Ո Ր Ո Շ ՈՒ Մ
Քրեական հետապնդումը դադարեցնելու և քրեական գործի
վարույթը կարճելու մասին միջնորդությունը քննելու վերաբերյալ


ԵԴ1/3499/01/24

«21» հունվարի 2025թ. ք․ Երևան

Երևան քաղաքի առաջին ատյանի ընդհանուր իրավասության քրեական դատարանը, նախագահությամբ` դատավոր Ա. Մելիքսեթյանի, քարտուղարությամբ՝ Ս. Ջավադյանի, մասնակցությամբ՝ հանրային մեղադրող Խ. Մովսիսյան, տուժող Ա. Ծատուրյանի, մեղադրյալ Վահե Նվերի Կարապետյանի, քննելով քրեական հետապնդումը դադարեցնելու վերաբերյալ հարցը,

Պ Ա Ր Զ Ե Ց

1.Գործի դատավարական պատմությունը.
1.1․ 2024 թվականի սեպտեմբերի 24-ին ՀՀ քրեական օրենսգրքի 254-րդ հոդվածի 2-րդ մասի 3-րդ կետի մասի հատկանիշներով նախաձեռնվել է թիվ 08121824 քրեական վարույթը։
1.2․ 2024 թվականի սեպտեմբերի 30-ին Վահե Կարապետյանի նկատմամբ ՀՀ քրեական օրենսգրքի 254-րդ հոդվածի 2-րդ մասի 3-րդ կետով հարուցվել է հանրային քրեական հետապնդում:
1.3․ 2024 թվականի հոկտեմբերի 1-ին մեղադրյալ Վահե Կարապետյանի նկատմամբ որպես խափանման միջոց է կիրառվել բացակայելու արգելք։
1.14․ Երևան քաղաքի առաջին ատյանի ընդհանուր իրավասության քրեական դատարանում 2024 թվականի նոյեմբերի 28-ին մուտք է եղել նախաքննական 08121824 համարով քրեական գործն ըստ մեղադրանքի Վահե Կարապետյանի ՀՀ քրեական օրենսգրքի 254-րդ հոդվածի 2-րդ մասի 3-րդ կետով, քրեական գործին շնորհվել է ԵԴ1/3499/01/24 դատական գործի համարը:
1.5․ 2024 թվականի դեկտեմբերի 2-ին որոշում է կայացվել թիվ ԵԴ1/3499/01/24 քրեական գործով վարույթ ստանձնելու և նախնական դատալսումներ նշանակելու մասին:



2. Միջնորդության դատական քննությունը.
2025 թվականի հունվարի 21-ին նախնական դատալսումների ժամանակ տուժող Ա. Ծատուրյանը՝ հայտնեց, որ հաշտվել է մեղադրյալի հետ, քանզի վերջինս փոխհատուցել է պատճառված վնասը։
Մեղադրյալ Վ. Կարապետյանը հայտնեց, որ հաշտվել է տուժողի հետ, չի առարկում ոչ արդարացնող հիմքով քրեական հետապնդման դադարեցման դեմ։
Հանրային մեղադրող Խ. Մովսիսյանը հայտնեց, որ այնքանով, որքանով մեղադրյալը համարվում է առաջին անգամ միջին ծանրության հանցանք կատարած անձ, հաշտվել է տուժողի հետ, առկա են քրեական հետապնդման անվերապահ դադարեցման հիմքեր, ուստի չի առարկում քրեական հետապնդման դադարեցման դեմ։

3․ Դատարանի իրավական վերլուծությունը և պատճառաբանությունները.
ՀՀ քրեական դատավարության 12-րդ հոդվածի 1-ին մասի համաձայն՝
« 1.Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
...
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից.
…»:
ՀՀ քրեական դատավարության 311-րդ հոդվածի 1-ին մասի համաձայն՝
«1. Նախնական դատալսումների ընթացքում սույն հոդվածով սահմանված հաջորդականությամբ դատարանը քննարկման առարկա է դարձնում՝
1) ինքնաբացարկի, բացարկի և վարույթին մասնակցելուց ազատելու հարցը.
2) վարույթի ընդդատության հարցը.
3) քրեական հետապնդումը դադարեցնելու կամ վարույթը կարճելու հարցը.
4) մեղադրյալի նկատմամբ խափանման միջոց կիրառելու հարցը.
5) գույքային հայց հարուցված լինելու դեպքում` գույքային պատասխանող ճանաչելու հարցը.
6) միջնորդության դեպքում` համաձայնեցման վարույթ կամ արագացված վարույթ կամ համագործակցության վարույթով դատաքննության հատուկ կարգ կիրառելու հարցը.
7) հետազոտման ենթակա ապացույցների ծավալի հարցը.
8) ապացույցների թույլատրելիության հարցը.
9) այլ վերաբերելի հարցեր: »:
ՀՀ քրեական դատավարության օրենսգրքի 315-րդ հոդվածի համաձայն.
«1. Սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:
2. Քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
3. Քրեական հետապնդումը դադարեցնելու և վարույթը կարճելու մասին որոշման պատճենն ուղարկվում է հանրային մեղադրողին և վարույթի մասնավոր մասնակիցներին:»:
ՀՀ քրեական օրենսգրքի 17-րդ հոդվածի 2-րդ մասի համաձայն՝
« Ոչ մեծ ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 2 տարի ժամկետով ազատազրկումը, կամ որոնց համար նախատեսված է ազատազրկման հետ չկապված պատիժ: »:
ՀՀ քրեական օրենսգրքի 82-րդ հոդվածի 2-րդ և 5-րդ մասերի համաձայն՝
«2. Եթե անձն առաջին անգամ է հանցանք կատարել, որը ոչ մեծ կամ միջին ծանրության հանցագործությանը հանցակցություն է, ապա նա հաշտության հիմքով ազատվում է քրեական պատասխանատվությունից, եթե առկա է հաշտության վերաբերյալ տուժողի և տվյալ հանցակցի՝ ինքնուրույն և ազատ կամարտահայտության վրա հիմնված փոխադարձ համաձայնությունը:
5. Նախկինում սույն հոդվածով նախատեսված հիմքով քրեական պատասխանատվությունից ազատված անձը չի կարող նույն հիմքով կրկին ազատվել քրեական պատասխանատվությունից: »:
ՀՀ քրեական օրենսգրքի 254-րդ հոդվածի համաձայն՝
«1. Գողությունը՝ գաղտնի հափշտակությունը`
...)
2. Գողությունը, որը կատարվել է՝
...)
3) տեխնիկական միջոցի, հատուկ հարմարեցված սարքավորման կամ այլ առարկայի կամ միջոցի գործադրմամբ կամ այլ եղանակով գույքի պաշտպանության կամ պահպանման համար նախատեսված սարքավորումը, համակարգը, կառույցը կամ այլ միջոցը ոչնչացնելով, վնասելով կամ շրջանցելով կամ
...)
պատժվում է տուգանքով` քսանապատիկից հիսնապատիկի չափով, կամ հանրային աշխատանքներով՝ հարյուր հիսունից երկու հարյուր յոթանասուն ժամ տևողությամբ, կամ ազատության սահմանափակմամբ՝ մեկից երեք տարի ժամկետով, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ` երկուսից հինգ տարի ժամկետով:»:

ՀՀ քրեական օրենսգրքի 82-րդ հոդվածի 2-րդ մասի համաձայն՝ եթե անձն առաջին անգամ է հանցանք կատարել, որը ոչ մեծ կամ միջին ծանրության հանցագործությանը հանցակցություն է, ապա նա հաշտության հիմքով ազատվում է քրեական պատասխանատվությունից, եթե առկա է հաշտության վերաբերյալ տուժողի և տվյալ հանցակցի՝ ինքնուրույն և ազատ կամարտահայտության վրա հիմնված փոխադարձ համաձայնությունը: Այսպիսով՝ Վահե Կարապետյանը մեղադրվում է ՀՀ քրեական օրենսգրքի 254-րդ հոդվածի 2-րդ մասով նախատեսված արարքի կատարման մեջ, որը դասվում է միջին ծանրության հանցանքների թվին, ընդ որում առկա չեն տվյալներ նախկինում կատարված հանցանքների և ՀՀ քրեական օրենսգրքի 82-րդ հոդվածի կիրառման վերաբերյալ:
Այսպիսով Դատարանն արձանագրում է, որ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով Վահե Կարապետյանի նկատմամբ քրեական հետապնդումը պետք է դադարեցնել տուժողի և հանցանք կատարած անձի հաշտության հիմքով:
Քննության առնելով մեղադրյալի նկատմամբ կիրառված խափանման բացակայելու արգելքի հարցը՝ Դատարանը գտնում է, որ այն պետք է պահպանել մինչև որոշման օրինական ուժի մեջ մտնելը:
Քննելով իրեղեն ապացույցի հարցը՝ Դատարանը գտնում է, որ 13.11.2024թ. որոշմամբ իրեղեն ապացույց ճանաչված բժշկական ձեռնոցները և պոլիէթիլենային տոպրակը անհրաժեշտ է ոչնչացնել, իսկ հեռակառավարվող վահանակը՝ կից բանալիներով և դրամը վերադարձնել օրինական տիրապետողին՝ տուժողին:
Վերոգրյալի հիման վրա՝ հիմք ընդունելով ՀՀ քրեական օրենսգրքի 82-րդ հոդվածը, ղեկավարվելով ՀՀ քրեական դատավարության օրենսգրքի 12-րդ և 315-րդ հոդվածներով՝ Դատարանը․

Ո Ր Ո Շ Ե Ց

Քրեական պատասխանատվությունից ազատվելու հիմքով մեղադրյալ Վահե Նվերի Կարապետյանի՝ ՀՀ քրեական օրենսգրքի 254-րդ հոդվածի 2-րդ մասի 3-րդ կետով քրեական հետապնդումը դադարեցնել:
Թիվ ԵԴ1/3499/01/24 գրեական գործի վարույթը կարճել:
Որոշման օրինական ուժի մեջ մտնելուց հետո մեղադրյալի նկատմամբ ընտրված խափանման միջոցը՝ բացակայելու արգելքը, վերացնել:
Իրեղեն հանդիսացող վահանակը՝ կից բանալիներով և դրամը վերադարձնել օրինական տիրապետողին՝ տուժողին, իսկ բժշկական ձեռնոցները և պոլիէթիլենային տոպրակը ոչնչացնել:
Որոշումը կարող է բողոքարկվել Հայաստանի Հանրապետության վերաքննիչ քրեական դատարան` ստանալու պահից մեկ ասվա ընթացքում:


ԴԱՏԱՎՈՐ՝ Ա. ՄԵԼԻՔՍԵԹՅԱՆ