ԵԴ1/3345/01/24
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

13 հունվարի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան),

Նախագահությամբ՝ դատավոր Մ.Մելքոնյանի,
քարտուղարությամբ` Ա.Մանասյանի,
մասնակցությամբ`
մեղադրող Ե.Աբովյանի,
մեղադրյալ Գ.Ղանդիլյանի,

Դռնբաց դատական նիստում քննության առնելով քրեական գործն ըստ մեղադրանքի` Գևորգ Հենզելի Ղանդիլյանի (ծնված` 23.07.1986թ.-ին ՀՀ-ում, ազգությամբ հայ, ՀՀ քաղաքացի, բարձրագույն կրթությամբ, նախկինում չդատված, ամուսնացած, աշխատում է Գևորգ Ղանդիլյան ԱՁ-ում որպես տնօրեն, բնակվում է ք.Երևան, Քանաքեռ-Զեյթուն, Ռուբինյանց փ., 6 շ., 20 բն. հասցեում) ՀՀ քրեական օրենսգրքի 344-րդ հոդվածի 2-րդ մասով.

Պ Ա Ր Զ Ե Ց

1․ Քրեական գործի դատավարական նախապատմությունը․
1․1․ 2022 թվականի հոկտեմբերի 18-ին ՀՀ ՔԿ ԵՔՔՎ ՃՏՀ քննության բաժնի քննիչ Ա.Մանուկյանը կազմել է արձանագրություն ՀՀ քրեական օրենսգրքի 344-րդ հոդվածի 2-րդ մասով թիվ 60818122 քրեական վարույթը նախաձեռնելու մասին:
1.2. 2024 թվականի օգոստոսի 08-ին թիվ 60818122 քրեական վարույթի նախաքննությունը փոխանցվել է ՀՀ ՔԿ ԵՔՔՎ Արաբկիր վարչական շրջանի քննչական բաժին, իսկ 2024 թվականի հոկտեմբերի 04-ին նախաքննության կատարումը հանձնարարվել է նույն բաժնի ՀԿԳ քննիչ Ա.Համզոյանին:
1.3. 2024 թվականի հոկտեմբերի 23-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ե.Աբովյանը որոշում է կայացրել թիվ 60818122 քրեական վարույթով Գևորգ Հենզելի Ղանդիլյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հանրային քրեական հետապնդում հարուցելու մասին:
1.4. 2024 թվականի հոկտեմբերի 24-ին ՀՀ ՔԿ ԵՔՔՎ Արաբկիր վարչական շրջանի քննչական բաժնի ՀԿԳ քննիչ Արտյոմ Համզոյանը որոշում է կայացրել թիվ 60818122 քրեական վարույթով Գևորգ Հենզելի Ղանդիլյանի վերաբերյալ առկա վարչական իրավախախտման թիվ 8180120968 արձանագրության և որոշման, 062512 ստուգաչափման վկայականի, սթափության զննման թիվ 05640 կտրոնի, թիվ 8180159946 արձանագրության, ինչպես նաև ՃՈ-ի էլեկտրոնային ռեգիստրից ստացված քաղվածքի պատճենները որպես արտավարութային փաստաթուղթ ապացույց ճանաչելու մասին:
1.5. 2024 թվականի հոկտեմբերի 24-ին ՀՀ ՔԿ ԵՔՔՎ Արաբկիր վարչական շրջանի քննչական բաժնի ՀԿԳ քննիչ Արտյոմ Համզոյանը որոշում է կայացրել թիվ 60818122 քրեական վարույթով մեղադրյալ Գևորգ Հենզելի Ղանդիլյանի նկատմամբ որպես խափանման միջոց բացակայելու արգելքը կիրառելու մասին:
1.6. 2024 թվականի հոկտեմբերի 29-ին թիվ 60818122 քրեական վարույթը ուղարկվել է ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազություն՝ մեղադրական եզրակացությունը հաստատելու և քրեական վարույթը Երևան քաղաքի առաջին ատյանի ընդհանուր իրավասության քրեական դատարան ուղարկելու միջնորդությամբ:
1.7. 2024 թվականի հոկտեմբերի 31-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ե.Աբովյանը որոշում է կայացրել չհաստատել թիվ 60818122 քրեական վարույթով կազմված մեղադրական եզրակացությունը՝ վարույթի նյութերը վերադարձնելով նախաքննական մարմին՝ նախաքննությունը շարունակելու համար:
1.8. 2024 թվականի հոկտեմբերի 31-ին թիվ 60818122 քրեական վարույթով կազմվել է նոր մեղադրական եզրակացություն և ուղարկվել է ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազություն՝ մեղադրական եզրակացությունը հաստատելու և քրեական վարույթը Երևան քաղաքի առաջին ատյանի ընդհանուր իրավասության քրեական դատարան ուղարկելու միջնորդությամբ, իսկ 2024 թվականի նոյեմբերի 14-ին թիվ 60818122 քրեական վարույթը, հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարանում, որը ստանալով թիվ ԵԴ1/3345/01/24 դատական համարը, մակագրվել և ստացվել է նույն դատարանի դատավոր Մասիս Մելքոնյանի աշխատակազմում:
1.9. 2024 թվականի նոյեմբերի 15-ին Երևան քաղաքի առաջին ատյանի ընդհանուր իրավասության քրեական դատարանը որոշում է կայացրել թիվ ԵԴ1/3345/01/24 քրեական գործը վարույթ ընդունելու և նախնական դատալսումներ նշանակելու մասին:
2. Մեղադրանքի փաստական նկարագրությունը.
2024 թվականի հոկտեմբերի 23-ին ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ե.Աբովյանը որոշում է կայացրել թիվ 60818122 քրեական վարույթով Գևորգ Հենզելի Ղանդիլյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հանրային քրեական հետապնդում հարուցելու մասին այն բանի համար, որ նա տրանսպորտային միջոցներ վարելու իրավունքից ՀՀ ՆԳՆ ոստիկանության պարեկային ծառայության աշխատակցի կողմից կայացված թիվ 8180120968 որոշմամբ 2022 թվականի ապրիլի 07-ին 1 տարի ժամկետով զրկվել է, և նշված որոշման մասին ծանուցվել նույն օրը, ինչից հետո Գ.Ղանդիլյանը տրանսպորտային միջոցներ վարելու իրավունքից 1 տարի ժամկետով զրկված լինելով և գտնվելով հարբած (ոչ սթափ) վիճակում՝ ալկոհոլի պարունակությունը արտաշնչած օդում 0.918 մգ/լ, 2022 թվականի սեպտեմբերի 22-ին, ժամը' 01:55-ի սահմաններում, Երևան քաղաքի Բաբայան փողոցում վարել է «Մերսեդես» մակնիշի 77 TT 099 հաշվառման համարանիշի տրանսպորտային միջոցը, ինչի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180159946 արձանագրությունը:
3.Դատաքննության ընթացքում հետազոտված թույլատրելի ապացույցները.
2025 թվականի հունվարի 13-ին տեղի ունեցած դատական նիստում մեղադրյալ Գևորգ Հենզելի Ղանդիլյանը, օգտվելով իր իրավունքից, հրաժարվել է ցուցմունք տալուց:
Դատարանը, հաշվի առնելով այն հանգամանքը, որ մեղադրյալ Գևորգ Հենզելի Ղանդիլյանը, օգտվելով իր իրավունքից, հրաժարվել է ցուցմունք տալուց և հարցերին պատասխանելուց, որոշում է կայացրել հրապարակել մեղադրյալ Գևորգ Հենզելի Ղանդիլյանի նախաքննական ցուցմունքները:
(Դատական նիստի արձանագրություն՝ 13.01.2025թ.)
Նախաքննության ընթացքում որպես մեղադրյալ հարցաքննվելիս Գևորգ Հենզելի Ղանդիլյանը ցուցմունք է տվել այն մասին, որ առաջադրված մեղադրանքում ընդունում է իր մեղավորությունը, խնդրել է իր նկատմամբ մեղմ վարվել:
(Հատոր 1, Գ.Թ. 14-19, 41,42)
Զննություն կատարելու մասին արձանագրության համաձայն՝ 27.10.2024թ. զննության է ենթարկվել Գևորգ Հենզելի Ղանդիլյանի վերաբերյալ առկա վարչական իրավախախտման թիվ 8180120968 արձանագրության և որոշման, 062512 ստուգաչափման վկայականի, սթափության զննման թիվ 05640 կտրոնի, թիվ 8180159946 արձանագրության, ինչպես նաև ՃՈ-ի էլեկտրոնային ռեգիստրից ստացված քաղվածքի պատճենները:
(Հատոր 1, Գ.Թ. 40-41)
Արտավարութային փաստաթուղթ ճանաչելու մասին որոշման համաձայն՝ որպես արտավարութային փաստաթուղթ է ճանաչվել Գևորգ Հենզելի Ղանդիլյանի վերաբերյալ առկա վարչական իրավախախտման թիվ 8180120968 արձանագրությունը և որոշումը, 062512 ստուգաչափման վկայականը, սթափության զննման թիվ 05640 կտրոնը, թիվ 8180159946 արձանագրությունը, ինչպես նաև ՃՈ-ի էլեկտրոնային ռեգիստրից ստացված քաղվածքի պատճենները:
(Հատոր 1, Գ.Թ. 42-43)
4.Դատարանի իրավական վերլուծությունները.
4.1. Վերլուծելով մեղադրյալ Գևորգ Հենզելի Ղանդիլյանին ներկայացված մեղադրանքը և հիմնվելով հետազոտված թույլատրելի ապացույցների վրա` Դատարանը գտնում է, որ.
• ապացուցված է մեղադրյալ Գևորգ Հենզելի Ղանդիլյանին վերագրվող փաստական հանգամանքները, մասնավորապես՝ մեղադրյալ Գևորգ Հենզելի Ղանդիլյանի կողմից տրանսպորտային միջոցներ վարելու իրավունքից զրկված լինելով կրկին տրանսպորտային միջոց վարելու փաստը.
• ապացուցված է վերոգրյալ արարքի քրեական հակաիրավականությունը, որը նախատեսված է 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 2-րդ մասով.
• ապացուցված է մեղադրյալ Գևորգ Հենզելի Ղանդիլյանի կողմից 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 2-րդ մասով նախատեսված վերոգրյալ արարքները կատարելը.
• ապացուցված է մեղադրյալ Գևորգ Հենզելի Ղանդիլյանի մեղավորությունը 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 2-րդ մասով նախատեսված արարքները կատարելու մեջ:
4.2. Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
4.3. ՀՀ Սահմանադրության 71-րդ հոդվածի համաձայն՝ 1. Հանցանք կատարած անձի պատժի հիմքը նրա մեղքն է: 2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին:
4.4. ՀՀ քրեական օրենսգրքի 7-րդ հոդվածի 1-ին մասի համաձայն`
Հանցանք կատարած անձին քրեական պատասխանատվության «պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին հանցավորի անձնավորությանը:
4.5. ՀՀ քրեական օրենսգրքի 55-րդ հոդվածի 2-րդ մասի համաձայն՝
1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ: 2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
4.6. ՀՀ քրեական օրենսգրքի 69-րդ հոդվածի համաձայն`
Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները: 2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները: 4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ: Պատիժ նշանակելը քրեական գործով արդարադատության իրականացման վճռական պահն է, որը պետք է դառնա կատարված հանցանքի հասարակական վտանգավորության գնահատման լիարժեք չափանիշ, պատժի ենթարկվող անձին վերասոցիալականացնելու, ինչպես մեղադրյալի, այնպես էլ այլ անձանց կողմից հանցագործությունները կանխելու գործուն միջոց: Արդարության և պատասխանատվության անհատականացման սկզբունքը պատժի տեսակը և չափը որոշելու բազմաթիվ դրույթների ու չափանիշների հետ մեկտեղ անխզելիորեն կապված է պատասխանատվությունը և պատիժը մեղմացնող ու ծանրացնող հանգամանքները հետազոտելու և հաշվի առնելու հետ: ՀՀ քրեական դատավարության օրենսգրքի 102-րդ հոդվածում թվարկված են յուրաքանչյուր քրեական գործով ապացուցման ենթակա փաստական հանգամանքները: Այդ հոդվածի 5-րդ կետի համաձայն՝ քրեական օրենքով նախատեսված պատասխանատվությունը մեղմացնող կամ խստացնող հանգամանքները հաստատվում են միայն ապացույցների հիման վրա: Ընդ որում, անձի պատասխանատվությունը և պատիժը մեղմացնող ու ծանրացնող հանգամանքների գնահատումը յուրաքանչյուր կոնկրետ գործով պատիժ նշանակելիս հնարավորություն է տալիս դատարանին պատկերացում կազմել հանցանքի հանրության համար վտանգավորության աստիճանի, բնույթի, ինչպես նաև հանցավորի անձնավորության մասին և յուրաքանչյուր կոնկրետ գործով անհատականացնել պատիժը: Պատժի անհատականացման կարևորությունն այն է, որ դա լուրջ երաշխիք է ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակների իրականացման համար:
4.7. Վերոհիշյալ իրավադրույթների և ՀՀ վճռաբեկ դատարանի որոշումների համատեքստում, ուսումնասիրելով մեղադրյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մեղադրյալ Գևորգ Հենզելի Ղանդիլյանի նկատմամբ, նրա կատարած հանցանքի համար պատիժ նշանակելիս` Դատարանը հաշվի է առնում հանցանքի բնույթն ու հանրության համար վտանգավորության աստիճանը, հանցավորի անձը բնութագրող հանգամանքները, այն, որ նա դատվածություն չունի:
4.8. Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալի պատասխանատվությունը և պատիժը մեղմացնող հանգամանք, հաշվի է առնում այն, որ նա ներկայացված մեղադրանքում իրեն լիովին մեղավոր է ճանաչել և տվել է խոստովանական ցուցմունք:
Մեղադրյալի պատասխանատվությունն ու պատիժը ծանրացնող հանգամանքներ Դատարանը չի արձանագրում:
4.9. Դատարանը, քննարկելով մեղադրյալ Գևորգ Հենզելի Ղանդիլյանի նկատմամբ պատժի նշանակման հարցը, գտնում է, որ մեղադրյալ Գևորգ Հենզելի Ղանդիլյանի նկատմամբ անհրաժեշտ է տուգանքի չափ նշանակել նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով, որով կապահովվի ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը, ավելին՝ այն անհրաժեշտ և բավարար է սոցիալական արդարությունը վերականգնելու, պատժի ենթարկված անձին վերասոցիալականացնելու և հանցագործությունները կանխելու համար: Միևնույն ժամանակ, հաշվի առնելով մեղադրյալի գույքային դրությունը՝ դատարանը գտնում է, Գևորգ Հենզելի Ղանդիլյանի նկատմամբ նշանակված տուգանքի` 375.000 (երեք հարյուր յոթանասունհինգ հազար) ՀՀ դրամ գումարի վճարումը պետք է տարաժամկետել, դրա վճարման ժամկետ սահմանել 12 (տասներկու) ամիս:
4.10. ՀՀ քրեական դատավարության 348-րդ հոդվածի համաձայն դատավճռում պետք է շարադրվեն նաև հետևյալ հարցերի պատասխանները.
• գույքային հայցը ենթակա է արդյոք բավարարման, ում օգտին և ինչ չափով, ինչպես նաև պատճառված գույքային վնասը ենթակա է արդյոք հատուցման, եթե գույքային հայց չի հարուցվել.
• որ գույքն է ենթակա բռնագրավման, ինչ չափով և ինչպիսի հիմքով,
վերացվելու է արդյոք կիրառված գույքի արգելադրումը, իսկ եթե այդպիսին կիրառված չէ, ապա ենթակա է արդյոք կիրառման,
• ինչպես պետք է պահպանվեն և տնօրինվեն ապացույցները,
• դատապարտված մեղադրյալի նկատմամբ վերացվելու, փոխվելու կամ կիրառվելու է արդյոք որևէ խափանման միջոց.
• ում վրա և ինչ չափով պետք է դրվեն վարութային ծախսերը։
4.11. Քննարկելով մեղադրյալի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
4.12. Նկատի ունենալով, որ սույն քրեական գործով գույքային հայց, գույք բռնագրավելու անհրաժեշտություն, արգելադրված գույք, վարույթային ծախսերի վերաբերյալ հարցեր առկա չեն, Դատարանը այդ հարցերին չի անդրադառնում:
4.13. Քննարկելով որպես արտավարութային փաստաթուղթ ապացույց ճանաչված Գևորգ Հենզելի Ղանդիլյանի վերաբերյալ առկա վարչական իրավախախտման թիվ 8180120968 արձանագրության և որոշման, 062512 ստուգաչափման վկայականի, սթափության զննման թիվ 05640 կտրոնի, թիվ 8180159946 արձանագրության, ինչպես նաև ՃՈ-ի էլեկտրոնային ռեգիստրից ստացված քաղվածքի պատճենների պահպանության հարցը՝ Դատարանը գտնում է, որ դատավճիռն օրինական ուժի մեջ մտնելուց հետո դրանք պետք է թողնել կցված քրեական գործի նյութերի հետ:
Ելնելով վերոգրյալից և ղեկավարվելով Հայաստանի Հանրապետության քրեական դատավարության օրենսգրքի 30-31-րդ, 100-րդ, 167-րդ, 347-350-րդ, 352-353-րդ, 364-րդ հոդվածներով, Դատարանը`

Վ Ճ Ռ Ե Ց

1. Մեղադրյալ Գևորգ Հենզելի Ղանդիլյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված արարք կատարելու համար:
2. ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման համար Գևորգ Հենզելի Ղանդիլյանի նկատմամբ պատիժ նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
3. Գևորգ Հենզելի Ղանդիլյանին թույլատրել դատավճռով նշանակված 375.000 (երեք հարյուր յոթանասունհինգ հազար)ՀՀ դրամի չափով տուգանքը վճարել մաս առ մաս՝ 12 (տասներկու) ամիս ժամկետում:
4. Գևորգ Հենզելի Ղանդիլյանի նկատմամբ որպես խափանման միջոց ընտրված բացակայելու արգելքը թողնել անփոփոխ մինչև սույն դատավճռի օրինական ուժի մեջ մտնելը:
5. Դատավճիռն օրինական ուժի մեջ մտնելուց հետո արտավարութային փաստաթուղթ ճանաչված ապացույցները թողնել կցված քրեական գործի նյութերին:
6. Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալուց հետո մեկամսյա ժամկետում:

ԴԱՏԱՎՈՐ ՄԱՍԻՍ ՄԵԼՔՈՆՅԱՆ