Գործ N ԵԴ1/3688/01/24




Ո Ր Ո Շ ՈՒ Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

31.10.2025թ. ք. Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)՝ նախագահությամբ դատավոր Վ.Լ.Գրիգորյանի, առանձին սենյակում քննության առնելով թիվ ԵԴ1/3688/01/24 քրեական գործով մեղադրյալի և տուժողի հաշտվելու հիմքով մեղադրյալ Սեյրան Սամվելի Հակոբյանի նկատմամբ ՀՀ քրեական օրենսգրքի 255-րդ հոդվածի 2-րդ մասի 3-րդ կետով քրեական հետապնդումը դադարեցնելու և քրեական գործի վարույթը կարճելու հարցը.

Պ Ա Ր Զ Ե Ց

2024 թվականի մարտի 19-ին ՀՀ ՔԿ ԵՔՔՎ Քանաքեռ-Զեյթուն վարչական շրջանի քննչական բաժնի քննիչ Լ.Ալոյանը կազմել է արձանագրությու՝ ՀՀ քրեական օրենսգրքի 255-րդ հոդվածի 2-րդ մասի 3-րդ կետի հատկանիշներով թիվ 09-0217-24 քրեական վարույթը նախաձեռնելու մասին:
2024 թվականի մարտի 21-ին քննիչ Լ.Ալոյանը որոշում է կայացրել Ադե Աբեդյանին որպես տուժող ճանաչելու մասին:
2024 թվականի մայիսի 29-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազության ավագ դատախազ Էդ.Գրիգորյանը որոշում է կայացրել թիվ 09-0217-24 քրեական վարույթով Սեյրան Սամվելի Հակոբյանի նկատմամբ ՀՀ քրեական օրենսգրքի 255-րդ հոդվածի 2-րդ մասի 3-րդ կետով հանրային քրեական հետապնդում հարուցելու մասին՝ այն հանցանքը կատարելու համար, որ նա խարդախությամբ՝ խաբեության եղանակով կատարել է ուրիշի գույքի հափշտակություն:
Այսպես.
Սեյրան Սամվելի Հակոբյանը ուրիշի գույքը հափշտակելու դիտավորությամբ «Լիստ.ամ» ինտերնետային կայքում տեղադրել է զոդման աշխատանքներ կատարելու վերաբերյալ հայտարարություն, որից հետո Ադե Վարդանի Աբեդյանը 2024 թվականի փետրվարի 08-ին զանգահարել է հայտարարությամբ նշված 093-10-28-18 հեռախոսահամարին, որի ընթացքում վերջինին հայտնել են, որ նրա հետ կապ կհաստատեն, այնուհետև 033-21-68-68 բջջային հեռախոսահամարից իրեն է զանգահարել Սեյրան Հակոբյան տվյալներով ներկայացած անձը, ով իր իրական մտադրության մասին լռելով և իրականում զոդման աշխատանքներ կատարելու կեղծ տվյալներ հաղորդելով և դիտավորությամբ իրականությունը խեղաթյուրելով հայտնել է, որ պատրաստ է կատարել զոդման աշխատանքներ՝ յուրաքանչյուր քառակուսու համար պահանջելով 5.000 ՀՀ դրամ գումար: Նշված աշխատանքների կատարման շուրջ Ադե Աբեդյանի և Սեյրան Հակոբյանի միջև ձեռք է բերվել պայմանավորվածություն, որից հետո վերջինս Ադե Աբեդյանից ստացել է շուրջ 591.000 ՀՀ դրամ գումար, սակայն Սեյրան Հակոբյանը կոնկրետ փաստերը ձևախեղելով և իր հոր մահվան վերաբերյալ իրականում գոյություն չունեցող կեղծ տվյալներ հաղորդելով, որոշակի վարքագծով և խոստումներով հավաստիացրել է, որ կատարելու է իր կողմից ստանձնված աշխատանքը, սակայն հետագայում այն չի կատարել և այդ կերպ խարդախությամբ՝ խաբեության և վստահությունը չարաշահելու եղանակով Ադե Աբեդյանից հափշտակել 591.000 ՀՀ դրամ գումար:
2024 թվականի մայիսի 30-ին ավագ քննիչ Լ.Ալոյանը որոշում է կայացրել թիվ 09-0217-24 քրեական վարույթով Սեյրան Սամվելի Հակոբյանի նկատմամբ որպես խափանման միջոց բացակայելու արգելք կիրառելու մասին:
2024 թվականի մայիսի 31-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Տ.Մխիթարյանը որոշում է կայացրել Սեյրան Սամվելի Հակոբյանի նկատմամբ ՀՀ քրեական օրենսգրքի 255-րդ հոդվածի 2-րդ մասի 3-րդ կետով հարուցված հանրային քրեական հետապնդման ժամկետը կասեցնելու մասին:
2024 թվականի հուլիսի 19-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազության ավագ դատախազ Էդ.Գրիգորյանը որոշում է կայացրել Սեյրան Սամվելի Հակոբյանի նկատմամբ ՀՀ քրեական օրենսգրքի 255-րդ հոդվածի 2-րդ մասի 3-րդ կետով հարուցված հանրային քրեական հետապնդման կասեցված ժամկետը երկու ամսով երկարաձգելու մասին:
2024 թվականի սեպտեմբերի 20-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազության ավագ դատախազ Էդ.Գրիգորյանը որոշում է կայացրել Սեյրան Սամվելի Հակոբյանի նկատմամբ ՀՀ քրեական օրենսգրքի 255-րդ հոդվածի 2-րդ մասի 3-րդ կետով հարուցված հանրային քրեական հետապնդման կասեցված ժամկետը մեկ ամսով երկարաձգելու մասին:
2024 թվականի հոկտեմբերի 25-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազության ավագ դատախազ Էդ.Գրիգորյանը որոշում է կայացրել Սեյրան Սամվելի Հակոբյանի նկատմամբ ՀՀ քրեական օրենսգրքի 255-րդ հոդվածի 2-րդ մասի 3-րդ կետով հարուցված հանրային քրեական հետապնդման կասեցված ժամկետը վերսկսելու մասին:
2024 թվականի նոյեմբերի 29-ին քննիչ Լ.Ալոյանը որոշում է կայացրել 21.03.2024 թվականին ներկայացված լազերային սկավառակը և 24.05.2024 թվականին ներկայացված թվով 1 փաստաթուղթը որպես արտավարութային փաստաթուղթ ապացույց ճանաչելու մասին:
2024 թվականի դեկտեմբերի 10-ին թիվ 09-0217-24 քրեական գործը, հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարանում, որը ստացել է թիվ ԵԴ1/3688/01/24 դատական համարը:
2025 թվականի հոկտեմբերի 31-ին կայացած դատական նիտի ընթացքում պաշտպանի կողմից դատարանին ներկայացվեց տուժողի դիմումը, որով վերջինս հայտնել է, որ հաշտվում է մեղադրյալ Սեյրան Սամվելի Հակոբյանի հետ, որևէ պարտք կամ պահանջ վերջինիս նկատմամբ չունի:
Տուժողը հայտնեց, որ հաշտվում է մեղադրյալի հետ և ցանկանում է, որպեսզի քրեական հետապնդումը դադարեցվի հաշտության հիմքով:
Մեղադրյալը հայտնեց, որ հաշտվում է տուժողի հետ և ցանկանում է, որպեսզի քրեական հետապնդումը դադարեցվի հաշտության հիմքով:
Պաշտպան Մ.Զիլֆուղարյանը և մեղադրող Է.Թովմասյանը հայտնեցին, որ տուժողի հետ հաշտվելու հիմքով քրեական հետապնդումը դադարեցնելու դեմ առարկություն չունեն:
Քննարկելով մեղադրյալի նկատմամբ քրեական հետապնդումը դադարեցնելու հարցը` Դատարանը գտնում է հետևյալը.
ՀՀ քրեական օրենսգրքի 17-րդ հոդվածի համաձայն`
«1. Հանցանքները դասակարգվում են չորս խմբի` ոչ մեծ ծանրության, միջին ծանրության, ծանր և առանձնապես ծանր:
(…)
3. Միջին ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 5 տարի ժամկետով ազատազրկումը:
(…)»:
ՀՀ 05.05.2021թ. քրեական օրենսգրքի 82-րդ հոդվածի համաձայն`
«1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ:
(…)
5. Նախկինում սույն հոդվածով նախատեսված հիմքով քրեական պատասխանատվությունից ազատված անձը չի կարող նույն հիմքով կրկին ազատվել քրեական պատասխանատվությունից:»:
ՀՀ քրեական օրենսգրքի 255-րդ հոդվածի համաձայն`
«1. Խարդախությունը՝ խաբեության կամ վստահությունը չարաշահելու եղանակով հափշտակությունը՝
(…)
2. Խարդախությունը, որը կատարվել է՝
(…)
3) խոշոր չափերով՝
պատժվում է տուգանքով` քսանապատիկից հիսնապատիկի չափով, կամ հանրային աշխատանքներով՝ հարյուր հիսունից երկու հարյուր յոթանասուն ժամ տևողությամբ, կամ ազատության սահմանափակմամբ՝ մեկից երեք տարի ժամկետով, կամ ազատազրկմամբ` երկուսից հինգ տարի ժամկետով:
(…)»:
ՀՀ քրեական դատավարության օրենսգրքի 12-րդ հոդվածի համաձայն`
«1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(…)
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից.
(…)»:
ՀՀ քրեական դատավարության օրենսգրքի 13-րդ հոդվածի համաձայն`
«1. Քրեական վարույթը ենթակա է կարճման, եթե`
(…)
3) կայացվել է անձի նկատմամբ քրեական հետապնդում չհարուցելու կամ մեղադրյալի նկատմամբ քրեական հետապնդումը դադարեցնելու մասին որոշում, և սպառվել են վարույթը շարունակելու բոլոր հնարավորությունները.
(…)»:
Մեղադրյալ Ռուբեն Բադալյանի կողմից սույն գործով մեղսագրվող արարքի կատարումից բացի քրեորեն պատժելի այլ արարք կատարած լինելու և դատապարտվելու վերաբերյալ «Դատալեքս» դատական տեղեկատվական համակարգում որևէ գրառումներ առկա չեն:
ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից տրված տեղեկանքի և «Դատալեքս» դատական տեղեկատվական համակարգ ուսումնասիրությունից պարզ է դառնում, որ Սեյրան Սամվելի Հակոբյանի վերաբերյալ այլ քրեական գործերով 08.07.2024 թվականին և 17.06.2025 թվականին կայացվել են մեղադրական դատավճիռնել, սակայն սույն գործով մեղսագրվող ենթադրյալ արարքը կատարվել է ավելի վաղ, այդ ժամանակ դատվածություն չի ունեցել, հետևաբար սույն դեպքում նշված դատավճիռների առկայությունը խոչընդոտ չէ քրեական հետապնդումը դադարեցնելու համար:
Հաշվի առնելով այն հանգամանքը, որ տուժողը և մեղադրյալը հաշտվել են միմյանց հետ, մեղադրյալ Ս.Հակոբյանը գիտակցում է իր նկատմամբ քրեական հետապնդումը հաշտվելու հիմքով դադարեցնելու հետևանքներն և բնույթը, չի առարկում այդ հիմքով քրեական հետապնդումը դադարեցնելու դեմ, իսկ ՀՀ 05.05.2021թ. քրեական օրենսգրքի 82-րդ հոդվածը նախատեսում է քրեական հետապնդումը բացառող անվերապահ հիմք, ուստի՝ Դատարանը գտնում է, որ մեղադրյալ Սեյրան Սամվելի Հակոբյանի նկատմամբ ՀՀ քրեական օրենսգրքի 255-րդ հոդվածի 2-րդ մասի 3-րդ կետով քրեական հետապնդումը ենթակա է դադարեցման` մեղադրյալի և տուժողի հաշտվելու հիմքով:
Քննարկելով մեղադրյալի նկատմամբ ընտրված «Բացակայելու արգելք» խափանման միջոցի հարցը՝ Դատարանը գտնում է, որ սույն որոշումն ուժի մեջ մտնելուց հետո այն պետք է վերացնել:
Անդրադառնալով որպես արտավարութային փաստաթուղթ ճանաչված ապացույցների պահպանման հարցին՝ Դատարանը գտնում է, որ սույն որոշումն օրինական ուժի մեջ մտնելուց հետո դրանք պետք է թողնել կցված քրեական գործին:
Հաշվի առնելով ՀՀ քրեական օրենսգրքի 82-րդ հոդվածի պահանջները և ղեկավարվելով ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով՝ դատարանը.

Ո Ր Ո Շ Ե Ց

Սեյրան Սամվելի Հակոբյանի նկատմամբ ՀՀ քրեական օրենսգրքի 255-րդ հոդվածի 2-րդ մասի 3-րդ կետով քրեական հետապնդումը դադարեցնել՝ տուժողի հետ հաշտվելու հիմքով:
Թիվ ԵԴ1/3688/01/24 քրեական գործի վարույթը կարճել:
Որոշումն ուժի մեջ մտնելուց հետո Սեյրան Սամվելի Հակոբյանի նկատմամբ ընտրված խափանման միջոց «Ստորագրություն չհեռանալու մասին» վերացնել:
Ապացույց ճանաչված արտավարութային փաստաթղթերը թողնել կցված քրեական գործին:
Որոշումը վերաքննության կարգով կարող է բողոքարկվել ՀՀ քրեական վերաքննիչ դատարան` ստացման պահից մեկամսյա ժամկետում:

ԴԱՏԱՎՈՐ` Վ.Լ.ԳՐԻԳՈՐՅԱՆ