագահությամբ՝ դատավոր Մ.Մելքոնյանի,
քարտուղարությամբ` Ա.Մանասյանի,
մասնակցությամբ`
մեղադրող Դ.Մարգարյանի,
մեղադրյալ Զ.Գրիգորյանի,

Դռնբաց դատական նիստում քննության առնելով քրեական գործն ըստ մեղադրանքի` Զոհրաբ Միսակի Գրիգորյանի (ծնված` 07.09.1990թ-ին ՀՀ-ում, ազգությամբ հայ, ՀՀ քաղաքացի, նախկինում դատված, ամուսնացած, խնամքին 2 անչափահաս երեխա, չի աշխատում, հաշվառված և բնակվում է ք.Երևան, Էրեբունի, Նոր-Արեշ 16փ., 23⁄3 տուն) ՀՀ քրեական օրենսգրքի 344-րդ հոդվածի 1-ին մասով (երկու դրվագ).

Պ Ա Ր Զ Ե Ց

1․ Քրեական գործի դատավարական նախապատմությունը․
1․1․ 2023 թվականի օգոստոսի 18-ին ՀՀ ՔԿ ԵՔՔՎ ՃՏՀ քննության բաժնի ավագ քննիչ Ա.Թովմասյանը կազմել է արձանագրություն՝ ՀՀ քրեական օրենսգրքի 344-րդ հոդվածի 1-ին մասով թիվ 60221723 քրեական վարույթը նախաձեռնելու մասին:
1.2. 2024 թվականի փետրվարի 01-ին ՀՀ ՔԿ ԵՔՔՎ ՃՏՀ քննության բաժնի ավագ քննիչ Ա.Թովմասյանը կազմել է արձանագրություն՝ ՀՀ քրեական օրենսգրքի 344-րդ հոդվածի 1-ին մասով թիվ 60-0550-24 քրեական վարույթը նախաձեռնելու մասին:
1.3. 2024 թվականի փետրվարի 02-ին ՀՀ ՔԿ ԵՔՔՎ ՃՏՀ քննության բաժնի ավագ քննիչ Ա.Թովմասյանը որոշում է կայացրել թիվ 60055024 քրեական վարույթը թիվ 60221723 քրեական վարույթին միացնելու և նախաքննությունը թիվ 60221723 համարի ներքո շարունակելու մասին:
1.4. 2024 թվականի փետրվարի 13-ին թիվ 60221723 քրեական վարույթի նախաքննությունը փոխանցվել է ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների քննչական երրորդ բաժնին, որը հանձնարարվել է նույն բաժնի քննիչ Ռ.Սաֆարյանին:
1.5. 2024 թվականի հոկտեմբերի 30-ին ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների քննչական երրորդ բաժնի քննիչ Ռ.Սաֆարյանը որոշում է կայացրել թիվ 60221723 քրեական վարույթով Զոհրաբ Միսակի Գրիգորյանի նկատմամբ կազմված թիվ 2215428249 որոշումը, 8180249145 և թիվ 8180255118 արձանագրությունները և «Ճանապարհային ոստիկանություն» ծառայության էլեկտրոնային ռեգիստրից արտատպված քաղվածքը որպես արտավարութային փաստաթուղթ ճանաչելու մասին:
1.6. 2024 թվականի նոյեմբերի 13-ին ՀՀ դատախազության Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազ Դ.Մարգարյանը որոշում է կայացրել թիվ 60221723 քրեական վարույթով Զոհրաբ Միսակի Գրիգորյանի նկատմամբ ՀՀ քրեական օրենսգրքի 344-րդ հոդվածի 1-ին մասով (երկու դրվագ) հանրային քրեական հետապնդում հարուցելու մասին:
1.7. 2024 թվականի նոյեմբերի 14-ին ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների քննչական երրորդ բաժնի քննիչ Ռ.Սաֆարյանը որոշում է կայացրել թիվ 60221723 քրեական վարույթով մեղադրյալ Զոհրաբ Միսակի Գրիգորյանի նկատմամբ որպես խափանման միջոց բացակայելու արգելքը կիրառելու մասին:
1.8. 2024 թվականի նոյեմբերի 16-ին ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների քննչական երրորդ բաժնի քննիչ Ռ.Սաֆարյանը որոշում է կայացրել թիվ 60221723 քրեական վարույթով Զոհրաբ Միսակի Գրիգորյանի նկատմամբ կազմված թիվ 2215428249 որոշումը, այդ որոշումը անձամբ ստանալու վերաբերյալ ծանուցումը և վարչական իրավախախտումների վերաբերյալ թիվ ԱՆ015446 արձանագրությունը որպես արտավարութային փաստաթուղթ ճանաչելու մասին:
1.9. 2024 թվականի դեկտեմբերի 26-ին թիվ 60221723 քրեական վարույթը, հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարանում, որը ստանալով թիվ ԵԴ1/3918/01/24 դատական համարը, մակագրվել և ստացվել է նույն դատարանի դատավոր Մասիս Մելքոնյանի աշխատակազմում:
1.10. 2024 թվականի դեկտեմբերի 27-ին Երևան քաղաքի առաջին ատյանի ընդհանուր իրավասության քրեական դատարանը, նախագահությամբ դատավոր Մասիս Մելքոնյանի, որոշում է կայացրել թիվ ԵԴ1/3918/01/24 քրեական գործը վարույթ ընդունելու և նախնական դատալսումներ նշանակելու մասին:
1.11. 2025 թվականի հունվարի 08-ին Դատարանը թիվ ԵԴ1/3918/01/24 քրեական գործով մեղադրյալ Զոհրաբ Միսակի Գրիգորյանի նկատմամբ ՀՀ քրեական օրենսգրքի 344-րդ հոդվածի 1-ին մասով (2 դրվագ) կայացրել է մեղադրական վերդիկտ։
2. Մեղադրանքի փաստական նկարագրությունը.
2024 թվականի նոյեմբերի 13-ին ՀՀ դատախազության Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազ Դ.Մարգարյանը որոշում է կայացրել թիվ 60221723 քրեական վարույթով Զոհրաբ Միսակի Գրիգորյանի նկատմամբ ՀՀ քրեական օրենսգրքի 344-րդ հոդվածի 1-ին մասով (երկու դրվագ) հանրային քրեական հետապնդում հարուցելու մասին ՀՀ քրեական օրենսգրքով նախատեսված այն արարքի կատարման համար, որ նա 2023 թվականի ապրիլի 16-ին՝ ժամը 12։15-ի սահմաններում և 2023 թվականի մայիսի 13-ին՝ ժամը 23։35-ի սահմաններում, վարել է «Օպել» մակնիշի 99 ZM 991 հաշվառման համարանիշի ավտոմեքենան՝ տրանսպորտային միջոցներ վարելու իրավունքը կասեցված վիճակում։
Այսպես.
ՀՀ ոստիկանության «Ճանապարհային ոստիկանություն» ծառայության կողմից 2022 թվականի նոյեմբերի 7-ին կայացված վարչական տույժ նշանակելու մասին թիվ 2215428249 որոշմամբ Զոհրաբ Միսակի Գրիգորյանի տրանսպորտային միջոցներ վարելու իրավունքը կասեցվել է 6 (վեց) ամիս ժամանակով՝ սկսած 2022 թվականի նոյեմբերի 28-ից մինչև 2023 թվականի մայիսի 28-ը, որի մասին վերջինս ծանուցվել է ինչպես փոստային առաքմամբ, այնպես էլ՝ 2023 թվականի հունվարի 3-ին կազմված վարչական տույժ նշանակելու մասին թիվ ԱՆ 015446 որոշմամբ: Տեղյակ լինելով, որ իր տրանսպորտային միջոցներ վարելու իրավունքը կասեցված է, Զոհրաբ Միսակի Գրիգորյանը, կասեցման ժամկետը դեռ չլրացած, 2023 թվականի ապրիլի 16-ին՝ ժամը 12:15-ի սահմաններում, Երևան քաղաքի Սայաթ-Նովայի պողոտայում վարել է «Օպել» մակնիշի 99 ZM 991 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկ Գագիկ Ասլանյանի կողմից նույն օրը՝ ժամը 12:25-ին, կազմվել է վարչական իրավախախտման վերաբերյալ թիվ 8180249145 արձանագրությունը։
Բացի այդ, տեղյակ լինելով, որ 2022 թվականի նոյեմբերի 7-ին կայացված վարչական տույժ նշանակելու մասին թիվ 2215428249 որոշմամբ իր տրանսպորտային միջոցներ վարելու իրավունքը կասեցվել է 6 (վեց) ամիս ժամանակով, Զոհրաբ Միսակի Գրիգորյանը, կասեցման ժամկետը դեռ չլրացած, 2023 թվականի մայիսի 13-ին՝ ժամը 23:35-ի սահմաններում, Երևան քաղաքի Հրազդանի կիրճում վարել է «Օպել» մակնիշի 99 ZM 991 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության կրտսեր պարեկ Տիգրան Ղալեչյանի կողմից նույն օրը՝ ժամը 23:45-ին, կազմվել է վարչական իրավախախտման վերաբերյալ թիվ 8180255118 արձանագրությունը:
3.Դատաքննության ընթացքում հետազոտված թույլատրելի ապացույցները.
2025 թվականի հունվարի 08-ին տեղի ունեցած դատական նիստում մեղադրյալ Զոհրաբ Միսակի Գրիգորյանը, օգտվելով իր իրավունքից, հրաժարվել է ցուցմունք տալուց:
Դատարանը, հաշվի առնելով այն հանգամանքը, որ մեղադրյալ Զոհրաբ Միսակի Գրիգորյանը, օգտվելով իր իրավունքից, հրաժարվել է ցուցմունք տալուց և հարցերին պատասխանելուց, որոշում է կայացրել հրապարակել մեղադրյալ Զոհրաբ Միսակի Գրիգորյանի նախաքննական ցուցմունքները:
(Դատական նիստի արձանագրություն՝ 18.12.2024թ.)
2024 թվականի նոյեմբերի 14-ին որպես մեղադրյալ հարցաքննվելիս Զոհրաբ Միսակի Գրիգորյանը ցուցմունք է տվել այն մասին, որ ներկայացված մեղադրանքում իրեն մեղավոր է ճանաչել և զղջացել իր կատարած արարքի համար:
(Հատոր 1, Գ.Թ. 58-59)
Զննություն կատարելու մասին արձանագրության համաձայն՝ զննության է ենթարկվել Զոհրաբ Միսակի Գրիգորյանի նկատմամբ ՀՀ ՆԳՆ ոստիկանության «Ճանապարհային ոստիկանություն» ծառայության կողմից կայացված վարչական տույժ նշանակելու մասին թիվ 2215428249 որոշումը, ՀՀ ՆԳՆ պարեկային ծառայության աշխատակիցների կողմից կազմված վարչական իրավախախտման վերաբերյալ թիվ 8180249145 և թիվ 8180255118 արձանագրությունները և «Ճանապարհային ոստիկանություն» ծառայության էլեկտրոնային ռեգիստրից արտատպված քաղվածքը, թիվ 2215428249 որոշումը Զ. Գրիգորյանին հանձնելու վերաբերյալ գրությունը և թիվ ԱՆ 015446 որոշումը զննության ենթարկելու մասին արձանագրություններով՝ այն մասին, որ Զոհրաբ Գրիգորյանի վարորդական իրավունքի վկայականը 07.11.2022թ. ՀՀ ՆԳՆ ոստիկանության «Ճանապարհային ոստիկանություն ծառայության» կողմից վարչական տույժ նշանակելու մասին թիվ 2215428249 որոշմամբ կասեցվել է 6 ամիս ժամկետով, այնուհետև նշված որոշման պատճենը 07.02.2023թ․ ստորագրությամբ հանձնվել է վերջինիս։ «Ճանապարհային ոստիկանություն» ծառայության էլեկտրոնային ռեգիստրից արտատպված քաղվածքով նշված է, որ Զոհրաբ Միսակի Գրիգորյանի տրանսպորտային միջոցներ վարելու իրավունքի կասեցման սկիզբը՝ 28-11-2022, իսկ ավարտը՝ 28-05-2023։ 2023 թվականի ապրիլի 16-ին, ՀՀ ՆԳՆ ոստիկանության պարեկային ծառայության կողմից կազմվել է վարչական իրավախախտումների վերաբերյալ թիվ 8180249145 արձանագրությունը, որի համաձայն՝ Զ. Գրիգորյանը իր տրանսպորտային միջոցներ վարելու իրավունքը կասեցված վիճակում, Երևան քաղաքի Սայաթ-Նովա փողոցում վարել է տրանսպորտային միջոց։ 2023 թվականի մայիսի 13-ին, ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտումների վերաբերյալ թիվ 8180255118 արձանագրությունը, որի համաձայն Զ. Գրիգորյանը իր տրանսպորտային միջոցներ վարելու իրավունքը կասեցված վիճակում, Երևան քաղաքի Հրազդանի կիրճում վարել է տրանսպորտային միջոց։
(Հատոր 1, Գ.Թ. 41-42, 78)
Արտավարութային փաստաթուղթ ապացույց ճանաչելու մասին որոշման համաձայն որպես արտավարութային փաստաթուղթ ապացույց է ճանաչվել Զոհրաբ Միսակի Գրիգորյանի նկատմամբ ՀՀ ՆԳՆ ոստիկանության «Ճանապարհային ոստիկանություն» ծառայության կողմից կայացված վարչական տույժ նշանակելու մասին թիվ 2215428249 որոշումը, ՀՀ ՆԳՆ պարեկային ծառայության աշխատակիցների կողմից կազմված վարչական իրավախախտման վերաբերյալ թիվ 8180249145 և թիվ 8180255118 արձանագրությունները և «Ճանապարհային ոստիկանություն» ծառայության էլեկտրոնային ռեգիստրից արտատպված քաղվածքը, թիվ 2215428249 որոշումը Զ. Գրիգորյանին հանձնելու վերաբերյալ գրությունը և թիվ ԱՆ 015446 որոշումը:
(Հատոր 1, Գ.Թ. 43-44, 79-80)
4.Դատարանի իրավական վերլուծությունները.
4.1. Վերլուծելով մեղադրյալ Զոհրաբ Միսակի Գրիգորյանին ներկայացված մեղադրանքը և հիմնվելով հետազոտված թույլատրելի ապացույցների վրա` Դատարանը գտնում է, որ.
• ապացուցված է մեղադրյալ Զոհրաբ Միսակի Գրիգորյանին վերագրվող փաստական հանգամանքները, մասնավորապես՝ մեղադրյալ Զոհրաբ Միսակի Գրիգորյանի կողմից տրանսպորտային միջոցներ վարելու իրավունքից զրկված լինելով կրկին տրանսպորտային միջոց վարելու փաստը.
• ապացուցված է վերոգրյալ արարքների քրեական հակաիրավականությունը, որը նախատեսված է 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 1-ին մասով.
• ապացուցված է մեղադրյալ Զոհրաբ Միսակի Գրիգորյանի կողմից 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 1-ին մասով (2 դրվագ) նախատեսված վերոգրյալ արարքները կատարելը.
• ապացուցված է մեղադրյալ Զոհրաբ Միսակի Գրիգորյանի մեղավորությունը 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 1-ին մասով (2 դրվագ) նախատեսված արարքները կատարելու մեջ:
4.2. Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
4.3. ՀՀ Սահմանադրության 71-րդ հոդվածի համաձայն՝ 1. Հանցանք կատարած անձի պատժի հիմքը նրա մեղքն է: 2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին:
4.4. ՀՀ քրեական օրենսգրքի 7-րդ հոդվածի 1-ին մասի համաձայն`
Հանցանք կատարած անձին քրեական պատասխանատվության «պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին հանցավորի անձնավորությանը:
4.5. ՀՀ քրեական օրենսգրքի 55-րդ հոդվածի 2-րդ մասի համաձայն՝
1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ: 2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
4.6. ՀՀ քրեական օրենսգրքի 69-րդ հոդվածի համաձայն`
Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները: 2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները: 4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ: Պատիժ նշանակելը քրեական գործով արդարադատության իրականացման վճռական պահն է, որը պետք է դառնա կատարված հանցանքի հասարակական վտանգավորության գնահատման լիարժեք չափանիշ, պատժի ենթարկվող անձին վերասոցիալականացնելու, ինչպես մեղադրյալի, այնպես էլ այլ անձանց կողմից հանցագործությունները կանխելու գործուն միջոց: Արդարության և պատասխանատվության անհատականացման սկզբունքը պատժի տեսակը և չափը որոշելու բազմաթիվ դրույթների ու չափանիշների հետ մեկտեղ անխզելիորեն կապված է պատասխանատվությունը և պատիժը մեղմացնող ու ծանրացնող հանգամանքները հետազոտելու և հաշվի առնելու հետ: ՀՀ քրեական դատավարության օրենսգրքի 102-րդ հոդվածում թվարկված են յուրաքանչյուր քրեական գործով ապացուցման ենթակա փաստական հանգամանքները: Այդ հոդվածի 5-րդ կետի համաձայն՝ քրեական օրենքով նախատեսված պատասխանատվությունը մեղմացնող կամ խստացնող հանգամանքները հաստատվում են միայն ապացույցների հիման վրա: Ընդ որում, անձի պատասխանատվությունը և պատիժը մեղմացնող ու ծանրացնող հանգամանքների գնահատումը յուրաքանչյուր կոնկրետ գործով պատիժ նշանակելիս հնարավորություն է տալիս դատարանին պատկերացում կազմել հանցանքի հանրության համար վտանգավորության աստիճանի, բնույթի, ինչպես նաև հանցավորի անձնավորության մասին և յուրաքանչյուր կոնկրետ գործով անհատականացնել պատիժը: Պատժի անհատականացման կարևորությունն այն է, որ դա լուրջ երաշխիք է ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակների իրականացման համար:
4.7. Վերոհիշյալ իրավադրույթների և ՀՀ վճռաբեկ դատարանի որոշումների համատեքստում, ուսումնասիրելով մեղադրյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մեղադրյալ Զոհրաբ Միսակի Գրիգորյանի նկատմամբ, նրա կատարած հանցանքի համար պատիժ նշանակելիս` Դատարանը հաշվի է առնում հանցանքի բնույթն ու հանրության համար վտանգավորության աստիճանը, հանցավորի անձը բնութագրող հանգամանքները, այն, որ նա դատվածություն չունի:
4.8. Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալի պատասխանատվությունը և պատիժը մեղմացնող հանգամանք, հաշվի է առնում այն, որ նա ներկայացված մեղադրանքում իրեն լիովին մեղավոր է ճանաչել և տվել է խոստովանական ցուցմունք:
Մեղադրյալի պատասխանատվությունն ու պատիժը ծանրացնող հանգամանքներ Դատարանը արձանագրում է, որ մեղադրյալ Զոհրաբ Միսակի Գրիգորյանը ունի չմարված դատվածություն ՀՀ քրեական օրենսգրքի 344-րդ հոդվածի 1-ին մասով նախատեսված արարք կատարելու համար:
4.9. Դատարանը, քննարկելով մեղադրյալ Զոհրաբ Միսակի Գրիգորյանի նկատմամբ պատժի նշանակման հարցը, գտնում է, որ մեղադրյալ Զոհրաբ Միսակի Գրիգորյանի նկատմամբ ՀՀ քրեական օրենսգրքի 344-րդ հոդվածի 1-ին մասով յուրաքանչյուր դրվագի համար անհրաժեշտ է որպես պատիժ նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով, որը ՀՀ քրեական օրենսգրքի 74-րդ հոդվածի կանոնների համաձայն, պատիժների լրիվ գումարման արդյունքում որպես վերջնական պատիժ պետք է նշանակվի տուգանք՝ 900.000 (ինը հարյուր հազար) ՀՀ դրամի չափով, որով կապահովվի ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը, ավելին՝ այն անհրաժեշտ և բավարար է սոցիալական արդարությունը վերականգնելու, պատժի ենթարկված անձին վերասոցիալականացնելու և հանցագործությունները կանխելու համար: Միաժամանակ Դատարանը գտնում է, որ մեղադրյալ Զոհրաբ Միսակի Գրիգորյանի նկատմամբ սույն դատավճռով նշանակված պատժին դատավճիռների համակցությամբ պետք է մասնակի գումարել ԳԴ/0233/01/24 քրեական գործով Գեղարքունիքի մարզի առաջին ատյանի ընդհանուր իրավասության դատարանի 2024 թվականի հուլիսի 1-ի դատավճռով նշանակված տուգանք պատժատեսակը և Զոհրաբ Միսակի Գրիգորյանի նկատմամբ որպես վերջնական պատիժ նշանակել տուգանք՝ 1.100.000 (մեկ միլիոն հարյուր հազար) ՀՀ դրամի չափով: Միևնույն ժամանակ, հաշվի առնելով մեղադրյալի գույքային դրությունը՝ դատարանը գտնում է, Զոհրաբ Միսակի Գրիգորյանի նկատմամբ նշանակված տուգանքի` 1.100.000 (մեկ միլիոն հարյուր հազար) ՀՀ դրամ գումարի վճարումը պետք է տարաժամկետել, դրա վճարման ժամկետ սահմանել 12 (տասներկու) ամիս:
4.10. ՀՀ քրեական դատավարության 348-րդ հոդվածի համաձայն դատավճռում պետք է շարադրվեն նաև հետևյալ հարցերի պատասխանները.
• գույքային հայցը ենթակա է արդյոք բավարարման, ում օգտին և ինչ չափով, ինչպես նաև պատճառված գույքային վնասը ենթակա է արդյոք հատուցման, եթե գույքային հայց չի հարուցվել.
• որ գույքն է ենթակա բռնագրավման, ինչ չափով և ինչպիսի հիմքով,
վերացվելու է արդյոք կիրառված գույքի արգելադրումը, իսկ եթե այդպիսին կիրառված չէ, ապա ենթակա է արդյոք կիրառման,
• ինչպես պետք է պահպանվեն և տնօրինվեն ապացույցները,
• դատապարտված մեղադրյալի նկատմամբ վերացվելու, փոխվելու կամ կիրառվելու է արդյոք որևէ խափանման միջոց.
• ում վրա և ինչ չափով պետք է դրվեն վարութային ծախսերը։
4.11. Քննարկելով մեղադրյալի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
4.12. Նկատի ունենալով, որ սույն քրեական գործով գույքային հայց, գույք բռնագրավելու անհրաժեշտություն, արգելադրված գույք, վարույթային ծախսերի վերաբերյալ հարցեր առկա չեն, Դատարանը այդ հարցերին չի անդրադառնում:
4.13. Քննարկելով որպես արտավարութային փաստաթուղթ ապացույց ճանաչված Զոհրաբ Միսակի Գրիգորյանի նկատմամբ ՀՀ ՆԳՆ ոստիկանության «Ճանապարհային ոստիկանություն» ծառայության կողմից կայացված վարչական տույժ նշանակելու մասին թիվ 2215428249 որոշման, ՀՀ ՆԳՆ պարեկային ծառայության աշխատակիցների կողմից կազմված վարչական իրավախախտման վերաբերյալ թիվ 8180249145 և թիվ 8180255118 արձանագրությունների և «Ճանապարհային ոստիկանություն» ծառայության էլեկտրոնային ռեգիստրից արտատպված քաղվածքի, թիվ 2215428249 որոշումը Զ.Գրիգորյանին հանձնելու վերաբերյալ գրության և թիվ ԱՆ 015446 որոշման պահպանության հարցը՝ Դատարանը գտնում է, որ դատավճիռն օրինական ուժի մեջ մտնելուց հետո դրանք պետք է թողնել կցված քրեական գործի նյութերի հետ:
Ելնելով վերոգրյալից և ղեկավարվելով Հայաստանի Հանրապետության քրեական դատավարության օրենսգրքի 30-31-րդ, 100-րդ, 167-րդ, 347-350-րդ, 352-353-րդ, 364-րդ հոդվածներով, Դատարանը`

Վ Ճ Ռ Ե Ց

1. Մեղադրյալ Զոհրաբ Միսակի Գրիգորյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով (երկու դրվագ) նախատեսված արարք կատարելու համար:
2. ՀՀ քրեական օրենսգրքի 344-րդ հոդվածի 1-ին մասով (1-ին դրվագ) նախատեսված հանցագործության կատարման համար Զոհրաբ Միսակի Գրիգորյանի նկատմամբ պատիժ նշանակել տուգանք՝ նվազագույն աշխատավարձի վեցապատիկի չափով՝ 450.000 /չորս հարյուր հիսուն հազար/ ՀՀ դրամի չափով:
3. ՀՀ քրեական օրենսգրքի 344-րդ հոդվածի 1-ին մասով (2-րդ դրվագ) նախատեսված հանցագործության կատարման համար Զոհրաբ Միսակի Գրիգորյանի նկատմամբ պատիժ նշանակել տուգանք՝ նվազագույն աշխատավարձի վեցապատիկի չափով՝ 450.000 /չորս հարյուր հիսուն հազար/ ՀՀ դրամի չափով:
4. ՀՀ քրեական օրենսգրքի 74-րդ հոդվածով սահմանված կարգով պատիժների լրիվ գումարման սկզբունքով Զոհրաբ Միսակի Գրիգորյանի նկատմամբ որպես վերջնական պատիժ նշանակել տուգանք՝ 900.000 (ինը հարյուր հազար) ՀՀ դրամի չափով:
5. ՀՀ քրեական օրենսգրքի 75-րդ հոդվածով սահմանված կարգով սույն դատավճռով նշանակված պատժին մասնակի գումարել ԳԴ/0233/01/24 քրեական գործով Գեղարքունիքի մարզի առաջին ատյանի ընդհանուր իրավասության դատարանի 2024 թվականի հուլիսի 1-ի դատավճռով նշանակված տուգանք պատժատեսակը և Զոհրաբ Միսակի Գրիգորյանի նկատմամբ որպես վերջնական պատիժ նշանակել տուգանք՝ 1.100.000 (մեկ միլիոն հարյուր հազար) ՀՀ դրամի չափով:
6. Զոհրաբ Միսակի Գրիգորյանին թույլատրել դատավճռով նշանակված 1.100.000 (մեկ միլիոն) ՀՀ դրամի չափով տուգանքը վճարել մաս առ մաս՝ 12 (տասներկու) ամիս ժամկետում:
7. Զոհրաբ Միսակի Գրիգորյանի նկատմամբ որպես խափանման միջոց ընտրված բացակայելու արգելքը թողնել անփոփոխ մինչև սույն դատավճռի օրինական ուժի մեջ մտնելը:
8. Դատավճիռն օրինական ուժի մեջ մտնելուց հետո արտավարութային փաստաթուղթ ճանաչված ապացույցները թողնել կցված քրեական գործի նյութերին:
9. Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալուց հետո մեկամսյա ժամկետում:

ԴԱՏԱՎՈՐ ՄԱՍԻՍ ՄԵԼՔՈՆՅԱՆ