Ո Ր Ո Շ Ո Ւ Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՎԱՐՈՒՅԹԸ
ԿԱՐՃԵԼՈՒ ՄԻՋՆՈՐԴՈՒԹՅՈՒՆԸ ՔՆՆՈՒԹՅԱՆ
ԱՌՆԵԼՈՒ ՄԱՍԻՆ

«25» դեկտեմբերի 2024թ. ք.Երևան
Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ Դատարան), նախագահությամբ դատավոր՝ Տիգրան Ոսկանյանի, քարտուղարությամբ՝ Ս.Բադալյանի, մասնակցությամբ՝ հանրային մեղադրող Լ.Քոչարյանի, պաշտպան Ա.Մուխսիկարոյանի, մեղադրյալ Դ.Մաճկալյանի, դռնբաց դատական նիստում քննության առնելով մեղադրյալ Դավիթ Լևոնի Մաճկալյանի՝ (ծնված՝ 01.01.1994 թվականին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին անչափահաս երեխա, չի աշխատում, դատվածությունը մարված, հաշվառված և փաստացի բնակվող՝ ք.Երևան, Նոր Խարբերդ հողատարածքներ, 23 փողոց, 61/24 տուն հասցեում) նկատմամբ ՀՀ քրեական օրենսգրքի 195-րդ հոդվածի 2-րդ մասի 5-րդ կետով քրեական հետապնդումը դադարեցնելու և թիվ ԵԴ1/3647/01/24 քրեական գործի վարույթը կարճելու պաշտպանի և մեղադրյալի միջնորդությունը,

Պ Ա Ր Զ Ե Ց
2024 թվականի օգոստոսի 19-ին՝ ՀՀ քննչական կոմիտեի Երևան քաղաքի քննչական վարչության Երևան քաղաքի Էրեբունի և Նուբարաշեն վարչական շրջանների քննչական բաժնում նախաձեռնվել է թիվ 12153824 քրեական վարույթը:
2024 թվականի օգոստոսի 23-ին՝ ՀՀ քննչական կոմիտեի Երևան քաղաքի քննչական վարչության Երևան քաղաքի Էրեբունի և Նուբարաշեն վարչական շրջանների քննչական բաժնի ավագ քննիչ Դ.Դանիելյանի որոշմամբ՝ թիվ 12153824 քրեական վարույթով Վարդուհի Կարապետի Շահբազյանը ճանաչվել է որպես տուժող:
2024 թվականի օգոստոսի 23-ին՝ ՀՀ քննչական կոմիտեի Երևան քաղաքի քննչական վարչության Երևան քաղաքի Էրեբունի և Նուբարաշեն վարչական շրջանների քննչական բաժնի ավագ քննիչ Դ.Դանիելյանի որոշմամբ՝ թիվ 12153824 քրեական վարույթով Աբրահամ Մարզպետի Համբարձումյանը ճանաչվել է որպես տուժող:
2024 թվականի նոյեմբերի 21-ին՝ Երևան քաղաքի Էրեբունի և Նուբարաշեն վարչական շրջանների դատախազության դատախազ Լ.Քոչարյանի որոշմամբ՝ թիվ 12153824 քրեական վարույթով Դավիթ Լևոնի Մաճկալյանի նկատմամբ ՀՀ քրեական օրենսգրքի 195-րդ հոդվածի 2-րդ մասի 5-րդ կետով հարուցվել է հանրային քրեական հետապնդում:
2024 թվականի նոյեմբերի 22-ին՝ ՀՀ քննչական կոմիտեի Երևան քաղաքի քննչական վարչության Երևան քաղաքի Էրեբունի և Նուբարաշեն վարչական շրջանների քննչական բաժնի ավագ քննիչ Դ.Դանիելյանի որոշմամբ՝ թիվ 12153824 քրեական վարույթով մեղադրյալ Դավիթ Լևոնի Մաճկալյանի նկատմամբ կիրառվել է այլընտրանքային խափանման միջոց՝ բացակայելու արգելքը:
Թիվ 12153824 քրեական վարույթի նյութերն ըստ մեղադրանքի Դավիթ Լևոնի Մաճկալյանի՝ ՀՀ քրեական օրենսգրքի 195-րդ հոդվածի 2-րդ մասի 5-րդ կետով, 2024 թվականի դեկտեմբերի 06-ի գրությամբ Երևան քաղաքի Էրեբունի և Նուբարաշեն վարչական շրջանների դատախազությունից ուղարկվել է Երևան քաղաքի առաջին ատյանի ընդհանուր իրավասության քրեական դատարան, մուտքագրվել է 09.12.2024 թվականին և նույն օրն էլ համակարգչային ծրագրի միջոցով իրականացվող գործերի բաշխմամբ, գործը մակագրվել է դատավոր Տիգրան Ոսկանյանին:
Քրեական գործին շնորհվել է թիվ ԵԴ1/3647/01/24 համարը:
Քրեական գործը դատավորին հանձնվել է 2024 թվականի դեկտեմբերի 10-ին։
2024 թվականի դեկտեմբերի 11-ին որոշում է կայացվել Դավիթ Լևոնի Մաճկալյանի վերաբերյալ ՀՀ քրեական օրենսգրքի 195-րդ հոդվածի 2-րդ մասի 5-րդ կետով թիվ ԵԴ1/3647/01/24 քրեական գործը վարույթ ստանձնելու և նախնական դատալսումների նշանակելու մասին:
Դավիթ Լևոնի Մաճկալյանին ՀՀ քրեական օրենսգրքի 195-րդ հոդվածի 2-րդ մասի 5-րդ կետով մեղադրանք է ներկայացվել այն բանի համար, որ «նա 2024 թվականի օգոստոսի 19-ին՝ ժամը 01:00-ի սահմաններում, Երևան քաղաքի Այգեգործների փողոց 89/12 հասցեի մոտ Աբրահամ Համբարձումյանի հետ կենցաղային հարցերի շուրջ ծագած վիճաբանության ընթացքում իր ընկերներ՝ Ռաֆայել Սևադայի Դավեյանի և Յուրա Սերյոժայի Գրիգորյանի հետ խմբի կազմում հարվածներ են հասցրել Աբրահամ Համբարձումյանի մարմնի տարբեր հատվածներին՝ պատճառելով առողջությանը թեթև վնասի հատկանիշներ չպարունակող աջից ակնակապիճի ստորին կոպի անցումով այտային շրջանի, ազդրի միջին երրորդականի, ձախ քունքային շրջանի արյունազեղումների ձևով մարմնական վնասվածքներ:»:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ մինչդատական վարույթի ընթացքում ընտրված խափանման միջոցը` բացակայելու արգելքը թողնել անփոփոխ:
Նախնական դատալսումների ընթացքում ՀՀ քրեական դատավարության 311-րդ հոդվածի 1-ին մասով նախատեսված հարցերի քննարկման ժամանակ մեղադրյալ Դ.Մաճկալյանի պաշտպան Ա.Մուխսիկարոյանը միջնորդեց տուժողի հետ հաշտության հիմքով մեղադրյալի նկատմամբ իրականացվող քրեական հետապնդումը դադարեցնել և գործի վարույթը կարճել:
Մեղադրյալը հայտնեց, որ համաձայն է այդ հիմքով քրեական հետապնդումը դադարեցնելուն և քրեական գործի վարույթը կարճելուն:
2024 թվականի դեկտեմբերի 25-ին նշանակված դատական նիստի ընթացքում հեռախոսազանգի միջոցով կապ հաստատվեց տուժող Ա.Համբարձումյանի հետ, որի ընթացքում վերջինս նշեց, որ նախաքննության ընթացքում գրավոր հայտնել է իր դիրքորոշումը, որ մեղադրյալի նկատմամբ բողոք-պահանջ չունի, հաշտվել է նրա հետ, այս պահին իր դիրքորոշումը չի փոխվել, պնդում է նախաքննության ընթացքում հայտնածը:
Հանրային մեղադրող Լ.Քոչարյանը չառարկեց միջնորդության դեմ:
ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի համաձայն՝
«Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(...) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից»:
ՀՀ քրեական օրենսգրքի 82-րդ հոդվածի համաձայն՝
«1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ:
(...)»:
Նույն օրենսգրքի 195-րդ հոդվածի համաձայն՝
«1. Հարվածներ հասցնելը կամ բռնի այլ գործողություններ կատարելը, եթե չեն առաջացել սույն օրենսգրքի 171-րդ հոդվածով նախատեսված հետևանքները`
(…)
2. Սույն հոդվածի 1-ին մասով նախատեսված արարքը, որը կատարվել է`
(…)
5) մի խումբ անձանց կողմից,
(…)
պատժվում է հանրային աշխատանքներով` հարյուրից երկու հարյուր ժամ տևողությամբ, կամ ազատության սահմանափակմամբ` առավելագույնը երկու տարի ժամկետով, կամ կարճաժամկետ ազատազրկմամբ՝ առավելագույնը երկու ամիս ժամկետով:»:
Նույն օրենսգրքի 17-րդ հոդվածի 2-րդ մասի համաձայն՝
«2. Ոչ մեծ ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 2 տարի ժամկետով ազատազրկումը, կամ որոնց համար նախատեսված է ազատությունից զրկելու հետ չկապված պատիժ:»:
ՀՀ քրեական դատավարության օրենսգրքի 311-րդ հոդվածի 1-ին մասի 3-րդ կետի համաձայն՝
«1. Նախնական դատալսումների ընթացքում սույն հոդվածով սահմանված հաջորդականությամբ դատարանը քննարկման առարկա է դարձնում՝
(…) 3) քրեական հետապնդումը դադարեցնելու կամ վարույթը կարճելու հարցը.»:
Նույն օրենսգրքի 315-րդ հոդվածի 1-ին մասի համաձայն` սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:
Անդրադառնալով սույն քրեական վարույթի փաստական հանգամանքներին՝ Դատարանն արձանագրում է, որ մեղադրյալի և տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնություն, համաձայն ՀՀ ՆԳՆ ոստիկանության ինֆորմացիոն կենտրոնի օպերատիվ տեղեկատու քարտադարանից Դավիթ Լևոնի Մաճկալյանի վերաբերյալ ստացված ձև 8 տեղեկանքի (վերջինիս դատվածությունը օրենքով սահմանված կարգով մարված է համարվում)՝ վերջինս հանդիսանում է դատվածություն չունեցող, Դավիթ Լևոնի Մաճկալյանին մեղսագրվում է ոչ մեծ ծանրության հանցանքի կատարում, ուստի Դատարանը գտնում է, որ Դավիթ Լևոնի Մաճկալյանի նկատմամբ ՀՀ քրեական օրենսգրքի 195-րդ հոդվածի 2-րդ մասի 5-րդ կետով քրեական հետապնդումը պետք է դադարեցնել և թիվ ԵԴ1/3647/01/24 քրեական գործի վարույթը կարճել՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի հիմքով:
ՀՀ քրեական դատավարության օրենսգրքի 315-րդ հոդվածի 2-րդ մասի համաձայն` քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
ՀՀ քրեական դատավարության օրենսգրքի 117-րդ հոդվածի 1-ին մասի համաձայն` եթե խափանման միջոցի գործողության ընթացքում փոխվել կամ վերացել են դրա իրավաչափության պայմանները, վարույթն իրականացնող մարմինն իր իրավասության սահմաններում որոշում է կայացնում խափանման միջոցը փոխելու կամ վերացնելու մասին:
Տվյալ դեպքում Դատարանը գտնում է, որ Դավիթ Լևոնի Մաճկալյանի նկատմամբ ընտրված խափանման միջոցը` բացակայելու արգելքը, պետք է վերացնել:
Ելնելով վերոգրյալից և ղեկավարվելով ՀՀ քրեական օրենսգրքի 82-րդ և ՀՀ քրեական դատավարության օրենսգրքի 12-րդ, 33-րդ, 311-րդ, 315-րդ հոդվածներով, Դատարանը՝

Ո Ր Ո Շ Ե Ց
Դավիթ Լևոնի Մաճկալյանի նկատմամբ ՀՀ քրեական օրենսգրքի 195-րդ հոդվածի 2-րդ մասի 5-րդ կետով քրեական հետապնդումը դադարեցնել և թիվ ԵԴ1/3647/01/24 քրեական գործի վարույթը կարճել՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի, այն է՝ Հայաuտանի Հանրապետության քրեական oրենuգրքի 82-րդ հոդվածի 1-ին մասի ուժով քրեական պատաuխանատվությունից ազատման ենթակա լինելու հիմքով:
Դավիթ Լևոնի Մաճկալյանի նկատմամբ ընտրված խափանման միջոցը՝ բացակայելու արգելքը, վերացնել:
Որոշումը կարող է բողոքարկվել ՀՀ վերաքննիչ քրեական դատարան` ստանալու պահից մեկամսյա ժամկետում:


ԴԱՏԱՎՈՐ ՏԻԳՐԱՆ ՈՍԿԱՆՅԱՆ