Գործ ԵԴ1/3554/01/24




Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

07.02.2025 թվական ք.Երևան

ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ
ՔՐԵԱԿԱՆ ԴԱՏԱՐԱՆ

ՆԱԽԱԳԱՀՈՂ ԴԱՏԱՎՈՐ՝ Ժ.ՉԻՉՈՅԱՆ
ՆԻՍՏԻ ՔԱՐՏՈՒՂԱՐ՝ Ա.ԱՍՏՎԱԾԱՏՐՅԱՆ
ՄԱՍՆԱԿՑՈՒԹՅԱՄԲ`
ՀԱՆՐԱՅԻՆ ՄԵՂԱԴՐՈՂ՝ Ա.ԴԱՎԹՅԱՆԻ
ՄԵՂԱԴՐՅԱԼ՝ Մ.ԳՐԻԳՈՐՅԱՆԻ

Դռնբաց դատական նիստում քննության առնելով քրեական գործն ըստ մեղադրանքի Մանուչար Հրանտի Գրիգորյանի՝ ծնված 06.06.1952թ., ազգությամբ հայ, ՀՀ քաղաքացի, ութամյա կրթությամբ, չի աշխատում, ամուսնացած, չդատապարտված, հաշվառված՝ Գեղարքունիքի մարզի Ճամբարակ քաղաքի Տիգրան Մեծի փողոցի 9-րդ շենքի 11-րդ հասցեի բնակարանում, բնակվող՝ Երևան քաղաքի Դավթաշեն 1-ին թաղամասի Փիրումյան փողոցի 33-րդ շենքի 26-րդ հասցեի բնակարանում, որպես խափանման միջոց է ընտրված Հայաստանի Հանրապետությունից բացակայելու արգելքը, մեղադրվում է ՀՀ քրեական օրենսգրքի 344-րդ հոդվածի 1-ին մասով, 07.02.2025 թվականին Մ.Գրիգորյանի վերաբերյալ կայացվել է մեղադրական վերդիկտ՝ ՀՀ քրեական օրենսգրքի 344-րդ հոդվածի 1-ին մասով.

I.Գործի դատավարական նախապատմությունը.

2023 թվականի օգոստոսի 30-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ՝ Ս.Հրաչյանը արձանագրություն է կազմել թիվ 60245723 քրեական վարույթը նախաձեռնելու և նախաքննություն կատարելու մասին:
2023 թվականի օգոստոսի 30-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ՝ Ս.Հրաչյանն արձանագրություն է կազմել թիվ 60264523 քրեական վարույթը նախաձեռնելու և նախաքննություն կատարելու մասին։
2023 թվականի օգոստոսի 31-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ՝ Ս.Հրաչյանը որոշում է կայացրել թիվ 60264523 քրեական վարույթը թիվ 60245723 քրեական վարույթին միացնելու և նախաքննությունը թիվ 60245723 համարի ներքո շարունակելու մասին։
2024 թվականի նոյեմբերի 15-ին ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնի քննիչ՝ Գ.Մանուկյանը միջնորդություն է ներկայացրել թիվ 60245723 քրեական վարույթով հսկող դատախազին Մանուչար Հրանտի Գրիգորյանի նկատմամբ ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին:
2024 թվականի նոյեմբերի 15-ին Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանը որոշում է կայացրել քրեական վարույթով ՀՀ քրեական օրենսգրքի 344-րդ հոդվածի 1-ին մասով Մանուչար Հրանտի Գրիգորյանի վերաբերյալ հանրային քրեական հետապնդում հարուցելու մասին, մեղադրանքի փաստական կողմի հետևյալ նկարագրությամբ․ (…) [ն]ա տրանսպորտային միջոցներ վարելու իրավունքը վեց ամիս ժամկետով` 2022 թվականի նոյեմբերի 14-ից մինչև 2023 թվականի մայիսի 14-ը, կասեցված լինելու և այդ մասին նախապես տեղյակ լինելու պայմաններում, 2023 թվականի մարտի 14-ին` ժամը 18:15-ի սահմաններում, Երևան քաղաքի Ծիծեռնակաբերդի խճուղում, վարել է «Գազել» մակնիշի 4972S հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության աշխատակցի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180249178 արձանագրությունը:»
2024 թվականի նոյեմբերի 16-ին Մանուչար Հրանտի Գրիգորյանի նկատմամբ որպես խափանման միջոց է ընտրվել Հայաստանի Հանրապետությունից բացակայելու արգելքը:
2024 թվականի նոյեմբերի 19-ին ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնի քննիչ՝ Գ.Մանուկյանը միջնորդություն է ներկայացրել թիվ 60245723 քրեական վարույթով հսկող դատախազին Մանուչար Հրանտի Գրիգորյանի նկատմամբ հանրային քրեական հետապնդում չհարուցելու մասին:
2024 թվականի նոյեմբերի 22-ին Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանը որոշում է կայացրել քրեական վարույթով Մանուչար Հրանտի Գրիգորյանի վերաբերյալ հանրային քրեական հետապնդում չհարուցելու մասին։
2024 թվականի նոյեմբերի 29-ին կազմվել է մեղադրական եզրակացությունը:
2024 թվականի դեկտեմբերի 03-ին Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանը որոշում է կայացրել մեղադրական եզրակացությունը հաստատելու մասին:
2024 թվականի դեկտեմբերի 04-ին քրեական գործը մուտք է եղել դատարան, էլեկտրոնային եղանակով մակագրվել և 2024 թվականի դեկտեմբերի 05-ին հանձնվել է դատավոր Ժ.Չիչոյանին:
2024 թվականի դեկտեմբերի 06-ին որոշում է կայացվել քրեական գործով վարույթ ստանձնելու և նախնական դատալսումներ նշանակելու մասին:
2025 թվականի փետրվարի 07-ին որոշում է կայացվել Մ.Գրիգորյանի նկատմամբ կիրառված խափանման միջոց՝ Հայաստանի Հանրապետությունից բացակայելու արգելքը անփոփոխ թողնելու մասին:
2025 թվականի փետրվարի 07-ին որոշում է կայացվել հիմնական դատալսումներ նշանակելու մասին:
2025 թվականի փետրվարի 07-ին մեղադրյալ Մանուչար Գրիգորյանի նկատմամբ կայացվել է մեղադրական վերդիկտ, նույն օրը որոշում է կայացվել լրացուցիչ դատալսումներ անցկացնելու մասին:

II. Հիմնական դատալսումների ընթացքում հետազոտված թույլատրելի ապացույցները.

Մանուչար Հրանտի Գրիգորյանի վարչական իրավախախտման վերաբերյալ թիվ 8180249178 ակտը, համաձայն որի՝ այն կազմվել է 14.03.2023-ին՝ ժամը 18:29-ին, ՀՀ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի կրտսեր պարեկ Մհեր Կորյունի Մանուկյանի կողմից Մանուչար Հրանտի Գրիգորյանի նկատմամբ՝ վերջինիս կողմից նշված օրը՝ ժամը 18:15-ին Երևան քաղաքի Ծիծեռնակաբերդի խճուղում «Գազել» մակնիշի 49725 S/ 36RT540 հաշվառման համարանիշի տրանսպորտային միջոցը տրանսպորտային միջոցներ վարելու իրավունքը կասեցված վիճակում վարելու համար:
(հատոր 1-ին գ.թ. 3, դատական նիստի արձանագրություն)
Ճանապարհային ոստիկանության էլեկտրոնային ռեգիստրում առկա Մանուչար Հրանտի Գրիգորյանի քաղվածքը, համաձայն որի՝ զրկումներ չեն հայտնաբերվել, իսկ կասեցման սկիզբն է 14.11.2022թ., ավարտ՝ 14.05.2023թ.:
(հատոր 1-ին գ.թ. 4, դատական նիստի արձանագրություն)
«Ճանապարհային ոստիկանություն» ծառայությունից ստացված N2215394683 վարչական տույժ նշանակելու մասին որոշումը, կազմվել է 24.10.2022թ. 2022թ. հոկտեմբերի 15-ին՝ ժամը 13:23-ին, Գազ մակնիշի 4972 S h/h-ի ավտոմեքենայի կողմից Երևան քաղաքի Սեբաստիա /Րաֆֆի/ Վանթյան խաչմերուկի հատվածում կատարած վարչական իրավախախտման վերաբերյալ, որի հետևանքով Մանուչար Հրանտի Գրիգորյանի տրանսպորտային միջոցներ վարելու իրավունքը կասեցվել է 6 ամիս ժամ կետով: N2215394683 վարչական տույժ նշանակելու մասին որոշման Հայ փոստի ծանուցման պատճենը, որի վրա առկա է 27.10.2022թ թվագրումը և տեղափոխված նշումը:
(հատոր 1-ին գ.թ. 5, դատական նիստի արձանագրություն)
Մանուչար Հրանտի Գրիգորյանի վարչական իրավախախտման վերաբերյալ թիվ 8180244624 ակտը, համաձայն որի՝ կազմվել է 23.02.2023-ին՝ ժամը 20:25-ին, ՀՀ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի պարեկ Տարոն Հովիկի Ներսիսյանի կողմից Մանուչար Հրանտի Գրիգորյանի նկատմամբ՝ վերջինիս կողմից նշված օրը՝ ժամը 19:35-ին, Երևան քաղաքի Հաղթանակի կամրջում «Գազ» մակնիշի 49725 հաշվառման համարանիշի տրանսպորտային միջոցը տրանսպորտային միջոցներ վարելու իրավունքը կասեցված վիճակում վարելու համար:
(հատոր 1-ին գ.թ. 12, դատական նիստի արձանագրություն)
Հարթակից օգտվելու և էլեկտրոնային եղանակով ծանուցումների վերաբերյալ Մանուչար Հրանտի Գրիգորյանի վերաբերյալ տեղեկանքը, համաձայն որի՝ 093-25-10-80 բջջային հեռախոսահամարին 2022-11-08-ին՝ ժամը 01:19:50-ին ուղարկվել է հաղորդագրություն, որ վարորդական վկայականը կասեցվել է: Քննությամբ քննությանը հետաքրքրություն ներկայացնող այլ տվյալներ չհայտնաբերվեցին:
(հատոր 1-ին գ.թ. 59-60, դատական նիստի արձանագրություն)
2024 թվականի նոյեմբերի 19-ի զննություն կատարելու մասին արձանագրությունը համաձայն որի՝ զննության են ենթարկվել վերոնշյալ փաստաթղթերը:
(հատոր 1-ին գ.թ. 82, դատական նիստի արձանագրություն)
2024 թվականի նոյեմբերի 19-ին քննիչի որոշմամբ որպես արտավարույթային փաստաթուղթ ապացույց ճանաչված և քրեական վարույթին կցված՝ Մանուչար Հրանտի Գրիգորյանի վերաբերյալ կայացված թիվ 8180249178 և թիվ 8180244624 արձանագրությունները, հարթակից օգտվելու և էլեկտրոնային եղանակով ծանուցումների վերաբերյալ տեղեկանքը, ճանապարհային ոստիկանության էլեկտրոնային ռեգիստրում առկա Մանուչար Հրանտի Գրիգորյանի քաղվածքը, Հայ փոստի ծանուցման պատճենը, N2215394683 վարչական տույժ նշանակելու մասին որոշումը:
(հատոր 1-ին գ.թ. 83-84, դատական նիստի արձանագրություն)
Մեղադրյալ Մանուչար Գրիգորյանը ներկայացված մեղադրանքում իրեն մեղավոր ճանաչեց և օգտվելով իր դատավարական իրավունքից հրաժարվեց ցուցմունք տալուց: ՀՀ քրեական դատավարության օրենսգրքի 330-րդ հոդվածի համաձայն հրապարակվեց մեղադրյալի նախաքննական ցուցմունքը, համաձայն որի՝ նախկինում վարել է Գազել մակնիշի ավտոմեքենա՝ աշխատելով թիվ 70 համարի երթուղում՝ որպես վարորդ և որևէ ծանուցում չի ստացել իր տրանսպորտային միջոցներ վարելու իրավունքի կասեցման վերաբերյալ՝ հավելելով, որ այդ մասին իմացել է, երբ 2023թ-ին՝ օրն ու ամիսը չի հիշում, վարելով Գազել մակնիշի, 4972 S հաշվառման համարանիշի տրանսպորտային միջոցը, իրեն կանգնացրել է պարեկային ոստիկանը և կազմել արձանագրություն, որ իր տրանսպորտային միջոց վարելու իրավունքը գտնվում է կասեցված վիճակում: Նշել է, որ դրանից մոտ 1 ամիս անց, կարիքից ելնելով, կրկին վարել է «Գազել» մակնիշի ավտոմեքենան և Երևան քաղաքի Ծիծեռնակաբերդի խճուղում իրեն կրկին կանգնացրել է պարեկային ոստիկանը և կազմել արձանագրություն, որ վարել է ավտոմեքենան տրանսպորտային միջոցներ կարելու իրավունքը կասեցված վիճակում։
(հատոր 1-ին գ.թ. 61-65, դատական նիստի արձանագրություն)

III. Լրացուցիչ դատալսումներ.

Հետազոտվեց ՀՀ ՆԳՆ ոստիկանության ինֆորմացիոն կենտրոնի Ձև 8 տեղեկանքը, համաձայն որի՝ մեղադրյալ Մանուչար Գրիգորյանը համարվում է դատվածություն չունեցող անձ ։
Ինչպես նաև հետազոտվեց «ՍլավՄեդ» բժշկական կենտրոնի կողմից տրված տեղեկանքը, համաձայն որի՝ Մանուչար Գրիգորյանը ունի առողջական խնդիրներ։
Լրացուցիչ դատալսումների ընթացքում դատապարտված մեղադրյալը հայտնեց, որ եթե Դատարանն իր նկատմամբ պատիժ նշանակի տուգանքի ձևով, խնդրում է հնարավորություն ընձեռել այն մաս առ մաս վճարելու, քանի որ չունի մշտական և կայուն աշխատանք, ուստի չի կարող ամբողջությամբ և անհապաղ վճարել նույնիսկ օրենքով սահմանված տուգանքի նվազագույն չափը:
(դատական նիստի արձանագրություն)

IV.Դատարանի պատճառաբանությունը և եզրահանգումները.

Հիմնական դատալսումների ընթացքում պատշաճ իրավական ընթացակարգով հետազոտված թույլատրելի ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հաստատված է համարում, որ Մանուչար Գրիգորյանը տրանսպորտային միջոցներ վարելու իրավունքը վեց ամիս ժամկետով` 2022 թվականի նոյեմբերի 14-ից մինչև 2023 թվականի մայիսի 14-ը, կասեցված լինելու և այդ մասին նախապես տեղյակ լինելու պայմաններում, 2023 թվականի մարտի 14-ին` ժամը 18:15-ի սահմաններում, Երևան քաղաքի Ծիծեռնակաբերդի խճուղում, վարել է «Գազել» մակնիշի 4972S հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության աշխատակցի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180249178 արձանագրությունը: Այլ խոսքով, Դատարանը հանգում է այն հետևության, որ մեղադրյալ Մանուչար Գրիգորյանը կատարել է իրեն մեղսագրված արարքը, որի համար կիրառելի է ՀՀ քրեական օրենսգրքի 344-րդ հոդվածի 1-ին մասը:
ՀՀ քրեական օրենսգրքի 55-րդ հոդվածի 1-ին մասի համաձայն.
§1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:¦
ՀՀ քրեական օրենսգրքի 69-րդ հոդվածի 1-ին մասի համաձայն.
§1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե Դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ:¦
ՀՀ քրեական օրենսգրքի 344 հոդվածի 1-ին մասի համաձայն.
§ 1. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը՝
պատժվում է տուգանքով` առավելագույնը տասնապատիկի չափով, կամ հանրային աշխատանքներով` առավելագույնը հարյուր ժամ տևողությամբ, կամ կարճաժամկետ ազատազրկմամբ՝ առավելագույնը մեկ ամիս ժամկետով: (…) ¦
Դատարանը հաստատված համարելով հանցագործության և դրա կատարման մեջ Մանուչար Գրիգորյանի մեղքի ապացուցված լինելը, գտնում է, որ նա ենթակա է պատժի կատարածի համար:
Դատարանը ՀՀ քրեական օրենսգրքի հոդվածների համապատասխան էդուարդ Ավետիսյանի նկատմամբ նշանակվող պատժի տեսակը և չափը որոշվելիս հաշվի է առնում կատարված հանցագործության եղանակը, հանցագործության շարժառիթներն ու նպատակները, նրա անձը բնութագրող տվյալները՝ այն, որ դատված չի եղել, ինչպես նաև նշանակվող պատժի` մեղադրյալի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցության հանգամանքը:
Դատարանը ղեկավարվելով ՀՀ քրեական օրենսգրքի 70-րդ հոդվածի 3-րդ մասով որպես մեղադրյալի պատիժը և պատասխանատվությունը մեղմացնող հանգամանք արձանագրում է, այն որ հանցանքը կատարելու պահին լրացած է եղել վերջինիս 65 տարին, ինչպես նաև այն, որ վերջինս ընդունել է իրեն առաջադրված մեղադրանքը զղջացել դրա համար և ունի առողջական խնդիրներ:
Դատարանը ղեկավարվելով ՀՀ քրեական օրենսգրքի 71-րդ հոդվածով արձանագրում է, որ Մանուչար Գրիգորյանի պատասխանատվությունը կամ պատիժը ծանրացնող հանգամանքներ չկան:
Դատարանը՝ հիմք ընդունելով մեղադրյալի կողմից կատարած հանցագործության եղանակը, տեղը, ժամանակը, հանցագործության շարժառիթը և նպատակները, դիտավորության տեսակը, պատասխանատվությունը և պատիժը մեղմացնող ու ծանրացնող հանգամանքների բացակայությունը և ղեկավարվելով ՀՀ քրեական օրենսգրքի 7-րդ հոդվածի 1-ին, 55-րդ և 69-րդ հոդվածներով, գտնում է, որ Մանուչար Գրիգորյանի նկատմամբ պետք է նշանակել ՀՀ քրեական օրենսգրքի 344-րդ հոդվածի 1-ին մասի սանկցիայով նախատեսված մեղմ պատժատեսակի նվազագույն չափը՝ տուգանքը:
ՀՀ քրեական օրենսգրքի 59-րդ հոդվածի համաձայն.
§(…)
Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։ (…)¦
Քրեաիրավական նշված նորմի վերլուծությունից պարզ է դառնում, որ տուգանքի հաշվարկման հիմքում դրվում է ոչ թե նվազագույն աշխատավարձը, այսինքն պետությունում սահմանված ֆիքսված որևէ գումար, այլ հանցանք կատարած անձի եկամուտը:
ՀՀ քրեական օրենսգրքի 3-րդ հոդվածի համաձայն.
§(…)
Ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, (…)¦:
Հաշվի առնելով այն, որ քրեական նոր օրենսգրքում տուգանքի հաշվարկման հիմքում դրվում է հանցանք կատարած անձի եկամուտը, օրենսդիրը կարգավորել է նաև այն իրավիճակները, երբ անձը եկամուտ չունի կամ դրա չափը անհնարին է պարզել: Այդ դեպքերում տուգանքի չափը հաշվարկվում է հանցանքը կատարելու պահին նվազագույն ամսական աշխատավարձի չափով:
Հաշվի առնելով, այն հանգամանքը, որ մեղադրյալ Մանուչար Գրիգորյանը չի աշխատում և եկամուտ չունի, ուստի վերջինիս նկատմամբ որպես պատիժ նշանակվող տուգանքի չափը պետք է որոշվի ՀՀ-ում սահմանված նվազագույն ամսական աշխատավարձի չափով:
2022 թվականի դեկտեմբերի 7-ին ընդունված՝ «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն՝ 2023 թվականի հունվարի 1-ին ՀՀ-ում որպես նվազագույն ամսական աշխատավարձ է սահմանվել 75.000 ՀՀ դրամը:
Դատարանը հիմք ընդունելով մեղադրյալ Մանուչար Գրիգորյանի անձը բնութագրող տվյալները, պատիժն ու պատասխանատվությունը մեղմացնող հանգամանքների առկայությունը և ծանրացնող հանգամանքների բացակայությունը, ինչպես նաև վերջինիս կողմից կատարված հանցանքի բնույթն ու նշանակությունը գտնում է, որ վերջինիս նկատմամբ որպես պատիժ պետք Է նշանակվի տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
Դատարանը հաշվի առնելով, մեղադրյալի գույքային դրությունը գտնում է, որ վերջինս ի վիճակի չէ անհապաղ և ամբողջությամբ վճարել տուգանքը:
ՀՀ քրեական օրենսգրքի 59-րդ հոդվածի համաձայն.
«(…)
7. Տուգանքի նշանակման հնարավորությունը և չափը դատարանը որոշում է՝ հաշվի առնելով հանցագործության ծանրությունը, հանցագործությամբ պատճառված վնասի բնույթն ու չափը, հանցագործությամբ ստացված գույքային կամ ոչ գույքային բնույթի օգուտները, դատապարտվողի ու նրա ընտանիքի գույքային դրությունը, ինչպես նաև դատապարտվողի՝ եկամուտ ստանալու հնարավորությունը կամ նրան պատկանող այնպիսի գույքի առկայությունը, որի վրա կարող է բռնագանձում տարածվել։
8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Եթե տուգանքը նշանակելուց հետո դատապարտյալի նյութական վիճակի վատթարացման հետևանքով նա զրկվում է տուգանքը վճարելու հնարավորությունից, ապա դատարանը, հաշվի առնելով դատապարտյալի դիրքորոշումը`
1) երկարաձգում է տուգանքի վճարման սահմանված վերջնաժամկետը` առավելագույնը 1 տարով,
2) նշանակում է հանրային աշխատանքներ` հանրային աշխատանքների 24 ժամը հաշվարկելով հանցանքը կատարելու պահին նվազագույն աշխատավարձի չափով: (…)»
Դատարանը գտնում է, որ մեղադրյալի նկատմամբ նշանակված տուգանքը վճարելու համար պետք է սահմանել 12 (տասներկու) ամիս ժամանակ՝ յուրաքանչյուր ամսում 31.250 (երեսունմեկ հազար երկու հարյուր հիսուն) ՀՀ դրամ վճարելու պայմանով:
Քննության առնելով 2024 թվականի նոյեմբերի 19-ին քննիչի որոշմամբ որպես արտավարույթային փաստաթուղթ ապացույց ճանաչված և քրեական վարույթին կցված՝ Մանուչար Հրանտի Գրիգորյանի վերաբերյալ կայացված թիվ 8180249178 և թիվ 8180244624 արձանագրությունների, հարթակից օգտվելու և էլեկտրոնային եղանակով ծանուցումների վերաբերյալ տեղեկանքի, ճանապարհային ոստիկանության էլեկտրոնային ռեգիստրում առկա Մանուչար Հրանտի Գրիգորյանի քաղվածքի, Հայ փոստի ծանուցման պատճենի, N2215394683 վարչական տույժ նշանակելու մասին որոշման հարցը, Դատարանը գտնում է, որ դրանք պետք է պահել քրեական գործի հետ միասին՝ վերջինիս պահելու ամբողջ ժամանակամիջոցում:
Քննության առնելով մեղադրյալի նկատմամբ նախնական դատալսման ընթացքում ընտրված խափանման միջոցի հարցը՝ Դատարանը գտնում է, որ այն պետք է թողնել անփոփոխ` մինչ դատավճռի օրինական ուժի մեջ մտնելը:
Դատարանը գտնում է նաև, որ վարույթային ծախսերի հարցը պետք է համարել լուծված, քանի որ ՀՀ քրեական դատավարության օրենսգրքի 167-րդ հոդվածով նախատեսված վարույթային ծախսը բացակայում է:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 347-349-րդ հոդվածներով, Դատարանը՝

Վ Ճ Ռ Ե Ց

Մանուչար Հրանտի Գրիգորյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված արարքում և պատիժ նշանակել տուգանք նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
Մանուչար Հրանտի Գրիգորյանին թույլատրել որպես պատիժ նշանակված 375.000 (երեք հարյուր յոթանասունհինգ հազար) ՀՀ դրամ տուգանքը մաս առ մաս վճարել 12 (տասներկու) ամիս ժամկետում, սահմանելով տուգանքի վճարման ժամանակացույց` յուրաքանչյուր ամիս վճարել 31.250 (երեսունմեկ հազար երկու հարյուր հիսուն) ՀՀ դրամ չափով:
2024 թվականի նոյեմբերի 19-ի քննիչի որոշմամբ որպես արտավարույթային փաստաթուղթ ապացույց ճանաչված և քրեական վարույթին կցված՝ Մանուչար Հրանտի Գրիգորյանի վերաբերյալ կայացված թիվ 8180249178 և թիվ 8180244624 արձանագրությունները, հարթակից օգտվելու և էլեկտրոնային եղանակով ծանուցումների վերաբերյալ տեղեկանքը, ճանապարհային ոստիկանության էլեկտրոնային ռեգիստրում առկա Մանուչար Հրանտի Գրիգորյանի քաղվածքը, Հայ փոստի ծանուցման պատճենը, N2215394683 վարչական տույժ նշանակելու մասին որոշումը, պահել գործի հետ միասին՝ վերջինիս պահելու ամբողջ ժամանակամիջոցում:
Դատավճռի օրինական ուժի մեջ մտնելուց հետո Մանուչար Հրանտի Գրիգորյանի նկատմամբ ընտրված խափանման միջոց՝ Հայաստանի Հանրապետությունից բացակայելու արգելքը և դրանով պայմանավորված սահմանափակումները, վերացնել:
Վարույթային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան ստանալու օրվանից հետո՝ մեկամսյա ժամկետում:



ԴԱՏԱՎՈՐ՝ Ժ.ՉԻՉՈՅԱՆ