ԵԴ1/3488/01/24



Ո Ր Ո Շ ՈՒ Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ և ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՀԱՐՑԸ ՔՆՆՈՒԹՅԱՆ ԱՌՆԵԼՈՒ ՄԱՍԻՆ

13 հունիսի 2025թ. ք. Երևան
Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ Դատարան), նախագահությամբ դատավոր Վ.Մելիքյանի, քարտուղարությամբ՝ Մ.Ներսիսյանի, մասնակցությամբ՝ հանրային մեղադրող Հ.Մարտիկյանի, մեղադրյալ Մ.Բաղդասարյանի, դռնբաց դատական նիստում քննության առնելով Մուշեղ Կարենի Բաղդասարյանի (ծնված՝ 25.08.1982 թվականին, ազգությամբ հայ, ՀՀ քաղաքացի, չդատված, չի աշխատում, հաշվառված և փաստացի բնակվող՝ ք.Երևան, Նորագյուղ փ., 117/2 տուն հասցեում) նկատմամբ քրեական հետապնդումը դադարեցնելու և քրեական գործի վարույթը գործուն զղջալու հիմքով կարճելու մասին հանրային մեղադրողի միջնորդությունը,

Պ Ա Ր Զ Ե Ց
02.04.2024 թվականին ՀՀ ՔԿ ԶՔԳՎ-ում ՀՀ քրեական օրենսգրքի 462-րդ հոդվածի 1-ին մասով նախաձեռնվել է թիվ 92-0573-24 քրեական վարույթը /հատոր 1-ին, գ.թ. 1-4/:
24.06.2024 թվականին Երևանի կայազորի զինվորական դատախազության դատախազ Հ.Մարտիկյանի որոշմամբ Մուշեղ Կարենի Բաղդասարյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 462-րդ հոդվածի 1-ին մասով /հատոր 1-ին, գ.թ. 29-30/:
25.06.2024 թվականին նախաքննական մարմնի որոշմամբ մեղադրյալ Մուշեղ Բաղդասարյանի նկատմամբ խափանման միջոց է կիրառվել բացակայելու արգելքը /հատոր 1-ին, գ.թ. 51-52/:
Թիվ ԵԴ1/3488/01/24 (92-0573-24 նախաքննական համար) քրեական գործն ըստ մեղադրանքի՝ Մուշեղ Կարենի Բաղդասարյանի ՀՀ քրեական օրենսգրքի 462-րդ հոդվածի 1-ին մասով ուղարկվել է Երևան քաղաքի առաջին ատյանի ընդհանուր իրավասության քրեական դատարան և համակարգչային ծրագրի միջոցով իրականացվող գործերի բաշխմամբ մակագրվել է դատավոր Վահագն Մելիքյանին:
Դատարանի 24.11.2024 թվականի որոշմամբ քրեական գործը վարույթ է ստանձնվել և նախնական դատալսումներ է նշանակվել:
Մուշեղ Կարենի Բաղդասարյանի նկատմամբ ՀՀ քրեական օրենսգրքի 462-րդ հոդվածի 1-ին մասով մեղադրանք է առաջադրվել այն բանի համար, որ նա հաշվառված լինելով ՀՀ պաշտպանության նախարարության զորակոչային և զորահավաքային համալրման ծառայության Երևանի թիվ 2 տարածքային ստորաբաժանման պահեստազորում, ՀՀ կառավարության 2023 թվականի դեկտեմբերի 21-ի թիվ 2212-Ն որոշմամբ հայտարարված վարժական հավաքներին ներգրավվելու համար 2024 թվականի փետրվարի 24-ին ստացել է նույն թվականի մարտի 20-ին վարժական հավաքի վայր մեկնելու համար տարածքային ստորաբաժանում ներկայանալու ծանուցագիրը, անցել է առողջական վիճակի հետազոտում, որի արդյունքով ճանաչվել է վարժական հավաքին կանչվելու ենթակա, և պարտավոր լինելով «Պաշտպանության մասին» ՀՀ օրենքի 14-րդ հոդվածի 2-րդ մասի 1-ին կետի համաձայն մասնակցել վարժական հավաքին, ծանուցագրում նշված օրը չի ներկայացել տարածքային ստորաբաժանում՝ խուսափելով 2024 թվականի մարտի 19-ից մինչև ապրիլի 12-ը ներառյալ անցկացվող վարժական հավաքից՝ այդ վարժական հավաքից ազատվելու՝ օրենսդրությամբ սահմանված հիմքերի բացակայության դեպքում:
Նախնական դատալսումների ընթացքում արված միջնորդությունը և դրա հիմքերը.
Հանրային մեղադրող Հ.Մարտիկյանը միջնորդել է մեղադրյալ Մուշեղ Բաղդասարյանի նկատմամբ իրականացվող քրեական հետապնդումը դադարեցնել գործուն զղջալու հիմքով հայտնելով, որ մեղադրյալն ինքնակամ մասնակցել է հաջորդիվ հայտարարված վարժական հավաքին, նման դեպքում նախաքննության ընթացքում գտնվող քրեական գործերով կայացվում են քրեական հետապնդումը գործուն զղջալու հիմքով դադարեցնելու մասին, ուստի և քանի որ քրեական վարույթն այլևս գտնվում է դատարանի վարույթում, ուստի Դատարանին է միջնորդում քրեական հետապնդումը նշված հիմքով դադարեցնել:
Ներկայացրեց նաև մեղադրյալի՝ հաջորդիվ հայտարարված վարժական հավաքներին մասնակցած լինելու վերաբերյալ փաստաթուղթը:
Մեղադրյալ Մ.Բաղդասարյանը հայտնեց, որ ընդունում է իրեն առաջադրված մեղադրանքը, հասկանում է, որ նշված հիմքով քրեական հետապնդումը դադարեցվում է ոչ արդարացնող հիմքով, սակայն համաձայն է միջնորդության հետ, ուստի խնդրում է քրեական հետապնդումը դադարեցնել գործուն զղջալու հիմքով, քանի որ զղջում է կատարածի համար:
Անդրադառնալով մեղադրյալի՝ գործուն զղջալու հիմքով քրեական հետապնդումը դադարեցնելու և քրեական գործի վարույթը կարճելու հարցին, Դատարանն արձանագրում է հետևյալը.
ՀՀ քրեական դատավարության օրենսգրքի 12-րդ հոդվածի համաձայն` «1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(...):
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից.(...):»:
ՀՀ քրեական օրենսգրքի 81-րդ հոդվածի համաձայն՝
«1. Եթե անձն առաջին անգամ է հանցանք կատարել, ապա կարող է ազատվել քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նա համագործակցում է քրեական հետապնդման մարմինների հետ, չի վիճարկում իրեն մեղսագրվող արարքը, վնաս պատճառած լինելու դեպքում հատուցել կամ այլ կերպ հարթել է հանցագործությամբ պատճառված վնասը:
1.1. Եթե անձի առաջին անգամ կատարած հանցանքը ծանր կամ առանձնապես ծանր հանցանք է, ապա հանցավորի դերի, հանցանքը կատարելիս կամ դրանից հետո նրա վարքագծի և այլ հանգամանքների հետ կապված բացառիկ գործոնների առկայության դեպքում նա կարող է ազատվել քրեական պատասխանատվությունից, եթե համագործակցում է քրեական հետապնդման մարմինների հետ, չի վիճարկում իրեն մեղսագրվող արարքը, վնաս պատճառած լինելու դեպքում հատուցել կամ այլ կերպ հարթել է հանցագործությամբ պատճառված վնասը: Բացառիկ կարող են ճանաչվել ինչպես առանձին մեղմացնող հանգամանքները, այնպես էլ այդ հանգամանքների համակցությունը:
1.2. Սույն հոդվածի 1.1-ին մասով նախատեսված հիմքով անձը չի կարող ազատվել քրեական պատասխանատվությունից սույն օրենսգրքի 133-154-րդ, 188-րդ հոդվածներով, 196-րդ հոդվածի 2-րդ մասով, 308-րդ, 419-րդ, 420-րդ, 425-րդ հոդվածներով, 441-րդ հոդվածի 2-րդ մասի 1-ին կետով, 450-րդ, 522-րդ, 523-րդ հոդվածներով, 549-րդ հոդվածի 2-րդ և 3-րդ մասերով, 550-րդ հոդվածի 2-րդ և 3-րդ մասերով նախատեսված հանցանքներ կատարելու, ինչպես նաև այնպիսի հանցանք կատարելու դեպքում, որի համար նախատեսված է նաև ցմահ ազատազրկում:
1.3. Եթե հանցագործությունից տուժողը 14 տարին չլրացած անձ է կամ հոգեկան առողջության խնդիրների կամ մտավոր զարգացման մեջ հետ մնալու հետևանքով լրիվ կամ մասնակիորեն զրկված է իր դեմ ուղղված հանցագործության բնույթն ու հետևանքները գիտակցելու կամ իր վարքագիծը ղեկավարելու հնարավորությունից, ապա նրա դեմ ուղղված հանցանք կատարած անձը սույն հոդվածի 1.1-ին մասով նախատեսված հիմքով չի կարող ազատվել քրեական պատասխանատվությունից:
2. Նախկինում սույն հոդվածով նախատեսված հիմքով քրեական պատասխանատվությունից ազատված անձը չի կարող նույն հիմքով կրկին ազատվել քրեական պատասխանատվությունից...»:
Դատարանը նախ փաստում է, որ մեղադրյալ Մուշեղ Կարենի Բաղդասարյանին մեղսագրված արարքը դասվում է միջին ծանրության հանցագործությունների շարքին:
Դատարանն արձանագրում է, որ համաձայն ՀՀ ոստիկանության ինֆորմացիոն կենտրոնից ստացված տեղեկանքի ուսումնասիրությամբ մեղադրյալը տվյալ պահին համարվում է դատվածություն չունեցող, հետևաբար, նաև ՀՀ քրեական օրենսգրքի 82-րդ հոդվածի իմաստով համարվում է առաջին անգամ ենթադրյալ հանցանք կատարող։
Այսպիսով հաշվի առնելով հանրային մեղադրողի և մեղադրյալի դիրքորոշումը, ինչպես նաև այն հանգամանքը, որ մեղադրյալին մեղսագրվում է առաջին անգամ միջին ծանրության հանցանքի կատարում, վերջինս ընդունել է իրեն առաջադրված մեղադրանքը, զղջացել կատարածի համար, ինքնակամ մասնակցել է հետագայում հայտարարված վարժական հավաքին, Դատարանը գտնում է, որ նշված պայմաններում հանրային մեղադրողի միջնորդությունը ենթակա է բավարարման և մեղադրյալ Մուշեղ Կարենի Բաղդասարյանի նկատմամբ իրականացվող քրեական հետապնդումը ՀՀ քրեական օրենսգրքի 462-րդ հոդվածի 1-ին մասով ենթակա է դադարեցման՝ գործուն զղջալու հիմքով:
Քննության առնելով մեղադրյալ Մուշեղ Կարենի Բաղդասարյանի նկատմամբ կիրառված բացակայելու արգելք խափանման միջոց հարցը, Դատարանը գտնում է, որ այն ենթակա է վերացման, քանի որ վերացել է խափանման միջոցի անհրաժեշտությունը:
Քրեական գործով դատական ծախսեր, գույքային հայցի պահանջ և տնօրինման ենթակա իրեղեն ապացույցներ առկա չեն:
Քննության առնելով արտավարութային փաստաթղթերի տնօրինման հարցը, Դատարանը գտնում է, որ դրանք պետք է թողնել կցված քրեական գործին՝ դրա պահպանության ողջ ժամանակահատվածում:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 12-րդ, 315-րդ և 364-րդ հոդվածներով` Դատարանը
Ո Ր Ո Շ Ե Ց
Հանրային մեղադրող Հ.Մարտիկյանի միջնորդությունը բավարարել:
Մեղադրյալ Մուշեղ Կարենի Բաղդասարյանի նկատմամբ ՀՀ քրեական օրենսգրքի 462-րդ հոդվածի 1-ին մասով քրեական հետապնդումը դադարեցնել և քրեական գործի վարույթը կարճել՝ գործուն զղջալու հիմքով:
Մեղադրյալ Մուշեղ Կարենի Բաղդասարյանի նկատմամբ կիրառված բացակայելու արգելքը վերացնել:
Արտավարութային փաստաթղթերը թողնել կցված քրեական գործին՝ դրա պահպանության ողջ ժամանակահատվածում:
Որոշումը հատուկ վերանայման կարգով կարող է բողոքարկվել ՀՀ վերաքննիչ քրեական դատարան` դատական ակտը ստանալու օրվանից հետո՝ մեկամսյա ժամկետում:
ԴԱՏԱՎՈՐ Վ.ՄԵԼԻՔՅԱՆ