ԵԴ1/3194/01/24







ՈՐՈՇՈՒՄ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ
ՔՐԵԱԿԱՆ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

«30» հուլիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

ՆԱԽԱԳԱՀՈՒԹՅԱՄԲ` ԴԱՏԱՎՈՐ ՎԱՀԵ ՋԻՎԱՆՅԱՆԻ
ՔԱՐՏՈՒՂԱՐՈՒԹՅԱՄԲ` ԳՈՀԱՐ ԽԱՉԱՏՐՅԱՆԻ
ՄԱՍՆԱԿՑՈՒԹՅԱՄԲ`
ՀԱՆՐԱՅԻՆ ՄԵՂԱԴՐՈՂ ԱՐՏՅՈՄ ԲԱԴԱԼՅԱՆԻ
ՊԱՇՏՊԱՆ ԱՐՍԵՆ ԽԱՌԱՏՅԱՆԻ

«Աջափնյակ 1» նստավայրում, դռնբաց դատական նիստում քննեց քրեական գործով ըստ մեղադրանքի Նարեկ Հայկազի Դանիելյանի՝ ՀՀ քրեական օրենսգրքի 195-րդ հոդվածի 2-րդ մասի 2-րդ և 6-րդ կետերով, 194-րդ հոդվածի 2-րդ մասի 2-րդ և 4-րդ կետերով, 192-րդ հոդվածի 2-րդ մասի 2-րդ և 6-րդ կետերով, 207-րդ հոդվածի 1-ին մասով և 508-րդ հոդվածի 1-ին մասով (ծնված՝ 1989 թվականի սեպտեմբերի 26-ին՝ Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, չդատված, չի աշխատել, բնակության հասցե՝ քաղաք Երևան, Աէրացիա, Շիրակի փողոց, 5-րդ նրբանցք, 3/1 շենք, 28-րդ բնակարան (մահացել է 21․03․2025 թվականին)), մեղադրյալի նկատմամբ քրեական հետապնդումը մահվան հիմքով դադարեցնելու և քրեական գործի վարույթը կարճելու հարցը։

1. Նկարագրական մաս.
2023 թվականի հունվարի 13-ին ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում ՀՀ քրեական օրենսգրքի 194-րդ հոդվածի 2-րդ մասի 4-րդ կետով և 195-րդ հոդվածի 2-րդ մասի 6-րդ կետով նախաձեռնվել է թիվ 11104723 քրեական վարույթը։
2023 թվականի հունվարի 25-ին ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում ՀՀ քրեական օրենսգրքի 508-րդ հոդվածի 1-ին մասով նախաձեռնվել է թիվ 11109323 քրեական վարույթը, որը 2023 թվականի հունվարի 30-ի որոշմամբ միացվել է թիվ 11104723 քրեական վարույթին։
2023 թվականի հունվարի 24-ին Նարեկ Հայկազի Դանիելյանը ձերբակալվել է և նույն օրն ազատ արձակվել։
2023 թվականի մարտի 08-ին ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում ՀՀ քրեական օրենսգրքի 196-րդ հոդվածի 2-րդ մասի 2-րդ կետով նախաձեռնվել է թիվ 11109323 քրեական վարույթը։
2023 թվականի նոյեմբերի 16-ին Նարեկ Հայկազի Դանիելյանի նկատմամբ հանրային քրեական հետապնդում է հարուցվել ՀՀ քրեական օրենսգրքի 196-րդ հոդվածի 2-րդ մասի 2-րդ կետով։
2023 թվականի նոյեմբերի 16-ին Նարեկ Հայկազի Դանիելյանի նկատմամբ որպես այլընտրանքային խափանման միջոց կիրառվել է բացակայելու արգելքը։
2023 թվականի դեկտեմբերի 01-ին ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում ՀՀ քրեական օրենսգրքի 207-րդ հոդվածի 2-րդ մասի 2-րդ կետով նախաձեռնվել է թիվ 11825623 քրեական վարույթը։
2024 թվականի փետրվարի 29-ին թիվ 11825623 քրեական վարույթը միացվել է թիվ 11104723 քրեական վարույթին։
2024 թվականի ապրիլի 16-ին թիվ 11104723 քրեական վարույթով հանրային քրեական հետապնդման ժամկետը կասեցվել է, որը վերսկսվել է 2024 թվականի հուլիսի 29-ին։
2024 թվականի հոկտեմբերի 23-ին ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում ՀՀ քրեական օրենսգրքի 192-րդ հոդվածի 2-րդ մասի 2-րդ և 6-րդ կետերով, 194-րդ հոդվածի 2-րդ մասի 2-րդ և 4-րդ կետերով և 195-րդ հոդվածի 2-րդ մասի 2-րդ և 6-րդ կետերով նախաձեռնվել է թիվ 11198324 քրեական վարույթը, որը 2024 թվականի հոկտեմբերի 28-ի որոշմամբ միացվել է թիվ 11104723 քրեական վարույթին։
2024 թվականի հոկտեմբերի 28-ին Նարեկ Հայկազի Դանիելյանի նկատմամբ հանրային քրեական հետապնդում է հարուցվել ՀՀ քրեական օրենսգրքի 195-րդ հոդվածի 2-րդ մասի 2-րդ և 6-րդ կետերով, 194-րդ հոդվածի 2-րդ մասի 2-րդ և 4-րդ կետերով, 192-րդ հոդվածի 2-րդ մասի 2-րդ և 6-րդ կետերով, 207-րդ հոդվածի 1-ին մասով և 508-րդ հոդվածի 1-ին մասով։
2024 թվականի նոյեմբերի 8-ին մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան են մուտքագրվել քրեական վարույթի նյութերը։
2024 թվականի նոյեմբերի 11-ին քրեական գործը հանձնվել է դատավոր Վ․Ջիվանյանին, որով 2024 թվականի նոյեմբերի 13-ին ստանձնվել է վարույթ և նշանակվել նախնական դատալսումներ։

1.1. Մեղադրանքի փաստական նկարագրություն.
Մեղադրյալ Նարեկ Հայկազի Դանիելյանի նկատմամբ հանրային քրեական հետապնդում է հարուցվել այն արարքի համար, որ նա 2022 թվականի նոյեմբերի 27-ին իր՝ Երևան քաղաքի Աէրացիա, Շիրակի փողոց, 5-րդ նրբանցք, 3/1 շենք, 28 բնակարանում վիճաբանել է իր հետ փաստական ամուսնական հարաբերությունների մեջ գտնվող հղի կնոջ՝ Հեղինե Հարությունի Մարտիրոսյանի հետ, որի ընթացքում ձեռքով բազմաթիվ հարվածներ է հասցրել վերջինիս դեմքին՝ պատճառելով ֆիզիկական ցավ և կապտուկի ձևով մարմնական վնասվածքներ:
Բացի այդ, Նարեկ Հայկազի Դանիելյանը նույն օրը իր՝ Երևան քաղաքի Աէրացիա, Շիրակի փողոց, 5-րդ նրբանցք, 3/1 շենք, 28 բնակարանում վիճաբանել է իր հետ փաստական ամուսնական հարաբերությունների մեջ գտնվող հղի կնոջ՝ Հեղինե Հարությունի Մարտիրոսյանի հետ, որի ընթացքում դանակը ուղղել է վերջինիս պարանոցի և փորի ուղղությամբ՝ սպառնալով, որ չի թողնի երեխային իր հետ տանի, փորից կհանի՝ այդ կերպ Հեղինե Մարտիրոսյանին տալով սպանության և առողջությանը վնաս պատճառելու սպառնալիք, որն իրականացնելու իրական վտանգ է եղել:
Բացի այդ, Նարեկ Հայկազի Դանիելյանը 2022 թվականի նոյեմբերի 27-ից մինչև նոյեմբերի 29-ը իրենց համատեղ բնակության՝ Երևան քաղաքի Աէրացիա, Շիրակի փողոց, 5-րդ նրբանցք, 3/1 շենք, 28 բնակարանի մուտքի դուռը կողպած պահելով իր հետ փաստական ամուսնական հարաբերությունների մեջ գտնվող Հեղինե Հարությունի Մարտիրոսյանին ապօրինի զրկել է ազատությունից:
Բացի այդ, Նարեկ Հայկազի Դանիելյանը, 2023 թվականի հունվարի 13-ին՝ ժամը 18:15-ի սահմաններում, ցանկանալով տեսակցել իր նորածին որդուն, այցելել է նախկինում իր հետ փաստական ամուսնական հարաբերությունների մեջ գտնված Հեղինե Հարությունի Մարտիրոսյանի բնակության վայր՝ Երևան քաղաքի Շարուրի 25 շենքի 28 բնակարան, և հիշյալ բնակարանում բնակվող անձանց՝ Սոխակ Մարտիրոսյանի և Հեղինե Մարտիրոսյանի կամքին հակառակ ոտքով հարվածել, կոտրել է բնակարանի դուռը և ապօրինի մուտք գործել այնտեղ:
Բացի այդ, Նարեկ Հայկազի Դանիելյանը՝ պատշաճ կարգով ծանուցված լինելով 2023 թվականի հունվարի 13-ին ՀՀ ոստիկանության Երևան քաղաքի վարչության Շենգավիթի բաժնի իրավասու ծառայողի կողմից «Ընտանիքում բռնության կանխարգելման, ընտանիքում բռնության ենթարկված անձանց պաշտպանության, ընտանիքում համերաշխության վերականգնման մասին» /«Ընտանեկան և կենցաղային բռնության կանխարգելման ու ընտանեկան և կենցաղային բռնության ենթարկված անձանց պաշտպանության մասին» ՀՀ օրենքի 7-րդ հոդվածի 3-րդ մասի 2-րդ և 3-րդ կետերի հիմքով կայացված «Անհետաձգելի միջամտության կիրառելու մասին» որոշման վերաբերյալ, որի համաձայն` վերջինիս 20 օր ժամկետով արգելվել է այցելել Սոխակ Մարտիրոսյանի բնակության վայր և 50 մետր հեռավորությունից ավելի մոտենալ նրան և նրա խնամքի տակ գտնվող անձանց, 2023 թվականի հունվարի 24-ին՝ ժամը 17:40-ի սահմաններում, այցելել է Սոխակ Մարտիրոսյանի բնակության վայր՝ Երևան քաղաքի Շարուրի փողոցի 25 շենքի 28 բնակարան՝ այդ կերպ չկատարելով կայացված որոշման պահանջները։

1.2. Կողմերի միջնորդությունները և դիրքորոշումները․
Քրեական գործի նախնական դատալսումների ընթացքում հանրային մեղադրող Ա․Բադալյանը հայտարարել է, որ Նարեկ Հայկազի Դանիելյանի նկատմամբ ՀՀ քրեական օրենսգրքի 195-րդ հոդվածի 2-րդ մասի 2-րդ և 6-րդ կետերով, 194-րդ հոդվածի 2-րդ մասի 2-րդ և 4-րդ կետերով, 192-րդ հոդվածի 2-րդ մասի 2-րդ և 6-րդ կետերով, 207-րդ հոդվածի 1-ին մասով և 508-րդ հոդվածի 1-ին մասով քրեական հետապնդումը քրեական հետապնդումը ենթակա է դադարեցման, իսկ վարույթը կարճման, քանի որ մեղադրյալը մահացել է։
Պաշտպան Ա․Խառատյանը հայտնել է, որ հարցի լուծումը թողնում է Դատարանի հայեցողությունաը, որևէ առարկություն չի ներկայացրել։
Մեղադրյալի մայրը՝ Լուսիկ Թարվերդյանը որևէ առարկություն Դատարանին չի ներկայացրել մահվան հիմքով իր հանգուցյալ որդու նկատմամբ քրեական հետապնդումը դադարեցնելու դեմ։

2. Պատճառաբանական մաս.

ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետի համաձայն`
«Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե` անձը մահացել է.»:
ՀՀ քրեական դատավարության օրենսգրքի 12-րդ հոդվածի 3-րդ մասի համաձայն`
«Սույն հոդվածի 1-ին մաuի 10-րդ կետով նախատեսված հանգամանքի առկայությունը քրեական հետապնդումը բացառող չէ, եթե մահացածի օրինական ներկայացուցիչն առարկում է դրա դեմ այն հիմքով, որ մահացածը չի կատարել իրեն մեղսագրվող արարքը: Այu դեպքում քրեական վարույթը շարունակվում է ընդհանուր կարգով, սակայն մեղադրական վերդիկտ կայացնելու դեպքում այդ անձի նկատմամբ պատիժ չի նշանակվում: Սույն հոդվածի 1-ին մաuի 10-րդ կետը չի տարածվում քաղաքացիական դատավարության կարգով անձին մահացած ճանաչելու դեպքերի վրա:»:
Սույն գործով քննարկվող հարցին վերաբերելի փաստական հանգամանքները հետևյալն են․
- 2025 թվականի մարտի 21-ին մեղադրյալ Նարեկ Հայկազի Դանիելյանը մահացել է, որի վերաբերյալ առկա է մահվան պետական գրանցման մասին ակտը` N6610,
- մեղադրյալ Նարեկ Հայկազի Դանիելյանին մեղսագրված դեպքով վերջինիս մերձավոր ազգական հանդիսացող մայրը՝ Լուսիկ Թարվերդյանը, հայտնել է, որ ինքը մոտ 80 տարեկան վատառողջ կին է, չի կարողանում քայլել ու չի կարող ներկայանալ դատական նիստին, չի առարկում որդու մահվան հիմքով նրա վերաբերյալ քրեական վարույթը կարճելուն, որևէ բողոք չունի։
Վերը նշված իրավական նորմերը կիրառելով սույն գործով փաստական հանգամանքների նկատմամբ՝ Դատարանը գտնում է, որ մահացած մեղադրյալ Նարեկ Հայկազի Դանիելյանի նկատմամբ քրեական հետապնդումը ենթակա է դադարեցման:
ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետը սահմանում է․
«Քրեական վարույթը ենթակա է կարճման, եթե` կայացվել է անձի նկատմամբ քրեական հետապնդում չհարուցելու կամ մեղադրյալի նկատմամբ քրեական հետապնդումը դադարեցնելու մասին որոշում, և սպառվել են վարույթը շարունակելու բոլոր հնարավորությունները․»։
Այսպիսով, վերոշարադրյալ իրավանորմերի հիման վրա Դատարանը գտնում է, որ մեղադրյալ Նարեկ Հայկազի Դանիելյանի նկատմամբ ՀՀ քրեական օրենսգրքի 195-րդ հոդվածի 2-րդ մասի 2-րդ և 6-րդ կետերով, 194-րդ հոդվածի 2-րդ մասի 2-րդ և 4-րդ կետերով, 192-րդ հոդվածի 2-րդ մասի 2-րդ և 6-րդ կետերով, 207-րդ հոդվածի 1-ին մասով և 508-րդ հոդվածի 1-ին մասով քրեական հետապնդումը պետք է դադարեցնել, միաժամանակ քրեական վարույթը կարճել, քանի որ տվյալ դեպքում սպառվել են վարույթը շարունակելու բոլոր հնարավորությունները (գործը մեկ մեղադրյալի ենթադրյալ կատարած հանցանքների վերաբերյալ է, որի նկատմամբ քրեական հետապնդումը ենթակա է դադարեցման)։
Քրեական գործով իրեղեն ապացույցներ, գույքային հայց չկա, մեղադրյալի գույքի վրա արգելանք չի դրվել, ուստի այդ հարցերին Դատարանը չի անդրադառնում, իսկ կիրառված խափանման միջոցը ենթակա է վերացման։
Դատարանը գտնում է, որ դատական ակտն օրինական ուժի մեջ մտնելուց հետո ապացույց ճանաչված փաստաթղթերը պետք է թողնել քրեական գործի նյութերում։
Սույն դատական ակտը կայացնելիս Դատարանը ղեկավարվում է ՀՀ քրեական դատավարության օրենսգրքի 12-րդ, 13-րդ, 30-րդ, 33-րդ, 98-99-րդ, 364-րդ հոդվածներով։

3. Եզրափակիչ մաս.
Ելնելով վերոգրյալից` Դատարանը

ՈՐՈՇԵՑ

ԵԴ1/3194/01/24 քրեական գործով մեղադրյալ Նարեկ Հայկազի Դանիելյանի նկատմամբ ՀՀ քրեական օրենսգրքի 195-րդ հոդվածի 2-րդ մասի 2-րդ և 6-րդ կետերով, 194-րդ հոդվածի 2-րդ մասի 2-րդ և 6-րդ կետերով, 192-րդ հոդվածի 2-րդ մասի 2-րդ և 6-րդ կետերով, 207-րդ հոդվածի 1-ին մասով և 508-րդ հոդվածի 1-ին մասով քրեական հետապնդումը դադարեցնել՝ մեղադրյալի մահանալու հիմքով, և քրեական վարույթը կարճել։
Նարեկ Հայկազի Դանիելյանի նկատմամբ կիրառված խափանման միջոցը՝ բացակայելու արգելքը, վերացնել։
Դատական ակտն օրինական ուժի մեջ մտնելուց հետո ապացույց ճանաչված փաստաթղթերը թողնել քրեական գործի նյութերում։
Որոշումը կարող է բողոքարկվել ՀՀ վերաքննիչ քրեական դատարան այն ստանալու օրվանից հետո` մեկամսյա ժամկետում:


ԴԱՏԱՎՈՐ ՎԱՀԵ ՋԻՎԱՆՅԱՆ