ԵԴ1/3751/01/24

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

04 ապրիլի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան), նախագահությամբ՝ դատավոր Մասիս Մելքոնյանի, քարտուղարությամբ՝ Մ.Մկրտչյանի, մասնակցությամբ՝ հանրային մեղադրող Հ.Միքաելյանի, մեղադրյալ Ա.Խաչատրյանի, պաշտպան՝ Հ.Հովհաննիսյանի, քննության առնելով համաձայնեցման վարույթի կարգի կիրառմամբ թիվ ԵԴ1/3751/01/24 վարույթն ըստ մեղադրանքի Արթուր Անդրանիկի Խաչատրյանի (ծնված՝ 1978թ. հոկտեմբերի 25-ին Ռուսաստանի Դաշնությունում, ազգությամբ հայ, ՀՀ քաղաքացի, նախկինում չդատված, ամուսնացած, միջնակարգ կրթությամբ, անհատ ձեռնարկատեր, հաշվառված և բնակվող ք. Երևան, Կոմիտասի պողոտա 30 շենք, 125 բնակարան հասցեում) ՀՀ քրեական օրենսգրքի 355-րդ հոդվածի 2-րդ մասով.

Պ Ա Ր Զ Ե Ց

1. Գործի դատավարական նախապատմությունը.
1.1. 2023 թվականի ապրիլի 15-ին ժ. 11.50-ին շտապօգնության 2-րդ ենթակայանից հաղորդում է ստացվել, որ շտապօգնության 25 խումբը կանչով մեկնել է Նազարբեկյան թաղամաս 41/1 հասցե, որտեղ բարձրությունից ընկած 40 տարեկան տղամարդ կա մահացած: Մեկնել են բաժնի պետի օ/գ տեղակալ Սահակյանը օ/խ-ով, դատաբժիշկ Բաբայանը որտեղ պարզել են որ Վարդան Վոլոդիայի Սարգսյանը /18.08.1968թ.ծ., բն. էր Փափազյան փողոց. 17շ. բն. 2/ ժ. 11.00-ի սահմաններում Նազարբեկյան թաղամասի 41/1 հասցեում գտնվող նորակառույց շենքի վերելակը նորոգելու ժամանակ 12-րդ հարկից վայր է ընկել վերելակի դիտահորը և մահացել:
1.2. 2023 թվականի ապրիլի 15-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում ՀՀ քրեական օրենսգրքի 355-րդ հոդվածի 2-րդ մասով նախաձեռնվել է թիվ 10151323 քրեական վարույթը:
1.3. 2023 թվականի ապրիլի 15-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել թիվ 10151323 քրեական վարույթով Վարդան Սարգսյանին տուժող ճանաչելու մասին:
1.4. 2023 թվականի ապրիլի 15-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել դիակի դատաբժշկական փորձաքննություն նշանակելու մասին:
1.5. 2023 թվականի մայիսի 12-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել թիվ 10151323 քրեական վարույթով մահացած տուժող՝ Վարդան Վոլոդյայի Սարգսյանի դստերը՝ Տաթևիկ Վարդանի Սարգսյանին տուժող ճանաչելու մասին:
1.6. 2023 թվականի հունիսի 30-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել տեխնիկայի անվտանգության դատատեխնիկական փորձաքննություն նշանակելու և դրա կատարումը ՀՀ ԱՆ «Փորձաքննությունների ազգային բյուրո» ՊՈԱԿ-ի փորձագետներին հանձնարարելու մասին:
1.7. 2024 թվականի հունվարի 08-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում ստացվել է դիակի դատաբժշկական փորձաքննության փորձագետի թիվ 0428 եզրակացությունը:
1.8. 2024 թվականի հուլիսի 11-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում ստացվել է ճարտարագիտատեխնիկական փորձաքննության փորձագետի թիվ 23-1576 եզրակացությունը:
1.6. 2024 թվականի նոյեմբերի 29-ին քրեական վարույթով հսկողություն իրականացնող դատախազի կողմից որոշում է կայացվել Արթուր Անդրանիկի Խաչատրյանի նկատմամբ ՀՀ քրեական օրենսգրքի 355-րդ հոդվածի 2-րդ մասով հանրային քրեական հետապնդում հարուցելու մասին:
1.7. 2024 թվականի նոյեմբերի 30-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել «ՇԻՆԱՐՏ ԳՐՈՒՊ» ՍՊԸ-ի և «Արթուր Խաչատրյան Անդրանիկի» Ա/Ձ-ի միջև կնքված աշխատանքների կատարման պայմանագիրը որպես արտավարութային փաստաթուղթ ճանաչելու մասին:
1.8. 2024 թվականի նոյեմբերի 30-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել շինարարական թույլտվության 01/18-11989-220 համարի փաստաթուղթը որպես արտավարութային փաստաթուղթ ճանաչելու մասին:
1.9. 2024 թվականի նոյեմբերի 30-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել ՀՀ ԱՆ իրավաբանական անձանց պետական ռեգիստրի կողմից տրված պետական միասնական գրանցամատյանի քաղվածքը որպես արտավարութային փաստաթուղթ ճանաչելու մասին:
1.10. 2024 թվականի նոյեմբերի 30-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել Անշարժ գույքի նկատմամբ իրավունքների պետական գրանցման 22042022-01-0286 համարի վկայականը որպես արտավարութային փաստաթուղթ ճանաչելու մասին:
1.11. 2024 թվականի նոյեմբերի 30-ին ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում որոշում է կայացվել Արթուր Անդրանիկի Խաչատրյանի նկատմամբ որպես խափանման միջոց բացակայելու արգելքը ընտրելու մասին:
1.11. 10.12.2024 թվականին թիվ 10151323 քրեական վարույթով կազմվել է մեղադրական եզրակացություն, որը ՀՀ դատախազության Երևան քաղաքի Աջափնյակ և Դավթաշեն վարչական շրջանների դատախազության դատախազ Հ.Միքաելյանի՝ 13.12.2024 թվականի որոշմամբ, հաստատվել է:
1.12. 13.12.2024 թվականին թիվ 10151323 քրեական վարույթը՝ հաստատված մեղադրական եզրակացությամբ, ընդունվել է Երևան քաղաքի առաջին ատյանի ընդհանուր իրավասության քրեական դատարան: Քրեական վարույթին շնորհվել է թիվ ԵԴ1/3751/01/24 համարը, որը նույն օրը մակագրվել և 13.12.2024թ. հանձնվել է դատավոր Մ.Մելքոնյանի աշխատակազմին:
1.13. 16.12.2024 թվականին որոշում է կայացվել վարույթ ստանձնելու և նախնական դատալսումներ նշանակելու մասին:
2. Մեղադրանքի փաստական նկարագրությունը և տրված իրավաբանական որակումը.
Արթուր Անդրանիկի Խաչատրյանը մեղադրվում է ՀՀ քրեական օրենսգրքով նախատեսված այն հանցանքի կատարման համար, որ նա ըստ պայմանագրի պարտավոր լինելով պահպանել Երևան քաղաքի Նազարբեկյան 41/1 հասցեում կառուցվող բնակելի շենքում մետաղական վերելակահորերի մոնտաժման աշխատանքների կատարման ընթացքում աշխատանքի պաշտպանության և անվտանգության ապահովման՝ ՀՀ օրենսդրությամբ սահմանված կանոններն ու պահանջները, չի պահպանել և խախտել է աշխատանքի պաշտպանության և անվտանգության այդ կանոններն ու պահանջները, որն անզգուշությամբ առաջացրել է Վարդան Վոլոդյայի Սարգսյանի մահը:
Այսպես. 2023 թվականի հունվարի 20-ին «ՇԻՆԱՐՏ ԳՐՈւՊ» ՍՊ ընկերության և «Արթուր Խաչատրյան Անդրանիկ» անհատ ձեռնարկատիրոջ միջև կնքվել է աշխատանքների կատարման No: 1 պայմանագիրը, համաձայն որի' «Արթուր Խաչատրյան Անդրանիկ» անհատ ձեռնարկատերը պարտավորվել է Երևան քաղաքի Նազարբեկյան 41/1 հասցեում կառուցվող շենքում իրականացնել 2 (երկու) հատ մետաղական վերելակահորերի մոնտաժման աշխատանքներ: Անհատ ձեռնարկատեր Արթուր Անդրանիկի Խաչատրյանը, նշված պայմանագրով հանդիսանալով Երևան քաղաքի Նազարբեկյան 41/1 հասցեում գտնվող շենքի մետաղական վերելակահորերի մոնտաժման աշխատանքների պաշտպանության և անվտանգության ապահովման կանոնների պահպանման համար պատասխանատու անձ, խախտել է շինարարական աշխատանքների կատարման ընթացքում աշխատանքի պաշտպանության և անվտանգության ապահովման՝ Հայաստանի Հանրապետությունում գործող ՀՀՇՆ 13-02-2022 «Անվտանգության տեխնիկա շինարարությունում» ՀՀ շինարարական նորմերի 4-րդ՝ «Անվտանգության տեխնիկայի ընդհանուր պահանջներ»-ը գլխի 13-րդ, 50-րդ 70-րդ, 77-րդ, 82-րդ, 97-րդ, լույն նորմատիվ ակտի 8-րդ՝ «Աշխատանքի անվտանգության տեխնիկայի գծով ուսուցման կազմակերպումը շինարարությունում» գլխի 781-րդ և 782-րդ կետերի, ինչպես նաև ՀՀ վշխատանքային օրենսգրքի 217-րդ հոդվածի 5-րդ և 254-րդ հոդվածի 1-ին մասերի պահանջները, մասնավորապես՝ մշտապես գործող արտադրական վտանգավոր գործոններով օժտված վայր հանդիսացող՝ գետնից մոտ 50,0 մետր բարձրության վրա նշված հասցեի նորակառույց շենքի 13-րդ հարկի վերելակի համար նախատեսված հորանի բաց հատվածում Վարդան Վոլոդյայի Սարգսյանի կողմից 2023 թվականի ապրիլի 15-ին շինմոնտաժային աշխատանքներ կատարելու ժամամակ Արթուր Խաչատրյանը չի ապահովել անվտանգ և նորմալ աշխատանքային պայմաններ, բարձրության վրա աշխատանքներ կատարելուց առաջ Վարդան Սարգսյանին չի տրամադրել անհատականացման պաշտպանության միջոցներ' նախապաշտպանական անվտանգության գոտի և սաղավարտ, չի տեղադրել զսպող անվտանգության համակարգերի և (կամ) անհատական պաշտպանության միջոցների կիրառման համար ճոպանների հասանելիության համակարգեր, ինչպես նաև նմանատիպ աշխատանքների կատարման համար անվտանգության տեխնիկայի վերաբերյալ Վարդան Սարգսյանին գրավոր չի հրահանգավորել, ինչի հետևանքով Վարդան Սարգսյանը, բանավոր համաձայնության հիման վրա, առանց օրինական գրանցման, առանց շինարարական հրապարակում գտնվելու և նման աշխատանքներ կատարելու համար պահանջվող անվտանգության տեխնիկայի վերաբերյալ գրավոր հրահանգավորման, ինչպես նաև առանց անհատական պաշտպանության միջոցների կիրառման 2023 թվականի ապրիլի 15-ին՝ ժամը 10:30-ից մինչև ժամը 11:20-ն ընկած ժամանակահատվածում, Երևան քաղաքի Նազարբեկյան 41/1 հասցեում կառուցված բազմաբնակելի շենքի 13-րդ հարկում' մշտապես գործող արտադրական վտանգավոր գործոններով օժտված վայր հանդիսացող՝ գետնից մոտ 50,0 մետր բարձրություն ունեցող վերելակի համար նախատեսված բաց հորանի վրա կատարել է շինհավաքակցման աշխատանքներ, որի ընթացքում վերելակի հորանի բաց հատվածից վերջինս վայր է ընկել հորանի հատակին և կյանքի հետ անհամատեղելի՝ գլխի, ողնաշարի, կրծքավանդակի, որովայնի խոռոչների, վերին և ստորին վերջույթների համակցված, բութ ձևով ստացած մարմնական վնասվածքների հետևանքով տեղում մահացել է: Այսինքն՝ Արթուր Անդրանիկի Խաչատրյանին մեղսագրվում է արարք, որը նախատեսված է ՀՀ քրեական օրենսգրքի 355-րդ հոդվածի 2-րդ մասով:

3․Համաձայնեցված վարույթ․

3.1․ Նախնական դատալսումների ընթացքում 04.04.2025 թվականի դատական նիստի ժամանակ հանրային մեղադրող Հ.Միքաելյանը հայտարարել է, որ կողմերը եկել են համաձայնության և պաշտպանը միջնորդել է կիրառել համաձայնեցման վարույթ։
3.2. Դատարանը, համոզվելով, որ առկա է ՀՀ քրեական դատավարության օրենսգրքի 458-րդ հոդվածի 1-ին մասով նախատեսված հիմքերը և միաժամանակ բացակայում են ՀՀ քրեական դատավարության օրենսգրքի 458-րդ հոդվածի 2-րդ մասով նախատեսված` համաձայնեցման վարույթի կիրառումը բացառող հանգամանքները, որոշում է կայացրել ներկայացված միջնորդությունը բավարարել և ղեկավարվելով ՀՀ քրեական դատավարության օրենսգրքի 459-րդ հոդվածով` կողմերին բանակցությունների համար տրամադրել է ժամանակ:
3.3. Հանրային մեղադրող Հրանուշ Միքայելյանի կողմից 2025 թվականի ապրիլի 04-ի դատական նիստին Դատարանին է ներկայացվել ՀՀ քրեական դատավարության օրենսգրքի 460-րդ հոդվածով սահմանված, վերաբերելի պահանջներին համապատասխանող, կողմերի միջև կնքված համաձայնության գալու վերաբերյալ արձանագրությունը՝ ստորագրված մեղադրյալի նրա պաշտպանների և մեղադրողի կողմից.
3.4. Համաձայնության մասին արձանագրությունն ընդունելուց հետո Դատարանն, արձանագրելով, որ համաձայնության մասին արձանագրությունը համապատասխանում է օրենքով սահմանված վերաբերելի պահանջներին, որոշում է կայացրել լրացուցիչ դատալսումներ անցկացնելու մասին:
3.5. Լրացուցիչ դատալսումների ընթացքում հանրային մեղադրողը հրապարակել է համաձայնության մասին արձանագրությունը:
3.6. Համաձայնության մասին արձանագրության հրապարակումից հետո մեղադրյալը հայտարարել է, որ իրեն պարզ է կնքված համաձայնության բովանդակությունը և համաձայն է դրան, դրանով արտահայտվել է իր իրական կամքը, գիտակցում է կնքված համաձայնության հետևանքները, պնդում է կնքված համաձայնությունը, այն կնքելիս բռնության, սպառնալիքի կամ հարկադրանքի այլ միջոցի ազդեցություն չի եղել:
3.7. Պաշտպանները և հանրային մեղադրողը հայտնեցին, որ պնդում են կնքված համաձայնությունը:
4. Համաձայնության մասին արձանագրության բովանդակությունը.

ԱՐՁԱՆԱԳՐՈՒԹՅՈՒՆ
Թիվ ԵԴ1/3751/01/24 (քրեական վարույթի համարը՝ 10151323)
քրեական գործով ՀՀ քրեական դատավարության օրենսգրքի 460-րդ հոդվածով սահմանված կարգով համաձայնության գալու վերաբերյալ
Սույն արձանագրությունը կազմվել է 2025 թվականի մարտի 13-ին Երևան քաղաքի Աջափնյակ և Դավթաշեն վարչական շրջանների դատախազությունում՝ ք. Երևան, Լենինգրադյան 4ա
Մասնակցությամբ՝
1. Հանրային մեղադրող՝ Երևան քաղաքի Աջափնյակ և Դավթաշեն վարչական շրջանների դատախազության ավագ դատախազ, երկրորդ դասի խորհրդական՝ Հրանուշ Գագիկի Միքաելյան
2․ Մեղադրյալ՝ Արթուր Անդրանիկի Խաչատրյան (ծնված՝ 1978 թվականի հոկտեմբերի 25-ին Ռուսաստանի Դաշնությունում, հաշվառված և բնակվում է Երևան քաղաքի Կոմիտասի պողոտայի 30-րդ շենքի 125-րդ բնակարանում, ազգությամբ հայ, ՀՀ քաղաքացի, միջնակարգ կրթությամբ, մայրենի լեզուն՝ հայերեն, անհատ ձեռնարկատեր, նախկինում չդատված, ամուսնացած, խնամքին երկու անչափահաս երեխա)
3. Պաշտպան՝ ՀՀ ՓՊ փաստաբան Հասմիկ Ռաֆիկի Հովհաննիսյան (արտոնագիր թիվ 1048)
2024 թվականի նոյեմբերի 30-ին Արթուր Անդրանիկի Խաչատրյանի նկատմամբ ընտրվել է բացակայելու արգելք խափանման միջոցը:
Մեղադրյալ Արթուր Անդրանիկի Խաչատրյանը մեղադրվում է ՀՀ քրեական օրենսգրքով նախատեսված այն հանցավոր արարքի կատարման համար, որ նա, ըստ պայմանագրի պարտավոր լինելով պահպանել Երևան քաղաքի Նազարբեկյան 41/1 հասցեում կառուցվող բնակելի շենքում մետաղական վերելակահորերի մոնտաժման աշխատանքների կատարման ընթացքում աշխատանքի պաշտպանության և անվտանգության ապահովման՝ ՀՀ օրենսդրությամբ սահմանված կանոններն ու պահանջները, չի պահպանել և խախտել է աշխատանքի պաշտպանության և անվտանգության այդ կանոններն ու պահանջները, որն անզգուշությամբ առաջացրել է Վարդան Վոլոդյայի Սարգսյանի մահը:
Այսպես.
2023 թվականի հունվարի 20-ին «ՇԻՆԱՐՏ ԳՐՈւՊ» ՍՊ ընկերության և «Արթուր Խաչատրյան Անդրանիկ» անհատ ձեռնարկատիրոջ միջև կնքվել է աշխատանքների կատարման No 1 պայմանագիրը, համաձայն որի՝ «Արթուր Խաչատրյան Անդրանիկ» անհատ ձեռնարկատերը պարտավորվել է Երևան քաղաքի Նազարբեկյան 41/1 հասցեում կառուցվող շենքում իրականացնել 2 (երկու) հատ մետաղական վերելակահորերի մոնտաժման աշխատանքներ: Անհատ ձեռնարկատեր Արթուր Անդրանիկի Խաչատրյանը, նշված պայմանագրով հանդիսանալով Երևան քաղաքի Նազարբեկյան 41/1 հասցեում գտնվող շենքի մետաղական վերելակահորերի մոնտաժման աշխատանքների պաշտպանության և անվտանգության ապահովման կանոնների պահաանման համար պատասխանատու անձ, խախտել է շինարարական աշխատանքների կատարման ընթացքում աշխատանքի պաշտպանության և անվտանգության ապահովման Հայաստանի Հանրապետությունում գործող ՀՀՇՆ 13-02-2022 «Անվտանգության տեխնիկա շինարարությունում» ՀՀ շինարարական նորմերի 4-րդ՝ «Անվտանգության տեխնիկայի ընդհանուր պահանջներ»-ը գլխի 13-րդ, 50-րդ, 70-րդ, 77-րդ, 82-րդ, 97-րդ, նույն նորմատիվ ակտի 8-րդ՝ «Աշխատանքի անվտանգության տեխնիկայի գծով ուսուցման կազմակերպումը շինարարությունում» գլխի 781-րդ և 782-րդ կետերի, ինչպես նաև ՀՀ Աշխատանքային օրենսգրքի 217-րդ հոդվածի 5-րդ և 254-րդ հոդվածի 1-ին մասերի պահանջները, մասնավորապես՝ մշտապես գործող արտադրական վտանգավոր գործոններով օժտված վայր հանդիսացող՝ գետնից մոտ 50,0 մետր բարձրության վրա նշված հասցեի նորակառույց շենքի 13-րդ հարկի վերելակի համար նախատեսված հորանի բաց հատվածում Վարդան Վոլոդյայի Սարգսյանի կողմից 2023 թվականի ապրիլի 15-ին շինմոնտաժային աշխատանքներ կատարելու ժամանակ Արթուր Խաչատրյանը չի ապահովել անվտանգ և նորմալ աշխատանքային պայմաններ, բարձրության վրա աշխատանքներ կատարելուց առաջ Վարդան Սարգսյանին չի տրամադրել անհատականացման պաշտպանության միջոցներ՝ նախապաշտպանական անվտանգության գոտի և սաղավարտ, չի տեղադրել զսպող անվտանգության համակարգերի և (կամ) անհատական պաշտպանության միջոցների կիրառման համար ճոպանների հասանելիության համակարգեր, ինչպես նաև նմանատիպ աշխատանքների կատարման համար անվտանգության տեխնիկայի վերաբերյալ Վարդան Սարգսյանին գրավոր չի հրահանգավորել, ինչի հետևանքով Վարդան Սարգսյանը, բանավոր համաձայնության հիման վրա, առանց օրինական գրանցման, առանց շինարարական հրապարակում գտնվելու նման աշխատանքներ կատարելու համար պահանջվող անվտանգության տեխնիկայի վերաբերյալ գրավոր հրահանգավորման, ինչպես նաև առանց անհատական պաշտպանության միջոցների կիրառման 2023 թվականի ապրիլի 15-ին՝ ժամը 10:30-ից մինչև ժամը 11:20-ն ընկած ժամանակահատվածում, Երևան քաղաքի Նազարբեկյան 41/1 հասցեում կառուցված բազմաբնակելի շենքի 13-րդ հարկում՝ մշտապես գործող արտադրական վտանգավոր գործոններով օժտված վայր հանդիսացող՝ գետնից մոտ 50,0 մետր բարձրություն ունեցող վերելակի համար նախատեսված բաց հորանի վրա կատարել է շինհավաքակցման աշխատանքներ, որի ընթացքում վերելակի հորանի բաց հատվածից վերջինս վայր է ընկել հորանի հատակին և կյանքի հետ անհամատեղելի՝ գլխի, ողնաշարի, կրծքավանդակի, որովայնի խոռոչների, վերին և ստորին վերջույթների համակցված ութ ձևով ստացած մարմնական վնասվածքների հետևանքով տեղում մահացել է:
Այսինքն, Արթուր Անդրանիկի Խաչատրյանին մեղսագրվում է հանցավոր արարքի կատարում՝ նախատեսված ՀՀ քրեական օրենսգրքի 355-րդ հոդվածի 2-րդ մասով:
Անդրադառնալով մեղադրյալ Արթուր Անդրանիկի Խաչատրյանի պատժի հարցին՝ բանակցությունների արդյունքում հաշվի է առնվել այն, որ Ա. Խաչատրյանը նախկինում դատապարտված չի եղել, առաջադրված մեղադրանքում իրեն մեղավոր է ճանաչել, խնամքի տակ ունի երկու անչափահաս երեխաներ՝ Ալեքսանդր Արթուրի Խաչատրյանը (ծնված՝ 2015 թվականի մայիսի 14-ին) և Դանիելա Արթուրի Խաչատրյանը (ծնված՝ 2011 թվականի նոյեմբերի 01-ին), տուժող Տաթևիկ Վարդանի Սարգսյանը պատճառված վնասը հատուցելու կամ այլ կերպ հարթելու պահանջ չի ներկայացրել:
Հիմք ընդունելով ՀՀ քրեական դատավարության օրենսգրքի 460-րդ հոդվածի 4-րդ մասի 9-րդ կետը և ղեկավարվելով ՀՀ քրեական օրենսգրքի 77-րդ, 79-րդ և 84-րդ հոդվածներով՝ կողմերը համաձայնվում են մեղադրյալին մեղսագրվող արարքի համար հետևյալ պատժատեսակի և պատժաչափի վերաբերյալ՝
Համաձայնեցված պատիժը՝ ՀՀ քրեական օրենսգրքի 355-րդ հոդվածի 2-րդ մասով` ազատազրկում՝ 4 (չորս) տարի ժամկետով:
ՀՀ քրեական օրենսգրքի 84-րդ հոդվածի կիրառմամբ նշանակված պատիժը պայմանականորեն չկիրառել և սահմանել փորձաշրջան՝ 3 (երեք) տարի ժամկետով։
Փորձաշրջանի ընթացքում Արթուր Անդրանիկի Խաչատրյանի վրա դնել առանց իր վարքագծի նկատմամբ վերահսկողություն իրականացնող իրավասու մարմնի համաձայնության Հայաստանի Հանրապետության տարածքը չլքելու և բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում իր նոր բնակության վայրի հասցեն հայտնելու պարտականությունը:
Հանրային մեղադրող՝ Հրանուշ Միքաելյան
Մեղադրյալ՝ Արթուր Խաչատրյան
Պաշտպան՝ Հասմիկ Հովհաննիսյան

5․Դատարանի իրավական վերլուծությունները պատճառաբանական մասը.
5.1. ՀՀ քրեական դատավարության օրենսգրքի 458-րդ հոդվածի համաձայն` «1. Դատարանը համաձայնեցման վարույթ կիրառում է հանրային մեղադրանքով նախնական դատալսումների ընթացքում` մեղադրյալի միջնորդության հիման վրա:2. Համաձայնեցման վարույթ չի կարող կիրառվել, եթե՝1) մեղադրյալը մեղադրվում է առանձնապես ծանր հանցանք կատարելու համար.2) վարույթում ներգրավված մի քանի մեղադրյալից առնվազն մեկն առարկում է համաձայնեցման վարույթ կիրառելու դեմ.3) մեղադրյալը չունի պաշտպան կամ միջնորդությունը ներկայացրել է առանց պաշտպանի հետ խորհրդակցելու.4) համաձայնեցման վարույթ կիրառելու դեմ իրավական կամ փաստական հիմնավորմամբ առարկում է հանրային մեղադրողը.5) առերևույթ հիմնավորվում է, որ հանցագործությամբ պատճառված վնասը հատուցված չէ, և համաձայնեցման վարույթ կիրառելու դեմ առարկում է տուժողը:»
5.2. ՀՀ քրեական դատավարության օրենսգրքի 459-րդ հոդվածի համաձայն`«1. Դատարանը բավարարում է համաձայնեցման վարույթ կիրառելու մասին միջնորդությունը, եթե առկա է սույն օրենսգրքի 458-րդ հոդվածի 1-ին մասով նախատեսված հիմքը, բացակայում են սույն օրենսգրքի 458-րդ հոդվածի 2-րդ մասով նախատեսված` համաձայնեցման վարույթի կիրառումը բացառող հանգամանքները, ինչպես նաև եթե մեղադրյալը համաձայն է իրեն մեղսագրվող արարքին, միջնորդությունը ներկայացրել է կամավոր և գիտակցում է իր միջնորդության բնույթը և հետևանքները: 2. Մեղադրյալի միջնորդությունը բավարարելու դեպքում դատարանը կողմերի բանակցությունների համար սահմանում է առավելագույնը մեկամսյա ժամկետ: 3. Դատարանը համաձայնեցման վարույթ կիրառելու մասին միջնորդությունը մերժում է առանձին որոշմամբ:
5.3. ՀՀ քրեական դատավարության օրենսգրքի 460-րդ հոդվածի համաձայն`«1. Համաձայնեցման վարույթ կիրառելու մասին միջնորդությունը բավարարելուց հետո հանրային մեղադրողը համաձայնության գալու նպատակով բանակցություններ է սկսում մեղադրյալի և նրա պաշտպանի հետ (…): 3. Հատուցման ենթակա վնասի բնույթի և չափի վերաբերյալ համաձայնության գալուց հետո կողմերը բանակցություններ են սկսում մեղադրյալի նկատմամբ կիրառման ենթակա պատժի (պատժատեսակի և պատժաչափի), ներառյալ այն կրելու նպատակահարմարության, ինչպես նաև բռնագրավման ենթակա գույքի և դրա չափի վերաբերյալ: Համաձայնության արդյունքով սահմանվող պատիժը և բռնագրավվող գույքը պետք է համապատասխանեն Հայաuտանի Հանրապետության քրեական օրենսգրքի ընդհանուր մասի վերաբերելի դրույթներին: 4. Բանակցությունների արդյունքով համաձայնության գալու դեպքում կողմերը կազմում են համաձայնության մասին արձանագրություն, որում նշվում են՝ 1) արձանագրությունը կազմելու տեղը և ժամանակը. 2) հանրային մեղադրողի անունը, ազգանունը, զբաղեցրած պաշտոնը. 3) մեղադրյալի անունը, ազգանունը, հայրանունը, ծննդյան թիվը, ամիսը, օրը և ծննդավայրը, բնակության հասցեն, քաղաքացիությունը, կրթությունը, մայրենի լեզուն աշխատանքի կամ ուսման վայրը, մեղադրյալի դատվածության առկայությունը, ինչպես նաև այլ վերաբերելի տեղեկություններ. 4) պաշտպանի անունը և ազգանունը. 5) տուժողի անունը և ազգանունը, եթե տուժողը մասնակցել է համաձայնության կայացմանը. 6) մեղադրյալի նկատմամբ կիրառված խափանման միջոցը և դրա կիրառման ժամկետը. 7) մեղադրական եզրակացության մեջ նշված արարքը և դրա համաձայնեցված իրավական գնահատականը. 8) հատուցված կամ հատուցման ենթակա վնասի բնույթը և չափը. 9) համաձայնեցված պատիժը (պատժատեսակը և պատժաչափը), ներառյալ այն կրելու նպատակահարմարության հարցը. 10) բռնագրավման ենթակա գույքը և դրա չափը (եթե դրանք համաձայնեցվել են) (…) 6. Հանցագործությունների համակցության դեպքում արձանագրության մեջ առանձին նշվում են յուրաքանչյուր հանցագործության համար համաձայնեցված պատժի տեսակը և չափը, ինչպես նաև վերջնական պատժի տեսակը և չափը: 7. Համաձայնությունը համարվում է կնքված մեղադրյալի, նրա պաշտպանի, հանրային մեղադրողի և բանակցություններին մասնակցելու դեպքում տուժողի կողմից համաձայնության մասին արձանագրությունը ստորագրելու պահից: 8. Համաձայնության մասին արձանագրության մեկական օրինակ հանրային մեղադրողը հանձնում է դատարան, մեղադրյալին, նրա պաշտպանին և տուժողին: 9. Սույն հոդվածի 3-րդ մասով սահմանված հարցերի վերաբերյալ համաձայնության չգալու դեպքում նախնական դատալսումները շարունակվում են սույն օրենսգրքով սահմանված ընդհանուր կարգով:»
5.4. ՀՀ քրեական դատավարության օրենսգրքի 461-րդ հոդվածի համաձայն`«1. Համաձայնության մասին արձանագրությունն ընդունելուց հետո դատարանը որոշում է կայացնում լրացուցիչ դատալսումներ անցկացնելու մասին: 2. Դատարանը չի ընդունում համաձայնության մասին արձանագրությունը և ընդհանուր կարգով շարունակում է նախնական դատալսումները, եթե, կողմերի բանակցությունների ընթացքում ծանոթանալով քրեական գործին, հանգել է հետևության, որ` 1) մեղադրյալին մեղսագրվող արարքն ակնհայտորեն կատարվել է մեղադրյալ չհանդիսացող այլ անձի կողմից կամ նրա մասնակցությամբ. 2) մեղադրյալին մեղսագրված արարքին տրված իրավական գնահատականն ակնհայտորեն չի համապատասխանում մեղադրանքի փաստական հանգամանքներին: 3. Դատարանը չի ընդունում համաձայնության մասին արձանագրությունը և սահմանում է նոր արձանագրություն կազմելու և դատարան ներկայացնելու առավելագույնը տասնհինգօրյա ժամկետ, եթե այն չի համապատասխանում սույն օրենսգրքի 460-րդ հոդվածով սահմանված պահանջներին, ինչպես նաև եթե համաձայնեցված պատիժը կամ բռնագրավման ենթակա գույքը կամ դրա չափն անօրինական է: Եթե դատարանի սահմանած ժամկետում կողմերը չեն ներկայացնում համաձայնության մասին պատշաճ արձանագրություն, ապա դատարանն ընդհանուր կարգով շարունակում է նախնական դատալսումները:»
5.5. ՀՀ քրեական դատավարության օրենսգրքի 462-րդ հոդվածի համաձայն` «1. Լրացուցիչ դատալսումներն անցկացվում են մեղադրյալի, նրա պաշտպանի, հանրային մեղադրողի, իսկ բանակցություններին մասնակցելու դեպքում` նաև տուժողի պարտադիր մասնակցությամբ: 2. Լրացուցիչ դատալսումներն սկսվում են հանրային մեղադրողի կողմից համաձայնության մասին արձանագրության հրապարակմամբ: 3. Համաձայնության մասին արձանագրության հրապարակումից հետո դատարանը մեղադրյալին հարցնում է, թե արդյոք նրան պարզ է կնքված համաձայնության բովանդակությունը, և արդյոք նա համաձայն է դրան: Այնուհետև դատարանը պարզում է, թե արդյոք մեղադրյալն արտահայտել է իր իրական կամքը, գիտակցում է կնքված համաձայնության հետևանքները և պնդում է արդյոք կնքված համաձայնությունը: 4. Դատարանը պաշտպանին և հանրային մեղադրողին հարցնում է, թե արդյոք նրանք պնդում են կնքված համաձայնությունը: 5. Դատարանը տուժողին հարցնում է, թե արդյոք նա պնդում է կնքված համաձայնությունը` հատուցման ենթակա վնասի չափի մասով: 6. Համաձայնության մասին արձանագրությունը հետազոտելուց հետո դատարանը հեռանում է առանձին սենյակ` նախապես հայտարարելով դատավճռի հրապարակման վայրը, տարին, ամիսը, օրը և ժամը: 7. Եթե սույն հոդվածի 3-5-րդ մասերում նշված հարցերից որևէ մեկին տրվում է ժխտական պատասխան, կամ մինչև դատարանի` առանձին սենյակ հեռանալը սույն հոդվածում նշված անձանցից որևէ մեկը հրաժարվում է կնքված համաձայնությունից, ապա դատարանը որոշում է կայացնում նախնական դատալսումները վերսկսելու մասին:»
5.6. ՀՀ քրեական դատավարության օրենսգրքի 462-րդ հոդվածի համաձայն` «1. Համաձայնեցման վարույթի արդյունքով դատարանը կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները: 2. Մեղադրական դատավճիռը պարունակում է համաձայնության մասին արձանագրության տեքստի բառացի շարադրանքը: 3. Մեղադրական դատավճռով դատարանը նշանակում է համաձայնության մասին արձանագրությամբ համաձայնեցված պատիժը (պատժատեսակն ու պատժաչափը), սահմանում է բռնագրավման ենթակա գույքը և դրա չափը: 4. Եթե առկա է գույքային հայց, ապա այն թողնվում է առանց լուծման: 5. Սույն օրենսգրքի 167-րդ հոդվածի 1-ին մասով նախատեսված վարութային ծախսերը մեղադրյալից ենթակա չեն բռնագանձման: 6. Դատավճիռը հրապարակելուց հետո դատավորը կողմերին պարզաբանում է նաև դատավճիռը բողոքարկելու` սույն օրենսգրքով նախատեսված սահմանափակումները:»
5.7. ՀՀ քրեական օրենսգրքի 77-րդ հոդվածի համաձայն` «1. Համաձայնեցման վարույթ կիրառելու դեպքում պատիժը չի կարող գերազանցել սույն օրենսգրքի Հատուկ մասի համապատասխան հոդվածի սանկցիայով նախատեսված առավել խիստ պատժատեսակի համար նախատեսված առավելագույն չափի կամ ժամկետի երկու երրորդը։ Եթե առավել խիստ պատժատեսակի երկու երրորդը պակաս է ստացվում սույն օրենսգրքի Հատուկ մասի համապատասխան հոդվածի սանկցիայով նախատեսված առավել խիստ պատժատեսակի նվազագույն չափից կամ ժամկետից, ապա այն չի կարող պակաս լինել նվազագույն չափից կամ ժամկետից։ 2. Չավարտված հանցագործություններով համաձայնեցման վարույթ կիրառելու դեպքում սույն հոդվածի 1-ին մասով նախատեսված կանոնը կիրառվում է չավարտված հանցագործության համար սույն օրենսգրքի 73-րդ հոդվածով նախատեսված պատժի նշանակման կանոնները կիրառելուց հետո: Եթե հաշվարկի արդյունքով պատժաչափը պակաս է ստացվում չավարտված հանցագործության համար պատժի նշանակման կանոնների կիրառմամբ սույն օրենսգրքի Հատուկ մասի համապատասխան հոդվածի սանկցիայով նախատեսված առավել խիստ պատժատեսակի նվազագույն չափից կամ ժամկետից, ապա նշանակվում է այն չափը կամ ժամկետը, որն ստացվել է հաշվարկի արդյունքով (…) 7. Սույն հոդվածի 1-3-րդ մասերով նախատեսված կանոններով պատժի նշանակման դեպքում սույն օրենսգրքի 76-րդ հոդվածով սահմանված կանոնները կիրառելի չեն (…) 9. Հանցագործությունների համակցության դեպքում պատիժ նշանակելիս սույն հոդվածի 1-5-րդ, 7-րդ և 8-րդ մասերով նախատեսված կանոնները կիրառելի են համակցության մեջ ընդգրկված յուրաքանչյուր հանցագործության համար առանձին: 10. Համաձայնեցման կամ համագործակցության կամ արագացված վարույթ կիրառելն արգելք չէ լրացուցիչ պատիժ կամ անվտանգության միջոց նշանակելու համար:»
5.8. Հաշվի առնելով այն, որ սույն գործով համաձայնության մասին արձանագրությունը համապատասխանում է օրենքով սահմանված վերաբերելի պահանջներին` Դատարանը գտնում է, որ պետք է կայացվի մեղադրական դատավճիռ, իսկ պատժատեսակի, պատժաչափի և դրա կրման նպատակահարմարության հարցերը պետք է լուծվեն նշված արձանագրությամբ սահմանված ձևով:
5.9. Քննարկվելով Արթուր Անդրանիկի Խաչատրյանի նկատմամբ ընտրված խափանման միջոցի հարցը, Դատարանը գտնում է, որ այն ընտրված է ճիշտ, փոփոխելու կամ վերացնելու ենթակա չէ, իսկ դատավճիռն օրինական ուժի մեջ մտնելուց այն ենթակա է վերացման:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 347-350-րդ, 463-րդ և 464-րդ հոդվածներով` Դատարանը.

Վ Ճ Ռ Ե Ց

1. Արթուր Անդրանիկի Խաչատրյանին մեղավոր ճանաչել ՀՀ քրեական օրենսգրքի 355-րդ հոդվածի 2-րդ մասով նախատեսված արարք կատարելու համար:
2. Արթուր Անդրանիկի Խաչատրյանին ՀՀ քրեական օրենսգրքի 355-րդ հոդվածի 2-րդ մասով նախատեսված արարք կատարելու համար դատապարտել ազատազրկման՝ 4 (չորս) տարի ժամկետով:
3. ՀՀ քրեական օրենսգրքի 84-րդ հոդվածի կիրառմամբ նշանակված պատիժը պայմանականորեն չկիրառել և սահմանել փորձաշրջան՝ 3 (երեք) տարի ժամկետով:
4. Փորձաշրջանի ընթացքում Արթուր Անդրանիկի Խաչատրյանի վրա դնել առանց իր վարքագծի նկատմամբ վերահսկողություն իրականացնող իրավասու մարմնի համաձայնության Հայաստանի Հանրապետության տարածքը չլքելու և բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում իր նոր բնակության վայրի հասցեն հայտնելու պարտականությունը:
5. Դատավճռի օրինակները տրամադրել վարույթի հանրային և մասնավոր մասնակիցներին:
6. Դատավճիռը կարող է բողոքարկվել ՀՀ վերաքննիչ քրեական դատարան դատական ակտը ստանալու օրվանից հետո` մեկամսյա ժամկետում, բացառությամբ՝ չի կարող բողոքարկվել ՀՀ քրեական դատավարության օրենսգրքի օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերի:

ԴԱՏԱՎՈՐ ՄԱՍԻՍ ՄԵԼՔՈՆՅԱՆ