ԵԴ1/3402/01/24


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«29» Ապրիլի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ,
ԺԵՆՅԱ ՂԱՓԱՆՑՅԱՆԻ ԵՎ ԹԱՄԱՐԱ ՀԱՐՈՒԹՅՈՒՆՅԱՆԻ
մասնակցությամբ.
հանրային մեղադրողներ՝ ԱՐՄԱՆ ԱԼԻԽԱՆՅԱՆԻ
ԵՎ ՆԱՐԵԿ ԲԱՐԵԿՅԱՆԻ
մեղադրյալ՝ ԱՐԹՈՒՐ ՇԱՀՆԱԶԱՐՅԱՆԻ
դռնբաց դատական նիստում քննելով Արթուր Լևոնի Շահնազարյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 476 հոդվածի 2-րդ մասի 3-րդ կետով.





1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ
Թիվ 14126824 քրեական վարույթով Արթուր Լևոնի Շահնազարյանին ՀՀ քրեական օրենսգրքի 476 հոդվածի 2-րդ մասի 3-րդ կետով մեղադրանք է ներկայացվել հետևյալ արարքի համար.
«[Նա] Երևան քաղաքի Թբիլիսյան խճուղի 3/9 հասցեում գործող ՀՀ Հակակոռուպցիոն քրեական դատարանում ծանր հանցագործությունների վերաբերյալ թիվ ՀԿԴ/0036/01/22 քրեական գործով հրավիրված լինելով որպես վկա ցուցմունք տալու, վկայի իրավունքները և պարտականությունները պարզաբանված լինելու պայմաններում, գիտակցելով իր արարքի փաստական հանգամանքները, ուղղակի դիտավորությամբ, 2023թ. նոյեմբերի 17-ին հարցաքննվելիս մեծամասամբ հերքել է ՀՀ հատուկ քննչական ծառայության քննիչի մոտ թիվ 62216818 քրեական գործով տրված իր նախաքննական երեք ցուցմունքները և դրանք հրապարակելուց հետո դատարանին հայտնել է սուտ տեղեկություններ առ այն, որ թե՛ նախաքննության ընթացքում, թե՛ տվյալ պահին՝ դատարանում, հարցաքննվելիս տվել է նույնաբովանդակ ցուցմունքներ, սակայն քննիչի կողմից նախաքննական ցուցմունքներն արձանագրվել են իրականությանը չհամապատասխանող բովանդակությամբ:
Քննիչի կողմից ծանր հանցագործության վերաբերյալ քրեական գործով ապացույց կեղծելու վերոնշյալ ենթադրյալ դեպքի առթիվ 2003թ. խմբագրության ՀՀ քրեական օրենսգրքի 349-րդ հոդվածի 3-րդ մասի 1-ին կետով /գործող ՀՀ քրեական օրենսգրքի 479-րդ հոդվածի 2-րդ մասի 4-րդ կետով/ 02.12.2023թ. նախաձեռնված և հետագայում կարճված թիվ 58250623 քրեական վարույթի նախաքննության ընթացքում հաստատվել է այն փաստը, որ թիվ 62216818 քրեական գործի նախաքննության ընթացքում Արթուր Շահնազարյանի կողմից տրված ցուցմունքները քննիչն արձանագրել է Արթուր Շահնազարյանի պատմածով և նրա բառերով, հետևաբար՝ Արթուր Շահնազարյանը դատարանին և դատախազին հայտնել է հանցագործության դեպքի և քննիչի կողմից հանցանք կատարելու մասին սուտ տեղեկություններ՝ զուգորդված քննիչին ծանր հանցագործության մեջ մեղադրելով»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Զննում կատարելու մասին» 2024 թվականի հոկտեմբերի 18-ի արձանագրության համաձայն.
«Զննության ենթարկեցի 17.11.2023 թվականին տեղի ունեցած դատական նիստի ձայնագրությունը՝ որը պահպանվում է թվով մեկ լազերային սկավառակում:
Զննությամբ պարզ դարձավ, որ դատաքննության փուլում որպես վկա ցուցմունք տալուց առաջ, գործով վկա Արթուր Շահնազարյանին բացատրվում է իր իրավունքները և պարտականությունները, մասնավորապես վերջինս նախազգուշացվում է սուտ ցուցմունք տալու կամ ցուցմունք տալուց հրաժարվելու համար նախատեսված քրեական պատասխանատվության մասին, որի վերաբերյալ վերջինս ստորագրում է համապատասխան արձանագրությունը:
Ցուցմունքի ընթացքում նախագահող դատավորը հարց է տալիս վկա Արթուր Շահնազարյանին, այն մասին, որ նախաքննության ընթացքում քննիչի մոտ հարցաքննվել է, դա եղել է իր կամքով թե ոչ, ինչին Ա.Շահնազարյանը պատասխանում է՝ այո, իր կամքով է հարցաքննվել, դատավորի մյուս հարցին՝ արդյոք ճշմարտությունն է հայտնել, թե ոչ, Ա.Շահնազարյանը պատասխանում է՝ այո ասել է այն ինչ եղել է:
Նախագահող դատավորի այն հարցին թե արդյոք, եղել է մի դեպք, որ քննիչը իրեն ստիպի ասել, որ հանգամանքները այսպես կամ այնպես ներկայացնի, Ա.Շահնազարյանը պատասխանում է, որ ոչ նման բան չի եղել, դատարանի կողմից տված հարցին, թե կարդացել է իր ցուցմունքը վկան պատասխանել է, որ ոչ մի բան չի կարդացել, քննիչն իրեն հարցեր է տվել նա է պատասխանել է։
Դատական նիստը նախագահողի կողմից հարց է տրվում Ա.Շանհազարյանին արդյոք նախկինում /նախաքննության փուլում/ էլ է ասել նույն բանը, ինչ հիմա /դատաքննության փուլում/ է ասում, Ա.Շահնազարյանը պատասխանում է, որ նախկինում էլ է նույնը ասել, հիմա էլ է նույնը ասում։
Նիստի ընթացքում նախագահող դատավորը ընթերցում է նախաքննության փուլում որպես վկա Ա.Շահնազարյանի կողմից տված երեք ցուցմունքները և հարց տալիս դրանց և դատական փուլում իր տված ցուցմունքի հակասության պատճառի վերաբերյալ, ինչին Ա.Շահնազարյանը պատասխանում է, որ չի ստել նախկինում, ուղղակի կարող է նա ուրիշ բան է ասել, քննիչը այլ բան է արձանագրել, դատարանի հարցին, թե ոնց է դա պատահել երեք անգամ, վերջինս պատասխանում է, որ բոլոր անգամներում էլ չի կարդացել իր կողմից տված ցուցմունքը, նախագահողի այն հարցին թե ինչու է վերջում գրել, որ կարդացել է ցուցմունքը, ճիշտ է այն, որի համար ստորագրում է, Ա.Շահնազարյանը նշել է, որ վստահել է քննիչին, որ ինքը ինչ ասել է այն էլ նա գրած է եղել, քննիչը ասել է արդյոք ցանկանում է կարդալ ցուցմունքը, նա էլ պատասխանել է՝ ոչ, քանի որ տեսել է երկար է տեքստի ծավալը և առանց կարդալու ստորագրել է, ծանոթ չի եղել տեքստին, չի կարծել, որ նա կարող է մի բան ասել, իսկ քննիչը այլ բան արձանագրել և լինեն բաներ, որ չեն համապատասխանում իր ասածին և իրականությանը, ինչ ասում է դատարանում դա է ճշմարտութունը:
Նախագահող դատավորը միջնորդում է դատախազին, որպեսզի վերցնի դատական նիստի կրիչը վարույթ նախաձեռնելու հարցքը քննարկելու նպատակով և զգուշացնում Ա.Շահնազարյանին, որ եթե հետագայում նախաձեռնված վարույթով պարզվի, որ ինքը ճշմարտությունը թաքցրել է և կեղծ տեղեկություն է հայտնել, ապա ինքը կենթարկվի քրեական պատասխանատվության»։ (2)
2.2 «Զննում կատարելու մասին» 2024 թվականի հոկտեմբերի 22-ի արձանագրության համաձայն.
«ՀՀ ԱԱԾ քննչական գլխավոր վարչությունում 2023 թվականի դեկտեմբերի 1-ին ՀՀ գլխավոր դատախազությունից ստացվել է առերևույթ հանցանքի մասին պատշաճ հաղորդում՝ ՀՀ հատուկ քննչական ծառայության ինքնավար պաշտոն զբաղեցնող անձի կողմից ծանր հանցագործությունների վերաբերյալ քրեական գործով ապացույցներ կեղծելու ենթադրյալ դեպքի վերաբերյալ։ Հաղորդմամբ և դրան կից փաստաթղթերով ներկայացվել է առերևույթ հանցանքի հետևյալ փաստական նկարագրությունը՝ քաղաքացի Արթուր Լևոնի Շահնազարյանը դատարանում քննվող թիվ ՀԿԴ/0036/01/22 գործով 2023 թվականի նոյեմբերի 17-ին տեղի ունեցած նիստի ժամանակ մեծամասամբ հերքել է ՀՀ հատուկ քննչական ծառայության քննիչի մոտ տրված իր նախաքննական ցուցմունքները՝ նշելով, որ դրանք չի կարդացել կազմումից հետո, քննիչն է սեփական նախաձեռնությամբ այդպես արձանագրել:
Հաղորդմամբ փաստվում է քննիչի կողմից ծանր հանցագործության վերաբերյալ՝ քրեական գործով ապացույց կեղծելու առերևույթ դեպք, 02.12.2023 թվականին նախաձեռնվել է քրեական վարույթ 2003 թվականի ապրիլի 18-ին ընդունված ՀՀ քրեական օրենսգրքի 349-րդ հոդվածի 3-րդ մասի 1-ին կետով /գործող ՀՀ քրեական օրենսգրքի 479-րդ հոդվածի 2-րդ մասի 4-րդ կետով/:
(...)
Այսպիսով, թիվ 62216818 քրեական գործի նախաքննության ընթացքում պարզվել է, որ թիվ 58250623 քրեական վարույթի նախաքննության ընթացքում Արթուր Լևոնի Շահնազարյանը ՀՀ հատուկ քննչական ծառայությունում քրեական գործի համար նշանակություն ունեցող հանգամանքների շուրջ 3 անգամ հարցաքննվելուց հետո՝ դատարանում քննվող թիվ ՀԿԴ/0036/01/22 քրեական գործով 2023 թվականի նոյեմբերի 17-ին տեղի ունեցած նիստի ժամանակ, նույն հանգամանքների շուրջ կրկին հարցաքննվելով մեծամասամբ հերքել է իր նախաքննական ցուցմունքները՝ հայտնելով, որ նախկինում ևս տվել է դատարանում տված ցուցմունքին նույնաբովանդակ ցուցմունքներ, սակայն իր ցուցմունքների արձանագրությունները չի կարդացել մեծածավալ լինելու պատճառով:
Հատկանշական է այն հանգամանքը, որ Ա. Շահնազարյանի՝ նախաքննական 3 ցուցմունքները, չնայած տարբեր օրերի տրված լինելուն, նույնաբովանդակ են ցուցմունքների արձանագրությունների յուրաքանչյուր էջում առկա են և Շահնազարյանի ստորագրությունները, յուրաքանչյուր արձանագրության վերջում առկա են Ա.Շահնազարյանի կողմից ձեռագիր արված գրառումներ՝ ցուցմունքներն անձամբ ընթերցած լինելու վերաբերյալ, ինչպես նաև յուրաքանչյուր արձանագրության սկզբում առկա են գրառումներ այն մասին, որ Ա.Շահնազարյանին պարզաբանվել են վկայի իրավունքները և պարտականությունները: Հարկ է նշել, որ Ա. Շահնազարյանի նախաքննական 3 հարցաքննությունների արձանագրությունները մեծածավալ չեն, դրանցից մեկի բովանդակային հատվածը կազմում է 2 էջ, երկրորդինը՝ երկու էջից քիչ ավելի, իսկ երրորդինը՝ գրեթե մեկ էջ։
(...)
Այսպիսով, թիվ 58250623 քրեական վարույթի նախաքննության ընթացքում չի հաստատվել թիվ 62216818 քրեական գործով նախաքննության իրականացրած քննիչ Նիկոլայ Գագիկի Բարսեղյանի կողմից ապացույց կեղծելու հանգամանքը, հետևաբար անհրաժեշտ է վերջինիս նկատմամբ հանրային քրեական հետապնդում չհարուցել։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետի, 38-րդ հոդվածի 6-րդ կետի և 196-րդ հոդվածի 1-ին և 4-րդ մասերի պահանջներով որոշվել է՝ թիվ 58250623 քրեական վարույթով Նիկոլայ Գագիկի Բարսեղյանի նկատմամբ՝ 2003 թվականի ապրիլի 18-ին ընդունված ՀՀ քրեական օրենսգրքի 349-րդ հոդվածի 3-րդ մասի 1-ին կետով /համապատասխանում է գործող ՀՀ քրեական օրենսգրքի 179-րդ հոդվածի 2-րդ մասի 3-րդ և 4-րդ կետերին/ հանրային քրեական հետապնդում չհարուցել՝ ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետով»։ (3)
2.3 «Զննում կատարելու մասին» 2024 թվականի հոկտեմբերի 23-ի արձանագրության համաձայն.
«Զննվել է թիվ 58250623 քրեական վարույթի շրջանակում կայացված 29.04.2024թ. թիվ 58250623 քրեական վարույթը կարճելու մասին որոշումը, թիվ 58250623 քրեական վարույթի շրջանակում կայացված 23.04.2024թ. քրեական հետապնդում չհարուցելու մասին որոշումը, թիվ 62216818 քրեական գործի շրջանակում որպես վկա Արթուր Լևոնի Շահնազարյանի կողմից տրված ցուցմունքները, թիվ 58250623 քրեական վարույթի շրջանակում՝ որպես վկա Արթուր Լևոնի Շահնազարյանի կողմից տրված ցուցմունքը,
(...)
Նախաքննության ընթացքում միջնորդություն է հարուցվել քրեական վարույթի նկատմամբ դատավարական հսկողություն իրականացնող դատախազին Նիկոլայ Գագիկի Բարսեղյանի նկատմամբ հանրային քրեական հետապնդում չհարուցելու մասին՝ անձի կողմից իրեն մեղսագրվող արարքը չկատարելու հիմքով, որը բավարարվել է հսկող դատախազի կողմից 23.04.2024 թվականին:
Ելնելով վերոգրյալից և հաշվի առնելով, որ Նիկոլայ Գագիկի Բարսեղյանի նկատմամբ, առկա է հանրային քրեական հետապնդում չհարուցելու մասին որոշում, ուստի ղեկավարվելով ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետով, 13-րդ հոդվածի 1-ին մասի 3-րդ կետով և 196-րդ հոդվածներով, որոշվել է՝ թիվ 58250623 քրեական վարույթը կարճել՝ ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետով` մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները։
(...)»: (4)
2.4 Արթուր Լևոնի Շահնազարյանը, ըստ էության, ցուցմունք տվեց այն մասին, որ դեպքից առաջ ինքը որպես վարորդ աշխատանքի է ընդունվել ՀՀ ՆԳՆ ոստիկանությունում, սակայն մոտ մեկ տարի այնտեղ աշխատելուց հետո՝ աշխատանքից դուրս է եկել, քանի որ փաստացի չի աշխատել։ Այդ ընթացքում իրեն որևէ հանձնարարություն չեն տվել, ինքն էլ հոգնել է այդ իրավիճակից, դիմում է գրել ու դուրս եկել աշխատանքից: Այդ ամենից հետո ինքը քննիչ Նիկոլայ Բաղդասարյանին հայտնել է իրականությանը չհամապատասխանող տեղեկություններ առ այն, որ ինքը ծանրաբեռնված աշխատել է, այս կամ այն անձին կամ նրանց ընտանիքի անդամներին «ա» կետից տեղափոխել է «բ» կետ։ Ինքն այդպիսի ցուցմունքներն է տվել, քանի որ չի ցանկացել, որ իրեն մեղադրեն այն բանի համար, որ ինքը ՀՀ ՆԳՆ ոստիկանությունում աշխատելու ժամանակահատվածում «պարապ է մնացել», և որևէ աշխատանք չի կատարել, բայց իրականում, երբ ինքն աշխատանքի է գնացել, այնտեղ, ըստ էության, որևէ բանով չի զբաղվել, իրեն ոչինչ չեն հանձնարարել: Իսկ հետո՝ և ՀՀ հակակոռուպցիոն դատարանում, և սույն քրեական վարույթով նախաքննությունն իրականացրած քննիչին ինքն արդեն հայտնել է իրականությունը, ասելով, որ երբ աշխատանքի է գնացել, իրականում որևէ աշխատանք չի կատարել:
Ինքն ի սկզբանե նպատակ չի ունեցել որևէ բանում մեղադրել քննիչ Նիկոլայ Բաղդասարյանին, ուղղակի առաջին անգամ է, որ մասնակցել է քննչական և դատավարական գործողությունների, եղել է շփոթված ու վախեցած վիճակում, այդ պատճառով էլ իրականությանը չհամապատասխանող տեղեկություններ է հայտնել:
Իրեն վերագրվող բոլոր փաստերի հետ ինքը համաձայն է, մեղադրանքում նկարագրված է իրականությունը: Ինքը ՀՀ հակակոռուպցիոն դատարանում հայտնել է, որ քննիչ Նիկոլայ Բաղդասարյանը չի արձանագրել այն հանգամանքները, ինչ ինքն է հայտնել, քանի որ վախեցել է, որ ՀՀ ՆԳՆ ոստիկանությունում որպես վարորդ գրանցված լինելու և փաստացի չաշխատելու համար իրեն կմեղադրեն: ՀՀ հակակոռուպցիոն դատարանում դատավորն իրեն հարցաքննության վերջում հայտնել է, որ եթե դատարանում տրված իր ցուցմունքը չհամապատասխանի իրականությանը, և նախաքննության ընթացքում քննիչն իրապես արձանագրած լինի այն, ինչի վերաբերյալ ինքը ցուցմունք է տվել, ապա ինքը կարող է ենթարկվել քրեական պատասխանատվության։ Այնուհանդերձ, ինքը դատավորին չի հայտնել, որ սուտ է խոսել, քանի որ եղել է վախեցած և շփոթված վիճակում, ինչպես նաև չի հասկացել դատավորի կողմից օգտագործված իրավաբանական տերմինոլոգիան:
2.5 Վարույթի արդարացիությունը կասկածի տակ չդնելու նպատակով Դատարանի նախաձեռնությամբ հետազոտման ենթակա ապացույցների ծավալը լրացվել է. հետազոտվել է թիվ ՀԿԴ/0036/01/22 քրեական գործով ՀՀ հակակոռուպցիոն դատարանում 2023 թվականի նոյեմբերի 17-ին տեղի ունեցած դատական նիստի ձայնային արձանագրության էլեկտրոնային կրիչը (պատճենը):
Վերը նշված լազերային սկավառակի պարունակությունն, ըստ էության, կրկնում է Դատավճռի 2.1 կետում նշված ապացույցի բովանդակությունը:

ԼՐԱՑՈՒՑԻՉ ԴԱՏԱԼՍՈՒՄՆԵՐ

2.6 Դատվածությունների և հետախուզման առկայության Ձև 8 հարցման պատասխանի համաձայն՝ Արթուր Լևոնի Շահնազարյանը նախկինում դատապարտված չի եղել:
2.7 ՀՀ քաղաքացիական կացության ակտերի գրանցման տվյալների շտեմարանում միասնական էլեկտրոնային տեղեկատվական համակարգի միջոցով կատարված հարցմանն ի պատասխան ստացվել են՝
-ամուսնության պետական գրանցման թիվ 228 ակտը, համաձայն որի Արթուր Լևոնի Շահնազարյանը և Արփինե Արամի Զեյնալյանն ամուսնացած են,
-ծննդի պետական գրանցման թիվ 36 ակտը, համաձայն որի՝ 2010 թվականի հունվարի 12-ին ծնված Լևոն Շահնազարյանի հայրն է Արթուր Լևոնի Շահնազարյանը,
-ծննդի պետական գրանցման թիվ 356 ակտը, համաձայն որի՝ 2012 թվականի հունիսի 15-ին ծնված Ալեքս Շահնազարյանի հայրն է Արթուր Լևոնի Շահնազարյանը,
-ծննդի պետական գրանցման թիվ 25558 ակտը, համաձայն որի՝ 2021 թվականի դեկտեմբերի 14-ին ծնված Արինա Շահնազարյանի հայրն է Արթուր Լևոնի Շահնազարյանը։
2.8 ՀՀ պետական եկամուտների կոմիտեի հարկ վճարողների սպասարկման վարչության պետի 2024 թվականի նոյեմբերի 27-ի գրության համաձայն՝ Արթուր Լևոնի Շահնազարյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Արթուր Լևոնի Շահնազարյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ։ (5)
Քննարկման ենթակա հարցերի վերաբերյալ կողմերի դիրքորոշումները.
2.9 Պատժի վերաբերյալ հարցերը քննարկելիս հանրային մեղադրող Նարեկ Բարեկյանը խնդրեց Արթուր Շահնազարյանին դատապարտել 3 տարի 6 ամիս ժամկետով ազատազրկման:
2.10 Պատժի վերաբերյալ հարցերը քննարկելիս մեղադրյալ Արթուր Շահնազարյանն, ըստ էության, խնդրեց իրեն չդատապարտել ազատազրկման, իսկ տուգանքի ձևով պատժի նշանակման դեպքում վճարման համար սահմանել ժամկետ, քանի որ հնարավորություն չի ունենա անհապաղ և ամբողջությամբ վճարել տուգանքը:

3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում, որ.
ա) Արթուր Լևոնի Շահնազարյանը, Երևան քաղաքի Թբիլիսյան խճուղի 3/9 հասցեում գործող ՀՀ հակակոռուպցիոն քրեական դատարանում ծանր հանցագործությունների վերաբերյալ քննվող թիվ ՀԿԴ/0036/01/22 քրեական գործով 2023 թվականի նոյեմբերի 17-ին հարցաքննվել է որպես վկա, և նրան պարզաբանվել են վկայի իր իրավունքներն ու պարտականությունները։
բ) Արթուր Լևոնի Շահնազարյանը հարցաքննվելիս մեծամասամբ հերքել է թիվ 62216818 քրեական գործով ՀՀ հատուկ քննչական ծառայության քննիչի մոտ տրված իր մինչդատական երեք ցուցմունքները, և դրանք հրապարակելուց հետո դատարանին գիտակցաբար տվել է սուտ տեղեկություն առ այն, որ թե նախաքննության ընթացքում, և թե տվյալ պահին՝ դատարանում, հարցաքննվելիս տվել է նույնաբովանդակ ցուցմունքներ, սակայն քննիչի կողմից իր ցուցմունքներն արձանագրվել են իրականությանը չհամապատասխանող բովանդակությամբ, այդ կերպ քննիչին մեղադրելով քրեական գործով ապացույց կեղծելու վերաբերյալ ծանր հանցագործության մեջ։
գ) Դատարանն արժանահավատ չի համարում քննիչ Նիկոլայ Բաղդասարյանին որևէ բանում մեղադրելու նպատակ չունենալու մասին մեղադրյալի ցուցմունքը, քանի որ դրա վերաբերյալ մեղադրյալը չի ներկայացրել որևէ համոզիչ փաստարկ։ Ավելին՝ մեղադրյալի ցուցմունքի համաձայն՝ ինքը ՀՀ հակակոռուպցիոն դատարանում հայտնել է, որ քննիչ Նիկոլայ Բաղդասարյանը չի արձանագրել այն հանգամանքները, ինչ ինքն է հայտնել, քանի որ վախեցել է, որ ՀՀ ՆԳՆ ոստիկանությունում որպես վարորդ գրանցված լինելու և փաստացի չաշխատելու համար իրեն կմեղադրեն, ինչն, ինքնին, վկայում է այն մասին, որ Արթուր Շահնազարյանը գիտակցել է իր արարքի այն փաստական հանգամանքները, որոնք հանցակազմի հատկանիշ են, և այդ արարքը կատարելը եղել է նրա նպատակը կամ նպատակին հասնելու միջոցը:
Բացի այդ, թիվ ՀԿԴ/0036/01/22 քրեական գործով 2023 թվականի նոյեմբերի 17-ի դատական նիստի ձայնային արձանագրության բովանդակությունից պարզ է դառնում, որ Արթուր Շահնազարյանի ցուցմունքների հակասությունների պարզաբանմանն ուղղված նախագահող դատավորի հարցերը եղել են պարզ, մատչելի, կրկնվել են մի քանի անգամ, և բուն հարցադրումները չեն պարունակել բարդ իրավաբանական տերմինոլոգիա։
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև այն, որ Արթուր Լևոնի Շահնազարյանն ամուսնացած է, նրա խնամքին են 3 անչափահաս երեխաներ, և հանցանքը կատարելուն նախորդող 12 ամիսների ընթացքում եկամուտ չի ստացել։

4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի ապրիլի 22-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Արթուր Լևոնի Շահնազարյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ դատապարտված մեղադրյալի կատարած արարքի նկատմամբ ենթակա է կիրառման ՀՀ քրեական օրենսգրքի 476 հոդվածի 2-րդ մասի 3-րդ կետը։
4.2 Հաստատված փաստական հանգամանքների հիման վրա Դատարանն արձանագրում է, որ Արթուր Լևոնի Շահնազարյանի պատասխանատվությունն ու պատիժը մեղմացնող՝ ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքի տակ երեք անչափահաս երեխաների առկայությունը:
Դատարանն արձանագրում է, որ Արթուր Լևոնի Շահնազարյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքի համար մեղադրյալ Արթուր Լևոնի Շահնազարյանը ենթակա է պատժի։
4.4 Պատժի տեսակն ու չափը որոշելիս՝ Դատարանը հաշվի է առնում հետևյալը՝
-Արթուր Լևոնի Շահնազարյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է միջին ծանրության հանցագործությունների շարքին։
-Արթուր Լևոնի Շահնազարյանի անձը բնութագրող տվյալները, պատասխանատվությունը և պատիժը մեղմացնող հանգամանքների առկայությունն ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Արթուր Լևոնի Շահնազարյանի կողմից ՀՀ քրեական օրենսգրքի 476 հոդվածի 2-րդ մասի 3-րդ կետով կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է քսանհինգապատիկի չափով տուգանքը:
Հիմք ընդունելով ՀՀ քրեական օրենսգրքի 59 հոդվածի 5-րդ մասը, ինչպես նաև հանցանքը կատարելուն նախորդող 12 ամիսների ընթացքում Արթուր Լևոնի Շահնազարյանի եկամտի վերաբերյալ տվյալների բացակայությունը՝ տուգանքի չափը պետք է հաշվարկել հանցանքը կատարելու պահին՝ 2023 թվականի նոյեմբերի 17-ին ՀՀ նվազագույն աշխատավարձի՝ 75.000 (յոթանասունհինգ հազար) ՀՀ դրամի չափով:
Այսպիսով, Դատարանը գտնում է, որ ՀՀ քրեական օրենսգրքի 476 հոդվածի 2-րդ մասի 3-րդ կետով նախատեսված հանցանքի կատարման համար Արթուր Լևոնի Շահնազարյանի նկատմամբ որպես պատիժ պետք է նշանակել տուգանք՝ հանցանքը կատարելու պահին նվազագույն աշխատավարձի քսանհինգապատիկի՝ 1.875.000 (մեկ միլիոն ութ հարյուր յոթանասունհինգ հազար) ՀՀ դրամի չափով։
Միևնույն ժամանակ Դատարանն արձանագրում է, որ կատարած հանցանքի համար Արթուր Լևոնի Շահնազարյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
4.5 Արթուր Լևոնի Շահնազարյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.6 Հիմք ընդունելով ՀՀ քրեական օրենսգրքի 59 հոդվածի 8-րդ մասը, նշանակվող տուգանքի չափը, ինչպես նաև հաշվի առնելով տուգանքի վճարման համար ժամկետ սահմանելու մասին Արթուր Շահնազարյանի խնդրանքը՝ Դատարանը գտնում է, որ նշանակված տուգանքի վճարման ժամկետ պետք է սահմանել առավելագույնը՝ 1 (մեկ) տարի:
4.7 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.8 Արթուր Լևոնի Շահնազարյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.9 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Արթուր Լևոնի Շահնազարյանին մեղավոր ճանաչել ՀՀ քրեական օրենսգրքի 476 հոդվածի 2-րդ մասի 3-րդ կետով նախատեսված հանցանքը կատարելու մեջ, և նրա նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի քսանհինգապատիկի՝ 1.875.000 (մեկ միլիոն ութ հարյուր յոթանասունհինգ հազար) ՀՀ դրամի չափով:
2. Նշանակված տուգանքի վճարման ժամկետ սահմանել առավելագույնը՝ 1 (մեկ) տարի:
3. Արթուր Շահնազարյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
4. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ


(1)Ծնված՝ 1987 թվականի մարտի 26-ին, Արարատի մարզի Արմաշ համայնքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երեք անչափահաս երեխա, նախկինում չդատապարտված, հաշվառված է և բնակվում է Երևան քաղաքի Ֆրունզեի փողոցի 10 շենքի թիվ 29 բնակարանում, որպես խափանման միջոց է կիրառված բացակայելու արգելքը:
(2)Տե՛ս, քրեական գործ, հատոր 1, թերթեր 41-42:
(3)Տե՛ս, քրեական գործ, հատոր 1, թերթեր 47-50:
(4)Տե՛ս, քրեական գործ, հատոր 1, թերթեր 51-54:
(5)2.5-2.7 կետերի վերաբերյալ տե՛ս Դատարանում ստեղծված նյութերը: