Գործ ԵԴ1/3307/01/24




Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈւՆԻՑ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂ ԴԱՏԱՎՈՐ` Վ.Լ.ԳՐԻԳՈՐՅԱՆԻ,
ՔԱՐՏՈՒՂԱՐՈՒԹՅԱՄԲ` Լ.ՊՐԱԶՅԱՆԻ,
Մասնակցությամբ`
ՄԵՂԱԴՐՈՂ` Մ.ՀԱԿՈԲՅԱՆԻ,
ՊԱՇՏՊԱՆ՝ Ա.ՀՈՎՀԱՆՆԻՍՅԱՆԻ,
ԹԱՐԳՄԱՆԻՉ՝ Ա.ՀԱՄԲԱՐՁՈՒՄՅԱՆԻ,
ՄԵՂԱԴՐՅԱԼ` Ա.Խ.ՄԱՐՏԻՆԵՍԻ,

2025 թվականի հուլիսի 29-ին Երևան քաղաքում` դռնբաց դատական նիստում, քննության առնելով քրեական գործն ըստ մեղադրանքի`
Անգել Խուլիո Մարտինեսի` ծնված 27.12.2000թ., Դոմինիկյան Հանրապետության քաղաքացի, ըստ իր հայտարարության՝ ամուսնացած, խնամքին մեկ անչափահաս երեխա, չի աշխատում, նախկինում չդատված, միջնակարգ կրթությամբ, բնակվել է Դոմինիկյան Հանրապետությունում: Սույն գործով անազատության մեջ է գտնվում 02.08.2024թ-ից: Մեղադրվում է ՀՀ քրեական օրենսգրքի 393-րդ հոդվածի 3-րդ մասի 2-րդ կետով և ՀՀ քրեական օրենսգրքի 399-րդ հոդվածի 3-րդ մասի 2-րդ կետով:

Պ Ա Ր Զ Ե Ց

Գործի դատավարական նախապատմությունը.
2024 թվականի օգոստոսի 02-ին, ժամը՝ 05:50-ին Անգել Խուլիո Մարտինեսը ձերբակալվել է:
Նույն օրը ՀՀ ՔԿ տնտեսական հանցագործությունների և մաքսանենգությունների քննության երրորդ վարչությունում ՀՀ քրեական օրենսգրքի 393-րդ հոդվածի 1-ին մասի և 399-րդ հոդվածի 1-ին մասի հատկանիշներով նախաձեռնվել է թիվ 84105924 քրեական վարույթը:
2024 թվականի օգոստոսի 02-ին որոշում է կայացվել հանցանք կատարած լինելու անմիջականորեն ծագած հիմնավոր կասկածի հիմքով Անգել Խուլիո Մարտինեսին ձերբակալելու մասին:
2024 թվականի օգոստոսի 03-ի ՀՀ գլխավոր դատախազության բնակչության առողջության դեմ ուղղված հանցագործությունների գործերով վարչության ավագ դատախազ Վ.Ղազարյանի որոշմամբ Անգել Խուլիո Մարտինեսի նկատմամբ ՀՀ քրեական օրենսգրքի 393-րդ հոդվածի 3-րդ մասի 2-րդ կետով և 399-րդ հոդվածի 3-րդ մասի 2-րդ կետով հարուցվել է հանրային քրեական հետապնդում այն արարքների կատարման համար, որ նա իրացնելու նպատակով ձեռք է բերել և պահել առանձնապես խոշոր չափերով «կոկաին» տեսակի թմրանիջոց, ինչպես նաև կատարել է Քաթարի Պետությունից Եվրասիական տնտեսական միության մաքսային սահմանով և ՀՀ պետական սահմանով առանձնապես խոշոր չափերով «կոկաին» տեսակի թմրամիջոցի մաքսանենգություն:
Այսպես.
Մարտինես Անգել Հուլիոն, քննությամբ չպարզված հանգամանանքներում և ինքնությունը դեռևս չպարզված անձից ՀՀ-ում իրացնելու նպատակով ապօրինի ձեռք է բերել ՀՀ կառավարության 2018 թվականի հունիսի 27-ի թիվ 707 որոշման 1-ին հավելվածով նախատեսված առանձնապես խոշոր չափերով՝ ընդհանուր 2899,78 գրամ քաշով «Կոկաին» տեսակի թմրամիջոց, որից հետո իր ճամպրուկի մեջ գտնվող ֆոտոխցիկի պատյանում և դյուրակիր համակարգչի պատյանում թաքցված վիճակում Քաթարի մայրաքաղաք Դոհայից՝ Դոհա-Երևան (QR285) չվերթով, Եվրասիական տնտեսական միության մաքսային սահմանով և ՀՀ պետական սահմանով մաքսանենգությամբ՝ մաքսային հսկողությունից թաքցնելու և դրա տեղափոխման համար սահմանված արգելքը խախտելու եղանակով 2024 թվականի օգոստոսի 2-ին, ժամը՝ 01:55-ին, Հայաստանի Հանրապետության պետական սահմանով ապօրինի տեղափոխել է Հայաստանի Հանրապետություն, որտեղ թաքցված թմրամիջոցի փաթեթները հայտնաբերվել են Հայաստանի Հանրապետության պետական եկամուտների կոմիտեի մաքսանենգության դեմ պայքարի վարչության աշխատակիցների կողմից «Զվարթնոց» օդանավակայանի ուղևորների ժամանման սրահի մաքսային հսկողության գոտում 2024 թվականի օգոստոսի 2-ին՝ ժամը 02:30-05:50-ն ընկած ժամանակահատվածում իրականացված մաքսային զննման ընթացքում:
2024 թվականի օգոստոսի 04-ին Երևան քաղաքի առաջին ատյանի ընդհանուր իրավասության քրեական դատարանի որոշմամբ մեղադրյալ Անգել Խուլիո Մարտինեսի նկատմամբ որպես խափանման միջոց է կիրառվել կալանքը 2 (երկու) ամիս ժամկետով, որի սկիզբը հաշվվել է 2024 թվականի օգոստոսի 02-ից:
2024 թվականի օգոստոսի 28-ի որոշմամբ մաքսային զննման /տեսազննման/ թիվ 75 ակտը, մաքսանենգության դեպքի վերաբերյալ ՄԿԽԴ-318 արձանագրությունը, Անգել Խուլիո Մարտինես Դոմինիկյան Հանրապետության քաղաքացու RD8325971 սերիա-համարի անձնագիրը և Անգել Խուլիո Մարտինեսի վերաբերյալ ՀՀ ՍԷԿՏ համակարգում առկա տեղեկատվությունը, որպես արտավարութային փաստաթուղթ, ճանաչվել են ապացույց:
2024 թվականի սեպտեմբերի 09-ի որոշմամբ ընդհանուր 2899,68 գրամ քաշով «կոկաին» տեսակի թմրամիջոցը ճանաչվել է որպես իրեղեն ապացույց:
2024 թվականի սեպտեմբերի 16-ի որոշմամբ Անգել Խուլիո Մարտինեսի մոտ հայտնաբերված Dell գրառմամբ դյուրակիր համակարգչի համար նախատեսված պայուսակը և RG-Ruggard գրառմամբ ֆոտոխցիկի համար նախատեսված պայուսակը ճանաչվել են որպես իրեղեն ապացույց:
2024 թվականի սեպտեմբերի 30-ի Երևան քաղաքի առաջին ատյանի ընդհանուր իրավասության քրեական դատարանի որոշմամբ մեղադրյալ Անգել Խուլիո Մարտինեսի նկատմամբ որպես խափանման միջոց կիրառված կալանքի ժամկետը երկարաձգվել է 2 (երկու) ամիս ժամկետով՝ մինչև 2024 թվականի դեկտեմբերի 02-ը:
2024 թվականի հոկտեմբերի 30-ի որոշմամբ Անգել Խուլիո Մարտինեսի կողմից օգտագործվող «SAMSUNG GALAXY A03 CORE» մոդելի բջջային հեռախոսում առկա և թվային խուզարկությամբ արտատպված երկխոսությունները, ավիատոմսը, թվով երեք նստեցման կտրոնները, Գրանդ Ֆորտուն հյուրանոցի ամրագրման փաստաթուղթը, ուղևորների վերաբերյալ փաստաթուղթը, Բլուր Ին Գալիրեա Հոթել հյուրանոցի ամրագրման փասթաթուղթը, և Դոմինիկյան Հանրապետության զինանշանով REPUBLICA DOMINICANA MIGRATION գրառմամբ փաստաթուղթը, որպես արտավարութային փաստաթուղթ, ճանաչվել են ապացույց:
2024 թվականի հոկտեմբերի 30-ին ՀՀ ՔԿ տնտեսական հանցագործությունների և մաքսանենգությունների քննության երրորդ վարչությունում ՀՀ քրեական օրենսգրքի 46-393-րդ հոդվածի 3-րդ մասի 2-րդ կետի և 46-399-րդ հոդվածի 3-րդ մասի 2-րդ կետի հատկանիշներով նախաձեռնվել է թիվ 84138924 քրեական վարույթը:
2024 թվականի նոյեմբերի 13-ին թիվ 84105924 քրեական վարույթը՝ հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարանում, որին շնորհվել է թիվ ԵԴ1/3307/01/24 դատական համարը:

Դատաքննությամբ հետազոտված թույլատրելի ապացույցները.
Մեղադրյալ Անգել Խուլիո Մարտինեսը հիմնական դատալսումների ընթացքում ցուցմունք տվեց այն մասին, որ առանց աշխատանքի էր մնացել, այս ծառայությունը մատուցել է գումար ստանալու համար: Քանի որ այդ ամեն ինչը ծրագրավորած է եղել այս երկիր մուտք գործելու միջոցով, լավ չի հիշել այն երկրի անունը, ու պետք է տաներ:
Պատասխանելով պաշտպանի հարցերին, հայտնեց, որ տեղեկացված է եղել, որ համակարգչի և լուսանկարչական սարքի պայուսակների մեջ եղել է թմրամիջոց, տեղյակ է եղել, որ 3 կգ է: Դրա դիմաց պետք է ստանար 10.000 ԱՄՆ դոլար, որն իրեն պետք է տրվեր թմրամիջոցը հանձնելուց հետո: Իրեն ասել էին, որ պետք է այստեղ մի փոքր հանգստանա, այլ ավիատոմս պետք է գներ, այդ թմրամիջոցը պետք է տաներ այլ երկիր, երկրի անունը չի հիշում, բայց իր հեռախոսում տվյալները կան: Զղջում է և գիտակցում է իր արածը:
Պատասխանելով մեղադրողի հարցերին, հայտնեց, որ իրեն թմրամիջոցը փոխանցած անձի մասին մեծ տեղեկատվություն չունի, կապը եղել է հեռախոսակապի միջոցով, նրա անունը Պեդրո է: Պեդրոն իրեն վստահում էր, այդ պատճառով առաջարկն իրեն է կատարել: Նախկինում թմրամիջոցների հետ կապ չի ունեցել, Դոմինիկյան Հանրապետությունում է իրեն հանձնվել թմրամիջոցը, ինքը Դոմինիկյան Հանրապետությունից մեկնել է Իսպանիա, հետո՝ Դոհա, հետո՝ Հայաստան: Հեռախոսային խոսակցություններով նույն Պեդրոն է իրեն ուղղորդում: Եթե Հայաստանում չբռնվեր, ապա ինքը Պեդրոի ցուցումով շարունակելու էր ճանապարհը:
Պատասխանելով Դատարանի հարցին, հայտնեց, որ Թուրքիա պետք է գնար:
/29.07.2025թ. դատական նիստերի արձանագրություն/
Արտավարութային փաստաթուղթ ապացույց ճանաչված՝ ՀՀ ՊԵԿ ՄԴՊ վարչության աշխատակիցների կողմից 02.08.2024թ. կազմված մաքսային զննման /մաքսային տեսազննման/ թիվ 75 ակտով և դրա զննման արձանագրության համաձայն՝ 2024 թվականի օգոստոսի 2-ին Զվարթնոց օդանավակայանի ուղևորների ժամանման սրահի մաքսային հսկողության գոտում Դոհա-Երևան (QR285) չվերթի ուղևոր Մարտինես Անգել Հուլիոն (Martinez Angel Julio) ընտրել է երկուղի համակարգի «կանաչ ուղի» ընթացակարգը։ ՀՀ ՊԵԿ ԷԱՕՏԻՓՎ ՈՒՄՍՀ բաժնի մաքսային տեսուչի կողմից վերջինս ուղեկցվել է «կարմիր ուղի»: Հայտարարագրման, ինչպես նաև արգելքների և սահմանափակումների ենթակա ապրանքների վերաբերյալ հիմնավոր կասկածներ ունենալով՝ մաքսային զննման /տեսազննում/ են ենթարկվել Մարտինես Անգել Հուլիոյին (Martinez Angel Julio) պատկանող ճամպրուկները՝ ներառյալ ձեռքի ուղեբեռը: Մաքսային հսկողության արդյունքում Մարտինես Անգել Հուլիոյին (Martinez Angel Julio) պատկանող ճամպրուկի մեջ գտնվող ֆոտոապարատի պատյանի պատերը հաստ են թվացել ՀՀ ՊԵԿ ԷԱՕՏԻՓՎ-ի ՈՒՄՍՀ բաժնի մաքսային տեսուչին, ուստի բացվել են պատյանների պատերը, որտեղ տեսախցիկի պատյանից հայտնաբերվել են 2 հատ, իսկ դյուրակիր համակարգչի պատյանից՝ 1 հատ, ընդհանուր 3 հատ փաթեթ՝ 3,052 կգ բրուտտո քաշով։ Փաթեթներում առկա է եղել սպիտակ փոշիանման զանգված, որոնք թաքցվել են մաքսային հսկողությունից` փաթեթավորված ինքնակպչուն ժապավենով:
/հատոր 1, Գ.Թ. 6-9, 100-102, 128-131/
Արտավարութային փաստաթուղթ ապացույց ճանաչված՝ ՀՀ ՊԵԿ ՄԴՊ վարչության աշխատակիցների կողմից 02.08.2024թ. կազմված մաքսանենգության դեպքի վերաբերյալ թիվ ՄԿԽԴ-318 արձանագրության և դրա զննման արձանագրության համաձայն՝ 2024 թվականի օգոստոսի 2-ին Զվարթնոց օդանավակայանի ուղևորների ժամանման սրահի մաքսային հսկողության գոտում Դոհա-Երևան (QR285) չվերթի ուղևոր՝ Մարտինես Անգել Հուլիոն (Martinez Angel Julio) ընտրել է երկուղի համակարգի «կանաչ ուղի» ընթացակարգը: ՀՀ ՊԵԿ ԷԱՕՏԻՓՎ-ի ՈՒՄՍՀ բաժնի մաքսային տեսուչի կողմից վերջինս ուղեկցվել է «կարմիր ուղի»: Հայտարարագրման, ինչպես նաև արգելքների և սահմանափակումների ենթակա ապրանքների վերաբերյալ հիմնավոր կասկածներ ունենալով` մաքսային զննման /տեսազննում/ են ենթարկվել Մարտինես Անգել Հուլիոյին (Martinez Angel Julio) պատկանող ճամպրուկը՝ ներառյալ ձեռքի ուղեբեռը: Մաքսային հսկողության արդյունքում Մարտինես Անգել Հուլիոյինի (Martinez Angel Julio) պատկանող ճամպրուկի մեջ գտնվող ֆոտոապարատի պատյանի պատերը հաստ են թվացել ՀՀ ՊԵԿ ԷԱՕՏԻՓՎ-ի ՈՒՄՍՀ բաժնի մաքսային տեսուչին, ուստի բացվել են պատյանների պատերը, որտեղ տեսախցիկի պատյանից հայտնաբերվել են 2 փաթե, իսկ դյուրակիր համակարգչի պատյանից՝ 1 փաթեթ, ընդհանուր 3 հատ փաթեթ՝ 3,052 կգ բրուտտո քաշով: Փաթեթներում առկա է եղել սպիտակ փոշենման զանգված, որոնք թաքցվել են մաքսային հսկողությունից` փաթեթավորված ինքնակպչուն ժապավենով:
Հայտանբերված վերոնշյալ 3 փաթեթներում առկա ընդանուր 3,052 կգ քաշով կոկաին տեսակի թմրամիջոցին նմանվող զանգվածները փաթեթավորվել են թվով 1 փաթեթում և կնիքվել թիվ RA716555 համարի մետաղական կնիքով, ֆոտոապարատի պատյանը կնիքվել է թիվ RA 716556 կինքով, իսկ համակարգչի պատյանը կնիքվել է թիվ RA 716557 կնիքով:
/հատոր 1, Գ.Թ. 10-12, 100-102, 128-131/
Արտավարութային փաստաթուղթ ապացույց ճանաչված՝ Մարտինես Անգել Հուլիոյի վերաբերյալ ՀՀ ՍԷԿՏ համակարգում առկա տեղեկատվության և դրա զննման արձանագրության համաձայն՝ Մարտինես Անգել Հուլիոյի Դոմինիկայի Հանրապետության քաղաքացու RD8325971 սերիա-համարի անձնագրով 02.08.2024թ-ին ժամը 01:55-ին Դոհա-Երևան թիվ 285 չվերթով ժամանել է Հայաստանի Հանրապետություն և ՀՀ պետական սահմանը հատել է ժամը 01:55-ին, այդպիսով մուտք գործելով ՀՀ: Բացի վերը նշված գրառումից այլ գրառում առկա չէր: Հետևաբար Մարտինես Անգել Հուլիոն ՀՀ է ժամանել առաջին անգամ:
/հատոր 1, Գ.Թ. 46-50, 104, 128-131/
Արտավարութային փաստաթուղթ ապացույց ճանաչված՝ Մարտինես Անգել Հուլիոյի Դոմինիկայի Հանրապետության քաղաքացու RD8325971 սերիա-համարի անձնագրի և դրա զննման արձանագրության համաձայն՝ դրանում առկա կնիքի՝ վերջինս Դոմինիկայի Հանրապետությունից մեկնել է 31 հուլիսի 2024թ-ին: Առկա է Հայաստանի Հանրապետության 02968069 համարի Վիզան, որը տրվել է 02.08.2024թ-ին և դրա համար վճարվել է 15.000 ՀՀ դրամ գումար: Առկա է նաև Զվարթնոց օդանավակայանի անցակետով ՀՀ մուտք գործելու կնիք, համաձայն որի՝ վերջինս ՀՀ է մուտք գերծել 02.08.2024թ-ին ժամը 01:48-ին:
/հատոր 1, Գ.Թ. 44-45,104, 128-131/
Արտավարութային փաստաթուղթ ապացույց ճանաչված՝ Մարտինես Անգել Հուլիոյի կողմից օգտագործվող «SAMSUNG GALAXY A03 CORE» մոդելի բջջային հեռախոսում առկա և թվային խուզարկությամբ արտատպված երկխոսություններով:
/հատոր 1, Գ.Թ. 135-162, 285-291/
Արտավարութային փաստաթուղթ ապացույց ճանաչված՝ Մարտինես Անգել Հուլիոյի անվամբ «Քաթար» ավիաուղիների Դոհա-Երևան 1572116772870-3 համարի ավիատոմսով՝ տպած 01.08.2024թ-ին:
/հատոր 1, Գ.Թ. 166, 260-273, 285-291/
Արտավարութային փաստաթուղթ ապացույց ճանաչված՝ թվով երեք նստեցման կտրոնների համաձայն՝ Մարտինես Անգել Հուլիոն 31.07.2024 թ-ին, ժամը 16:20-ին Սանտո Դոմինգոյից մեկնել է Մադրիդ, այնուհետև 01.08.2024թ-ին, ժամը 09:30-ին Մադրիդից մեկնել է Դոհա, որից հետո նույն օրը, ժամը 20:50-ին Դոհայից մեկնել է Երևան:
/հատոր 1, Գ.Թ. 165, 260-273, 285-291/
Արտավարութային փաստաթուղթ ապացույց ճանաչված՝ Մարտինես Անգել Հուլիոյի անվամբ Երևան քաղաքի Թաիրով փողոցում գտնվող «Grand Fortune Hotel» հյուրանոցային համարը ամրագրելու մասին փաստաթղթով:
/հատոր 1, Գ.Թ. 18, 260-273, 285-291/
Արտավարութային փաստաթուղթ ապացույց ճանաչված՝ Մարտինես Անգել Հուլիոյի անվամբ ուղևորներ թռիչքի երթուղին անվանված փաստաթղթով:
/հատոր 1, Գ.Թ. 20, 260-273, 285-291/
Արտավարութային փաստաթուղթ ապացույց ճանաչված՝ Մարտինես Անգել Հուլիոյի անվամբ «Բլուր Ին Գալիրեա Հոթել» հյուրանոցի ամրագրման փաստաթղթով
/հատոր 1, Գ.Թ. 19, 250-256, 285-291/
Արտավարութային փաստաթուղթ ապացույց ճանաչված՝ Դոմինիկայի Հանրապետության զինանշանով REPUBLICA DOMINICANA MIGRATION գրառմամբ փաստաթղթով:
/հատոր 1, Գ.Թ. 21, 250-256, 285-291/
Զննում կատարելու մասին արձանագրության համաձայն՝ Իսպաներեն լեզվի թարգմանչի մասնակցությամբ զննման է ենթարկվել նյութերում առկա իսպաներեն լեզվով թվով երկու փաստաթուղթ, որոնցից մեկի վրա առկա էր Blur in Gallary Hotel գրառումը և իսպաներեն լեզվով գրառումներ, որոնք ըստ թարգմանչի՝ «Հյուրանոցի ամրագրման փաստաթուղթ է» և դրանում մասնավորապես գրված է հետևյալը. «Շնորհակալ ենք Անգել Հուլիո, քո ամրագրումը հաստատված է, քեզ ուղարկում ենք հաստատման էլեկտրոնային նամակ afolfinaflores@gmail.com հասցեին: Կարիք չկա զանգահարել մեզ վերաամրագրման համար: Վայելիր քո հյուրանոցում մնալը: Ամրագրման համարը 72057244860750: Համաձայն ներքևի հատվածի գրառման՝ Մարտինես Անգել Հուլիոն հյուրանոց պետք է մուտք լիներ 09.08.2024թ-ին, ուրբաթ, ժամը 14:00-ից մինչև կեսգիշեր՝ տեղի ժամով:
Հետևաբար այդ ամենից բխում է, որ Մարտինես Անգել Հուլիոն, համաձայն վարույթի նյութերում առկա փաստաթղթերի՝ 02.08.2024թ-ին ամրագրել է Երևան քաղաքի Թաիրով փողոցում գտնվող Grand Fortune Hotel հյուրանոցի համար, որտեղից պետք է դուրս գար 08.08.2024թ-ի ցերեկը և դրանից հետո 09.08.2024թ-ին ժամը 14:00-ից մինչև կեսգիրշեր՝ տեղի ժամով, պետք է գնար արդեն դարձյալ Երևան քաղաքում գտնվող Blur in Gallary Hotel հյուրանոց:
Հաջորդ փաստաթուղթը Դոմինիկայի Հանրապետության զինանշանով REPUBLICA DOMINICANA MIGRATION գրառմամբ QR կոդ պարունակող փաստաթուղթն է, որն ըստ թարգմանչի՝ հանդիսանում է էլեկտրոնային ավիատոմս, համաձայն որի այն տրվել է 28.07.2024թ-ին, իսկ թռիչքի ամսաթիվն է 31.07.2024թ-ը: Դա իրենից ներկայացնում է Դոմինիկայի Հանրապետության կողմից տրված ելքի էլեկտրոնային ավիատոմս:
Այնեւհետև զննման է ենթարկվել Մարտինես Անգել Հուլիոյի «SAMSUNG GALAXY A03 CORE» մոդելի բջջային հեռախոսի թվային խուզարկությամբ արտատպված երկխոսությունները: Մասնավորապես WatsApp Business հավելվածում առկա +18494423449 բջջային հեռախոսահամարն օգտագործող Lisa անվանված օգտատիրոջ հետ տեղի ունեցած երկխոսությունը, համաձայն որի՝ 15.07.2024թ-ին նշված օգտատերը Մարտինես Հուլիոյին ուղարկել է +1829-987-4236 բջջային հեռախոսահամարն օգտագործող Auto import անվանված օգտատիրոջ տվյալները: Այնուհետև 30.07.2024 թվականի ժամը 10:47-ին ուղարկել է իսպաներեն լեզվով հաղորդագրություն, որում ըստ թարգմանչի՝ նշված է հետևյալը. «Իսպանիա Դոհա Կատար, Հայաստան տրանզիտ 4291773201», որից հետո նրան է ուղարկել քրեական վարույթի նյութերում առկա՝ դեպի ՀՀ ժամանելու չվերթների վերաբերյալ լուսանկարը:
Այնուհետև զննման է ենթարկվել Մարտինես Անգել Հուլիոյի WatsApp հավելվածով +18293605282 բջջային հեռախոսահամարն օգտագործող My Gordy անվանված օգտատիրոջ հետ երկխոսությունը, որն ըստ թարգմանչի՝ քննությանը հետաքրքրող տեղեկությունների չի պարունակում, ըստ երկխոսության բովանդակության՝ Մարտինես Անգել Հուլիոյի զրուցակիցը նրան դիմում է «եղբայր» և անհանգստանում է այն մաիսն, թե վերջինս ինչպես կանցկացնի վերջին թռիչքը:
Այնուհետև զննման է ենթարկվել Մարտինես Անգել Հուլիոյի WatsApp հավելվածով +1829-987-4236 բջջային հեռախոսահամարն օգտագործող Auto import անվանված օգտատիրոջ հետ երկխոսությունը, որը պահպանված էր թղթային տարբերակով և բջջային հեռախոսում: Երկխոսությունն ամբողջությամբ իսպաներեն է և այն թարգմանվեց թարգմանչի կողմից հայերեն: Այն սկսվում է 2024 թվականի հուլիսի 31-ից, որն ուներ հետևյալ բովանդակությունը՝ /Մարտինես Անգել Հուլիոն կնշվի Մ, իսկ վերջինիս զրուցակիցը Զ տառով/:
Զ-սպոսում ես
Մ-այո
Զ-լավ, կանչել են ինքնաթիռ
Մ-Արդեն նստում եմ
Զ-ֆոտո խնդրում եմ
/Մարտինես Անգել հուլիոն ուղարկում է երուկ լուսանկար ինքնաթիռից/
Զ-Աստված հոգ տանի քո ճանապարհի մասին, ու քեզ ծածկի իր սուրբ ծածկոցով: Թռիչքը ուշանում է հենց որ հասնես Մադրիդ հարցրու ու արագ շարժվիր:
Մ-Ամեն, եղավ
Զ-տերմինալ 29
Մ-արդեն այստեղ եմ
Զ-տերմինալ 29, գրողը տանի «հայհոյանք»
Մ-ինչա պատահել
Զ-ամեն ինչ լավա
Մ-Սենց վախեցած չկայի դեռ
Զ-արագացնել է պետք
Մ-ուրեմն պետք է սպասեմ մինչև նստեցման կանչեն
Զ-այո
Մ-Չգիտես հա, դու գիտես որ ինքնաթիռում ես սկսեցի մեկի հետ խոսել որ ինձ բացատրի ամեն ինչ միանգամից
Զ-ոնց ուզում ես բայց ուշադիր եղի, որովհետև մեկ-մեկ փոխվում են տերմինալները ուշադիր եղիր
Մ-այո
Զ-Այդպես էլ արա, մյուս տերմինալում նույնը կանես
Մ-եղավ, բայց դեռ ես շատ բան չեմ հասկանում, բայց ասա ինձ թե որ տերմինալն է լինելու Դոհայում, որ միանգամից կողմնորոշվեմ
Զ- դեռ չգիտեմ, էս էջը որ ես նայում եմ ռեալ ժամանակով եմ նայում, բայց դեռ չկա, բայց միշտ երբ հասնում ես հարցրու
Մ-Դե հա ես հարցնում եմ, բայց դու էլ ինձ ասա ավելի վստահ լինելու համար, դե գիտես: Եթե հնարավոր է իմ ժամանելուց առաջ դա ճշտել, ինձ հաղորդագրություն ուղարկիր
Զ- սպանեցիր էս հարցերով, միշտ ինքնաթիռում կա շատ մարդ որը գնում է Հայաստան դու հարցրու, այո իհարկե
Մ-լավ, այո
Զ- ոչինչ չեմ տեսնում Դոհայի տերմինալից բայց դա երրորդ համարն է և տերմինալը կարող է լինել 61-62: Բայց միշտ երրորդ պլատֆորման է: երբ որ բարձրանալու լինի ինձ տեղեկացրու:
Մ-Արդեն ինքնաթիռի մեջ եմ
Զ- Աստված պահի քեզ և ծածկի իր ծածկոցով
Մ-ամեն
Զ-տեսա քո տաբլոն QR285 դա է քո թռիչքը
Մ-հա
Զ-խելագարի մեկը, շատ աշխույժ էիր
Մ- ես էլ քեզ նույնն եմ ասում
Զ-այո
Մ- Դու Խորխեին ոչ մի բան չես ասել
Զ-ոչ խելառս
Մ- չասես իրան դեռ
Զ- ես դա չեմ լուսաբանում, դա անձնական է: Դա ձեր գործն է բայց չես ուզում որ մայրդ իմանա
Մ-դեռ ոչ
Զ-Ես նրա հետ լավ եմ, բայց իմ աշխատանքն աննկատ լինելն է և չխախտել օրենքը
Մ- հենց այդպես
Զ-Իմը ու քո մայրիկը տարբեր բաներ են
Մ- իհարկե այդպես էլ պետքա լիներ
Զ- ինչպես կլինի իմն ու քոնը
Այնուհետև զրուցակիցը ձայնային հաղորդագրություն է ուղարկում հետևյալ բովանդակությամբ. «Վիզան գնում ես Հայաստան ժամանելուն պես»
Մ-սկզբում վիզան եմ գնում, թե վերցնում եմ ուղեբեռս, որն անեմ առաջինը
Զ-Սկզբից վիզան հետո ուղեբեռը, բայց Հայաստան հասնելուն պես
Մ-լավ
Զ- Արդեն գտար Տերմինալը
Մ- Այստեղ եմ սպասում եմ Հայաստան մեկնելուն
Զ-գտար Տերմինալը
Մ- Ինձ մի հատ բացատրի ինչպես եմ գնում վիզան, տղա ջան այստեղ մեկը չկա որ հասկանա իսպաներեն
Զ- Մի հարցրու օգտվի Գուգլե թարգմանիչից
Մ-Այո
Զրուցակիցն ուղարկում է էլեկտրոնային հղում և գրում է. «սա քո հյուրանոցի հասցեն է»:
Մ- Եղավ պետք է վճարեմ ամրագրման համար
Զ-Դու վճարիր հյուրանոցում 6 օրվա համար: Չմոռանաս փոխել 500 դոլար օդանավակայանում:
Մ-լավ
Զ- Քո դուրս գալու ճանապարհին է:
Մ-այո
Երկու բաց թողնված զանգ է առկա
Մ- ինտերնետը շ՛ատ դանդաղ է քո զանգերին պատասխանելու համար
Այնուհետև զրուցակիցը երկու ձայնային հաղորդագրություն է ուղարկում հետևյալ բովանդակությամբ. «ժամանելուն պես առաջինն ինչ անում ես վճարում ես վիզայի համար: Ովքեր լրացնելու են վիզան հարցնելու են քո մայրիկի, քո հայրիկի անունները, քեզ հարցնելու են այստեղ քո հասցեն, թե ինչ ես աշխատում այստեղ, կասես որ վարսավիր ես և նույնպես քեզ կհարցնեն քո հասցեն այդտեղ: Հետո կանցնի քո ճամպրուկը ու դու կզանգես քո մայրիկին ու դրանից հետո կփոխես 500 դոլար, կվերցնես տաքսի հյուրանոցի հասցեն քեզ արդեն ուղարկել եմ: Երբ հասնես հյուրանոց ցույց կտաս բլանկը և այդ ժամանակ ես քեզ կզանգեմ ու ամեն ինչ կբացատրեմ:
Մ-Հիանալի է: Եվ այդ մարդիկ ովքեր ինձ վիզա են վաճառելու, իսպաներեն խոսում են թե ոչ:
Զ-Չէ միացրու գուգլ թարգմանիչը անգլերեն-իսպաներեն, քանի որ նրանք անգլերեն են խոսում
Մ-Այո
Զ- Այո մնացածը կարող են, ացելի ալվա որ դուրս գաս խելացի ձևով
Մ- Հանգստացիր, ամեն ինչ լավ կլինի աստված առաջ
Մարտինես Անգել Հուլիոն ձայնային հաղորդագրություն է ուղարկում հետևյալ բովանդակությամբ. «ինձ ասացին որ հանձնեմ ճամպրուկը ես արդեն ինքնաթիռում եմ»:
Զրուցակիցը ձայնային հաղրոդագրություն է ուղարկում հետևյալ բովանդակությամբ. «Ճամպրուկը վերցնելուն պես ցույց ես տալիս քո տոմսը և քեզ կտան ճամպրուկը: Աստված քեզ պահապան, ամեն:
Օգոստոսի 2 ժամը 00:58
Մ- տես ինչ արժի վիզա գնելը, պետք է ասեմ, թե քանի օրվա համար
Զ-30 օր
Մարտինես Անգել Հուլիոն ուղարկում է ՀՀ մուտքի վիզայի տրամադրման բլանկը և գրում որ ոչինչ դրանից չի հասկանում:
Առկա է կատարված երկու զանգ:
Զ-առաջինքը քո անունն է, իսկ երկորդը ազգանունը
Զրուցակիցն ուղարկում է անձնագրի համարի լուսանկար, Մարտինես Անգել Հուլիոն նույնպես ուղարկում է անձնագրի լուսանկար:
Օգոստոսի 2 ժամը 02:56 րոպե
Մ- ինձ բռնեցին
Զ- Վայ, ոնց եղավ
Դրանից հետո կատարված երկխոսությունը տեղի է ունեցել ՀՀ ՊԵԿ ՄԴՊՎ աշխատակիցների կողմից ձեռնարկված Վերահսկելի մատակարարում և գնում ՕՀՄ շրջանակներում, վերջիններիս հսկողությամբ և ունի հետևյալ բովանդակությունը՝
Մ- Ինձ թողեցին արդեն հյուրանոցում եմ
Զ- ոնց եղավ, չգտան պայուսակը, ինչ էր տեղի ունեցել
Մ-ինձ կանգենցրեցին շան պատճառով, բայց հետո ստուգեցին ու թողեցին գնամ: Մտածում էին որ բան ստամոքսում ունեմ:
Զ- լավ, իսկ ուղեբեռը
Մ- դե շնից հետո թողեցին որ գնամ
Զ- խելառի մեկը, արդեն հյուարնոցում ես վճարեցիր հյուրանոցը
Մ- քանի որ մուտքի ժամը 12:00-ն էր ես վճարեցի ավելի շատ փող և մտա համար, հիմա հանգստանում եմ
Զ- լավ դե հանգստացի հետո
Մ-ՕՔ
Մ- ես զարթնեցի, ինչ պետք է անեմ
Զ- ինչ կա
Մ- քաղաքով ման էի գալիս, հիմա գնում եմ հյուրանոց, ատամս ցավում է
Զ-խելառի մեկը մի բան կխմես ատամի համար
Մարտինես Անգել հուլիոն ուղարկում է դեղի լուսնակար և գրում
Մ-ասացին որ սա լավ է ատամի համար
Զրուցակիցը ձայնային հաղորդագրություն է ուղարկում հետևյալ բովանդակությամբ. «Խելագառս, ես հիմա տոմս եմ ման գալիս որ կիրակի օրը գնաս Թուրքիա, քո վերջնակետը Թուրքիան է: Այսօր հանսգտացի: Աստված առաջ կիրակի օրը կգնաս Թուրքիա, քեզ հանգստացնող խմի, լավ կլինի, վճարիր հյուրանոցը:
Մ-լավ եղավ
Այնուհետև Մարտինես Անգել Հուլիոն ձայնային հաղորդագրություն է ուղարկում հետևյալ բովանդակությամբ. «Մի հատ հարց ունեմ քեզ տալու, ոնց որ լավ չհասկացա, ուղեբեռս վերցնելու են այստեղ թե Թուրքիայում»:
Զ- Թուրքիա
Մ- հա որովհետև ես խառնվեցի իրար, ինձ թվում էր էսօր կամ վաղը կգան հյուրանոց
Զ- չէ ասացի հանգստացի
Մ- Էտ էի ուզում հասկանայի, կգան ուղեբեռի հետևից թե ոնց կլինի
Զ- չէ, կիրակի օրը կմեկնես Թուրքիա և ուղբեռը կստանան Թուրքիայում
Մ- ՕՔ
Զ- Իմս..
/հատոր 1, Գ.Թ. 250-256/
Զննում կատարելու մասին արձանագրության համաձայն՝ զննման են ենթարկվել Մարտինես Անգել Հուլիոյի անվամբ «Քաթար» ավիաուղիների Դոհա-Երևան ավիատոմսը, տպած 01.08.2024թ-ին: Համաձայն նշված ավիատոմսի՝ այն էկոնոմ դասի ավիատոմս է և նախատեսված է Դոհա-Երևան 285 թռիչքի համար, որով էլ Մարտինես Անգել Հուլիոն 02.08.2024թ-ին ժամանել է Երևան: Նշված ավիատոմսը 1572116772870-3 համարի ավիատոմսն է:
Առկա են թվով երեք նստեցման կտրոններ անգլերեն լեզվով, համաձայն որոնց՝ Մարտինես Անգել Հուլիոն 31.07.2024 թ-ին, ժամը 16:20-ին Սանտո Դոմինգոյից մեկնել է Մադրիդ, այնուհետև 01.08.2024թ-ին, ժամը 09:30-ին Մադրիդից մեկնել է Դոհա, որից հետո նույն օրը, ժամը 20:50-ին Դոհայից մեկնել է Երևան:
Այնուհետև զննման է ենթարկվել նյութերին կից ներկայացված Hotels.com կայքից արտատպված թերթը, համաձայն որի՝ այն անգլերեն լեզվով էր և դրանում առկա գրառումների համաձայն Մարտինես Անգել Հուլիոյի անվամբ 02.08.2024թ-ին ամրագրվել էր Երևան քաղաքի Թաիրով փողոցում գտնվող «Grand Fortune Hotel» հյուրանոցային համարը, իսկ մեկնման օր նշված է 08.08.2024թ-ը:
/հատոր 1, Գ.Թ. 164/
Զննում կատարելու մասին արձանագրության համաձայն՝ զննման են ենթարկվել Մարտինես Անգել Հուլիոյի մոտ հայտնաբերված փաթեթները որով պարզվել է որ՝
Առաջին փաթեթը պոլիէթիլենային սպիտակ փաթեթ էր, որի վրա առկա էր լատինատառ Jur.am գրառումը: Նշված փաթեթը կապարակնիքված էր: Ինչպես փաթեթը, այնպես էլ կապարակնիքը գտնվում էին անխախտ վիճակում: Փաթեթը և կապարակնիքները բացվեցին, դրանում առկա էր սև գույն պայուսակ, որի դիմացի հատվածում առկա էր ռետինե նյութից պատրաստված RG- Ruggard գրառումը, կողային հատվածում առկա էր Comando Pro 65 գրառումը: Նշված պայուսակում որևէ իր կամ առարկա զննման ընթացքում առկա չէր: Պայուսակն ըստ էության նախատեսված է ֆոտոխցիկի տեղափոխման համար: Պայուսակի ներսի հատվածից աստառի հատվածում պատռված, բացված էր, որտեղ ըստ էության Մարտինես Հուլիոյի կողմից թաքցվել է թմրամիջոցը:
Հաջորդ փաթեթը պոլիէթիլենային սպիտակ փաթեթ էր, որի վրա առկա էր լատինատառ SAS SUPERMARKET գրառումը: Նշված փաթեթը կապարակնիքված էր: Ինչպես փաթեթը, այնպես էլ կապարակնիքը գտնվում էին անխախտ վիճակում: Փաթեթը և կապարակնիքները բացվեցին, դրանում առկա էր սև գույն պայուսակ, որի վրա առկա էր փորագրված լատինատառ DELL գրառումը և այն ըստ էության հանդիսանում էր դյուրակիր համակարգչի տեղափոխման համար նախատեսված պայուսակ, որտեղ ըստ էության Մարտինես Հուլիոյի կողմից թաքցվել է թմրամիջոցը: Պայուսակում որևէ իր կամ առարկա առկա չէր:
/հատոր 1, Գ.Թ. 180-182/
2024 թվականի օգոստոսի 30-ին կազմված թվային խուզարկություն կատարելու մասին արձանագորթւյան համաձայն՝ Երևան քաղաքի առաջին ատյանի ընդհանուր իրավասության քրեական դատարանի կողմից 2024 թվականի օգոստոսի 22-ին կայացված թիվ ԵԴ1/1753/08/24 որոշման հիման վրա թվային խուզարկության է ենթարկեցի մեղադրյալ Մարտինես Անգել Հուլիոյի «SAMSUNG GALAXY A03 CORE» մոդելի բջջային հեռախոսում:
Թվային խուզարկության արդյունքում պարզվել է հետևյալը.
Բջջային հեռախոսում առկա ժամանակը համապատասխանում է ՀՀ իրական ժամանակին: Բջջային հեռախոսի գործարանային համարն է՝ 3503573339133192/01: Բջջային հեռախոսում տեղադրված է +18494423449 հեռախոսահամարը: Բջջային հեռախոսն անջատված է համացանցից:
Առկա էր WatsApp Business հավելված, որի զննմամբ պարզվեց, որ դրանում քննությանը հետաքրքրող ժամանակահատվածում առկա է թվով երկու երկխոսություններ, որոնցից մեկը կատարված է +18494423449 բջջային հեռախոսահամարն օգտագործող Lisa անվանված օգտատիրոջ հետ: 15.07.2024թ-ին նշված օգտատերը Մարտինես Հուլիոյին ուղարկել է +1829-987-4236 բջջային հեռախոսահամարն օգտագործող Auto import անվանված օգտատիրոջ տվյալները: Այնուհետև 30.07.2024 թվականի ժամը 10:47-ին ուղարկել է իսպաներեն լեզվով հաղորդագրություն, որից հետո 31.07.2024թ-ին Մարտինես Անգել Հուլիոյին է ուղարկել քրեական վարույթի նյութերում առկա դեպի ՀՀ ժամանելու չվերթների վերաբերյալ լուսանկարը: Քննության հետաքրքրող ժամանակահատվածի երկխոսությունը լուսանկարահանվել է հետագայում թարգմանվելու նպատակով:
Նշված հավելվածում քննությանը հետաքրքրող ժամանակահատվածում առկա է ևս մեկ երկխոսություն +1829-987-4236 բջջային հեռախոսահամարն օգտագործող Auto import անվանված օգտատիրոջ հետ:
Երկխոսության միմիյանց փոխանցված լուսնակարաների և ֆայլերի բաժնի զննմամբ պարզվեց, որ դրանցում առկա են Մարտինես Անգել Հուլիոյի կողմից ՀՀ մեկնելիս ինքնաթիռում կատարված լուսանկարներ, անձագրի լուսանկարները, Հայաստանի Հանրապետության մուտքի վիզա ստանալու վերաբերյալ դիմումի լուանկարը, կատաֆաստ տեսակի դեղամիջոցի տուփի լուսանկարը: Երկխոսությունը իսպաներեն լեզվով է: Երկխոսությունը սկսվում է 31.07.2024թ-ին, ժամը՝ 11:54-ին, և ավարտվում է 02.08.2024թ-ին ժամը 19:33-ին: Հետևաբար նշված օգտատերը հանդիսանում է այն անձն ով ուղորդել է Մարտինես Անգել Հուլիոյին կոկային տեսակի թմրամիջոցը ՀՀ տեղափոխելուն: Ժամը 18:23-ին նշված օգտատերը Մարտինես Հուլիոյին ուղարկված հաղորդագրությամբ նշել է Turkia բառը: Նշված երկխոսության մի հատված կատարվել է այն ժամանակահատվածում, երբ Մարտինես Անգել Հուլիոն արդեն, իսկ եղել է ձերբակյալված, հետևաբար այն կատարվել է ՀՀ ՊԵԿ ՄԴՊ աշխատակիցների հսկողության ներքո ձեռնարկված օպերատիվ-հետախուզական միջոցառումների շրջանակներում: Նշված երկխոսությունն ամբողջությամբ լուսանկարահանվել է և ներբեռնվել համակարգչում՝ թարգմանչի մասնակցությամբ զննում կատարելու նպատակով: Ուղարկված ձայնային հաղորդագրությունները, բջջային հեռախոսի տեխնիկական հնարավորություններից ելնելով, թողնվել են բջջային հեռախոսում, որը կծառայի որպես էլեկտրոնային կրիչ:
Քննությանը հետաքրքրող ժամանակահատվածում հիմնական զանգերը +1829-987-4236 բջջային հեռախոսահամարն օգտագործող Auto import անվանված օգտատիրոջ հետ են:
/հատոր 1, Գ.Թ. 132-163/
«ՀՀ ԳԱԱ փորձաքննությունների ազգային բյուրո» ՊՈԱԿ-ից ստացված դատանյութագիտական փորձաքննության 24-2122 եզրակացության համաձայն՝
1. Փորձաքննության ներկայացված կնիքված պոլիմերային փաթեթի մեջ գտնվող՝ սպիտակավուն երանգի անթափանց պոլիմերային փաթեթի ու վերջինիս մեջ գտնվող թափանցիկ պոլիմերային, պատռված երկու հատ փաթեթների մեջ լցված 1424,77 գրամ քաշով սպիտակավուն երանգի, փոշենման և բեկորանման մասնիկներից կազմված զանգվածը (օբյեկտ 1) և սպիտակավուն երանգի անթափանց պոլիմերային փաթեթի ու վերջինիս մեջ գտնվող թափանցիկ պոլիմերային, պատռված մեկ հատ փաթեթի մեջ լցված 1475,01 գրամ քաշով սպիտակավուն երանգի, փոշենման և բեկորանման մասնիկներից կազմված զանգվածը (օբյեկտ 2) հանդիսանում են կոկաին տեսակի թմրամիջոց, որի ընդհանուր քանակությունը թիվ 1 և 2 օբյեկտներում կազմում է 2899,78 գրամ։
Կոկաինը, համաձայն «Թմրամիջոցների և հոգեմետ (հոգեներգործուն) նյութերի մասին» ՀՀ օրենքի 3-րդ և 4-րդ հոդվածների, որպես թմրամիջոց, համապատասխան սահմանված չափերով՝ գրամներով, ներառված է Հայաստանի Հանրապետության Կառավարության 2018 թվականի հունիսի 27-ի N 707-Ն որոշման «Թմրամիջոցների և հոգեմետ (հոգեներգործուն) նյութերի մանր չափերը» սահմանող N 1 հավելվածի «Թմրամիջոցներ» բաժնի 87-րդ կետում:
/հատոր 1, Գ.Թ. 34-40/
2024 թվականի օգստոսի 2-ին կազմված անձի ձերբակալման մասին արձանագրության համաձայն՝ ժամը 05:50-ին, «ԱՄՕ» ՓԲԸ ընկերության «զվարթնոց» օդանավակայանի ուղևորների ժամանման սրահում ՀՀ քրեական օրենսգրքի 399-րդ հոդվածի հատկանիշներով (Թմրամիջոցների, հոգեմետ (հոգեներգործուն) նյութերի, դրանց պատրաստուկների, դրանց համարժեք նյութերի (անալոգի) կամ դրանց պրեկուրսորների մաքսանենգություն) կատարելու հիմնավոր կասկածի առկայության պայմաններում ձերբակալվել է Մարտինես Անգել Հուլիոն, ով հայտարարել է, որ տեղյակ է, թե ինչի համար է ձերբակալվել և իրեն մեղավոր է ճանաչում, իր մոտից հայտնաբերված պատյանների միջից հանված 3 փաթեթներում գտնվող զանգվածը հանդիսանում է կոկաին տեսակի թմրամիջոցը, որը նախատեսված չէր իր համար, այլ այն պետք է բերեր ՀՀ, գնար հյուրանոց, այնտեղ սպասեր մինչև իրեն կոկաինը տված մարդը ասեր, թե ինչ անի, այդ անձի անունն է Պերո և հեռախոսահամարն է +18299874236: Վերջինիս անձնական խուզարկությամբ հայտնաբերվել է «SAMSUNG GALAXY A03 CORE» մոդելի բջջային հեռախոսը:
/հատոր 1, Գ.Թ. 13-16/
Իրեղեն ապացույց ճանաչված՝ թիվ 24-2122 եզրակացությանը կից ստացված ընդհանուր 2899,68 գրամ քաշով «կոկային» տեսակի թմրամիջոցը, փաթեթավորված ընդհանուր մեկ փաթեթում և կնիքված ՀՀ ԳԱԱ «ՓՈՐՁԱՔՆՆՈՒԹՅՈՒՆՆԵՐԻ ԱԶԳԱՅԻՆ ԲՅՈՒՐՈ» ՊՈԱԿ ՓԱԹԵԹՆԵՐԻ ՀԱՄԱՐ» գրառումները կրող կլոր կնիքի դրոշմով:
/հատոր 1, Գ.Թ. 176-179/
Իրեղեն ապացույց ճանաչված՝ Մարտինես Անգել Հուլիոյի մոտ հայտնաբերված Dell գրառմամբ դյուրակիր համակարգչի համար նախատեսված պայուսակը՝ փաթեթավորված առանձին փաթեթում և կնիքվեած ՀՀ ՔԿ 376 կնիքով:
/հատոր 1, Գ.Թ. 183-186/
Իրեղեն ապացույց ճանաչված՝ Մարտինոս Անգել Հուլիոյի մոտ հայտնաբերված RG- Ruggard գրառմամբ ֆոտոխցիկի համար նախատեսված պայուսակը՝ փաթեթավորված առանձին փաթեթում և կնիքված ՀՀ ՔԿ 376 կնիքով:
/հատոր 1, Գ.Թ. 183-186/

Դատարանի իրավական վերլուծությունները.
ՀՀ քրեական օրենսգրքի 14-րդ հոդվածի համաձայն`
«1. Քրեական պատասխանատվության հիմքն ինչպես ավարտված, այնպես էլ չավարտված հանցանք կատարելն է:»:
ՀՀ քրեական օրենսգրքի 16-րդ հոդվածի համաձայն`
«1. Հանցանք է համարվում սույն օրենսգրքով նախատեսված, պատժի սպառնալիքով արգելված, հանցագործության սուբյեկտի կողմից մեղավորությամբ կատարված արարքը:
(...)»:
ՀՀ քրեական օրենսգրքի 393-րդ հոդվածի համաձայն՝
«1. Իրացնելու նպատակով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը, առաքելը, տարածելը, գովազդելը կամ դրանք ապօրինի իրացնելը կամ մեկ ուրիշի դրդմամբ՝ նրա համար թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ ապօրինի ձեռք բերելը`
պատժվում է ազատազրկմամբ՝ երեքից վեց տարի ժամկետով:
(...)
3. Սույն հոդվածի 1-ին կամ 2-րդ մասով նախատեսված արարքը, որը կատարվել է՝
(...)
2) առանձնապես խոշոր չափերով՝
պատժվում է ազատազրկմամբ՝ վեցից տասներկու տարի ժամկետով:
(...):»:
ՀՀ քրեական օրենսգրքի 399-րդ հոդվածի համաձայն՝
«1. Թմրամիջոցի, հոգեմետ (հոգեներգործուն) նյութի, դրանց պատրաստուկի, դրանց համարժեք նյութի (անալոգ) կամ դրանց ածանցյալի կամ դրանց պրեկուրսորի կամ դրանք պատրաստելու համար օգտագործվող և հատուկ հսկողության տակ գտնվող նյութի, սարքավորման կամ գործիքի կամ մշակումն արգելված՝ թմրամիջոց, հոգեմետ (հոգեներգործուն), խիստ ներգործող կամ թունավոր նյութ պարունակող բույսի մաքսանենգությունը՝ Եվրասիական տնտեսական միության մաքսային սահմանով կամ Հայաստանի Հանրապետության պետական սահմանով դրանք ապօրինի տեղափոխելը, որը կատարվել է առանց մաքսային հսկողության կամ դրանից թաքցնելով, կամ դրանց մասին հավաստի տեղեկությունը սահմանված կարգով չհայտարարագրելու կամ ոչ իր անվամբ հայտարարագրելու կամ դրանց տեղափոխման համար սահմանված կանոնը, այդ թվում՝ արգելքը կամ սահմանափակումը խախտելու կամ մաքսային կամ այլ փաստաթուղթը խաբեությամբ օգտագործելու միջոցով`
պատժվում է ազատազրկմամբ՝ երեքից վեց տարի ժամկետով:
(...)
3. Սույն հոդվածի 1-ին կամ 2-րդ մասով նախատեսված արարքը, որը կատարվել է`
(...)
2) առանձնապես խոշոր չափերով՝
պատժվում է ազատազրկմամբ՝ վեցից տասներկու տարի ժամկետով:»:
ՀՀ քրեական դատավարության օրենսգրքի 22-րդ հոդվածի համաձայն`
«1. Քրեական վարույթի համար նշանակություն ունեցող ցանկացած հանգամանք պետք է հաստատվի պատշաճ ապացույցների բավարար համակցությամբ:
2. Եզրափակիչ դատավարական ակտը պետք է հիմնվի հետազոտված ապացույցների ազատ և բարեխիղճ գնահատման վրա:
3. Մեղադրական դատավճռի հիմքում դրվող յուրաքանչյուր փաստական հանգամանք պետք է հիմնավորվի ապացույցների այնպիսի ծավալով, որը կբացառի դրա ապացուցվածության վերաբերյալ ցանկացած հիմնավոր կասկած: Դատավճիռ կայացնելիս պետք է հաշվի առնվի անհրաժեշտ և հնարավոր ապացույցների բացակայությունը:
4. Վարույթն իրականացնող մարմինը պարտավոր է հանգամանորեն ստուգել ի պաշտպանություն մեղադրյալի բերված և պատշաճ ձևակերպված փաստարկները:
5. Հանցագործության համար անձի մեղավորության մասին հետևությունը չի կարող հիմնվել ենթադրությունների վրա. այն պետք է հաստատվի փոխկապակցված վերաբերելի, թույլատրելի, հավաստի ապացույցների ամբողջությամբ:
6. Խոստովանական ցուցմունքը չի կարող անձին դատապարտելու հիմք հանդիսանալ, եթե այն չի հիմնավորվել պատշաճ իրավական ընթացակարգի շրջանակներում հետազոտված բավարար ապացույցներով:
(...)»:
ՀՀ քրեական դատավարության օրենսգրքի 101-րդ հոդվածի համաձայն՝
«1. Ապացուցումը սույն օրենսգրքով նախատեսված` ապացուցման ենթակա փաստական հանգամանքները, ինչպես նաև վարույթի համար նշանակություն ունեցող այլ հանգամանքներ հաստատելու կամ հերքելու նպատակով ապացույցներ հավաքելը, ստուգելը և գնահատելն է:»:
ՀՀ քրեական դատավարության օրենսգրքի 102-րդ հոդվածի համաձայն՝
«1. Քրեական վարույթի ընթացքում ապացուցման ենթակա են՝
1) դեպքը և դրա հանգամանքները (ժամանակը, տեղը, եղանակը և այլն).
2) մեղադրյալի առնչությունը դեպքին.
3) ենթադրյալ հանցագործության՝ քրեական օրենքով նախատեսված հատկանիշները.
4) մեղադրյալի մեղավորությունը ենթադրյալ հանցանքը կատարելու մեջ.
5) քրեական պատասխանատվությունը կամ պատիժը մեղմացնող և ծանրացնող հանգամանքները.
6) մեղադրյալի անձը բնութագրող հանգամանքները.
7) ենթադրյալ հանցագործությամբ պատճառված վնասը.
8) այն հանգամանքները, որոնք թույլ են տալիս անձին ազատել քրեական պատասխանատվությունից կամ պատժից.
9) այն հանգամանքները, որոնցով անձը հիմնավորում է վարույթի ընթացքում իր գույքային պահանջները.
10) այն հանգամանքները, որոնցով վարույթի մասնակիցը կամ այլ անձը հիմնավորում է իր պահանջները:
2. Սույն օրենսգրքով նախատեսված վարույթի առանձին տեսակների համար կարող է սահմանվել ապացուցման ենթակա հանգամանքների այլ շրջանակ:»:
ՀՀ քրեական դատավարության օրենսգրքի 105-րդ հոդվածի համաձայն՝
«1. Յուրաքանչյուր ապացույց ենթակա է գնահատման՝ վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից:
2. Քննիչը, դատախազը, դատավորը, ղեկավարվելով քրեադատավարական օրենսդրությամբ, ներառյալ ապացուցման չափանիշների մասին վերաբերելի կանոններով, ապացույցները գնահատում են դրանց պատշաճ հետազոտման և վերլուծության վրա հիմնված ներքին համոզմամբ:
3. Ոչ մի տվյալ նախապես հավաստի ապացույցի ուժ չունի: Դատավորը, ինչպես նաև քննիչը և դատախազը չպետք է կանխակալ վերաբերմունք դրսևորեն ապացույցներին, չպետք է դրանց որոշ մասին մյուսների նկատմամբ առավել կամ նվազ նշանակություն տան, քանի դեռ պատշաճ իրավական ընթացակարգի շրջանակներում դրանք չեն գնահատվել:»:
Վերլուծելով մեղադրյալ Անգել Խուլիո Մարտինեսին առաջադրված մեղադրանքը և հիմնվելով հետազոտված թույլատրելի ապացույցների վրա` Դատարանը գտնում է, որ
- ապացուցված է մեղադրյալ Անգել Խուլիո Մարտինեսի վերագրվող փաստական հանգամանքները (արարքները),
- ապացուցված է ՀՀ քրեական օրենսգրքի 393-րդ հոդվածի 3-րդ մասի 2-րդ կետով և ՀՀ քրեական օրենսգրքի 399-րդ հոդվածի 3-րդ մասի 2-րդ կետով արարքների կատարման հակաիրավականությունը,
- ապացուցված է մեղադրյալ Անգել Խուլիո Մարտինեսի կողմից այդ արարքները կատարելը,
- ապացուցված է մեղադրյալ Անգել Խուլիո Մարտինեսի մեղավորությունը տվյալ արարքները կատարելու մեջ։
Դատարանը գտնում է, որ Անգել Խուլիո Մարտինեսն իր կատարած հանրորեն վտանգավոր արարքների կատարման համար ենթակա է քրեական պատասխանատվության և պատժի:
Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ Սահմանադրության 71-րդ հոդվածի համաձայն՝
«1. Հանցանք կատարած անձի պատժի հիմքը նրա մեղքն է:
2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին»:
ՀՀ Սահմանադրության 72-րդ հոդվածի համաձայն՝
«Ոչ ոք չի կարող դատապարտվել այնպիսի գործողության կամ անգործության համար, որը կատարման պահին հանցագործություն չի հանդիսացել: Չի կարող նշանակվել ավելի ծանր պատիժ, քան այն, որը ենթակա էր կիրառման հանցանք կատարելու պահին: Արարքի պատժելիությունը վերացնող կամ պատիժը մեղմացնող օրենքն ունի հետադարձ ուժ:»:
ՀՀ քրեական օրենսգրքի 7-րդ հոդվածի համաձայն`
«1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:
(...)»:
ՀՀ քրեական օրենսգրքի 55-րդ հոդվածի համաձայն`
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»:
ՀՀ քրեական օրենսգրքի 69-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ:»:
ՀՀ քրեական օրենսգրքի 67-րդ հոդվածի համաձայն`
«1. Ազատազրկումը դատապարտյալին քրեակատարողական հիմնարկում անազատության մեջ պահելու ձևով հասարակությունից որոշակի ժամկետով մեկուսացնելն է, որը կարող է նշանակվել սույն օրենսգրքով նախատեսված դեպքերում:
(...)»:
ՀՀ վճռաբեկ դատարանն Արարատ Ավագի Ավագյանի և Վահան Սերյոժայի Սահակյանի վերաբերյալ ԵԿԴ/0252/01/13 քրեական գործով 2014թ. հոկտեմբերի 31-ի որոշմամբ արտահայտել է նաև հետևյալ իրավական դիրքորոշումը.
«(…) նշանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին (…):
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա:
(…)
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով: Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս: Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն:
(…)»:
Հաշվի առնելով մեղադրյալ Անգել Խուլիո Մարտինեսի կատարած հանցագործությունների բնույթը և հանրության համար վտանգավորության աստիճանը, դրանց կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո նրա դրսևորած վարքագիծը, խախտված հասարակական հարաբերության սոցիալական նշանակությունը, Դատարանը գտնում է, որ Անգել Խուլիո Մարտինեսն իր կատարած հանցագործությունների համար ենթակա է պատժի ազատազրկման ձևով:
Քննարկելով Անգել Խուլիո Մարտինեսի նկատմամբ ազատազրկման ձևով նշանակվելիք պատժաչափի հարցը, հաշվի առնելով արարքների կատարման եղանակը, արարքների վտանգավորության աստիճանը, թմրամիջոցի չափը, որն էականորեն բարձրացնում է արարքի հանրորեն վտանգավորության աստիճանը, Դատարանը գտնում է, որ նվազագույն պատիժ նշանակելով հնարավոր չէ հասնել պատժի նպատակներին, սակայն միաժամանակ Դատարանը հաշվի է առնում, որ վերջինս նախաքննության ընթացքում ընդունել է իր մեղքը, իսկ դատաքննության ընթացքում էլ տվել է խոստովանական ցուցմունք, որով աջակցել է դեպքի վերաբերյալ տեղեկություններ ստանալու հարցում, ուստի Դատարանը գտնում է, որ վերջինիս նկատմամբ ՀՀ քրեական օրենսգրքի 393-րդ հոդվածի 3-րդ մասով և 399 հոդվածի 3-րդ մասով՝ յուրաքանչյուր արարքի համար 7 /յոթ/ տարի ժամկետով ազատազրկում նշանակելով և նշանակված պատիժները մասնակի գումարման սկզբունքով նրա նկատմամբ վերջնական պատիժ 7 /յոթ/ տարի 6 /վեց/ ամիս ժամկետով ազատազրկում նշանակելով հնարավոր կլինի հասնել պատժի նպատակներին, սոցիալական արդարության վերականգնմանը, պատժի ենթարկված անձին վերասոցիալականացնելու, ինչպես նաև հանցագործությունները կանխելու իրագործմանը:
ՀՀ քրեական օրենսգրքի 62-րդ հոդվածի համաձայն՝
«1. Օտարերկրյա քաղաքացուն Հայաստանի Հանրապետության տարածքից վտարելը Հայաստանի Հանրապետությունում քրեական պատասխանատվության ենթակա օտարերկրյա քաղաքացուն Հայաստանի Հանրապետության սահմաններից հեռացնելն է՝ արգելելով նրան գտնվել Հայաստանի Հանրապետությունում:
2. Օտարերկրյա քաղաքացուն Հայաստանի Հանրապետության տարածքից վտարելը որպես լրացուցիչ պատիժ սահմանվում է 5-10 տարի ժամկետով:
3. Օտարերկրյա քաղաքացուն Հայաստանի Հանրապետության տարածքից վտարելը որպես լրացուցիչ պատիժ նշանակելիս դրա ժամկետի հաշվարկն սկսվում է Հայաստանի Հանրապետության տարածքից վտարելու պահից:
4. Օտարերկրյա քաղաքացուն Հայաստանի Հանրապետության տարածքից վտարելը կատարվում է դատապարտյալի նկատմամբ նշանակված հիմնական պատիժը կրելուց հետո։ Այն դեպքում, երբ արդարադատության բնագավառում պետական լիազոր մարմինը Հայաստանի Հանրապետության միջազգային պայմանագրերով սահմանված կարգով համաձայնություն է ձեռք բերում դատապարտյալին պատժի մնացած մասը կրելու նպատակով իր քաղաքացիության երկիր փոխանցելու վերաբերյալ, ապա օտարերկրյա քաղաքացուն Հայաստանի Հանրապետության տարածքից վտարելու վերաբերյալ օրինական ուժի մեջ մտած եզրափակիչ դատական ակտը համարվում է ի կատար ածված դատապարտյալի փոխանցումն իրականացնելու մասին արդարադատության բնագավառում պետական լիազոր մարմնի ծանուցումն ստանալուց հետո: Այն դեպքում, երբ սույն օրենսգրքի 84-րդ կամ 85-րդ հոդվածով սահմանված կարգով կայացվել է անձին պատժից ազատելու վերաբերյալ որոշում, օտարերկրյա քաղաքացուն Հայաստանի Հանրապետության տարածքից վտարելը կատարվում է փորձաշրջանն ավարտվելուց հետո։ Սույն օրենսգրքի 60-րդ հոդվածի 6-րդ մասով սահմանված դեպքերում անձին պատժի հետագա կրումից ազատելու, ինչպես նաև սույն օրենսգրքի 79-րդ հոդվածի 4-րդ մասով կամ 88-րդ հոդվածով սահմանված կարգով անձին հիմնական պատժից ազատելու դեպքում օտարերկրյա քաղաքացուն Հայաստանի Հանրապետության տարածքից վտարելը կատարվում է պատժի հետագա կրումից կամ պատժից ազատելուց հետո։
5. Օտարերկրյա քաղաքացին կարող է վտարվել իր քաղաքացիության պետություն կամ այն պետություն, որտեղ վերջինս մշտապես բնակվում է: Վտարման երկիրը սահմանում է դատարանը՝ հաշվի առնելով դատապարտյալի կարծիքը:
(…)»:
Դատարանը գտնում է, որ մեղադրյալ Անգել Խուլիո Մարտինեսի նկատմամբ որպես լրացուցիչ պատիժ պետք է նշանակվի Հայաստանի Հանրապետության տարածքից իր քաղաքացիության երկիր վտարելը:
Քննարկելով ընտրված խափանման միջոցի հարցը` Դատարանը գտնում է, որ մեղադրյալ Անգել Խուլիո Մարտինեսի նկատմամբ խափանման միջոցն ընտրված է ճիշտ և այն ենթակա չէ փոփոխման:
Քննարկելով արտավարութային փաստաթղթերի պահպանման հարցը՝ Դատարանը գտնում է, որ դրանք անհրաժեշտ է թողնել կցված քրեական գործին:
Քննարկելով իրեղեն ապացույցների հարցը, Դատարանը գտնում է, որ իրեղեն ապացույց ճանաչված «կոկաին» տեսակի թմրամիջոցը, Dell գրառմամբ դյուրակիր համակարգչի համար նախատեսված պայուսակը և RG-Ruggard գրառմամբ ֆոտոխցիկի համար նախատեսված պայուսակը պետք է վերադարձնել մեղադրողին՝ թիվ 84138924 քրեական վարույթին կցելու նպատակով:
ՀՀ քրեական դատավարության օրենսգրքի 167-րդ հոդվածի համաձայն՝
«1. Վարութային ծախսեր են՝
(…)
2) փորձագետի և թարգմանչի վարձատրության գումարները.
(…)
2. Հանրային մեղադրանքով վարութային ծախսերը վճարվում են պետական միջոցների հաշվին, եթե սույն օրենսգրքով այլ կարգ սահմանված չէ: Մասնավոր մեղադրանքով վարութային ծախսերի բաշխման կարգը որոշում է դատարանը:
3. Եթե դատապարտված մեղադրյալը վճարունակ է, ապա սույն հոդվածի 1-ին մասի 1-ին, 2-րդ և 4-7-րդ կետերում թվարկված վարութային ծախսերի հատուցման պարտականությունը դատարանը դնում է նրա վրա:
(…)»:
Հաշվի առնելով, որ մեղադրյալ Անգել Խուլիո Մարտինեսի անձնական խուզարկությամբ հայտնաբերվել են դրամական միջոցներ, ուստի Դատարանը գտնում է, որ թիվ 24-2122 փորձաքննության գումարի՝ 144.000 ՀՀ դրամի հատուցումը պետք է դնել Անգել Խուլիո Մարտինեսի վրա:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 347-350-րդ հոդվածներով` Դատարանը

Վ Ճ Ռ Ե Ց

Անգել Խուլիո Մարտինեսին մեղավոր ճանաչել ՀՀ քրեական օրենսգրքի 393-րդ հոդվածի 3-րդ մասի 2-րդ կետով և ՀՀ քրեական օրենսգրքի 399-րդ հոդվածի 3-րդ մասի 2-րդ կետով:
ՀՀ քրեական օրենսգրքի 393-րդ հոդվածի 3-րդ մասի 2-րդ կետով դատապարտել ազատազրկման 7 /յոթ/ տարի ժամկետով:
ՀՀ քրեական օրենսգրքի 399-րդ հոդվածի 3-րդ մասի 2-րդ կետով դատապարտել ազատազրկման 7 /յոթ/ տարի ժամկետով:
Պատիժների մասնակի գումարման սկզբունքով Անգել Խուլիո Մարտինեսի նկատմամբ վերջնական պատիժ նշանակել ազատազրկում 7 /յոթ/ տարի 6 /վեց/ ամիս ժամկետով:
Անգել Խուլիո Մարտինեսի նկատմամբ որպես լրացուցիչ պատիժ նշանակել Հայաստանի Հանրապետության տարածքից Դոմինիկյան Հանրապետություն վտարելը՝ 7 /յոթ/ տարի 6 /վեց/ ամիս ժամկետով:
Պատժի կրման սկիզբը հաշվել 02.08.2024թ-ից:
Անգել Խուլիո Մարտինեսից բռնագանձել 144.000 /հարյուր քառասունչորս հազար/ ՀՀ դրամ որպես փորձագետի վարձատրություն՝ բռնագանձումը տարածելով վերջինիս անձնական խուզարկությամբ հայտնաբերված դրամական միջոցների վրա:
Անգել Խուլիո Մարտինեսի նկատմամբ ընտրված խափանման միջոց կալանքը թողնել անփոփոխ:
Դատավճիռն օրինական ուժի մեջ մտնելուց հետո իրեղեն ապացույց ճանաչված «կոկաին» տեսակի թմրամիջոցը, Dell գրառմամբ դյուրակիր համակարգչի համար նախատեսված պայուսակը և RG-Ruggard գրառմամբ ֆոտոխցիկի համար նախատեսված պայուսակը վերադարձնել մեղադրողին՝ թիվ 84113824 քրեական վարույթին կցելու համար:
Դատավճիռը կարող է բողոքարկվել ՀՀ քրեական վերաքննիչ դատարան` ստանալու օրվանից հետո մեկամսյա ժամկետում:

ԴԱՏԱՎՈՐ` Վ.Լ.ԳՐԻԳՈՐՅԱՆ