Գործ N ԵԴ1/3285/01/24




Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈւՆԻՑ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

ՆԱԽԱԳԱՀՈՂ ԴԱՏԱՎՈՐ` Վ.Լ.ԳՐԻԳՈՐՅԱՆ
ՔԱՐՏՈՒՂԱՐՈՒԹՅԱՄԲ` Լ.ՊՐԱԶՅԱՆԻ,
Մասնակցությամբ`
ՄԵՂԱԴՐՈՂ` Բ.ՂԱԶԻՆՅԱՆԻ,
ՄԵՂԱԴՐՅԱԼ` Գ.ԽԱՉԱՏՐՅԱՆԻ,

2025 թվականի փետրվարի 10-ին Երևան քաղաքում` դռնբաց դատական նիստում` քննության առնելով քրեական գործն ըստ մեղադրանքի`
Գագիկ Արմենի Խաչատրյանի /ծնված 2002թ. նոյեմբերի 27-ին՝ Արմավիր քաղաքում, ազգությամբ հայ, ՀՀ քաղաքացի, միջնակարգ կրթությամբ, ուսանող, ամուսնացած, խնամքին մեկ անչափահաս երեխա, դատված, հաշվառված է և բնակվում է քաղաք Արմավիր, Մյասնիկյան փողոցի 13/1 տուն հասցեում/: Մեղադրվում է ՀՀ քրեական օրենսգրքի 344-րդ հոդվածի 1-ին մասով.

Պ Ա Ր Զ Ե Ց

Գործի դատավարական նախապատմությունը.
2024 թվականի հուլիսի 31-ին ՀՀ ՔԿ ԵՔՔՎ ՃՀՔ բաժնի քննիչ Ա.Պետրոսյանը կազմել է արձանագրություն՝ ՀՀ քրեական օրենսգրքի 344-րդ հոդվածի 1-ին մասի հատկանիշներով թիվ 60553424 քրեական վարույթը նախաձեռնելու մասին:
2024 թվականի հոկտեմբերի 01-ին քննիչ Ա.Պետրոսյանը որոշում է կայացրել Գագիկ Արմենի Խաչատրյանի նկատմամբ կազմված վարչական իրավախախտման վերաբերյալ թիվ 8180412562 արձանագրութան, թիվ 8180398971 արձանագրության, ալկոհոլի պարունակության ստուգման թիվ 00313 կտրոնի, ստուգաչափման թիվ 106349 վկայականի պատճենները, պարտավորագրի և ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տվյալների պատճենները թիվ 60553424 քրեական վարույթով որպես արտավարութային փաստաթուղթ ապացույց ճանաչելու մասին:
2024 թվականի հոկտեմբերի 04-ին Երևան քաղաքի Աջափնյակ և Դավթաշեն վարչական շրջանի դատախազության դատախազ Բ.Ղազինյանը որոշում է կայացրել թիվ 60553424 քրեական վարույթով Գագիկ Արմենի Խաչատրյանի նկատմամբ ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին:
2024 թվականի հոկտեմբերի 07-ին քննիչ Ա.Պետրոսյանը որոշում է կայացրել թիվ 60553424 քրեական վարույթով Գագիկ Արմենի Խաչատրյանի նկատմամբ որպես խափանման միջոց բացակայելու արգելք կիրառելու մասին:
2024 թվականի նոյեմբերի 12-ին թիվ 60553424 քրեական վարույթը՝ հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարանում, որը ստացել է թիվ ԵԴ1/3285/01/24 դատական համարը:

Մեղադրանքի փաստական նկարագրությունը.
2024 թվականի հոկտեմբերի 04-ին Երևան քաղաքի Աջափնյակ և Դավթաշեն վարչական շրջանի դատախազության դատախազ Բ.Ղազինյանը որոշում է կայացրել թիվ 60553424 քրեական վարույթով Գագիկ Արմենի Խաչատրյանի նկատմամբ ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին ՀՀ քրեական օրենսգրքով նախատեսված, պատժի սպառնալիքով արգելված, մեղավորությամբ կատարված հանրորեն վտանգավոր այն արարքի կատարման համար, որ նա, ՀՀ ՆԳՆ ոստիկանության պարեկային ծառայության ծառայողի կողմից 2024 թվականի հունվարի 31-ին կայացված՝ վարչական տույժ նշանակելու մասին թիվ 8180398971 որոշմամբ ենթարկված լինելով վարչական պատասխանատվության՝ տրանսպորտային միջոց վարելու իրավունքը 6 ամիս ժամկետով կասեցնելու ձևով, պատշաճ ծանուցված և տեղեկացված լինելով այդ մասին, 2024 թվականի հունիսի 16-ին ժամը 23.56-ի սահմաններում Երևան քաղաքի Շիրազի փողոցում վարել է Մերսեդես Բենց մակնիշի 66GX996 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի կրտսեր պարեկի կողմից 2024 թվականի հունիսի 17-ին կազմված վարչական իրավախախտման վերաբերյալ թիվ 8180412562 արձանագրությամբ:

Դատաքննությամբ հետազոտված թույլատրելի ապացույցները.
Քրեական գործի դատաքննության փուլում մեղադրյալ Գագիկ Արմենի Խաչատրյանը հրաժարվեց ցուցմունք տալ, սակայն հայտնեց, որ իր մայրն է վարել մեքենան:
/դատական նիստի արձանագրություն՝ 10.02.2025թ./
Նախաքննության ընթացքում որպես մեղադրյալ հարցաքննվելիս Գագիկ Արմենի Խաչատրյանը ցուցմունք է տվել այն մասին, որ իրեն հասկանալի և պարզ է առաջադրված մեղադրանքը, ընդունում է իր մեղավորությունը, քանի որ անհրաժեշտությունից ելնելով է վարել, քանի որ հիվանդանոց պետք է գնային, զղջում է կատարածի համար և խնդրել է մեղմ վերաբերվել, քանի որ մասնակցել է 2022 թվականին ծավալված մարտական գործողություններին և մեկ տարի առաջ է զորացրվել բանակից: Այժմ խնամքին ունի 1 անչափահաս երեխա, որի վերաբերյալ փաստաթղթերը ներկայացրել է վարույթ իրականցնող մարմնին:
/Հատոր 1, գ.թ. 36-38/
Զննություն կատարելու մասին 16.09.2024թ. արձանագրության համաձայն՝
2024 թվականի հուլիսի 30-ին ՀՀ ՆԳՆ ոստիկանության պարեկային ծառայությունից ստացվել են փաստաթղթերը, համաձայն որի 2024 թվականի հունիսի 17-ին պարեկային ծառայության 2-րդ գումարտակի 3-րդ վաշտի կրտսեր պարեկ Գրիշա Սարիբեկի Նիկոլյանի /կրծքանշան թիվ 01637/ կողմից կազմվել է վարչական իրավախախտման վերաբերյալ թիվ 8180412562 արձանագրությունն այն մասին, որ Գագիկ Արմենի Խաչատրյանը (ծնված 27.11.2002թ., ք. Արմավիր, Մյասնիկյան փողոց, 13/1 տ., ՀԾՀ 3731020386) 2024 թվականի հունիսի 17-ին, ժամը 23:56-ին տրանսպորտային միջոց վարելու իրավունը կասեցված վիճակում Երևան քաղաքի Շիրազի փողոցում վարել է «Մերսեդես Բենց» մակնիշի 66GX996 հաշվառման համարանիշի տրանսպորտային միջոցը:
Արձանագրությանը կցվում է հատվածում գրառում առկա չէ:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է գրառում՝ մեքենան ես չեմ վարել, հրաժարվում եմ ոստիկանության արձանագրությունից, դիմում եմ վերադասությանը և ստորագրություն:
Արձանագրությանը ծանոթացա, իմ իրավուքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն:
Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված՝ 201.2 թիվը:
2024 թվականի հունվարին 31-ին ժամը 04:37-ին ք. Արմավիր, Երևանյան փողոցում ՀՀ ՆԳՆ ոստիկանության պարեկային ծառայության Արմավիրի մարզի գումարտակի 2-րդ վաշտի, 1-ին դասակի կրտսեր պարեկ Սևակ Մովսեսի Վարդանյանի /կրծքանշան թիվ 01988/ կողմից կազմվել է վարչական իրավախախտման վերաբերյալ թիվ 8180398971 արձանագրությունն այն մասին, որ Գագիկ Արմենի Խաչատրյանը (ծնված՝ 27.11.2002թ., ք. Արմավիր, Մյասնիկյան փողոց, 13/1 տ., ՀԾՀ՝ 3731020386) 2024 թվականի հունվարի 31-ին, ժամը 04:20-ին Արմավիր քաղաքի Երևանյան փողոցում վարել է «Մերսեդես Բենց» մակնիշի 66GX996 հաշվառման համարանիշի տրանսպորտային միջոցը ոչ սթափ վիճակում:
Արձանագրությանը կցվում է հատվածում առկա է գրատում՝ վ/վ սթափության վիճակի զննության կտրոնը:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա ստորագրություն:
Արձանագրությանը ծանոթացա, իմ իրավուքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն և ազգանուն:
Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված՝ 68 թիվը:
Որոշման հատվածում երեևում է, որ տվյալ անձի վարորդական իրավունքի վկայականը կասեցվել է 6 ամիս ժամկետով, և 31.01.2024թ.-ին էլ ստորագրել և վերցրել է որոշման իր օրինակը: Նույն օրը վ/վ-ն վերադարձվել է, առկա է ստորագրություն:
Ալկոհոլի պարունակության ստուգման կտրոնի զննությամբ պարզվեց, որ ստուգաչափման սարքի համարն է՝ 91101162, զննման համարը՝ 00313, զննման ամսաթիվը՝ 31.01.2024թ., զննման ժամը՝ 04:37:32, վերջին ստուգաչափման ամսաթիվը՝ 29.09.2023թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.294մգ/լ, վարորդի անունն է՝ Գագիկ, ազգանունը՝ Խաչատրյան, տրանսպորտային միջոցի համարանիշը՝ 66GX996, RE 639497, Պ/ծ ազգանունը՝ Վարդանյան, կրծքանշանի համարը՝ 01988, ստորաբաժանում՝ 2-րդ վ., 1-ին դ':
ՀՀ էկոնոմիկայի նախարարության «Ստանդարտացման և չափագիտության ազագային մարմին» ՓԲԸ-ից կողմից տրված թիվ 106349 ստուգաչափման վկայականի զննությամբ պարզվեց, որ վկայականը ուժի մեջ է 2023 թվականի ապրիլի 23-ից մինչև 2024 թվականի ապրիլի 23-ը, ստուգաչափման սարքի գործարանային համարն է 91101162, տեսակը՝ Jupiter X/RP, չափման տիրույթը՝ 0,000+2,000մգ/լ, ճշտության դասը, կարգը /սխալանքը/ 0-0,1±5-%, 0,1-0,15±8%30,15±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008 МП 242-1353-2012, ստուգաչափող անվան դիմաց առկա է ստորագրույթուն և նշված է Ա. Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրույթյուն և նշված է Գ.Մարտիրոսյան:
Պարտավորագրի զննությամբ երևում որ է, 2024 թվականի հունվարի 31-ին Գագիկ Խաչատրյանն իր՝ Մերսեդես Բենց մակնիշի, 66GX996 հաշվառման համարանիշի տրանսպորտային միջոցը հանձնել է Համբարձում Հովհաննիսյանին:
ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության զննությամբ պարզվեց, որ Գագիկ Արմենի Խաչատրյանի (ծնված՝ 27.11.2002թ., ք. Արմավիր, Մյասնիկյան փողոց, 13/1 տ., ՀԾՀ՝ 3731020386) անվամբ թիվ RE 639497 վարորդական վկայականը գտնվում է կասեցված կարգավիճակում, սկիզբ՝ 31.01.2024թ., ավարտ՝ 31.07.2025թ., Զրկումներ առկա չեն:
/Հատոր 1, գ.թ. 15-17/
Արտավարութային փաստաթուղթ ճանաչելու մասին 01.10.2024թ. որոշմամբ Գագիկ Արմենի Խաչատրյանի նկատմամբ կազմված վարչական իրավախախտման վերաբերյալ թիվ 8180412562 արձանագրութան, թիվ 8180398971 արձանագրության, ալկոհոլի պարունակության ստուգման թիվ 00313 կտրոնի, ստուգաչափման թիվ 106349 վկայականի պատճենները, պարտավորագրի և ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տվյալների պատճենները ճանաչվել են ապացույց:
/Հատոր 1, գ.թ. 3, 4, 5, 6, 7, 8, 18-19/

Դատարանի իրավական վերլուծությունները.
ՀՀ քրեական օրենսգրքի 14-րդ հոդվածի համաձայն` «1. Քրեական պատասխանատվության հիմքն ինչպես ավարտված, այնպես էլ չավարտված հանցանք կատարելն է:»:
ՀՀ քրեական օրենսգրքի 16-րդ հոդվածի համաձայն`
«1. Հանցանք է համարվում սույն օրենսգրքով նախատեսված, պատժի սպառնալիքով արգելված, հանցագործության սուբյեկտի կողմից մեղավորությամբ կատարված արարքը:
(...)»:
ՀՀ 05.05.2021թ. քրեական օրենսգրքի 344-րդ հոդվածի համաձայն`
«1. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը՝
պատժվում է տուգանքով` առավելագույնը տասնապատիկի չափով, կամ հանրային աշխատանքներով` առավելագույնը հարյուր ժամ տևողությամբ, կամ կարճաժամկետ ազատազրկմամբ՝ առավելագույնը մեկ ամիս ժամկետով:
(...)
4. Սույն օրենսգրքի իմաստով՝ անձի՝ տրանսպորտային միջոցներ վարելու իրավունքը համարվում է կասեցված, եթե նրա` տրանսպորտային միջոցներ վարելու իրավունքն օրենքով սահմանված կարգով կասեցվել է, և կասեցման ժամկետը չի լրացել:
(...)»:
ՀՀ քրեական դատավարության օրենսգրքի 22-րդ հոդվածի համաձայն`
«1. Քրեական վարույթի համար նշանակություն ունեցող ցանկացած հանգամանք պետք է հաստատվի պատշաճ ապացույցների բավարար համակցությամբ:
2. Եզրափակիչ դատավարական ակտը պետք է հիմնվի հետազոտված ապացույցների ազատ և բարեխիղճ գնահատման վրա:
3. Մեղադրական դատավճռի հիմքում դրվող յուրաքանչյուր փաստական հանգամանք պետք է հիմնավորվի ապացույցների այնպիսի ծավալով, որը կբացառի դրա ապացուցվածության վերաբերյալ ցանկացած հիմնավոր կասկած: Դատավճիռ կայացնելիս պետք է հաշվի առնվի անհրաժեշտ և հնարավոր ապացույցների բացակայությունը:
4. Վարույթն իրականացնող մարմինը պարտավոր է հանգամանորեն ստուգել ի պաշտպանություն մեղադրյալի բերված և պատշաճ ձևակերպված փաստարկները:
5. Հանցագործության համար անձի մեղավորության մասին հետևությունը չի կարող հիմնվել ենթադրությունների վրա. այն պետք է հաստատվի փոխկապակցված վերաբերելի, թույլատրելի, հավաստի ապացույցների ամբողջությամբ:
6. Խոստովանական ցուցմունքը չի կարող անձին դատապարտելու հիմք հանդիսանալ, եթե այն չի հիմնավորվել պատշաճ իրավական ընթացակարգի շրջանակներում հետազոտված բավարար ապացույցներով:
(...)»:
ՀՀ քրեական դատավարության օրենսգրքի 101-րդ հոդվածի համաձայն՝
«1. Ապացուցումը սույն օրենսգրքով նախատեսված` ապացուցման ենթակա փաստական հանգամանքները, ինչպես նաև վարույթի համար նշանակություն ունեցող այլ հանգամանքներ հաստատելու կամ հերքելու նպատակով ապացույցներ հավաքելը, ստուգելը և գնահատելն է:»:
ՀՀ քրեական դատավարության օրենսգրքի 102-րդ հոդվածի համաձայն՝
«1. Քրեական վարույթի ընթացքում ապացուցման ենթակա են՝
1) դեպքը և դրա հանգամանքները (ժամանակը, տեղը, եղանակը և այլն).
2) մեղադրյալի առնչությունը դեպքին.
3) ենթադրյալ հանցագործության՝ քրեական օրենքով նախատեսված հատկանիշները.
4) մեղադրյալի մեղավորությունը ենթադրյալ հանցանքը կատարելու մեջ.
5) քրեական պատասխանատվությունը կամ պատիժը մեղմացնող և ծանրացնող հանգամանքները.
6) մեղադրյալի անձը բնութագրող հանգամանքները.
7) ենթադրյալ հանցագործությամբ պատճառված վնասը.
8) այն հանգամանքները, որոնք թույլ են տալիս անձին ազատել քրեական պատասխանատվությունից կամ պատժից.
9) այն հանգամանքները, որոնցով անձը հիմնավորում է վարույթի ընթացքում իր գույքային պահանջները.
10) այն հանգամանքները, որոնցով վարույթի մասնակիցը կամ այլ անձը հիմնավորում է իր պահանջները:
2. Սույն օրենսգրքով նախատեսված վարույթի առանձին տեսակների համար կարող է սահմանվել ապացուցման ենթակա հանգամանքների այլ շրջանակ:»:
ՀՀ քրեական դատավարության օրենսգրքի 105-րդ հոդվածի համաձայն՝
«1. Յուրաքանչյուր ապացույց ենթակա է գնահատման՝ վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից:
2. Քննիչը, դատախազը, դատավորը, ղեկավարվելով քրեադատավարական օրենսդրությամբ, ներառյալ ապացուցման չափանիշների մասին վերաբերելի կանոններով, ապացույցները գնահատում են դրանց պատշաճ հետազոտման և վերլուծության վրա հիմնված ներքին համոզմամբ:
3. Ոչ մի տվյալ նախապես հավաստի ապացույցի ուժ չունի: Դատավորը, ինչպես նաև քննիչը և դատախազը չպետք է կանխակալ վերաբերմունք դրսևորեն ապացույցներին, չպետք է դրանց որոշ մասին մյուսների նկատմամբ առավել կամ նվազ նշանակություն տան, քանի դեռ պատշաճ իրավական ընթացակարգի շրջանակներում դրանք չեն գնահատվել:»:
Վերլուծելով մեղադրյալ Գագիկ Արմենի Խաչատրյանին առաջադրված մեղադրանքը և հիմնվելով հետազոտված թույլատրելի ապացույցների վրա` Դատարանը գտնում է, որ.
- ապացուցված է մեղադրյալ Գագիկ Արմենի Խաչատրյանին վերագրվող փաստական հանգամանքները (արարքները),
- ապացուցված է ՀՀ քրեական օրենսգրքի 344-րդ հոդվածի 1-ին մասով նախատեսված արարքների քրեական հակաիրավականությունը,
- ապացուցված է մեղադրյալ Գագիկ Արմենի Խաչատրյանի կողմից այդ արարքները կատարելը,
- ապացուցված է մեղադրյալ Գագիկ Արմենի Խաչատրյանի մեղավորությունը տվյալ արարքները կատարելու մեջ։
Անդրադառնալով մեղադրյալի այն հայտարարությանը, որ ինքը չի եղել մեքենան վարողը, ապա հարկ է նկատել, որ նախաքննության ընթացքում վերջնս հայտնել է, որ ինքն է վարել, ինչպես նաև նշել է վարելու պատճառը և հայտնել է որ զղջում է կատարածի համար:
Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ Սահմանադրության 71-րդ հոդվածի համաձայն՝
«1. Հանցանք կատարած անձի պատժի հիմքը նրա մեղքն է:
2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին»:
ՀՀ քրեական օրենսգրքի 55-րդ հոդվածի համաձայն`
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»:
ՀՀ քրեական օրենսգրքի 69-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ:»:
ՀՀ քրեական օրենսգրքի 344-րդ հոդվածի 1-ին մասի սանկցիան այլընտրանքային է, պատիժ է նախատեսում ինչպես տուգանքի, այնպես էլ՝ հանրային աշխատանքների, կարճաժամկետ ազատազրկման և ազատազրկման ձևով:
Ուսումնասիրելով մեղադրյալ Գագիկ Արմենի Խաչատրյանի անձը` նրա կատարած հանցագործության համար պատիժ նշանակելիս Դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն որ վերջինս թեպետ նախկինում դատապարտված է եղել, սակայն դատապարտվել է անչափահաս տարիքում կատարված արարքների համար, ինչպես նաև դատական ակտով՝ համաներման կիրառմամբ ազատվել է պատժի կրումից, ինչպիսինը դատվածություն չի առաջացնում: Ինչ վերաբերվում է թիվ ԱՐԴ/0340/01/24 գործով կայացված դատավճռին, ապա հարկ է նկատել, որ այդ գործով կատարման կարգադրությունը տրվել է սույն գործով արարքը կատարելուց հետո, հետևաբար այն ևս որպես պատիժը և պատասխանատվությունը ծանրածնող հանգամանք չի կարող դիտվել:
Հաշվի առնելով մեղադրյալ Գագիկ Արմենի Խաչատրյանի կատարած հանցագործության բնույթը և հանրության համար վտանգավորության աստիճանը, դրա կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո նրա դրսևորած վարքագիծը, ինչպես նաև խախտված հասարակական հարաբերության սոցիալական նշանակությունը` դատարանը գտնում է, որ Գագիկ Արմենի Խաչատրյանն իր կատարած` ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության համար ենթակա է տուգանքի ձևով նախատեսված պատժի:
ՀՀ քրեական օրենսգրքի 59-րդ հոդվածի համաձայն՝
«1. Տուգանքը դրամական տուժանք է, որը նշանակվում է սույն օրենսգրքով նախատեսված դեպքերում և չափերով:
2. Տուգանքը որպես հիմնական պատիժ կարող է նշանակվել սույն օրենսգրքի Հատուկ մասով նախատեսված դեպքերում:
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
(…)
8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Եթե տուգանքը նշանակելուց հետո դատապարտյալի նյութական վիճակի վատթարացման հետևանքով նա զրկվում է տուգանքը վճարելու հնարավորությունից, ապա դատարանը, հաշվի առնելով դատապարտյալի դիրքորոշումը`
1) երկարաձգում է տուգանքի վճարման սահմանված վերջնաժամկետը` առավելագույնը 1 տարով,
2) նշանակում է հանրային աշխատանքներ` հանրային աշխատանքների 24 ժամը հաշվարկելով հանցանքը կատարելու պահին նվազագույն աշխատավարձի չափով:
(…)»:
Նկատի ունենալով, որ թեպետ մեղադրյալ Գագիկ Արմենի Խաչատրյանը հայտնեց, որ աշխատում է, սակայն ՀՀ ՊԵԿ տվյալների շտեմարանում նրա եկամուտների վերաբերյալ տեղեկատվություն առկա չէ, ուստի Դատարանը գտնում է, որ տուգանքի չափը պետք է հաշվարկել արարքը կատարելու պահի նվազագույն աշխատավարձի չափով, ինչպես նաև հաշվի առնելով, որ վերջինիս խնամքի տակ է գտնվում անչափահաս երեխան, Դատարանը գտնում է, որ վերջինիս նկատմամբ պետք է նշանակվի ՀՀ քրեական օրենսգրքի 344-րդ հոդվածի 1-ին մասի սանկցիայով նախատեսված տուգանքի նվազագույն՝ հնգապատիկի չափով: Ինչ վերաբերվում է թիվ ԱՐԴ/0340/01/24 գործով կայացված դատավճռով նշանակված տուգանք պատժին, ապա հաշվի առնելով, որ առկա չէ տեղեկատվություն, թե մեղադրյալը տուգանք պատժի որքան գումարն է վճարել, ինչպես նաև տարբեր դատավճռներով նշանակված տուգանք պատիժները կարող են կատարվել նաև առանձին, ուստի Դատարանը գտնում է, որ դատավճիռների համակցությամբ պատիժ նշանակելու նպատակը բացակայում է:
Միաժամանակ հաշվի առնելով մեղադրյալի հայտարարությունը, որ տուգանքը միանվագ վճարելու հնարավորություն չունի, Դատարանը գտնում է, որ մեղադրյալ Գագիկ Արմենի Խաչատրյանին պետք է թույլատրել նշանակված տուգանքը վճարել մաս առ մաս՝ 12 /տասներկու/ ամսվա ընթացքում:
ՀՀ քրեական օրենսգրքի 61-րդ հոդվածի համաձայն՝
«1. Որոշակի պաշտոններ զբաղեցնելու իրավունքից զրկելը՝ որոշակի պաշտոններ զբաղեցնելը, իսկ որոշակի գործունեությամբ զբաղվելու իրավունքից զրկելը՝ կատարված հանցանքի բնույթի հետ կապված որոշակի գործունեությամբ զբաղվելն արգելելն է:
(…)
4. Որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելը որպես լրացուցիչ պատիժ սահմանվում է ոչ մեծ և միջին ծանրության հանցագործությունների համար՝ 1-3 տարի, իսկ ծանր և առանձնապես ծանր հանցագործությունների համար՝ 1-5 տարի ժամկետով:
5. Որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելը որպես լրացուցիչ պատիժ կարող է նշանակվել այն դեպքում, երբ դատարանը, ելնելով հանցավորի պաշտոնավարության կամ որոշակի գործունեությամբ զբաղվելու ժամանակ նրա կատարած հանցանքի բնույթից, հնարավոր չի համարում անձի կողմից հետագա ժամանակահատվածում որոշակի պաշտոններ զբաղեցնելը կամ որոշակի գործունեությամբ զբաղվելը:
(…)»:
Քննարկելով մեղադրյալ Գագիկ Արմենի Խաչատրյանի նկատմամբ լրացուցիչ պատիժ նշանակելու հարցը` Դատարանը փաստում է, որ վերջինիս խնամքի տակ է գտնվում մեկ անչափահաս երեխան, իսկ այդ հանգամանքն էլ համադրելով կատարված արարքի բնույթի և հանրորեն վտանգավորության աստիճանի հետ, Դատարանը գտնում է, որ մեղադրյալ Գագիկ Արմենի Խաչատրյանի նկատմամբ լրացուցիչ պատիժ նշանակելու անհրաժեշտությունը բացակայում է:
Քննարկելով խափանման միջոցի հարցը` Դատարանը գտնում է, որ մեղադրյալ Գագիկ Արմենի Խաչատրյանի նկատմամբ «Բացակայելու արգելք» խափանման միջոցն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը:
Քննարկելով որպես արտավարութային փաստաթղթեր ապացույց ճանաչված Գագիկ Արմենի Խաչատրյանի նկատմամբ կազմված վարչական իրավախախտման վերաբերյալ թիվ 8180412562 արձանագրութան, թիվ 8180398971 արձանագրության, ալկոհոլի պարունակության ստուգման թիվ 00313 կտրոնի, ստուգաչափման թիվ 106349 վկայականի պատճենների, պարտավորագրի և ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տվյալների պատճենների պահպանման հարցը, Դատարանը գտնում է, որ դրանք անհրաժեշտ է թողնել կցված քրեական գործին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 347-350-րդ հոդվածներով` Դատարանը.

Վ Ճ Ռ Ե Ց

Գագիկ Արմենի Խաչատրյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով և դատապարտել տուգանքի` նվազագույն աշխատավարձի հնգապատիկի՝ 375.000 երեք հարյուր յոթանասունհինգ հազար) ՀՀ դրամի չափով՝ առանց լրացուցիչ պատժի:
Դատավճիռն օրինական ուժի մեջ մտնելուց հետո թույլատրել Գագիկ Արմենի Խաչատրյանին դատավճռով նշանակված 375.000 /երեք հարյուր յոթանասունհինգ հազար/ ՀՀ դրամը վճարել մաս առ մաս` 12 /տասներկու/ ամսվա ընթացքում, յուրաքանչյուր ամիս նվազագույնը 31.250 /երեսունմեկ հազար երկու հարյուր հիսուն/ ՀՀ դրամի չափով:
Գագիկ Արմենի Խաչատրյանի նկատմամբ ընտրված խափանման միջոց «Բացակայելու արգելքը» թողնել անփոփոխ մինչև դատավճռի օրինական ուժի մեջ մտնելը:
Ապացույց ճանաչված արտավարութային փաստաթղթերը թողնել կցված քրեական գործին:
Դատավճիռը կարող է բողոքարկվել ՀՀ քրեական վերաքննիչ դատարան` ստանալու օրվանից հետո մեկամսյա ժամկետում:

ԴԱՏԱՎՈՐ` Վ.Լ.ԳՐԻԳՈՐՅԱՆ