ԵԴ1/3209/01/24

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ
ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2025թ․ օգոստոսի <<15>> ք․Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

Նախագահող դատավոր Ա.Հովհաննիսյան
դատական նիստերի քարտուղար Մ.Հովհաննիսյան
հանրային մեղադրող Գ.Մուրադյան
պաշտպան Ա.Մկրտչյան
տուժող Ա.Նավասարդյան

դռնբաց դատական նիստում քննեց քրեական վարույթն ըստ մեղադրանքի Սուրեն Մնացականի Եդիգարյանի՝ ծնված 1979 թվականի օգոստոսի 10-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, չի աշխատում, դատվածություն ունեցող (ենթադրյալ հանցանքի կատարման պահին), բնակվող՝ Քասախ գյուղի Սաֆարյան փողոցի 9-րդ շենքի 3-րդ բնակարանում, ներկայումս գտնվում է <<Սևան>> ՔԿ հիմնարկում: Հանրային քրեական հետապնդում է հարուցվել ՀՀ քրեական օրենսգրքի 254-րդ հոդվածի 1-ին մասով. որպես խափանման միջոց է կիրառվել բացակայելու արգելքը:

Վարույթի դատավարական նախապատմությունը.
2022 թվականի նոյեմբերի 9-ին Անահիտ Վազգենի Նավասարդյանը հանցագործության մասին բանավոր հաղորդում է ներկայացվել ՀՀ ոստիկանության Երևան քաղաքի վարչության Էրեբունու բաժին:
2022 թվականի նոյեմբերի 10-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի ավագ քննիչ Ա.Խաչատրյանի արձանագրությամբ ՀՀ քրեական օրենսգրքի 254-րդ հոդվածի 1-ին մասի հատկանիշներով նախաձեռնվել է թիվ 12904822 քրեական վարույթը:
2022 թվականի նոյեմբերի 10-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի ավագ քննիչ Ա.Խաչատրյանի որոշմամբ Անահիտ Վազգենի Նավասարդյանը տուժող է ճանաչվել:
2024 թվականի հոկտեմբերի 25-ի ՀՀ դատախազության Երևան քաղաքի Էրեբունի և Նուբարաշեն վարչական շրջանների դատախազության ավագ դատախազ Գ.Մուրադյանի որոշմամբ Սուրեն Մնացականի Եդիգարյանի նկատմամբ հանրային քրեական հետապնդում է հարուցվել այն հանցանքը կատարելու համար, որ նա կատարել է գաղտնի հափշտակություն:
Այսպես, 2022 թվականի հոկտեմբերի 1-ին՝ ժամը 18:46-ին, Սուրեն Եդիգարյանը մուտք է գործել Երևան քաղաքի Մովսես Խորենացի 112/9 հասցեում գործող Անահիտ Նավասարդյանին պատկանող խանութ և օգտվելով խանութում այլ անձանց բացակայության հանգամանքից, ուրիշի գույքն ապօրինի, անհատույց իրենը դարձնելու ուղղակի դիտավորությամբ, սեղանի վրայից գաղտնի հափշտակել է Անահիտ Նավասարդյանին պատկանող 171.900 ՀՀ դրամ արժողությամբ <<Samsung Galaxy A6+>> մոդելի բջջային հեռախոսը՝ վերջինին պատճառելով մանր չափերի գույքային վնաս:
Այսինքն՝ Սուրեն Մնացականի Եդիգարյանին մեղսագրվում է ՀՀ քրեական օրենսգրքի 254-րդ հոդվածի 1-ին մասով նախատեսված հանցանք:
2024 թվականի հոկտեմբերի 26-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի քննիչ Ս.Հովսեփյանի որոշմամբ Սուրեն Մնացականի Եդիգարյանի նկատմամբ որպես խափանման միջոց է կիրառվել բացակայելու արգելքը:
2024 թվականի հոկտեմբերի 31-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի քննիչ Ս.Հովսեփյանի որոշմամբ <<Samsung Galaxy A6+>> մոդելի բջջային հեռախոսը իրեղեն ապացույց է ճանաչվել:
2024 թվականի նոյեմբերի 8-ին թիվ 12904822 քրեական գործը մեղադրական եզրակացությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան:
Արագացված դատական քննություն.
Նախնական դատալսումների ընթացքում պաշտպան Ա.Մկրտչյանը միջնորդեց դատաքննությունն անցկացնել արագացված վարույթի կարգով՝ նկատի ունենալով, որ սույն վարույթի շրջանակներում Սուրեն Եդիգարյանն իր մեղքն ընդունել է։
Հանրային մեղադրող Գ.Մուրադյանը հրապարակեց մեղադրանքի փաստական հիմքն ու արարքին տրվող իրավական գնահատականը՝ միաժամանակ նշելով, որ չի առարկում արագացված կարգով վարույթի կիրառման դեմ:
Մեղադրյալ Սուրեն Եդիգարյանը հայտնեց, որ իրեն պարզ է առաջադրված մեղադրանքը, դրա հետ համաձայն է: Պնդում է ներկայացված միջնորդությունը, այն ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով վարույթի անցկացնելու հետևանքները:
Դատական նիստին չի ներկայացել տուժող Անահիտ Նավասարդյանը, ով Դատարանին ուղղված դիմումով նշել է, որ չի առարկում, որ դատաքննությունն իրականացվի արագացված կարգով, մեղադրյալի դեմ բողոք, պահանջ չունի և խնդրում է իրեն տրամադրել բջջային հեռախոսը:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը և բացակայում են սույն օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, որոշում է կայացրել արագացված վարույթ կիրառելու միջնորդությունը բավարարելու մասին։
Հետևաբար, Դատարանը գտնում է, որ Սուրեն Մնացականի Եդիգարյանը կատարել է արարք՝ նախատեսված ՀՀ քրեական օրենսգրքի 254-րդ հոդվածի 1-ին մասով:
Դատարանի իրավական վերլուծությունները.
Դատարանը, ուսումնասիրելով Սուրեն Մնացականի Եդիգարյանի պատասխանատվությունը և պատիժը մեղմացնող ու ծանրացնող հանգամանքները, վերասոցիալականացման և իրավահպատակ վարքագծի ձևավորման համար նշանակություն ունեցող տվյալները, եկավ հետևյալ եզրահանգման.
Դատարանը Սուրեն Մնացականի Եդիգարյանի քրեական պատասխանատվությունն ու պատիժը մեղմացնող հանգամանք է դիտում մեղքն ընդունելը և կատարածի համար զղջալը։
Միաժամանակ, Դատարանն արձանագրում է, որ Սուրեն Մնացականի Եդիգարյանի պատասխանատվությունն ու պատիժը ծանրացնող հանգամանք է հանցանքը դատվածություն ունեցող անձի կողմից կատարելը: Մասնավորապես՝ Սուրեն Եդիգարյանը Երևան քաղաքի առաջին ատյանի ընդհանուր իրավասության քրեական դատարանի 2022 թվականի փետրվարի 7-ին ուժի մեջ մտած թիվ ԵԴ/0363/01/21 դատավճռով նշանակված տուգանքը վճարել է 2024 թվականի սեպտեմբերի 9-ին: Այլ խոսքով՝ Սուրեն Եդիգարյանը 2022 թվականի փետրվարի 7-ից մինչև 2024 թվականի սեպտեմբերի 9-ը համարվել է դատվածություն ունեցող անձ, իսկ սույն քրեական գործով մեղսագրվող արարքը կատարվել է 2022 թվականի հոկտեմբերի 1-ին:
Կատարված արարքի համար մեղադրյալ Սուրեն Մնացականի Եդիգարյանը ենթակա է քրեական պատասխանատվության և պատժի։
ՀՀ վճռաբեկ դատարանը 2010 թվականի օգոստոսի 27-ի թիվ ՍԴ/0293/01/09 որոշմամբ դիրքորոշում է հայտնել, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձը բնութագրող տվյալները և, քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ է և բավարար է այդ անձին ուղղելու և նրա կողմից նոր հանցանքի կատարումը կանխելու համար: Պատժի տեսակի և չափի որոշման ժամանակ դատարանը պետք է հաշվի առնի կատարված հանցագործության՝ հանրության համար վտանգավորության աստիճանն ու բնույթը, հանցավորի անձը բնութագրող տվյալները, այդ թվում՝ նրա պատասխանատվությունը մեղմացնող և (կամ) ծանրացնող հանգամանքները:
Դատարանը, հաշվի առնելով Սուրեն Մնացականի Եդիգարյանի կատարած արարքի բնույթը և հանրային վտանգավորության աստիճանը, մասնավորապես՝ այն, որ վերջինի կատարած հանցանքը հանդիսանում է ոչ մեծ ծանրության հանցագործություն, այդ թվում՝ նրա գործողությունների վտանգավորության աստիճանը, մեղադրյալի անձը, պատասխանատվությունն ու պատիժը մեղմացնող հանգամանքի առկայությունը, հանցանքը դատվածություն ունենալու պայմաններում կատարելը, ինչպես նաև այն, որ մեղադրյալի կատարած արարքի համար քրեական օրենսգրքի համապատասխան հոդվածի սանկցիայով նախատեսված է պատիժ նաև ազատազրկման ձևով, գտնում է՝ Սուրեն Մնացականի Եդիգարյանի նկատմամբ ՀՀ քրեական օրենսգրքի 254-րդ հոդված 1-ին մասով պատիժ պետք է նշանակել ազատազրկում՝ 3 (երեք) ամիս ժամկետով, ինչը վերջինը պետք է կրի։
Ընդ որում, պատժի տեսակն ընտրելիս Դատարանի կողմից կարևորվում է նաև այն հանգամանքը, որ Սուրեն Եդիգարյանի նկատմամբ այժմ մեկ այլ քրեական գործով կայացվել է մեղադրական դատավճիռ, որով վերջինի նկատմամբ պատիժ է նշանակվել ազատազրկում՝ 3 (երեք) տարի 5 (հինգ) ամիս ժամկետով:
Այլ խոսքով՝ նկատելի է, որ թեև Սուրեն Եդիգարյանը՝ կայացված դատավճռի ուժով գտնվելու է անազատության մեջ և ըստ այդմ՝ նրա նկատմամբ հոդվածի սանկցիայով նախատեսված այլընտրանքային պատժատեսակների՝ տուգանքի, հանրային աշխատանաքների կամ ազատության սահմանափակման նշանակումը, մեծ հավանականությամբ, կկրի ձևական բնույթ և չի ծառայի քրեական օրենսդրությամբ պատժի առջև դրված նպատակների իրագործմանը: Այլ կերպ ասած՝ բոլոր դեպքերում, պատժի տեսակն ընտրելիս պետք է առաջանորդվել դրանց փաստացի կատարվելու կանխավարկածով, այլ ոչ թե նշանակել ձևական պատիժ՝ իմանալով, որ միևնույն է կամ մեծ է հավանականությունը, որ այն ի կատար չի ածվելու:
Ինչ վերաբերում է կարճաժամկետ ազատազրկում պատժատեսակի կիրառմանը, Դատարանը նկատում է, որ ՀՀ քրեական օրենսգրքի 65-րդ հոդվածից բխում է, որ կարճաժամկետ ազատազրկումը նշանակվում է նախկինում ազատությունից զրկելու հետ կապված պատիժ չկրած անձի նկատմամբ, մինչդեռ սույն դեպքում Սուրեն Եդիգարյանի նկատմամբ նախկինում ազատությունից զրկելու հետ կապված պատիժ նշանակված եղել է (կարգապահական գումարտակում պահելը՝ 1 տարի 6 ամիս ժամկետով):
ՀՀ քրեական օրենսգրքի 74-րդ հոդվածով սահմանված պատիժները գումարելու կանոնի կիրառմամբ՝ նշանակված 3 (երեք) ամիս ժամկետով ազատազրկմանը պետք է գումարել Երևան քաղաք առաջին ատյանի ընդհանուր իրավասության քրեական դատարանի 2024 թվականի հունվարի 10-ի թիվ ԵԴ/1235/01/22 դատավճռով նշանակված 3 (երեք) տարի 5 (հինգ) ամիս ժամկետով ազատազրկումը և վերջնական պատիժ նշանակել ազատազրկում՝ 3 (երեք) տարի 8 (ութ) ամիս ժամկետով: Պատժի կրման սկիզբն անհրաժեշտ է հաշվել 2024 թվականի նոյեմբերի 6-ից:
Քննարկման առարկա դարձնելով դատապարտված մեղադրյալի նկատմամբ կիրառված խափանման միջոցի հարցը՝ Դատարանը գտնում է, որ Սուրեն Մնացականի Եդիգարյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը:
Հաջորդիվ, ՀՀ քրեական դատավարության օրենսգրքի 100-րդ հոդվածով սահմանված կարգով՝ իրեղեն ապացույց ճանաչված <<Սամսունգ Ա6+>> մոդելի բջջային հեռախոսը պետք է վերադարձնել տուժող Անահիտ Վազգենի Նավասարդյանն: Այս առնչությամբ Դատարանն ընդգծում է, որ մինչև դատավճռի օրինական ուժի մեջ մտնելն իրեղեն ապացույց հանդիսացող բջջային հեռախոսը դրա սեփականատիրոջը վերադարձնելը պայմանավորված է այն հանգամանքով, որ Սուրեն Եդիգարյանը միջնորդել է կիրառել արագացված վարույթ, որպիսի պայմաններում այլևս խոսք չի կարող գնալ ապացույցների բովանդակային հետազոտման կամ դրանց վիճարկման մասին: Բացի այդ, տուժողը Դատարանին ուղղված գրությամբ ևս խնդրել է բջջային հեռախոսն իրեն վերադարձնել, որի կապակցությամբ կողմերը առարկություններ չեն ներկայացրել:
ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը արագացված վարույթ կիրառելու դեպքում, համաձայն նույն օրենսգրքի 464.4-րդ հոդվածի 3-րդ մասի՝ դատապարտված մեղադրյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 276-րդ, 347-349-րդ, 353-րդ, 364-րդ, 464.1-464.5-րդ հոդվածներով՝ Դատարանը

Վ Ճ Ռ Ե Ց

Սուրեն Մնացականի Եդիգարյանին մեղավոր ճանաչել ՀՀ քրեական օրենսգրքի 254-րդ հոդվածի 1-ին մասով և պատիժ նշանակել ազատազրկում՝ 3 (երեք) ամիս ժամկետով:
ՀՀ քրեական օրենսգրքի 74-րդ հոդվածով սահմանված պատիժները գումարելու կանոնի կիրառմամբ՝ 3 (երեք) ամիս ժամկետով ազատազրկմանը գումարել Երևան քաղաք առաջին ատյանի ընդհանուր իրավասության քրեական դատարանի 2024 թվականի հունվարի 10-ի թիվ ԵԴ/1235/01/22 դատավճռով նշանակված 3 (երեք) տարի 5 (հինգ) ամիս ժամկետով ազատազրկումը և վերջնական պատիժ նշանակել ազատազրկում՝ 3 (երեք) տարի 8 (ութ) ամիս ժամկետով:
Պատժի կրման սկիզբը հաշվել 2024 թվականի նոյեմբերի 6-ից:
Սուրեն Մնացականի Եդիգարյանի նկատմամբ կիրառված այլընտրանքային խափանման միջոց բացակայելու արգելքը, դատավճիռն օրինական ուժի մեջ մտնելուց հետո վերացնել:
Իրեղեն ապացույց ճանաչված <<Սամսունգ Ա6+>> մոդելի բջջային հեռախոսը վերադարձնել տուժող Անահիտ Վազգենի Նավասարդյանն:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով):

ԴԱՏԱՎՈՐ Ա.ՀՈՎՀԱՆՆԻՍՅԱՆ