Գործ ԵԴ1/3564/01/24


Ո Ր Ո Շ Ու Մ
Քրեական հետապնդումը դադարեցնելու և քրեական գործի վարույթը կարճելու մասին միջնորդությունը քննության առնելու մասին

«24» փետրվարի 2025թ. ք. Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ Դատարան),

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Գոհար Մուրադյանի,
տուժող՝ Աշոտ Հովհաննիսյանի,
պաշտպան՝ Էդգար Խաչիկյանի,
մեղադրյալ՝ Բագրատ Մկրտչյանի,

դռնբաց դատական նիստում, նախնական դատալսումների ընթացքում քննության առնելով քրեական գործն ըստ մեղադրանքի՝ Բագրատ Սարգսի Մկրտչյանի՝ ծնված՝ 18.02.1975թ․ Արմավիրի մարզի Էջմիածին քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, նախկինում չդատված, հաշվառված և բնակվում է՝ Արմավիրի մարզի Էջմիածին քաղաքի Միչուրինի փողոցի 44 տուն հասցեում ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերով,
Պ Ա Ր Զ Ե Ց

Գործի դատավարական նախապատմությունը.
2020 թվականի մարտի 30-ին Աշոտ Հովհաննիսյանը ՀՀ ոստիկանության ԵՔՎ Էրեբունու բաժնում հաղորդում է տվել այն մասին, որ իրեն պատկանող «Տոյոտա Հայլանդեր» մակնիշի ավտոմեքենան 2019 թվականի նոյեմբերից մինչև 2020 թվականի մարտն ընկած ժամանակահատվածում վերանորոգման է հանձնել Երևան քաղաքի Այվազովսկու փողոցի 15 հասցեում գտնվող ավտոտեխսպասարկման կետում՝ փականագործ Բագրատ Մկրտչյանի մոտ, հետագայում՝ վերցնելով ավտոմեքենան պարզել է, որ դրա վրայից բացակայում են խլացուցիչի երեք կատալիզատորները։
Դեպքի առթիվ նախապատրաստվել են նյութեր, 2020 թվականի ապրիլի 8-ին ՀՀ քրեական օրենսգրքի 177-րդ հոդվածի 2-րդ մասի 2-րդ կետով նախատեսված հանցագործության հատկանիշներով հարուցվել է թիվ 12179820 քրեական գործը, որը նախաքննություն կատարելու համար ուղարկվել է ՀՀ քննչական կոմիտեի ԵՔՔՎ Էրեբունի և Նուբարաշեն վարչական շրջանների քննչական բաժին։
2023 թվականի սեպտեմբերի 12-ին կայացվել է որոշում ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերով Բագրատ Սարգսի Մկրտչյանի նկատմամբ հանրային քրեական հետապնդում հարուցելու մասին։
Նախաքննության ընթացքում պարզվել է, որ Բագրատ Սարգսի Մկրտչյանը 11.10.2021 թվականին հատել է ՀՀ պետական սահմանը։
Նախաքննության ընթացքում Ռոման Բաքոյանի կողմից ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերով նախատեսված արարքը կատարելու համար կազմվել է մեղադրական եզրակացություն, իսկ Բագրատ Մկրտչյանի նկատմամբ հայտարարվել է հետախուզում։
2023 թվականի սեպտեմբերի 12-ին որոշում է կայացվել թիվ 12179820 քրեական վարույթից մաս անջատելու և առանձին վարույթում առանձնացնելու Բագրատ Մկրտչյանի կողմից ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերով նախատեսված հանրորեն վտանգավոր արարքը կատարելու դեպքի առթիվ թիվ 12825123 քրեական վարույթը։
2024 թվականի դեկտեմբերի 04-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/3564/01/24 քրեական գործն ըստ մեղադրանքի՝ Բագրատ Սարգսի Մկրտչյանի՝ ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերով։
Նույն օրը քրեական գործն էլեկտրոնային եղանակով մակագրվել և 2024 թվականի դեկտեմբերի 05-ին հանձնվել է դատավոր Տաթևիկ Մուրադյանին:
Դատարանը 2024 թվականի դեկտեմբերի 06-ին որոշում է կայացրել թիվ ԵԴ1/3564/01/24 քրեական գործի վարույթն ստանձնելու և նախնական դատալսումներ նշանակելու մասին։
Քրեական գործի լուծման համար էական նշանակություն ունեցող հանգամանքները.
Բագրատ Սարգսի Մկրտչյանի նկատմամբ նոր հանրային քրեական հետապնդում է հարուցվել ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերով՝ այն բանի համար, որ «նա նախնական համաձայնության գալով Ռոման Բաքոյանի հետ, վերջինիս հետ խմբի կազմում կատարել է ուրիշի՝ խոշոր չափերով գույքի գաղտնի հափշտակություն։
Այսպես, Աշոտ Օնիկի Հովհաննիսյանը 2019թ. նոյեմբեր ամսին սեփականության իրավունքով իրեն պատկանող «TOYOTA-HIGHLANDER» մակնիշի 40 OQ 002 հաշվառման համարանիշով ավտոմեքենան Բագրատ Մկրտչյանի հետ ունեցած պայմանավորվածության համաձայն՝ վերջինիս կողմից այն վերանորոգելու համար, թողել է Երևան քաղաքի Այվազովսկու փողոցի 15 հասցեում գործող ավտոտեխսպասարկման կետում։ Դրանից հետո, Բագրատ Մկրտչյանը նշված ավտոմեքենայի՝ 1.271.000 ՀՀ դրամ ընդհանուր արժողությամբ խլացուցիչի թվով երեք կատալիզատորները միասին գաղտնի հափշտակելու շուրջ նախնական համաձայնության է եկել Ռոման Բաքոյանի հետ։ Իրենց հանցավոր մտադրությունն իրականացնելու նպատակով 2020 թվականի մարտ ամսին՝ քննությամբ չպարզված օրը, նշված ավտոմեքենան վերջիններս տեղափոխել են ավտատեխսպասարկման կետի հարևանությամբ գործող ավտոմեքենայի խլացուցիչների գնման սպասարկման կետ, որտեղ մասնագետ Արսեն Գասպարյանից թաքցնելով այն հանգամանքը, որ ավտոմեքենայի սեփականատերը տեղյակ չէ իրենց գործողությունների մասին, վերջինիս խնդրել են ավտոմեքենայի վրայից հանել և գնել խլացուցիչի թվով երեք կատալիզատորները, ինչն Արսեն Գասպարյանը կատարել է և վճարել դրա դիմաց։ Կատարված հափշտակության արդյունքում տուժող Աշոտ Հովհաննիսյանին պատճառվել է խոշոր չափի՝ 1.271.000 ՀՀ դրամի գույքային վնաս։»:
Դատական նիստում կողմերի արտահայտած դիրքորոշումները.
Քրեական գործով նախնական դատալսումների ընթացքում, տուժող Աշոտ Հովհաննիսյանը հայտնեց, որ հաշտվել է մեղադրյալ Բագրատ Մկրտչյանի հետ, չունի որևէ բողոք և պահանջ, չի ցանկանում, որ նա ենթարկվի քրեական պատասխանատվության:
Պաշտպան Էդգար Խաչիկյանը միջնորդեց մեղադրյալ Բագրատ Մկրտչյանի ՀՀ քրեական օրենսգրքի 82-րդ հոդվածի կիրառմամբ մեղադրյալի նկատմամբ քրեական հետապնդումը դադարեցնել և թիվ ԵԴ1/3564/01/24 քրեական գործի վարույթը կարճել՝ հաշվի առնելով, որ մեղադրյալը և տուժողը հաշտվել են։
Մեղադրյալը միացավ իր պաշտպանի ներկայացրած միջնորդությանը, հայտնեց, որ ընդունում է իր մեղքը կատարած արարքում և խնդրում է տուժողի հետ հաշտության հիմքով իր նկատմամբ հարուցված քրեական հետապնդումը դադարեցնել և քրեական գործի վարույթը կարճել:
Հանրային մեղադրող Գոհար Մուրադյանը չառարկեց պաշտպանի կողմից ներկայացված միջնորդության դեմ։
Դատարանի պատճառաբանությունները և եզրահանգումը.
Ուսումնասիրելով թիվ ԵԴ1/3564/01/24 քրեական գործի նյութերը, տուժողի դիմումը, լսելով վարույթի մասնակիցներին՝ Դատարանը գտնում է, որ ներկայացված միջնորդությունը հիմնավոր է և ենթակա է բավարարման հետևյալ պատճառաբանությամբ.
ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի համաձայն՝ «1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից»:
ՀՀ քրեական օրենսգրքի 82-րդ հոդվածի համաձայն՝ «1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ:
(...)»:
ՀՀ քրեական օրենսգրքի 17-րդ հոդվածի 3-րդ մասի համաձայն՝ «Միջին ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 5 տարի ժամկետով ազատազրկումը»:
ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերի համաձայն՝
2. Գողությունը, որը կատարվել է՝
1) մի խումբ անձանց կողմից նախնական համաձայնությամբ,
․․․
4) խոշոր չափերով՝
պատժվում է տուգանքով` քսանապատիկից հիսնապատիկի չափով, կամ հանրային աշխատանքներով՝ հարյուր հիսունից երկու հարյուր յոթանասուն ժամ տևողությամբ, կամ ազատության սահմանափակմամբ՝ մեկից երեք տարի ժամկետով, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ` երկուսից հինգ տարի ժամկետով::
ՀՀ քրեական դատավարության օրենսգրքի 13-րդ հոդվածի համաձայն՝
«1. Քրեական վարույթը ենթակա է կարճման, եթե`
(...).
3) մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները.
(...)»։
ՀՀ քրեական դատավարության օրենսգրքի 311-րդ հոդվածի 1-ին մասի 3-րդ կետի համաձայն՝ «1. Նախնական դատալսումների ընթացքում սույն հոդվածով սահմանված հաջորդականությամբ դատարանը քննարկման առարկա է դարձնում՝ 3) քրեական հետապնդումը դադարեցնելու կամ վարույթը կարճելու հարցը»:
ՀՀ քրեական դատավարության օրենսգրքի 315-րդ հոդվածի 1-ին մասի համաձայն՝ «1. Սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:»։
Անդրադառնալով սույն քրեական գործի փաստական հանգամանքներին՝ Դատարանն արձանագրում է, որ մեղադրյալի և տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնություն, համաձայն ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից Բագրատ Մկրտչյանի վերաբերյալ ստացված ձև 8 տեղեկանքի՝ վերջինը նախկինում դատված չի եղել, ՀՀ քրեական օրենսգրքի 82-րդ հոդվածով նախատեսված հիմքով քրեական պատասխանատվությունից չի ազատվել, Բագրատ Մկրտչյանին մեղսագրվում է միջին ծանրության հանցանքի կատարում, ուստի Դատարանը գտնում է, որ Բագրատ Մկրտչյանի նկատմամբ ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերով քրեական հետապնդումը պետք է դադարեցնել և թիվ ԵԴ1/3564/01/24 քրեական գործի վարույթը պետք է կարճել՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի հիմքով:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ Բագրատ Մկրտչյանի նկատմամբ ընտրված խափանման միջոցը` բացակայելու արգելքը, պետք է վերացնել:
Ելնելով վերոգրյալից և ղեկավարվելով ՀՀ քրեական օրենսգրքի 82-րդ և ՀՀ քրեական դատավարության օրենսգրքի 12-13-րդ, 311-րդ, 315-րդ հոդվածներով՝ Դատարանը
Ո Ր Ո Շ Ե Ց

Մեղադրյալ Բագրատ Սարգսի Մկրտչյանի վերաբերյալ ՀՀ քրեական օրենսգրքի 254-րդ հոդվածի 2-րդ մասի 1-ին և 4-րդ կետերով քրեական հետապնդումը դադարեցնել և թիվ ԵԴ1/3564/01/24 քրեական գործի վարույթը կարճել` ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի, այն է` ՀՀ քրեական օրենսգրքի 82-րդ հոդվածի 1-ին մասի ուժով քրեական պատասխանատվությունից ազատման ենթակա լինելու հիմքով:
Բագրատ Սարգսի Մկրտչյանի նկատմամբ ընտրված խափանման միջոցը` բացակայելու արգելքը, վերացնել:
Որոշումը կարող է բողոքարկվել ՀՀ վերաքննիչ քրեական դատարան` ստանալու օրվանից հետո մեկամսյա ժամկետում:


ԴԱՏԱՎՈՐ՝ ՏԱԹԵՎԻԿ ՄՈՒՐԱԴՅԱՆ