ԵԴ1/3727/01/24




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈւԹՅԱՆ ԱՆՈւՆԻՑ

Երևան քաղաքի առաջին ատյանի ընդհանուր իրավասության քրեական դատարանը. (այսուհետ նաև` Դատարան),

Նախագահող դատավոր Ն.ԲԱՂԴԱՍԱՐՅԱՆԻ
Քարտուղարությամբ Ա.ՍԱՐԳՍՅԱՆԻ


Մասնակցությամբ՝
Հանրային մեղադրող Բ. ՂԱԶԻՆՅԱՆԻ
Մեղադրյալ Ա. ՍԱՐԳՍՅԱՆԻ


2024 թվականի դեկտեմբերի 30-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Արտակ Վարդանի Սարգսյանի (ծնված՝ 04.03.1990թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երեք անչափահաս երեխա, նախկինում չդատված, աշխատում է Ադթեցհ խանութ-սրահում՝ որպես վերանորոգող, հաշվառված և բնակվող՝ ք. Երևան, Աջափնյակ, Բաշինջաղյան 144/1 տուն հասցեում, մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով, որպես խափանման միջոց է ընտրվել բացակայելու արգելքը,

Պ Ա Ր Զ Ե Ց`

Գործի դատավարական նախապատմությունը. 20.07.2024թ. ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60-2769-24 քրեական վարույթը։
16.10.2024թ. կայացվել է որոշում՝ Արտակ Վարդանի Սարգսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով նախատեսված հանցանք կատարելու համար քրեական հետապնդում հարուցելու մասին, որը 24.10.2024թ. ներկայացվել է վերջինիս:
18.10.2024թ. Արտակ Վարդանի Սարգսյանի նկատմամբ որպես խափանման միջոց է կիրառվել բացակայելու արգելքը:
2024 թվականի դեկտեմբերի 11-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի Արտակ Վարդանի Սարգսյանի՝ ՀՀ քրեական օրենսգրքի 344-րդ հոդվածի 2-րդ մասով։
Հիշյալ քրեական գործին շնորհվել է ԵԴ1/3727/01/24 դատական գործի համարը, որը նույն օրը մակագրվել և 2024 թվականի դեկտեմբերի 12-ին հանձնվել է դատավոր Ն. Բաղդասարյանին:
2024 թվականի դեկտեմբերի 13-ին որոշում է կայացվել վարույթ ստանձնելու և նախնական դատալսումներ նշանակելու մասին:
Դատարանի՝ 30․12․2024թ․ որոշմամբ Արտակ Վարդանի Սարգսյանի նկատմամբ կիրառված խափանման միջոց բացակայելու արգելքը թողնվել է անփոփոխ։
2024 թվականի դեկտեմբերի 30-ին մեղադրյալ Արտակ Վարդանի Սարգսյանի նկատմամբ կայացվել է մեղադրական վերդիկտ։

Մեղադրանքի փաստական նկարագրությունը.
Մեղադրյալ Արտակ Վարդանի Սարգսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով քրեական հետապնդում է հարուցվել այն բանի համար, որ նա «ՀՀ ՆԳՆ ոստիկանության պարեկային ծառայության ծառայողի կողմից' 2022 թվականի հոկտեմբերի 30-ին կայացված' վարչական տույժ նշանակելու մասին թիվ 8180163661 որոշմամբ ենթարկված լինելով վարչական պատասխանատվության' տրանսպորտային միջոց վարելու իրավունքից 2 տարի ժամկետով զրկելու ձևով, պատշաճ ծանուցված և տեղեկացված լինելով այդ մասին, 2024 թվականի հունիսի 16֊ին ժամը 00:20-ի սահմաններում Երևան քաղաքի Դավիթաշենի կամրջի վրա հարբած (ոչ սթափ) վիճակում' արտաշնչած մեկ լիտր օդի մեջ ալկոհոլի պարունակությունը կազմել է 0,208 մգ/լ վարել է «Հյունդաի» մակնիշի 36 RC 521 հաշվառման համարանիշի տրանսպորտային միջոցը, որպիսի փաստն արձանագրվել է ՀՀ ՆԳՆ ոստիկանության պարեկային ծառայության Երևան քաղաքի 3-րդ գումարտակի 3-րդ վաշտի ծառայողների կողմից նույն օրը կազմված վարչական իրավախախտման վերաբերյալ թիվ 8180412126 արձանագրությամբ:»:

Հիմնական դատալսումների ընթացքում հետազոտված թույլատրելի ապացույցները.
Սույն քրեական գործի դատաքննության ընթացքում հետազոտվել են հետևյալ գրավոր ապացույցները.
07.10.2024թ. զննում կատարելու մասին արձանագրությունը, համաձայն որի' 2022 թվականի հոկտեմբերի 30-ին' ժամը 01:29-ին, Երևան քաղաքի Կոմիտասի պողոտա 49/9 հասցեում Երևան քաղաքի գնդի 2-րդ գումարտակի 1-ին վաշտի կրտսեր պարեկ էդգար Ադամյանի կողմից կազմվել է վարչական իրավախախտման վերաբերյալ արձանագրություն, համաձայն որի' Արտակ Վարդանի Սարգսյանը (ծնված 04.03.1990 թվականին) 2022 թվականի հոկտեմբերի 30-ին' ժամը 00:15-ին Երևան քաղաքի Ռուբինյանց փողոցում վարել է «Հյունդայի» մակնիշի 36 RC 521 հաշվառման համարանիշի ավտոմեքենան և խուսափել է սթափության վիճակը ստուգելու նպատակով զննություն անցնելուց: Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է «քաղաքացին հրաժարվեց դիմում-բողոք, բացատրություն տալուց» ձեռագիր գրառում: Արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումն ստացա հատվածում որևէ գրառում առկա չէ: Առկա է արձանագրությունը կազմողի ստորագրությունը, որպես խախտման ծածկագիր նշված է 72 թիվը: Թիվ 8180163661 որոշումը կայացվել է 30.10.2022 թվականին, համաձայն որի' Արտակ Սարգսյանին զրկել տ/մ վարելու իրավունքից 2 տարի ժամկետով, որոշում ընդունող անձ' պարեկ Ադամյան: Որոշման պատճենը և կատարման կարգի մասին քաղվածքն ստացա հատվածում առկա է ստորագրություն:
Վարորդի սթափության վիճակի զննության թիվ 000130 ուղեգրի զննությամբ պարզվել է, որ Երևան քաղաքի գնդի 2-րդ գումարտակի 1-ին վաշտի կրտսեր պարեկ Ադամյանի կողմից քաղաքացի Արտակ Վարդանի Սարգսյանին ներակայացրել է սթափության վիճակի զննության' «ԿԲԱԿ» ՓԲԸ:
«Կախվածությունների բուժման ազգային կենտրոն» ՓԲԸ-ի սթափության վիճակի զննության թիվ 266 արձանագրության զննությամբ պարզվել է, որ 30.10.2022 թվականին, ժամը 01:10-ին, հերթապահ բժիշկ Աղասի Դավթյանը եզրակացություն է տվել այն մասին, որ Արտակ Վարդանի Սարգսյանը հրաժարվել է սթափության զննությունից:
2024 թվականի հունիսի 16-ին' ժամը 00:35-ին, Երևան քաղաքի Սասնա Ծռեր փողոցում ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 3- րդ վաշտի պարեկ Հայկ Նասլյանի կողմից կազմված վարչական իրավախախտման վերաբերյալ արձանագրության համաձայն' Արտակ Վարդանի Սարգսյանը (ծնված 04.03.1990 թվականին) 2024 թվականի հունիսի 16֊ին' ժամը 00:20-ին Երևան քաղաքի Դավիթաշեն կամուրջի վրա' զրկված լինելով տրանսպորտային միջոցներ վարելու իրավունքից, ոչ սթափ վիճակում վարել է «Հյունդայի» մակնիշի 36 RC 521 հաշվառման համարանիշի ավտոմեքենան: Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն, արձանագրությանը ծանոթացա, իմ իրավունքների ու պպրտականությունների մասին քաղվածքը և խախտման քննարկման վայրի և ժամանակի վերաբերյալ ծանուցումը ստանալու հատվածում առկա է ստորագրություն: Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է 202.1 թիվը:
Ալկոհոլի պարունակության ստուգման կտրոն-պատճենի զննությամբ պարզվել է, որ սարքի համարն է՝ 91101102, զննման համարը՝ 01744, զննման ամսաթիվը' 16.06.2024, ստուգումը կատարվել է ավտոմատ, ժամը 00:29:09-ին, ալկոհոլի պարունակությունը' 0.208 մգ/լ, վարորդի անուն ազգանունը' Արտակ Սարգսյան, տրանսպորտային միջոցի համարանիշը' 36 RC 521, պարեկային ծառայող՛ Սաֆարյան, կրծքանշանի համար 03766: Սթափության սարքի ստուգաչափման թիվ 120898 վկայականի զննությամբ պարզվել է, որ ստուգաչափման թվականն է՝ 05.04.2024թ., այն ուժի մեջ է մինչև 2025 թվականի ապրիլի 05-ը: Չափման միջոցի անվանումը և տեսակը' ալկոմետր, գործարանային համարը' 91101102, տեսակը' «Jupiter Х/RP», չափման տիրույթը' 0.000-2.000 մգ/լ:
Ճանապարհային ոստիկանության էլեկտրոնային ռեգիստրից արտատպված վարորդական վկայականի տվյալների քաղվածքի զննությամբ պարզվել է, որ Արտակ Վարդանի Սարգսյանը զրկված է վարորդական իրավունքի վկայականից: Զրկման սկիզբ է համարվում' 30.10.2022 և ավարտ' 30.10.2024:

/դատական նիստի արձանագրություն, վ.թ. 3, 4, 5, 6, 7, 8, 9, 16-18/

Արտավարութային փաստաթուղթ ճանաչված և զննության ենթարկված Արտակ Վարդանի Սարգսյանի վերաբերյալ ՀՀ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի կրտսեր պարեկ էդգար Ադամյանի կողմից 30.10.2022 թվականին կազմված վարչական իրավախախտման վերաբերյալ թիվ 8180163661 արձանագրությունը և որոշումը, «Կախվածությունների բուժման ազգային կենտրոն» ՓԲԸ-ի սթափության վիճակի զննության թիվ 266 արձանագրությունը, վարորդի սթափության վիճակի զննության թիվ 000130 ուղեգիրը, ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 3-րդ վաշտի պարեկ Հայկ Նասլյանի կողմից 16.06.2024 թվականին կազմված վարչական իրավախախտման վերաբերյալ թիվ 8180412126 արձանագրությունը, 16.06.2024 թվականի ալկոհոլի պարունակության ստուգման կտրոնի պատճենը, ստուգաչափման թիվ 120898 վկայականի պատճենը և ՀՀ ՆԳՆ ոստիկանության «ճանապարհային ոստիկանություն» ծառայության էլեկտրոնային ռեգիստրից ստացված տեղեկատվությունը:
/դատական նիստի արձանագրություն, վ.թ. 19-21/

Դատաքննության ընթացքում մեղադրյալ Արտակ Սարգսյանը օգտվելով իր սահմանադրական իրավունքից, հրաժարվել է ցուցմունք տալ:
Նախաքննության ընթացքում մեղադրյալ Արտակ Սարգսյանը ցուցմունք տալիս հայտնել է, որ իրեն մեղավոր է ճանաչում ներկայացված մեղադրանքում, զղջում է կատարած արարքի համար, հրաժարվում է ցուցմունք տալ, հարցերին պատասխանել:
/դատական նիստի արձանագրություն, վ.թ 40-42/

Դատարանի փաստական վերլուծությունները և հետազոտված ապացույցների հիման վրա դատարանի կողմից հաստատված փաստական հանգամանքները.
Հետազոտված թույլատրելի ապացույցների հիման վրա դատարանը հաստատված է համարում հետևյալ փաստական հանգամանքները.
Արտակ Վարդանի Սարգսյանը ՀՀ ՆԳՆ ոստիկանության պարեկային ծառայության ծառայողի կողմից' 2022 թվականի հոկտեմբերի 30-ին կայացված' վարչական տույժ նշանակելու մասին թիվ 8180163661 որոշմամբ ենթարկված լինելով վարչական պատասխանատվության' տրանսպորտային միջոց վարելու իրավունքից 2 տարի ժամկետով զրկելու ձևով, պատշաճ ծանուցված և տեղեկացված լինելով այդ մասին, 2024 թվականի հունիսի 16֊ին ժամը 00:20-ի սահմաններում Երևան քաղաքի Դավիթաշենի կամրջի վրա հարբած (ոչ սթափ) վիճակում' արտաշնչած մեկ լիտր օդի մեջ ալկոհոլի պարունակությունը կազմել է 0,208 մգ/լ վարել է «Հյունդաի» մակնիշի 36 RC 521 հաշվառման համարանիշի տրանսպորտային միջոցը, որպիսի փաստն արձանագրվել է ՀՀ ՆԳՆ ոստիկանության պարեկային ծառայության Երևան քաղաքի 3-րդ գումարտակի 3-րդ վաշտի ծառայողների կողմից նույն օրը կազմված վարչական իրավախախտման վերաբերյալ թիվ 8180412126 արձանագրությամբ:

Դատարանի իրավական վերլուծությունները, հետևությունները և դրանց իրավական հիմնավորումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, դատարանը հանգում է հետևության, որ ապացուցված է Արտակ Վարդանի Սարգսյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Արտակ Վարդանի Սարգսյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը հաստատված համարելով հանցագործության և դրա կատարման մեջ Արտակ Վարդանի Սարգսյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
ՀՀ քրեական օրենսգրքի 69-րդ հոդվածի 2-րդ մասի համաձայն՝
«Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:»:
Պատասխանատվությունն ու պատիժը մեղմացնող և ծանրացնող հանգամանքների վերաբերյալ Վճռաբեկ դատարանն իրավական դիրքորոշում է արտահայտել Ա.Ավետիսյանի գործով որոշման մեջ՝ արձանագրելով, որ «(...) պատասխանատվությունն ու պատիժը մեղմացնող և ծանրացնող հանգամանքները հնարավորություն են տալիս պատկերացում կազմել հանցագործության՝ հանրության համար վտանգավորության աստիճանի և բնույթի, հանցավորի անձնավորության մասին և յուրաքանչյուր կոնկրետ գործով անհատականացնել պատիժը: Պատիժը մեղմացնող և ծանրացնող հանգամանքների ցանկի վերլուծությունը ցույց է տալիս, որ քննարկվող հանգամանքները վերաբերում են ինչպես հանցագործությանը, այնպես էլ հանցավորի անձնավորությանը կամ միաժամանակ բնութագրում են հանցագործությունն ու հանցավորի անձնավորությունը: Այդ պատճառով էլ պատիժը մեղմացնող և ծանրացնող հանգամանքները պետք է դիտարկել որպես հանցակազմի սահմաններից դուրս հանգամանքներ, որոնք ուղղակի կամ անուղղակի վերաբերում են հանցագործությանը կամ հանցավորի անձնավորությանը, բարձրացնում կամ իջեցնում են հասարակական վտանգավորության աստիճանը և ազդում պատժի վրա: Դրանց գնահատմամբ է հնարավոր յուրաքանչյուր կոնկրետ գործով անհատական մոտեցում ցուցաբերել` ինչպես պատժի տեսակը և չափը որոշելիս, այնպես էլ այն կրելու նպատակահարմարության հարցը լուծելիս (...)» (տե՛ս Անդրանիկ Մեսրոպի Ավետիսյանի գործով Վճռաբեկ դատարանի 2011 թվականի հուլիսի 13-ի թիվ ԵԱՆԴ/0091/01/09 որոշման 20-րդ կետը)»:
Վճռաբեկ դատարանն Արարատ Ավագի Ավագյանի և Վահան Սերյոժայի Սահակյանի վերաբերյալ ԵԿԴ/0252/01/13 քրեական գործով 2014թ. հոկտեմբերի 31-ի որոշման մեջ արտահայտել է նաև հետևյալ իրավական դիրքորոշումը.
«(…) նշանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին (…):
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա (…)
Նշված նորմի վերլուծության հիման վրա դատարանն արձանագրում է, որ տվյալ հանցագործության վերաբերյալ գործերով պատժի անհատականացման սկզբունքի տեսանկյունից արարքի հանրային վտանգավորությունը որոշելիս դատարանը, ի թիվս այլնի, պետք է հաշվի առնի. (…)
դրա չափը (…),
արարքի կատարման նպատակն ու շարժառիթը (…):
Վկայակոչված հանգամանքները, այլ հանգամանքների հետ համակցությամբ ազդում են արարքի հանրային վտանգավորության վրա և պետք է իրենց համապատասխան գնահատականը ստանան յուրաքանչյուր գործով պատիժ նշանակելիս:
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով: Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս: Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն (…)»:
Մեղադրյալ Արտակ Սարգսյանի նկատմամբ, նրա կատարած հանցագործության համար պատիժ նշանակելիս՝ դատարանը հաշվի է առնում վերոհիշյալ նախադեպային որոշումներում արտահայտված իրավական դիրքորոշումները:
Դատարանը հաշվի է առնում նաև հանցագործության կատարման եղանակը, հանցավոր մտադրության իրականացման աստիճանը, հանցագործություն կատարելուց հետո հանցավորի դրսևորած վարքագիծը, խախտված հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը:
Մեղադրյալ Արտակ Վարդանի Սարգսյանի նկատմամբ պատիժ նշանակելիս դատարանը հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, դատարանը, որպես Արտակ Վարդանի Սարգսյանի անձը բնութագրող տվյալ հաշվի է առնում այն, որ նա նախկինում դատված չի եղել, ամուսնացած է, աշխատում է:
Մեղադրյալ Արտակ Սարգսյանի կատարած հանցագործության համար պատիժ նշանակելիս՝ որպես նրա պատասխանատվությունը և պատիժը մեղմացնող հանգամանքներ դատարանը դիտում է խնամքին երեք անչափահաս երեխա՝ Վիկտորիա Արտակ Սարգսյան՝ ծնված՝ 15.01.2015թ., Արևիկ Արտակ Սարգսյան՝ ծնված՝ 10.08.2017թ. և Աբել Արտակ Սարգսյան՝ ծնված՝05.05.2021թ. ունենալը, կատարած արարքի համար զղջալը և մեղքն ընդունելը, ինչը որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել է դրա համար:
ՀՀ քրեական օրենսգրքի 344-րդ հոդվածի 2-րդ մասը նախատեսում է պատիժ՝ տուգանք՝ առավելագույնը քսանապատիկի չափով, կամ հանրային աշխատանքներ՝ ութսունից հարյուր հիսուն ժամ տևողությամբ, կամ կարճաժամկետ ազատազրկում՝ մեկից երկու ամիս ժամկետով, կամ ազատազրկում՝ առավելագույնը երկու տարի ժամկետով:
Վերոգրյալի հիման վրա, պատժի տեսակը և չափն ընտրելիս ղեկավարվելով պատիժ նշանակելու ընդհանուր սկզբունքներով, հաշվի առնելով մեղադրյալի կատարած հանցագործությունների բնույթը և հանրության համար վտանգավորության աստիճանը, դրանք կատարելու հանգամանքները, նրա անձը բնութագրող տվյալների և պատասխանատվությունն ու պատիժը մեղմացնող հանգամանքների համակցությունը, ինչպես նաև պատասխանատվությունն ու պատիժը ծանրացնող հանգամանքների բացակայությունը, դատարանը գտնում է, որ Արտակ Վարդանի Սարգսյանի կատարած ՀՀ քրեական օրենսգրքի 344-րդ հոդվածի 2-րդ մասով նախատեսված հանցավոր արարքի համար նրա նկատմամբ պետք է նշանակել պատիժ տուգանքի ձևով՝ հնգապատիկի չափով, քանի որ այն կարող է ապահովել պատժի նպատակները:
Միաժամանակ, անդրադառնալով մեղադրյալի նկատմամբ նշանակվող տուգանքի ձևով պատժի չափին՝ դատարանն արձանագրում է հետևյալը․
ՀՀ քրեական օրենսգրքի 59-րդ հոդվածի 5-րդ մասի համաձայն՝ «Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից»։
Նկատի ունենալով, որ համաձայն ՀՀ ՊԵԿ-ից ստացված գրության՝ մեղադրյալ Արտակ Սարգսյանի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից՝ դատարանը գտնում է, որ նշանակվող տուգանքի չափի հաշվարկային հիմք պետք է ընդունել արարքի կատարման պահին գործող «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափը՝ 75.000 (յոթանասունհինգ հազար) ՀՀ դրամը:
Այսպիսով, հիմք ընդունելով ՀՀ քրեական օրենսգրքի 7-րդ, 55-րդ, 69-րդ հոդվածների պահանջները՝ դատարանը գտնում է, որ մեղադրյալ Արտակ Վարդանի Սարգսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով որպես պատիժ պետք է նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
Դատարանը գտնում է, որ իր նկատմամբ նշանակված պատիժը մեղադրյալ Արտակ Վարդանի Սարգսյանը պետք է կրի, քանի որ դրան խոչընդոտող հանգամանքներ առկա չեն:
ՀՀ քրեական օրենսգրքի 59-րդ հոդվածի 8-րդ մասի համաձայն` «Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։(...)»:
Նկատի ունենալով, որ մեղադրյալ Արտակ Վարդանի Սարգսյանը նյութական դրությունից ելնելով՝ չի կարող անհապաղ և ամբողջությամբ վճարել նշանակված տուգանքը, սակայն պատրաստակամ է այն վճարել՝ դատարանը գտնում է, որ պետք է տուգանքի վճարման համար սահմանել 1 /մեկ/ տարի ժամկետ:
Դատարանն արձանագրում է, որ սույն գործով գույքային հայց չի հարուցվել, բռնագրավման ենթակա գույքի, ինչպես նաև գույքի արգելադրման վերաբերյալ տվյալներ գործում առկա չեն, սույն գործով վարութային ծախսեր չկան:
Քննարկելով ապացույցների պահպանման և տնօրինման հարցը, ղեկավարվելով ՀՀ քրեական դատավարության օրենսգրքի 99-րդ հոդվածով՝ դատարանը գտնում է, որ արտավարութային փաստաթուղթ ճանաչված՝ փաստաթղթերի պատճենները պետք է պահել վարույթի նյութերի հետ՝ դրանք պահելու ամբողջ ընթացքում:
Քննարկելով խափանման միջոցի հարցը՝ դատարանը գտնում է, որ մեղադրյալ Արտակ Վարդանի Սարգսյանի նկատմամբ որպես խափանման միջոց ընտրված բացկայելու արգելքը ճիշտ է և այն վերացվելու կամ փոփոխվելու ենթակա չէ՝ մինչև դատավճռի օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 342-349-րդ հոդվածներով` դատարանը.

Վ Ճ Ռ Ե Ց՝

Մեղադրյալ Արտակ Վարդանի Սարգսյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ, և նրան դատապարտել տուգանքի` հնգապատիկի՝ 375.000 /երեք հարյուր յոթանասունհինգ հազար/ ՀՀ դրամ գումարի չափով:
Մեղադրյալ Արտակ Սարգսյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Դատավճիռը օրինական ուժի մեջ մտնելուց հետո մեղադրյալ Արտակ Վարդանի Սարգսյանի նկատմամբ նշանակված տուգանքի վճարման համար սահմանել 1 /մեկ/ տարի ժամկետ:
Արտավարութային փաստաթուղթ ճանաչված փաստաթղթերի պատճենները պահել վարույթի նյութերի հետ՝ դրանք պահելու ամբողջ ընթացքում:
Դատավճիռը կարող է բողոքարկվել ՀՀ վերաքննիչ քրեական դատարան՝ ստանալու օրվանից՝ մեկամսյա ժամկետում:


ԴԱՏԱՎՈՐ՝ Ն. ԲԱՂԴԱՍԱՐՅԱՆ



Դատավճիռը չի բողոքարկվել և 18.02.2025թ. մտել է օրինական ուժի մեջ:


ԴԱՏԱՎՈՐ՝ Ն. Ռ. ԲԱՂԴԱՍԱՐՅԱՆ