Գործ ԵԴ1/3420/01/24



Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
27.05.2025 թվական ք.Երևան

ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ
ՔՐԵԱԿԱՆ ԴԱՏԱՐԱՆ

ԴԱՏԱՎՈՐ՝ Դ.ԲԱԼԱՅԱՆ
ՆԻՍՏԻ ՔԱՐՏՈՒՂԱՐ՝ Ա.ՄԱԼՈՅԱՆ
ՄԱՍՆԱԿՑՈՒԹՅԱՄԲ՝
ՀԱՆՐԱՅԻՆ ՄԵՂԱԴՐՈՂ` Ա.ԳՐԻԳՈՐՅԱՆ
ՄԵՂԱԴՐՅԱԼ՝ Է.ԵՍԱՅԱՆ

Դռնբաց դատական նիստերում քննության առնելով վարույթն ըստ մեղադրանքի Էդգար Սայաթի Եսայանի՝ ծնված 20.08.1994 թվականին Երևան քաղաքում, ազգությամբ
հայ, ՀՀ քաղաքացի, միջնակարգ կրթությամբ, ամուսնացած, խնամքին անչափահս երեխա, չի աշխատում, ֆիզիկապես առողջ, դատապարտված՝
1. 18.11.2020 թվականին (ԵԴ/1052/01/20) Երևան քաղաքի առաջին ատյանի ընդհանուր իրավասության դատարանի կողմից ՀՀ քրեական օրենսգրքի 177-րդ հոդվածի 1.1 մասով տուգանքի 300.000 ՀՀ դրամի չափով, Արմավիրի մարզի առաջին ատյանի ընդհանուր իրավասության դատարանի 18.02.2022 թվականի որոշմամբ պատիժը փոխարինվել է 1.500 ժամ հանրային աշխատանքներով, նույն դատարանի 10.10.2022 թվականի որոշմամաբ պատիժը համապատախանեցվել է 01.05.2022 թվականին ընդունված ՀՀ քրեական օրենսգրքի դրույթներին և պատիժ է սահմանվել 106 ժամ հանրային աշխատանքներ, 19.01.2024 թվականին ազատվել է պատժի կրումից՝ այն ամբողջությամբ կրելու հիմքով,
2. 23.08.2024 թվականին (ԿԴ/0569/01/24) ՀՀ Կոտայքի մարզի առաջին ատյանի ընդհանուր իրավասության դատարանի կողմից ՀՀ քրեական օրենսգրքի 344-րդ հոդվածի 2-րդ մասով հանրային աշխատանքներ 80 ժամ տևողությամբ, 06.12.2024 թվականին ազատվել է պատժի կրումից՝ այն ամբողջությամբ կրելու հիմքով,
բնակվում է՝ քաղաք Երևան, Մոլդովական փողոց, 29/5 շենք, 67-րդ բնակարան հասցեում, որպես խափանման միջոց է ընտրված բացակայելու արգելքը, 13.05.2025 թվականին կայացվել է մեղադրական վերդիկտ ՀՀ քրեական օրենսգրքի 344-րդ հոդվածի 2-րդ մասով

I.Գործի դատավարական նախապատմությունը.

2024 թվականի հուլիսի 15-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Դ.Շահբազյանը կազմել է արձանագրություն ՀՀ քրեական օրենսգրքի 344-րդ հոդվածի 2-րդ մասի հատկանիշներով թիվ 60544224 քրեական վարույթը նախաձեռնելու վերաբերյալ /հատոր 1-ին գ.թ. 1/:
2024 թվականի հուլիսի 24-ին Երևան քաղաքի Ավան և Նոր Նորք վարչական շրջանների դատախազության դատախազ Վ.Մարգարյանը որոշում է կայացրել Էդգար Եսայանի նկատմամբ ՀՀ քրեական օրենսգրքի 344-րդ հոդվածի 2-րդ մասով հանրային քրեական հետապնդում հարուցելու մասին, այն հանցանքի կատարման համար, որ նա չոստանալով տրանսպորտային միջոցներ վարելու իրավունք, ոչ սթափ վիճակում վարել է տրանսպորտային միջոցը:
Այսպես.
Էդգար Սայաթի Եսայանը, չունենալով տրանսպորտային միջոց վարելու իրավունք 2024 թվականի հունիսի 10-ին՝ ժամը 00:20-ին, Երևան քաղաքի Մոլդովական փողոցում 0,177 մգ ալկոհոլի ազդեցության տակ վարել է «Մերսեդես» մակնիշի 35 TF 125 հաշվառման համարանիշի ավտոմեքենան, որի վերաբերյալ ՀՀ ՆԳՆ ոստիկանության պարեկային ծառայության Երևանի գնդի 1-ին գումարտակի 2-րդ վաշտի կրտսեր պարեկ Ազատ Խաչատրյանի կողմից կազմվել է թիվ 8180408710 արձանագրությունը /հատոր 1-ին գ.թ. 23-24/:
2024 թվականի հուլիսի 29-ին Էդգար Եսայանի նկատմամբ որպես խափանման միջոց է ընտրվել բացակայելու արգելքը /հատոր 1-ին գ.թ. 25-26/:
2024 թվականի օգոստոսի 30-ին դատախազ Վ.Մարգարյանը որոշում է կայացրել մեղադրյալի գտնվելու վայրը անհայտ լինելու հիմքով քրեական հետապնդան ժամկետները կասեցնելու մասին /հատոր 1-ին գ.թ. 43-46/:
2024 թվականի հոկտեմբերի 09-ին մեղադրյալը հայտնաբերվել է և վերջինիս ներկայացվել է մեղադրանքը ու պարզաբանվել մեղադրյալի իրավունքներն ու պարտականությունները /հատոր 1-ին գ.թ. 49, 50, 57-58, 59/:
2024 թվականի հոկտեմբերի 10-ին դատախազ Վ.Մարգարյանը որոշում է կայացրել կասեցված հանրային քրեական հետապնդման ժամկետները վերսկսելու մասին /հատոր 1-ին գ.թ. 64-66/:
2024 թվականի հոկտեմբերի 31-ին կազմվել է մեղադրական եզրակացությունը /հատոր 1-ին գ.թ. 69-75/:
2024 թվականի նոյեմբերի 14-ին դատախազ Վ.Մարգարյանը որոշում է կայացրել մեղադրական եզրակացությունը հաստատելու մասին /հատոր 1-ին գ.թ. 79-80/:
2024 թվականի նոյեմբերի 20-ին քրեական գործը մուտք է եղել դատարան, էլեկտրոնային եղանակով մակագրվել և հաջորդ օրը հանձնվել է դատավոր Դ.Բալայանին /հատոր 1-ին գ.թ. 78, 81-82/:
2024 թվականի նոյեմբերի 22-ին որոշում է կայացվել քրեական գործը վարույթ ստանձնելու և նախնական դատալսումներ նշանակելու մասին /հատոր 1-ին գ.թ. 83/:
2025 թվականի մայիսի 13-ին մեղադրյալ Էդգար Եսայանի նկատմամբ ՀՀ քրեական օրենսգրքի 344-րդ հոդվածի 2-րդ մասով կայացվել է մեղադրական վերդիկտ /հատոր 1-ին գ.թ. 111/:

II. Հիմնական դատալսումների ընթացքում հետազոտված թույլատրելի ապացույցները.
1. 10.06.2024թ. կազմված վարչական իրավախախտման վերաբերյալ թիվ 8180408710 արձանագրության պատճենի համաձայն՝ Էդգար Եսայանը չունենալով տրանսպորտային միջոցներ վարելու իրավունք և գտնվելով ոչ սթափ վիճակում, նույն օրը՝ ժամը 00:20-ի սահմաններում, Երևան քաղաքի Մոլդոբական փողոցում վարել է «Մերսեդես» մակնիշի 35 TF 125 հաշվառման համարանիշի ավտոմեքենան /հատոր 1-ին գ.թ. 3/:
2. Սթափության վիճակի ստուգման կտրոնի պատճենի համաձայն՝ Էդգար Եսայանի սթափության վիճակի ստուգումը կատարվել է թիվ 91100937 «Jupiter X/RP» տեսակի ստուգաչափման սարքով, ստուգումը կատարվել է 10.06.2024 թվականին, ալկոհոլի պարունակությունը կազմել է 0.177 մգ/լ /հատոր 1-ին գ.թ. 7/:
3. ՀՀ Էկոնոմիկայի նախարարության «Ստանդարտաֆիկացման և չափագիտության ազգային մարմին» ՓԲԸ-ն կողմից տրված թիվ N115131 ստուգաչափման վկայականի պատճենի համաձայն՝ «Ալկոտեստեր» անվանման, «Jupiter X/RP» տեսակի ստուգաչափման՝ թիվ 91100937 սարքը, ստուգաչափում է անցել 27.01.2024 թվականին և ուժի մեջ է մինչև 01.27.2025 թվականը, դրա չափման տիրույթը 0,000-2,000 մգ/լ է, իսկ ճշտության դասը /սխալանքը/ +- 10% է /հատոր 1-ին գ.թ. 6/:
4. Ճանապարհային ոստիկանության էլեկտրոնային ռեգիստրի տվյալների համաձայն՝ Էդգար Եսայանը չի ունեցել տրանսպորտային միջոցներ վարելու իրավունք /հատոր 1-ին գ.թ. 5/:
5. 23.07.2024 թվականին զննություն կատարելու մասին կազմված արձանագրության համաձայն՝ քննիչը զննության է ենթարկել սույն դատակական ակտի 1-4-րդ կետերում թվարկված փաստաթղթերը /հատոր 1-ին գ.թ. 12-13/:
6. Նույն օրը քննիչի որոշմամբ որպես արտավարույթային փաստաթուղթ են ճանաչվել սույն դատակական ակտի 1-4-րդ կետերում թվարկված փաստաթղթերը /հատոր 1-ին գ.թ. 14-15/:
7. Մեղադրյալ Էդգար Եսայանը ներկայացված մեղադրանքում իրեն մեղավոր ճանաչեց և օգտվելով իր իրավունքից հրաժարվեց ցուցմունք տալ /դատական նիստի արձանագրություն/:
III.Դատարանի պատճառաբանությունը և եզրահանգումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, դատարանը հաստատված է համարում, որ Էդգար Եսայանը մեղավորությամբ կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը հաստատված համարելով հանցագործության և դրա կատարման մեջ Էդգար Եսայանի մեղքի ապացուցված լինելը, գտնում է, որ նա ենթակա է պատժի կատարածի համար:
Դատարանը դատապարտված մեղադրյալի նկատմամբ պատիժ նշանակելիս հաշվի է առնում ինչպես նրա կատարած հանցագործության բնույթը, եղանակն ու նպատակը, դիտավորության աստիճանը, հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությունը, այնպես էլ նրա անձը բնութագրող տվյալները, այն որ երիտասարդ է:
Դատարանը ղեկավարվելով ՀՀ քրեական օրենսգրքի 70-րդ հոդվածի 1-ին մասի 4-րդ կետով, որպես մեղադրյալի պատասխանատվությունը և պատիժը մեղմացնող հանգամանքներ հաշվի է առնում, նրա խնամքին գտնվող անչափահաս երեխայի՝ 10.03.2018 թվականին ծնված Սառա Էդգար Եսայանի առկայությունը /հատոր 1-ին գ.թ. 116/:
Դատարանն արձանագրում է, որ դատապարտված մեղադրյալի պատասխանատվությունը և պատիժը ծանրացնող հանգամանքներ չկան:
Դատարանը՝ հաշվի առնելով Էդգար Եսայանի անձը բնութագրող տվյալները, նրա պատասխանատվությունն ու պատիժը մեղմացնող հանգամանքի առկայությունը և ծանրացնող հանգամանքի բացակայությունն ու ղեկավարվելով ՀՀ քրեական օրենսգրքի օրենսգրքի 7-րդ հոդվածի 1-ին, 55-րդ և 69-րդ հոդվածներով գտնում է, որ Էդգար Եսայանի նկատմամբ ՀՀ քրեական օրենսգրքի 344-րդ հոդվածի 2-րդ մասով՝ որպես պատիժ պետք է նշանակել հանրային աշխատանքները՝ 100 ժամ տևողությամբ: Դատարանի նման դիրքորոշումը պայմանավորված է այն հանգամանքով, որ Էդգար Եսայանը չի աշխատում, չունի կայուն եկամուտ: Աբցի այդ նրա նկատմամբ 18.11.2020 թվականի թիվ ԵԴ/1052/01/20 դատավճռով պատիժ է նշանակվել տուգանքի ձևով, որը հետագայում չվճարելու արդյունքում փոխվել է հանրային աշխատանքներով և ի կատար է ածվել 19.01.2024 թվականին, դրանից հետո Էդգար Եսայանի նկատմամբ 23.08.2024 թվականի թիվ ԿԴ/0569/01/24 դատավճռով կրկին որպես պատիժ է նշանակվել հանրային աշխատանքները և վերջինս պատժի կրումից ազատվել է 06.12.2024 թվականին:
Քննության առնելով դատապարտված մեղադրյալի նկատմամբ ընտրված խափանման միջոցի հարցը՝ դատարանը գտնում է, որ այն պետք է վերացնել դատավճռի օրինական ուժի մեջ մտնելուց հետո:
Դատարանը արձանագրում է նաև, որ դատապարտված մեղադրյալից բռնագանձման ենթակա չեն ՀՀ քրեական դատավարության օրենսգրքի 167-րդ հոդվածի 1-ին մասի 1-7-րդ կետերով նախատեսված վարութային ծախսերը՝ նկատի ունենալով այն հանգամանքը, որ նույն հոդվածի 2-րդ մասի համաձայն՝ հանրային մեղադրանքով վարութային ծախսերը վճարվում են պետական միջոցների հաշվին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 347-349-րդ հոդվածներով, դատարանը

Վ Ճ Ռ Ե Ց

Էդգար Սայաթի Եսայանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարման մեջ և պատիժ նշանակել՝ հանրային աշխատանքներ՝ 100 ժամ տևողությամբ:
Էդգար Եսայանի նկատմամբ ընտրված խափանման միջոցը՝ բացակայելու արգելքը ու անձնագրային գործարքներ կատարելու վրա դրված արգելքը վերացնել:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան ստանալու օրվանից հետո՝ մեկամսյա ժամկետում:


ԴԱՏԱՎՈՐ Դ.ԲԱԼԱՅԱՆ