ԵԴ1/3686/01/24







Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Տ․ՄԽԻԹԱՐՅԱՆԻ
մեղադրյալ Մ․ԱՎԱԳՅԱՆԻ


2024 թվականի դեկտեմբերի 25-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Մարզպետ Ռուստամի Մանուկյան՝ ծնված 1990 թվականի սեպտեմբերի 27-ին, Գեղադիր համայնքում, հայ, ՀՀ քաղաքացի, միջնակարգ կրթությամբ, նախկինում դատված, աշխատում է Գաթա» պանդակում որպես խոհարար, ամուսնացած, ըստ իր հայտարարության՝ խնամքին 2 անչափահաս երեխա հաշվառված է և բնակվում է Կոտայքի մարզ, Գեղադիր համայնք, 5-րդ փողոց, 2-րդ փակուղի, 1-ին տուն հասցեում, քրեական հետապնդում է հարուցվել 2 դրվագ ՀՀ քրեական օրենսգրքի 344-րդ հոդվածի 1-ին մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1.Գործի դատավարական նախապատմությունը
2024 թվականի հունիսի 14-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-2316-24 քրեական վարույթը:
2024 թվականի հունիսի 14-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-2317-24 քրեական վարույթը:
Նախաքննության մարմնի 2024 թվականի հունիսի 14-ի որոշմամբ թիվ 60-2317-24 քրեական վարույթը միացվել է թիվ 60-2316-24 քրեական վարույթին, վարույթը շարունակվել թիվ 60-2316-24 համարով։
2024 թվականի հոկտեմբերի 25-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 09125324 քրեական վարույթը:
2024 թվականի հոկտեմբերի 25-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 09125424 քրեական վարույթը:
Նախաքննության մարմնի 2024 թվականի հոկտեմբերի 25-ի որոշմամբ թիվ 09125324 և 09125424 քրեական վարույթները միացվել է թիվ 60-2316-24 քրեական վարույթին, վարույթը շարունակվել թիվ 60-2316-24 համարով։
2024 թվականի հուլիսի 19-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-2713-24 քրեական վարույթը:
Նախաքննության մարմնի 2024 թվականի հոկտեմբերի 30-ի որոշմամբ թիվ 60-2713-24 քրեական վարույթը միացվել է թիվ 60-2316-24 քրեական վարույթին, վարույթը շարունակվել թիվ 60-2316-24 համարով։
2024 թվականի նոյեմբերի 29-ի որոշմամբ Մարզպետ Ռուստամի Մանուկյան նկատմամբ քրեական հետապնդում է հարուցվել 2 դրվագ ՀՀ քրեական օրենսգրքի 344-րդ հոդվածի 1-ին մասով այն արարքների համար, որ նա, հանդիսանալով տրանսպորտային միջոցներ վարելու իրավունքը կասեցված անձ և հաստատապես տեղյակ լինելով այդ մասին, 2024 թվականի մայիսի 19-ին՝ ժամը 11:25-ի սահմաններում, Երևան քաղաքի Թումանյան փողոցում դիտավորությամբ վարել է «ԲՄՎ» մակնիշի 66 PP 466 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է թիվ 8180269984 արձանագրությունը։
Այսինքն՝ Մարզպետ Ռուստամի Մանուկյանին մեղսագրվում է հանցանք՝ նախատեսված ՀՀ քրեական օրենսգրքի 344-րդ հոդվածի 1-ին մասով:
Բացի այդ, Մարզպետ Ռուստամի Մանուկյանը, հանդիսանալով տրանսպորտային միջոցներ վարելու իրավունքը կասեցված անձ և հաստատապես տեղյակ լինելով այդ մասին, 2024 թվականի հունիսի 6-ին՝ ժամը 10:40-ի սահմաններում, Երևան քաղաքի Մոլդովական փողոցում դիտավորությամբ վարել է «ԲՄՎ» մակնիշի 66 PP 466 հաշվառման համարանիշի տրանսպորտային միջոցը որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է թիվ 8180405653 արձանագրությունը:
2024 թվականի նոյեմբերի 29-ի մեկ այլ որոշմամբ Մարզպետ Ռուստամի Մանուկյան նկատմամբ ՀՀ քրեական օրենսգրքի 344-րդ հոդվածի 1-ին մասով կայացվել է հանրային քրեական հետապնդում չհարուցելու մասին։
2024 թվականի նոյեմբերի 30-ի որոշմամբ Մարզպետ Ռուստամի Մանուկյան նկատմամբ խափանման միջոց է ընտրվել բացակայելու արգելքը:
2024 թվականի դեկտեմբերի 10-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/3686/01/24 համարը:
2024 թվականի դեկտեմբերի 12-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2024 թվականի դեկտեմբերի 25-ին Դատարանը Մարզպետ Ռուստամի Մանուկյան նկատմամբ կայացրել է մեղադրական վերդիկտ։


2.Դատարանում հետազոտված և գնահատված ապացույցներ
Մեղադրյալ Մարզպետ Ռուստամի Մանուկյանն առաջադրված մեղադրանքում իրեն մեղավոր է ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում 2024 թվականի հոկտեմբերի 17-ին Մարզպետ Ռուստամի Մանուկյանը ցուցմունք է տվել այն մասին, որ ինքը տեղյակ է, որ 2023 թվականի դեկտեմբերի 23-ին իր կողմից՝ տրանասպորտային միջոցներ վարելու իրավունքը կասեցվել է վեց ամիս ժամկետով, սակայն երբ առաջին անգամ, պարեկային ծառայության աշխատակիցները՝ իր կողմից վարվող տրանսպորտային միջոցը կանգնեցրել են, այդ պահին նոր նրան տեղեկացվել են, որ իր տրանասպորտային միջոց վարելու իրավունքը կասեցված է: Դրանից հետո ինքը վարել է տրանսպորտային միջոց 2024 թվականի մարտի 31-ին, մայիսի 19-ին և 2024 թվականի հունիսի 06-ին: Վարույթն իրականացնող մարմնի կողմից հնչեցված հարցին ի պատասխան հայտնեց, որ այո թվարկվածների մեջ եղել է դեպք, երբ ինքը տրանասպորտային միջոցը վարել է ոչ սթափ վիճակում: Ծանուցում ուղարկվել է իր հաշվառման հասցեով, որը ստացել է իր մայրը և իրեն այդ մասին չի հայտնել: 2024 թվականի նոյեմբերի 30-ին Մարզպետ Ռուստամի Ավագյանը որպես մեղադրյալ ցուցմունք է տվել այն մասին, որ իրեն պարզաբանվել են որպես մեղադրյալ իր իրավունքները և պարտականությունները, դրանք իր համար պարզ են և հասկանալի: ՀՀ քրեական օրենսգրքի 344-րդ հոդվածի 1-ին մասով ներկայացված մեղադրանքում իրեն մեղավոր է ճանաչում, մեղադրանքի փաստական հիմքը իրեն պարզ է, պնդում է նախկինում տված իր ցուցմունքները ամբողջությամբ, այս պահին օգտվելով իր դատավարական իրավունքից հրաժարվում է ցուցմունք տալ և պատասխանել հարցերին ստորագրել է արձանագրության համապատասխան տողերում: Հայտարարում է, որ զղջում է կատարված դեպքերի համար(տե´ս դատական նիստի արձանագրություն, քրեական գործ, 46-49, 145-146-րդ թերթեր)։
Ցուցմունքները հրապարակելուց հետո Մարզպետ Ռուստամի Մանուկյանը հայտնել է, որ դրանք ճիշտ են և պնդել է դրանք (տե՛ս դատական նիստի արձանագրությունը):
Հիմնական դատալսումների ընթացքում հետազոտվել են հետևյալ գրավոր ապացույցները.
Զննում կատարելու մասին արձանագրությունը, որի համաձայն՝ զննության են ենթարկվել վարչական իրավախատման վերաբերյալ 19.05․24թ․ և 6․06․24թ կազմված արձանագրությունները, ՃՈ ռգիստրի քաղվածքը, փոստային ծառայության կողմից ծանուցման թերթիկում առկա Պատվիրված» գրառումը։ Մարզպետ Մանուկյանը 2024 թվականի փետրվարի 05-ին ժամը 23:50-ի սահմաններում ք. Երևան Զ.Քանաքեռցու փողոցում՝ իր կողմից շահագործվող BMW» մակնիշի 66 PP 466 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքը կասեցված վիճակում, որի վերաբերյալ ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի, 3-րդ վաշտի կրտսեր պարեկ՝ Արման Սարինյանը կազմել է վարչական իրավախախտումների վերաբերյալ թիվ 8180269720 արձանագրությունը:
Մարզպետ Մանուկյանը 2024 թվականի մայիսի 19-ին ժամը 11:25-ի սահմաններում Երևան քաղաքի Թումանյան փողոցում՝ իր կողմից շահագործվող BMW» մակնիշի 66 PP 466 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքը կասեցված վիճակում, որի վերաբերյալ ՀՀ ՆԳՆ ոստիկանության պարեկային ծառայության, ավագ լեյտենանտ, ավագ պարեկ՝ Գագիկ Ասլանյանը, կազմել է վարչական իրավախախտումների վերաբերյալ թիվ 8180269984 արձանագրությունը։
Մարզպետ Մանուկյանը 2024 թվականի մայիսի 19-ին ժամը 11:25-ի սահմաններում Երևան քաղաքի Թումանյան փողոցում՝ իր կողմից շահագործվող BMW» մակնիշի 66 PP 466 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքը կասեցված վիճակում, որի վերաբերյալ ՀՀ ՆԳՆ ոստիկանության պարեկային ծառայության, ավագ լեյտենանտ, ավագ պարեկ՝ Գագիկ Ասլանյանը, կազմել է վարչական իրավախախտումների վերաբերյալ թիվ 8180269984 արձանագրությունը:
Մարզպետ Մանուկյանը 2024 թվականի հունիսի 06-ին ժամը 10:40-ի սահմաններում Երևան քաղաքի Մոլդովական փողոցում՝ իր կողմից շահագործվող BMW» մակնիշի 66 PP 466 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքը կասեցված վիճակում, որի վերաբերյալ ՀՀ ՆԳՆ ոստիկանության պարեկային ծառայության, ավագ սերժանտ, կրտսեր պարեկ Խաչատուր Մելքոնյանը, կազմել է վարչական իրավախախտումների վերաբերյալ թիվ 8180405652 արձանագրությունը։
ՃՈ Ռեգիստրի քաղվածքի համաձայն դեպքի վերաբերելի ժամակահատվածում Մարզպետ Մանուկյանի տրանսպորտային միջոցներ վարելու իրավունքը կասեցված է եղել 28.12.2023թ-ից մինչև 28.06.2024թ․-ը։
Մարզպետ Մանուկյանի վարորդական իրավունքը կասեցնելու վերաբերյալ որոշման ծանուցման թերթիկներում առկա են Պատվիրված» գրառումը (տե´ս դատական նիստի արձանագրություն, քրեական գործ, 122-123-րդ թերթեր)։
Մ․Մանուկյանի դատավածության վերաբերյալ տեղեկանքը, որի համաձայն Մ․Մանուկյանը նախկինում դատապարտված է եղել (տե´ս դատական նիստի արձանագրություն):


3.Դատարանի իրավական վերլուծությունները
Դատարանը, վերլուծելով մեղադրյալ Մ․Մանուկյանը առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ Մարզպետ Ռուստամի Մանուկյանը, հանդիսանալով տրանսպորտային միջոցներ վարելու իրավունքը կասեցված անձ և հաստատապես տեղյակ լինելով այդ մասին, 2024 թվականի մայիսի 19-ին՝ ժամը 11:25-ի սահմաններում, Երևան քաղաքի Թումանյան փողոցում դիտավորությամբ վարել է «ԲՄՎ» մակնիշի 66 PP 466 հաշվառման համարանիշի տրանսպորտային միջոցը, որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է թիվ 8180269984 արձանագրությունը, բացի այդ, Մարզպետ Ռուստամի Մանուկյանը հանդիսանալով տրանսպորտային միջոցներ վարելու իրավունքը կասեցված անձ և հաստատապես տեղյակ լինելով այդ մասին, 2024 թվականի հունիսի 6-ին՝ ժամը 10:40-ի սահմաններում, Երևան քաղաքի Մոլդովական փողոցում դիտավորությամբ վարել է «ԲՄՎ» մակնիշի 66 PP 466 հաշվառման համարանիշի տրանսպորտային միջոցը որի վերաբերյալ ՀՀ ՆԳՆ ոստիկանության պարեկային ծառայության պարեկի կողմից կազմվել է թիվ 8180405653 արձանագրությունը։
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Մ․Մանուկյանի կողմից երկու անգամ տրանսպորտային միջոց վարելը իրավունքը կասեցված լինելու պայմաններում, այդ արարքներն ապացուցված են, ճիշտ են որակված և համապատասխանում է 2 դրվագ ՀՀ քրեական օրենսգրքի 344-րդ հոդվածի 1-ին մասի հատկանիշներին:
Անդրադառնալով մեղադրյալի նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
Պատժի նշանակման հիմնական կանոնները սահմանող իրավական նորմերը (նախկին օրենսգրքի) ՀՀ վճռաբեկ դատարանը վերլուծել և դրանց վերաբերյալ իրավական դիրքորոշումներ է հայտնել թիվ ՎԲ-50/07, ՎԲ-124/07, ՎԲ-142/07, ՎԲ-192/07, ՎԲ-201/07, ԱՎԴ2/0059/01/08, ԵԱՔԴ/0078/01/09 ԵԿԴ/0042/01/11, ինչպես նաև մի շարք այլ գործերով կայացված որոշումներում: Վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և այն կատարող անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, այն կատարող անձի, պատիժը մեղմացնող և ծանրացնող հանգամանքների վերլուծության հիման վրա
Այսպես` Դատարանը մեղադրյալ Մ. Մանուկյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Մ.Մանուկյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Դատարանը, որպես մեղադրյալ Մ.Մանուկյանի պատասխանատվությունն ու պատիժը մեղմացնող հանգամանք հաշվի է առնում այն, որ նա իրեն լիովին մեղավոր է ճանաչել և տվել խոստովանական ցուցմունքներ, անկեղծորեն զղջացել է կատարած արարքի համար:
Դատարանը, արձանագրում է, որ մեղադրյալ Մ. Մանուկյանի պատասխանատվությունն ու պատիժը ծանրացնող հանգամանք առկա չէ։
Դատարանը գտնում է, որ կատարած արարքի համար մեղադրյալ Մ.Մանուկյանը ենթակա է պատժի:
Դատարանը, հաշվի առնելով մեղադրյալ Մ.Մանուկյանի կատարած արարքի՝ հանրության համար վտանգավորության աստիճանն ու բնույթը, նրա անձը բնութագրող, պատասխանատվությունը և պատիժը մեղմացնող հանգամանքները, գտնում է, որ մեղադրյալ Մ. Մանուկյանն իր կատարած 2 դրվագ ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության համար ենթակա է պատժի տուգանքի ձևով։ Այսպես՝ ՀՀ քրեական օրենսգրքի 344-րդ հոդվածի 1-ին մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով և ՀՀ քրեական օրենսգրքի 344-րդ հոդվածի 1-ին մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով։
ՀՀ քրեական օրենսգրքի 74-րդ հոդվածի հիման վրա՝ մեղադրյալ Մարզպետ Մանուկյանի նկատմամբ նշանակված պատիժներն լրիվ գումարելու միջոցով, նրա նկատմամբ պատիժ պետք է նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով։
ՀՀ քրեական օրենսգրքի 74-րդ հոդվածի 11-րդ մասի համաձայն՝ «Պատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը և պատժի կրման սկիզբ է համարվում առաջին դատավճռով նշանակված պատժի կրման սկիզբը»։
Սույն գործի նյութերի ուսումնասիրությունից երևում է, որ ՀՀ Կոտայքի մարզի առաջին ատյանի ընդհանուր իրավասության դատարանի 2024 թվականի հոկտեմբերի 11-ի դատավճռով Մարզպետ Մանուկյանը մեղավոր է ճանաչվել ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն աշխատավարձի հնգապատիկի` 375.000 (երեք հարյուր յոթանասունհինգ հազար) ՀՀ դրամի չափով: Մարզպետ Ռուստամի Մանուկյանին թույլատրել նշանակված տուգանքը վճարել մաս առ մաս 1 (մեկ) տարվա ընթացքում։
Հիմք ընդունելով վերոգրյալը՝ Դատարանը փաստում է, որ Մարզպետ Ռուստամի Մանուկյանի նկատմամբ վերջնական պատիժ պետք է սահմանվի ՀՀ քրեական օրենսգրքի 74-րդ հոդվածի 11-րդ մասի կարգով, այն է՝ սույն գործով նրա նկատմամբ նշանակված պատժին պետք է լրիվ գումարել Կոտայքի մարզի առաջին ատյանի ընդհանուր իրավասության դատարանի 2024 թվականի հոկտեմբերի 11-ի դատավճռով նշանակված տուգանքը՝ 375.000 (երեք հարյուր յոթանասունհինգ հազար) ՀՀ դրամը և վերջնական պատիժ սահմանել տուգանք՝ 1․125․000 (մեկ միլիոն հարյուր քսանհինգ հազար) ՀՀ դրամ։
Դատարանն արձանագրում է, որ արտավարութային փաստաթուղթ ճանաչված և քրեական գործին կցված փաստաթղթերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Մ․Մանուկյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ, 464․1-րդ-464․5-րդ հոդվածներով` Դատարանը

Վ Ճ Ռ Ե Ց

Մեղադրյալ Մարզպետ Ռուստամի Մանուկյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով և 344-րդ հոդվածի 1-ին մասով նախատեսված արարքների կատարման մեջ և նրա նկատմամբ պատիժ նշանակել․
ՀՀ քրեական օրենսգրքի 344-րդ հոդվածի 1-ին մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 344-րդ հոդվածի 1-ին մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի 3-րդ մասի հիման վրա՝ պատիժների լրիվ գումարելու միջոցով, մեղադրյալ Մարզպետ Ռուստամի Մանուկյանի նկատմամբ պատիժ նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով:
ՀՀ քրեական օրենսգրքի 74-րդ հոդվածի 11-րդ մասի հիման վրա՝ սույն դատավճռով նշանակված պատժին՝ 750․000 (յոթ հարյուր հիսուն հազար) ՀՀ դրամին ամբողջությամբ գումարել նախորդ դատավճով նշանակված պատիժը 375․000 (երեք հարյուր յոթանասունհինգ հազար) ՀՀ դրամը և վերջնական պատիժ նշանակել տուգանք՝ 1․125․ 000( մեկ միլիոն հարյուր քսանհինգ հազար) ՀՀ դրամի չափով:
Մարզպետ Ռուստամի Մանուկյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Արտավարութային փաստաթղթերը թողնել կցված քրեական գործին դատավճիռն օրինական ուժի մեջ մտնելուց հետո։
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:


ԴԱՏԱՎՈՐ՝ Ս.ԳԶՈԳՅԱՆ