ԵԴ1/3415/01/24


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«19» Մարտի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԱՐՄԵՆ ԳՐԻԳՈՐՅԱՆԻ
մեղադրյալ՝ ՀՐԱՉԻԿ ԽԱԼԱՓՅԱՆԻ
դռնբաց դատական նիստում քննելով Հրաչիկ Հուսիկի Խալափյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 1-ին մասով.







1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60234723 քրեական վարույթով Հրաչիկ Հուսիկի Խալափյանին ՀՀ քրեական օրենսգրքի 344 հոդվածի 1-ին մասով մեղադրանք է ներկայացվել հետևյալ արարքի համար.
«[Ն]ա 1 (մեկ) տարի ժամկետով` 12.04.2022 թվականից մինչև 12.04.2023 թվականը տրանսպորտային միջոցներ վարելու իրավունքից զրկված լինելու պայմաններում 2022 թվականի հոկտեմբերի 31-ին՝ ժամը 09:00-ի սահմաններում, Երևան քաղաքի Խուդյակով փողոցում վարել է «Օպել» մակնիշի 35 GF 697 հաշվառման համարանիշի ավտոմեքենան, որը ստուգման նպատակով կանգնեցվել է ՀՀ ոստիկանության պարեկային ծառայության աշխատակցի կողմից, և նույն օրը Հրաչիկ Հուսիկի Խալափյանի նկատմամբ կազմվել է վարչական իրավախախտման վերաբերյալ թիվ 8180164950 արձանագրությունը»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Փաստաթղթերի զննում կատարելու մասին» 2024 թվականի օգոստոսի 14-ի արձանագրության համաձայն.
«ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի պարեկի կողմից 12.04.2022թ.՝ ժամը 07:00-ին կազմվել է վարչական իրավախախտման վերաբերյալ արձանագրություն և կայացվել դրան համակցված թիվ 8180130754 որոշումն այն մասին, որ Հրաչիկ Հուսիկի Խալափյանը Երևան քաղաքի Աճառյան փողոցում «Օպել» մակնիշի 35 GF 697 հաշվառման համարանիշի տրանսպորտային միջոցը վարել է առանց հաշվառման համարանիշի, որոշում է կայացվել վերջինիս զրկել տրանսպորտային միջոց վարելու իրավունքից՝ 1 տարի ժամկետով։ Արձանագրության ծանոթացման, իրավունքների և պարտականությունների մասին ծանուցման ստացման դիմաց առկա է իրավախախտում կատարած անձի ստորագրություն:
ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի կրտսեր պարեկ Խ. Մելքոնյանի կողմից 31.10.2022թ.՝ ժամը 09:10-ին կազմվել է վարչական իրավախախտման վերաբերյալ արձանագրություն և կայացվել դրան համակցված թիվ 8180164950 որոշումն այն մասին, որ Հրաչիկ Հուսիկի Խալափյանը Երևան քաղաքի Խուդյակովի փողոցում «Օպել» մակնիշի 35 GF 697 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքից զրկված վիճակում: Արձանագրության ծանոթացման, իրավունքների և պարտականությունների մասին ծանուցման ստացման դիմաց առկա է իրավախախտում կատարած անձի ստորագրություն։
Ճանապարհային ոստիկանության էլեկտրոնային ռեգիստրից տպված տեղեկատվության համաձայն՝ Հրաչիկ Հուսիկի Խալափյանի 16.01.2014թ. թողարկված թիվ MF 998684 վարորդական վկայականի զրկման սկիզբ է նշված՝ 12.04.2022p, ավարտ՝ 12.04.2023թ:
(...)»:(2)
2.2 Մեղադրյալ Հրաչիկ Հուսիկի Խալափյանն օգտվելով իր սահմանադրական իրավունքից, հրաժարվել է դատարանում ցուցմունք տալուց: Մեղադրյալ Հրաչիկ Խալափյանը հրաժարվել է նաև նախաքննության ընթացքում պաշտպանի բացակայությամբ տրված ցուցմունքներից:

ԼՐԱՑՈՒՑԻՉ ԴԱՏԱԼՍՈՒՄՆԵՐ

2.3 Դատվածությունների և հետախուզման առկայության Ձև 8 հարցման պատասխանի համաձայն՝ Հրաչիկ Հուսիկի Խալափյանը Երևան քաղաքի առաջին ատյանի ընդհանուր իրավասության դատարանի 2018 թվականի մայիսի 17-ի դատավճռով մեղավոր է ճանաչվել 2003 թվականի ապրիլի 18-ին ընդունված ՀՀ քրեական օրենսգրքի 34-177 հոդվածի 2-րդ մասի 3-րդ կետով (2 դրվագ) նախատեսված հանցանքները կատարելու մեջ, նրա նկատմամբ վերջնական պատիժ է նշանակվել ազատազրկում՝ 3 տարի ժամկետով, և տուգանք՝ 200.000 ՀՀ դրամի չափով: Հրաչիկ Խալափյանի նկատմամբ նշանակված պատիժը պայմանականորեն չի կիրառվել՝ սահմանվել է փորձաշրջան՝ 4 (չորս) տարի ժամկետով: Հրաչիկ Խալափյանը 2019 թվականի ապրիլի 12-ին համաներման կիրառմամբ ազատվել է պատժից։(3)
2.4 Ծննդի պետական գրանցման թիվ ԱԲ 153171 ակտի համաձայն՝ 2011 թվականի հուլիսի 5-ին ծնված Արմեն Հրաչիկի Խալափյանի հայրն է Հրաչիկ Հուսիկի Խալափյանը,
2.5 Ծննդի պետական գրանցման թիվ ԱԲ 585241 ակտի համաձայն՝ 2017 թվականի հուլիսի 27-ին ծնված Հասմիկ Հրաչիկի Խալափյանի հայրն է Հրաչիկ Հուսիկի Խալափյանը:
2.6 ՀՀ ԱՆ «Արմենիա» հանրապետական բժշկական կենտրոնի ուրոլոգիայի բաժանմունքի վարիչ Ա.Մարտիրոսյանի և բժիշկ Հ.Հարությունյանի կողմից տրված դուրսգրման թիվ 1586/430 էպիկրիզի համաձայն՝
«Հրաչիկ Խալափյանի մոտ վերջնական ախտորոշվել է հետին միզուկի պատռվածք: Սուր միզակապություն: Ցայլոսկրերի և ձախ նստոսկրի փուշ ելունի կոտրվածքներ աննշան տեղաշարժով:
(…)
2021 թվականի մարտի 20-ին ծանր վիճակով ընդունվել է վերակենդանացման բաժանմունք:
2021 թվականի մարտի 22-ին տեղափոխվել է ուրոլոգիական բաժանմունք»:
-ՀՀ ԱՆ «Արմենիա» հանրապետական բժշկական կենտրոնի ուրոլոգիայի բաժանմունքի վարիչ և բուժող բժիշկ Ա.Մարտիրոսյանի կողմից 2024 թվականի ապրիլի 16-ին տրված տեղեկանքի համաձայն՝«Հրաչիկ Խալափյանը հետազոտվել է ուրոլոգիական բաժանմունքում:
Դիագնոզ՝ հետին միզուկի ստրիկտուրա (…), խոր միզային ինֆեկցիա:
Խորհուրդ է տրվում վիրահատական բուժում, հակաբակտերիալ բուժումից հետո: Վ/ց միզային դրենաժի պարբերաբար (1 ամիս պարբերականությամբ փոխարինում նորով)»։(4)
Քննարկման ենթակա հարցերի վերաբերյալ կողմերի դիրքորոշումները.
2.7 Պատժի վերաբերյալ հարցերը քննարկելիս հանրային մեղադրողը Դատարանին խնդրեց Հրաչիկ Հուսիկի Խալափյանի նկատմամբ որպես պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի չափով:
2.8 Մեղադրյալն, ըստ էության, Դատարանին հայտնեց, որ տուգանքի ձևով պատիժ նշանակվելու դեպքում ինքը չի կարողանա այն վճարել, քանի որ իր առողջական խնդիրներով պայմանավորված աշխատանք գտնել չի կարողանում ունի ֆինանսական խնդիրներ, ինչի պատճառով նույնիսկ չի կատարել 200.000 ՀՀ դրամ արժողությամբ երկրորդային վիրահատությունը:
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում այն, որ Հրաչիկ Հուսիկի Խալափյանը 2022 թվականի ապրիլի 12-ից մինչև 2023 թվականի ապրիլի 12-ը զրկված լինելով տրանսպորտային միջոցներ վարելու իրավունքից 2022 թվականի հոկտեմբերի 31-ին՝ ժամը 09:00-ի սահմաններում, Երևան քաղաքի Խուդյակով փողոցում վարել է «Օպել» մակնիշի 35 GF 697 հաշվառման համարանիշի ավտոմեքենան:
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Հրաչիկ Հուսիկի Խալափյանը սույն քրեական գործով հաստատված հանցանքը կատարելու պահին չի ունեցել դատվածություն, ունի առողջական խնդիրներ:
-Հրաչիկ Հուսիկի Խալափյանի խնամքին են երկու անչափահաս երեխաներ:
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի մարտի 18-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Հրաչիկ Հուսիկի Խալափյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ նրա կատարած արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 1-ին մասը:
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ Հրաչիկ Հուսիկի Խալափյանի պատասխանատվությունն ու պատիժը մեղմացնող՝ ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքի տակ երկու անչափահաս երեխաների առկայությունը:
Միևնույն ժամանակ Դատարանն արձանագրում է, որ Հրաչիկ Հուսիկի Խալափյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքի համար մեղադրյալ Հրաչիկ Հուսիկի Խալափյանը ենթակա է պատժի։
4.4 Դատապարտված մեղադրյալի նկատմամբ նշանակվող պատժի տեսակն ու չափը որոշելիս՝ Դատարանը հաշվի է առնում հետևյալը՝
-Հրաչիկ Հուսիկի Խալափյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին։
-Հրաչիկ Հուսիկի Խալափյանը չունի մշտական աշխատանք և ունի առողջական խնդիրներ, հետևաբար նրա նկատմամբ տուգանքի և հանրային աշխատանքների ձևով պատիժ նշանակելու հնարավորությունը բացակայում է, քանի որ առերևույթ բացակայում է դատապարտվողի՝ եկամուտ ստանալու հնարավորությունը և նա հնարավորություն չի ունենա վճարել նշանակված տուգանքը, իսկ հանրային աշխատանքները՝ իր մոտ ախտորոշված հիվանդության պայմաններում, ողջամտորեն կվտանգեն նրա առողջությունը:
-Հրաչիկ Հուսիկի Խալափյանի անձը բնութագրող տվյալները, ինչպես նաև պատասխանատվությունը և պատիժը մեղմացնող հանգամանքի առկայությունն ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Հրաչիկ Հուսիկի Խալափյանի կողմից կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է կարճաժամկետ ազատազրկումը՝ 15 (տասնհինգ) օր ժամկետով:
• Միևնույն ժամանակ, Դատարանն արձանագրում է, որ կատարած հանցանքների համար Հրաչիկ Խալափյանի նկատմամբ լրացուցիչ պատիժ նշանակելու հիմքերն ու անհրաժեշտությունը տվյալ դեպքում բացակայում են։
4.5 Մեղադրյալ Հրաչիկ Հուսիկի Խալափյանի կողմից իր նկատմամբ նշանակված պատիժը կրելու հարցը որոշելիս Դատարանը հաշվի է առնում այն հանգամանքը, որ Հրաչիկ Խալափյանի նկատմամբ նշանակվել է ՀՀ քրեական օրենսգրքի 344 հոդվածի 1-ին մասի սանկցիայով նախատեսված առավել խիստ պատիժը։
Վերը նշվածի պայմաններում Դատարանը գտնում է, որ նշանակված պատիժը պայմանականորեն չկիրառելը և 1 (մեկ) տարի ժամկետով փորձաշրջան սահմանելը տվյալ դեպքում կարող են բավարար լինել քրեական պատժի նպատակներն իրացնելու, այդ թվում՝ պատժի ենթարկված անձին ուղղելու համար։
• Այսպիսով՝ Դատարանը գտնում է, որ Հրաչիկ Հուսիկի Խալափյանի նկատմամբ նշանակված պատիժը՝ 15 (տասնհինգ) օր ժամկետով կարճաժամկետ ազատազրկումը, ՀՀ քրեական օրենսգրքի 84 հոդվածի կիրառմամբ պետք է պայմանականորեն չկիրառել՝ սահմանելով 1 (մեկ) տարի ժամկետով փորձաշրջան։
Փորձաշրջանի ընթացքում Հրաչիկ Խալափյանի նկատմամբ պետք է նշանակել հետևյալ պարտականությունը.
-առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը:
4.6 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.7 Հրաչիկ Հուսիկի Խալափյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.8 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Հրաչիկ Հուսիկի Խալափյանին մեղավոր ճանաչել ՀՀ քրեական օրենսգրքի 344 հոդվածի 1-ին մասով նախատեսված հանցանքը կատարելու մեջ և նրա նկատմամբ պատիժ նշանակել կարճաժամկետ ազատազրկում՝ 15 (տասնհինգ) օր ժամկետով։
2. Հրաչիկ Հուսիկի Խալափյանի նկատմամբ նշանակված պատիժը պայմանականորեն չկիրառել՝ սահմանելով փորձաշրջան՝ 1 (մեկ) տարի ժամկետով:
Փորձաշրջանի ընթացքում Հրաչիկ Խալափյանի նկատմամբ նշանակել հետևյալ պարտականությունը՝
-առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը:
3. Հրաչիկ Խալափյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
4. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1977 թվականի օգոստոսի 22-ին Սյունիքի մարզի Կապան քաղաքում, ազգությամբ հայ, ՀՀ քաղաքացի, միջնակարգ կրթությամբ, խնամքին՝ երկու անչափահաս երեխա, դատվածություն չունեցող, հաշվառված է Սյունիքի մարզի Կապան քաղաքի Մինաս Պապյան փողոցի 1 շենքի թիվ 2 բնակարանում, բնակվում է Կոտայքի մարզի Առինջ գյուղի 3 փողոցի 1 փակուղու թիվ 1 տանը, որպես խափանման միջոց է կիրառված բացակայելու արգելքը:
(2)Տե՛ս, քրեական գործ, հատոր 1, թերթեր 26-27
(3) 2.3 կետի վերաբերյալ, տե՛ս, Դատարանում ստեղծված նյութերը
(4)2.4 կետի վերաբերյալ, տե՛ս քրեական գործ, հատոր 1, թերթեր 48-51