ԵԴ1/3179/01/24







Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Կ․ՍՏԵՓԱՆՅԱՆԻ
մեղադրյալ Մ․ԱՍԱՏՐՅԱՆԻՆ


2024 թվականի նոյեմբերի 22-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Մերի Դերենիկի Ասատրյանի՝ ծնված 1995 թվականի օգոստոսի 29-ին, Երևան քաղաքում, հայ, ՀՀ քաղաքացի, բարձրագույն կրթությամբ, նախկինում չդատապարտված, աշխատում է Ամառ» ռեստորանում է որպես սպասարման ոլորտի մասնագետ, չամուսնացած, հաշվառված է և բնակվում է Արարատի մարզ, գ․ Մրգավետ Իսահակյան փողոց 20-րդ տուն հասցեում, մեղադրանք է առաջադրվել 2 դրվագ ՀՀ քրեական օրենսգրքի 344-րդ հոդվածի 1-ին մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1.Գործի դատավարական նախապատմությունը
2024 թվականի հուլիսի 31-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-2919-24 քրեական վարույթը:
2024 թվականի սեպտեմբերի 10-ին ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60591523 քրեական վարույթը:
Նախաքննության մարմնի 2024 թվականի սեպտեմբերի 10-ի որոշմամբ թիվ 60591524 քրեական վարույթը միացվել թիվ 60291924 քրեական վարույթին, վարույթը շարունակվել թիվ 60291924 համարով։
2024 թվականի հոկտեմբերի 15-ի որոշմամբ Մերի Դերենիկի Ասատրյանի նկատմամբ քրեական հետապնդում է հարուցվել 2 դրվագ ՀՀ քրեական օրենսգրքի 344-րդ հոդվածի 1-ին մասով այն արարքների համար, որ նա տրանսպորտային միջոցներ վարելու իրավունքից զրկված լինելու պայմաններում երկու դրվագներով վարել է տրանսպորտային միջոց։
Այսպես.
Մերի Դերենիկի Ասատրյանը, 2024թ.-ի հուլիսի 11-ից մինչև 2025թ.-ի հուլիսի 11-ը ՀՀ ոստիկանության պարեկային ծառայության թիվ 8180409422 վարչական իրավախախտման որոշմամբ զրկված լինելով տրանսպորտային միջոցներ վարելու իրավունքից, 2024 թվականի հուլիսի 29-ին՝ ժամը 03:40-ին, Երևան քաղաքի Բագրատունյաց պողոտայում վարել է «ՄԻՆԻ» մակնիշի 37 AT 624 հաշվառման համարանիշով տրանսպորտային միջոցը, ինչը հայտնաբերվել է ՀՀ ոստիկանության պարեկային ծառայության աշխատակիցների կողմից և կազմվել է վարչական իրավախախտման վերաբերյալ արձանագրություն:
Այսինքն՝ Մերի Դերենիկի Ասատրյանի արարքում առկա է ՀՀ քրեական օրենսգրքի 344-րդ հոդվածով 1-ին մասով նախատեսված հանցանքի կատարումը վկայող փաստեր:
Բացի այդ, Մերի Դերենիկի Ասատրյանը, 2024թ.-ի հուլիսի 11-ից մինչև 2025թ.-ի հուլիսի 11-ը «ՆԳՆ ոստիկանության պարեկային ծառայության թիվ 8180409422 վարչական իրավախախտման որոշմամբ զրկված լինելով տրանսպորտային միջոցներ վարելու իրավունքից, 2024 թվականի օգոստոսի 28-ին՝ ժամը 02:30-ին, Երևան քաղաքի Արշակունյաց պողոտայում վարել է «ՄԻՆԻ» մակնիշի, 37 AT 624 հաշվառման համարանիշով տրանսպորտային միջոցը, ինչը հայտնաբերվել է ՀՀ ոստիկանության պարեկային ծառայության աշխատակիցների կողմից և կազմվել է վարչական իրավախախտման վերաբերյալ արձանագրություն:
2024 թվականի հոկտեմբերի 15-ի որոշմամբ Մերի Դերենիկի Ասատրյանի նկատմամբ խափանման միջոց է ընտրվել բացակայելու արգելքը:
2024 թվականի նոյեմբերի 7-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/3179/01/24 համարը:
2024 թվականի նոյեմբերի 11-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2024 թվականի նոյեմբերի 22-ին Դատարանը Մերի Դերենիկի Ասատրյանի նկատմամբ կայացրել է մեղադրական վերդիկտ։


2.Դատարանում հետազոտված և գնահատված ապացույցներ
Մեղադրյալ Մերի Դերենիկի Ասատրյանն առաջադրված մեղադրանքում իրեն մեղավոր է ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում 2024 թվականի հոկտեմբերի 17-ին Մերի Դերենիկի Ասատրյանը որպես մեղադրյալ ցուցմունք է տվել այն մասին, որ 2020 թվականից ունեցել է «B» կարգի վարորդական իրավունքի վկայական: 2024 թվականի հուլիսի 11-ին՝ զրկվել է տրանսպորտային միջոցներ վարելու իրավունքից ոչ սթափ վիճակում տրանսպորտային միջոց վարելու համար: Տրանսպորտային միջոցներ վարելու իրավունքից զրկվելու վերաբերյալ կայացված որոշման մասին ծանուցված եղել է հենց կայացնելու պահից: 2024 թվականի հուլիսի 29-ին` գիշերային ժամի, Երևան քաղաքի Արշակունյաց պողոտայում «Մինի» մակնիշի 37 AT 624 հաշվառման համարանիշի ավտոմեքենան վարել է տրանսպորտային միջոցներ վարելու իրավունքից զրկված, ինչի կապակցությամբ պարեկային ծառայողները կանգնեցնելով իրեն կազմել են համապատասխան թիվ 8180407449 արձանագրությունը: Արձանագրությանը ծանոթանալուց հետո ստորագրել է արձանագրության համապատասխան տողերում։ 2024 թվականի օգոստոսի 28-ին՝գիշերային ժամի, Երևան քաղաքի Արշակունյաց պողոտայում «Մինի» մակնիշի 37 AT 624 հաշվառման համարանիշի ավտոմեքենան վարել է տրանսպորտային միջոցներ վարելու իրավունքից զրկված, ինչի կապակցությամբ պարեկային ծառայողները կանգնեցնելով իրեն կազմել են համապատասխան թիվ 8180405256 արձանագրությունը: Արձանագրության համապատասխան տողերում կատարել է «Զղջում եմ արարքիս համար խնդրում եմ ներողամիտ գտնվել։ Նմանատիպ դեպք չի կրկնվի» գրառումը և ստորագրել է արձանագրության համապատասխան տողերում: Հայտարարում է, որ զղջում է կատարված դեպքերի համար(տե´ս դատական նիստի արձանագրություն, քրեական գործ, 50-53-րդ թերթ)։
Ցուցմունքները հրապարակելուց հետո Մերի Դերենիկի Ասատրյանը հայտնել է, որ դրանք ճիշտ են և պնդել է դրանք (տե՛ս դատական նիստի արձանագրությունը):
Հիմնական դատալսումների ընթացքում հետազոտվել են հետևյալ գրավոր ապացույցները.
Մերի Դերենիկի Ասասստրյանի (ծնվ.29. 9.08.1995p., ՀԾՀ 7908950213, բն. Արարատի մարզ գ. Մրգավետ Իսահակյան փողոց 20 տուն) վերաբերյալ կազմված վարչական իրավախախտման վերաբերյալ արձանագրությունը, որի համաձայն՝վերջինս 2024թ. հուլիսի 29-ին՝ ժամը 03:40-ին, Երևան քաղաքի Բագրատունյաց պողոտայում վարել է «Մինի» մակնիշի 37 AT 624 հաշվառման համարանիշի ավտոմեքենան՝ տրանսպորտային միջոց վարելու իրավունքից զրկված վիճակում (տե´ս դատական նիստի արձանագրություն, քրեական գործ, 4-րդ թերթ)։
ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի տեղեկանքը, որի համաձայն՝ Մերի Դերենիկի Ասատրյանը տրանսպորտային միջոցներ վարելու իրավունքից 2024 թվականի հուլիսի 11-ին զրկվել է 1 տարի ժամկետով՝ (զրկման սկիզբ 11.07.2024թ, զրկման ավարտ 11.07.2025թ):
Մերի Դերենիկի Ասատրյանի (ծնվ.29.08.1995թ., ՀԾՀ 7908950213, բն. Արարատի մարզ գ. Մրգավետ Իսահակյան փողոց 20 տուն) վերաբերյալ կազմված վարչական իրավախախտման վերաբերյալ արձանագրությունը, որի համաձայն՝ վերջինս 2024թ. հուլիսի 11-ին ժամը՝ 03:35-ին, Երևան քաղաքի Իսակովի պողոտայում «Մինի» մակնիշի 37 AT 624 հաշվառման համարանիշի ավտոմեքենան վարել է ոչ սթափ վիճակում, ինչից հետո կայացվել է վարչական իրավախախտման վերաբերյալ թիվ 8180409422 որոշումը` Մերի Դերենիկի Ասատրյանին՝ տրանսպորտային միջոցներ վարելու իրավունքից 1 տարի ժամկետով զրկելու վերաբերյալ: Վարչական իրավախախտման արձանագրության և որոշման համապատասխան տողերում առկա են ծանուցվողի (վարորդի) և պարեկային ծառայողի ստորագրությունները: (տե՛ս դատական նիստի արձանագրություն, քրեական գործ, 6-րդ թերթ):
Սթափության վիճակի զննության վերաբերյալ թիվ 01879 կտրոնը, որի համաձայն՝ 2024 թվականի հուլիսի 11-ին՝ ժամը 03:43-ին, Մերի Դերենիկի Ասատրյանը, թիվ 91100960 համարի սարքի միջոցով ենթարկվել է սթափության վիճակի զննության և նրա օրգանիզմում ալկոհոլի չափաքանակը կազմել է 0,964 մգ/լ (տե՛ս դատական նիստի արձանագրություն, քրեական գործ, 7-րդ թերթ):
Թիվ 120887 համարի ստուգաչափման վկայականի պատճենը, որի համաձայն՝ 91100960 համարի սարքը ստուգաչափվել է 2024 թվականի ապրիլի 4-ին և այն ուժի մեջ է մինչև 2025 թվականի ապրիլի 4-ը, որպես չափման տիրույթ նշված է «0․000-0․200» մգ/լ (տե´ս դատական նիստի արձանագրություն, քրեական գործ, 8-րդ թերթեր)։
Վարչական իրավախատման վերաբերյալ 28.08.2024թ. կազմված արձանագրությունը, որի համաձայն՝ ՀՀ ոստիկանության պարեկային ծառայության պարեկ Նորիկ Դավթյանը 2024 թվականի օգոստոսի 28-ին՝ ժամը 02:38-ին, կազմել է վարչական իրավախախտման վերաբերյալ արձանագրությունն այն բանի համար, որ Մերի Դերենիկի Ասատրյանը չունենալով տրանսպորտային միջոցներ վարելու իրավունք Երևան քաղաքի Արշակունյաց պողոտայում ժամը 02:30- ին վարել է Մինիլ» մակնիշի տրասնպորտային միջոցը (տե´ս դատական նիստի արձանագրություն, քրեական գործ, 16-րդ թերթ)։
Թիվ 120887 համարի ստուգաչափման վկայականի պատճենը, որի համաձայն՝ 91100960 համարի սարքը ստուգաչափվել է 2024 թվականի ապրիլի 4-ին և այն ուժի մեջ է մինչև 2025 թվականի ապրիլի 4-ը, որպես չափման տիրույթ նշված է «0․000-0․200» մգ/լ (տե´ս դատական նիստի արձանագրություն, քրեական գործ, 3-րդ, 5-րդ, 20-21-րդ թերթեր)։
Արտավարութային փաստաթուղթ ճանաչելու մասին 2024 թվականի հոկտեմբերի 7-ի որոշումը (տե´ս դատական նիստի արձանագրություն, քրեական գործ, 20-21-րդ թերթեր)։
Մ․Ասատրյանի դատավածության վերաբերյալ տեղեկանքը, որի համաձայն Մ․Ասատրյանի նախկինում դատապարտված չի եղել (տե´ս դատական նիստի արձանագրություն, քրեական գործ, 31-րդ թերթ):


3.Դատարանի իրավական վերլուծությունները
Դատարանը, վերլուծելով մեղադրյալ Մ․Ասատրյանը առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ Մերի Դերենիկի Ասատրյանը, 2024թ.-ի հուլիսի 11-ից մինչև 2025թ.-ի հուլիսի 11-ը ՀՀ ոստիկանության պարեկային ծառայության թիվ 8180409422 վարչական իրավախախտման որոշմամբ զրկված լինելով տրանսպորտային միջոցներ վարելու իրավունքից, 2024 թվականի հուլիսի 29-ին՝ ժամը 03:40-ին, Երևան քաղաքի Բագրատունյաց պողոտայում վարել է «ՄԻՆԻ» մակնիշի, 37 AT 624 հաշվառման համարանիշով տրանսպորտային միջոցը, ինչը հայտնաբերվել է ՀՀ ոստիկանության պարեկային ծառայության աշխատակիցների կողմից և կազմվել է վարչական իրավախախտման վերաբերյալ արձանագրություն:
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Մ․Ասատրյանի կողմից երկու անգամ տրանսպորտային միջոց վարելը դրանից զրկված լինելու պայմաններում, այդ արարքներն ապացուցված են, ճիշտ են որակված և համապատասխանում է 2 դրվագ ՀՀ քրեական օրենսգրքի 344-րդ հոդվածի 1-ին մասի հատկանիշներին:
Անդրադառնալով մեղադրյալի նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
Պատժի նշանակման հիմնական կանոնները սահմանող իրավական նորմերը (նախկին օրենսգրքի) ՀՀ վճռաբեկ դատարանը վերլուծել և դրանց վերաբերյալ իրավական դիրքորոշումներ է հայտնել թիվ ՎԲ-50/07, ՎԲ-124/07, ՎԲ-142/07, ՎԲ-192/07, ՎԲ-201/07, ԱՎԴ2/0059/01/08, ԵԱՔԴ/0078/01/09 ԵԿԴ/0042/01/11, ինչպես նաև մի շարք այլ գործերով կայացված որոշումներում: Վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և այն կատարող անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, այն կատարող անձի, պատիժը մեղմացնող և ծանրացնող հանգամանքների վերլուծության հիման վրա
Այսպես` Դատարանը մեղադրյալ Մ․Ասատրյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Մ․Ասատրյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, Դատարանը, որպես Մ․Ասատրյանի անձը բնութագրող տվյալ հաշվի է առնում այն, որ երիտասարդ է, նակինում դատապարտված չի եղել։
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալ Մ․Ասատրյանի պատասխանատվությունն ու պատիժը մեղմացնող հանգամանք հաշվի է առնում այն, որ նա իրեն լիովին մեղավոր է ճանաչել և տվել խոստովանական ցուցմունքներ, անկեղծորեն զղջացել է կատարած արարքների համար:
Դատարանը, արձանագրում է, որ մեղադրյալ Մ․Ասատրյանի պատասխանատվությունն ու պատիժը ծանրացնող հանգամանքներ առկա չեն:
Դատարանը գտնում է, որ կատարած արարքների համար մեղադրյալ Մ․Ասատրյանը ենթակա է պատժի:
Դատարանը, հաշվի առնելով մեղադրյալ Մ․Ասատրյանի կատարած արարքների՝ հանրության համար վտանգավորության աստիճանն ու բնույթը, նրա անձը բնութագրող, պատասխանատվությունը և պատիժը մեղմացնող հանգամանքները, գտնում է, որ մեղադրյալ Մ․Ասատրյանն իր կատարած 2 դրվագ ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության համար ենթակա է պատժի հանրային աշխատանքների ձևով՝ հաշվի առնելով այն, որ մեղադրյալը հայտարարեց, որ հնարավորություն չունի վճարելու իր նկատմամբ ենթադրաբար նշանակվող տուգանքը, այն իր համար ավելի խիստ պատիժ է, քան հանրային աշխատանքները և պատրաստ է կատարել հանրային աշխատանքներ։
Վերոգրյալի հիման վրա Դատարանը գտնում է, որ Մերի Ասատրյանի նկատմամբ ՀՀ քրեական օրենսգրքի 344-րդ հոդվածի 1-ին մասով որպես պատիժ պետք է նշանակել հանրային աշխատանքներ՝ 60 (վաթսուն) ժամ տևողությամբ, իսկ ՀՀ քրեական օրենսգրքի 344-րդ հոդվածի 1-ին մասով՝ կրկին հանրային աշխատանքներ՝ 60 (վաթսուն) ժամ տևողությամբ։
ՀՀ քրեական օրենսգրքի 74-րդ հոդվածի հիման վրա պատիժների լրիվ գումարելու հիման վրա մեղադրյալ Մերի Դերենիկի Ասատրյանի նկատմամբ վերջնական պատիժ նշանակել հանրային աշխատանքներ՝ 120 (հարյուրքսան) ժամ տևողությամբ։
Դատարանն արձանագրում է, որ արտավարույթային փաստաթուղթ ճանաչված և քրեական գործին կցված փաստաթղթերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Մ․Ասատրյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ, 464․1-րդ-464․5-րդ հոդվածներով` Դատարանը

Վ Ճ Ռ Ե Ց

Մերի Դերենիկի Ասատրյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով և 344-րդ հոդվածի 1-ին մասով նախատեսված արարքների կատարման մեջ և նրա նկատմամբ պատիժ նշանակել․
ՀՀ քրեական օրենսգրքի 344-րդ հոդվածի 1-ին մասով՝ հանրային աշխատանքներ՝ 60 (վաթսուն) ժամ տևողությամբ։
ՀՀ քրեական օրենսգրքի 344-րդ հոդվածի 1-ին մասով՝ հանրային աշխատանքներ՝ 60 (վաթսուն) ժամ տևողությամբ։
ՀՀ քրեական օրենսգրքի 74-րդ հոդվածի հիման վրա՝ պատիժների լրիվ գումարելու միջոցով, մեղադրյալ Մերի Դերենիկի Ասատրյանի նկատմամբ վերջնական պատիժ նշանակել հանրային աշխատանքներ՝ 120 (հարյուրքսան) ժամ տևողությամբ։
Մերի Դերենիկի Ասատրյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Արտավարութային փաստաթղթերը թողնել կցված քրեական գործին դատավճիռն օրինական ուժի մեջ մտնելուց հետո։
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:


ԴԱՏԱՎՈՐ՝ Ս.ԳԶՈԳՅԱՆ