ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Գործ թիվ ԵԴ1/3212/01/24

ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆԸ
Նախագահությամբ՝ դատավոր Դավիթ Արղամանյանի,
քարտուղարությամբ՝ Դավիթ Հակոբյանի,

մասնակցությամբ՝

հանրային մեղադրող՝ Հրանուշ Միքաելյանի,
մեղադրյալ՝ Կարեն Սարգսյանի,

2025թ. փետրվարի 5 ք.Երևան,

դռնբաց դատական նիստում քննելով քրեական վարույթն ըստ մեղադրանքի
Կարեն Ատոմի Սարգսյանի
(ծնված՝ 07.08.1988թ․, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին՝ երեք անչափահաս երեխա, նախկինում չդատված, հաշվառված՝ Արագածոտնի մարզի Շենավան համայնքի 21-րդ փողոցի 6-րդ տանը, բնակվող՝ Երևան քաղաքի, Սիլիկյան թաղամասի, 4-րդ փողոցի, 60/2 հասցեում)
ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով՝




ՊԱՐԶԵՑ
1. Գործի դատավարական նախապատմությունը.
1․ 2023 թվականի օգոստոսի 31-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60260823 քրեական վարույթը (այսուհետ նաև՝ քրեական վարույթ)։
2. 2024 թվականի հուլիսի 26-ի ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Նարեկ Պետրոսյանի որոշմամբ թիվ 60134423 և 60260823 քրեական վարույթները միացվել են մեկ վարույթում և նախաքննությունը շարունակվել է թիվ 60260823 համարի ներքո։
3. 2024թ. հոկտեմբերի 28-ին Երևան քաղաքի Աջափնյակ և Դավթաշեն վարչական շրջանների դատախազության ավագ դատախազ Հ.Միքաելյանի որոշմամբ թիվ 60260823 քրեական վարույթով Կարեն Ատոմի Սարգսյանի նկատմամբ 344-րդ հոդվածի 1-ին մասով և 344-րդ հոդվածի 2-րդ մասով հարուցվել է հանրային քրեական հետապնդում։
4. 2024թ. հոկտեմբերի 29-ի որոշմամբ Կարեն Ատոմի Սարգսյանի նկատմամբ որպես խափանման միջոց է կիրառվել բացակայելու արգելքը։
5. 2024թ. հոկտեմբերի 31-ին Աջափնյակ և Դավթաշեն վարչական շրջանների դատախազությունից մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 60260823 քրեական վարույթը, քրեական գործին շնորհվել է ԵԴ1/3212/01/24 համարը։
6. 2024թ. նոյեմբերի 14-ին Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան) որոշում է կայացրել թիվ ԵԴ1/3212/01/24 քրեական գործով վարույթ ստանձնելու և նախնական դատալսումներ նշանակելու մասին։
7․ 2024 թվականի նոյեմբերի 28-ին որոշմամբ Կարեն Ատոմի Սարգսյանի նկատմամբ կիրառված «բացակայելու արգելք» այլընտրանքային խափանման միջոցը թողնվել է անփոփոխ։
8․ Նույն օրը Կարեն Ատոմի Սարգսյանի նկատմամբ կայացվել է մեղադրական վերդիկտ, համաձայն որի՝ Կարեն Ատոմի Սարգսյանը մեղավոր է ճանաչվել ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործությունների կատարման մեջ։
2. Մեղադրանքի փաստական նկարագրությունը.
Կարեն Ատոմի Սարգսյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով՝ այն արարքների համար, որ նա՝
«(...) տեղյակ լինելով ՀՀ ՆԳՆ ՈՍ Պարեկային ծառայությունում 2023 թվականի հունվարի 20-ին իր վերաբերյալ կայացված վարչական իրավախախտման գործով թիվ 8180244132 որոշման, այն է՝ մեկ տարի ժամկետով՝ 2023 թվականի հունվարի 20-ից մինչև 2024 թվականի հունվարի 22-ն ընկած ժամանակահատվածում, տրանսպորտային միջոցներ վարելու իրավունքից զրկման մասին, զրկման ժամկետը չլրացած՝ 2023 թվականի փետրվարի 28-ին՝ ժամը 12:50-ի սահմաններում, Երևան քաղաքի Սիլիկյան 10-րդ փողոցում վարել է «Կրայսլեր» մակնիշի 37PS672 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի պարեկի կողմից կազմվել է վարչական իրավախախտման մասին թիվ 8180246340 արձանագրությունը:
Այսինքն՝ Կարեն Ատոմի Սարգսյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 344-րդ հոդվածի 1-ին մասով:
Բացի այդ, Կարեն Ատոմի Սարգսյանը, տեղյակ լինելով ՀՀ ՆԳՆ ՈՍ Պարեկային ծառայությունում 2023 թվականի հունվարի 20-ին իր վերաբերյալ կայացված վարչական իրավախախտման գործով թիվ 8180244132 որոշման, այն է՝ մեկ տարի ժամկետով՝ 2023 թվականի հունվարի 20-ից մինչև 2024 թվականի հունվարի 22-ն ընկած ժամանակահատվածում, տրանսպորտային միջոցներ վարելու իրավունքից զրկման մասին և գտնվելով հարբած (ոչ սթափ) վիճակում՝ մեկ լիտր արտաշնչած օդի մեջ մաքուր ալկոհոլի 0.923 միլիգրամ պարունակությամբ, 2023 թվականի նոյեմբերի 26-ին՝ ժամը 22:50-ի սահմաններում, վարել է «Կրայսլեր» մակնիշի 10LQ777 հաշվառման համարանիշի ավտոմեքենան Երևան քաղաքի Գ.Չաուշի հրապարակում, որի վերաբերյալ ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի պարեկի կողմից կազմվել է վարչական իրավախախտման մասին թիվ 8180265688 արձանագրությունը:
Այսինքն՝ Կարեն Ատոմի Սարգսյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 344-րդ հոդվածի 2-րդ մասով:
Այսպիսով՝ Կարեն Ատոմի Սարգսյանին մեղսագրվում է ՀՀ քրեական օրենսգրքի 344-րդ հոդվածի 1-ին մասով և 344-րդ հոդվածի 2-րդ մասով նախատեսված հանցավոր արարքների կատարում։
(...)»
3.1. Հիմնական դատալսումների ընթացքում հետազոտված թույլատրելի ապացույցները.
- Վարչական իրավախախտման վերաբերյալ ՀՀ ոստիկանության Պարեկային ծառայության աշխատակցի կողմից 28.02.2023 թվականին կազմված թիվ 8180246340 արձանագրությունը, համաձայն որի՝ Կարեն Ատոմի Սարգսյանը (ծնված՝ 07.08.1988թ.) 28.02.2023 թվականին, ժամը 12:50-ին Երևան քաղաքի Սիլիկյան 10-րդ փողոցում «Կրայսլեռ» մակնիշի 37PS672 հաշվառման համարանիշի ավտոմեքենան վարել է տրասնպորտային միջոցներ վարելու իրավունքից զրկված վիճակում, վարչական իրավախախտում կատարած անձի բացատրություն դաշտում առկա է «առողջական խնդիրների հետ կապված ստիպված էի մոտենալ դեղատուն» գրառումը, ծանուցման ստացման դաշտի դիմաց առկա է ստորագրություն և «Սարգսյան» գրառումը (հատոր 1, վ/թ 3),
- վարչական իրավախախտման վերաբերյալ ՀՀ ոստիկանության պարեկային ծառայության
աշխատակցի կողմից 20.01.2023 թվականին կազմված թիվ 8180244132 արձանագրությունը, համաձայն որի՝ Կարեն Ատոմի Սարգսյանը (ծնված՝ 07.08.1988թ.) 20.01.2023 թվականին ժամը 03:45-ին Երևան քաղաքի Ամիրյան փողոցում «Կրայսլեռ» մակնիշի 37PS672 հաշվառման համարանիշի ավտոմեքենան վարել է ոչ սթափ վիճակում՝ վարորդի մեկ լիտր արտաշնչած օդի մեջ մաքուր ալկոհոլի պարունակությունը գերազանցում է 0,5 միլիգրամը, սարքի համար՝ 91101092, զննման համար՝ 00122: Արձանագրությանը կից նույն օրը կայացված վարչական իրավախախտման գործով թիվ 8180244132 որոշման համաձայն Կարեն Սարգսյանը զրկվել է տրանսպորտային միջոցներ վարելու իրավունքից՝ 1 տարի ժամկետով, որոշման ստորին հատվածում առկա գրառման համաձայն՝ որոշման պատճենը վարորդը ստացել է 20.01.2023 թվականին, որի վերաբերյալ առկա է ստորագրություն, վարչական իրավախախտում կատարած անձի բացատրության դաշտում առկա է «ես համաձայն չեմ սարքի ճշտության հետ, ես օգտագործել եմ 3 բաժակ օղի» գրառումը և ստորագրություն (հատոր 1, վ/թ 5),
- սթափության ստուգաչափման 20.01.2023 թվականի կտրոնը, համաձայն որի՝ թիվ 91101092 սարքով 20.01.2023 թվականին, ժամը 03:48-ին, կատարվել է թիվ 00122 զննումը, որով պարզվել է, որ վարորդ Կարեն Սարգսյանի (վարորդական վկայական Բ1000920, տրանսպորտային միջոց՝ 37 PS 672) մոտ ալկոհոլի պարունակությունը կազմում է 0.978մգ/լ, սարքի դատարկ թեստը ցույց է տվել 0,000 մգ/լ արդյունք, վարորդի ազգանվան կողքին առկա է ստորագրություն (հատոր 1, վ/թ 6),
- ստուգաչափման թիվ 085648 վկայականը, համաձայն որի՝ թիվ 91101092 ալկոտեստերը ստուգաչափվել է 06.12.2022 թվականին, ստուգաչափումը ուժի մեջ է եղել մինչև 06.12.2023 թվականը, սարքի սխալանքը կազմում է 0-ից 0,1-ի դեպքում +/-5%, 0,1-ից 0,15-ի դեպքում +/-8%, 0,15-ից ավելիի դեպքում +/-10% (հատոր 1, վ/թ 7),
- ճանապարհային ոստիկանության էլեկտրոնային ռեգիստրից արտատպված քաղվածքը, համաձայն որի՝ Կարեն Ատոմի Սարգսյանը տրանսպորտային միջոցներ վարելու իրավունքից զրկված է եղել 20.01.2023-22.01.2024թթ. ժամանակահատվածում (հատոր 1, վ/թ 4, 29),
- ստուգաչափման թիվ 102321 վկայականը, համաձայն որի՝ թիվ 91101134 ալկոտեստերը ստուգաչափվել է 27.07.2023 թվականին, ստուգաչափումը ուժի մեջ է եղել մինչև 27.07.2024 թվականը, սարքի սխալանքը կազմում է 0-ից 0,1-ի դեպքում +/-5%, 0,1-ից 0,15-ի դեպքում +/-8%, 0,15-ից ավելիի դեպքում +/-10% (հատոր 1, վ/թ 28),
- սթափության ստուգաչափման 26.11.2023 թվականի կտրոնը, համաձայն որի՝ թիվ 91101134 սարքով կատարվել է 26.11.2023 թվականին ժամը 23:59-ին թիվ 00968 զննումը, որով պարզվել է, որ վարորդ Կարեն Սարգսյանի (ՀԾՀ՝ 708880785, տրանսպորտային միջոց՝ 10LQ777) մոտ ալկոհոլի պարունակությունը կազմում է 0.923մգ/լ, սարքի դատարկ թեստը ցույց է տվել 0,000 մգ/լ արդյունք, վարորդի ազգանվան կողքին առկա է ստորագրություն (հատոր 1, վ/թ 34),
- վարչական իրավախախտման վերաբերյալ ՀՀ ոստիկանության Պարեկային ծառայության աշխատակցի կողմից 27.11.2023 թվականին կազմված թիվ 8180265688 արձանագրությունը՝ համաձայն որի՝ Կարեն Ատոմի Սարգսյանը (ծնված՝ 07.08.1988թ.) 27.11.2023 թվականին, ժամը 22:50-ին, Երևան քաղաքի Գ.Չաուշի հրապարակում «Կրայսլեռ» մակնիշի 10LQ777 հաշվառման համարանիշի ավտոմեքենան վարել է տրասնպորտային միջոցներ վարելու իրավունքից զրկված և ոչ սթափ վիճակում, սարքի համար՝ 91101134, զննության համար՝ 00968, Վարչական իրավախախտում կատարած անձի բացատրություն դաշտում առկա է «թարթիչ չմիացնելու համար են կանգնեցրել են, որի համար համաձայն չեմ» գրառումը և ստորագրություն, ծանուցման ստացման դաշտի դիմաց առկա է ստորագրություն (հատոր 1, վ/թ 35),
- վերոնշյալ փաստաթղթերը զննության ենթարկելու մասին 2024 թվականի հոկտեմբերի 28-ի արձանագրությունը (հատոր 1, վ/թ 51-52)։

- մեղադրյալ Կարեն Սարգսյանն՝ օգտվելով իր իրավունքից, հրաժարվեց Դատարանում ցուցմունք տալուց, պնդեց նախաքննության ընթացքում վկայի և մեղադրյալի կարգավիճակում տված ցուցմունքները, ուստի հանրային մեղադրողի կողմից հրապարակվեցին վերոնշյալ ցուցմունքները, համաձայն որոնց՝ ներկայացված մեղադրանքում մեղադրյալ Կարեն Ատոմի Սարգսյանը իրեն մեղավոր է ճանաչել ամբողջությամբ և ցուցմունքներով հայտնել է, որ 28.02.2023 թվականին «Կրայսլեռ» մակնիշի 37PS672 հաշվառման համարանիշի ավտոմեքենան վարել է տրանսպորտային միջոցներ վարելու իրավունքից զրկված վիճակում և գիտակցել է, որ իրավունք չունի տրասնպորտային միջոցներ վարել, սակայն վարել է, քանի որ անհրաժեշտություն է եղել գնալ դեղատուն: Նշել է, որ գիտակցել է, որ 20.01.2023 թվականի թիվ 8180244132 որոշմամբ իրեն տրասնպորտային միջոցներ վարելու իրավունքից զրկել են մեկ տարի ժամկետով և որ այդ ժամանակահատվածում իրավունք չունի վարել տրանսպորտային միջոցներ: 20.01.2023 թվականին, երբ կազմվել է թիվ 8180244132 արձանագրությունը մեքենան ինքն է վարել և եղել է ոչ սթափ վիճակում, սակայն չի պատկերացրել, որ 3 բաժակ օղուց կարող է սթափության սարքը նման արդյունք ցույց տալ, որի առնչությամբ արել է հայտարարություն: Հայտնել է, որ 27.11.2023 թվականին, երբ կազմվել է թիվ 8180265688 արձանագրությունը, ինքն է եղել մեքենայի ղեկին և տրանսպորտային միջոցը վարել է ոչ սթափ վիճակում՝ գիտակցելով, որ դեռևս զրկված է տրանսպորտային միջոցներ վարելու իրավունքից, սակայն վարել է, քանի որ կրկին անհրաժեշտ է եղել դեղատուն գնալ: Հավելել է, որ զղջում է իր արարքների համար և խնդրում է հնարավորինս մեղմ պատիժ սահմանել, քանի որ ունի 3 անչափահաս երեխա և միայնակ է կրում ընտանիքի ֆինանսական հոգսերը՝ այդ թվում նաև իր կնոջ և իր մայրիկի (հատոր 1, վ/թ 48-50, 78-80)։
3.2. Լրացուցիչ դատալսումների ընթացքում հետազոտված անհրաժեշտ ապացույցները.
- 2024 թվականի նոյեմբերի 28-ին արտատպված Կարեն Ատոմի Սարգսյանի ՔԿԱԳ տվյալների շտեմարանի քաղվածքը. առկա է Դավիթ Կարենի Սարգսյանի (ծնված՝ 06.08.2015թ.) ծննդի պետական գրանցման մասին թիվ 186 ակտը, վերջինի հայրության ճանաչման պետական գրանցման մասին թիվ 54 ակտը, Նարեկ Կարենի Սարգսյանի (ծնված՝ 26.10.2019թ.) ծննդի պետական գրանցման մասին թիվ 185 ակտը, վերջինի հայրության ճանաչման պետական գրանցման մասին թիվ 73 ակտը, Հայկ Կարենի Սարգսյանի (ծնված՝ 17.01.2021թ.) ծննդի պետական գրանցման մասին թիվ 454 ակտը, վերջինի հայրության ճանաչման պետական գրանցման մասին թիվ 90 ակտը, ամուսնության պետական գրանցման մասին թիվ 14190 ակտը,
- 2024 թվականի նոյեմբերի 28-ին արտատպված ձև 8 տեղեկանքը, համաձայն որի Կարեն Ատոմի Սարգսյանը նախկինում դատված չի եղել,
- 2024 թվականի նոյեմբերի 28-ին արտատպված ՊԵԿ տվյալների շտեմարանի քաղվածքները, համաձայն որոնց Կարեն Սարգսյանը 2022 թվականի փետրվարի 28-ից մինչև 2023 թվականի փետրվարի 28-ը ներառյալ ընկած ժամանակահատվածում ստացել է 86.666 ՀՀ դրամի չափով աշխատավարձ՝ ներառյալ հարկերը, տուրքերը կամ այլ վճարները, և 3.555.560 ՀՀ դրամի չափով վարձավճար, իսկ 2022 թվականի նոյեմբերի 26-ից մինչև 2023 թվականի նոյեմբերի 26-ը ներառյալ ընկած ժամանակահատվածում՝ 4.933.751 ՀՀ դրամի չափով աշխատավարձ՝ հարկերը, տուրքերը կամ այլ վճարները, և 3.555.560 ՀՀ դրամի չափով վարձավճար,
- ՀՀ պետական եկամուտների կոմիտե կատարված հարցումների պատասխանները, համաձայն որոնց՝ Կարեն Սարգսյանը 2022 թվականի փետրվարի 28-ից մինչև 2023 թվականի փետրվարի 28-ը ներառյալ ընկած ժամանակահատվածում ստացել է 63.500 ՀՀ դրամի չափով աշխատավարձ՝ չհաշված հարկերը, տուրքերը կամ այլ վճարները («մաքուր» աշխատավարձ), իսկ 2022 թվականի նոյեմբերի 26-ից մինչև 2023 թվականի նոյեմբերի 26-ը ներառյալ ընկած ժամանակահատվածում՝ 3.596.246 ՀՀ դրամի չափով աշխատավարձ՝ չհաշված հարկերը, տուրքերը կամ այլ վճարները («մաքուր» աշխատավարձ)։
4. Դատարանի իրավական վերլուծությունները և եզրահանգումը.
4.1. Գնահատելով դատաքննության ընթացքում հետազոտված ապացույցների յուրաքանչյուրը վերաբերելիության, թույլատրելիության և հավաստիության տեսանկյունից՝ Դատարանն արձանագրում է, որ ապացույցների հետազոտման ընթացքում չեն արձանագրվել դրանց ձեռք բերման պատշաճ իրավական ընթացակարգի խախտումներ, ուստի հետազոտված ապացույցներից յուրաքանչյուրը թույլատրելի է։
Միևնույն ժամանակ Դատարանն արձանագրում է, որ հետազոտված ապացույցներից յուրաքանչյուրը պարունակում է տեղեկություններ գործի համար նշանակություն ունեցող փաստերի վերաբերյալ՝ հետևաբար հետազոտված ապացույցներից յուրաքանչյուրը բավարարում են ապացույցի վերաբերելիության պահանջին։
Դատարանն արձանագրում է, որ հետազոտված ապացույցներից ոչ մեկը չի պարունակում հակասական տվյալներ գործի փաստերի վերաբերյալ, ուստի դրանք գնահատվում են բավարար՝ հավաստիության տեսանկյունից։
4.2. Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով՝ Դատարանը հաստատված է համարում, որ Կարեն Սարգսյանը տեղյակ լինելով ՀՀ ՆԳՆ ոստիկանության պարեկային ծառայությունում 2023 թվականի հունվարի 20-ին իր վերաբերյալ կայացված վարչական իրավախախտման գործով թիվ 8180244132 որոշման, այն է՝ մեկ տարի ժամկետով՝ 2023 թվականի հունվարի 20-ից մինչև 2024 թվականի հունվարի 22-ն ընկած ժամանակահատվածում, տրանսպորտային միջոցներ վարելու իրավունքից զրկման մասին, զրկման ժամկետը չլրացած՝ 2023 թվականի փետրվարի 28-ին՝ ժամը 12:50-ի սահմաններում, Երևան քաղաքի Սիլիկյան 10-րդ փողոցում վարել է «Կրայսլեր» մակնիշի 37PS672 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 1-ին վաշտի պարեկի կողմից կազմվել է վարչական իրավախախտման մասին թիվ 8180246340 արձանագրությունը:
Բացի այդ, Կարեն Ատոմի Սարգսյանը, տեղյակ լինելով ՀՀ ՆԳՆ ոստիկանության պարեկային ծառայությունում 2023 թվականի հունվարի 20-ին իր վերաբերյալ կայացված վարչական իրավախախտման գործով թիվ 8180244132 որոշման, այն է՝ մեկ տարի ժամկետով՝ 2023 թվականի հունվարի 20-ից մինչև 2024 թվականի հունվարի 22-ն ընկած ժամանակահատվածում, տրանսպորտային միջոցներ վարելու իրավունքից զրկման մասին և գտնվելով հարբած (ոչ սթափ) վիճակում՝ մեկ լիտր արտաշնչած օդի մեջ մաքուր ալկոհոլի 0.923 միլիգրամ պարունակությամբ, 2023 թվականի նոյեմբերի 26-ին՝ ժամը 22:50-ի սահմաններում, վարել է «Կրայսլեր» մակնիշի 10LQ777 հաշվառման համարանիշի ավտոմեքենան Երևան քաղաքի Գ.Չաուշի հրապարակում, որի վերաբերյալ ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի պարեկի կողմից կազմվել է վարչական իրավախախտման մասին թիվ 8180265688 արձանագրությունը:
Այսինքն՝ ապացուցված է Կարեն Ատոմի Սարգսյանի կողմից մեղավորությամբ ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով նախատեսված հակաիրավական արարքների կատարումը։
ՀՀ քրեական օրենսգրքի 344-րդ հոդվածի 1-ին մասի համաձայն՝
«1. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը՝
պատժվում է տուգանքով` առավելագույնը տասնապատիկի չափով, կամ հանրային աշխատանքներով` առավելագույնը հարյուր ժամ տևողությամբ, կամ կարճաժամկետ ազատազրկմամբ՝ առավելագույնը մեկ ամիս ժամկետով:»
ՀՀ քրեական օրենսգրքի 344-րդ հոդվածի 2-րդ մասի համաձայն՝
«2. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված կամ տրանսպորտային միջոց վարելու իրավունք չունեցող անձի կողմից հարբած (ոչ սթափ) վիճակում տրանսպորտային միջոց վարելը կամ այդ անձի կողմից սթափության վիճակի զննություն անցնելուց հրաժարվելը կամ խուսափելը`
պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:»
Անդրադառնալով դատապարտված մեղադրյալի պատասխանատվությունը և պատիժը մեղմացնող հանգամանքներին՝ Դատարանն արձանագրում է, որ որպես քրեական պատասխանատվությունը կամ պատիժը մեղմացնող հանգամանք Դատարանն ապացուցված է համարում Կարեն Սարգսյանի խնամքին երեք անչափահաս երեխաների՝ Դավիթ Կարենի Սարգսյանի (ծնված՝ 06.08.2015թ.), Նարեկ Կարենի Սարգսյանի (ծնված՝ 26.10.2019թ.) և Հայկ Կարենի Սարգսյանի (ծնված՝ 17.01.2021թ.) առկայության փաստը, այն է՝ ՀՀ քրեական օրենսգրքի 70-րդ հոդվածի 1-ին մասի 4-րդ կետը։
Անդրադառնալով դատապարտված մեղադրյալի պատասխանատվությունը և պատիժը ծանրացնող հանգամանքների հարցին՝ Դատարանն արձանագրում է, որ ՀՀ քրեական օրենսգրքի 71-րդ հոդվածով սահմանված հանգամանքներ առկա չեն։
Անդրադառնալով մեղադրյալ Կարեն Սարգսյանի անձը բնութագրող հանգամանքներին՝ Դատարանն արձանագրում է, որ Կարեն Սարգսյանը նախկինում դատապարտված չի եղել՝ բնութագրվում է դրականորեն, ընդունել է մեղքը, զղջացել է կատարածի համար։
Անդրադառնալով մեղադրյալի կողմից պատժի ենթակա լինելու հարցին՝ Դատարանն արձանագրում է, որ մեղադրյալ Կարեն Սարգսյանին քրեական պատասխանատվությունից, պատժից ազատելու հիմքեր առկա չեն, հետևաբար նա ենթակա է պատժի՝ իր կատարած հանցանքի համար։
Մեղադրյալ Կարեն Սարգսյանի նկատմամբ պատիժ նշանակելու հարցին անդրադառնալով՝ Դատարանն արձանագրում է հետևյալը.
ՀՀ քրեական օրենսգրքի 7-րդ հոդվածի 1-ին մասի համաձայն՝
«1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:»
Նույն օրենսգրքի 55-րդ հոդվածի համաձայն՝
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»
Նույն օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
(…)»
Դատարանն արձանագրում է, որ ՀՀ քրեական օրենսգրքի 344-րդ հոդվածի 1-ին մասով սահմանված պատժատեսակները երեքն են՝ տուգանք, հանրային աշխատանքներ և կարճաժամկետ ազատազրկում, ՀՀ քրեական օրենսգրքի 344-րդ հոդվածի 2-րդ մասով սահմանված պատժատեսակները չորսը՝ տուգանք, հանրային աշխատանքներ, կարճաժամկետ ազատազրկում և ազատազրկում։ Նկատի ունենալով, որ նշված հոդվածները հանդիսանում են ոչ մեծ ծանրության հանցանքներ, իսկ մեղադրյալը հանդիսանում է առաջին անգամ հանցանք կատարած անձ, հաշվի առնելով նաև կատարված արարքների հանրային վտանգավորությունն ու առաջացած հետևանքները՝ Դատարանը գտնում է, որ պատժի նպատակներին հնարավոր է հասնել տուգանք պատժատեսակի կիրառմամբ։
ՀՀ քրեական օրենսգրքի 59-րդ հոդվածի համաձայն՝
«1. Տուգանքը դրամական տուժանք է, որը նշանակվում է սույն օրենսգրքով նախատեսված դեպքերում և չափերով:
2. Տուգանքը որպես հիմնական պատիժ կարող է նշանակվել սույն օրենսգրքի Հատուկ մասով նախատեսված դեպքերում:
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
(…)
7. Տուգանքի նշանակման հնարավորությունը և չափը դատարանը որոշում է՝ հաշվի առնելով հանցագործության ծանրությունը, հանցագործությամբ պատճառված վնասի բնույթն ու չափը, հանցագործությամբ ստացված գույքային կամ ոչ գույքային բնույթի օգուտները, դատապարտվողի ու նրա ընտանիքի գույքային դրությունը, ինչպես նաև դատապարտվողի՝ եկամուտ ստանալու հնարավորությունը կամ նրան պատկանող այնպիսի գույքի առկայությունը, որի վրա կարող է բռնագանձում տարածվել։
8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Եթե տուգանքը նշանակելուց հետո դատապարտյալի նյութական վիճակի վատթարացման հետևանքով նա զրկվում է տուգանքը վճարելու հնարավորությունից, ապա դատարանը, հաշվի առնելով դատապարտյալի դիրքորոշումը`
1) երկարաձգում է տուգանքի վճարման սահմանված վերջնաժամկետը` առավելագույնը 1 տարով,
2) նշանակում է հանրային աշխատանքներ` հանրային աշխատանքների 24 ժամը հաշվարկելով հանցանքը կատարելու պահին նվազագույն աշխատավարձի չափով:
(…)»
Նույն օրենսգրքի 3-րդ հոդվածի 1-ին մասի համաձայն՝
1. Սույն օրենսգրքում օգտագործվում են հետևյալ հասկացությունները.
(…)
6) ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, անձի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտը (շահաբաժինը, տոկոսը, ռոյալթին, վարձակալական վճարը): Ամսական եկամուտը հաշվարկելիս հաշվի չեն առնվում դրանց համար վճարվող հարկերը, տուրքերը կամ այլ վճարներ.
7) նվազագույն աշխատավարձ՝ «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափը.
(…)»
Վերոգրյալ իրավանորմերը վկայում են այն մասին, որ տուգանքը որպես հիմնական պատիժ նշանակվում հանցանք կատարած անձի ամսական եկամտի հնգապատիկից հիսնապատիկի չափով, իսկ մեղադրյալին մեղսագրվող արարքներից մեկի համար՝ առավելագույնը տասնապատիկի չափով, իսկ մյուսի համար՝ առավելագույնը քսանապատիկի չափով։
Հետազոտելով 2024 թվականի նոյեմբերի 28-ին արտատպված ՊԵԿ տվյալների շտեմարանի քաղվածքները, ինչպես նաև ՀՀ պետական եկամուտների կոմիտե կատարված հարցումների պատասխանները պարզ է դառնում, որ Կարեն Սարգսյանի եկամուտների վերաբերյալ առկա են տվյալներ, որոնց հաշվարկով պարզ է դառնում, որ հանցանքները ավարտվելու օրերին նախորդող 12 ամիսների ընթացքում անձի ստացած միջին ամսական եկամտի 35 տոկոսը գերազանցում է հանցանքը կատարելու պահին նվազագույն աշխատավարձի չափը, մասնավորապես՝ 2022 թվականի փետրվարի 28-ից մինչև 2023 թվականի փետրվարի 28-ն ընկած ժամանակահատվածում Կարեն Սարգսյանը ստացել է 63.500 ՀՀ դրամի չափով աշխատավարձ՝ չհաշված հարկերը, տուրքերը կամ այլ վճարները («մաքուր» աշխատավարձ), ինչպես նաև 3.555.560 ՀՀ դրամի չափով վարձավճար, որոնց հաշվարկով Կարեն Սարգսյանի միջին ամսական եկամուտը վերոնշյալ ժամանակահատվածում կազմել է 301.588 ՀՀ դրամ, որի 35 տոկոսը կազմում է 105.555 ՀՀ դրամ։ Ինչ վերաբերում է 2022 թվականի նոյեմբերի 26-ից մինչև 2023 թվականի նոյեմբերի 26-ը ընկած ժամանակահատվածին՝ Դատարանն արձանագրում է, որ նշված ժամանակահատվածում Կարեն Սարգսյանը ստացել է 3.596.246 ՀՀ դրամի չափով աշխատավարձ՝ չհաշված հարկերը, տուրքերը կամ այլ վճարները («մաքուր» աշխատավարձ), ինչպես նաև 3.555.560 ՀՀ դրամի չափով վարձավճար, որոնց հաշվարկով Կարեն Սարգսյանի միջին ամսական եկամուտը վերոնշյալ ժամանակահատվածում կազմել է 595.983 ՀՀ դրամ, որի 35 տոկոսը կազմում է 208.594 ՀՀ դրամ։ Ուստի տուգանքի չափերը պետք է հաշվարկել հանցանքները կատարելու պահին մեղադրյալի ամսական եկամտի չափով:
Այսպիսով, Դատարանը հիմք ընդունելով մեղադրյալ Կարեն Սարգսյանի անձը բնութագրող տվյալները՝ առաջին անգամ հանցանք կատարած լինելը, կատարածի համար զղջալը, մեղքը ընդունելը, պատասխանատվությունն ու պատիժը մեղմացնող հանգամանքի առկայությունը՝ խնամքին երեք անչափահաս երեխաների առկայությունը և ծանրացնող հանգամանքների բացակայությունը, վերջինիս կողմից կատարված հանցավոր արարքների բնույթը, նշանակությունը և վտանգավորությունը՝ գտնում է, որ նրա նկատմամբ ՀՀ քրեական օրենսգրքի 344-րդ հոդվածի 1-ին մասով պատիժ պետք է նշանակվի տուգանք՝ ամսական եկամտի հնգապատիկի՝ 527.775 ՀՀ դրամի չափով, իսկ ՀՀ քրեական օրենսգրքի 344-րդ հոդվածի 2-րդ մասով՝ տուգանք՝ ամսական եկամտի վեցապատիկի՝ 1.251.564 ՀՀ դրամի չափով և նա պետք է կրի իր նկատմամբ նշանակված պատիժները։
ՀՀ քրեական օրենսգրքի 74-րդ հոդվածի 1-ին մասի համաձայն՝
«1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:»
Առաջնորդվելով ՀՀ քրեական օրենսգրքի 74-րդ հոդվածով՝ Դատարանը գտնում է, որ Կարեն Սարգսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով նշանակված 1.251.564 ՀՀ դրամի չափով տուգանք պատժին անհրաժեշտ է լրիվ գումարել ՀՀ քրեական օրենսգրքի 344-րդ հոդվածի 1-ին մասով նշանակված 527.775 ՀՀ դրամի չափով տուգանք պատիժը և մեղադրյալ Կարեն Սարգսյանի նկատմամբ վերջնական պատիժ է նշանակում տուգանք՝ 1.779.339 ՀՀ դրամի չափով։
Դատարանն արձանագրում է նաև, որ մեղադրյալին պետք է թույլատրել որպես պատիժ նշանակված 1.779.339 ՀՀ դրամի չափով տուգանքը վճարել մաս առ մաս 12 ամսվա ընթացքում՝ նվազագույնը 148.278 ՀՀ դրամի չափով՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Նկատի ունենալով այն հանգամանքը, որ սույն քրեական վարույթով գույքային հայց, գույք բռնագրավելու անհրաժեշտություն, արգելադրված գույք առկա չեն՝ Դատարանն այդ հարցերին չի անդրադառնում:
Անդրադառնալով ապացույցների պահպանման և տնօրինման հարցին՝ Դատարանն արձանագրում է, որ դրանք ենթակա են պահման քրեական գործի հետ՝ այն պահելու ամբողջ ժամանակահատվածում:
Դատարանը գտնում է նաև, որ Կարեն Սարգսյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ` մինչև դատավճռի օրինական ուժի մեջ մտնելը, իսկ դատավճիռը օրինական ուժի մեջ մտնելուց հետո Կարեն Սարգսյանի վերաբերյալ ՀՀ միգրացիոն ծառայությունում և Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքները պետք է վերացնել:
Հաշվի առնելով, որ սույն գործով վարութային ծախսեր առկա չեն, Դատարանն այդ հարցին անդրադարձ չի կատարում։
Ելնելով վերոգրյալից և ղեկավարվելով ՀՀ քրեական օրենսգրքի 55-րդ, 59-րդ, 69-րդ, 70-րդ և ՀՀ քրեական դատավարության օրենսգրքի 31-րդ, 33-րդ, 347-349-րդ, 352-353-րդ, 364-րդ հոդվածներով՝ Դատարանը

ՎՃՌԵՑ
1. Կարեն Ատոմի Սարգսյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով և ՀՀ քրեական օրենսգրքի 344-րդ հոդվածի 2-րդ մասով՝
Կարեն Ատոմի Սարգսյանի նկատմամբ ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման համար պատիժ նշանակել՝ տուգանք՝ ամսական եկամտի հնգապատիկի՝ 527.775 (հինգ հարյուր քսանյոթ հազար յոթ հարյուր յոթանասունհինգ) ՀՀ դրամի չափով,
Կարեն Ատոմի Սարգսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման համար պատիժ նշանակել՝ տուգանք՝ ամսական եկամտի վեցապատիկի՝ 1.251.564 (մեկ միլիոն երկու հարյուր հիսուն մեկ հազար հինգ հարյուր վաթսունչորս) ՀՀ դրամի չափով,
2. ՀՀ քրեական օրենսգրքի 74-րդ հոդվածով սահմանված կարգով մեղադրյալ Կարեն Ատոմի Սարգսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով նշանակված 1.251.564 (մեկ միլիոն երկու հարյուր հիսուն մեկ հազար հինգ հարյուր վաթսունչորս) ՀՀ դրամի չափով տուգանք պատժին լրիվ գումարել ՀՀ քրեական օրենսգրքի 344-րդ հոդվածի 1-ին մասով նշանակված 527.775 (հինգ հարյուր քսանյոթ հազար յոթ հարյուր յոթանասունհինգ) ՀՀ դրամի չափով տուգանք պատիժը, և մեղադրյալ Կարեն Ատոմի Սարգսյանի նկատմամբ վերջնական պատիժ նշանակել տուգանք՝ 1.779.339 (մեկ միլիոն յոթ հարյուր յոթանասունինը հազար երեք հարյուր երեսունինը) ՀՀ դրամի չափով։
3. Կարեն Ատոմի Սարգսյանին թույլատրել որպես պատիժ նշանակված՝ 1.779.339 (մեկ միլիոն յոթ հարյուր յոթանասունինը հազար երեք հարյուր երեսունինը) ՀՀ դրամի չափով տուգանքը վճարել մաս առ մաս՝ 12 (տասներկու) ամսվա ընթացքում՝ նվազագույնը 148.278 (հարյուր քառասունութ հազար երկու հարյուր յոթանասունութ) ՀՀ դրամի չափով՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
4. Ապացույցները պահել քրեական գործի հետ՝ այն պահելու ամբողջ ժամանակահատվածում:
5. Կարեն Ատոմի Սարգսյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
6. Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:

Դատավոր` Դավիթ Արղամանյան