Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
ԵԴ1/3809/01/24

«27» դեկտեմբերի 2024թ. ք. Երևան

Երևան քաղաքի առաջին ատյանի ընդհանուր իրավասության քրեական դատարանը, նախագահությամբ դատավոր Ա. Մելիքսեթյանի, գրավոր ընթացակարգով, համաձայնությամբ տուգանք նշանակելու վարույթի կիրառմամբ, քննելով քրեական գործն ըստ մեղադրանքի՝ Սասուն Արտյոմի Մեսրոպյանի (ծնված՝ 02.04.1993թ., ազգությամբ հայ, ՀՀ քաղաքացի, ամուսնացած, խնամքին 2 անչափահաս երեխա, դատվածություն չունեցող, աշխատում է «Մելառ ԼԼՑ» ՍՊԸ՝ որպես տեխնիկական անվտանգության պատասխանատու, բնակվող՝ Կոտայքի մարզ, գ․ Աղավնաձոր, 2-րդ փող․, 8-րդ տուն հասցեում) ՀՀ քրեական օրեսգրքի 344-րդ հոդվածի 1-ին մասով

Պ Ա Ր Զ Ե Ց

1.Գործի դատավարական նախապատմությունը
2024 թվականի մայիսի 31-ին ՀՀ քրեական օրենսգրքի 344-րդ հոդվածի 1-ին մասով մասով նախաձեռնվել է թիվ 60527824 քրեական վարույթը։
2024 թվականի դեկտեմբերի 06-ին Սասուն Արտյոմի Մեսրոպյանի նկատմամբ ՀՀ քրեական օրենսգրքի 344-րդ հոդվածի 1-ին մասով հարուցվել է հանրային քրեական հետապնդում:
2024 թվականի դեկտեմբերի 09-ին Սասուն Արտյոմի Մեսրոպյանի նկատմամբ որպես խափանման միջոց է կիրառվել բացակայելու արգելքը:
2024թ. դեկտեմբերի 11-ին կազմվել է արձանագրություն համաձայնությամբ տուգանք նշանակելու վարույթ կիրառելու իրավական հետևանքների ծանուցման մասին:
2024 թվականի դեկտեմբերի 19-ին քրեական վարույթն ըստ մեղադրանքի՝ Սասուն Արտյոմի Մեսրոպյանի մուտք է եղել Դատարան, շնորհվել է ԵԴ1/3809/01/24 դատական գործի համարը:
2024 թվականի դեկտեմբերի 20-ին Դատարանը որոշում է կայացրել թիվ ԵԴ1/3809/01/24 քրեական գործով վարույթը ստանձնելու և համաձայնությամբ տուգանք նշանակելու վարույթ հարուցելու մասին:
2024թ. դեկտեմբերի 20-ին Երևան քաղաքի առաջին ատյանի ընդհանուր իրավասության քրեական դատարան է ստացվել մեղադրյալ Սասուն Արտյոմի Մեսրոպյանի պաշտպան Ք․ Գասպարյանի միջնորդությունը խափանման միջոցը փոփոխելու և որպես խափանման միջոց գրավ կիրառելու մասին:

2. Մեղադրանքի փաստական նկարագրությունը.
Սասուն Արտյոմի Մեսրոպյանը, պատշաճ ծանուցված լինելով 2023 թվականի դեկտեմբերի 30-ին իրավասու պետական աշխատակցի կողմից կայացված վարչական տույժ նշանակելու մասին թիվ 8301059067 որոշմամբ վարչական պատասխանատվության՝ տրանսպորտային միջոցներ վարելու իրավունքը 6 (վեց) ամիս ժամկետով կասեցնելու մասին, կասեցման ժամկետը չլրացած՝ 2024 թվականի ապրիլի 22-ին՝ 17:34-ի սահմաններում, Երևան քաղաքի Բաղրամյան պողոտայում վարել է «Մերսեդես» մակնիշի 37 DL 274 հաշվառման համարանիշի տրանսպորտային միջոցը, որի վերաբերյալ կազմվել է թիվ 8180400982 արձանագրությունը։

3. Դատարանի իրավական վերլուծությունները.
ՀՀ քրեական դատավարության օրենսգրքի 464.7 -րդ հոդվածի համաձայն՝
«1.Համաձայնությամբ տուգանք նշանակելու վարույթն իրականացվում է, եթե առկա է սույն օրենսգրքի 464.6-րդ հոդվածով սահմանված կարգով կազմված և ստորագրված արձանագրություն:
2. Համաձայնությամբ տուգանք նշանակելու վարույթ չի կարող իրականացվել, եթե՝
1) մեղադրյալն անչափահաս է.
2) մեղադրյալը մեղադրվում է մեկից ավելի հանցանքներ կատարելու համար.
3) մեղադրյալին մեղսագրվող արարքի համար Հայաստանի Հանրապետության քրեական օրենսգրքով տուգանք պատժատեսակ սահմանված չէ.
4) մեղադրյալին մեղսագրվող արարքով վնաս է պատճառվել մասնավոր անձի շահերին.
5) գույքային հայց է հարուցվել մեղադրյալի կամ այն անձի դեմ, որի վրա կարող է գույքային պատասխանատվություն դրվել մեղադրյալի գործողությունների համար.
6) սույն օրենսգրքով սահմանված կարգով մեղադրական եզրակացությունը հաստատելիս հսկող դատախազն իրավական կամ փաստական հիմնավորմամբ առարկել է դրա դեմ՝ այդ մասին նշում կատարելով մեղադրական եզրակացությունը հաստատելու որոշման մեջ․
7) մեղադրյալը գրավոր հրաժարվել է համաձայնությամբ տուգանք նշանակելու վարույթ կիրառելուց․
8) խախտվել է սույն օրենսգրքի 464.6-րդ հոդվածով սահմանված կարգը:»
Նույն օրենսգրքի 464.9 -րդ մասի համաձայն՝
«1. Համաձայնությամբ տուգանք նշանակելու վարույթի արդյունքով դատարանը գրավոր ընթացակարգով կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները:
2. Դատավճիռը կայացվում է համաձայնությամբ տուգանք նշանակելու վարույթ կիրառելու մասին որոշումը կայացնելուց հետո՝ հնարավորին չափ սեղմ ժամկետում, սակայն ոչ ուշ, քան 15 օրվա ընթացքում։
3. Համաձայնությամբ տուգանք նշանակելու վարույթի արդյունքով մեղադրական դատավճիռ կայացնելիս դատարանը նշանակում է պատիժ՝ հաշվի առնելով Հայաuտանի Հանրապետության քրեական օրենսգրքի 77-րդ հոդվածի վերաբերելի դրույթները:
4. Սույն օրենսգրքի 167-րդ հոդվածի 1-ին մասով նախատեսված վարութային ծախսերը մեղադրյալից ենթակա չեն բռնագանձման:
5. Դատավճիռը պետք է պարունակի պարզաբանում այն բողոքարկելու՝ սույն օրենսգրքով նախատեսված սահմանափակումների վերաբերյալ։
6. Դատավճիռը կայացնելուց հետո՝ ոչ ուշ, քան հինգ օրվա ընթացքում, ուղարկվում է դատապարտված մեղադրյալին, նրա պաշտպանին, հանրային մեղադրողին:»
ՀՀ քրեական օրենսգրքի 77-րդ հոդվածի 6-րդ մասի համաձայն՝
« 6. Ավարտված կամ չավարտված հանցագործություններով համաձայնությամբ տուգանք նշանակելու վարույթի դեպքում նշանակվում է սույն օրենսգրքի Հատուկ մասի համապատասխան հոդվածի սանկցիայով նախատեսված տուգանքի նվազագույն չափը՝ առանց լրացուցիչ պատիժ և անվտանգության միջոց նշանակելու:»

Ելնելով վերոգրյալից Դատարանը համաձայնությամբ տուգանք նշանակելու վարույթի շրջանակում գտնում է, որ.
- ապացուցված է մեղադրյալ Սասուն Արտյոմի Մեսրոպյանին վերագրվող փաստական հանգամանքները, մասնավորապես մեղադրյալ Սասուն Արտյոմի Մեսրոպյանի կողմից տրանսպորտային միջոցներ վարելու իրավունքը կասեցված լինելու պայմաններում տրանսպորտային միջոց վարելը,
- ապացուցված է վերոգրյալ արարքի քրեական հակաիրավականությունը, որը նախատեսված է ՀՀ քրեական օրենսգրքի 344-րդ հոդվածի 1-ին մասով,
- ապացուցված է մեղադրյալ Սասուն Արտյոմի Մեսրոպյանի կողմից ՀՀ քրեական օրենսգրքի 344-րդ հոդվածի 1-ին մասով նախատեսված վերոգրյալ արարքը կատարելը.
- ապացուցված է մեղադրյալ Սասուն Արտյոմի Մեսրոպյանի մեղավորությունը ՀՀ քրեական օրենսգրքի 344-րդ հոդվածի 1-ին մասով նախատեսված արարքը կատարելու մեջ:
Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է, որ մեղադրյալի նկատմամբ պետք է նշանակվի պատիժ տուգանքի ձևով ՀՀ քրեական օրենսգրքի 344-րդ հոդվածի 1-ին մասի սանկցայի նվազագույն չափով: Հաշվի առնելով այն, որ թեև մեղադրյալն աշխատում է, սակայն ամսական եկամուտը պակաս է նվազագույն ամսական աշխատավարձի չափից, ուստի տուգանքը պետք է հաշվարկել՝ հիմք ընդունելով նվազագույն ամսական աշխատավարձի չափը:
Անդրադառնալով պատիժը մեղադրյալի կողմից կրելու հարցին՝ Դատարանն արձանագրում է, որը մեղադրյալը պատիժը պետք է կրի: Միևնույն ժամանակ հաշվի առնելով այն, որ մեղադրյալը չունի բավարար ֆինանսական միջոցներ, խնամքին ունի երկու անչափահաս երեխա, ուստի Դատարանը գտնում է, որ մեղադրյալն ի վիճակի չէ անհապաղ և ամբողջությամբ վճարելու նշանակված տուգանքը, ուստի արձանագրում է, որ անհրաժեշտ է դատավճռով նրա նկատմամբ նշանակվող տուգանքը տարաժամկետել 1 (մեկ) տարի ժամկետով՝ թույլատրելով այդ գումարը մաս առ մաս վճարել 1 (մեկ) տարվա ընթացքում:
Դատարանն արձանագրում է, որ սույն գործով գույքային հայց չի հարուցվել, բռնագրավման ենթակա գույքի, ինչպես նաև գույքի արգելադրման վերաբերյալ տվյալներ գործում առկա չեն:
Անդրադառնալով դատական ծախսերին՝ Դատարանն արձանագրում է, որ ՀՀ քրեական դատավարության օրենսգրքի 464.9-րդ հոդվածի 4-րդ մասի համաձայն՝ սույն վարույթով դատավճիռ կայացնելիս դատական ծախսերը մեղադրյալից ենթակա չեն բռնագանձման:
Քննարկելով ապացույցների պահպանման և տնօրինման հարցը՝ Դատարանը գտնում է, որ 2024 թվականի դեկտեմբերի 06-ին արտավարութային փաստաթուղթ ճանաչված և վարույթի նյութերին կցված՝ Ժորա Սուրենի Խաչատրյանի նկատմամբ կազմված վարչական իրավախախտման վերաբերյալ թիվ 8180416184 և 8180298429 արձանագրությունները, ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության, Ժորա Սուենի Խաչատրյանի սթափության վիճակի թիվ 00118 և 02114 կտրոնի և սթափության 91100996 համարի սարքի, ստուգաչափման թիվ 120904 վկայականի և 91101050 համարի սարքի, ստուգաչափման թիվ 066389 վկայականի պատճեները պետք է պահել վարույթի նյութերի հետ՝ դրանք պահելու ամբողջ ընթացքում:
Անդրադառնալով խափանման միջոցին և այս համատեքստում քննարկելով պաշտպանի միջնորդությունը Դատարանը գտնում է, որ պաշտպանի միջնորդությունը ենթակա է բավարարման. մեղադրյալի նկատմամբ որպես խափանման միջոց ընտրված բացակայելու արգելքը պետք է փոփոխել և որպես խափանման միջոց ընտրել գրավը՝ 400․000 /չորս հարյուր հազար/ ՀՀ դրամի չափով: Գրավի պայմանն ապահովված լինելու դեպքում վերացնել բացակայելու արգելք խափանման միջոցով պայմանավորված բոլոր սահմանափակումները:
Վերոգրյալի հիման վրա և ղեկավարվելով Հայաստանի Հանրապետության քրեական դատավարության օրենսգրքի 99-րդ, 347-350-րդ, 352-353-րդ, 364-րդ, 464.1-464.5-րդ հոդվածներով, Դատարանը`

Վ Ճ Ռ Ե Ց


Սասուն Արտյոմի Մեսրոպյանին մեղավոր ճանաչել ՀՀ քրեական օրեսգրքի 344-րդ հոդվածի 1-ին մասով նախատեսված հանցագործության կատարման մեջ և նրա նկատմամբ նշանակել պատիժ տուգանք՝ նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամի չափով:
Թույլատրել Սասուն Արտյոմի Մեսրոպյանին դատավճռով նշանակված 375.000 ՀՀ դրամ գումարի չափով տուգանքը վճարել մաս առ մաս, 12 /տասներկու/ ամսվա ընթացքում՝ յուրաքանչյուր ամիս վճարելով առնվազն 31.250 /երեսունմեկ հազար երկու հարյուր հիսուն/ ՀՀ դրամ գումար:
Մեղադրյալի նկատմամբ ընտրված խափանման միջոցը՝ բացակայելու արգելքը, փոփոխել, խափանման միջոց ընտրել գրավը՝ 400․000 /չորս հարյուր հազար/ ՀՀ դրամի չափով:
Սահմանված գրավի գումարը եռօրյա ժամկետում վճարել Կենտրոնական գանձապետարանի գործառնական վարչության Երևան քաղաքի առաջին ատյանի ընդհանուր իրավասության քրեական դատարանի թիվ 900013298014 դեպոզիտային հաշվին և գրավը մուծված լինելու մասին անդորրագիրը ներկայացնել Դատարան:
Խափանման միջոց գրավը պահպանել մինչև դատավճռի օրինական ուժի մեջ մտնելը, որից հետո այն վերացնել, իսկ գրավի գումարը վերադարձնել այն վճարած անձին:
Դատական ծախսերի հարցը համարել լուծված:
Վարույթի նյութերին կցված արտավարութային փաստաթղթերը պահել վարույթի նյութերի հետ՝ դրանք պահելու ամբողջ ընթացքում:
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերով, կարող է բողոքարկվել ՀՀ վերաքննիչ քրեական դատարան` դատական ակտը ստանալուց հետո մեկամսյա ժամկետում:



ԴԱՏԱՎՈՐ` Ա. ՄԵԼԻՔՍԵԹՅԱՆ



Դատավճիռը չի բողոքարկվել, օրինական ուժի մեջ է մտել 2025 թվականի մարտի 13-ին։



ԴԱՏԱՎՈՐ` Ա. ՄԵԼԻՔՍԵԹՅԱՆ