ԵԴ1/3731/01/24 Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈւԹՅԱՆ ԱՆՈւՆԻՑ


«28» մարտի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)՝

Նախագահությամբ՝ Մ.ԱՐԶՈւՄԱՆՅԱՆԻ
քարտուղարությամբ Մ.ՍԻՄՈՆՅԱՆԻ
մասնակցությամբ՝
հանրային մեղադրող Ա․ՄԵԺԼՈւՄՅԱՆԻ
մեղադրյալ Ա․ԱՎԵՏԻՍՅԱՆԻ

դռնբաց դատական նիստում, քննության առնելով քրեական գործն ըստ մեղադրանքի Արթուր Ավետիսի Ավետիսյանի (ծնված՝ 1996 թվականի ապրիլի 24-ին Երևան քաղաքում, ազգությամբ հայ, ՀՀ քաղաքացի, ամուսնացած, միջնակարգ կրթությամբ, չի աշխատում, հաշվառված է Արարատի մարզի Մասիս քաղաքի 1-ին թաղամասի 6-րդ փողոցի 34-րդ տանը, բնակվում է Երևան քաղաքի Նորագավիթ 1-ին փողոցի 101/1 տանը) ՀՀ քրեական օրենսգրքի 344-րդ հոդվածի 2-րդ մասով, խափանման միջոց է ընտրված բացակայելու արգելքը,

Պ Ա Ր Զ Ե Ց

Գործի դատավարական նախապատմությունը.
2024 թվականի ապրիլի 30-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի ՀԿԳ քննիչ Ն․Ստեփանյանի կողմից ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60-1707-24 քրեական վարույթը։
2024 թվականի սեպտեմբերի 20-ին Երևան քաղաքի Ավան և Նոր Նորք վարչական շրջանների դատախազության դատախազ Հ․Ավալյանը որոշում է կայացրել թիվ 60170724 քրեական վարույթով Արթուր Ավետիսի Ավետիսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հանրային քրեական հետապնդում հարուցելու մասին:
2024 թվականի սեպտեմբերի 24-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Դ․Շահբազյանը որոշում է կայացրել թիվ 60170724 քրեական վարույթով մեղադրյալ Արթուր Ավետիսի Ավետիսյանի նկատմամբ որպես խափանման միջոց բացակայելու արգելքը կիրառելու մասին:
2024 թվականի դեկտեմբերի 6-ին Ա․Ավետիսյանի վերաբերյալ թիվ 60170724 քրեական վարույթը մեղադրական եզրակացությամբ ուղարկվել է Դատարան, որին շնորհվել է ԵԴ1/3731/01/24 համարը։
2024 թվականի դեկտեմբերի 12-ին թիվ ԵԴ1/3731/01/24 քրեական գործը հանձնվել է դատավոր Մ․Արզումանյանին։
2024 թվականի դեկտեմբերի 13-ին Երևան քաղաքի առաջին ատյանի ընդհանուր իրավասության քրեական դատարանի դատավոր Մ.Արզումանյանը որոշում է կայացրել թիվ ԵԴ1/3731/01/24 քրեական գործի վարույթը ստանձնելու և նախնական դատալսումներ նշանակելու վերաբերյալ։

Մեղադրանքի փաստական նկարագրությունը.
Արթուր Ավետիսի Ավետիսյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 344-րդ հոդվածի 2-րդ մասով այն հանրորեն վտանգավոր արարքի կատարման համար, որ նա, տրանսպորտային միջոցներ վարելու իրավունք չունենալով, հարբած (ոչ սթափ) վիճակում վարել է տրանսպորտային միջոց:
Այսպես. Արթուր Ավետիսի Ավետիսյանը 1 (մեկ) տարի ժամկետով՝ 11.12.2022 թվականից մինչև 11.12.2023 թվականը՝ տրանսպորտային միջոցներ վարելու իրավունքից զրկված լինելու պայմաններում, 2023 թվականի հոկտեմբերի 22-ին՝ ժամը 22:35-ի սահմաններում, Երևան-Աբովյան մայրուղում վարել է «ԲՄՎ» մակնիշի, 36 PZ 080 հաշվառման համարանիշով տրանսպորտային միջոցը, որը ստուգման նպատակով կանգնեցվել է ՀՀ ՆԳՆ ոստիկանության պարեկային ծառայության աշխատակցի կողմից: Ստուգման արդյունքում պարզվել է, որ Արթուր Ավետիսի Ավետիսյանը, չունենալով տրանսպորտային միջոցներ վարելու իրավունք, տրանսպորտային միջոցը վարել է հարբած (ոչ սթափ) վիճակում, այսինքն՝ սթափության վիճակի զննությամբ պարզվել է, որ նրա մեկ լիտր արտաշնչած օդի մեջ մաքուր ալկոհոլի պարունակությունը կազմել է 0,125 մգ/լ, որն ըստ Վարչական իրավախախտումների վերաբերյալ ՀՀ օրենսգրքի 126-րդ հոդվածի 9-րդ մասի՝ համարվում է ոչ սթափ վիճակում գտնվող, ինչի կապակցությամբ Արթուր Ավետիսի Ավետիսյանի նկատմամբ կազմվել է 8180253684 վարչական իրավախախտման մասին արձանագրությունը։

Հիմնական դատալսումների ընթացքում հետազոտված թույլատրելի ապացույցները.
- Զննում կատարելու մասին 2024 թվականի սեպտեմբերի 19-ի արձանագրությունը, համաձայն որի՝ զննության է ենթարկվել 2023 թվականի հունվարի 15-ին՝ ժամը 14:10-ին, Հրազդան քաղաքում ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի կրտսեր պարեկ Լյուդվիկ Հարությունյանի /կրծքանշան թիվ 05163/ կողմից կազմված վարչական իրավախախտման վերաբերյալ թիվ 8180242016 արձանագրությունը, համաձայն որի՝ Արթուր Ավետիսի Ավետիսյանը (ծնված 24.04.1996թ., բնակվող՝ Արարատի մարզ, ք.Մասիս, 1 թաղամաս, 6 փողոց, 34 տուն հասցեում/ 2023 թվականի հունվարի 15-ին՝ ժամը 00:50-ին, Նուբարաշեն 9 փողոցում ոչ սթափ վիճակում վարել է «ՎԱԶ» մակնիշի, 37 FV 515 հաշվառման համարանիշ, տրանսպորտային միջոցը: Արձանագրության՝ վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն: Արձանագրությանը ծանոթանալու, իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն: Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված՝ 70.2 թիվը:
Թիվ 8180242016 որոշումը, համաձայն որի՝ 11.12.2022թ. Արթուր Ավետիսի Ավետիսյանը զրկվել է տրանսպորտային միջոցներ վարելու իրավունքից` մեկ տարի ժամկետով: Որոշման պատճենը և կատարման կարգի մասին քաղվածքը ստորագրությամբ ստացել է:
Ալկոհոլի պարունակության ստուգման կտրոնը, համաձայն որի՝ ստուգաչափման սարքի համարն է՝ 91100890, զննման համարը՝ 00583, զննման ամսաթիվը՝ 11.12.2022թ., զննման ժամը՝ 01:00:23, վերջին ստուգաչափման ամսաթիվը՝ 13.07.2022թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0,604 մգ/լ, վարորդի անունն է՝ Արթուր, ազգանունը՝ Ավետիսյան, տրանսպորտային միջոցի համարանիշը՝ 37 FV 515, ՊԾ ազգանունը՝ Հարությունյան, կրծքանշանի համարը՝ 05163, ստորաբաժանումը՝ 4-րդ գումարտակ, 2-րդ վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ից կողմից տրված թիվ 0746060 ստուգաչափման վկայականը, համաձայն որի՝ վկայականն ուժի մեջ է 2022 թվականի հուլիսի 13-ից 2023 թվականի հուլիսի 13-ը, ստուգաչափման սարքի գործարանային համարն է 91100997, տեսակը՝ Jupiter X/RP, չափման տիրույթը՝ 0.000 0.200մգ/լ, ճշտության դասը, կարգը /սխալանքը/ 5-±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Ա. Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
2023 թվականի հոկտեմբերի 22-ին՝ ժամը 22:45-ին, Երևան-Աբովյան մայրուղում ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի պարեկ Տիգրան Միրզոյանի /կրծքանշան թիվ 13199/ կողմից կազմված վարչական իրավախախտման վերաբերյալ թիվ 8180253684 արձանագրությունը, համաձայն որի՝ Արթուր Ավետիսի Ավետիսյանը (ծնված 24.04.1996թ., բնակվող՝ Արարատի մարզ, ք.Մասիս, 1 թաղամաս, 6 փողոց, 34 տուն հասցեում) 2023 թվականի հոկտեմբերի 22-ին՝ ժամը 22:35-ին, Երևան-Աբովյան մայրուղում տրանսպորտային միջոց վարելու իրավունքից զրկված և ոչ սթափ վիճակում վարել է «ԲՄՎ» մակնիշի, 36 PZ 080 հաշվառման համարանիշ, տրանսպորտային միջոցը։ Արձանագրության՝ վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն «Շատ քիչ եմ ալկոհոլ օգտագործել, որի համար զղջում եմ» գրառումը: Արձանագրությանը ծանոթանալու, իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն և «Ավետիսյան» գրառումը։ Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված՝ 203.1 թիվը:
Ալկոհոլի պարունակության ստուգման կտրոնը, համաձայն որի՝ ստուգաչափման սարքի համարն է՝ 91100915, զննման համարը՝ 00864, զննման ամսաթիվը՝ 22.10.2023թ., զննման ժամը՝ 22:42:14, վերջին ստուգաչափման ամսաթիվը՝ 19.04.2023թ., դատարկ թեստ՝ 0.000 մգ/լ, ստուգաչափման ձևաչափը` ավտոմատ, ալկոհոլի պարունակությունը՝ 0,125 մգ/լ, վարորդի անունն է՝ Արթուր, ազգանունը՝ Ավետիսյան, տրանսպորտային միջոցի համարանիշը՝ 36 PZ 080, ՊԾ ազգանունը՝ 10 Միրզոյան, կրծքանշանի համարը՝ 13199, ստորաբաժանումը` 4-րդ գումարտակ, 1-ին վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ից կողմից տրված թիվ 093539 ստուգաչափման վկայականը, համաձայն որի՝ վկայականն ուժի մեջ է 2023 թվականի ապրիլի 19-ից 2024 թվականի ապրիլի 19-ը, ստուգաչափման սարքի գործարանային համարն է 91100915, տեսակը՝ Jupiter X/RP, չափման տիրույթը՝ 0.000 2,000մգ/լ, ճշտության դասը, կարգը /սխալանքը/ 5-±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Ա.Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվությունը, համաձայն որի՝ Արթուր Ավետիսի Ավետիսյանի (ծնված՝ 24.04.1996թ., ՀԾՀ 3404960386) անվամբ թիվ RF397574 վարորդական վկայականը գտնվում է զրկված կարգավիճակում, սկիզբ` 11.12.2022թ., ավարտ՝ 11.12.2023թ.:
- Արտավարութային փաստաթուղթ ճանաչելու մասին 2024 թվականի սեպտեմբերի 19-ի որոշումը, համաձայն որի՝ թիվ 60170724 քրեական վարույթով որպես արտավարութային փաստաթուղթ են ճանաչվել վարչական իրավախախտման վերաբերյալ թիվ 8180253684 և 81800242016 արձանագրությունները, ալկոհոլի պարունակության ստուգման թիվ 00864 և 00583 կտրոնները, ստուգաչափման թիվ 093539 և 074606 վկայականները, ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության պատճենները։
- Մեղադրյալ Արթուր Ավետիսի Ավետիսյանը, հայտարարելով, որ իրեն մեղավոր է ճանաչում, զղջում է կատարվածի համար և օգտվելով իր սահմանադրական իրավունքից, դատարանում ցուցմունք տալու ցանկություն չհայտնեց:
Հիմնական դատալսումների ընթացքում հրապարակվեց մեղադրյալ Արթուր Ավետիսյանի նախաքննական ցուցմունքը, համաձայն որի՝ Ա․Ավետիսյանը հայտնել է, որ իրեն առաջադրված մեղադրանքը պարզ է և հասկանալի, առաջադրված մեղադրանքում իրեն մեղավոր է ճանաչում և ընդունում իր մեղավորությունը: 2023 թվականի հոկտեմբերի 22-ին չունենալով տրանսպորտային միջոց վարելու իրավունք և ոչ սթափ վիճակում՝ վարել է «ԲՄՎ» մակնիշի, 36 PZ 080 հաշվառման համարանիշի տրանսպորտային միջոցը:

Լրացուցիչ դատալսումների ընթացքում հետազոտված ապացույցները.
- ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի ձև 8 և ձև 9 տեղեկանքները, համաձայն որոնց՝ Երևան քաղաքի առաջին ատյանի ընդհանուր իրավասության քրեական դատարանի 2024 թվականի հոկտեմբերի 10-ի դատավճռով Արթուր Ավետիսի Ավետիսյանը մեղավոր է ճանաչվել ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ նշանակվել է պատիժ տուգանք՝ նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամի չափով: Թույլատրվել է Արթուր Ավետիսի Ավետիսյանին դատավճռով նշանակված 375.000 ՀՀ դրամ գումարի չափով տուգանքը վճարել մաս առ մաս, 12 /տասներկու/ ամսվա ընթացքում՝ յուրաքանչյուր ամիս վճարելով առնվազն 31.250 /երեսունմեկ հազար երկու հարյուր հիսուն/ ՀՀ դրամ գումար:
Բացի այդ, Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 18-ի դատավճռով Արթուր Ավետիսի Ավետիսյանը մեղավոր է ճանաչվել Հայաստանի Հանրապետության քրեական օրենսգրքի 344-րդ հոդվածի 2-րդ մասով և նրա նկատմամբ պատիժ է նշանակվել տուգանք՝ նվազագույն աշխատավարձի հնգապատիկի չափով՝ 375.000 (երեք հարյուր յոթանասունհինգ հազար) ՀՀ դրամ: ՀՀ քրեական օրենսգրքի 59-րդ հոդվածի կանոններով թույլատրվել է նշանակված տուգանքի վճարումն իրականացնել մեկ տարվա ընթացքում մաս առ մաս՝ համաչափորեն 12 ամսվա ընթացքում:
- ՀՀ ԱՆ պրոբացիայի ծառայության Արարատի մարզային մարմնից ստացված գրությունները, համաձայն որոնց՝ թիվ ԵԴ1/3002/01/24 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 18-ի դատավճիռն ի կատար ածելու նպատակով դատապարտյալ Արթուր Ավետիսի Ավետիսյանը 2025 թվականի փետրվարի 7-ին ներկայացել է ՀՀ ԱՆ պրոբացիայի ծառայության Արարատի մարզային մարմին և նույն օրը սահմանված կարգով վերցվել է հաշվառման: 25.02.2025թ. դրությամբ Արթուր Ավետիսյանի կողմից դատավճռով նշանակված տուգանք պատժի կատարման նպատակով վճարում իրականացնելը հավաստող որևէ անդորրագիր Արարատի մարզային մարմին չի ներկայացրել: Համաձայն վերահսկողության պլանի՝ գանձման ենթակա գումարը կազմում է 375000 (երեք հարյուր յոթանասուն հինգ հազար) ՀՀ դրամ, առաջին վճարման վերջնաժամկետը՝ 29.08.2025թ.։
Թիվ ԵԴ1/2445/01/24 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի հոկտեմբերի 10-ի դատավճիռն ի կատար ածելու նպատակով դատապարտյալ Արթուր Ավետիսի Ավետիսյանը 2024 թվականի դեկտեմբերի 2-ին ներկայացել է ՀՀ ԱՆ պրոբացիայի ծառայության Արարատի մարզային մարմին և նույն օրը սահմանված կարգով վերցվել է հաշվառման:

07.01.2025թ. դրությամբ Արթուր Ավետիսյանի կողմից դատավճռով նշանակված տուգանք պատժի կատարման նպատակով վճարում կատարված չլինելու պատճառով՝ ՀՀ ԱՆ պրոբացիայի ծառայության Արարատի մարզային մարմինը միջնորդություն է ներկայացրել դատարան՝ տուգանքի չափին համարժեք գույք բռնագանձելու վերաբերյալ։
10.02.2025թ. դատական նիստով որոշվել է ՀՀ ԱՆ պրոբացիայի ծառայության Արարատի մարզային մարմնի միջնորդությունը մերժել և բավարարել Արթուր Ավետիսյանի կողմից դատական նիստի ընթացքում արված միջնորդությունը՝ հանրային աշխատանքներ կատարելու վերաբերյալ, նշանակվել են հանրային աշխատանքներ՝ 120 ժամ տևողությամբ: Որոշումը 25.03.2025թ. դրությամբ ՀՀ ԱՆ պրոբացիայի ծառայության Արարատի մարզային մարմնում չի ստացվել։
- մեղսագրվող հանցանքն ավարտվելու օրվան նախորդող 12 ամիսների ընթացքում Արթուր Ավետիսի Ավետիսյանի ստացած եկամուտների վերաբերյալ ՀՀ պետական եկամուտների կոմիտեից ստացված գրությունը, համաձայն որի՝ հայցվող ժամանակահատվածում Ա․Ավետիսյանը չի հանդիսացել վարձու աշխատող և նրա եկամտի վերաբերյալ տվյալներ առկա չեն։

Դատարանի փաստական վերլուծությունները և Դատարանի կողմից հաստատված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների բավարար համակցություն, որը թույլ է տալիս հաստատված համարելու Արթուր Ավետիսյանին ներկայացված մեղադրանքի փաստական հանգամանքները՝ բացառելով դրանց ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում քրեական գործի լուծման համար նշանակություն ունեցող հետևյալ փաստական հանգամանքները.
- Արթուր Ավետիսի Ավետիսյանի կողմից 1 (մեկ) տարի ժամկետով՝ 2022 թվականի դեկտեմբերի 11-ից մինչև 2023 թվականի դեկտեմբերի 11-ը տրանսպորտային միջոցներ վարելու իրավունքից զրկված լինելը,
- Արթուր Ավետիսի Ավետիսյանի կողմից 2023 թվականի հոկտեմբերի 22-ին՝ ժամը 22:35-ի սահմաններում, Երևան-Աբովյան մայրուղիում հարբած (ոչ սթափ) վիճակում՝ մեկ լիտր արտաշնչած օդի մեջ մաքուր ալկոհոլի պարունակությունը 0,125 մգ/լ, «ԲՄՎ» մակնիշի, 36 PZ 080 հաշվառման համարանիշի տրանսպորտային միջոցը վարելը։
- ներկայացված մեղադրանքում Արթուր Ավետիսի Ավետիսյանի կողմից իրեն մեղավոր ճանաչելը և զղջալը,
- հանցանքը կատարելու պահին դատվածություն չունենալը,
- մեղսագրվող հանցանքն ավարտվելու օրվան նախորդող 12 ամիսների ընթացքում Արթուր Ավետիսի Ավետիսյանի ստացած եկամուտների վերաբերյալ տվյալների բացակայությունը։

Դատարանի իրավական վերլուծությունները, հետևությունները և որոշումները.
Դատարանի կողմից հաստատված փաստական հանգամանքների և 2025 թվականի փետրվարի 14-ին կայացված մեղադրական վերդիկտի հիման վրա Դատարանը գտնում է, որ ապացուցված է մեղադրյալ Արթուր Ավետիսի Ավետիսյանին վերագրվող փաստական հանգամանքները, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալ Ա․Ավետիսյանի արարքի նկատմամբ պետք է կիրառվի ՀՀ քրեական օրենսգրքի 344-րդ հոդվածի 2-րդ մասը։
Դատարանը, հաստատված համարելով մեղադրյալ Արթուր Ավետիսի Ավետիսյանի մեղավորությունը ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարման մեջ և ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Արթուր Ավետիսի Ավետիսյանի պատասխանատվությունն ու պատիժը մեղմացնող հանգամանքներ պետք է դիտարկել ներկայացված մեղադրանքում իրեն մեղավոր ճանաչելը և զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը):
Դատարանը միաժամանակ արձանագրում է, որ Արթուր Ավետիսյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Դատարանը գտնում է, որ կատարած հանցանքների համար մեղադրյալ Արթուր Ավետիսի Ավետիսյանը ենթակա է պատժի։
ՀՀ քրեական օրենսգրքի 7-րդ հոդվածի 1-ին մասի համաձայն` հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:
ՀՀ քրեական օրենսգրքի 55-րդ հոդվածի 1-ին մասի համաձայն՝ պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ: Նույն հոդվածի 2-րդ մասի համաձայն՝ պատժի նպատակներն են՝ վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
ՀՀ քրեական օրենսգրքի 69-րդ հոդվածի 1-ին, 2-րդ և 3-րդ մասերի համաձայն` հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները: Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ: Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
Պատիժ նշանակելու ընդհանուր սկզբունքներին ՀՀ վճռաբեկ դատարանն անդրադարձել է Նարեկ Սարգսյանի վերաբերյալ 2011 թվականի դեկտեմբերի 22-ի թիվ ԵԿԴ/0042/01/11 գործով կայացված որոշման մեջ, որտեղ իրավական դիրքորոշում է ձևավորել այն մասին, որ «(...) [Պ]ատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են՝
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) [Պ]ատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն»։
ՀՀ վճռաբեկ դատարանը Արարատ Ավագի Ավագյանի և Վահան Սերյոժայի Սահակյանի վերաբերյալ 2009 թվականի փետրվարի 17-ի թիվ ԵԿԴ/0252/01/13 որոշմամբ արտահայտել է հետևյալ իրավական դիրքորոշումը. «(…) [Ն]շանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին:
(…):
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա:
Արարքի բնույթն ու հանրային վտանգավորության աստիճանի վերաբերյալ ՀՀ վճռաբեկ դատարանը դիրքորոշում է հայտնել Գարուշ Մադաթյանի վերաբերյալ 2009 թվականի փետրվարի 17-ի թիվ ԵՇԴ/0029/01/08 որոշմամբ՝ «(…) Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը:
(…)
Արարքի հանրային վտանգավորության բնույթի որոշման հարցում Վճռաբեկ դատարանը կարևորում է խախտված քրեաիրավական նորմով պաշտպանվող հասարակական հարաբերության սոցիալական նշանակությունը: Վճռաբեկ դատարանը գտնում է, որ պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը:
(…)»:
Դատարանի համոզմամբ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Հետևաբար՝ կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 55-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից:
ՀՀ քրեական օրենսգրքի 344-րդ հոդվածի 2-րդ մասի համաձայն՝
«Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված կամ տրանսպորտային միջոց վարելու իրավունք չունեցող անձի կողմից հարբած (ոչ սթափ) վիճակում տրանսպորտային միջոց վարելը կամ այդ անձի կողմից սթափության վիճակի զննություն անցնելուց հրաժարվելը կամ խուսափելը`
պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով»:
Դատարանը նախ հարկ է համարում արձանագրել, որ ՀՀ քրեական օրենսգրքի 344-րդ հոդվածի 2-րդ մասով որպես պատիժ նախատեսված են տուգանքը, հանրային աշխատանքները, կարճաժամկետ ազատազրկումը և ազատազրկումը։
Դատարանը մեղադրյալ Արթուր Ավետիսյանի նկատմամբ հնարավոր չի համարում տուգանք պատժատեսակի նշանակումը, քանի որ իրատեսական չի համարում տուգանք պատժատեսակի նշանակումը և մեղադրյալ Արթուր Ավետիսյանի կողմից դրա կրման հնարավորությունը: Այսինքն, Դատարանը չունի լիարժեք վստահություն առ այն, որ տուգանք պատժատեսակի նշանակման դեպքում այն ընդհանրապես կկատարվի և կծառայի պատժի նպատակների ապահովմանը: Ավելին, լրացուցիչ դատալսումների ընթացքում դատապարտված մեղադրյալ Ա․Ավետիսյանը տվել է իր համաձայնությունը հանրային աշխատանքներ պատժատեսակի կիրառմամբ պատիժը կրելու վերաբերյալ: Նկատի ունենալով այն հանգամանքը, որ պատժի համակարգը կառուցված է այն տրամաբանությամբ, որ յուրաքանչյուր հաջորդող պատժատեսակ առավել խիստ է, քան նախորդողը, իսկ ՀՀ քրեական օրենսդրությամբ տուգանք պատժատեսակին հաջորդում է հանրային աշխատանքներ պատժատեսակը, Դատարանը գտնում է, որ մեղադրյալ Ա․Ավետիսյանի նկատմամբ պետք է նշանակվի պատիժ հանրային աշխատանքների ձևով: Նշված եզրահանգման հիմքում ընկած է նաև այն փաստը, որ նախկինում դատարանի կողմից մեղադրյալ Ա․Ավետիսյանի նկատմամբ 2024 թվականի հոկտեմբերի 10-ի թիվ ԵԴ1/2445/01/24 դատավճռով տուգանքի ձևով նշանակված պատիժը չի կատարվել, որպիսի հանգամանքով էլ պայմանավորված ՀՀ ԱՆ պրոբացիայի ծառայության կողմից ներկայացվել է միջնորդություն՝ տուգանքի չափին համարժեք գույք բռնագանձելու վերաբերյալ, որը թեև մերժվել է, սակայն բավարարվել է դատապարտյալ Արթուր Ավետիսյանի միջնորդությունը՝ հանրային աշխատանքներ կատարելու վերաբերյալ:
ՀՀ քրեական օրենսգրքի 60-րդ հոդվածի համաձայն՝
«1. Հանրային աշխատանքները դատարանի նշանակած և իրավասու մարմնի որոշած վայրում չվարձատրվող, դատապարտյալի ուսումնառությունից կամ աշխատանքից ազատ ժամանակահատվածում նրա կողմից հանրության համար օգտակար այնպիսի աշխատանքների կատարումն է, որոնք չեն վտանգում նրա ֆիզիկական կամ հոգեկան առողջությունը։
2. Հանրային աշխատանքները դատապարտյալի համաձայնությամբ ոչ ավելի, քան օրական 4 ժամ տևողությամբ սահմանվում են ոչ մեծ և միջին ծանրության հանցագործությունների համար՝ 60-270 ժամ տևողությամբ:
(…)»:
Վերը մեջբերված իրավական նորմերի և դիրքորոշումների լույսի ներքո մեղադրյալ Արթուր Ավետիսի Ավետիսյանի նկատմամբ պատժի տեսակը և չափը որոշելիս Դատարանը հաշվի է առնում նրա կողմից կատարված հանցագործության բնույթը և հանրության համար վտանգավորության աստիճանը, մասնավորապես՝ այն, որ նա կատարել է ոչ մեծ ծանրության դիտավորյալ հանցագործություն, խախտված հասարակական հարաբերության սոցիալական նշանակությունը, հանցանքը կատարելուց հետո մեղադրյալի դրսևորած վարքագիծը, պատասխանատվությունն ու պատիժը մեղմացնող հանգամանքները, ինչպես նաև պատասխանատվությունը և պատիժը ծանրացնող հանգամանքի բացակայությունը։ Նման պայմաններում Դատարանն արձանագրում է, որ ՀՀ քրեական օրենսգրքի 344-րդ հոդվածի 2-րդ մասով նախատեսված ութսուն ժամ հանրային աշխատանքներ պատժատեսակի նշանակման միջոցով հնարավոր է հասնել պատժի նպատակներին` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
Քրեական գործի նյութերի ուսումնասիրությամբ պարզվում է, որ Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 18-ի թիվ ԵԴ1/3002/01/24 դատավճռով Արթուր Ավետիսի Ավետիսյանը մեղավոր է ճանաչվել ՀՀ քրեական օրենսգրքի 344-րդ հոդվածի 2-րդ մասով և նրա նկատմամբ պատիժ է նշանակվել տուգանք՝ նվազագույն աշխատավարձի հնգապատիկի չափով՝ 375.000 (երեք հարյուր յոթանասունհինգ հազար) ՀՀ դրամ: ՀՀ քրեական օրենսգրքի 59-րդ հոդվածի կանոններով թույլատրվել է նշանակված տուգանքի վճարումն իրականացնել մեկ տարվա ընթացքում մաս առ մաս՝ համաչափորեն 12 ամսվա ընթացքում: Բացի այդ, Երևան քաղաքի առաջին ատյանի ընդհանուր իրավասության քրեական դատարանի 2024 թվականի հոկտեմբերի 10-ի դատավճռով Արթուր Ավետիսի Ավետիսյանը մեղավոր է ճանաչվել ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ նշանակվել է պատիժ տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով: Թույլատրվել է Արթուր Ավետիսի Ավետիսյանին դատավճռով նշանակված 375.000 ՀՀ դրամ գումարի չափով տուգանքը վճարել մաս առ մաս, 12 (տասներկու) ամսվա ընթացքում՝ յուրաքանչյուր ամիս վճարելով առնվազն 31.250 (երեսունմեկ հազար երկու հարյուր հիսուն) ՀՀ դրամ գումար:
ՀՀ ԱՆ պրոբացիայի ծառայության Արարատի մարզային մարմնից ստացված գրությունների համաձայն՝ թիվ ԵԴ1/3002/01/24 քրեական գործով 25.02.2025թ. դրությամբ Արթուր Ավետիսյանի կողմից դատավճռով նշանակված տուգանք պատժի կատարման նպատակով վճարում իրականացնելը հավաստող որևէ անդորրագիր Արարատի մարզային մարմին չի ներկայացրել: Համաձայն վերահսկողության պլանի՝ գանձման ենթակա գումարը կազմում է 375000 (երեք հարյուր յոթանասուն հինգ հազար) ՀՀ դրամ, առաջին վճարման վերջնաժամկետը՝ 29.08.2025թ.։ Թիվ ԵԴ1/2445/01/24 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի հոկտեմբերի 10-ի դատավճռով նշանակված տուգանք պատժի կատարման նպատակով վճարում կատարված չլինելու պատճառաբանությամբ ՀՀ ԱՆ պրոբացիայի ծառայության Արարատի մարզային մարմինը միջնորդություն է ներկայացրել դատարան՝ տուգանքի չափին համարժեք գույք բռնագանձելու վերաբերյալ, որը դատարանի որոշմամբ մերժվել է և բավարարվել է դատապարտյալ Արթուր Ավետիսյանի միջնորդությունը՝ տուգանք պատժատեսակը հանրային աշխատանքներ պատժատեսակով փոխարինելու վերաբերյալ, որի արդյունքում տուգանք պատժատեսակը փոխարինվել է 120 ժամ տևողությամբ հանրային աշխատանքներով: 2025 թվականի մարտի 25-ի դրությամբ նշված որոշումը ՀՀ ԱՆ պրոբացիայի ծառայության Արարատի մարզային մարմնում չի ստացվել։
ՀՀ քրեական օրենսգրքի 74-րդ հոդվածի 11-րդ մասի համաձայն՝ պատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը և պատժի կրման սկիզբ է համարվում առաջին դատավճռով նշանակված պատժի կրման սկիզբը:
Դատարանն արձանագրելով, որ Արթուր Ավետիսյանը ՀՀ քրեական օրենսգրքի 344-րդ հոդվածի 2-րդ մասով նախատեսված արարքը կատարել է 2023 թվականի հոկտեմբերի 22-ին, այսինքն նախքան թիվ ԵԴ1/3002/01/24 և ԵԴ1/2445/01/24 դատավճիռներ կայացնելը, գտնում է, որ պետք է առաջնորդվել ՀՀ քրեական օրենսգրքի 74-րդ հոդվածի 11-րդ մասով սահմանված կարգով` մասնավորապես՝ սույն դատավճռով նշանակված պատժին պետք է լրիվ գումարել Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 18-ի դատավճռով Արթուր Ավետիսի Ավետիսյանի նկատմամբ նշանակված պատիժը՝ 375․000 (երեք հարյուր յոթանասունհինգ հազար) ՀՀ դրամի չափով տուգանքը և Արթուր Ավետիսի Ավետիսյանի նկատմամբ վերջնական պատիժ նշանակել հանրային աշխատանքներ՝ 80 (ութսուն) ժամ տևողությամբ և տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
Տվյալ դեպքում սահմանված պատիժը համաչափ է կատարված կոնկրետ հանցագործության բնույթին, վտանգավորության աստիճանին, այն կատարելու հանգամանքներին, հանցավորի անձին և բավարար է պատժի նպատակների նվաճման տեսանկյունից:
Դատարանը միաժամանակ հաշվի առնելով այն փաստը, որ Ա․Ավետիսյանի նկատմամբ 2024 թվականի հոկտեմբերի 10-ի դատավճռով նշանակված տուգանքի ձևով պատժի չկրած մասին համարժեք գույք բռնագանձելու վերաբերյալ ՀՀ ԱՆ պրոբացիայի ծառայության կողմից ներկայացված միջնորդությունը մերժվել է և բավարարվել է դատապարտյալ Արթուր Ավետիսյանի միջնորդությունը՝ տուգանք պատժատեսակը հանրային աշխատանքներ պատժատեսակով փոխարինելու վերաբերյալ, որի արդյունքում տուգանք պատժատեսակը փոխարինվել է 120 ժամ տևողությամբ հանրային աշխատանքներ պատժատեսակով, գտնում է որ սույն դատավճռով նշանակված պատժին Երևան քաղաքի առաջին ատյանի ընդհանուր իրավասության քրեական դատարանի՝ 2024 թվականի հոկտեմբերի 10-ի դատավճռով նշանակված պատիժը սույն դատավճռով նշանակված պատժին լրիվ կամ մասնակի գումարելու օրենսդրական հնարավորությունը և անհրաժեշտությունը բացակայում է:
Անդրադառնալով մեղադրյալ Ա․Ավետիսյանի նկատմամբ ընտրված խափանման միջոցի հարցին՝ Դատարանը գտնում է, որ նրա նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը:
Անդրադառնալով ապացույցների տնօրինման և պահպանման հարցին՝ Դատարանը գտնում է, որ արտավարութային փաստաթուղթ ապացույց ճանաչված՝ թիվ 60170724 քրեական վարույթով վարչական իրավախախտման վերաբերյալ թիվ 8180253684 և 81800242016 արձանագրությունները, ալկոհոլի պարունակության ստուգման թիվ 00864 և 00583 կտրոնները, ստուգաչափման թիվ 093539 և 074606 վկայականները, ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության պատճենները պետք է պահել գործի նյութերի հետ՝ դրանց պահման ամբողջ ընթացքում:
Նկատի ունենալով այն հանգամանքը, որ սույն քրեական գործով գույքային հայց, գույք բռնագրավելու անհրաժեշտություն, վարույթային ծախսեր, արգելադրված գույք առկա չեն՝ Դատարանն այդ հարցերին չի անդրադառնում։
Ելնելով վերոգրյալից և ղեկավարվելով Հայաստանի Հանրապետության քրեական դատավարության օրենսգրքի 30-31-րդ, 100-րդ, 167-րդ, 347-350-րդ, 352-353-րդ, 364-րդ հոդվածներով՝ Դատարանը

Վ Ճ Ռ Ե Ց

Արթուր Ավետիսի Ավետիսյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով և և նրա նկատմամբ պատիժ նշանակել հանրային աշխատանքներ՝ 80 (ութսուն) ժամ տևողությամբ:
ՀՀ քրեական օրենսգրքի 74-րդ հոդվածի 11-րդ մասով սահմանված կարգով` սույն դատավճռով նշանակված պատժին լրիվ գումարել Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 18-ի դատավճռով Արթուր Ավետիսի Ավետիսյանի նկատմամբ նշանակված պատիժը՝ 375․000 (երեք հարյուր յոթանասունհինգ հազար) ՀՀ դրամի չափով տուգանքը և Արթուր Ավետիսի Ավետիսյանի նկատմամբ վերջնական պատիժ նշանակել հանրային աշխատանքներ՝ 80 (ութսուն) ժամ տևողությամբ և տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
Արթուր Ավետիսի Ավետիսյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Ապացույց ճանաչված արտավարութային փաստաթղթերը պահել գործի նյութերի հետ՝ դրանց պահման ամբողջ ընթացքում:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:

ԴԱՏԱՎՈՐ Մ.ԱՐԶՈւՄԱՆՅԱՆ