ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Գործ թիվ ԵԴ1/3592/01/24
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆԸ
Նախագահությամբ՝ դատավոր Դավիթ Արղամանյանի,
քարտուղարությամբ՝ Արթուր Սարգսյանի,
Դավիթ Հակոբյանի,

մասնակցությամբ՝

հանրային մեղադրող՝ Ռազմիկ Արսենյանի,
պաշտպան՝ Պավել Գյուլումյանի,
մեղադրյալ՝ Գոռ Նիկողոսյանի,

2025թ. հունվարի 30 ք. Երևան,
դռնբաց դատական նիստում դատաքննության հատուկ՝ արագացված վարույթի կարգով քննելով քրեական վարույթն ըստ մեղադրանքի՝
Գոռ Վարդանի Նիկողոսյանի
(ծնված՝ 05.01.1984թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին՝ մեկ անչափահաս երեխա, չի աշխատում, նախկինում չդատված, բնակվող ք.Երևան, Նուբարաշեն 11-րդ փողոց, 11-րդ շենք, բնակարան 40 հասցեում)
ՀՀ քրեական օրենսգրքի 396-րդ հոդվածի 1-ին մասով և ՀՀ քրեական օրենսգրքի 335-րդ հոդվածի 1-ին մասով՝





ՊԱՐԶԵՑ
1. Գործի դատավարական նախապատմությունը.
1․ 2024 թվականի սեպտեմբերի 10-ին ՀՀ քննչական Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական առաջին բաժնում ՀՀ քրեական օրենսգրքի 393-րդ հոդվածի 1-ին մասի, ՀՀ քրեական օրենսգրքի 396-րդ հոդվածի 1-ին մասի և ՀՀ քրեական օրենսգրքի 335-րդ հոդվածի 1-ին մասի հատկանիշներով նախաձեռնվել է թիվ 15143324 քրեական վարույթը (այսուհետ նաև՝ քրեական վարույթ)։
2. Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազ Ռ.Արսենյանի 2024թ. սեպտեմբերի 10-ի որոշմամբ թիվ 15143324 քրեական վարույթով Գոռ Վարդանի Նիկողոսյանի նկատմամբ ՀՀ քրեական օրենսգրքի 396-րդ հոդվածի 1-ին մասով և ՀՀ քրեական օրենսգրքի 335-րդ հոդվածի 1-ին մասով հարուցվել է հանրային քրեական հետապնդում։
3. 2024թ. սեպտեմբերի 11-ի քննիչի որոշմամբ թիվ 15143324 քրեական վարույթով Գոռ Վարդանի Նիկողոսյանի անձնական խուզարկությամբ հայտնաբերված և փորձաքննությունից հետո ստացված 0.1 գրամ քաշով «Մեթամֆետամին» տեսակի թմրամիջոցի փաթեթը՝ կնիքված ՀՀ ՆԳՆ ոստիկանության ՓՔ վարչության ծրարների համար նախատեսված կնիքով, ճանաչվել է իրեղեն ապացույց։
4. Երևան քաղաքի առաջին ատյանի ընդհանուր իրավասության քրեական դատարանի 2024 թվականի սեպտեմբերի 11-ի որոշմամբ թիվ 15143324 քրեական վարույթով մեղադրյալ Գոռ Վարդանի Նիկողոսյանի նկատմամբ որպես խափանման միջոց կիրառվել է կալանքը՝ 2 ամիս ժամկետով՝ սկիզբը հաշվելով Գոռ Վարդանի Նիկողոսյանին փաստացի արգելանքի վերցնելու պահից՝ 2024 թվականի սեպտեմբերի 9-ից։
5. Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 7-ի որոշմամբ թիվ 15143324 քրեական վարույթով մեղադրյալ Գոռ Վարդանի Նիկողոսյանի նկատմամբ որպես խափանման միջոց կիրառված կալանք խափանման միջոցի ժամկետը երկարաձգելու միջնորդությունը բավարարվել է մասնակի՝ Գոռ Վարդանի Նիկողոսյանի նկատմամբ կիրառվել է այլընտրանքային խափանման միջոցների համակցություն՝ տնային կալանք՝ երկու ամիս ժամկետով և գրավ՝ 1.000.000 ՀՀ դրամի չափով։ Գոռ Վարդանի Նիկողոսյանը ՀՀ ԱՆ պրոբացիայի ծառայության կողմից էլեկտրոնային հաշվառման է վերցվել 2024 թվականի նոյեմբերի 11-ից։
6. 2024 թվականի նոյեմբերի 25-ի ՀՀ քննչական Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական առաջին բաժնում ՀՀ քրեական օրենսգրքի 458-րդ հոդվածի 1-ին մասի հատկանիշներով նախաձեռնվել է թիվ 15175624 քրեական վարույթը։
7. Նույն օրը քննիչի որոշմամբ թիվ 15143324 և թիվ 15175624 քրեական վարույթները միացվել են մեկ վարույթում՝ նախաքննությունը շարունակվել է թիվ 15143324 քրեական վարույթի ներքո։
8. ՀՀ քննչական Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական առաջին բաժնի ավագ քննիչ Նարեկ Հարությունյանի 2024թ. դեկտեմբերի 2-ի որոշմամբ թիվ 15143324 քրեական վարույթից անջատվել է թիվ 15176324 քրեական վարույթը՝ այլ ենթադրյալ հանցանք կատարելու փաստի առթիվ։
9. 2024թ. դեկտեմբերի 6-ին Երևան քաղաքի Կենտրոն և Նորք-Մարաշ վարչական շրջանների դատախազությունից՝ հաստատված մեղադրական եզրակացությամբ, Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 15143324 քրեական վարույթի նյութերը։
10. Նշված քրեական գործին շնորհվել է թիվ ԵԴ1/3592/01/24 համարը, որը մակագրվել և 2024թ. դեկտեմբերի 9-ին հանձնվել է դատավոր Դավիթ Արղամանյանին:
11. 2024թ. դեկտեմբերի 10-ին Երևան քաղաքի առաջին ատյանի ընդհանուր իրավասության քրեական դատարանի (այսուհետ նաև՝ Դատարան) դատավոր Դավիթ Արղամանյանի կողմից որոշում է կայացվել թիվ ԵԴ1/3592/01/24 քրեական գործով վարույթ ստանձնելու և նախնական դատալսումներ նշանակելու մասին։
12. Երևան քաղաքի առաջին ատյանի ընդհանուր իրավասության քրեական դատարանի 2024 թվականի դեկտեմբերի 20-ի որոշմամբ Գոռ Նիկողոսյանի նկատմամբ կիրառված տնային կալանքը վերացվել է և նա անհապաղ ազատ է արձակվել։ Նույն որոշմամբ Գոռ Նիկողոսյանի նկատմամբ կիրառված գրավը՝ 1.000.000 ՀՀ դրամի չափով, թողնվել է անփոփոխ և նրա նկատմամբ համակցված կիրառվել է բացակայելու արգելք այլընտրանքային խափանման միջոցը։
2. Մեղադրանքի փաստական նկարագրությունը.
Գոռ Վարդանի Նիկողոսյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 396-րդ հոդվածի 1-ին մասով և ՀՀ քրեական օրենսգրքի 335-րդ հոդվածի 1-ին մասով՝ այն արարքների կատարման համար, որ նա «(...) առանց իրացման նպատակի ձեռք է բերել և իր մոտ ապօրինի պահել է զգալի չափերի 0.13 գրամ քաշով «Մեթամֆետամին» տեսակի թմրանյութ, ինչպես նաև ապօրինի պահել է ռազմամթերք և հրազեն:
Այսպես.
Գոռ Վարդանի Նիկողոսյանը, խախտելով «Թմրամիջոցների և հոգեմետ նյութերի մասին» ՀՀ օրենքի 11-րդ հոդվածի 2-րդ կետի պահանջը, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու, այսինքն թմրամիջոց պատրաստելու, վերամշակելու, ձեռք բերելու, պահելու, փոխադրելու կամ առաքելու թույլտվություն քննությամբ դեռևս չպարզված ժամանակահատվածում և հանգամանքներում ինքնությունը դեռևս չպարզված անձից իր անձնական օգտագործման համար ձեռք է բերել և իր մոտ ապօրինի պահել է զգալի չափերի 0.13 գրամ քաշով «Մեթամֆետամին» տեսակի թմրանյութ, որն էլ հայտնաբերվել է 2024թ. սեպտեմբերի 9-ին ՀՀ ՆԳՆ ոստիկանության Կենտրոնական բաժնում վերջինիս անձնական խուզարկությամբ։
Այսինքն Գոռ Վարդանի Նիկողոսյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 396-րդ հոդվածի 1-ին մասով:
Բացի այդ, Գոռ Վարդանի Նիկողոսյանը, չունենալով «Զենքի շրջանառության կարգավորման մասին» ՀՀ օրենքով սահմանված հրազենի, ռազմամթերքի շրջանառություն իրականացնելու այն ձեռք բերելու, պահելու կամ կրելու իրավունք, ինչպես նաև հրազենի, ռազմամթերքի շրջանառություն իրականացնելու ՀՀ ոստիկանությունում օրենքով սահմանված կարգով ձևակերպված համապատասխան թույլտվություն, քննությամբ դեռևս չպարզված ժամանակահատվածում ու հանգամանքներում ձեռք է բերել և իր մոտ ապօրինի կերպով պահել է հրազեն հանդիսացող գործարանային արտադրության «Մակարովի» կոնստրուկցիա ունեցող (ծառայողական, գազային, տրավմատիկ, դեակտիվացված կամ այլ) ատրճանակի(ների) դետալների օգտագործմամբ և ինքնաշեն եղանակով ակոսավոր փող տեղադրելու միջոցով պատրաստված ակոսափող ատրճանակ՝ հարմարեցված 9մմ (9x18) տրամաչափի փամփուշտներով կրակելու համար, ինչպես նաև ռազմամթերք հանդիսացող գործարանային արտադրության թվով 6 հատ 9մմ (9x18) տրամաչափի փամփուշտներ, որոնք էլ հայտնաբերվել են 2024թ. սեպտեմբերի 09-ին ՀՀ ՆԳՆ ոստիկանության Կենտրոնական բաժնում վերջինիս անձնական խուզարկությամբ:
Այսինքն՝ Գոռ Վարդանի Նիկողոսյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 335-րդ հոդվածի 1-ին մասով:
Այսպիսով՝ Գոռ Վարդանի Նիկողոսյանին մեղսագրվում է հանցավոր արարքների կատարում, որոնք նախատեսված են ՀՀ քրեական օրենսգրքի 396-րդ հոդվածի 1-ին մասով և ՀՀ քրեական օրենսգրքի 335-րդ հոդվածի 1-ին մասով:
(...)»
3. Արագացված վարույթ կիրառելու միջնորդությունը և դրա քննարկումը.
Նախնական դատալսումների՝ 2024թ. դեկտեմբերի 20-ի դատական նիստի ընթացքում, ՀՀ քրեական դատավարության օրենսգրքի 311-րդ հոդվածի 1-ին մասով նախատեսված հարցերի քննարկման շրջանակում մեղադրյալ Գոռ Նիկողոսյանը և վերջինիս պաշտպան Պավել Գյուլումյանը միջնորդել են կիրառել արագացված վարույթ։
Միջնորդություն ներկայացնելուց հետո հանրային մեղադրողը ներկայացրեց մեղադրանքի փաստական հիմքը, ինչպես նաև մեղադրյալին վերագրվող արարքի իրավական գնահատականը:
Մեղադրյալ Գոռ Նիկողոսյանը, պատասխանելով Դատարանի հարցերին՝ հայտնեց, որ մեղադրանքի էությունը պարզ է, մեղադրանքի հետ համաձայն է, բավարար ժամանակ է ունեցել պաշտպանի հետ խորհրդակցելու և առաջադրված մեղադրանքը քննարկելու համար, պաշտպանը պատասխանել է հետաքրքրող հարցերին, գիտակցում է, որ պարտավոր չէ համաձայնվել առաջադրված մեղադրանքին և ունի ընդհանուր կարգով գործի քննության իրավունք, կամավոր է ներկայացրել միջնորդությունը, չի օգտագործում որևէ դեղորայքային միջոց, այլ նյութեր, առողջության հետ կապված խնդիրներ չունի, տեղյակ է, որ արագացված վարույթ կիրառելու դեպքում ապացույցներ չեն հետազոտվելու և դատավճիռ է կայացնելու մեղադրանքի հետ մեղադրյալի համաձայնության հիման վրա, տեղյակ է, որ արագացված վարույթ կիրառելու դեպքում դատավճիռը չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:
Պաշտպան Պավել Գյուլումյանը, պատասխանելով Դատարանի հարցերին՝ հայտնեց, որ պաշտպանյալի հետ մանրամասն և ամբողջությամբ քննարկել է մեղադրանքի էությունը, որի հետ նա համաձայն է, մեղադրյալը հասկանում և գիտակցում է մեղադրանքի կետերը և հանգամանքները, մեղադրյալը գիտակցված ընդունում է մեղադրանքը և կամավոր է ներկայացրել միջնորդությունը, պարզաբանել է արագացված վարույթ կիրառելու միջնորդության էությունը, հետևանքները, բողոքարկման սահմանափակ լինելու հանգամանքը և այլ հարցեր։
Հանրային մեղադրողը միջնորդության դեմ չառարկեց։
Դատարանը, նկատի ունենալով, որ առկա է ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված հիմքը, բացակայում են նույն օրենսգրքի 464.1-րդ հոդվածի 2-րդ մասով նախատեսված՝ արագացված վարույթի կիրառումը բացառող հանգամանքները՝ բավարարել է արագացված վարույթ կիրառելու վերաբերյալ միջնորդությունը և գործով ձեռք բերված ապացույցների ընդհանուր կարգով սահմանված հետազոտություն չկատարելով, որոշում է կայացրել լրացուցիչ դատալսումներ անցկացնելու մասին։
4. Լրացուցիչ դատալսումներում հետազոտված անհրաժեշտ ապացույցները.
- 2025 թվականի հունվարի 30-ին արտատպված Գոռ Նիկողոսյանի դատվածության և հետախուզման առկայության վերաբերյալ ձև 8 տեղեկանքը, համաձայն որի՝ նա հանդիսանում է առաջին անգամ հանցանք կատարած անձ,
- 2025 թվականի հունվարի 30-ին արտատպված ՔԿԱԳ տվյալների շտեմարանը՝ Գոռ Նիկողոսյանի անձնական տվյալների և ընտանեկան դրության վերաբերյալ,
- 2025 թվականի հունվարի 30-ին արտատպված ՊԵԿ տվյալների շտեմարանի քաղվածքը, համաձայն որի Գոռ Նիկողոսյանի եկամուտների վերաբերյալ տվյալներ առկա չեն,
- Գրիգոր Գոռի Գասպարյանի (ծնված՝ 10.10.2017թ.) և Գուրգեն Գոռի Գասպարյանի (ծնված՝ 18.11.2019թ.) ծննդյան վկայականները,
- համատիրության կառավարչի կողմից 01.11.2024թ. տրված տեղեկանքը առ այն, որ Գոռ Նիկողոսյանը բնակվում է Երևան քաղաքի Նուբարաշեն վարչական շրջանի 11-րդ փողոցի 11-րդ շենքի 40-րդ բնակարանում, նրա հետ միասին տվյալ հասցեում բնակվում են նաև կինը՝ Քրիստինե Հակոբի Գասպարյանը, որդիները՝ Գրիգոր Գոռի Գասպարյանը (ծնված՝ 10.10.2017թ.) և Գուրգեն Գոռի Գասպարյանը, մայրը՝ Անահիտ Պետրոսի Պետրոսյանը, հայրը՝ Գրիգոր Գորիկի Աթանեսյանը,
- թիվ 622993 տեղեկանքը, համաձայն որի՝ Քրիստինե Գասպարյանը հանդիսանում է երկրորդ կարգի հաշմանդամ,
- հոր՝ Գրիգոր Գորիկի Աթանեսյանի հաշմանդամություն ունենալու վերաբերյալ փաստաթղթերը, համաձայն որոնց՝ Գրիգոր Գորիկի Աթանեսյանի մոտ ախտորոշվել է I25 սրտի քրոնիկ իշեմիկ հիվանդությունը և նա հանդիսանում է հաշմանդամություն ունեցող անձ,
- հոր՝ Գրիգոր Գորիկի Աթանեսյանի և մոր՝ Անահիտ Պետրոսի Պետրոսյանի անձնագրերի պատճենները և նրանց ամուսնության վկայականը։
5. Դատարանի իրավական վերլուծությունները և եզրահանգումը.
ՀՀ քրեական դատավարության օրենսգրքի 464.4-րդ հոդվածի համաձայն՝
«1. Արագացված վարույթի արդյունքով դատարանը կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները:
2. Դատարանը արագացված վարույթի արդյունքով մեղադրական դատավճիռ կայացնելիս նշանակում է պատիժ՝ հաշվի առնելով Հայաuտանի Հանրապետության քրեական օրենսգրքի ընդհանուր մասի վերաբերելի դրույթները:
(...)»
ՀՀ քրեական օրենսգրքի 396-րդ հոդվածի 1-ին համաձայն՝
«1. Առանց իրացնելու նպատակի զգալի չափերով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը՝
պատժվում է տուգանքով՝ առավելագույնը տասնապատիկի չափով, կամ հանրային աշխատանքներով՝ առավելագույնը հարյուր ժամ տևողությամբ, կամ ազատության սահմանափակմամբ՝ առավելագույնը մեկ տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով, կամ ազատազրկմամբ՝ առավելագույնը մեկ տարի ժամկետով:»
ՀՀ քրեական օրենսգրքի 335-րդ հոդվածի 1-ին մասի համաձայն՝
«1. Ապօրինի կերպով հրազեն (բացառությամբ քաղաքացիական ողորկափող հրազենի, դրա փամփուշտների կամ դրա բաղկացուցիչ մասերի), դրա հիմնական բաղկացուցիչ մաս, ռազմամթերք, ակոսափող հրազենի փամփուշտ, պայթուցիկ նյութ կամ պայթեցման սարք ձեռք բերելը, իրացնելը, պահելը, փոխադրելը, առաքելը կամ կրելը՝
պատժվում է ազատության սահմանափակմամբ՝ առավելագույնը երեք տարի ժամկետով, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը հինգ տարի ժամկետով:»
Դատաքննության հատուկ կարգ՝ արագացված վարույթ կիրառելու, մեղադրյալ Գոռ Նիկողոսյանի կողմից մեղադրանքն ընդունելու և գործով ձեռք բերված ապացույցների հետազոտում չիրականացնելու պայմաններում՝ Դատարանը գտնում է, որ ապացուցված են մեղադրյալ Գոռ Նիկողոսյանին վերագրվող փաստական հանգամանքները, վերջինիս կատարած արարքները համապատասխանում են ՀՀ քրեական օրենսգրքի 396-րդ հոդվածի 1-ին մասով և ՀՀ քրեական օրենսգրքի 335-րդ հոդվածի 1-ին մասով նախատեսված հանցագործությունների հատկանիշներին, ապացուցված է վերջինիս կողմից նշված արարքները մեղավորությամբ կատարելը։
ՀՀ քրեական օրենսգրքի 70-րդ հոդվածի համաձայն՝
«1. Քրեական պատասխանատվությունը կամ պատիժը մեղմացնող հանգամանքներ են՝
(…)
4) պատիժ նշանակելու պահին հանցանք կատարած անձի խնամքի տակ անչափահասի կամ հաշմանդամություն ունեցող անձի առկայությունը, բացառությամբ այն դեպքերի, երբ հանցանքը կատարվել է խնամքի տակ գտնվող անձի նկատմամբ,
(…)
2. Պատիժ նշանակելիս դատարանը կարող է հաշվի առնել նաև սույն հոդվածի 1-ին մասով չնախատեսված մեղմացնող այլ հանգամանքներ:
(…)»
Անդրադառնալով դատապարտված մեղադրյալի պատասխանատվությունը և պատիժը մեղմացնող հանգամանքներին՝ Դատարանն արձանագրում է, որ որպես քրեական պատասխանատվությունը կամ պատիժը մեղմացնող հանգամանք Դատարանը հաշվի է առնում մեղադրյալ խնամքին երկու անչափահաս երեխաների առկայության փաստը, ինչն ապացուցված է Գրիգոր Գոռի Գասպարյանի (ծնված՝ 10.10.2017թ.) և Գուրգեն Գոռի Գասպարյանի (ծնված՝ 18.11.2019թ.) ծննդյան վկայականներով, ինչպես նաև Գոռ Նիկողոսյանի խնամքին գտնվող, 2-րդ խմբի հաշմանդամություն ունեցող Քրիստինե Գասպարյանի (հաշմանդամության վերաբերյալ թիվ 622993 վկայական) և հոր՝ Գրիգոր Գորիկի Աթանեսյանի առկայության փաստը։ Հաշմանդամություն ունեցող անձանց՝ Գոռ Նիկողոսյանի խնամքին գտնվելու փաստն ապացուցվում է նաև համատիրության կառավարչի կողմից 01.11.2024թ. տրված տեղեկանքով, որով հաստատվում է, որ հաշմանդամություն ունեցող Քրիստինե Գասպարյանը և Գրիգոր Աթանեսյանը բնակվում են Գոռ Նիկողոսյանի հետ՝ նույն հասցեում։ Այսպիսով՝ Դատարանն արձանագրում է, որ ապացուցված է մեղադրյալի խնամքին անչափահաս երեխաների, ինչպես նաև հաշմանդամություն ունեցող անձանց առկայությունը, այն է՝ ՀՀ քրեական օրենսգրքի 70-րդ հոդվածի 1-ին մասի 4-րդ կետը։
Անդրադառնալով դատապարտված մեղադրյալի պատասխանատվությունը և պատիժը ծանրացնող հանգամանքների հարցին՝ Դատարանն արձանագրում է, որ ՀՀ քրեական օրենսգրքի 71-րդ հոդվածով սահմանված հանգամանքներ առկա չեն։
Դատարանը, որպես մեղադրյալ Գոռ Նիկողոսյանի անձը բնութագրող հանգամանքներ, հաշվի է առնում, որ վերջինս դատվածություն չունի՝ բնութագրվում է դրական, մեղքն ընդունել և զղջացել է։
Անդրադառնալով մեղադրյալ Գոռ Նիկողոսյանի կողմից պատժի ենթակա լինելու հարցին՝ Դատարանն արձանագրում է, որ սույն քրեական գործով մեղադրյալ Գոռ Նիկողոսյանին քրեական պատասխանատվությունից ազատելու հիմքեր առկա չեն, հետևաբար նա ենթակա է պատժի՝ իր կատարած հանցանքների համար։
Մեղադրյալի նկատմամբ պատիժ նշանակելու հարցին անդրադառնալով՝ Դատարանն արձանագրում է հետևյալը.
ՀՀ քրեական օրենսգրքի 7-րդ հոդվածի 1-ին մասի համաձայն՝
«1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»
Նույն օրենսգրքի 55-րդ հոդվածի համաձայն՝
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»
Նույն օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
(…)»
Նույն օրենսգրքի 67-րդ հոդվածի 1-ին մասի համաձայն՝
«1. Ազատազրկումը դատապարտյալին քրեակատարողական հիմնարկում անազատության մեջ պահելու ձևով հասարակությունից որոշակի ժամկետով մեկուսացնելն է, որը կարող է նշանակվել սույն օրենսգրքով նախատեսված դեպքերում:»
Դատարանը, հաշվի առնելով մեղադրյալ Գոռ Նիկողոսյանի կատարած հանցանքի հանգամանքները, շարժառիթները և նպատակները, պատասխանատվությունն ու պատիժը մեղմացնող հանգամանքների առկայությունը, ծանրացնող հանգամանքների բացակայությունը, անձը բնութագրող տվյալները, Գոռ Նիկողոսյանի վերաբերյալ ՀՀ ՊԵԿ տվյալների շտեմարանի քաղվածքը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները՝ գտնում է, որ վերջինիս նկատմամբ ՀՀ քրեական օրենսգրքի 396-րդ հոդվածի 1-ին մասով նախատեսված հանցագործության կատարման համար պատիժ պետք է նշանակել՝ տուգանք՝ նվազագույն աշխատավարձի հնգապատիկի՝ 375.000 ՀՀ դրամի չափով։
Դատարանը, հաշվի առնելով Գոռ Նիկողոսյանի արարքը, հաշվի առնելով քրեական օրենսդրությամբ պահպանվող հասարակական հարաբերությունների` հանցանքի կատարման պահին ունեցած սոցիալական նշանակությունը, մեղքի ձևը և տեսակը, հանցագործության նպատակը և շարժառիթը, դրա կատարման եղանակը, հանցավոր մտադրության իրականացման աստիճանը, հայտնաբերված հրազենի տեսակը՝ ակոսափող ատրճանակը, որը պատրաստված է ինքնաշեն եղանակով, ակոսավոր փող տեղադրելու միջոցով և հարմարեցված է 9մմ (9x18) տրամաչափի փամփուշտներով կրակելու համար, դրանում փամփուշտների առկայությունը, հասարակական վայրում այն լիցքավորված կրելու հանգամանքը՝ արձանագրում է, որ Գոռ Նիկողոսյանի կատարած՝ ՀՀ քրեական օրենսգրքի 335-րդ հոդվածի 1-ին մասով նախատեսված հանցագործությունն օժտված է հանրության համար վտանգավորության բարձր աստիճանով և բնույթով, ուստի ՀՀ քրեական օրենսգրքի 335-րդ հոդվածի 1-ին մասով նախատեսված հանցագործության կատարման համար անհրաժեշտ է նշանակել պատիժ՝ ազատազրկում։ Դատարանը՝ հաշվի առնելով կատարված արարքի հանգամանքները, շարժառիթները և նպատակները, պատասխանատվությունն ու պատիժը մեղմացնող հանգամանքների առկայությունը, ծանրացնող հանգամանքների բացակայությունը, անձը բնութագրող տվյալները՝ հանցանքն առաջին անգամ կատարելը, կատարածի համար զղջալը և մեղքն ընդունելը, գտնում է, որ 6 ամիս ժամկետով ազատազրկման պայմաններում հնարավոր է հասնել պատժի նպատակներին, ուստի ՀՀ քրեական օրենսգրքի 335-րդ հոդվածի 1-ին մասով նախատեսված հանցագործության կատարման համար Գոռ Նիկողոսյանի նկատմամբ պատիժ է նշանակում ազատազրկում՝ 6 ամիս ժամկետով։
ՀՀ քրեական օրենսգրքի 74-րդ հոդվածի համաձայն՝
«1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:
(...)
4. Եթե հանցագործությունների համակցությունն ընդգրկում է դիտավորությամբ կատարված ծանր հանցանք, ապա ազատազրկման ձևով վերջնական պատիժը նշանակվում է պատիժները լրիվ կամ մասնակիորեն գումարելու միջոցով: Գումարելիս ազատազրկման ձևով վերջնական պատիժը չի կարող գերազանցել 15 տարին:
(...)»
Դատարանը, ղեկավարվելով ՀՀ քրեական օրենսգրքի 74-րդ հոդվածով՝ գտնում է, որ սահմանված կարգով նշանակված պատիժները լրիվ գումարելու միջոցով մեղադրյալ Գոռ Նիկողոսյանի նկատմամբ ՀՀ քրեական օրենսգրքի 335-րդ հոդվածի 1-ին մասով նշանակված 6 ամիս ժամկետով ազատազրկում պատժին անհրաժեշտ է լրիվ գումարել ՀՀ քրեական օրենսգրքի 396-րդ հոդվածի 1-ին մասով նշանակված 375.000 ՀՀ դրամի չափով տուգանքը և մեղադրյալ Գոռ Նիկողոսյանի նկատմամբ պատիժ է նշանակում ազատազրկում՝ 6 ամիս ժամկետով և տուգանք՝ 375.000 ՀՀ դրամի չափով։
ՀՀ քրեական օրենսգրքի 79-րդ հոդվածի 3-րդ մասի համաձայն՝
«3. Մինչև դատավճռի օրինական ուժի մեջ մտնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը հաշվակցվում է կարճաժամկետ ազատազրկման, կարգապահական գումարտակում պահելու, ազատազրկման ձևով նշանակված պատժին` 1 օրը հաշվելով 1 օրվա դիմաց, ազատության սահմանափակման ձևով նշանակված պատժին՝ 1 օրը հաշվելով 2 օրվա դիմաց, իսկ հանրային աշխատանքների դեպքում՝ 1 օրը 8 ժամի դիմաց:»
Ղեկավարվելով ՀՀ քրեական օրենսգրքի 79-րդ հոդվածով՝ Դատարանը գտնում է, որ Գոռ Նիկողոսյանի նկատմամբ ՀՀ քրեական օրենսգրքի 335-րդ հոդվածի 1-ին մասով և նույն օրենսգրքի 396-րդ հոդվածի 1-ին մասով նշանակված 6 ամիս ժամկետով ազատազրկում և 375.000 ՀՀ դրամի չափով տուգանք պատժին պետք է հաշվակցել թիվ 15143324 քրեական վարույթով 2024 թվականի սեպտեմբերի 9-ից մինչև 2024 թվականի նոյեմբերի 9-ը և 2024 թվականի նոյեմբերի 11-ից մինչև 2024 թվականի դեկտեմբերի 20-ը փաստացի անազատության մեջ գտնվելու ժամկետը՝ 3 ամիս 9 օրը և որպես վերջնական պատիժ է նշանակում ազատազրկում՝ 2 ամիս 21 օր ժամկետով և տուգանք՝ 375.000 ՀՀ դրամի չափով։
Անդրադառնալով մեղադրյալ Գոռ Նիկողոսյանի նկատմամբ նշանակված պատիժը կրելու հարցին՝ Դատարանն արձանագրում է, որ վերջինս պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն, և սույն գործի փաստական հանգամանքների պայմաններում միայն այդ դեպքում է հնարավոր հասնել ՀՀ քրեական օրենսգրքի 55-րդ հոդվածով ամրագրված պատժի նպատակներին՝ սոցիալական արդարության վերականգնմանը, պատժի ենթարկված անձի վերասոցիալականացմանը և հանցագործությունների կանխմանը:
Դատարանը նման եզրահանգման է գալիս հաշվի առնելով ենթադրյալ հանցավոր արարքների կատարման եղանակը, կատարած հանցանքների հանգամանքները, շարժառիթները և նպատակները, մասնավորապես՝ Գոռ Նիկողոսյանի կողմից հանրային վայրում լիցքավորված ատրճանակ կրելու հանգամանքը, ինչն ինքնին ավելի է բարձրացնում նշված հանցակազմի հանրային վտանգավորության աստիճանը։
Դատարանի գնահատմամբ՝ նշանակված պատիժը պայմանականորեն չկիրառելը կհակասի ՀՀ քրեական օրենսգրքի 7-րդ և 69-րդ հոդվածներով սահմանված՝ արդարության և պատասխանատվության անհատականացման, պատիժ նշանակելու ընդհանուր սկզբունքներին և կլինի անհամաչափ մեղմ ներգործություն ինչպես մեղադրյալի, այնպես էլ նրա կատարած հանցագործությունների նկատմամբ:
Նկատի ունենալով այն հանգամանքը, որ սույն քրեական վարույթով գույքային հայց, գույք բռնագրավելու անհրաժեշտություն, արգելադրված գույք առկա չեն, ուստի Դատարանն այդ հարցերին չի անդրադառնում:
Անդրադառնալով իրեղեն ապացույց ճանաչված՝ Գոռ Վարդանի Նիկողոսյանի անձնական խուզարկությամբ հայտնաբերված և փորձաքննությունից հետո ստացված 0.1 գրամ քաշով «Մեթամֆետամին» տեսակի թմրամիջոցի փաթեթի՝ կնիքված ՀՀ ՆԳՆ ոստիկանության ՓՔ վարչության ծրարների համար նախատեսված կնիքով, և Գոռ Վարդանի Նիկողոսյանի անձնական խուզարկությամբ հայտնաբերված ատրճանակի, փամփշտատուփի և փամփուշտների փաթեթի՝ կնիքված ՀՀ քննչական կոմիտեի փորձագիտական կենտրոնի ծրարների համար նախատեսված կնիքով, տնօրինման հարցին՝ Դատարանն արձանագրում է, որ ՀՀ քննչական Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական առաջին բաժնի ավագ քննիչ Նարեկ Հարությունյանի 2024թ. դեկտեմբերի 2-ի որոշմամբ թիվ 15143324 քրեական վարույթից անջատվել է թիվ 15176324 քրեական վարույթը՝ Գոռ Նիկողոսյանին քննությամբ չպարզված ժամանակահատվածում և հանգամանքներում ինքնությունը չպարզված անձի կողմից «Մեթամֆետամին» տեսակի թմրամիջոց իրացնելու և ատրճանակի իրանի և փակաղակի գործարանային համարը ջնջելու մասով, թիվ 15176324 քրեական վարույթի նախաքննությունը շարունակվում է, ուստի վերոնշյալ իրեղեն ապացույցները կարող են առանցքային նշանակություն ունենալ թիվ 15176324 քրեական վարույթով էական հանգամանքների ապացուցման գործընթացի համար։ Ելնելով վերոգրյալից՝ Դատարանը գտնում է, որ նշված իրեղեն ապացույցները դատավճռի օրինական ուժի մեջ մտնելուց հետ անհրաժեշտ է կցել թիվ 15176324 քրեական վարույթի նյութերին։
Անդրադառնալով Գոռ Նիկողոսյանի նկատմամբ կիրառված «բացակայելու արգելք» այլընտրանքային խափանման միջոցի հարցին՝ Դատարանն արձանագրում է, որ Գոռ Նիկողոսյանի նկատմամբ նշանակվում է ՀՀ քրեական օրենսգրքով նախատեսված պատժատեսակներից ամենախիստը՝ ազատազրկումը, ինչն ինքնին թույլ է տալիս Դատարանին գալ այն եզրահանգման, որ Գոռ Նիկողոսյանը կարող է դիմել փախուստի, ուստի Դատարանը գտնում է, որ Գոռ Նիկողոսյանի նկատմամբ ընտրված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո՝ վերացնել։
Անդրադառնալով որպես գրավի գումար Երևան քաղաքի առաջին ատյանի ընդհանուր իրավասության քրեական դատարանի արտաբյուջետային՝ 900013298014 դեպոզիտ հաշվին վճարված 1.000.000 ՀՀ դրամ գումարի հարցին՝ Դատարանը գտնում է, որ դատավճռի օրինական ուժի մեջ մտնելուց հետո նշված գումարը անհրաժեշտ է վերադարձնել Պավել Սլավիկի Գյուլումյանին, քանի որ բացառապես բացակայելու արգելք այլընտրանքային խափանման միջոցն ի զորու է ապահովելու մեղադրյալ պատշաճ վարքագիծը։
Միևնույն ժամանակ, Դատարանը, նկատի ունենալով արագացված վարույթ կիրառելու հանգամանքը, ղեկավարվելով ՀՀ քրեական դատավարության օրենսգրքի 464.4 հոդվածի 3-րդ մասով՝ փաստում է, որ ՀՀ քրեական դատավարության օրենսգրքի 167-րդ հոդվածի 1-ին մասով նախատեսված վարութային ծախսերը մեղադրյալից ենթակա չեն բռնագանձման։
Ելնելով վերոգրյալից և ղեկավարվելով ՀՀ քրեական օրենսգրքի 55-րդ, 59-րդ, 67-րդ, 69-րդ, 70-րդ, 74-րդ, 79-րդ, 84-րդ և ՀՀ քրեական դատավարության օրենսգրքի 31-րդ, 33-րդ, 347-349-րդ, 352-353-րդ, 364-րդ և 464.4-րդ հոդվածներով՝ Դատարանը

ՎՃՌԵՑ
1. Գոռ Վարդանի Նիկողոսյանին մեղավոր ճանաչել ՀՀ քրեական օրենսգրքի 396-րդ հոդվածի 1-ին մասով, ՀՀ քրեական օրենսգրքի 335-րդ հոդվածի 1-ին մասով և՝
Գոռ Վարդանի Նիկողոսյանի նկատմամբ ՀՀ քրեական օրենսգրքի 396-րդ հոդվածի 1-ին մասով նախատեսված հանցագործության կատարման համար պատիժ նշանակել՝ տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով,
Գոռ Վարդանի Նիկողոսյանի նկատմամբ ՀՀ քրեական օրենսգրքի 335-րդ հոդվածի 1-ին մասով նախատեսված հանցագործության կատարման համար պատիժ նշանակել՝ ազատազրկում՝ 6 (վեց) ամիս ժամկետով։
2. ՀՀ քրեական օրենսգրքի 74-րդ հոդվածով սահմանված կարգով նշանակված պատիժները լրիվ գումարելու միջոցով, մեղադրյալ Գոռ Վարդանի Նիկողոսյանի նկատմամբ ՀՀ քրեական օրենսգրքի 335-րդ հոդվածի 1-ին մասով նշանակված 6 (վեց) ամիս ժամկետով ազատազրկում պատժին լրիվ գումարել ՀՀ քրեական օրենսգրքի 396-րդ հոդվածի 1-ին մասով նշանակված 375.000 (երեք հարյուր յոթանասունհինգ հազար) ՀՀ դրամի չափով տուգանքը և մեղադրյալ Գոռ Վարդանի Նիկողոսյանի նկատմամբ պատիժ նշանակել ազատազրկում՝ 6 (վեց) ամիս ժամկետով և տուգանք՝ 375.000 (երեք հարյուր յոթանասունհինգ հազար) ՀՀ դրամի չափով։
3. ՀՀ քրեական օրենսգրքի 79-րդ հոդվածի կիրառմամբ՝ Գոռ Վարդանի Նիկողոսյանի նկատմամբ ՀՀ քրեական օրենսգրքի 396-րդ հոդվածի 1-ին մասով և ՀՀ քրեական օրենսգրքի 335-րդ հոդվածի 1-ին մասով նշանակված 6 (վեց) ամիս ժամկետով ազատազրկում և 375.000 (երեք հարյուր յոթանասունհինգ հազար) ՀՀ դրամի չափով տուգանք պատժին հաշվակցել թիվ 15143324 քրեական վարույթով 2024 թվականի սեպտեմբերի 9-ից մինչև 2024 թվականի նոյեմբերի 9-ը և 2024 թվականի նոյեմբերի 11-ից մինչև 2024 թվականի դեկտեմբերի 20-ը փաստացի անազատության մեջ գտնվելու ժամկետը՝ 3 (երեք) ամիս 9 (ինը) օրը և որպես վերջնական պատիժ նշանակել ազատազրկում՝ 2 (երկու) ամիս 21 (քսանմեկ) օր ժամկետով և տուգանք՝ 375.000 (երեք հարյուր յոթանասունհինգ հազար) ՀՀ դրամի չափով։
4. Գոռ Վարդանի Նիկողոսյանի պատժի կատարումը դնել ՀՀ արդարադատության նախարարության համապատասխան քրեակատարողական հիմնարկի և ՀՀ ԱՆ պրոբացիայի ծառայության վրա։
5. Պատժի կրման սկիզբը հաշվել փաստացի արգելանքի վերցնելու պահից։
6. Երևան քաղաքի առաջին ատյանի ընդհանուր իրավասության քրեական դատարանի արտաբյուջետային՝ 900013298014 դեպոզիտ հաշվին որպես գրավի գումար վճարված 1.000.000 (մեկ միլիոն) ՀՀ դրամը վերադարձնել Պավել Սլավիկի Գյուլումյանին։
7. Գոռ Վարդանի Նիկողոսյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
8. Իրեղեն ապացույց ճանաչված՝ Գոռ Վարդանի Նիկողոսյանի անձնական խուզարկությամբ հայտնաբերված և փորձաքննությունից հետո ստացված 0.1 գրամ քաշով «Մեթամֆետամին» տեսակի թմրամիջոցի փաթեթը՝ կնիքված ՀՀ ՆԳՆ ոստիկանության ՓՔ վարչության ծրարների համար նախատեսված կնիքով, և Գոռ Վարդանի Նիկողոսյանի անձնական խուզարկությամբ հայտնաբերված ատրճանակի, փամփշտատուփի և փամփուշտների փաթեթը՝ կնիքված ՀՀ քննչական կոմիտեի փորձագիտական կենտրոնի ծրարների համար նախատեսված կնիքով, դատավճիռն օրինական ուժի մեջ մտնելուց հետո կցել թիվ 15176324 քրեական վարույթի նյութերին:
9. Սույն քրեական վարույթով մյուս ապացույցները պահել քրեական գործի հետ՝ այն պահելու ամբողջ ժամանակահատվածում:
10. Դատավճիռը` բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:


Դատավոր` Դավիթ Արղամանյան