Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

ԵԴ1/3799/01/24

«14» ապրիլի 2025թ. ք. Երևան

Երևան քաղաքի առաջին ատյանի ընդհանուր իրավասության քրեական դատարանը


նախագահությամբ դատավոր՝ Ա. Մելիքսեթյանի,
քարտուղարությամբ՝ Ս. Ջավադյանի,

մասնակցությամբ.
հանրային մեղադրող՝ Դ․ Մարգարյանի,

դռնբաց դատական նիստում, քննելով քրեական գործն ըստ մեղադրանքի՝
Վահագն Վարազդատի Մանուկյանի՝ /ծնված՝ 21․07․1984թ., ք․ Երևանում, ազգությամբ հայ, ՀՀ քաղաքացի, ամուսնացած, նախկինում չդատապարտված, չի աշխատում, հաշվառված՝ ք․ Երևան, Բագրատունյաց փողոց 12-րդ շենք, 35-րդ բնակարան հասցեում, բնակվող՝ ք․ Երևան, Շինարարների 15/2-րդ շենք, 118-րդ բնակարան հասցեում/ ՀՀ քրեական օրենսգրքի 344-րդ հոդվածի 1-ին մասով երկու դրվագ,

Պ Ա Ր Զ Ե Ց

1.Գործի դատավարական պատմությունը.
1.1․ 2023թ․ դեկտեմբերի 08-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-5141-23 քրեական վարույթը:
1․2․ 2024թ․ հունվարի 24-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-0138-24 քրեական վարույթը:
1․3․ 2024թ․ հունվարի 24-ին որոշում է կայացվել թիվ 60-0138-24 քրեական վարույթը թիվ 60-5141-23 քրեական վարույթին միացնելու և նախաքննությունը թիվ 60-5141-23 քրեական վարույթի համարի ներքո շարունակելու մասին։
1.4․ 2024թ. մայիսի 21-ին որոշում է կայացվել Վահագն Վարազդատի Մանուկյանի նկատմամբ ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին:
1.5․ 2024թ. մայիսի 22-ին որոշում է կայացվել Վահագն Վարազդատի Մանուկյանի նկատմամբ որպես խափանման միջոց բացակայելու արգելքը կիրառելու մասին:
1․6․ 2024թ․ հունիսի 24-ին որոշում է կայացվել Վահագն Վարազդատի Մանուկյանի նկատմամբ ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 1-ին մասով 2024թ. մայիսի 21-ին հարուցված հանրային քրեական հետապնդման ժամկետը կասեցնելու մասին։
1․7․ 2024թ․ դեկտեմբերի 04-ին որոշում է կայացվել Վահագն Վարազդատի Մանուկյանի նկատմամբ ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 1-ին մասով 2024թ. մայիսի 21-ին հարուցված և 2024թ․ հունիսի 24-ին կասեցված հանրային քրեական հետապնդման ժամկետը վերսկսելու մասին։
1.8․ Երևան քաղաքի առաջին ատյանի ընդհանուր իրավասության քրեական դատարանում 2024 թվականի դեկտեմբերի 18-ին մուտք է եղել ՀՀ դատախազության Երևան քաղաքի Կենտրոն և Նորք-Մարաշ վարչական շրջանների դատախազությունից ստացված նախաքննական 60-5141-23 համարով քրեական գործն ըստ մեղադրանքի՝ Վահագն Վարազդատի Մանուկյանի՝ ՀՀ քրեական օրենսգրքի 344-րդ հոդվածի 1-ին մասով /2 դրվագ/, քրեական գործին շնորհվել է ԵԴ1/3799/01/24 դատական գործի համարը, աշխատակազմին է հանձնվել 2024 թվականի դեկտեմբերի 19-ին:
1.9․ 2024 թվականի դեկտեմբերի 19-ին Դատարանը որոշում է կայացրել թիվ ԵԴ1/3799/01/24 քրեական գործով վարույթը ստանձնելու և նախնական դատալասումներ նշանակելու մասին:

2. Մեղադրանքի փաստական նկարագրությունը.
ՀՀ ոստիկանության պարեկային ծառայության կողմից թիվ 8180240896 վարչական իրավախախտման գործով 2022 թվականի դեկտեմբերի 28-ին կայացված որոշմամբ Վահագն Վարազդատի Մանուկյանը 1(մեկ) տարի ժամանակով զրկվել է տրանսպորտային միջոցներ վարելու իրավունքից՝ սկսած 2022 թվականի դեկտեմեբերի 28–ից մինչև 2023 թվականի դեկտեմբերի 28-ը, որի մասին տեղում ծանուցվել է և ստացել որոշման պատճենը:
Ծանուցված լինելով, որ զրկված է տրանսպորտային միջոցներ վարելու իրավունքից, Վահագն Վարազդատի Մանուկյանը, 2023 թվականի ապրիլի 18-ին՝ ժամը 01:15-ի սահմաններում, Երևան քաղաքի Արգիշտի փողոցում վարել է «ԲՄՎ» մակնիշի 40 SX 040 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկ Կարեն Սահադյանի կողմից նույն օրը՝ ժամը 01:25-ին, կազմվել է վարչական իրավախախտման վերաբերյալ թիվ 8180250874 արձանագրությունը։
Բացի այդ, նույն որոշմամբ 1(մեկ) տարի ժամանակով զրկված լինելով տրանսպորտային միջոցներ վարելու իրավունքից և այդ մասին ծանուցված լինելով՝ Վահագն Վարազդատի Մանուկյանը 2023 թվականի նոյեմբերի 14-ին՝ ժամը 16:30-ի սահմաններում, Երևան քաղաքի Իսակովի պողոտայում վարել է «ԲՄՎ» մակնիշի 40 SX 040 հաշվառման համարանիշի տրանսպորտային միջոցը, որի վերաբերյալ ոստիկանության պարեկային ծառայության ավագ պարեկ Մանուկ Վարդանյանի կողմից նույն օրը՝ ժամը 16:38-ին, կազմվել է վարչական իրավախախտման վերաբերյալ թիվ կողմից 8180263740 արձանագրությունը։



3. Դատաքննությամբ հետազոտված թույլատրելի ապացույցները.
3.1 Զննություն կատարելու մասին արձանագրությամբ, համաձայն որի զննության են ենթարկվել վարչական տույժ նշանակելու մասին թիվ 8180250874 որոշումը, որը կազմվել է 2023 թվականի ապրիլի 18-ին ՊԾ ԵՔԳ 4-րդ գումարտակի 3-րդ վաշտի պարեկ Կարեն Սահադյանի կողմից այն բանի համար, որ քաղաքացի Վահագն Մանուկյանը 18.04.2023թ.՝ ժամը 01:15-ին, Երևան քաղաքի Արգիշտի փողոցում վարել է «BMW» մակնիշի 40 SX 040 հաշվառման համարանիշի տրանսպորտային միջոցը՝ զրկված լինելով տրանսպորտային միջոց վարելու իրավունքից: Նշված արձանագրության ստորին հատվածում՝ առկա է ստորագրություն:
3․2. ՃՈ էլեկտրոնային ռեգիստրից՝ Վահագն Մանուկյանի վարորդական վկայականի վերաբերյալ տեղեկատվությունն արտացոլող տեղեկանքը, համաձայն որի Վահագն Մանուկյանի վարորդական իրավունքի վկայականը 28.12.2022-28.12.2023թթ. ընկած ժամանակահատվածում ունեցել է զրկված կարգավիճակ:
3․3. Զննության է ենթարկվել 28.12.2022թ.՝ ժամը 02:18-ին, կազմված վարչական իրավախախտման վերաբերյալ թիվ 8180240896 արձանագրությունը: Նշված արձանագրությունը կազմվել է պարեկային ծառայության Երևան քաղաքի գնդի 3-րդ գումարտակի, 2-րդ վաշտի պարեկ Արմեն Մուրադյանի կողմից այն բանի քաղաքացի Վահագն Մանուկյանը 28.12.2022թ.՝ ժամը 02:10-ին, Երևան քաղաքի Կիևյան փողոցում վարել է «BMW» մակնիշի 40 SX 040 հաշվառման համարանիշի տրասնպորտային միջոցը՝ գտնվելով ոչ սթափ վիճակում (մեկ լիտր արտաշնչած օդի մեջ ալկոհոլի պարունակությունը գերազանցում է 0,5 /գլ.): Այնուհետև պարեկային ծառայության աշխատակցի կողմից կայացվել է որոշում Վահագն Մանուկյանին տրանսպորտային միջոց վարելու իրավունքից զրկել մեկ տարի ժամկետով: Նշված որոշման ստորին հատվածում՝ «որոշման պատճեն ստացա» գրառման դիմաց առկա է իրավախախտում կատարած անձի ստորագրություն:
3․4. Զննության է ենթարկվել 2022 թվականի դեկտեմբերի 28-ին, Հայաստանի Հանրապետության Ներքին գործերի նախարարության ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի ծառայող Մուրադյանի կողմից կազմված՝ վարորդի սթափության աստիճանը ստուգելու մասին կտրոնը: Համաձայն նշված կտրոնում առկա տվյալների՝ սարքի համարն է 91100919, զննման համարն է 00786, վարորդ է հանդիսանում Վահագն Մանուկյանը, ալկոհոլի պարունակությունը 0,574 մգ/լ:
3․5. Զննության է ենթարկվել Հայաստանի Հանրապետության Էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ից կողմից տրված թիվ 074585 ստուգաչափման վկայականը: Նշված ստուգաչափման վկայականը ուժի մեջ է 2022 թվականի հուլիսի 11-ից մինչև 2023 թվականի հուլիսի 11-ը, ստուգաչափման սարքի գործարանային համարն է 91100919, տեսակը՝ Jupiter - X/RP, չափման տիրույթը՝ 0.000+0.200մգ/լ ճշտության դասը, կարգը /սխալանքը/ +5+10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008 MT 242-1353- 2012, ստուգաչափողի անվան դիմաց առկա է ստորագրույթուն և նշված է Ա.Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրույթյուն և նշված է Գ.Մարտիրոսյան:
3․6. Վարչական իրավախախտման վերաբերյալ թիվ 8180263740 արձանագրությունը, որը կազմվել է 14.11.2023թ.՝ ժամը 16:38-ին, ՊԾ ԵՔԳ 4-րդ գումարտակի 1-ին վաշտի պարեկ Մանուկ Վարդանյանի կողմից քաղաքացի Վահագն Մանուկյանի նկատմամբ այն բանի համար, որ վերջինս նույն օրը՝ ժամը 16:30-ին, Երևան քաղաքի Իսակովի պողոտայում վարել է «BMW» մակնիշի 40 SX 040 հաշվառման համարանիշի տրասնպորտային միջոցը՝ լինելով զրկված տրանսպորտային միջոցներ վարելու իրավունքից։
3․7․ Արտավարութային փաստաթուղթ ճանաչված զննության ենթարկված քրեական վարույթի նյութերում առկա վարչական իրավախախտման վերաբերյալ թիվ 8180250874 արձանագրությունը, ՀՀ ՆԳՆ ոստիկանության ճանապարհային ոստիկանության էլեկտրոնային ռեգիստրում կատարված հարցման արդյունքները արտացոլող տեղեկանքը, վարչական իրավախախտման վերաբերյալ թիվ 8180240896 արձանագրությունը, պարեկային ծառայության աշխատակից Մուրադյանի կողմից կազմված վարորդի սթափության վիճակի զննության կտրոնը, թիվ 074585 ստուգաչափման վկայականը, վարչական իրավախախտման վերաբերյալ թիվ 8180263740 արձանագրությունը։
3.8․ Մեղադրյալ Վահագն Վարազդատի Մանուկյանի դատարանում տված ցուցմունքը, որի ընթացքում ի պատասխան հանրային մեղադրողի հարցերի՝ հայտնեց, որ իր նկատմամբ զրկման որոշումը կայացվել է խմածության հիմքով, սակայն իրականում ինքը դեղամիջոց է օգտագործում, ինչը հարբածության բարձր տոկոս է ցույց տալիս։ Մի դրվագով հիշում է, որ կես շիշ գարեջուր է խմել ժամը 18։00-ին և երեկոյան 23։30-ին իր մոտ հարբածություն է ցույց տվել։ Մի դրվագով էլ մեքենան նոր էր գնել և մեկ բաժակ կոնյակ էր խմել, իրեն երբ կանգնեցրել են պարեկային ծառայության աշխատակիցները, ինքը տեղեկացրել է, որ դեղամիջոց է ընդունում և այն հարբածության վիճակ է ցույց տալիս, այն արձանագրել են և ասել, որ զրկվում է վարորդական իրավունքից։ Բացի այդ, նույն պարեկային ծառայության աշխատակիցը նույն օրվա ընթացքում իրեն մի քանի անգամ կանգնեցրել է այն պայմաններում, երբ ինքը որևէ իրավախախտում չէր կատարել։ Պարեկային ծառայության աշխատակիցները լրացրել են փաստաթուղթը և ինքն այն ստորագրել է, բայց ինքը չի պատկերացրել, որ այդ պահից սկսած զրկված է տրանսպորտային միջոցներ վարելու իրավունքից, զրկման որոշումը ստորագրել է առանց այն կարդալու։ Իրեն առաջադրված երկու դրվագ մեղադրանքների շուրջ հայտնեց, որ դրանցից մեկ դրվագով, ինքն արդեն տեղյակ եղել է, որ զրկված է տրանսպորատային միջոցներ վարելու իրավունքից։ Ընդունում է, որ մեղավոր է իրեն առաջադրված մեղադրանքի մեջ, զղջում է կատարվածի համար։
Ի պատասխան Դատարանի հարցադրմանը՝ հայտնեց, որ չի փորձել բողոքարկել իրեն տրանսպորտային միջոցներ վարելու իրավունքից զրկելու վերաբերյալ վարչական ակտը, քանի որ չի իմացել, որ զրկված է տրանսպորտային միջոցներ վարելու իրավունքից, կարծել է, որ իրեն պետք է որոշում ուղարկվի, որով կհայտնեն իրեն, որ զրկված է և չի կարող վարել տրանսպորտային միջոց։

4. Դատարանի փաստական վերլուծությունները և դատարանի կողմից հաստատված փաստական հանգամանքները.
ՀՀ ոստիկանության պարեկային ծառայության կողմից թիվ 8180240896 վարչական իրավախախտման գործով 2022 թվականի դեկտեմբերի 28-ին կայացված որոշմամբ Վահագն Վարազդատի Մանուկյանը 1(մեկ) տարի ժամանակով զրկվել է տրանսպորտային միջոցներ վարելու իրավունքից՝ սկսած 2022 թվականի դեկտեմեբրի 28–ից մինչև 2023 թվականի դեկտեմբերի 28-ը, որի մասին տեղում ծանուցվել է և ստացել որոշման պատճենը:
Ծանուցված լինելով, որ զրկված է տրանսպորտային միջոցներ վարելու իրավունքից, Վահագն Վարազդատի Մանուկյանը, 2023 թվականի ապրիլի 18-ին՝ ժամը 01:15-ի սահմաններում, Երևան քաղաքի Արգիշտի փողոցում վարել է «ԲՄՎ» մակնիշի 40 SX 040 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկ Կարեն Սահադյանի կողմից նույն օրը՝ ժամը 01:25-ին, կազմվել է վարչական իրավախախտման վերաբերյալ թիվ 8180250874 արձանագրությունը։
Բացի այդ, նույն որոշմամբ 1(մեկ) տարի ժամանակով զրկված լինելով տրանսպորտային միջոցներ վարելու իրավունքից և այդ մասին ծանուցված լինելով՝ Վահագն Վարազդատի Մանուկյանը 2023 թվականի նոյեմբերի 14-ին՝ ժամը 16:30-ի սահմաններում, Երևան քաղաքի Իսակովի պողոտայում վարել է «ԲՄՎ» մակնիշի 40 SX 040 հաշվառման համարանիշի տրանսպորտային միջոցը, որի վերաբերյալ ոստիկանության պարեկային ծառայության ավագ պարեկ Մանուկ Վարդանյանի կողմից նույն օրը՝ ժամը 16:38-ին, կազմվել է վարչական իրավախախտման վերաբերյալ թիվ կողմից 8180263740 արձանագրությունը։

5. Դատարանի իրավական վերլուծությունները.
5.1. Վերլուծելով մեղադրյալ Վահագն Վարազդատի Մանուկյանին առաջադրված մեղադրանքը և հիմնվելով հետազոտված թույլատրելի և վերաբերելի ապացույցների վրա` Դատարանը գտնում է, որ.
- ապացուցված է մեղադրյալ Վահագն Վարազդատի Մանուկյանին վերագրվող փաստական հանգամանքները, մասնավորապես մեղադրյալ Վահագն Վարազդատի Մանուկյանի կողմից տրանսպորտային միջոցներ վարելու իրավունքից զրկված լինելու պայմաններում 2 /երկու/ անգամ տրանսպորտային միջոց վարելը,
- ապացուցված է վերոգրյալ արարքների քրեական հակաիրավականությունը, որը նախատեսված է ՀՀ քրեական օրենսգրքի 344-րդ հոդվածի 1-ին մասով,
- ապացուցված է մեղադրյալ Վահագն Վարազդատի Մանուկյանի կողմից ՀՀ քրեական օրենսգրքի 344-րդ հոդվածի 1-ին մասով նախատեսված վերոգրյալ արարքները կատարելը.
- ապացուցված է մեղադրյալ Վահագն Վարազդատի Մանուկյանի մեղավորությունը ՀՀ քրեական օրենսգրքի 344-րդ հոդվածի 1-ին մասով նախատեսված արարքները կատարելու մեջ:
Այս համատեքստում Դատարանն արժանահավատ չի համարում մեղադրյալի ցուցմմունքը , քանզի այն չի հաստատվում հետազոտված այլ ապացույցներով:
Ավելին՝ վարչական իրավախախտման արդյունքում պարեկային ծառայության աշխատակցի կողմից կայացված ակտը, որով մեղադրյալը զրկվել է վարորդական իրավունքի վկայականից 1 տարի ժամկետով, ստորագրվել է մեղադրյալի կողմից, ինչով և հավաստվում է, որ մեղադրյալը տեղյակ է եղել զրկված լինելու մասին: Իսկ ինչ վերաբերում է մեղադրյալի կողմից հայտնած այն հանգամանքին, որ դեղամիջոց է ընդունում և այն հարբածության վիճակ է ցույց տալիս, ապա նշված հանգամանքը կարող էր քննարկման առարկա դարձվել վարչական ակտը հատուկ ընթացակարգերով բողոքարկելու իրավունքն իրացնելով: Այլ կերպ, հարբած լինելու հիմքով վարորդական իրավունքից զրկելու վարչական ակտի իրավաչափությունը ստուգելու իրավասությամբ սույն Դատարանը լիազորված չէ:
5.2. Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ Սահմանադրության 71-րդ հոդվածի համաձայն
«1. Հանցանք կատարած անձի պատժի հիմքը նրա մեղքն է:
2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին»:

ՀՀ քրեական օրենսգրքի 7-րդ հոդվածի 1-ին մասի համաձայն`
«1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»:

ՀՀ քրեական օրենսգրքի 55-րդ հոդվածի 2-րդ մասի համաձայն՝
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»:

ՀՀ քրեական օրենսգրքի 69-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ»:

ՀՀ քրեական օրենսգրքի 74-րդ հոդվածի համաձայն`
«1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:»:

Պատիժ նշանակելը քրեական գործով արդարադատության իրականացման վճռական պահն է, որը պետք է դառնա կատարված հանցանքի հասարակական վտանգավորության գնահատման լիարժեք չափանիշ, պատժի ենթարկվող անձին վերասոցիալականացնելու, ինչպես մեղադրյալի, այնպես էլ այլ անձանց կողմից հանցագործությունները կանխելու գործուն միջոց: Արդարության և պատասխանատվության անհատականացման սկզբունքը պատժի տեսակը և չափը որոշելու բազմաթիվ դրույթների ու չափանիշների հետ մեկտեղ անխզելիորեն կապված է պատասխանատվությունը և պատիժը մեղմացնող ու ծանրացնող հանգամանքները հետազոտելու և հաշվի առնելու հետ: ՀՀ քրեական դատավարության օրենսգրքի 102-րդ հոդվածում թվարկված են յուրաքանչյուր քրեական գործով ապացուցման ենթակա փաստական հանգամանքները: Այդ հոդվածի 5-րդ կետի համաձայն քրեական օրենքով նախատեսված պատասխանատվությունը մեղմացնող կամ խստացնող հանգամանքները հաստատվում են միայն ապացույցների հիման վրա: Ընդ որում, անձի պատասխանատվությունը և պատիժը մեղմացնող ու ծանրացնող հանգամանքների գնահատումը յուրաքանչյուր կոնկրետ գործով պատիժ նշանակելիս հնարավորություն է տալիս դատարանին պատկերացում կազմել հանցանքի՝ հանրության համար վտանգավորության աստիճանի, բնույթի, ինչպես նաև հանցավորի անձնավորության մասին և յուրաքանչյուր կոնկրետ գործով անհատականացնել պատիժը: Պատժի անհատականացման կարևորությունն այն է, որ դա լուրջ երաշխիք է ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակների իրականացման համար:
5.3. Դատարանը որպես մեղադրյալի պատասխանատվությունը և պատիժը մեղմացնող հանգամանք հաշվի է առնում այն, որ մեղադրալի խնամքին են իր երկու անչափահաս երեխաները, ինչպես նաև ներկայացված մեղադրանքում իրեն լիովին մեղավոր է ճանաչել:
Դատարանը մեղադրյալի պատասխանատվությունը և պատիժը ծանրացնող հանգամանքներ չի արձանագրում:
5.4. Վերոգրյալ իրավանորմերի համատեքստում քննարկելով այն հարցը, թե ինչ պատժատեսակ և պատժաչափ պետք է նշանակվի մեղադրյալի նկատմամբ, հաշվի առնելով մեղադրյալի կատարած հանցագործության բնույթը և հանրության համար վտանգավորության աստիճանը, ինչպես նաև հանցագործության անմիջական օբյեկտի՝ հասարակության անվտանգության դեմ ուղղված ոտնձգության բնույթը և այդ ոլորտում պետության քրեական քաղաքականության ուղղվածությունը, դրանք համադրելով մեղադրյալի անձը բնութագրող տվյալների հետ, հաշվի առնելով նաև մեղադրյալի պատասխանատվությունը և պատիժը մեղմացնող հանգամանքի առկայությունը և ծանրացնող հանգամանքների բացակայությունը, Դատարանը գտնում է, որ մեղադրյալ Վահագն Վարազդատի Մանուկյանին իր կատարած՝ ՀՀ քրեական օրենսգրքի 344-րդ հոդվածի 1-ին մասով նախատեսված արարքների կատարման համար ենթակա է պատժի այդ հանցագործության համար նախատեսված պատիժներից առավել մեղմ պատժի` տուգանքի ձևով, իսկ առավել խիստ պատիժ նշանակելու հիմքերը բացակայում են:
Միևնույն ժամանակ, հաշվի առնելով, որ թեև մեղադրյալը չի աշխատում, չունի եկամուտներ, Դատարանը գտնում է, որ մեղադրյալի նկատմամբ տուգանքի ձևով պատժի չափը որոշելիս պետք է հաշվի առնել հանցանքը կատարելու պահին նվազագույն աշխատավարձի չափը, որը «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն սահմանված է 75.000 (յոթանասունհինգ հազար) ՀՀ դրամ:
Դատարանը գտնում է, որ 2023 թվականի ապրիլի 18-ին կատարված ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման համար մեղադրյալի նկատմամբ պետք է նշանակվի պատիժ տուգանք՝ նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամի չափով, իսկ 2023 թվականի նոյեմբերի 14-ին կատարված ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման համար մեղադրյալի նկատմամբ պետք է նշանակվի պատիժ տուգանք՝ նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամի չափով։
Դատարանն արձանագրում է, որ ՀՀ քրեական օրենսգրքի 74-րդ հոդվածի 1-ին մասի համաձայն՝ հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, ուստի պատիժները լրիվ գումարելու միջոցով վերջնական պատիժ պետք է սահմանել տուգանք 750.000 /յոթ հարյուր հիսուն հազար/ ՀՀ դրամի չափով, որով կապահովվի ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին և բավարար կլինի սոցիալական արդարությունը վերականգնելու, պատժի ենթարկված անձին վերասոցիալականացնելու և հանցագործությունները կանխելու համար:
5.5. Անդրադառնալով պատիժը մեղադրյալի կողմից կրելու հարցին՝ Դատարանն արձանագրում է, որը մեղադրյալը պատիժը պետք է կրի: Միևնույն ժամանակ հաշվի առնելով, որ մեղադրյալը չի աշխատում, չունի եկամուտներ, ինչպես նաև խնամքին ունի եկիոր անչափահաս երեխա, ուստի Դատարանը գտնում է, որ մեղադրյալն ի վիճակի չէ անհապաղ և ամբողջությամբ վճարելու նշանակված տուգանքը, ուստի արձանագրում է, որ անհրաժեշտ է դատավճռով նրա նկատմամբ նշանակվող տուգանքը տարաժամկետել 12 /տասներկու/ ամիս ժամկետով՝ թույլատրելով վերջինիս յուրաքանչյուր ամիս վճարել առնվազն 62.500 /վաթսուն երկու հազար/ ՀՀ դրամ գումար:
5.6. Անդրադառնալով մեղադրյալի նկատմամբ լրացուցիչ պատիժ նշանակելու հարցին, Դատարանն արձանագրում է, որ միայն հիմնական պատիժը՝ տուգանքը, բավարար է պատժի նպատակներին հասնելու համար, ուստի մեղադրյալի նկատմամբ լրացուցիչ պատժատեսակ նշանակելն աննպատակահարմար է:
5.7. Դատարանն արձանագրում է, որ սույն գործով գույքային հայց չի հարուցվել, բռնագրավման ենթակա գույքի, ինչպես նաև գույքի արգելադրման վերաբերյալ տվյալներ գործում առկա չեն:
5.8. Անդրադառնալով ապացույցների տնօրինման հարցին՝ Դատարանը գտնում է, որ 2024 թվականի ապրիլի 10-ին արտավարութային փաստաթուղթ ճանաչված և վարույթի նյութերին կցված՝ թիվ 8180250874 վարչական իրավախախտման վերաբերյալ արձանագրությունը, ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրում կատարված հարցման արդյունքները, թիվ 8180240896 վարչական իրավախախտման վերաբերյալ արձանագրությունը, պարեկային ծառայության աշխատակից Մուրադյանի կողմից վարորդի սթափության վիճակը ստուգելու մասին կտրոնը, թիվ 074585 ստուգաչափման վկայականը, վարչական իրավախախտման վերաբերյալ թիվ 8180263740 արձանագրությունը պետք է պահել վարույթի նյութերի հետ՝ դրանք պահելու ամբողջ ընթացքում:
5.9. Քննարկելով խափանման միջոցի հարցը` դատարանը գտնում է, որ մեղադրյալի նկատմամբ որպես խափանման միջոց բացակայելու արգելքն ընտրված է ճիշտ և այն վերացվելու կամ փոփոխվելու ենթակա չէ մինչև դատավճռի օրինական ուժի մեջ մտնելը:
5.10. Քննարկելով դատական ծախսերի հարցը՝ Դատարանն արձանագրում է, որ վարույթային ծախսեր առկա չեն:
Վերոգրյալի հիման վրա և ղեկավարվելով Հայաստանի Հանրապետության քրեական դատավարության օրենսգրքի 100-րդ, 167-րդ, 347-350-րդ, 352-353-րդ, 364-րդ հոդվածներով, Դատարանը`

Վ Ճ Ռ Ե Ց

Մեղադրյալ Վահագն Վարազդատի Մանուկյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցանքներում և յուրաքանչյուր դրվագի համար պատիժ նշանակել տուգանք՝ նվազագույն աշխատավարձի հինգապատիկի` 375.000 /երեք հարյուր յոթանասունհինգ հազար/ ՀՀ դրամ գումարի չափով:
ՀՀ քրեական օրենսգրքի 74-րդ հոդվածի կիրառմամբ հանցանքների համակցությամբ պատիժները լրիվ գումարելու միջոցով վերջնական հիմնական պատիժ նշանակել տուգանք՝ 750.000 /յոթ հարյուր հիսուն հազար/ ՀՀ դրամը:
Վահագն Վարազդատի Մանուկյանին թույլատրել դատավճռով նշանակված 750.000 ՀՀ դրամ գումարի չափով տուգանքը վճարել մաս առ մաս, 12 /տասներկու/ ամսվա ընթացքում՝ յուրաքանչյուր ամիս վճարելով առնվազն 62.500 /վաթսուն երկու հազար/ ՀՀ դրամ գումար:
Մեղադրյալ Վահագն Վարազդատի Մանուկյանի նկատմամբ ընտրված խափանման միջոց բացակայելու արգելքը պահպանել՝ մինչև դատավճռի օրինական ուժի մեջ մտնելը:
Վարութային ծախսերի հարցը համարել լուծված։
Վարույթի նյութերին կցված արտավարութային փաստաթղթերը պահել վարույթի նյութերի հետ՝ դրանք պահելու ամբողջ ընթացքում:
Դատավճիռը կարող է բողոքարկվել ՀՀ վերաքննիչ քրեական դատարան` դատական ակտը ստանալու օրվանից հետո մեկամսյա ժամկետում:


ԴԱՏԱՎՈՐ՝ Ա. ՄԵԼԻՔՍԵԹՅԱՆ