Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2024 թվականի դեկտեմբերի 27-ին Երևան քաղաքում

Երևան քաղաքի առաջին ատյանի ընդհանուր իրավասության քրեական
դատարանը (այսուհետ նաև` Դատարան)` հետևյալ կազմով

Նախագահությամբ դատավոր՝ Տիգրան Ոսկանյանի
Քարտուղարությամբ՝ Սյուզաննա Բադալյանի

Մասնակցությամբ
Մեղադրող՝ Տարոն Մխիթարյանի
Մեղադրյալ` Պետրոս Բարդուղյանի

Դռնբաց դատական նիստում քննեց քրեական գործն ըստ մեղադրանքի Պետրոս Բարդեղիմոսի Բարդուղյանի (ծնված՝ 25.08.1980 թվականին՝ Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երկու անչափահաս երեխա, չի աշխատում, նախկինում դատված, հաշվառված և փաստացի բնակվող՝ ք․Երևան, Վարդան Աճեմյան փողոց, տուն 119 հասցեում) ՀՀ քրեական օրենսգրքի 344-րդ հոդվածի 1-ին մասով,
1.Գործի դատավարական նախապատմությունը.
2023 թվականի հոկտեմբերի 19-ին ՀՀ քրեական օրենսգրքի 344-րդ հոդվածի 1-ին մասով ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում նախաձեռնվել է թիվ 60024623 քրեական վարույթը:
2024 թվականի նոյեմբերի 28-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Տ.Մխիթարյանի որոշմամբ Պետրոս Բարդեղիմոսի Բարդուղյանի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 344-րդ հոդվածի 1-ին մասով:
2024 թվականի նոյեմբերի 29-ին ՀՀ քննչական կոմիտեի Երևան քաղաքի քննչական վարչության Արաբկիր և Քանաքեռ-Զեյթուն վարչական շրջանների քննչական բաժնի քննիչ Լ.Ալոյանի որոշմամբ Պետրոս Բարդեղիմոսի Բարդուղյանի նկատմամբ կիրառվել է այլընտրանքային խափանման միջոց՝ բացակայելու արգելքը:
Թիվ 60024623 քրեական վարույթի նյութերն ըստ մեղադրանքի Պետրոս Բարդեղիմոսի Բարդուղյանի՝ ՀՀ քրեական օրենսգրքի 344-րդ հոդվածի 1-ին մասով, 2024 թվականի դեկտեմբերի 06-ի գրությամբ Երևան քաղաքի Արաբկիր և Քանաքեռ-Զեյթուն վարչական շրջանների դատախազությունից ուղարկվել է Երևան քաղաքի առաջին ատյանի ընդհանուր իրավասության քրեական դատարան, մուտքագրվել է 10.12.2024 թվականին և նույն օրն էլ համակարգչային ծրագրի միջոցով իրականացվող գործերի բաշխմամբ, գործը մակագրվել է դատավոր Տիգրան Ոսկանյանին: Քրեական գործին շնորհվել է թիվ ԵԴ1/3693/01/24 համարը:
Քրեական գործը դատավորին հանձնվել է 2024 թվականի դեկտեմբերի 11-ին։
2024 թվականի դեկտեմբերի 13-ին որոշում է կայացվել Պետրոս Բարդեղիմոսի Բարդուղյանի վերաբերյալ ՀՀ քրեական օրենսգրքի 344-րդ հոդվածի 1-ին մասով թիվ ԵԴ1/3693/01/24 քրեական գործը վարույթ ստանձնելու և նախնական դատալսումների նշանակելու մասին:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ մինչդատական վարույթի ընթացքում ընտրված խափանման միջոցը` բացակայելու արգելքը թողնել անփոփոխ:
2. Մեղադրանքի փաստական նկարագրությունը.
Պետրոս Բարդեղիմոսի Բարդուղյանի նկատմամբ ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում է հարուցվել այն բանի համար, որ նա զրկված լինելով տրանսպորտային միջոց վարելու իրավունքից, 2023 թվականի մայիսի 17-ին՝ ժամը 09:45-ի սահմաններում, Երևան քաղաքի Քանաքեռ-Զեյթուն վարչական շրջանի Դավիթ Անհաղթ փողոցում վարել է ՕՊԵԼ մակնիշի 37 NT 641 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է թիվ 8180251777 արձանագրությունը:
3.Դատաքննությամբ հետազոտված թույլատրելի ապացույցները.
Մեղադրյալ Պետրոս Բարդեղիմոսի Բարդուղյանը հիմնական դատալսումների ժամանակ օգտվելով իր սահմանադրական իրավունքից՝ ցուցմունք չտվեց, միաժամանակ հանրային մեղադրողի միջնորդության հիման վրա հրապարակվեց մեղադրյալ Պ.Բարդուղյանի նախաքննական ցուցմունքը, ըստ որի վկայի դատավարական կարգավիճակում Պ․Բարդուղյանը 2024 թվականի հոկտեմբերի 17-ին ցուցմունք է տվել այն մասին, որ․ «Ինքը տեղեկացված է եղել, որ 2022 թվականի դեկտեմբերի 16-ին զրկվել է տրանսպորտային միջոցներ վարելու իրավունքից մեկ տարի ժամկետով։ 2023 թվականի մայիսի 17-ին, ժամը՝ 09։40-ի սահմաններում ք․Երևան, Դ․Անհաղթ փողոցում վարել է «Օպել» մակնիշի 37 NT 641 հաշվառման համարանիշի տրանսպորտային միջոցը, որը արձանագրվել է պարեկային ծառայության աշխատակցի կողմից: Ինքը այդ պահին մատուցելիս է եղել տաքսի ծառայություններ՝ իմանալով, որ զրկված է տրանսպորտային միջոցներ վարելու իրավունքից։ Հստակ օրը չի հիշում, սակայն 2023 թվականին ևս մեկ անգամ տրանսպորտային միջոցներ վարելու իրավունքը զրկված վիճակում վարել է տրանսպորտային միջոց, որի վերաբերյալ առկա է դատարանի օրինական ուժի մեջ մտած դատավճիռ», մեղադրյալի դատավարական կարգավիճակում Պ․Բարդուղյանը 2024 թվականի նոյեմբերի 29-ին ցուցմունք է տվել այն մասին, որ․ «ՀՀ քրեական օրենսգրքի 344-րդ հոդվածի 1-ին մասով ներկայացված մեղադրանքում իրեն մեղավոր է ճանաչում, մեղադրանքի փաստական հիմքը իրեն պարզ է, պնդում է նախկինում տված իր ցուցմունքները ամբողջությամբ, այս պահին օգտվելով իր դատավարական իրավունքից հրաժարվում է ցուցմունք տալ և պատասխանել հարցերին»։
(Տե՛ս գ.թ. 23-26,39-40 դատական նիստի արձանագրություն)
Հետազոտվել են.
Զննում կատարելու մասին արձանագրությունը, համաձայն որի՝ զննության են ենթարկվել Պետրոս Բարդուղյանի վերաբերյալ 17.05.2023թ.-ին կազմված վարչական իրավախախտման վերաբերյալ թիվ 8180251777 արձանագրությունը, ՃՈ էլեկտրոնային ռեգիստրի քաղվածքը, վարչական իրավախախտման վերաբերյալ թիվ 8180240627 արձանագրությունը, սթափության վիճակի զննման կտրոնը, թիվ 083665 ստուգաչափման վկայականը.
1.Վարչական իրավախախտման վերաբերյալ թիվ 8180251777 որոշում-արձանագրությունը, որում արձանագրվել է, որ Պետրոս Բարդեղիմոսի Բարդուղյանը 17.05.2023թ-ին` ժամը 09:45-ին, Երևան քաղաքի Դ.Անհաղթ փողոցում «Օպել» մակնիշի 37 NT 641 հ/հ-ի ավտոմեքենան վարել է տրանսպորտային միջոց վարելու իրավունքը զրկված վիճակում:
2.ՃՈ-ի էլեկտրոնային ռեգիստրի քաղվածքը, համաձայն որի՝ Պետրոս Բարդեղիմոսի Բարդուղյանը RE355816 համարի վարորդական իրավունքի վկայականը զրկումների բաժնում նշված է` սկիզբ` 16.12.2022, ավարտ` 18.12.2024:
3.Վարչական իրավախախտման վերաբերյալ թիվ 8180240627 արձանագրությունը, որում արձանագրվել է, որ Պետրոս Բարդեղիմոսի Բարդուղյանը 16.12.2022թ-ին` ժամը 00:37-ին, Երևան քաղաքի Սարկավագի փողոցում «Օպել» մակնիշի 37 NT 641 հ/հ-ի ավտոմեքենան վարել է ոչ սթափ վիճակում: 16.12.2022թ-ի որոշումով Պետրոս Բարդեղիմոսի Բարդուղյանը զրկվել է տրանսպորտային միջոց վարելու իրավունքից մեկ տարի ժամկետով:
4.Սթափության վիճակի զննման կտրոնը, համաձայն որի սարքի համարն է 91101000, զննման համարը 00266, զննման ամսաթիվը դեկտեմբերի 16-ը, 2022թ. Ժամը 00:32:20: Ալկոհոլի պարունակությունը` 1,016 mc/L: Վարորդի անունը Պետրոս Բարդուղյան, տ/մ համարանիշ 37 NT 641 և այլ նույնականացնող տվյալներ:
5.Թիվ 083665 ստուգաչափման վկայականը, որի ստուգաչափման թվականն է 2022թ.11. «15», ուժի մեջ է մինչև 2023թ.11. «15»:
(Տե՛ս գ.թ 27, դատական նիստի արձանագրություն)
Արտավարույթային փաստաթղթեր ճանաչված՝ Բարդեղիմոսի Բարդուղյանի վերաբերյալ 17.05.2023թ.-ին կազմված վարչական իրավախախտման վերաբերյալ թիվ 8180251777 արձանագրությունը, ՃՈ էլեկտրոնային ռեգիստրի քաղվածքը, վարչական իրավախախտման վերաբերյալ թիվ 8180240627 արձանագրությունը, սթափության վիճակի զննման կտրոնը, թիվ 083665 ստուգաչափման վկայականը։
(Տե՛ս գ.թ 28, դատական նիստի արձանագրություն)
4.Դատարանի փաստական վերլուծությունները և Դատարանի կողմից հաստատված փաստական հանգամանքները:
Հետազոտված ապացույցների հիման վրա դատարանի կողմից հաստատված են համարվում հետևյալ փաստական հանգամանքները.
Պետրոս Բարդեղիմոսի Բարդուղյանը զրկված լինելով տրանսպորտային միջոց վարելու իրավունքից, 2023 թվականի մայիսի 17-ին՝ ժամը 09:45-ի սահմաններում, Երևան քաղաքի Քանաքեռ-Զեյթուն վարչական շրջանի Դավիթ Անհաղթ փողոցում վարել է ՕՊԵԼ մակնիշի 37 NT 641 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է թիվ 8180251777 արձանագրությունը:
5.Դատարանի իրավական վերլուծությունը.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Պետրոս Բարդեղիմոսի Բարդուղյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Պետրոս Բարդեղիմոսի Բարդուղյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 1-ին մասը:
Դատարանը հաստատված համարելով հանցագործության և դրա կատարման մեջ Պետրոս Բարդեղիմոսի Բարդուղյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
ՀՀ քրեական դատավարության օրենսգրքի 348-րդ հոդվածի համաձայն՝ ի թիվս այլի դատավճռում պետք է շարադրվեն հետևյալ հարցերի պատասխանները․
-ապացուցված են արդյո՞ք դատապարտված մեղադրյալի պատասխանատվությունը և պատիժը մեղմացնող կամ ծանրացնող հանգամանքները.
-ինչ պատիժ պետք է նշանակվի դատապարտված մեղադրյալի նկատմամբ.
-դատապարտված մեղադրյալը արդյո՞ք պետք է կրի իր նկատմամբ նշանակված պատիժը։
Նշված հարցերի լուծման ընթացքում դատարանը պետք է ղեկավարվի ՀՀ քրեական օրենսգրքի Ընդհանուր մասի մի շարք դրույթներով:
ՀՀ քրեական օրենսգրքի 7-րդ հոդվածի համաձայն՝ «1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը»:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»:
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները»:
Դատարանի համոզմամբ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Հետևաբար, կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 55-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից:
Վերոգրյալ իրավական նորմերի լույսի ներքո անդրադառնալով մեղադրյալ Պետրոս Բարդեղիմոսի Բարդուղյանի նկատմամբ նշանակվող պատժի տեսակի և չափի հարցերին, Դատարանն արձանագրում է, որ մեղադրյալ Պետրոս Բարդեղիմոսի Բարդուղյանը ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության համար ենթակա է պատժի՝ տուգանքի ձևով՝ նվազագույն ամսական աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով: Սահմանված պատիժը տվյալ դեպքում համաչափ է կատարված կոնկրետ հանցագործության բնույթին, վտանգավորության աստիճանին, այն կատարելու հանգամանքներին, հանցավորի անձին և բավարար է պատժի նպատակների նվաճման տեսանկյունից:
Դատարանի այս հետևությունները պայմանավորված են այն հանգամանքով, որ Պետրոս Բարդեղիմոսի Բարդուղյանը մեղքն ընդունել է, զղջացել է կատարածի համար, տվել ինքնախոստովանական ցուցմունքներ, խնամքին ունի երկու անչափահաս երեխա՝ 15.10.2009թ. ծնված Նունե Պետրոսի Բարդուղյանի /ծննդյան վերաբերյալ ակտի գրանցում թիվ 030120/ և 26.03.2011թ. ծնված Գոռ Պետրոսի Բարդուղյանի /ծննդյան վերաբերյալ ակտի գրանցում թիվ 128103/ (անչափահաս երեխա ունենալու հանգամանքը հավաստվում է թիվ ԿԴ/0454/01/23 դատավճռով), հանցանք կատարելու պահին հանդիսացել է առաջին անգամ հանցանք կատարած անձ և չի ունեցել դատվածություն:
Մեղադրյալի պատասխանատվությունը և պատիժը ծանրացնող հանգամանքների վերաբերյալ փաստական տվյալներ գործով ձեռք չեն բերվել:
Դատարանը հաշվի առնելով, որ մեղադրյալ Պետրոս Բարդեղիմոսի Բարդուղյանը Կոտայքի մարզի առաջին ատյանի ընդհանուր իրավասության դատարանի 2024 թվականի հունվարի 15-ի թիվ ԿԴ/0454/01/23 դատավճռով մեղավոր է ճանաչվել ՀՀ քրեական օրենսգրքի 344-րդ հոդվածի 1-ին մասով և դատապարտվել է տուգանքի՝ 375.000 (երեք հարյուր յոթանասունհինգ հազար) ՀՀ դրամի չափով, ուստի հիմք ընդունելով ՀՀ քրեական օրենսգրքի 74-րդ հոդվածի 11-րդ մասը, գտնում է, որ Պետրոս Բարդեղիմոսի Բարդուղյանի նկատմամբ պատիժ պետք է նշանակել հանցանքների համակցության կանոններով, այն է` ՀՀ քրեական օրենսգրքի 74-րդ հոդվածով սահմանված կարգով սույն դատավճռով նշանակված պատժին լրիվ գումարելով Կոտայքի մարզի առաջին ատյանի ընդհանուր իրավասության դատարանի 2024 թվականի հունվարի 15-ի թիվ ԿԴ/0454/01/23 դատավճռով նշանակված 375.000 (երեք հարյուր յոթանասունհինգ հազար) ՀՀ դրամի չափով նշանակված տուգանքի չվճարած չափը՝ 127.000 (հարյուր քսանյոթ հազար) ՀՀ դրամի չափով տուգանքը և վերջնական պատիժ նշանակել տուգանք՝ 502.000 (հինգ հարյուր երկու հազար) ՀՀ դրամի չափով:
Միաժամանակ հաշվի առնելով այն հանգամանքը, որ Պետրոս Բարդեղիմոսի Բարդուղյանը հայտարարեց, որ ինքն անհապաղ ի վիճակի չէ ամբողջությամբ վճարել տուգանքը, այլ կարող է այն վճարել մաս-մաս, ապա Դատարանը հիմք ընդունելով ՀՀ քրեական օրենսգրքի 59-րդ հոդվածի 8-րդ մասի կարգավորումները գտնում է, որ մեղադրյալին պետք է հնարավորություն տալ նշանակվելիք տուգանքը վճարել մաս առ մաս՝ 1 (մեկ) տարվա ընթացքում՝ ըստ դատապարտյալի և ՀՀ ԱՆ պրոբացիայի ծառայության համապատասխան մարմնի կողմից համատեղ սահմանած վճարման ժամանակացույցի։
ՀՀ քրեական դատավարության 348-րդ հոդվածի համաձայն դատավճռում պետք է շարադրվեն նաև հետևյալ հարցերի պատասխանները․
-գույքային հայցը ենթակա է արդյոք բավարարման, ում օգտին և ինչ չափով, ինչպես նաև պատճառված գույքային վնասը ենթակա է արդյոք հատուցման, եթե գույքային հայց չի հարուցվել.
-որ գույքն է ենթակա բռնագրավման, ինչ չափով և ինչպիսի հիմքով․
-վերացվելու է արդյոք կիրառված գույքի արգելադրումը, իսկ եթե այդպիսին կիրառված չէ, ապա ենթակա է արդյոք կիրառման.
-ինչպես պետք է պահպանվեն և տնօրինվեն ապացույցները.
-դատապարտված մեղադրյալի նկատմամբ վերացվելու, փոխվելու կամ կիրառվելու է արդյոք որևէ խափանման միջոց.
-ում վրա և ինչ չափով պետք է դրվեն վարութային ծախսերը։
Քննարկելով մեղադրյալի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
Նկատի ունենալով, որ սույն քրեական գործով գույքային հայց, գույք բռնագրավելու անհրաժեշտություն, արգելադրված գույք, վարութային ծախսեր, ապացույցների պահպանման և տնօրինման հարցեր առկա չեն, դատարանը այդ հարցերին չի անդրադառնում:
Ելնելով վերոգրյալից և ղեկավարվելով Հայաստանի Հանրապետության քրեական դատավարության օրենսգրքի 30-31-րդ, 100-րդ, 167-րդ, 347-350-րդ, 352-353-րդ, 364-րդ հոդվածներով, Դատարանը`
Վ Ճ Ռ Ե Ց
Պետրոս Բարդեղիմոսի Բարդուղյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն ամսական աշխատավարձի հնգապատիկի՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածով սահմանված կարգով սույն դատավճռով նշանակված պատժին լրիվ գումարել Կոտայքի մարզի առաջին ատյանի ընդհանուր իրավասության դատարանի 2024 թվականի հունվարի 15-ի թիվ ԿԴ/0454/01/23 դատավճռով Պետրոս Բարդեղիմոսի Բարդուղյանի նկատմամբ նշանակված 375.000 (երեք հարյուր յոթանասուն հինգ հազար) ՀՀ դրամի չափով նշանակված տուգանքի չվճարած չափի՝ 127.000 (հարյուր քսանյոթ հազար) ՀՀ դրամի չափով տուգանքը և Պետրոս Բարդեղիմոսի Բարդուղյանի նկատմամբ վերջնական պատիժ նշանակել տուգանք՝ 502.000 (հինգ հարյուր երկու հազար) ՀՀ դրամի չափով:
ՀՀ քրեական օրենսգրքի 59-րդ հոդվածի 8-րդ մասի կարգով՝ թույլատրել Պետրոս Բարդեղիմոսի Բարդուղյանին դատավճռով նշանակված 502.000 (հինգ հարյուր երկու հազար) ՀՀ դրամի գումարի չափով տուգանքը վճարել մաս առ մաս՝ 1 (մեկ) տարվա ընթացքում՝ ըստ դատապարտյալի և ՀՀ ԱՆ պրոբացիայի ծառայության համապատասխան մարմնի կողմից համատեղ սահմանած վճարման ժամանակացույցի:
Պետրոս Բարդեղիմոսի Բարդուղյանի նկատմամբ ընտրված բացակայելու արգելք խափանման միջոցը թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
Դատավճիռը կարող է բողոքարկվել ՀՀ վերաքննիչ քրեական դատարան` այն ստանալու օրվանից հետո՝ մեկամսյա ժամկետում:

ԴԱՏԱՎՈՐ ՏԻԳՐԱՆ ՈՍԿԱՆՅԱՆ