ԵԴ1/3332/01/24






Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«10» մարտի 2025 թվական քաղաք Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

ՆԱԽԱԳԱՀՈՒԹՅԱՄԲ` ԴԱՏԱՎՈՐ ՎԱՀԵ ՋԻՎԱՆՅԱՆԻ
ՔԱՐՏՈՒՂԱՐՈՒԹՅԱՄԲ` ԳՈՀԱՐ ԽԱՉԱՏՐՅԱՆԻ
ՄԱՍՆԱԿՑՈՒԹՅԱՄԲ`
ՀԱՆՐԱՅԻՆ ՄԵՂԱԴՐՈՂ ԵՍԱՅԻ ԱԲՈՎՅԱՆԻ
ՄԵՂԱԴՐՅԱԼ ԳԱԳԻԿ ՊԵՏՐՈՍՅԱՆԻ

«Աջափնյակ 1» նստավայրում, դռնբաց դատական նիստում քննեց քրեական գործն ըստ մեղադրանքի Գագիկ Սարգսի Պետրոսյանի՝ ՀՀ քրեական օրենսգրքի 344-րդ հոդվածի 1-ին մասով (3 դրվագով) և 344-րդ հոդվածի 2-րդ մասով (ծնված՝ 01․01․1977 թվականին՝ Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, չդատված, չի աշխատում, հաշվառված՝ քաղաք Երևան, Ավան Առինջ 1-ին միկրոշրջան, 2/8 -րդ շենք, 6-րդ բնակարան, բնակվող՝ քաղաք Երևան, Նոր Նորք, Ամառանոցային 19-րդ տուն հասցեում, որպես խափանման միջոց է կիրառվել բացակայելու արգելքը)։

1. Նկարագրական մաս.

2023 թվականի նոյեմբերի 16-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 1-ին մասով նախաձեռնվել է թիվ 60-0792-23 քրեական վարույթը։
2023 թվականի նոյեմբերի 28-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 1-ին մասով նախաձեռնվել է թիվ 60-0987-23 քրեական վարույթը, որը միացվել է թիվ 60-0792-23 քրեական վարույթին։
2024 թվականի ապրիլի 19-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 2-րդ մասով նախաձեռնվել են թիվ 60-1450-24 և 60-1457-24 քրեական վարույթները, որոնք միացվել են թիվ 60-0792-23 քրեական վարույթին։
2024 թվականի հոկտեմբերի 25-ին Գագիկ Սարգսի Պետրոսյանի նկատմամբ ՀՀ քրեական օրենսգրքի 344-րդ հոդվածի 1-ին մասով, 344-րդ հոդվածի 1-ին մասով, 344-րդ հոդվածի 1-ին մասով և 344-րդ հոդվածի 2-րդ մասով հարուցվել է հանրային քրեական հետապնդում։
2024 թվականի հոկտեմբերի 29-ին Գագիկ Սարգսի Պետրոսյանի նկատմամբ որպես այլընտրանքային խափանման միջոց է կիրառվել բացակայելու արգելքը։
2024 թվականի նոյեմբերի 14-ին մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան են մուտքագրվել թիվ 60079223 քրեական վարույթի նյութերը։
2024 թվականի նոյեմբերի 15-ին քրեական գործը թիվ ԵԴ1/3332/01/24 համարի ներքո հանձնվել է դատավոր Վ․Ջիվանյանին, որով 2024 թվականի նոյեմբերի 18-ին ստանձնվել է վարույթ և նշանակվել նախնական դատալսումներ։
2025 թվականի փետրվարի 11-ին ավարտվել են հիմնական դատալսումները և Գագիկ Սարգսի Պետրոսյանի նկատմամբ կայացվել է մեղադրական վերդիկտ` Գագիկ Սարգսի Պետրոսյանը մեղավոր է ճանաչվել ՀՀ քրեական օրենսգրքի 344-րդ հոդվածի 1-ին մասով (3 դրվագ) և 344-րդ հոդվածի 2-րդ մասով նախատեսված հանցագործությունների կատարման մեջ, նույն օրն իրականացվել են լրացուցիչ դատալսումներ։

1.1. Մեղադրանքի փաստական նկարագրություն.
Գագիկ Սարգսի Պետրոսյանի նկատմամբ հանրային քրեական հետապնդում է հարուցվել այն արարքի համար, որ նա, ՀՀ ՆԳՆ ոստիկանության պարեկային ծառայության աշխատակցի կողմից կայացված թիվ 8180166984 որոշմամբ 1 տարի ժամկետով զրկված լինելով տրանսպորտային միջոցներ վարելու իրավունքից, 2023 թվականի ապրիլի 05-ին՝ ժամը 16:10-ի սահմաններում, Երևան քաղաքի «Լամբադա» կամուրջի տակ վարել է «Մերսեդես» մակնիշի 48 WW 048 հաշվառման համարանիշի ավտոմեքենան, ինչի վերաբերյալ պարեկային ծառայության աշխատակցի կողմից կազմվել է վարչական իրավախախտման մասին թիվ 8180252037 արձանագրությունը:
Բացի այդ, Գագիկ Պետրոսյանը ՀՀ ՆԳՆ ոստիկանության պարեկային ծառայության աշխատակցի կողմից կայացված թիվ 8180166984 որոշմամբ 1 տարի ժամկետով զրկված լինելով տրանսպորտային միջոցներ վարելու իրավունքից, 2023 թվականի սեպտեմբերի 09-ին՝ ժամը 12:25-ի սահմաններում, Երևան քաղաքի Մյասնիկյան պողոտայում վարել է «Մերսեդես» մակնիշի 48 WW 048 հաշվառման համարանիշի ավտոմեքենան, ինչի վերաբերյալ պարեկային ծառայության աշխատակցի կողմից կազմվել է վարչական իրավախախտման մասին թիվ 8180259983 արձանագրությունը:
Բացի այդ, Գագիկ Պետրոսյանը ՀՀ ՆԳՆ ոստիկանության պարեկային ծառայության աշխատակցի կողմից կայացված թիվ 8180166984 որոշմամբ 1 տարի ժամկետով զրկված լինելով տրանսպորտային միջոցներ վարելու իրավունքից, 2023 թվականի նույնիբերի 14-ին՝ ժամը 21:00-ի սահմաններում, Երևան քաղաքի Թևոսյան փողոցում վարել է «Մերսեդես» մակնիշի 500 QQ 02 հաշվառման համարանիշի ավտոմեքենան, ինչի վերաբերյալ պարեկային ծառայության աշխատակցի կողմից կազմվել է վարչական իրավախախտման մասին թիվ 8180261725 արձանագրությունը:
Ինչպես նաև, Գագիկ Պետրոսյանը, տրանսպորտային միջոցներ վարելու իրավունքից ՀՀ ՆԳՆ ոստիկանության պարեկային ծառայության աշխատակցի կողմից կայացված թիվ 8180166984 որոշմամբ 1 տարի ժամկետով զրկված լինելով և գտնվելով հարբած (ոչ սթափ) վիճակում, ալկոհոլի պարունակությունը արտաշնչած օդում 0,687 մգ/լ, 2023 թվականի նոյեմբերի 27-ին՝ ժամը 00:40-ի սահմաններում Երևան քաղաքի Թևոսյան փողոցում վարել է «Մերսեդես» մակնիշի 48 WW 048 հաշվառման համարանիշի ավտոմեքենան, ինչի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180265415 արձանագրությունը:

1.2. Դատաքննության ընթացքում հետազոտված թույլատրելի ապացույցներ.
Դատաքննությամբ հետազոտվել են հետևյալ ապացույցները՝
1.2.1. Մեղադրյալ Գագիկ Սարգսի Պետրոսյանը, պատասխանելով հանրային մեղադրողի հարցերին հայտնեց, որ իրեն առաջադրված մեղադրանքի էությունը հասկանալի է, ընդունում է այն։ Հիշողության հետ մի փոքր խնդիրներ ունի և լավ չի հիշում, թե երբ է զրկվել վարորդական իրավունքից։
Դատարանի հարցերին պատասխանելով հայտնեց, որ տրանսպորտային միջոց վարելու իրավունքից զրկելու պահին իրենից վարորդական վկայականը չեն վերցրել, այլ ասել են, որ գնա ճանապարհային ոստիկանություն, որտեղից էլ նրանց տված թղթի հիման վրա վերցրել է պլաստիկը։ Ներկայացված մեղադրանքի հետ համաձայն է, արարքներն ինքն է կատարել։

1.2.2. Վարչական իրավախախտման վերաբերյալ թիվ 8180252037 արձանագրությունը, որի համաձայն՝ 05․04․2023թ.-ին՝ ժամը 16։10-ին, Երևան քաղաքի Լամբադա կամրջի տակ տրանսպորտային միջոցներ վարելու իրավունքից զրկված անձը վարել է տրանսպորտային միջոց։
/տե՛ս դատական նիստի արձանագրությունը, հատոր 1՝ գ/թ 3/

1.2.3. ՀՀ ճանապարհային ոստիկանության էլեկտրոնային ռեգիստրից արտատպված քաղվածքի պատճենը, որի համաձայն՝ Գագիկ Սարգսի Պետրոսյանի վարորդական վկայականի կարգավիճակը նշված է «Զրկված», զրկման սկիզբը՝ 08․12․2022թ․, ավարտը՝ 08․12․2023թ․։
/տե՛ս դատական նիստի արձանագրությունը, հատոր 1՝ գ/թ 4/

1.2.4. Վարչական իրավախախտման վերաբերյալ թիվ 8180166984 արձանագրությունը, որի համաձայն՝ 19․11․2022թ.-ին՝ ժամը 23։10-ին, Երևան քաղաքի Պարոնյան փողոցում անձը տրանսպորտային միջոցը վարել է ոչ սթափ վիճակում։
/տե՛ս դատական նիստի արձանագրությունը, հատոր 1՝ գ/թ 5/

1.2.5. Վարչական իրավախախտման վերաբերյալ թիվ 8180259983 արձանագրությունը, որի համաձայն՝ 09․09․2023թ.-ին՝ ժամը 12։25-ին, Երևան քաղաքի Մյասնիկյան Պողոտայում տրանսպորտային միջոցներ վարելու իրավունքից զրկված անձը վարել է տրանսպորտային միջոց։
/տե՛ս դատական նիստի արձանագրությունը, հատոր 1՝ գ/թ 13/

1.2.6. Անձի սթափության վիճակի զննության արձանագրությունը, որի համաձայն՝ Գագիկ Սարգսի Պետրոսյանի 1 լիտր արտաշնչած օդի մեջ ալկոհոլի պարունակությունը կազմել է 0,687 մգ/լ:
/տե՛ս դատական նիստի արձանագրությունը, հատոր 1, գ/թ 32/

1.2.7. Վարչական իրավախախտման վերաբերյալ թիվ 8180265415 արձանագրությունը, որի համաձայն՝ 27․11․2023թ.-ին՝ ժամը 00։40-ին, Երևան քաղաքի Թևոսյան փողոցում տրանսպորտային միջոցներ վարելու իրավունքից զրկված անձը տրանսպորտային միջոցը վարել է ոչ սթափ վիճակում։
/տե՛ս դատական նիստի արձանագրությունը, հատոր 1՝ գ/թ 33/

1.2.8. ՀՀ ՆԳՆ էլեկտրոնային ռեգիստրից արտատպված քաղվածքի պատճենը, որի համաձայն՝ Գագիկ Սարգսի Պետրոսյանի վարորդական վկայականի կարգավիճակը 03․11․2021 թվականից 03․05․2022 թվականը կասեցվել է բալային համակարգի կողմից։
/տե՛ս դատական նիստի արձանագրությունը, հատոր 1՝ գ/թ 75/

1.2.9. ՀՀ ՔԿ Երևան քաղաքի քննչական վարչության Արաբկիր վարչական շրջանի քննչական բաժնի գրությունը, որով հանձնարարվել է ՀՀ ոստիկանության «Ճանապարհային ոստիկանություն» ծառայությանը և պարեկային ծառայությանը տրամադրել «Alcovisor Jupiter X/RP» մոդելի 91100997 գործարանային համարի սարքի 27․11․2023թ․ դրությամբ ստուգաչափման ուժի մեջ գտնված և չափման տիրույթը 0․0000-2․0000մգ/լ հաստատված վկայականի պատճենը։
/տե՛ս դատական նիստի արձանագրությունը, հատոր 1՝ գ/թ 76/

1.2.10. Թիվ 102355 ստուգաչափման վկայականը, համաձայն որի 91100997 գործարանային համարի Jupiter X/RP տեսակի ալկոտեստերն ուժի մեջ է 2023 թվականի հուլիսի 21-ից մինչև 2024 թվականի հուլիսի 21-ը, չափման տիրույթը 0,000-2,000 մգ/լ է։
/տե՛ս դատական նիստի արձանագրությունը, հատոր 1՝ գ/թ 86/

1.2.11. Զննություն կատարելու մասին արձանագրությունը, համաձայն որի․
1. Վարչական իրավախախտման գործով թիվ 8180252037 որոշման պատճենի զննությամբ պարզվել է, որ 05.04.2023թ.՝ ժամը 16:15-ին, ՀՀ ոստիկանության պարեկային ծառայության 3-րդ գումարտակի 1-ին վաշտի պարեկ Արսեն Սուրենի Հովհաննիսյանը /05234/ Գագիկ Սարգսի Պտրոսյանի նկատմամբ կազմել է վարչական իրավախախտման վերաբերյալ արձանագրություն, ըստ որի Գագիկ Պետրոսյանը «Մերսեդես» մակնիշի 48 WW 048 հաշվառման համարանիշի տրանսպորտային միջոցը նույն օրը՝ ժամը 16:10-ին, Երևան քաղաքի «Լամբադա» կամրջի տակ վարել է տրանսպորտային միջոցներ վարելու իրավունքից զրկված պայմաններում:
2. Վարչական իրավախախտման գործով թիվ 8180166984 արձանագրության և որոշման պատճենի զննությամբ պարզվեց, որ 19.11.2022թ.՝ ժամը 23:24-ին Երևան քաղաքի գնդի 1 գումարտակի 3 վաշտի պարեկ Նորիկ Ասքանազի Մանուկյանը /09334/ Գագիկ Սարգսի Պետրոսյանի վերաբերյալ կազմել է վարչական իրավախախտման վերավբբերյալ արձանագրություն, առ այն, որ վերջինս Տոյոտա մակնիշի 34 UF 343 հաշվառման համարանիշի ավտոմեքենան նույն օրը՝ ժամը 23:1:0-ին վարել է Երևան քաղաքի Պարոնյան փողոցում, գտնվել է ոչ սթափ վիճակում, որի վերաբերյալ կատարվել է սթափության զննում, սարքի համար՝ 91100905, իսկ նույն վարչական իրավախախտման գործով թիվ 8180166984 որոշմամբ՝ 25.11.20222թ. որոշում է կայացվել Գագիկ Սարգսի Պետրոսյանին տրանսպորտային միջոցներ վարելու իրավունքից մեկ տարի ժամկետով զրկելու մասին, իսկ նշված որոշման և արձանագրության ներքևի ձախ հատվածում առկա է 25.11.2022թ.՝ ժ.12:00 որոշումը ստանալու վերաբերյալ ժամանակահատված:
3. Վարչական իրավախախտման գործով թիվ 8180259983 որոշման պատճենի զննությամբ պարզվել է, որ 09.09.2023թ.՝ ժամը 12:30-ին, ՀՀ ոստիկանության պարեկային ծառայության 2-րդ գումարտակի 2-րդ վաշտի պարեկ Եղիշե Մանվելի Ալեքսանյանը /07413/ Գագիկ Սարգսի Պտրոսյանի նկատմամբ կազմել է վարչական իրավախախտման վերաբերյալ արձանագրություն, ըստ որի Գագիկ Պետրոսյանը «Մերսեդես» մակնիշի 48 WW 048 հաշվառման համարանիշի տրանսպորտային միջոցը նույն օրը՝ ժամը 12:25-ին Երևան քաղաքի Մյասնիկյան պողոտայում:
4. Վարչական իրավախախտման գործով թիվ 8180265415 որոշման պատճենի զննությամբ պարզվել է, որ 27.11.2023թ.՝ ժամը 00:55-ին, ՀՀ ոստիկանության պարեկային ծառայության 1 գումարտակի 3 վաշտի պարեկ Էդիկ Վլադիկի Առաքելյանը /02275/ Գագիկ Սարգսի Պտրոսյանի նկատմամբ կազմել է վարչական իրավախախտման վերաբերյալ արձանագրություն, ըստ որի Գագիկ Պետրոսյանը «Մերսեդես» մակնիշի 48 WW 048 հաշվառման համարանիշի տրանսպորտային միջոցը նույն օրը՝ ժամը 00:40-ին վարել է Երևան քաղաքի Թևոսյան փողոցում գտնվելով ոչ սթափ վիճակում:
5. Ալկոհոլի պարունակության ստուգման կտրոնի պատճենի զննությամբ պարզվեց, որ սարքի համարն է 91100997, զննման համարը՝ 02949, զննման ամսաթիվը՝ 27.11.2023, ստուգումը կատարվել է ավտոմատ, ժամը 00:52:03-ին, ալկոհոլի պարունակությունը՝ 0.687 մգ/լ, վարորդի անունը՝ Գագիկ, ազգանունը՝ Պետրոսյան, տրանսպորտային միջոցի համարանիշը՝ 48 WW 048, ՃՈ տեսուչի ազգանունը՝ Սերոբյան, կրծքանշանի համար 02949, ստորաբաժանում՝ 1 գումարտակի 3 վաշտ:
6. Վարչական իրավախախտման գործով թիվ 8180261725 որոշման պատճենի զննությամբ պարզվել է, որ 14.11.2023թ.՝ ժամը 21:07-ին, ՀՀ ոստիկանության պարեկային ծառայության 3-րդ գումարտակի 2-րդ վաշտի պարեկ Հունան Ալբերտի Գզիրյանը /01341/ Գագիկ Սարգսի Պտրոսյանի նկատմամբ կազմել է վարչական իրավախախտման վերաբերյալ արձանագրություն, ըստ որի Գագիկ Պետրոսյանը «Մերսեդես» մակնիշի 500 QO 02 հաշվառման համարանիշի տրանսպորտային միջոցը նույն օրը՝ ժամը 21:00-ին Երևան քաղաքի Թևոսյան փողոցում:
/տե՛ս դատական նիստի արձանագրությունը, հատոր 1՝ գ/թ 77-78/

1.2.12. Արտավարութային փաստաթուղթ ճանաչելու մասին որոշումը, որի համաձայն՝ Գագիկ Սարգսի Պետրոսյանի վերաբերյալ վարչական իրավախախտման թիվ 8180252037, թիվ 8180166984, թիվ 8180259983, թիվ 8180265415, թիվ 8180261725 արձանագրությունների և որոշումների, սթափության զննման թիվ 02949 կտրոնի, ինչպես նաև Ճանապարհային ոստիկանության էլեկտրոնային ռեգիստրից արտատպված փաստաթղթի պատճենները ճանաչվել են արտավարութային փաստաթուղթ։
/տե՛ս դատական նիստի արձանագրությունը, հատոր 1՝ գ/թ 79-80/

Լրացուցիչ դատալսումներում Դատարանը հետազոտել է նաև հետևյալ ապացույցները.

1.2.13. ՀՀ ոստիկանության ինֆորմացիոն կենտրոնի կողմից տրված ձև 8 տեղեկանքը, դատվածության և հետախուզման առկայության հարցման վերաբերյալ ստացված ձև 8 և ձև 9 պատասխանները, Կոտայքի մարզի առաջին ատյանի ընդհանուր իրավասության դատարանի 18․09․2024թ․ թիվ ԿԴ/0797/01/24 դատավճիռը, համաձայն որոնց՝ Գագիկ Սարգսի Պետրոսյանը Կոտայքի մարզի առաջին ատյանի ընդհանուր իրավասության դատարանի 18․09․2024թ․ թիվ ԿԴ/0797/01/24 դատավճռով ՀՀ քրեական օրենսգրքի 344-րդ հոդվածի 2-րդ մասով դատապարտվել է 375․000 ՀՀ դրամ տուգանքի։
/Տե՛ս դատական նիստի արձանագրությունը և հատոր 1՝ գ/թ 81/

1․2․14․ ՀՀ ԱՆ պրոբացիայի ծառայությունից ստացված տեղեկանքը, համաձայն որի Գագիկ Սարգսի Պետրոսյանի նկատմամբ Կոտայքի մարզի առաջին ատյանի ընդհանուր իրավասության դատարանի 18․09․2024թ․ թիվ ԿԴ/0797/01/24 դատավճռով դատավճռով նշանակված 375․000 ՀՀ դրամ տուգանքից առ 22․02․2025թ․ վճարում չի կատարվել։
/Տե՛ս դատական նիստի արձանագրությունը/

1․2․15․ Քաղաքացիական կացության ակտերի գրանցման տվյալների շտեմարանի քաղվածքը, համաձայն որի՝ Գագիկ Սարգսի Պետրոսյանի վերաբերյալ տեղեկություններ չկան։
/Տե՛ս դատական նիստի արձանագրությունը/

1․2․16․ Պետական եկամուտների կոմիտեի տվյալների շտեմարանի քաղվածքը, համաձայն որի՝ հարցվող ժամանակահատվածում Գագիկ Սարգսի Պետրոսյանի եկամուտների վերաբերյալ տեղեկատվություն առկա չէ։
/Տե՛ս դատական նիստի արձանագրությունը/

1․2․17․ «Նաիրի» և «Իզմիրլյան» բժշկական կենտրոններից տրված փաստաթղթերը, համաձայն որոնց Գագիկ Պետրոսյանի մոտ ախտորոշված է զարկերակային հիպերտենզիա /անամնեզում/, վահանաձև գեղձի հանգույց (TIRADS 4):
/Տե՛ս դատական նիստի արձանագրությունը/

1.3. Դատարանի փաստական վերլուծությունները և հաստատված կամ հերքված փաստական հանգամանքները.
Դատարանը, պատշաճ իրավական ընթացակարգի շրջանակներում հետազոտելով սույն գործով ձեռք բերված ապացույցները և դրանք գնահատելով վերաբերելիության, արժանահավատության, իսկ ամբողջ ապացույցներն իրենց համակցությամբ՝ գործի լուծման համար բավարարության տեսանկյունից, եզրահանգում է․ հաստատված է, որ մեղադրյալ Գագիկ Սարգսի Պետրոսյանը, տրանսպորտային միջոցներ վարելու իրավունքից զրկված վիճակում՝
- 2023 թվականի ապրիլի 05-ին՝ ժամը 16:10-ի սահմաններում, Երևան քաղաքի «Լամբադա» կամրջի տակ վարել է «Մերսեդես» մակնիշի 48 WW 048 հաշվառման համարանիշի ավտոմեքենան,
- 2023 թվականի սեպտեմբերի 09-ին՝ ժամը 12:25-ի սահմաններում, Երևան քաղաքի Մյասնիկյան պողոտայում վարել է «Մերսեդես» մակնիշի 48 WW 048 հաշվառման համարանիշի ավտոմեքենան,
- 2023 թվականի նոյեմբերի 14-ին՝ ժամը 21:00-ի սահմաններում, Երևան քաղաքի Թևոսյան փողոցում վարել է «Մերսեդես» մակնիշի 500 QQ 02 հաշվառման համարանիշի ավտոմեքենան,
- 2023 թվականի նոյեմբերի 27-ին՝ ժամը 00:40-ի սահմաններում, հարբած (ոչ սթափ) վիճակում Երևան քաղաքի Թևոսյան փողոցում վարել է «Մերսեդես» մակնիշի 48 WW 048 հաշվառման համարանիշի ավտոմեքենան։
Մասնավորապես՝ մեղադրյալն իր ցուցմունքով նշել է, որ տեղեկացված է եղել տրանսպորտային միջոցներ վարելու իրավունքից զրկված լինելու մասին և մեղադրանքում նշված օրերին և ժամերին վարել է տրանսպորտային միջոց, վարչական իրավախախտման վերաբերյալ արձանագրություններով արձանագրվել է մեղադրանքում նշված ժամանակահատվածներում մեղադրյալի կողմից տրանսպորտային միջոց վարելը, ՀՀ ոստիկանության ճանապարհային ոստիկանության էլեկտրոնային ռեգիստրի հաշվառման շտեմարանից արտատպված քաղվածքով արձանագրվել է մեղադրյալի՝ տրանսպորտային միջոց վարելու իրավունքից զրկված լինելը, սթափության վիճակի զննման կտրոնով արձանագրվել է 2023 թվականի նոյեմբերի 27-ին՝ ժամը 00:40-ի սահմաններում ոչ սթափ վիճակում գտնվելը։
Դատարանը հաստատված է համարում նաև, որ Գագիկ Սարգսի Պետրոսյանը չի վիճարկել առաջադրված մեղադրանքը։

2. Պատճառաբանական մաս.

2.1. Քննարկելով մեղադրյալ Գագիկ Պետրոսյանին առաջադրված մեղադրանքի փաստակազմը հաստատված լինելու հանգամանքը և դրա իրավաբանական որակումը՝ Դատարանը պետք է պատասխանի հետևյալ հարցերին.
ա) ապացուցված են արդյոք մեղադրյալին վերագրվող փաստական հանգամանքները (արարքը).
բ) ապացուցված է արդյոք այդ արարքի քրեական հակաիրավականությունը.
գ) ապացուցված է արդյոք մեղադրյալի կողմից այդ արարքը կատարելը.
դ) ապացուցված է արդյոք մեղադրյալի մեղավորությունը տվյալ արարքը կատարելու մեջ.
ե) դատապարտված մեղադրյալի արարքի նկատմամբ քրեական օրենսգրքի որ հոդվածը, հոդվածի մասը կամ կետն է ենթակա կիրառման։
2.1.1. Անդրադառնալով «ա» կետով բարձրացված հարցին՝ Դատարանն անհրաժեշտ է համարում նշել հետևյալը.
Դատարանը գտնում է, որ հետազոտված ապացույցներով հաստատվել է, որ մեղադրյալ Գագիկ Պետրոսյանը կատարել է առաջադրված մեղադրանքում նրան վերագրված փաստական հանգամանքները։
2.1.2. Անդրադառնալով «բ» կետով բարձրացված հարցին՝ Դատարանն անհրաժեշտ է համարում նշել հետևյալը․
ՀՀ քրեական օրենսգրքի 344-րդ հոդվածի 1-ին մասի համաձայն՝
«1. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը՝
(…)
2. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված կամ տրանսպորտային միջոց վարելու իրավունք չունեցող անձի կողմից հարբած (ոչ սթափ) վիճակում տրանսպորտային միջոց վարելը կամ այդ անձի կողմից սթափության վիճակի զննություն անցնելուց հրաժարվելը կամ խուսափելը`
(…)»:
Նշված հանցակազմի օբյեկտը երթևեկության անվտանգության և տրանսպորտի շահագործումն ապահովող հասարակական հարաբերություններն են, օբյեկտիվ կողմը՝ տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը: Սուբյեկտիվ կողմից դրսևորվում է ուղղակի դիտավորությամբ, իսկ սուբյեկտը 16 տարին լրացած անձն է։
Հաստատված փաստական հանգամանքները համապատասխանում են բերված հանցակազմերի հատկանիշներին, հետևաբար ապացուցված է արարքների քրեական հակաիրավականությունը։
2.1.3. Անդրադառնալով «գ» կետով բարձրացված հարցին՝ Դատարանն անհրաժեշտ է համարում նշել հետևյալը.
Հետազոտված ապացույցներով՝ մեղադրյալի ցուցմունքով, վարչական իրավախախտումների վերաբերյալ թիվ 8180252037, 8180259983, 8180265415 և 8180261725 արձանագրություններով հաստատվել է, որ մեղադրյալ Գագիկ Պետրոսյանին վերագրված արարքները կատարվել են նրա կողմից։
2.1.3. Անդրադառնալով «դ» կետով բարձրացված հարցին՝ Դատարանն անհրաժեշտ է համարում նշել հետևյալը.
Քննարկվող հանցակազմի սուբյեկտիվ կողմը դրսևորվում է ուղղակի դիտավորությամբ։ Այսինքն՝ հանցավորը գիտակցում է, որ տրանսպորտային միջոցը վարում է տրանսպորտային միջոցներ վարելու իրավունքից զրկված կամ կասեցված լինելու կամ տրանսպորտային միջոց վարելու իրավունք չունենալու պայմաններում, ինչպես նաև՝ ոչ սթափ վիճակում։ Տվյալ դեպքում մեղադրյալի ցուցմունքով, ՀՀ ճանապարհային ոստիկանության էլեկտրոնային ռեգիստրից արտատպված քաղվածքով հաստատվել է, որ նա գիտակցել է, որ զրկված լինելով տրանսպորտային միջոցներ վարելու իրավունքից՝ վարել է տրանսպորտային միջոց, հետևապես հաստատվել է դատապարտված մեղադրյալ Գագիկ Պետրոսյանի մեղքը նրան վերագրված արարքների կատարման մեջ։
2.1.4. Անդրադառնալով «ե» կետով բարձրացված հարցին՝ Դատարանն անհրաժեշտ է համարում նշել հետևյալը.
Սույն գործի դատաքննությամբ պատշաճ իրավական ընթացակարգի շրջանակներում ապացուցված փաստական հանգամանքները համապատասխանում են ՀՀ քրեական օրենսգրքի 344-րդ հոդվածի 1-ին և 2-րդ մասերում նկարագրված դիսպոզիցիաներին։
2.2. ՀՀ քրեական օրենսգրքի 344-րդ հոդվածի 1-ին մասի սանկցիայով պատիժ է նախատեսվում տուգանք` առավելագույնը տասնապատիկի չափով, կամ հանրային աշխատանքներ` առավելագույնը հարյուր ժամ տևողությամբ, կամ կարճաժամկետ ազատազրկում՝ առավելագույնը մեկ ամիս ժամկետով: ՀՀ քրեական օրենսգրքի 344-րդ հոդվածի 2-րդ մասի սանկցիայով պատիժ է նախատեսվում տուգանք` առավելագույնը քսանապատիկի չափով, կամ հանրային աշխատանքներ՝ ութսունից հարյուր հիսուն ժամ տևողությամբ, կամ կարճաժամկետ ազատազրկում՝ մեկից երկու ամիս ժամկետով, կամ ազատազրկում՝ առավելագույնը երկու տարի ժամկետով:
Դատարանը գտնում է, որ անհրաժեշտ է անդրադառնալ դատապարտված մեղադրյալ Գագիկ Սարգսի Պետրոսյանի նկատմամբ պատիժ նշանակելու հետ կապված հետևյալ հարցերին.
ա) ապացուցված են արդյո՞ք Գագիկ Սարգսի Պետրոսյանի պատասխանատվությունը և պատիժը մեղմացնող կամ ծանրացնող հանգամանքները.
բ) Գագիկ Սարգսի Պետրոսյանը ենթակա է արդյո՞ք պատժի իր կատարած հանցանքների համար.
գ) ի՞նչ պատիժ պետք է նշանակվի Գագիկ Սարգսի Պետրոսյանի նկատմամբ.
դ) Գագիկ Սարգսի Պետրոսյանն արդյո՞ք պետք է կրի իր նկատմամբ նշանակված պատիժը.
2.2.1. Անդրադառնալով «ա» կետով բարձրացված հարցին՝ Դատարանն անհրաժեշտ է համարում նշել հետևյալը.
ՀՀ քրեական օրենսգրքի 69-րդ հոդվածի 2-րդ մասի համաձայն՝
«Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:»:
ՀՀ քրեական օրենսգրքի 70-րդ հոդվածի համաձայն՝
«1. Քրեական պատասխանատվությունը կամ պատիժը մեղմացնող հանգամանքներ են՝
(․․․)
10) հանցանք կատարած անձի մեղայականով ներկայանալը, հանցագործությունը, հանցագործության այլ մասնակցին բացահայտելուն, հանցագործությամբ ձեռք բերված գույքը որոնելուն, գործով ապացույց ձեռք բերելուն աջակցելը,
(․․․)
2. Պատիժ նշանակելիս դատարանը կարող է հաշվի առնել նաև սույն հոդվածի 1-ին մասով չնախատեսված մեղմացնող այլ հանգամանքներ:
3. Եթե սույն հոդվածի 1-ին մասում նշված որևէ հանգամանք սույն օրենսգրքի Հատուկ մասի համապատասխան հոդվածով նախատեսված է որպես հանցագործության հատկանիշ, ապա դա չի կարող կրկին հաշվի առնվել որպես քրեական պատասխանատվությունը կամ պատիժը մեղմացնող հանգամանք:»:
Տվյալ դեպքում Դատարանը, հիմք ընդունելով ՀՀ քրեական օրենսգրքի 70-րդ հոդվածի 1-ին մասի 10-րդ կետը՝ որպես Գագիկ Սարգսի Պետրոսյանի պատիժը մեղմացնող հանգամանք է դիտարկում խոստովանական ցուցմունքներ տալը։ Բացի այդ, Դատարանը հաշվի է առնում նաև առաջադրված մեղադրանքում իրեն ամբողջությամբ մեղավոր ճանաչելը և զղջալը (տե՛ս Սերոբ Սարգսյանի գործով Վճռաբեկ դատարանի՝ 2012 թվականի նոյեմբերի 1-ի թիվ ՍԴ/0109/01/12 որոշում):
2.2.2. Անդրադառնալով «բ» կետով բարձրացված հարցին՝ Դատարանն արձանագրում է, որ սույն քրեական գործով մեղադրյալ Գագիկ Սարգսի Պետրոսյանին պատժից ազատելու հիմքեր առկա չեն, հետևաբար նա ենթակա է պատժի՝ իր կողմից կատարած հանցանքների համար։
2.2.3. Անդրադառնալով «գ» կետով բարձրացված իրավական հարցին՝ Դատարանն անհրաժեշտ է համարում նշել հետևյալը.
ՀՀ քրեական օրենսգրքի 7-րդ հոդվածի 1-ին մասի համաձայն՝
«1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»:
ՀՀ քրեական օրենսգրքի 55-րդ հոդվածի 2-րդ մասի համաձայն՝
«Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»։
ՀՀ քրեական օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
(…):»:
Պատիժ նշանակելու ընդհանուր սկզբունքներին ՀՀ վճռաբեկ դատարանն անդրադարձել է Նարեկ Սարգսյանի վերաբերյալ 2011 թվականի դեկտեմբերի 22-ի թիվ ԵԿԴ/0042/01/11 գործով կայացված որոշման մեջ, որտեղ իրավական դիրքորոշում է ձևավորել այն մասին, որ «(...) [Պ]ատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են՝
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) [Պ]ատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն»։
ՀՀ վճռաբեկ դատարանը Արարատ Ավագի Ավագյանի և Վահան Սերյոժայի Սահակյանի վերաբերյալ քրեական գործով արտահայտել է նաև հետևյալ իրավական դիրքորոշումը. «(…) նշանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին (…): Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա: (…) Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա։ (…)
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով: Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս: Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն: (…)»: (տե՛ս Արարատ Ավագի Ավագյանի և Վահան Սերյոժայի Սահակյանի գործով Վճռաբեկ դատարանի 2009 թվականի փետրվարի 17-ի թիվ ԵԿԴ/0252/01/13 որոշման 39-րդ կետը)։
Անդրադառնալով արարքի բնույթն ու հանրային վտանգավորության աստիճանը գնահատելու հարցերին ՀՀ վճռաբեկ դատարանը Գ.Մադաթյանի վերաբերյալ քրեական գործով որոշմամբ արտահայտել է հետևյալ իրավական դիրքորոշումները. «(…) Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ: Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը: (…) Արարքի հանրային վտանգավորության բնույթի որոշման հարցում Վճռաբեկ դատարանը կարևորում է խախտված քրեաիրավական նորմով պաշտպանվող հասարակական հարաբերության սոցիալական նշանակությունը: Վճռաբեկ դատարանը գտնում է, որ պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը: (…)» (տե՛ս Գարուշ Մադաթյանի գործով Վճռաբեկ դատարանի 2009 թվականի փետրվարի 17-ի թիվ ԵՇԴ/0029/01/08 որոշման 14-15-րդ կետերը):
Վերը մեջբերված իրավական նորմերում և դիրքորոշումներում սահմանված չափանիշների համատեքստում անդրադառնալով Գագիկ Սարգսի Պետրոսյանի նկատմամբ պատժի տեսակը և չափը որոշելուն՝ Դատարանը հիմք է ընդունում հետևյալ հանգամանքները.
- մեղադրյալ Գագիկ Սարգսի Պետրոսյանի կողմից ՀՀ քրեական օրենսգրքի 344-րդ հոդվածի 1-ին մասով (3 դրվագով) և 344-րդ հոդվածի 2-րդ մասով կատարված հանցագործությունների բնույթը և հանրության համար վտանգավորության աստիճանը, մասնավորապես այն, որ նրան մեղսագրված են երթևեկության անվտանգության և տրանսպորտի շահագործման սահմանված կարգի դեմ ուղղված ոչ մեծ ծանրության դիտավորյալ հանցագործություններ,
- հանցանքը կատարելուց հետո մեղադրյալի դրսևորած վարքագիծը՝ խոստովանել է իր կողմից կատարած իրավախախտումները,
- նրա անձը բնութագրող հանգամանքները, մասնավորապես այն, որ հանցանքը կատարելու պահին դատված չի եղել, ունի առողջական խնդիրներ, ինչպես նաև պատասխանատվությունը և պատիժը մեղմացնող սույն դատավճռի 2.2.1 կետում նշված հանգամանքները և ծանրացնող հանգամանքների բացակայությունը:
Այսպիսով՝ Դատարանը, հաշվի առնելով վերոգրյալ հանգամանքները, գտնում է, որ մեղադրյալ Գագիկ Պետրոսյանի նկատմամբ ՀՀ քրեական օրենսգրքի 344-րդ հոդվածի 1-ին մասով՝ յուրաքանչյուր դրվագով պետք է նշանակել նրան վերագրվող հոդվածի սանկցիայով նախատեսված տուգանք` հանցանքի պահին սահմանված նվազագույն աշխատավարձի վեցապատիկի չափով, իսկ ՀՀ քրեական օրենսգրքի 344-րդ հոդվածի 2-րդ մասով՝ հոդվածի սանկցիայով նախատեսված տուգանք պատժատեսակը` հանցանքի պահին սահմանված նվազագույն աշխատավարձի յոթապատիկի չափով։
ՀՀ քրեական օրենսգրքի 59-րդ հոդվածի համաձայն՝
«1. Տուգանքը դրամական տուժանք է, որը նշանակվում է սույն օրենսգրքով նախատեսված դեպքերում և չափերով:
(...)
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(...)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
7. Տուգանքի նշանակման հնարավորությունը և չափը դատարանը որոշում է՝ հաշվի առնելով հանցագործության ծանրությունը, հանցագործությամբ պատճառված վնասի բնույթն ու չափը, հանցագործությամբ ստացված գույքային կամ ոչ գույքային բնույթի օգուտները, դատապարտվողի ու նրա ընտանիքի գույքային դրությունը, ինչպես նաև դատապարտվողի՝ եկամուտ ստանալու հնարավորությունը կամ նրան պատկանող այնպիսի գույքի առկայությունը, որի վրա կարող է բռնագանձում տարածվել։
(․․․)»։
«Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն՝
«Հայաստանի Հանրապետությունում նվազագույն ամսական աշխատավարձը սահմանել 75000 դրամ»։
Հաշվի առնելով այն հանգամանքը, որ Գագիկ Սարգսի Պետրոսյանի՝ հանցանքներն ավարտվելու օրվան նախորդող 12 ամիսների ընթացքում ստացած միջին ամսական եկամտի վերաբերյալ տեղեկություն առկա չէ, ուստի Դատարանը գտնում է, որ Գագիկ Սարգսի Պետրոսյանի նկատմամբ տուգանք պատժատեսակի չափը հաշվարկելիս որպես ելակետ պետք է ընդունել նրա կողմից հանցանքները կատարելու պահին գործող Հայաստանի Հանրապետությունում սահմանված նվազագույն աշխատավարձի չափը, այսինքն՝ 75.000 (յոթանասունհինգ հազար) ՀՀ դրամը։ Նշված պայմաններում նրա նկատմամբ տուգանքի ձևով նշանակվելիք պատժաչափը ՀՀ քրեական օրենսգրքի 344-րդ հոդվածի 1-ին մասով կազմում է 450․000 (չորս հարյուր հիսուն հազար) ՀՀ դրամ, ՀՀ քրեական օրենսգրքի 344-րդ հոդվածի 2-րդ մասով՝ 525․000 (հինգ հարյուր քսանհինգ հազար) ՀՀ դրամ:
ՀՀ քրեական օրենսգրքի 74-րդ հոդվածի 1-ին մասի համաձայն՝
«Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: (․․․)»։
Հիմք ընդունելով վերոգրյալը, Դատարանը գտնում է, որ հանցագործությունների համակցությամբ Գագիկ Պետրոսյանի նկատմամբ վերջնական պատիժ պետք է նշանակել պատիժները լրիվ գումարելու միջոցով՝ պատիժ սահմանելով տուգանք՝ 1․875․000 (մեկ միլիոն ութ հարյուր յոթանասունհինգ հազար) ՀՀ դրամի չափով։
Դատարանը միաժամանակ արձանագրում է, որ Գագիկ Սարգսի Պետրոսյանը Կոտայքի մարզի առաջին ատյանի ընդհանուր իրավասության դատարանի 18․09․2024թ․ թիվ ԿԴ/0797/01/24 դատավճռով մեղավոր է ճանաչվել ՀՀ քրեական օրենսգրքի 344-րդ հոդվածի 2-րդ մասով և նրա նկատմամբ պատիժ է նշանակվել տուգանք 375․000 ՀՀ դրամի չափով, որը չի վճարվել։ Այսինքն՝ Գագիկ Սարգսի Պետրոսյանն ունի չկրած պատիժ, ուստի մեղադրյալի նկատմամբ պատիժ նշանակելիս Դատարանը պետք է ղեկավարվի ՀՀ քրեական օրենսգրքի 74-րդ հոդվածի 11-րդ մասով, համաձայն որի՝ «Պատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը և պատժի կրման սկիզբ է համարվում առաջին դատավճռով նշանակված պատժի կրման սկիզբը:»։
Ելնելով վերոգրյալից՝ Դատարանը գտնում է, որ ՀՀ քրեական օրենսգրքի 74-րդ հոդվածի 11-րդ մասի կանոններով հանցանքների համակցությամբ նշանակված պատժին պետք է լրիվ գումարել Կոտայքի մարզի առաջին ատյանի ընդհանուր իրավասության դատարանի 18․09․2024թ․ թիվ ԿԴ/0797/01/24 դատավճռով նշանակված 375․000 (երեք հարյուր յոթանասունհինգ հազար) ՀՀ դրամ տուգանքը և Գագիկ Սարգսի Պետրոսյանի նկատմամբ վերջնական պատիժ նշանակել տուգանք՝ 2․250․000 (երկու միլիոն երկու հարյուր հիսուն հազար) ՀՀ դրամի չափով։

2.2.4. Անդրադառնալով «դ» կետով բարձրացված հարցին՝ Դատարանն արձանագրում է, որ Գագիկ Սարգսի Պետրոսյանը պետք է կրի իր նկատմամբ նշանակված պատիժը:
2.3. Նկատի ունենալով, որ սույն քրեական գործով գույքային հայցի, գույքի արգելադրման, վարութային ծախսերի, իրեղեն ապացույցների վերաբերյալ տվյալներ առկա չեն՝ Դատարանն այդ հարցերին չի անդրադառնում։
2.4. Դատարանը, ղեկավարվելով ՀՀ քրեական դատավարության օրենսգրքի 99-րդ հոդվածի կարգավորումներով, գտնում է, որ քրեական գործով ապացույցները պետք է թողնել քրեական գործի նյութերում։
2.5. Անդրադառնալով մեղադրյալ Գագիկ Սարգսի Պետրոսյանի նկատմամբ կիրառված խափանման միջոցին՝ բացակայելու արգելքին, Դատարանը գտնում է, որ այն պետք է թողնել անփոփոխ՝ մինչև դատավճռի օրինական ուժի մեջ մտնելը՝ մեղադրյալի պատշաճ վարքագիծն ապահովելու համար:
2.6. Սույն դատական ակտը կայացնելիս Դատարանը ղեկավարվում է ՀՀ քրեական դատավարության օրենսգրքի 33-րդ, 99-րդ, 276-րդ, 347-350-րդ հոդվածներով։

3. Եզրափակիչ մաս.
Ելնելով վերոգրյալից` Դատարանը

Վ Ճ Ռ Ե Ց

Մեղադրյալ Գագիկ Սարգսի Պետրոսյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով, 344-րդ հոդվածի 1-ին մասով, 344-րդ հոդվածի 1-ին մասով և 344-րդ հոդվածի 2-րդ մասով նախատեսված հանցանքների կատարման մեջ։
ՀՀ քրեական օրենսգրքի 344-րդ հոդվածի 1-ին մասով (1-ին դրվագ) նրա նկատմամբ նշանակել պատիժ՝ տուգանք՝ հանցանքը կատարելու պահին սահմանված նվազագույն աշխատավարձի վեցապատիկի չափով՝ 450.000 չորս հարյուր հիսուն հազար ՀՀ դրամ, ՀՀ քրեական օրենսգրքի 344-րդ հոդվածի 1-ին մասով (2-րդ դրվագ) նշանակել պատիժ՝ տուգանք՝ հանցանքը կատարելու պահին սահմանված նվազագույն աշխատավարձի վեցապատիկի չափով՝ 450.000 չորս հարյուր հիսուն հազար ՀՀ դրամ, ՀՀ քրեական օրենսգրքի 344-րդ հոդվածի 1-ին մասով (3-րդ դրվագ) նշանակել պատիժ՝ տուգանք՝ հանցանքը կատարելու պահին սահմանված նվազագույն աշխատավարձի վեցապատիկի չափով՝ 450.000 չորս հարյուր հիսուն հազար ՀՀ դրամ, ՀՀ քրեական օրենսգրքի 344-րդ հոդվածի 2-րդ մասով (4-րդ դրվագ) նշանակել պատիժ՝ տուգանք՝ հանցանքը կատարելու պահին սահմանված նվազագույն աշխատավարձի յոթապատիկի չափով՝ 525.000 հինգ հարյուր քսանհինգ հազար ՀՀ դրամ։
ՀՀ քրեական օրենսգրքի 74-րդ հոդվածի կանոններով հանցագործությունների համակցությամբ պատիժները լրիվ գումարելու միջոցով Գագիկ Սարգսի Պետրոսյանի նկատմամբ պատիժ նշանակել տուգանք՝ 1․875․000 (մեկ միլիոն ութ հարյուր յոթանասունհինգ հազար) ՀՀ դրամի չափով։
ՀՀ քրեական օրենսգրքի 74-րդ հոդվածի 11-րդ մասի կանոններով հանցանքների համակցությամբ նշանակված պատժին լրիվ գումարել Կոտայքի մարզի առաջին ատյանի ընդհանուր իրավասության դատարանի 2024 թվականի սեպտեմբերի 18-ի թիվ ԿԴ/0797/01/24 դատավճռով նշանակված 375․000 (երեք հարյուր յոթանասունհինգ հազար ՀՀ դրամ տուգանքը և Գագիկ Սարգսի Պետրոսյանի նկատմամբ վերջնական պատիժ նշանակել տուգանք՝ 2․250․000 (երկու միլիոն երկու հարյուր հիսուն հազար) ՀՀ դրամի չափով։
Գագիկ Սարգսի Պետրոսյանի նկատմամբ ընտրված խափանման միջոցը` բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Դատական ակտն ուժի մեջ մտնելուց հետո քրեական գործով ապացույցները թողնել քրեական գործի նյութերում։
Դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` դատական ակտն ստանալու օրվանից հետո՝ մեկամսյա ժամկետում:


ԴԱՏԱՎՈՐ ՎԱՀԵ ՋԻՎԱՆՅԱՆ