Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


ԵԴ1/3255/01/25

«04» հունիսի 2025թ. ք. Երևան

Երևան քաղաքի առաջին ատյանի ընդհանուր իրավասության քրեական դատարանը

նախագահությամբ՝ դատավոր՝ Ա. Մելիքսեթյանի,
քարտուղարությամբ՝ Ս. Ջավադյանի,

մասնակցությամբ՝
հանրային մեղադրող՝ Բ․ Ղազինյանի,

դռնբաց դատական նիստում, քննելով քրեական գործն ըստ մեղադրանքի՝
Հրայր Ռուբիկի Հայրապետյանի՝ /ծնված՝ 16․05․1980 թվականին Երևան քաղաքում, ազգությամբ հայ, ՀՀ քաղաքացի, նախկինում դատապարտված, դատվածությունը մարված, հաշվառված և բնակվող՝ ք․ Երևան, Սվաճյան փողոց, 60/1 շենք, բնակարան 34 հասցեում/ ՀՀ քրեական օրենսգրքի 344-րդ հոդվածի 1-ին մասով,

Պ Ա Ր Զ Ե Ց

1.Գործի դատավարական նախապատմությունը
1.1. 2024 թվականի մայիսի 31-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60531624 քրեական վարույթը:
1.2. 2024 թվականի հոկտեմբերի 16-ին որոշում է կայացվել թիվ 60531624 քրեական վարույթով Հրայր Ռուբիկի Հայրապետյանի նկատմամբ ՀՀ քրեական օրեսգրքի 344-րդ հոդվածի 1-ին մասով հանրային քրեական հետապնդում հարուցվելու մասին:
1.3. 2024 թվականի հոկտեմբերի 16-ին որոշում է կայացվել Հրայր Ռուբիկի Հայրապետյանի նկատմամբ որպես այլընտրանքային խափանման միջոց բացակայելու արգելքը կիրառելու մասին:
1․4․ Երևան քաղաքի առաջին ատյանի ընդհանուր իրավասության քրեական դատարանում 2024 թվականի նոյեմբերի 12-ին մուտք է եղել ՀՀ դատախազության Երևան քաղաքի Աջափնյակ և Դավթաշեն վարչական շրջանների դատախազությունից ստացված նախաքննական 60531624 համարով քրեական գործն ըստ մեղադրանքի Հրայր Ռուբիկի Հայրապետյանի՝ ՀՀ քրեական օրենսգրքի 344-րդ հոդվածի 1-ին մասով, քրեական գործին շնորհվել է ԵԴ1/3255/01/24 դատական գործի համարը, աշխատակազմին է հանձնվել 2024 թվականի նոյեմբերի 13-ին:
1․5․ 2024 թվականի նոյեմբերի 14-ին որոշում է կայացվել թիվ ԵԴ1/3255/01/24 քրեական գործով վարույթ ստանձնելու և նախնական դատալսումներ նշանակելու մասին:

2. Մեղադրանքի փաստական նկարագրությունը.
Հրայր Ռուբիկի Հայրապետյանը ՀՀ ՆԳՆ ոստիկանության պարեկային ծառայության ծառայողի կողմից 2023 թվականի նոյեմբերի 12-ին կայացված վարչական տույժ նշանակելու մասին թիվ 8180260240 որոշմամբ ենթարկված լինելով վարչական պատասխանատվության տրանսպորտային միջոց վարելու իրավունքից 1 տարի ժամկետով զրկելու ձևով, պատշաճ ծանուցված և տեղեկացված լինելով այդ մասին, 2024 թվականի մայիսի 12-ին ժամը 23:35-ի սահմաններում Երևան քաղաքի Աշտարակի խճուղում վարել է Հյունդայի մակնիշի 37 ZS 772 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի պարեկի կողմից նույն օրը կազմված վարչական իրավախախտման վերաբերյալ թիվ 8180401980 արձանագրությամբ:

3. Դատաքննությամբ հետազոտված թույլատրելի ապացույցները.
3.1 Զննում կատարելու մասին արձանագրությունը, համաձայն որի՝ 2023 թվականի նոյեմբերի 02-ին՝ ժամը 04:00-ին, Երևան քաղաքի Իսակովի պողոտայում ՀՀ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի կրտսեր պարեկ Աշոտ Մինասյանի կողմից կազմվել է վարչական իրավախախտման վերաբերյալ և արձանագրություն, համաձայն որի՝ Հրայր Ռուբիկի Հայրապետյանը (ծնված 16.05.1980 թվականին) 02.11.2023 թվականին ժամը 03:55-ին Երևան քաղաքի Իսակովի պողոտայում ոչ սթափ վիճակում վարել է <<Հյունդայի>> մակնիշի 0P-559-00 հաշվառման համարանիշով ավտոմեքենան: Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է «Վարորդը հրաժարվեց բացատրություն տալուց և ստորագրելուց» ձեռագիր գրառումը, իսկ արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում գրառում առկա չէ։ Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է 70.2 թիվը: Թիվ 8180260240 որոշումը կայացվել է 02.11.2023 թվականին, համաձայն որի՝ Հրայր Հայրապետյանին զրկել տ/մ վարելու իրավունքից 1 տարի ժամկետով, որոշում ընդունող անձ՝ Մինասյան:
3․2. Ալկոհոլի պարունակության ստուգման կտրոնի պատճենը, որի զննությամբ պարզվել է, որ սարքի համարն է 91100887, զննման համարը՝ 01646, զննման ամսաթիվը՝ 02.11.2023, ստուգումը կատարվել է ավտոմատ, ժամը 03:55:53-ին, ալկոհոլի պարունակությունը՝ 0.710 մգ/լ, վարորդի անուն ազգանունը՝ Հրայր Հայրապետյան, տրանսպորտային միջոցի համարանիշը՝ OP 559 00, ՊԾ ազգանուն՝ Սարգսյան, կրծքանշանի համար 08503: Առկա է նաև սթափության սարքի ստուգաչափման թիվ 102330 վկայականը, որի զննությամբ պարզվել է, որ ստուգաչափման թվականն է՝ 25.07.2023թ., այն ուժի մեջ է մինչև 2024 թվականի հուլիսի 25-ը: Չափման միջոցի անվանումը և տեսակը՝ ալկոմետր, գործարանային համարը՝ 91100887, տեսակը՝ <<Jupiter _ X/RP>>, չափման տիրույթը՝ 0.000- 2.000 մգ/լ:
3․3. Ճանապարհային ոստիկանության էլեկտրոնային ռեգիստրից արտատպված վարորդական վկայականի տվյալների քաղվածքը, որի զննությամբ պարզվել է, որ Հրայր Ռուբիկի Հայրապետյանը զրկված է վարորդական իրավունքի վկայականից Զրկման սկիզբ է համարվում՝ 02.11.2023 և ավարտ՝ 04.11.2024:
3․4. 2024 թվականի մայիսի 02-ին՝ ժամը 23:39-ին, Երևան քաղաքի Անաստաս Միկոյան փողոցում ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի ավագ պարեկ Սեյրան Ալեքսանյանի կողմից կազմված վարչական իրավախախտման վերաբերյալ թիվ 8180401980 արձանագրությունը, համաձայն որի՝ Հրայր Ռուբիկի Հայրապետյանը (ծնված 16.05.1980 թվականին) 2024 թվականի մայիսի 02-ին՝ ժամը 23:35-ին Երևան քաղաքի Աշտարակի խճուղիում՝ զրկված լինելով տրանսպորտային միջոցներ վարելու իրավունքից վարել է <<Հյունդայի>> մակնիշի 37 ZS 772 հաշվառման համարանիշի ավտոմեքենան: Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն, իսկ արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է նույնպես ստորագրություն: Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է 201․1 թիվը։
3․5. Որպես արտավարութային փաստաթուղթ ճանաչված՝ Հրայր Ռուբիկի Հայրապետյանի վերաբերյալ ՀՀ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի կրտսեր պարեկ Աշոտ Մինասյանի կողմից 02.11.2023 թվականին կազմված վարչական իրավախախտման վերաբերյալ թիվ 8180260240 արձանագրությունը և որոշումը, 02.11.2023 թվականի ալկոհոլի պարունակության ստուգման կտրոնի պատճենը, ստուգաչափման թիվ 102330 վկայականի պատճենը, ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի ավագ պարեկ Սեյրան Ալեքսանյանի կողմից 02.05.2024 թվականին կազմված վարչական իրավախախտման վերաբերյալ թիվ 8180401980 արձանագրությունը և ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվությունը։
3․6․ Մեղադրյալ Հրայր Ռուբիկի Հայրապետյանը դատարանում հրաժարվեց ցուցմունք տլաւց, սակայն չհրաժարվեց նախաքննության ընթաքում իր տված ցուցմունքից, ուստի հրապարակվեց Հրայր Ռուբիկի Հայրապետյանի՝ 2024 թվականի հոկտեմբերի 24-ի մեղադրյալի կարգավիճակով տված ցուցմունքը՝ հետևյալ բովանդակությամբ.՝
Ինձ ներկայացված մեղադրանքի շուրջ հայտնում եմ, որ ընդունում եմ մեղավորությունս կատարվածում և զղջում կատարածիս համար, օգտվելով իմ դատավարական կարգավիճակից հրաժարվում եմ ցուցմունք տալ և Ձեր հարցերին պատասխանել։ Ցուցմունքիս ավելացնելու ոչինչ չունեմ:

4. Դատարանի փաստական վերլուծությունները և դատարանի կողմից հաստատված փաստական հանգամանքները.
Հետազոտված ապացույցների հիման վրա Դատարանի կողմից հաստատվել են հետևյալ փաստական հանգամանքները.
Հրայր Ռուբիկի Հայրապետյանը ՀՀ ՆԳՆ ոստիկանության պարեկային ծառայության ծառայողի կողմից 2023 թվականի նոյեմբերի 12-ին կայացված վարչական տույժ նշանակելու մասին թիվ 8180260240 որոշմամբ ենթարկված լինելով վարչական պատասխանատվության տրանսպորտային միջոց վարելու իրավունքից 1 տարի ժամկետով զրկելու ձևով, պատշաճ ծանուցված և տեղեկացված լինելով այդ մասին, 2024 թվականի մայիսի 12-ին ժամը 23:35-ի սահմաններում Երևան քաղաքի Աշտարակի խճուղում վարել է Հյունդայի մակնիշի 37 ZS 772 հաշվառման համարանիշի ավտոմեքենան, որպիսի փաստն արձանագրվել է ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի պարեկի կողմից նույն օրը կազմված վարչական իրավախախտման վերաբերյալ թիվ 8180401980 արձանագրությամբ:

5. Դատարանի իրավական վերլուծությունները.
5.1. Վերլուծելով մեղադրյալ Հրայր Ռուբիկի Հայրապետյանին առաջադրված մեղադրանքը և հիմնվելով հետազոտված թույլատրելի ապացույցների վրա` Դատարանը գտնում է, որ.
- ապացուցված է մեղադրյալ Հրայր Ռուբիկի Հայրապետյանին վերագրվող փաստական հանգամանքները, մասնավորապես մեղադրյալ Հրայր Ռուբիկի Հայրապետյանի կողմից տրանսպորտային միջոցներ վարելու իրավունքից զրկված լինելու պայմաններում տրանսպորտային միջոց վարելը,
- ապացուցված է վերոգրյալ արարքի քրեական հակաիրավականությունը, որը նախատեսված է ՀՀ քրեական օրենսգրքի 344-րդ հոդվածի 1-ին մասով,
- ապացուցված է մեղադրյալ Հրայր Ռուբիկի Հայրապետյանի կողմից ՀՀ քրեական օրենսգրքի 344-րդ հոդվածի 1-ին մասով նախատեսված վերոգրյալ արարքը կատարելը.
- ապացուցված է մեղադրյալ Հրայր Ռուբիկի Հայրապետյանի մեղավորությունը ՀՀ քրեական օրենսգրքի 344-րդ հոդվածի 1-ին մասով նախատեսված արարքը կատարելու մեջ:

5.2. Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ Սահմանադրության 71-րդ հոդվածի համաձայն
«1. Հանցանք կատարած անձի պատժի հիմքը նրա մեղքն է:
2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին»:

ՀՀ քրեական օրենսգրքի 7-րդ հոդվածի 1-ին մասի համաձայն`
«1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»:

ՀՀ քրեական օրենսգրքի 55-րդ հոդվածի 2-րդ մասի համաձայն՝
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»:

ՀՀ քրեական օրենսգրքի 69-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ»:


5.3. Դատարանը որպես մեղադրյալի պատասխանատվությունը և պատիժը մեղմացնող հանգամանք հաշվի է առնում այն, որ ներկայացված մեղադրանքում իրեն լիովին մեղավոր է ճանաչել և զղջացել է:
Դատարանը որպես մեղադրյալի պատասխանատվությունը և պատիժը ծանրացնող հանգամանք արձանագրում է վերջինիս կողմից նույնաբնույթ արարքի կատարման համար դատապարտված, ընդ որում՝ հանրային աշխատանքների ձևով պատժի նշանակման, և դեռևս դատվածությունը մարված չլինելու պայմաններում սույն վարույթով իրեն մեղսագրվող արարքը կատարելու հանգամանքը։
5.4. Վերոգրյալ իրավանորմերի համատեքստում քննարկելով այն հարցը, թե ինչ պատժատեսակ և պատժաչափ պետք է նշանակվի մեղադրյալի նկատմամբ, հաշվի առնելով մեղադրյալի կատարած հանցագործության բնույթը և հանրության համար վտանգավորության աստիճանը, ինչպես նաև հանցագործության անմիջական օբյեկտի՝ հասարակության անվտանգության դեմ ուղղված ոտնձգության բնույթը և այդ ոլորտում պետության քրեական քաղաքականության ուղղվածությունը, դրանք համադրելով մեղադրյալի անձը բնութագրող տվյալների հետ, հաշվի առնելով նաև մեղադրյալի պատասխանատվությունը և պատիժը մեղմացնող և ծանրացնող հանգամանքների առկայությունը, ինչպես նաև մեղադյալի ցանկությունը՝ հանրային աշխատանքների ձևով պատժի նշանակման վերաբերյալ, Դատարանը գտնում է, որ մեղադրյալ Հրայր Ռուբիկի Հայրապետյանն իր կատարած՝ ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման համար ենթակա է պատժի հանրային աշխատանքների ձևով, իսկ առավել խիստ պատիժ նշանակելու հիմքերը բացակայում են:
Դատարանը գտնում է, որ իր կատարված ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման համար մեղադրյալի նկատմամբ պետք է նշանակվի հանրային աշխատանքներ՝ նվազագույն աշխատավարձի հնգապատիկի՝ 70 /յոթանասուն/ ժամ տևողությամբ, որով կապահովվի ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին և բավարար կլինի սոցիալական արդարությունը վերականգնելու, պատժի ենթարկված անձին վերասոցիալականացնելու և հանցագործությունները կանխելու համար: Դատարանի եզրահանգումը՝ հանրային աշխատանքներ պատժատեսակի նվազագույն չափով պատիժ չնշանակելու վերաբերյալ, պայմանավորված է նաև մեղադրյալի՝ իրեն մեղսագրվող արարքը դատվածություն ունենալու պայմաններում կատարելու հանգամանքով։
Անդրադառնալով դատավճիռների համակցությամբ պատիժները գումարելու հարցին, Դատարանի գնահատմամբ թեև մեղադրյալի նկատմամբ առկա է նշանակված հանրային աշխատանքներ պատժատեսակ, սակայն մեղադրյալի վերաբերյալ ձև 8 տեղեկանքի համաձայն՝ հանրային աշխատանքներ պատիժը փաստացի կատարվել է 10.06.2024թ., ուստի նշված իրավական ռեժիմով սույն պատժին գումարելու հիմք առկա չէ:
5.5. Անդրադառնալով մեղադրյալի նկատմամբ լրացուցիչ պատիժ նշանակելու հարցին, Դատարանն արձանագրում է, որ մեղադրանքի կողմը նման միջնորդությամբ հանդես չեկավ, իսկ Դատարանի գնահատմամբ միայն հիմնական պատիժը՝ հանրային աշխատանքները, բավարար է պատժի նպատակներին հասնելու համար:
5.6. Դատարանն արձանագրում է, որ սույն գործով գույքային հայց չի հարուցվել, բռնագրավման ենթակա գույքի, ինչպես նաև գույքի արգելադրման վերաբերյալ տվյալներ գործում առկա չեն:
5.7. Անդրադառնալով ապացույցների տնօրինման հարցին՝ Դատարանը գտնում է, որ 2024 թվականի հոկտեմբերի 15-ին արտավարութային փաստաթուղթ ճանաչված Հրայր Ռուբիկի Հայրապետյանի վերաբերյալ ՀՀ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի կրտսեր պարեկ Աշոտ Մինասյանի կողմից 02.11.2023 թվականին կազմված վարչական իրավախախտման վերաբերյալ թիվ 8180260240 արձանագրությունը և որոշումը, 02.11.2023 թվականի ալկոհոլի պարունակության ստուգման կտրոնի պատճենը, ստուգաչափման թիվ 102330 վկայականի պատճենը, ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի ավագ պարեկ Սեյրան Ալեքսանյանի կողմից 02.05.2024 թվականին կազմված վարչական իրավախախտման վերաբերյալ թիվ 8180401980 արձանագրությունը և ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվությունը պետք է պահել վարույթի նյութերի հետ՝ դրանք պահելու ամբողջ ընթացքում:
5.8. Քննարկելով խափանման միջոցի հարցը` Դատարանը գտնում է, որ մեղադրյալի նկատմամբ որպես խափանման միջոց բացակայելու արգելքն ընտրված է ճիշտ և այն վերացվելու կամ փոփոխվելու ենթակա չէ մինչև դատավճռի օրինական ուժի մեջ մտնելը:
5.9. Քննարկելով վարութային ծախսերի հարցը՝ Դատարանն արձանագրում է, որ այդպիսիք առկա չեն:
Վերոգրյալի հիման վրա և ղեկավարվելով Հայաստանի Հանրապետության քրեական դատավարության օրենսգրքի 100-րդ, 167-րդ, 347-350-րդ, 352-353-րդ, 364-րդ հոդվածներով, Դատարանը`

Վ Ճ Ռ Ե Ց

Մեղադրյալ Հրայր Ռուբիկի Հայրապետյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցանքում և պատիժ նշանակել հանրային աշխատանքներ 70 /յոթանասուն/ ժամ:
Մեղադրյալ Հրայր Ռուբիկի Հայրապետյանի նկատմամբ ընտրված խափանման միջոց բացակայելու արգելքը պահպանել՝ մինչև դատավճռի օրինական ուժի մեջ մտնելը:
Վարութային ծախսերի հարցը համարել լուծված։
Վարույթի նյութերին կցված արտավարութային փաստաթղթերը պահել վարույթի նյութերի հետ՝ դրանք պահելու ամբողջ ընթացքում:
Դատավճիռը կարող է բողոքարկվել ՀՀ վերաքննիչ քրեական դատարան` դատական ակտը ստանալուց հետո մեկամսյա ժամկետում:


ԴԱՏԱՎՈՐ՝ Ա. ՄԵԼԻՔՍԵԹՅԱՆ