ԵԴ1/3160/01/24



Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
Երևան քաղաքի առաջին ատյանի ընդհանուր իրավասության
քրեական դատարանը (այսուհետ նաև՝ Դատարան)՝

Նախագահող դատավոր Հ.Ավագյան
Քարտուղարությամբ` Մ.Թովմասյանի
Մասնակցությամբ՝
Հանրային մեղադրողներ Ռ․Գրիգորյանի, Ռ․Մկրտչյանի
Տուժողներ Գ․Միքայելյանի, Լ․Աթաբեկյանի,
Տ․Ղազարյանի, Հ․Հակոբյանի,
Ա․Աբրահամյանի, Ա․Ղազարյանի,
Գ․Հովհաննիսյանի, Ա․Ղազարյանի
Պաշտպաններ Ա․Մանուկյանի, Մ․Աբրահամյանի,
Վ․Հակոբյանի
Մեղադրյալ Վ․Բադալյանի

2026 թվականի ապրիլի 1-ին, դռնբաց դատական նիստում, Երևան քաղաքում քննելով քրեական վարույթն ըստ մեղադրանքի`
Վաչագան Վազգենի Բադալյանի՝ (ծնված՝ 1990 թվականի դեկտեմբերի 31-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, դատվածություն չունեցող, հաշվառված Երևան քաղաքի Նորագավիթ 7-րդ փողոցի 1-ին փակուղու 2-րդ տանը) հանրային քրեական հետապնդում է հարուցվել ՀՀ քրեական օրենսգրքի 255-րդ հոդվածի 1-ին մասով, 267-րդ հոդվածի 1-ին մասով՝ երեք դրվագով, 255-րդ հոդվածի 2-րդ մասի 1-ին կետով, 267-րդ հոդվածի 2-րդ մասի 1-ին կետով՝ հինգ դրվագով, որպես խափանման միջոց է կիրառվել կալանքը,

ՊԱՐԶԵՑ

1. Գործի դատավարական նախապատմությունը.
2023 թվականի մայիսի 22-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09135423 քրեական վարույթը՝ ՀՀ քրեական օրենսգրքի 255-րդ հոդվածի 1-ին մասի հատկանիշներով:
Նույն օրը Տաթև Տիգրանի Ղազարյանը ճանաչվել է տուժող:
2023 թվականի մայիսի 12-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09132323 քրեական վարույթը՝ ՀՀ քրեական օրենսգրքի 255-րդ հոդվածի 1-ին մասի հատկանիշներով:
2023 թվականի հունիսի 20-ին Լուսինե Սամվելի Աթաբեկյանը ճանաչվել է տուժող:
2023 թվականի դեկտեմբերի 26-ին որոշում է կայացվել թիվ 09132323 քրեական վարույթը թիվ 09135423 քրեական վարույթին միացնելու մասին:
2023 թվականի հոկտեմբերի 9-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09-0076-23 քրեական վարույթը՝ ՀՀ քրեական օրենսգրքի 255-րդ հոդվածի 1-ին մասի հատկանիշներով:
Նույն օրը Գայանե Արմենի Հովհաննիսյանը ճանչվել է տուժող:
2023 թվականի դեկտեմբերի 26-ին որոշում է կայացվել թիվ 09-0076-23 քրեական վարույթը թիվ 09135423 քրեական վարույթին միացնելու մասին:
2023 թվականի մայիսի 19-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09134823 քրեական վարույթը՝ ՀՀ քրեական օրենսգրքի 255-րդ հոդվածի 1-ին մասի հատկանիշներով:
2023 թվականի հունիսի 7-ին Գուրգեն Արմենակի Միքաելյանը ճանչվել է տուժող:
2023 թվականի հունիսի 14-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09142623 քրեական վարույթը՝ ՀՀ քրեական օրենսգրքի 255-րդ հոդվածի 1-ին մասի հատկանիշներով:
Նույն օրը Հասմիկ Միշայի Հակոբյանը ճանչվել է տուժող:
2023 թվականի մայիս 31-ին որոշում է կայացվել թիվ 09134823 քրեական վարույթը թիվ 09135423 քրեական վարույթին միացնելու մասին:
2023 թվականի դեկտեմբերի 28-ին որոշում է կայացվել թիվ 09134823 քրեական վարույթը թիվ 09135423 քրեական վարույթին միացնելու մասին:
2023 թվականի սեպտեմբերի 19-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09-0028-23 քրեական վարույթը՝ ՀՀ քրեական օրենսգրքի 255-րդ հոդվածի 1-ին մասի հատկանիշներով:
2023 թվականի սեպտեմբերի 20-ին Անահիտ Ռոբերտի Ղազարյանը ճանչվել է տուժող:
2023 թվականի դեկտեմբերի 28-ին որոշում է կայացվել թիվ 09-0028-23 քրեական վարույթը թիվ 09135423 քրեական վարույթին միացնելու մասին:
2023 թվականի նոյեմբերի 20-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09-0155-23 քրեական վարույթը՝ ՀՀ քրեական օրենսգրքի 255-րդ հոդվածի 1-ին մասի, 287-րդ հոդվածի 1-ին մասի հատկանիշներով:
2023 թվականի նոյեմբերի 21-ին Արման Վահանի Աբրահամյանը ճանչվել է տուժող:
2023 թվականի դեկտեմբերի 28-ին որոշում է կայացվել թիվ 09-0155-23 քրեական վարույթը թիվ 09135423 քրեական վարույթին միացնելու մասին:
2024 թվականի սեպտեմբերի 7-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել են թիվ 091064424, 09106524, 09106724, 09106824, 09106924 քրեական վարույթները՝ ՀՀ քրեական օրենսգրքի 267-րդ հոդվածի 1-ին մասի հատկանիշներով:
Նույն օրը որոշում է կայացվել նշված քրեական վարույթները թիվ 09135423 քրեական վարույթին միացնելու մասին:
2024 թվականի սեպտեմբերի 9-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09107524 քրեական վարույթը՝ ՀՀ քրեական օրենսգրքի 255-րդ հոդվածի 1-ին մասի, 267-րդ հոդվածի 1-ին մասի հատկանիշներով:
Նույն օրը Արմենուհի Համլետի Ղազարյանը ճանչվել է տուժող:
2024 թվականի սեպտեմբերի 17-ին որոշում է կայացվել թիվ 09107524 քրեական վարույթը թիվ 09135423 քրեական վարույթին միացնելու մասին:
Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ե.Կարապետյանի 2024 թվականի սեպտեմբերի 24-ի որոշմամբ՝ Վաչագան Վազգենի Բադալյանի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 255-րդ հոդվածի 1-ին մասով, 267-րդ հոդվածի 1-ին մասով՝ երեք դրվագով, 255-րդ հոդվածի 2-րդ մասի 1-ին կետով, 267-րդ հոդվածի 2-րդ մասի 1-ին կետով՝ հինգ դրվագով:
2024 թվականի հոկտեմբերի 29-ին Վաչագան Բադալյանը ձերբակալվել է, և նույն օրը նրան ներկայացվել է մեղադրանքը։
Երևան քաղաքի առաջին ատյանի ընդհանուր իրավասության քրեական դատարանի 2024 թվականի հոկտեմբերի 30-ի որոշմամբ՝ Վաչագան Բադալյանի նկատմամբ որպես խափանման միջոց է ընտրվել կալանքը:
2023 թվականի հոկտեմբերի 31-ին որոշում է կայացվել թիվ 09135423 քրեական վարույթից մաս անջատելու մասին և անջատված վարույթին շնորհվել է թիվ 09126824 համարը:
2024 թվականի նոյեմբերի 7-ին թիվ 09135423 վարույթի նյութերը հաստատված մեղադրական եզրակացությամբ ուղարկվել են Դատարան, որտեղ գործին շնորհվել է ԵԴ1/3160/01/24 համարը:
2024 թվականի նոյեմբերի 11-ին Դատարանի դատավոր Հ․Ավագյանը որոշում է կայացրել վարույթը ստանձնելու և նախնական դատալսումներ նշանակելու մասին։
2026 թվականի մարտի 25-ին Դատարանը Վաչագան Վազգենի Բադալյանի նկատմամբ կայացրել է մեղադրական վերդիկտ։



2. Մեղադրանքի փաստական և իրավական հիմնավորումները.
Վաչագան Վազգենի Բադալյանի նկատմամբ հանրային քրեական հետապնդում է հարուցվել այն բանի համար, որ «(․․․) նա խաբեության՝ դիտավորությամբ իրականությունը խեղաթյուրելու, իրական մտադրության մասին լռելու և վստահությունը չարաշահելու՝ ապագայում սպասվող իրադարձությունների կապակցությամբ անձին դիտավորությամբ մոլորության մեջ գցելու եղանակով կատարել է ուրիշի գույքի մանր չափերի հափշտակություններ՝ այդ թվում խմբի կազմում, ինչպես նաև իրացրել է կեղծ բովանդակությամբ վճարահաշվարկային փաստաթղթեր և կեղծ արտարժույթ։
Այսպես.
Վաչագան Վազգենի Բադալյանը 2023 թվականի մայիսի 15-ին ուրիշի գույքը խաբեությամբ հափշտակելու դիտավորությամբ «Լիստ.ամ» կայքում «apple watch SE» մոդելի ժամացույցի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Տաթև Ղազարյանի հետ և պայմանավորվածություն ձեռք բերել ժամացույցը 85.000 ՀՀ դրամով գնելու շուրջ, որից հետո նույն օրը՝ ժամը 21:30-ի սահմաններում Երևան քաղաքի Դրո փողոցի 15 հասցեում գտնվող «Հայփոստ» ՓԲ ընկերության մոտ հանդիպել է Տաթև Ղազարյանին և վերջինիս «Whatsaap» հավելվածի հեռախոսահամարին է ուղարկել «Ինեկոբանկ» ՓԲ ընկերության անվամբ լրացված, քննությամբ դեռևս չպարզված հանգամանքներում պատրաստված, կեղծ բովանդակությամբ վճարահաշվարկային փաստաթուղթ հանդիսացող 230515026048000 գործարքի համարով անդորրագիրը՝ այդ կերպ խաբեության և վստահությունը չարաշահելու եղանակով հափշտակելով «apple watch SE» մոդելի ժամացույցը՝ Տաթև Ղազարյանին պատճառելով մանր չափի՝ 85.000 ՀՀ դրամի գույքային վնաս:
Այսինքն` Վաչագան Վազգենի Բաղալյանին մեղսագրվում է ՀՀ քրեական օրենսգրքի 255-րդ հոդվածի 1-ին մասով և 267-րդ հոդվածի 1-ին մասով նախատեսված հանցանքի կատարում։
Բացի այդ, Վաչագան Վազգենի Բադալյանը 2023 թվականի մայիսի 9-ին ուրիշի գույքը խաբեությամբ հափշտակելու դիտավորությամբ «Լիստ․ամ» կայքում «iphone 11» մոդելի բջջային հեռախոսի վաճառքի վերաբերյալ տեղադրված հեռախոսահամարով կապ է հաստատել Լուսինե Աթաբեկյանի հետ և պայմանավորվածություն ձեռք բերել հեռախոսը 130.000 ՀՀ դրամով գնելու շուրջ, որից հետո 2023 թվականի մայիսի 10-ին՝ ժամը 22:10-ի սահմաններում Երևան քաղաքի Դրոյի փողոցի 21-րդ շենքի 19 բնակարան հասցեում հանդիպել է Լուսինե Աթաբեկյանին և վերջինիս է ուղարկել «Արդշինբանկ» ՓԲ ընկերության անվամբ լրացված, քննությանը դեռևս չպարզված հանգամանքներում պատրաստված, կեղծ բովանդակությամբ վճարահաշվարկային փաստաթուղթ հանդիսացող 3019719 նույնականացուցիչ համարով անդորրագիրը` այդ կերպ խաբեության և վստահությունը չարաշահելու եղանակով հափշտակելով «iphone 11» մոդելի բջջային հեռախոսը՝ Լուսինե Աթաբեկյանին պատճառելով մանր չափի` 130.000 ՀՀ դրամի գույքային վնաս:
Այսինքն` Վաչագան Վազգենի Բաղալյանին մեղսագրվում է ՀՀ քրեական օրենսգրքի 255-րդ հոդվածի 1-ին մասով և 267-րդ հոդվածի 1-ին մասով նախատեսված հանցանքի կատարում։
Բացի այդ, Վաչագան Վազգենի Բադալյանը և վարույթով դեռևս չպարզված անձը խմբի կազմում խարդախությամբ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից դեռևս նախաքննությամբ չպարզված անձը 2023 թվականի հոկտեմբերի 7-ին «Լիստ.ամ» կայքում «iphone 11 pro max» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Գայանե Հովհաննիսյանի հետ և պայմանավորվածություն ձեռք բերել հեռախոսը 170.000 ՀՀ դրամով գնելու շուրջ, որից հետո նույն օրը՝ ժամը 22:00-22:30-ի սահմաններում Վաչագան Բադալյանը և վարույթով դեռևս չպարզված անձը Երևան քաղաքի Դրոյի փողոցի 8-րդ հասցեում հանդիպել են Գայանե Հովհաննիսյանին և վերջինիս են ուղարկել «Արդշինբանկ» ՓԲ ընկերության անվամբ լրացված, քննությամբ դեռևս չպարզված հանգամանքներում պատրաստված, կեղծ բովանդակությամբ վճարահաշվարկային փաստաթուղթ հանդիսացող 331879921 նույնականացուցիչ համարով անդորրագիրը՝ այդ կերպ խաբեության և վստահությունը չարաշահելու եղանակով հափշտակելով «iphone 11 pro max» մոդելի բջջային հեռախոսը՝ Գայանե Հովհաննիսյանին պատճառելով մանր չափի՝ 170.000 ՀՀ դրամի գույքային վնաս:
Այսինքն՝ Վաչագան Վազգենի Բադալյանին մեղսագրվում է ՀՀ քրեական օրենսգրքի 255-րդ հոդվածի 2-րդ մասի 1-ին կետով և 267-րդ հոդվածի 2-րդ մասի 1-ին կետով նախատեսված հանցանքի կատարում:
Բացի այդ, Վաչագան Վազգենի Բադալյանը և վարույթով դեռևս չպարզված անձը խմբի կազմում խարդախությամբ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից դեռևս նախաքննությամբ չպարզված անձը 2023 թվականի մայիսի 7-ին «Լիստ.ամ» կայքում «Samsung galaxy S 23» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Գուրգեն Միքայելյանի հետ և պայմանավորվածություն ձեռք բերել հեռախոսը 270.000 ՀՀ դրամով գնելու շուրջ, որից հետո նույն օրը` ժամը 18:00-ի սահմաններում Վաչագան Բադալյանը և վարույթով դեռևս չպարզված անձը Երևան քաղաքի Ա.Ահարոնյան և Դրո փողոցների խաչմերուկում հանդիպել են Գուրգեն Միքայելյանին և վերջինիս «Whatsaap» հավելվածի հեռախոսահամարին ուղարկել «Արդշինբանկ» ՓԲ ընկերության անվամբ լրացված, քննությամբ դեռևս չպարզված հանգամանքներում պատրաստված, կեղծ բովանդակությամբ վճարահաշվարկային փաստաթուղթ հանդիսացող 30197121 նույնականացուցիչ համարով անդորրագիրը՝ այդ կերպ խաբեության և վստահությունը չարաշահելու եղանակով հափշտակելով «Samsung galaxy S 23» մոդելի բջջային hեռախոսը՝ Գուրգեն Միքայելյանին պատճառելով մանր չափի՝ 270.000 ՀՀ դրամի գույքային վնաս:
Այսինքն՝ Վաչագան Վազգենի Բադալյանին մեղսագրվում է ՀՀ քրեական օրենսգրքի 255-րդ հոդվածի 2-րդ մասի 1-ին կետով և 267-րդ հոդվածի 2-րդ մասի 1-ին կետով նախատեսված հանցանքի կատարում:
Բացի այդ, Վաչագան Վազգենի Բադալյանը և վարույթով դեռևս չպարզված անձը խմբի կազմում խարդախությամբ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից դեռևս նախաքննությամբ չպարզված անձը 2023 թվականի հունիսի 9-ին` ժամը 11:23–ի սահմաններում «Լիստ.ամ» կայքում «iphone 12 mini 64 GB green» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Հասմիկ Հակոբյանի հետ և պայմանավորվածություն ձեռք բերել հեռախոսը 130.000 ՀՀ դրամով գնելու շուրջ, որից հետո նույն օրը՝ ժամը 22:00-ի սահմաններում Վաչագան Բադալյանը և վարույթով դեռևս չպարզված անձը Երևան քաղաքի Էմինեմսկու 1-ին փողոց հասցեում հանդիպել են Հասմիկ Հակոբյանին և վերջինիս «Whatsaap» հավելվածի հեռախոսահամարին ուղարկել բանկի անվամբ լրացված, քննությամբ դեռևս չպարզված հանգամանքներում պատրաստված, կեղծ բովանդակությամբ վճարահաշվարկային փաստաթուղթ հանդիսացող անդորրագիր՝ այդ կերպ խաբեության և վստահությունը չարաշահելու եղանակով հափշտակելով՝ «iphone 12 mini 64 GB green» մոդելի բջջային հեռախոսը՝ Հասմիկ Հակոբյանին պատճառելով մանր չափի՝ 130.000 ՀՀ դրամի գույքային վնաս:
Այսինքն՝ Վաչագան Վազգենի Բադալյանին մեղսագրվում է ՀՀ քրեական օրենսգրքի 255-րդ հոդվածի 2-րդ մասի 1-ին կետով և 267-րդ հոդվածի 2-րդ մասի 1-ին կետով նախատեսված հանցանքի կատարում:
Բացի այդ, Վաչագան Վազգենի Բադալյանը և վարույթով դեռևս չպարզված անձը խմբի կազմում խարդախությամբ՝ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից դեռևս նախաքննությամբ չպարզված անձը 2023 թվականի սեպտեմբերի 17-ին՝ ժամը 21։00-ի սահմաններում «Լիստ.ամ» կայքում «iphone 13» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Անահիտ Ղազարյանի հետ և պայմանավորվածություն ձեռք բերել հեռախոսը 220.000 ՀՀ դրամով գնելու շուրջ, որից հետո նույն օրը Վաչագան Բադալյանը և վարույթով դեռևս չպարզված անձը Երևան քաղաքի Կ.Ուլնեցի 72 շենքի մոտ հանդիպել են Անահիտ Ղազարյանին և վերջինիս են ուղարկել «Արդշինբանկ» ՓԲ ընկերության անվամբ լրացված, քննությամբ դեռևս չպարզված հանգամանքներում պատրաստված, կեղծ բովանդակությամբ վճարահաշվարկային փաստաթուղթ հանդիսացող 33187992 նույնականացուցիչ համարով անդորրագիրը` այդ կերպ խաբեության և վստահությունը չարաշահելու եղանակով հափշտակելով «iphone 13» մոդելի բջջային հեռախոսը՝ Անահիտ Ղազարյանին պատճառելով մանր չափի՝ 220.000 ՀՀ դրամի գույքային վնաս:
Այսինքն՝ Վաչագան Վազգենի Բադալյանին մեղսագրվում է ՀՀ քրեական օրենսգրքի 255-րդ հոդվածի 2-րդ մասի 1-ին կետով և 267-րդ հոդվածի 2-րդ մասի 1-ին կետով նախատեսված հանցանքի կատարում:
Բացի այդ, Վաչագան Վազգենի Բադալյանը և վարույթով դեռևս չպարզված անձը խմբի կազմում խարդախությամբ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից դեռևս նախաքննությամբ չպարզված անձը 2024 թվականի սեպտեմբերի 5-ին՝ ժամը 17:00-ից-18:00-ն ընկած ժամանակահատվածում «Լիստ.ամ» կայքում «iphone 14 pro max» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Արմենուհի Ղազարյանի հետ և պայմանավորվածություն ձեռք բերել հեռախոսը 355.000 ՀՀ դրամով գնելու շուրջ, որից հետո նույն օրը՝ ժամը 22:30-ի սահմաններում Վաչագան Բադալյանը և վարույթով դեռևս չպարզված անձը Երևան քաղաքի Ծարավ-Աղբյուր փողոցի 32/2 տանը հանդիպել են Արմենուհի Ղազարյանին և վերջինիս են ուղարկել «Արդշինբանկ» ՓԲ ընկերության անվամբ լրացված, քննությամբ դեռևս չպարզված հանգամանքներում պատրաստված, կեղծ բովանդակությամբ վճարահաշվարկային փաստաթուղթ հանդիսացող 31872219 նույնականացուցիչ համարով անդորրագիրը՝ այդ կերպ խաբեության և վստահությունը չարաշահելու եղանակով հափշտակելով «iphone 14 pro max» մոդելի բջջային հեռախոսը՝ Արմենուհի Ղազարյանին պատճառելով մանր չափի՝ 355.000 ՀՀ դրամի գույքային վնաս:
Այսինքն՝ Վաչագան Վազգենի Բադալյանին մեղսագրվում է ՀՀ քրեական օրենսգրքի 255-րդ հոդվածի 2-րդ մասի 1-ին կետով և 267-րդ հոդվածի 2-րդ մասի 1-ին կետով նախատեսված հանցանքի կատարում:
Բացի այդ, Վաչագան Վազգենի Բադալյանը 2023 թվականի նոյեմբերի 17-ին՝ ժամը 22:54-ի սահմաններում ուրիշի գույքը խաբեությամբ հափշտակելու դիտավորությամբ «Լիստ.ամ» կայքում «iphone 14 pro max» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Արման Աբրահամյանի հետ և պայմանավորվածություն ձեռք բերել հեռախոսը 900 ԱՄՆ դոլարով գնելու շուրջ, որից հետո նույն օրը Երևան քաղաքի Կ.Ուլնեցի 62 շենքի մոտ հանդիպել է Արման Աբրահամյանին և վերջինիս է տվել «MB 94335804 D», «MB 94337745 D», «MB 94337599 D», «MB 94335800 D», «PF 98737257 H», «PF 98730565 H», «PF 27524234 B», «PF 27524198 B», «PF 16049892_8», «PF 98735766 H», «PF 275242269 B» անվանական արժեքով քննությամբ դեռևս չպարզված հանգամանքներում պատրաստված 4 հատ 50 և 7 հատ 100 ԱՄՆ դոլար կեղծ արտարժույթ՝ այդ կերպ խաբեության և վստահությունը չարաշահելու եղանակով հափշտակելով «iphone 14 pro max» մոդելի բջջային հեռախոսը՝ Արման Աբրահամյանին պատճառելով մանր չափի՝ 900 ԱՄՆ դոլարին համարժեք 362.169 ՀՀ դրամի գույքային վնաս:
Այսինքն՝ Վաչագան Վազգենի Բադալյանին մեղսագրվում է ՀՀ քրեական օրենսգրքի 255-րդ հոդվածի 1-ին մասով և 267-րդ հոդվածի 1-ին մասով նախատեսված հանցանքի կատարում»։

3. Ապացույցների հետազոտում և գնահատում.
Մեղադրյալ Վաչագան Վազգենի Բադալյանը հիմնական դատալսումների ընթացքում հայտարարել է, որ մասնակի ընդունում է մեղքը, իրեն վերագրվող արարքները կատարել է միայնակ, ինչպես նաև՝ Արման Աբրահամյանի հետ կապված դրվագով ինքն առնչություն չունի և ցուցմունք է տվել այն մասին, որ իր հետ կապված անձինք տվյալ ժամանակահատվածում ամբողջությամբ տեղյակ չեն եղել կատարվող գործողություններից։ Նրանցից մեկը եղել է ծանոթ, մյուսը՝ անծանոթ անձ և նրանք չեն ունեցել տեղեկություն, որ իր գործողությունները կապված են եղել անձնական կամ առևտրային բնույթի նպատակների հետ: Տարբեր ժամանակներում ներգրավված անձինք տարբեր են եղել և նրանք պատկերացում չեն ունեցել իրականացվող գործողությունների վերաբերյալ։ Ինքը որևէ դեպքում և որևէ անձի, այդ թվում՝ Արման Աբրահամյանին, կեղծ գումար չի փոխանցել, նշված անձի հետ անձնական կամ գործնական կապ չի ունեցել։ Հեռախոսը ձեռք է բերել այլ անձի համար որպես նվեր, սակայն այն հետագայում չի ընդունվել։ Գործընթացը կատարվել է ծանոթի միջոցով և չի ունեցել տեղեկություն, թե հետագայում տվյալ հեռախոսը ինչպես է տնօրինվել։ Ինքն է կազմակերպել հեռախոսային խոսակցությունները և անձամբ է պայմանավորվել գործարքների շուրջ։ Հիմնական շփումն իրականացրել է ինքը, իսկ իր հետ եղած մյուս անձը հանդիպումների ընթացքում հիմնականում եղել է ներկա, սակայն չի մասնակցել ակտիվ քննարկումներին։ Տվյալ անձին ճանաչել է որպես ծանոթ, որի հետ հանդիպել է մոտ երկու անգամ, սակայն չի համարում նրան մտերիմ կամ ընկեր։ Իրենց հարաբերությունները սահմանափակվել են կարճատև հանդիպումներով և ընդհանուր ծանոթությամբ: Հեռախոսը ձեռք է բերել որպես օգնություն կամ լավություն կատարելու նպատակով՝ այլ անձի համար և գործարքը կազմակերպել է իր նախաձեռնությամբ, առանց պարտադրանքի կամ շահադիտական նպատակի։ Ինքը նշված անձանց վերաբերյալ չի հիշում տվյալները, սակայն կարող է ասել, որ նրանցից մեկը զբաղվել է հագուստի վաճառքով կամ առևտրային գործունեությամբ։ Հեռախոսային կապի միջոցով կատարել է պայմանավորվածություններ և ստացել փոխանցումների վերաբերյալ տեղեկություններ, սակայն չի ընդունում, որ ամբողջ գործընթացը միայն իր կողմից է իրականացվել։ Ինքը որոշ հանգամանքներ չի հիշում կամ չի կարող ամբողջությամբ վերականգնել դեպքերի ընթացքը։ Իր հետ եղած անձանց տվյալները չի հիշում, այդ թվում՝ անուն-ազգանուններ, հասցեներ, հեռախոսահամարներ կամ մեքենայի համարանիշներ։ Հիշում է միայն մեկ անձի՝ Նարեկ Միքայելյանին, ով անհրաժեշտության դեպքում կարող է ներկայանալ և ցուցմունք տալ դատարանում (տե՛ս դատական նիստի արձանագրությունը, ձայնագրության սկավառակը):
Տուժող Գուրգեն Արմենակի Միքայելյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին ճանաչում է դեպքի հետ կապված, մինչ այդ նրա հետ առնչություն չի ունեցել։ 2023 թվականի ընթացքում էլեկտրոնային խանութից գնել է «Սամսունգ Գալաքսի Ս 23» բջջային հեռախոսը, որից հետո հասկացել է, որ դրանում հնարավոր է տեղադրել միայն մեկ հեռախոսաքարտ, ինչով պայմանավորված որոշել է վաճառել այն: Համապատասխան վաճառքի հայտարարությունը տեղադրել է «Լիստ․ամ» կայքում և նշել, որ բջջայինը վաճառում է 270.000 ՀՀ դրամ գումարով: 2023 թվականի մայիսի 7-ին 091498766 բջջային հեռախոսահամարից իրեն է զանգահարել մի տղամարդ, ում հետ պայմանավորվածություն են ձեռք բերել հանդիպել Երևան քաղաքի Ա.Ահարոնյան և Դրո փողոցների խաչմերուկի մոտ՝ «Ֆանտաններ» կոչվող հատվածում։ Ժամը 18-ի սահմաններում, երբ հասել է այդ վայր, իրեն են մոտեցել Վաչագան Բադալյանը և ևս մեկ տղամարդ, ով ներկայացել է Կարեն անվամբ և հայտնել են, որ ցանկանում են գնել հեռախոսը: Այնուհետև այդ անձինք ուսումնասիրել են իր կողմից վաճառվող հեռախոսը և հայտնել, որ պետք է վճարումն իրականացնեն «Իզի Փեյ» վճարային համակարգով, որին ինքը չի առարկել: Վաչագանը ճշտել է իր բանկային տվյալները և մի պահ հեռացել է, որից հետո վերադառնալով, իր «Վոտսափ» հավելվածին ուղարկել է վճարման էլեկտրոնային անդորրագիր: Չնայած նրան, որ անդորրագիր է ցուցադրվել իրեն կատարված 270.000 ՀՀ դրամ գումարի փոխանցման վերաբերյալ, իր էլեկտրոնային դրամապանակին գումարի մուտք չի եղել և ոչ աշխատանքային ժամով պայմանավորված ինքը հնարավորություն չի ունեցել բանկից տեղեկանալ փոխանցման վերաբերյալ: Ընդունելով Վաչագանի կողմից ներկայացված կտրոնը՝ պահանջել է, որ վերջինս որպես երաշխավորություն իրեն փոխանցի անձնագիր և նոր միայն հեռանա, որպեսզի ինքը վստահ լինի, որ խաբեության զոհ չի դառնալու: Վաչագանն արդեն «Տելեգրամ»-ով ուղարկել է իր անձնագրի լուսապատճենը, որից հետո այդ անձինք, վերցնելով բջջային հեռախոսը, հեռացել են: Որոշ ժամանակ անց ստուգել է իր հաշվեկշիռը և հասկացել, որ գումարային փոխանցումը չի կատարվել և «Իզի Փեյ» զանգահարելով՝ հետաքրքրքվել է փոխանցված անդորրագրի վերաբերյալ, սակայն իրեն հայտնել են, որ նման փոխանցում չի իրակաանցվել, ինչից հասկացել է, որ դարձել է խարդախության զոհ, որից հետո ո΄չ Վաչագանի, ո΄չ էլ Կարենի հետ կապ հաստատել չի կարողացել (տե՛ս դատական նիստի արձանագրությունը, ձայնագրության սկավառակը):
Տուժող Լուսինե Սամվելի Աթաբեկյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին նախկինում չի ճանաչել, նրա հետ առնչություն է ունեցել միայն դեպքի հետ կապված։ 2023 թվականի մայիսի սկզբին իր «Այֆոն 11» մոդելի բջջային հեռախոսը վաճառելու վերաբերյալ «Լիստ․ամ» կայքում հայտարարություն է տեղադրել։ 2023 թվականի մայիսի 9-ի երեկոյան «Վոտսապ» հավելվածի 091498766 հեռախոսահամարով իրեն է զանգահարել մի տղամարդ, ներկայացել Վաչե անունով, իսկ հաջորդ օրը՝ ժամը 22:00-ի սահմաններում, Վաչագան Բադալյանն այցելել է իր՝ Երևան քաղաքի Դրոյի փողոցի 21-րդ շենքի 19-րդ բնակարան, որտեղ վերցրել ու ուսումասիրել է բջջայինը, այնուհետև խնդրել է իրեն տրամադրել բանկային քարտ՝ դրան գումարը փոխանցելու համար: Նրան տրամադրել է «Էվոկաբանկ»-ի իր բանկային քարտը, Վաչագանն իր բջջային հեռախոսով ինչ-որ գործողություն է կատարել, այնուհետև ցուցադրել վճարային անդորրագիր՝ իբրև արդեն փոխանցել է 130.000 ՀՀ դրամը: Դրանից հետո վերցնելով բջջային հեռախոսը՝ Վաչագանը հեռացել է տնից: Նրա հեռանալուց հետո հասկացել է, որ նշված կտրոնը կեղծ է եղել, չի համապատասխանել իրականությանը, որևէ փոխանցում չի կատարվել և Վաչագանը խաբեությամբ տիրացել է իր բջջային հեռախոսին: Հետագայում փորձել է կապ հաստատել նրա հետ, սակայն զանգերին չի պատասխանել (տե՛ս դատական նիստի արձանագրությունը, ձայնագրության սկավառակը):
Տուժող Տաթև Տիգրանի Ղազարյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին ճանաչում է դեպքի հետ կապված, մինչ այդ նրա հետ առնչություն չի ունեցել։ 2023 թվականին «Լիստ․ամ» կայքում հայտարարություն է տեղադրել իրեն պատկանող «Այփլ Վոտչ» մոդելի ձեռքի ժամացույցը 90.000 ՀՀ դրամով վաճառելու վերաբերյալ։ 2023 թվականի մայիսի 15-ին 093-79-49-67 բջջային հեռախոսահամարից ստացել է հեռախոսազանգ: Իրեն զանգահարած անձը չի ներկայացել, ցանկություն է հայտնել գնել ժամացույցը: Նրա հետ պայմանավորվածություն են ձեռք բերել ժամացույցը 85.000 ՀՀ դրամով վաճառելու վերաբերյալ: Նույն օրը՝ ժամը 17-ի սահամաններում, Վաչագան Բադալյանի հետ հանդիպել է Երևան քաղաքի Դրո փողոցի 15 հասցեի մոտ գտնվող «Հայփոստ» ՓԲԸ-ի մոտ, որտեղ նրան է փոխանցել ժամացույցը՝ իր տուփով և լիցքավորիչով, ինչպես նաև՝ թվով երկու կապիչները: Երբ ժամացույցը տրամադրել է Վաչագանին, նա իր բջջային հեռախոսով ցույց է տվել վճարման անդորրագիր, համաձայն որի՝ 85.000 ՀՀ դրամը փոխանցվել է իրեն պատկանող հաշվեհամարին: Միաժամանակ նշված անդորրագիրը ուղարկել է իր «Վոտսափ» հավելվածին, որից հետո վերցրել է ժամացույցը և հեռացել: Դրանից հետո գնացել է տուն և մոտ 1 ժամ անց Վաչագանը 093-79-49-67 բջջային հեռախոսահամարից զանգահարել է իրեն և հայտնել, որ չի կարողանում ակտիվացնել ժամացույցը, քանի որ այն միացված է իր «Այքլաուդին»-ին: Այդ ժամանակ նրան ասել է, որպեսզի թարմացնի ժամացույցը, սակայն այդպես էլ չի կարողացել ակտիվացնել այն: Վաչգանն իրեն հայտնել է, որ իր ծանոթը՝ Գարիկը կմոտեցնի ժամացույցը, որպեսզի ինքը դուրս գա «Այքլաուդին»-ից: Նույն օրը՝ ժամը 21:30-ի սահմաններում, Երևան քաղաքի Դրոյի 17 հասցում հանդիպել է ոմն Գարիկի հետ, վերջինս իրեն է փոխանցել ժամացույցը և վերցնելով այն՝ գնացել է տուն: Տանը դուրս է եկել իր «Այքլաուդին»-ից։ Հաջորդ օրը կապ է հատատել Վաչագանի հետ, պայմանավորվածություն են ձեռք բերել, որպեսզի ժամացույցը «Յանդեքս» տաքսի ծառայության միջոցով առաքի Երևան քաղաքի Կոմիտասի պողոտայի 2 հասցե, որից հետո ժամացույցն առաքել է նշված հասցե: Այդ ընթացքում մշտապես կապի մեջ է եղել Վաչագանի հետ, նրանից պարզաբանումներ է պահանջել, քանի որ գումարը չի նստել հաշվին, իսկ նա ասել է, որ բանկային հաշի փոխանցումը կարող է տևել 1-2 օր: Դեպքից 4 օր անց, հասկանալով, որ գումարը չի նստել իր բանկային հաշվին, կապ է հաստատել բանկի հետ, սակայն բանկի սպասարկման աշխատակիցը տեղեկացրել է, որ փոխանցում կատարելիս ստացող բանկի անվանումը սխալ է նշվել, ինչով պայմանավորված գումարը չի հասել իր հաշվին: Կրկին կապ է հաստատել Վաչագանի հետ, նա հայտնել է, որ գումարը կանխիկ կտրամադրի իրեն, սակայն այդպես էլ կապի դուրս չի եկել և խաբեությամբ տիրացել է ժամացույցին (տե՛ս դատական նիստի արձանագրությունը, ձայնագրության սկավառակը):
Տուժող Հասմիկ Միշայի Հակոբյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին ճանաչում է դեպքի հետ կապված, մինչ այդ նրա հետ առնչություն չի ունեցել։ 2022 թվականի ընթացքում «Մոբայլ Սենտր» խանութից գնել է «Այֆոն 12 մինի» մոդելի բջջային հեռախոս, որն օգտագործել է շուրջ մեկ տարի, որից հետո որոշել է վաճառել։ Համապատասխան վաճառքի հայտարարությունը տեղադրել է «Լիստ․ամ» կայքում։ 2023 թվականի հունիսի 9-ին իր «Վատսափ»-ին ստացել է զանգ «Գև» անվան տակ գրանցված +374-93-79-49-67 հեռախոսահամարից: Զանգահարողը հեռախոսազրույցի ընթացքում հարցրել է, թե որքան է հնարավոր սակարկել բջջայինի արժեքը և ինքը հայտնել է, որ հայտարարությունում նշված 140.000 դրամից կարող է իջնել 10.000 ՀՀ դրամ։ Քանի որ իր աշխատանքային ժամին են զանգահարել, ուստի չի կարողացել երկար խոսել և խնդրել է իր հետ կապ հաստատել ժամը 17-ից հետո: Երբ տուն է վերադարձել, իրենց պայմանավորված ժամին նույն «Վատսափ»-ին ստացել է զանգ և այդ անձը հետաքրքրվել է, թե երբ կարող է մոտենալ և որտեղ։ Նշել է իր տան հարակից հասցեն՝ Էմինեմսկու 1-ին փողոցը և այդ մարդն ասել, որ լրացուցիչ կապ կհաստատի։ Նույն օրը՝ ժամը 20-ի սահամաններում, նույն «Վատսափ»-ից ստացել է զանգ և այդ անձը հեռախոսով խոսելիս ասել է, որ գալիս է Բանգլադեշից և կուշանա։ Շուրջ 2 ժամ անց նոր միայն զանգահարել է նույն մարդը և ասել, որ իրենց տան մոտ է: Բջջայինը և դրամապանակը վերցնելով՝ դուրս է եկել իրենց տան հարակից բակերից մեկը, որտեղ կանգնած է եղել «Տոյոտա Քեմրի» մակնիշի մոխրագույն ավտոմեքենա, որի համարանիշները չի հիշել: Այդ ավտոմեքենայից իջել են Վաչագան Բադալյանը և ևս մեկ անձ, մոտեցել են իրեն և նրանցից ակտիվը՝ շեկ, բաց մաշկով տղան էր, ով խոսակցության ընթացքում հայտարարել է, որ ինքը գեներալի տղա է և բջջայինը գնում է, քանի որ ծննդյան նվեր են տանելու: Ծննդյան նվերի վերաբերյալ իրեն հայտնել են նաև հեռախոսազրույցի ընթացքում և դա է եղել պատճառը, որ համաձայնել է ուշ ժամի վաճառել հեռախոսը: Այնուհետև, բջջայինը հանել են տուփից և փողոցի լույսի տակ պահելով ուսումնասիրել դրա գույնը և չափը: Դրանից հետո Վաչագանի հետ եղած անձն ասել է, որ գումարն առձեռն չի կարող վճարել և պետք է փոխանցեն, ինքն ասել է, որ իրենք նման պայմանավորվածություն չեն ունեցել, բայց այդ շեկ տղան ասել է, որ չես հասկանում, թե կյանքը ինչքան է հեշտացել անկանխիկ վճարումներից: Այդ ժամանակ հետաքրքրքվել է արդյոք ունի բանկային քարտ, թե ոչ և դրամապանակը ստուգելով՝ տեսել է, որ աշխատանքային քարտը մոտն է: Նրանց հայտնել է իր քարտի վրայի թվերը, որից հետո Վաչագանը հավաքել է քարտի թվերն իր բջջայինով և հայտնել ամբողջական անուն-ազգանունը։ Քանի որ տեղյակ չէ, թե ինչպես են կատարվում անկանխիկ փոխանցումները, հավատացել է նրանց, քանի որ Վաչագանը նշել է իր անուն-ազգանունը: Այդ պահին մյուս անձը հետաքրքրվել է վերջնական արժեքի վերաբերյալ և ինքը պահանջել է 130.000 ՀՀ դրամ գումար, սակայն այդ անձը Վաչագանին ասել է, որ 135.000 ՀՀ դրամ փոխանցի իր հաշվեհամարին: Այդ ժամանակ նույն «Վատսափ»-ից ստացել է նամակ՝ կտրոնի լուսանկարի տեսքով, որում որպես մուտքային ստացողի հաշիվ նշված է եղել բանկային քարտի տվյալները և իր ազգանունը, որից հետո այդ տղաները շատ արագ ավտոմեքենան նստելով հեռացել են: Նրանց գնալուց հետո միայն փողոցում կանգնած ուսումնասիրել է իրեն փոխանցված կտրոնը, հասկացել է, որ այն «Թել Սել»-ի կտրոն է, սակայն որպես իր բանկային հաշվեհամար նշված է եղել բանկային քարտի տվյալները: Տեղում հասկացել է, որ դարձել է խարդախության զոհ, փորձել է զանգահարել այդ անձանց հեռախոսահամարին, սակայն նրանք իրեն ավելացրել են սև ցուցակում (տե՛ս դատական նիստի արձանագրությունը, ձայնագրության սկավառակը:
Տուժող Գայանե Արմենի Հովհաննիսյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին նախկինում չի ճանաչել, նրա հետ առնչություն է ունեցել միայն դեպքի հետ կապված։ «Լիստ.ամ» կայքում երկար ժամանակ հայտարարություն է տեղադրած եղել իր «Այֆոն 11 պրո մաքս» բջջային հեռախոսը 170.000 ՀՀ դրամով վաճառելու վերաբերյալ։ 2023 թվականի հոկտեմբերի 7-ին՝ ժամը 22-ի սահմաններում, իր հետ 077-18-59-51 բջջային հեռախոսահամարից կապ է հաստատել մի անձ և ցանկություն հայտնել գնել բջջային հեռախոսը։ Դրանից հետո, իրենց պայմանավորվածության համաձայն, Վաչագան Բադալյանը, մեկ այլ տղամարդու հետ, այցելել են իր՝ Երևան քաղաքի Դրոյի փողոցի 8 հասցեում գտնվող բնակարան, ուսումնասիրել են բջջային հեռախոսը, որից հետո ցույց են տվել վճարման կտրոն գումարի փոխանցման մասին։ Այդ անձինք ասել են, որ քանի որ շաբաթ օր է, հնարավոր է գումարը ուշ նստի իր հաշվին և վերցնելով բջջային հեռախոսը՝ հեռացել են։ Հետագայում գումարն այդպես էլ չի մուտքագրվել իր հաշիվ, որից պարզ է դարձել, որ վճարման կտրոնը կեղծ է եղել: Ինքը փորձել է կապ հաստատել այդ անձանց հետ, սակայն հեռախոսահամարը գտնվել է անհասանելի վիճակում: Բջջային հեռախոսն իրենից վերցրել է Վաչագան Բադալյանը, իսկ մյուս տղամարդու տվյալները չունի: Վաչագան Բադալյանին ինքը նախկինում տեսել է, գիտեր, որ աշխատել է շրջանայինում գտնվող հեռախոսների վաճառքի խանութում։ Դեպքից հետո փորձել է նրան այնտեղ փնտրել, սակայն իրեն ասել են, որ այլևս չի աշխատում, քանի որ բոլորին խաբել է (տե՛ս դատական նիստի արձանագրությունը, ձայնագրության սկավառակը):
Տուժող Անահիտ Ռոբերտ Ղազարյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին նախկինում չի ճանաչել, նրա հետ առնչություն է ունեցել միայն դեպքի հետ կապված։ Իր «Այֆոն 13» մոդելի մուգ կապույտ հեռախոսը տեղադրել է «Լիստ․ամ» կայք՝ վաճառելու նպատակով և 2023 թվականի սեպտեմբերի 17-ին՝ ժամը 21-ի սահմաններում, իր 096-66-09-77 հեռախոսահամարին 077-18-59-51 հեռախոսահամարից զանգահարել է մի անձ, ներկայացել է Սեն անվամբ և հայտնել, որ իրեն շտապ հեռախոս է անհրաժեշտ, խնդրել է, որ հենց այդ ժամին գա և հեռախոսը գնի։ Իրենց պայմանավորվածության համաձայն՝ հանդիպել են Երևանի Կ.Ուլնեցու 72-րդ շենքի հարևանությամ, որտեղ եկել են երկու անձ՝ մեկը Վաչագան Բադալյանը, մյուսի տվյալները չունի, այդ տղամարդու հագին եղել է գլխարկ, մուգ ակնոցներ և ունեցել է շատ նիհար կազմվածք։ Իրեն Սեն անվամբ ներկայացած անձը եղել է Վաչագանը, ով ասել է, որ իբրև 220.000 ՀՀ դրամ գումարը փոխանցել է բանկի միջոցով և ուղարկել է անդորրագիրը, նաև ավելացրել է, որ կիրակի է, այդ իսկ պատճառով հիմա գումարը չի նստել իր հաշվեհամարին և խնդրել է, որպեսզի այդ պահին հեռախոսը մնա իր մոտ, մինչև գումարը առավոտյան կնստի իր հաշվեհամարին: Հաջորդ օրն առավոտյան ինքը զանգահարել է բանկ և պարզել է, որ որևէ փոխանցում չի արվել իր հաշվեհամարին, իսկ այդ պահից ինչ զանգահարել կամ գրել է այդ անձի հեռախոսահամարին, իրեն չեն պատասխանել (տե՛ս դատական նիստի արձանագրությունը, ձայնագրության սկավառակը):
Տուժող Արմենուհի Համլետի Ղազարյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին նախկինում չի ճանաչել, նրա հետ առնչություն է ունեցել միայն դեպքի հետ կապված։ Իրեն պատկանող «Այֆոն 14 պրո մաքս» տեսակի բջջային հեռախոսը վաճառելու նպատակով հայտարարություն է տեղեդրել «Լիստ.ամ» հարթակում և որպես կապի միջոց տեղադրել է 077-28-90-13 բջջային հեռախոսահամարը: 2023 թվականի սեպտեմբերի 5-ին՝ ժամը 17-ից 18-ն ընկած ժամակահատվածում, 043-88-47-06 բջջային հեռախոսահամարից իրեն զանգահարել է մի անձ, ով ներկայացել է Վաչագան անվամբ և ցանկություն է հայտնել գնել նշված հեռախոսը: Ձեռք են բերել պայմանավորվածություն իրենց հասցեում հանդիպելու և նշված բջջային հեռախոսը վաճառելու վերաբերյալ, որից հետո նույն օրը՝ ժամը 22:30-ի սահմաններում, իրենց տուն են այցելել երկու արական սեռի անձինք, որոնցից մեկը եղել է Վաչագան Բադալյանը, իսկ մյուսը՝ ներկայացել է Ռոբերտ անվամբ: Բջջային հեռախոսն ուսումնասիրելուց հետո նշված անձինք որոշել են գնել հեռախոսը և այդ ժամանակ Վաչագանը հայտնել է, որ իրենց ընկերության դրամաշրջանառությունն ապահովելու նպատակով ցանկանում են գումարը վճարել փոխանցման եղանակով: Ինքը չի համաձայնել, հայտնել է, որ գումարը վճարեն կանխիկ կամ քարտային փոխանցման միջոցով, սակայն Վաչագանի բազմաթիվ պնդումներից հետո համաձայնել է, որ հեռախոսի գնման դիմաց վճարվելիք գումարը փոխանցեն իր «Ամիօբանկ»-ի հաշվեհամարին: Այդ ընթացքում Վաչագան Բադալյանը վստահություն ներշնչելու համար իրեն է փոխանցել իր անձնագրի լուսանկարը, այնուհետև կարճ ժամանակ անց հեռախոսի միջոցով իրեն են փոխանցել վճարման անդորրագիր, համաձայն որի՝ իրեն փոխանցվել է 355.000 ՀՀ դրամ գումար: Փոխանցելուց հետո տեղի ունեցած խոսակցության ժամանակ Վաչագանը զանգահարել է իբրև թե բանկի աշխատողի և վստահեցրել, որ փոխանցումը տեղի է ունեցել, սակայն իրեն հայտնել է, որ գումարը իր հաշվեհամարին կնստի մեկ աշխատանքային օրվա ընթացքում: Այդ խոսակցություններին որոշակի մասնակցություն է ունեցել նաև Վաչագանի հետ իրենց տուն եկած, Ռոբերտ անունով ներկայացած տղան, ով ևս իրեն համոզել է վաճառել հեռախոսը և վստահեցրել է, որ գումարն անպայման մեկ օրվա ընթացքում կփոխանցվի: Այնուհետև, հեռախոսն իր գործարանային տուփով վերցնելուց հետո, երբ այդ անձինք դուրս են եկել իրենց տանից, կարճ ժամանակ անց նկատել է, որ հաղորդագրությունների միջոցով իրեն փոխանցված անձնագրի և անդորրագրի լուսանկարները ջնջվել են, սակայն մինչ այդ դրանք իր կողմից պահպանվել էին։ Բացի այդ, անհասանելի է դարձել նաև Վաչագան Բադալյանի կողմից օգտագործված բջջային հեռախոսահամարը (տե՛ս դատական նիստի արձանագրությունը, ձայնագրության սկավառակը):
Տուժող Արման Վահանի Աբրահամյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին նախկինում չի ճանաչել և վստահ չէ, որ իրենից հափշտակություն կատարած անձը եղել է հենց նա։ Դեպքը տեղի է ունեցել ուշ ժամի և տվյալ անձը եղել է գլխարկով։ Զանգի միջոցով պայմանավորվել են և հանդիպել, կատարվել է գործարք, որի ընթացքում տվյալ անձն իրեն փոխանցել է դոլար, իսկ ինքը՝ հեռախոսը: Երկրորդ անձին մի քանի անգամ տեսել է նույն տարածքում՝ մոտակա հատվածում: Ոստիկանությունում իրեն ցուցադրվել է Վաչագան Բադալյանի անձնագրի լուսանկարը, սակայն հայտնել է, որ այդ անձը չէ։ Այնուհետև ցուցադրվել է մեկ այլ լուսանկար նույն անձից՝ կիսապրոֆիլ դիրքով, որը տեսնելուց հետո իր մոտ ձևավորվել է տպավորություն, որ տարածքում տեսած երկրորդ անձը հնարավոր է հենց նա լինի: Չի պնդում դա 100 տոկոս ճշգրտությամբ, սակայն այդպիսի տպավորություն է ստացել։ Այդ օրը երեկոյան իրեն զանգահարել է մի անձնավորություն իր կողմից հարթակում տեղադրված «Այֆոն 14 պրո մաքս» հեռախոսի վաճառքի վերաբերյալ, որը ցանկացել է վաճառել 350.000 ՀՀ դրամով, մոտավորապես 920 ԱՄՆ դոլարով։ Զանգահարած անձն առաջարկել է գինը կլորացնել մինչև 900 դոլար և նշել, որ պատրաստ է անմիջապես գալ և գնել։ Ինքը սկզբում առաջարկել է հանդիպումը տեղափոխել հաջորդ օր՝ ուշ ժամ լինելու պատճառով, սակայն զանգահարողը պնդել է, որ շտապ է, քանի որ ցանկանում է այն գնել որպես նվեր իր կնոջ ծննդյան օրվա համար։ Իր համաձայնությամբ հանդիպումը կայացել է նույն օրը՝ մութ ժամին, հանդիպել են մեքենայի մոտ, որտեղ իրականացվել է գործարքը։ Տվյալ վայրում ժամանակավորապես բնակվել է վարձով և հեռախոսը վերցրել է այդ բնակարանից։ Իր մեքենան այդ պահին եղել է կայանված և տեսագրող սարքի ձայնագրությունները տրամադրել է քննիչին։ Այդ տեսագրություններում ֆիքսված են ժամն ու մթության պայմանները, սակայն անձը հստակ ճանաչելի չէ։ Հանդիպման ընթացքում գնորդը կրկին նշել է, որ շտապում է, քանի որ կնոջ ծննդյան տարեդարձին մնացել է մի քանի ժամ։ Դեպքի պահին ինքը միայնակ է եղել, այդ ժամանակ սև գույնի մեքենա, հնարավոր է «Նիսսան Տիդա» կանգնել է և դրանից իջել է մեկ մարդ։ Տեղանքը եղել է մութ, իր հիշելով՝ Վաչագանը մի քանի անգամ անցել-գնացել է այդ տարածքով։ Իրեն ցույց են տվել մի նկար, որի մեջ տեսած անձն իրեն հիշեցրել է Վաչագանին, սակայն ինքը միայն այդքան կապ է ունեցել տվյալ անձի հետ: Մեքենայից իջած անձն իրեն գումար է տրվել, որից հետո հեռախոսը փոխանցել է նրան: Իրեն փոխանցել է տարբեր թղթադրամներ, մոտավորապես՝ 5 հատ 100 դոլարանոց և 2 հատ 50 դոլարանոց, սակայն ընդհանուր գումարի ճշգրիտ չափը չի հիշում։ Ավելի ուշ պարզվել է, որ այդ դոլարները կեղծ են։ Այդ հանգամանքը պարզվել է այն ժամանակ, երբ փորձել է գումարը փոխանակել «Սաս» սուպերմարկետում, այնտեղ իրեն ասել են, որ գումարը կեղծ է, կամ պետք է դիմեն ոստիկանություն, կամ ինքը պետք է գնա ոստիկանություն։ Իրեն փոխանցված գումարը և իր կողմից փոխանցված հեռախոսը հետագայում հանձնվել են համապատասխան մարմիններին։ Իր հեռախոսը հայտնաբերվել և առգրավվել է, սակայն ինքը չունի ամբողջական տեղեկություն այդ գործընթացի մասին։ Խնդրում է, որ եթե հեռախոսը գտնվել է, այն վերադարձվի իրեն, տվյալ անձանց հետ որևէ պարտք կամ պահանջ չունի։ Ինքը չի ենթարկվել որևէ հարկադրանքի քննչական կամ ոստիկանության մարմիններում ցուցմունք տալու ընթացքում։ Դեպքի ժամանակ հանդիպած անձն իրեն առաջին հայացքից թվացել է նորմալ և ադեկվատ մարդ՝ բարեկեցիկ արտաքինով, ինչի պատճառով ինքը չի կասկածել իրավիճակին։ Չի կարող հստակ նշել դեպքի օրը, սակայն այն մոտավոր եղել է 2023 թվականի նոյեմբեր–դեկտեմբերի ամսին։ Հերքում է, որ որևէ մեկն իրեն ստիպել է տրամադրել ճշմարտությանը հակասող տեղեկություն կամ մոլորեցնող ցուցմունք։ Իր կողմից տրված բոլոր հայտարարությունները եղել են կամավոր և իր համոզմամբ՝ համապատասխանել են իրականությանը։ Նախաքննության ընթացքում ինքը փորձել է լինել անկեղծ և չի շեղվել իրականությունից։ Ինչ վերաբերում է լուսանկարով ճանաչմանը, ապա իրեն ներկայացվել է լուսանկար և ինքը ճանաչել է այդ անձին որպես այն մարդու, ում տեսել է դեպքի ընթացքում։ Քննարկվել է այն, որ դեպքին ներգրավված են եղել երկու անձ և ինքը հաստատել է, որ տեսել է դրանցից մեկին։ Երկրորդ անձը եղել է գլխարկով և նրա դեմքը հստակ չի կարողացել տեսնել։ Ըստ իր ընկալման՝ Վաչագանը չի եղել այն անձը, ով իրեն գումար է փոխանցել կամ ում ինքը հետագայում ճանաչել է։ Ճանաչման ժամանակ իրեն ներկայացված լուսանկարում պատկերված անձը եղել է առանց գլխարկի, մինչդեռ իր տեսած անձը դեպքի պահին եղել է գլխարկով, ինչի պատճառով ինքը ճանաչման ժամանակ հիմնականում առաջնորդվել է դեմքի ստորին հատվածի և ընդհանուր դիմագծերի առանձնահատկություններով։ Այդ հանգամանքը որոշակի դժվարություն է առաջացրել, սակայն ինքը համոզված է, որ իր տեսած անձը և լուսանկարում պատկերված անձը նույն մարդն են։ Դեպքի պահին ներգրավված անձանցից երկուսն էլ եղել են գլխարկներով, ինչի պատճառով ինքն ամբողջությամբ չի տեսել նրանց դեմքերը։ Ինքը չի ունեցել միտում որևէ անձի դիտավորյալ մեղադրելու կամ սխալ տեղեկություն տրամադրելու։ Սկզբնական փուլում ավելի վստահ է եղել իր առաջին տպավորության վրա, սակայն հետագայում տարբեր քննարկումների և դատական նիստում լսած տեղեկությունների ազդեցությամբ իր մոտ որոշակի շփոթություն է առաջացել (տե՛ս դատական նիստի արձանագրությունը, ձայնագրության սկավառակը):
Նախաքննության ընթացքում Արման Աբրահամյանը ցուցմունք է տվել այն մասին, որ «Լիստ․ամ» կայքում տեղադրել է հայտարություն այն մասին, որ վաճառում է «Այֆոն 14 պրո մաքս» մոդելի բջջային հեռախոս։ 2023 թվականի նոյեմբերի 17-ին՝ ժամը 22:54-ին, իր 094-10-10-80 հեռախոսահամարին զանգահարել է 055-89-00-37 բջջային հեռախոսահամարից մի տղամարդ և հայտնել, որ ցանկանում է գնել իր բջջային հեռախոսը, որն ինքը վաճառելիս է եղել 370.000 ՀՀ դրամով: Այդ տղամարդն ասել է, որ ունի ընդհամենը 900 ԱՄՆ դոլար և եթե համաձայն է, կարող է հենց այդ պահին գալ իր հասցեով և գնել: Իր հետ խոսացող անձին ասել է, որպեսզի մոտենա Կ.Ուլնեցու 62-րդ շենքի մոտ: Վերջինս եկել է մեքենայով, որի դիմացի աջ հատվածից իջել է, մոտեցել իրեն, հավանել է հեռախոսը և գնել այն՝ վճարելով դրա համար 900 ԱՄՆ դոլար: Դրանից անմիջապես հետո գնացել է տարադրամի փոխանակման կետ և այնտեղ պարզել, որ ամբողջ գումարը կեղծ է: Նշված երիտասարդը եղել է միջահասակ, ունեցել է միջին կազմվածք, մորուք: Գլխին առկա է եղել գլխարկ, իսկ հագին ամբողջությամբ սև սպորտային համազգեստ: Տեսնելու դեպքում անմիջապես կճանաչի (տե՛ս քրեական վարույթի 3-րդ հատորի 61-63-րդ, 101-102-րդ թերթերը):
Ցուցմունքները հրապարակելուց հետո Արման Աբրահամյանը հայտարարել է, որ դրանք համապատասխանում են իրականությանը, իսկ դատաքննական և նախաքննական ցուցմունքների միջև առկա հակասությունները պայմանավորված են դեպքից երկար ժամանակ անցնելու հանգամանքով (տե՛ս դատական նիստի արձանագրությունը, ձայնագրության սկավառակը):
Վկա Մաքս Վլադիկի Հովսեփյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին չի ճանաչում։ 2023 թվականի օգոստոսի կեսերին իր հետ նույն վայրում աշխատող Վազգենից 100․000 ՀՀ դրամով գնել է «Այֆոն 11» մոդելի բջջային հեռախոս, որը եղել է օգտագործված վիճակում, վնասված հատվածներ չի ունեցել։ Հեռախոսը գնել է տուփով, տեղյակ է, որ Վազգենն այն մի քանի ամիս առաջ գնել է Կոմիտասում գտնվող «Արի մոբայլ» խանութ-սրահից: Բջջայինը գնելուց հետո միայն ինքն է օգտագործել, որից հետո իրեն զանգահարել են ոստիկանության ծառայողները, տեղեկացրել, որ հեռախոսը գողացված է և այն ներկայացրել է ոստիկանության ծառայողներին: Չի իմացել, որ այդ բջջայինը հնարավոր է գողացված կամ այլ եղանակով ձեռք բերված լինի, քանի որ Վազգենն այն գնել է խանութից։ Իր գումարը վերադարձրել են, որևէ մեկից պահանջ չունի (տե՛ս դատական նիստի արձանագրությունը, ձայնագրության սկավառակը)։
Վկա Գեղամ Գևորգի Միրզոյանը հիմնական դատալսումների ընթացքում ցուցմունք է տվել այն մասին, որ Վաչագան Բադալյանին չի ճանաչում։ 2023 թվականի մայիս ամսին՝ հստակ օրը չի հիշում, «Արի մոբայլ» խանութ-սրահից իր անձնական օգտագործման համար գնել է «Սամսունգ Գալաքսի Ս 23» մոդելի բջջային հեռախոս։ Հեռախոսի համար վճարել է 304․000 ՀՀ դրամ, իրեն տրամադրել են նաև տուփը և տվել են երաշխիք։ Իր մոտ որևէ կասկած չի եղել, որ հնարավոր է հեռախոսը գողացված լինի։ Հետագայում իրեն զանգահարել են ոստիկանությունից, տեղեկացրել, որ հեռախոսը գողացված է և այն ներկայացրել է ոստիկանության ծառայողներին։ Իր գումարը խանութը վերադարձրել է, որևէ մեկից պահանջ չունի (տե՛ս դատական նիստի արձանագրությունը, ձայնագրության սկավառակը)։
Դատակոչված վկաներ Վազգեն Մնացականյանը, Միշա Հովսեփյանը, Էրիկ Սիմոնյանը, Արտակ Հայրապետյանը, Մարիաննա Քարամյանը, Միհրան Խուդոյանը, Կարինե Խաչատրյանը դատալսումների ընթացքում չեն հարցաքննվել, քանի որ հանրային մեղադրողը միջնորդել է այդ մասով սահմանափակել ապացույցների հետազոտումը, ինչը Դատարանի որոշմամբ բավարարվել է։
Դատալսումների ընթացքում հետազոտվել են նաև հետևյալ ապացույցները.
Բանավոր հաղորդում ներկայացնելու մասին արձանագրությունը, համաձայն որի՝ Գուրգեն Արմենակի Միքաելյանը 2023 թվականի մայիսի 19-ին ՀՀ ՆԳՆ ոստիկանության Քանաքեռ-Զեյթունի բաժնում հաղորդում է ներկայացրել այն մասին, որ «Լիստ․ամ» կայքում բջջային հեռախոսը վաճառելու վերաբերյալ տեղադրել է հայտարարությունը, որը գնելու պատրվակով 2023 թվականի մայիսի 7-ին Ա.Ահարոնյան և Դրո փողոցների խաչմերուկում հանդիպել է գնորդ ներկայացած Վաչագան Վազգենի Բադալյանին և ոմն Կարենին, որտեղ Վ.Բադալյանը տելեգրամյան հավելվածի միջոցով ներկայացրել է 270.000 ՀՀ դրամ գումարի կեղծ կտրոն և խաբեությամբ վերցնելով իր կողմից վաճառվող բջջային հեռախոսը՝ հեռացել են, որի արդյունքում իրեն պատճառվել է 270.000 ՀՀ դրամի նյութական վնաս (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 60-րդ թերթը)։
Բանավոր հաղորդում ներկայացնելու մասին արձանագրությունը, համաձայն որի՝ Լուսինե Սամվելի Աթաբեկյանը 2023 թվականի մայիսի 11-ին ՀՀ ՆԳՆ ոստիկանության Քանաքեռ-Զեյթունի բաժնում հաղորդում է տվել այն մասին, որ իր «Այֆոն» մոդելի բջջային հեռախոսը վաճառելու վերաբերյալ «Լիստ․ամ» կայքում հայտարարություն է տեղադրել, որը գնելու նպատակով 2023 թվականի մայիսի 9-ին 091-49-87-66 հեռախոսահամարով իրեն է զանգահարել մի տղամարդ, ներկայացել Վաչե անունով, իսկ հաջորդ օրը՝ ժամը 22:10-ի սահմաններում, Վաչե ներկայացած անձը, այցելելով իրենց՝ Երևան քաղաքի Դրոյի փողոցի 21-րդ շենքի 19-րդ բնակարան, իրեն է ներկայացրել գումարը փոխանցելու վերաբերյալ գործարքի կտրոն և վերցնելով բջջային հեռախոսը՝ հեռացել է: Նրա հեռանալուց հետո հասկացել է, որ նշված կտրոնը կեղծ է եղել՝ չի համապատասխանել իրականությանը, որևէ փոխանցում չի կատարվել և Վաչե ներկայացած անձը, չարաշահելով իր վստահությունը, խաբեությամբ տիրացել է իր բջջային հեռախոսին՝ իրեն պատճառելով 130.000 ՀՀ դրամ գույքային վնաս (տե՛ս դատական նիստի արձանագրությունը, ձայնագրության սկավառակը, քրեական վարույթի 1-ին հատորի 38-րդ թերթը)։
Բանավոր հաղորդում ներկայացնելու մասին արձանագրությամբ, համաձայն որի՝ Տաթև Տիգրանի Ղազարյանը 2023 թվականի մայիսի 19-ին ՀՀ ՆԳՆ ոստիկանության Քանաքեռ-Զեյթունի բաժնում հաղորդում է տվել այն մասին, որ «Լիստ․ամ» կայքում իր «Այվոտչ» ժամացույցը վաճառելու վերաբերյալ տեղադրված հայտարարությամբ, այն գնելու պատրվակով, 2023 թվականի մայիսի 15-ին՝ ժամը 18:50-ին, Երևան քաղաքի Դրոյի փողոցի 15 հասցեի մոտ իր հետ հանդիպել է ոմն Գևորգը, որտեղ վերջինս ներկայացրել է 85.000 ՀՀ դրամի էլեկտրոնային վճարման կեղծ անդորրագիր և խաբեությամբ վերցնելով ժամացույցը՝ հեռացել է (տե՛ս դատական նիստի արձանագրությունը, ձայնագրության սկավառակը, քրեական վարույթի 1-ին հատորի 4-րդ թերթը)։
Բանավոր հաղորդում ներկայացնելու մասին արձանագրությունը, համաձայն որի՝ Հասմիկ Միշայի Հակոբյանը 2023 թվականի հունիսի 13-ին ՀՀ ՆԳՆ ոստիկանության Քանաքեռ-Զեյթունի բաժնում հաղորդում է տվել այն մասին, որ իր՝ «Այֆոն 12 մինի» մոդելի բջջային հեռախոսը վաճառելու վերաբերյալ տեղադրված հայտարարությամբ, այն գնելու պատրվակով, 2023 թվականի հունիսի 9-ին՝ ժամը 22:00-ի սահմաններում, Էմինեմսկու 1-ին փողոցում իրեն է հանդիպել մի տղամարդ, ով փոխանցել է 135.000 ՀՀ դրամ գումար բանկային քարտին փոխանցելու կեղծ անդորրագիր և այդ կերպ խաբեությամբ վերցնելով իր բջջայինը՝ հեռացել է (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 89-րդ թերթը)։
Բանավոր հաղորդում ներկայացնելու մասին արձանագրությունը, համաձայն որի՝ Արման Վահանի Աբրահամյանը 2023 թվականի նոյեմբերի 18-ին ՀՀ ՆԳՆ ոստիկանության Քանաքեռ-Զեյթունի բաժնում հաղորդում է տվել այն մասին, որ իրեն պատկանող «Այֆոն 14 պրո մաքս» մոդելի բջջային հեռախոսը վաճառելու նպատակով հայտարարություն է տեղադրել «Լիստ․ամ» կայքում: 2023 թվականի նոյեմբերի 17-ին՝ ժամը 22:54-ին, 055-89-00-37 հեռախոսահամարից իրեն զանգահարել է մի տղամարդ և ցանկություն հայտնել հեռախոսը գնելու, պատճառաբանելով, որ հաջորդ օրն իր կնոջ ծննդյան արարողությունն է: Պայմանավորվելով նույն օրը՝ ժամը 23:45-ի սահմաններում, հանդիպել են Կ.Ուլնեցու 62 հասցեի մոտ, որտեղ եկած 30-35 տարեկան մի տղամարդ, պայմանավորվածության համաձայն, իրեն վճարել է 900 ԱՄՆ դոլար գումար և վերցնելով բջջային հեռախոսը՝ հեռացել է: Դրանից հետո ինքը գնացել է տարադրամների փոխանակման կետ, որտեղ էլ պարզվել է, որ այդ տղայի կողմից տրված թղթադրամները կեղծ են, արդյունքում իրեն պատճառվել է 360.000 ՀՀ դրամի վնաս (տե՛ս դատական նիստի արձանագրությունը, ձայնագրության սկավառակը, քրեական վարույթի 3-րդ հատորի 48-րդ թերթը)։
Բանավոր հաղորդում ներկայացնելու մասին արձանագրությամբ, համաձայն որի՝ Անահիտ Ռոբերտի Ղազարյանը 2023 թվականի սեպտեմբերի 18-ին ՀՀ ՆԳՆ ոստիկանության Քանաքեռ-Զեյթունի բաժնում հաղորդում է տվել այն մասին, որ 2023 թվականի սեպտեմբերի 17-ին՝ ժամը 21:30-ի սահմաններում, «Լիստ․ամ» կայքում տեղադրված «Այֆոն 13» մոդելի հեռախոսի վաճառքի հայտարարությամբ զանգահարել է ոմն Սեն անունով անձնավորություն, ով հեռախոսը գնելու պատրվակով եկել է իրենց բակ՝ Կ.Ուլնեցի 72-րդ շենքի մոտ, որտեղ վերցնելով բանկային քարտի տվյալները, գումարը փոխանցելու համար իրենց ներկայացրել է կեղծ փոխանցման անդորրագիր՝ իբրև այդ պահին կատարել է փոխանցում, և չարաշահելով իրենց վստահությունը՝ վերցրել է հեռախոսը և հեռացել՝ պատճաելով 220.000 ՀՀ դրամի նյութական վնաս (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 210-րդ թերթը)։
Բանավոր հաղորդում ներկայացնելու մասին արձանագրությունը, համաձայն որի՝ Գայանե Արմենի Հովհաննիսյանը 2023 թվականի հոկտեմբերի 8-ին ՀՀ ՆԳՆ ոստիկանության Քանաքեռ-Զեյթունի բաժնում հաղորդում է տվել այն մասին, որ «Լիստ.ամ» կայքում «Այֆոն 11 պրո մաքս» մոդելի բջջային հեռախոսը վաճառելու վերաբերյալ տեղադրված հայտարարությամբ, այն գնելու պատրվակով, 077-18-59-51 բջջային հեռախոսահամարից իր հետ կապ են հաստատել և 2023 թվականի հոկտեմբերի 7-ին՝ ժամը 22։00-ի սահմաններում, Դրոյի փողոցի 8-րդ շենքի 5-րդ բնակարան են եկել 2 անհայտ անձինք, հեռախոսի միջոցով իրեն են փոխանցել վճարման կտրոնը, վերցրել հեռախոսը և հեռացել, սակայն որոշ ժամանակ անց պարզվել է, որ կտրոնը կեղծ է և տվյալ անձինք խաբեությամբ տիրացել են հեռախոսին` պատճառելով 170.000 ՀՀ դրամի վնաս (տե՛ս դատական նիստի արձանագրությունը, ձայնագրության սկավառակը, քրեական վարույթի 1-ին հատորի 113-րդ թերթը)։
Բանավոր հաղորդում ներկայացնելու մասին արձանագրությունը, համաձայն որի՝ Արմենուհի Համլետի Ղազարյանը 2024 թվականի սեպտեմբերի 9-ին ՀՀ ՆԳՆ ոստիկանության Քանաքեռ-Զեյթունի բաժնում հաղորդում է տվել այն մասին, որ 2024 թվականի սեպտեմբերի 5-ին՝ ժամը 22։30-ի սահմաններում, իրենց տուն՝ ք․Երևան Ծարավ Աղբյուր 32/2 հասցե է եկել Վաչագան Վազգենի Բադալյանը՝ բջջային հեռախոս գնելու նպատակով։ Քանի որ վերջինս չուներ կանխիկ գումար, իրենց առաջարկել է տալ հաշվեհամար, որպեսզի գումարը փոխանցի, որից հետո «Վատսապ» հավելվածի միջոցով ուղարկել վճարման անդորրագիր։ Վերջինիս է տրվել վաճառված «Այֆոն 14 պրո մաքս» տեսակի բջջային հեռախոսը, որն արժեցել է 355․000 ՀՀ դրամ։ Վերջինս որպես երաշխիք իրենց տրամադրել է նաև իր անձնագրի պատճենը։ Վ․Բադալյնի կողմից փոխանցված գումարը մինչ օրս չի նստել իր հաշվեհամարին և բանկից տեղեկացել է, որ նմանատիպ փոխանցում իրեն չի արվել։ Այսպիսով Վ․Բադալյանը չարաշահել է իր վստահություն՝ իր հետ տանելով բջջային հեռախոսը, իրեն պատճառելով 355․000 ՀՀ դրամի նյութական վնաս (տե՛ս դատական նիստի արձանագրությունը, ձայնագրության սկավառակը, քրեական վարույթի 4-րդ հատորի 70-րդ թերթը)։
Զննում կատարելու մասին արձանագրությունը, համաձայն որի՝ զննման է ենթարկվել տուժող Տաթև Ղազարյանի կողմից ներկայացված կեղծ անդորրագրի պատճենը և պարզվել է, որ դրա ձախ անկյունային հատվածում առկա է հայերեն գրառված «Գումար» բառը, որի անմիջապես ներքևում գրառված է 85․000 AMD։ Այնուհետև գրառված է ելքագրվող հաշիվ, որի ներքևում որպես հաշվեհամար գրառված է 11817003224707 թվերը։ Որպես ստացողի հաշիվ նշված է 2051657118671001 թվերը։ Ստացող նշված է Ineco bank, իսկ նպատակ դաշտում նշված է external card transfer: Գործարքի համար նշված է 230515026048000 թվերը, իսկ վերջում կատարման ամսաթիվ նշված է 15․05․2023 թվական՝ ժամը 18։54։
Այնուհետև, զննման է ենթարկվել տուժող Լուսինե Աթաբեկյանի կողմից ներկայացված գումարի վճարման կեղծ անդորրագրի պատճենը և պարզվել է, որ դրա ձախ վերևի հատվածում պատկերված է «Արդշինբանկ» ընկերության տարբերանշանը, որի վերևում հայերեն գրառված են գործարքի մանրամասները։ Որպես նույնականացուցիչ թվեր գրառված են 30197191, կատարման ամսաթիվ նշված է 10․05․2023՝ 22։23։27։ Որպես վճարողի հաշվեհամար նշված է 5471280036710603 թվերը, այուհետև առկա է / նշանը և գրառված է ԱԴեմիրջյան։ Ծառայություն դաշտում գրառված է Արդշինբանկ, ծառայության նույնականացուցիչ դաշտում գրառված է 4150960000185939 և /ԼԱտաբեկյան։ Որպես գումար նշված է 130․000 AMD, իսկ որպես միջնորդավճար նշված է 130․00 AMD:
Այնուհետև, զննման է ենթարկվել տուժող Գայանե Հովհաննիսյանի կողմից ներկայացված գումարի վճարման կեղծ անդորրագրի պատճենը և պարզվել է, որ դրա ձախ վերևի հատվածում պատկերված է «Արդշինբանկ» ընկերության տարբերանշանը, որպես նույնականացուցիչ թվեր գրառված են 331879921, կատարման ամսաթիվ նշված է 07․10․2023՝ 22․46․29։ Որպես վճարողի հաշվեհամար նշված է 24700239494450070 թվերը, այուհետև առկա է / նշանը և գրառված է ԱԴեմիրջյան։ Ծառայություն դաշտում գրառված է Արդշինբանկ իրավաբանական անձի հաշվից, ծառայության նույնականացուցիչ դաշտում գրառված է 4318290092515663 և /Ա․Խնկոյան։ Որպես գումար նշված է 170․000 AMD, իսկ որպես միջնորդավճար նշված է 890․00 AMD: Ամենավերջում գրառված է․ «Վճարում՝ Ardshinbank card replenisment»:
Այնուհետև, զննման է ենթարկվել տուժող Գուրգեն Միքայելյանի կողմից ներկայացված գումարի վճարման կեղծ անդորրագրի պատճենը և պարզվել է, որ դրա ձախ վերևի հատվածում պատկերված է «Արդշինբանկ» ընկերության տարբերանշանը, որի վերևում հայերեն գրառված են գործարքի մանրամասները։ Որպես նույնականացուցիչ թվեր գրառված են 30197191, կատարման ամսաթիվ նշված է 07․05․2023՝ 18։04։27։ Որպես վճարողի հաշվեհամար նշված է 5471280036710603 թվերը, այուհետև առկա է / նշանը և գրառված է ԱԴեմիրջյան։ Ծառայություն դաշտում գրառված է Արդշինբանկ, ծառայության նույնականացուցիչ դաշտում գրառված է 2050075083311001/09527779 թվերը։ Որպես գումար նշված է 270․000 AMD, իսկ որպես միջնորդավճար նշված է 270․00 AMD: Ամենավերջում գրառված է․ միջնորդավճար «Վճարում՝ Ardshinbank card replenisment»:
Այնուհետև, զննման է ենթարկվել տուժող Անահիտ Ղազարյանի կողմից ներկայացված գումարի վճարման կեղծ անդորրագրի պատճենը և պարզվել է, որ դրա ձախ վերևի հատվածում պատկերված է «Արդշինբանկ» ընկերության տարբերանշանը։ Որպես նույնականացուցիչ թվեր գրառված են 33187992, կատարման ամսաթիվ նշված է 17․09․2023՝ 22։17։38։ Որպես վճարողի հաշվեհամար նշված է 5471280036710603 թվերը, այուհետև առկա է / նշանը և գրառված է ԱԴեմիրջյան։ Ծառայություն դաշտում գրառված է Արդշինբանկ, ծառայության նույնականացուցիչ դաշտում գրառված է 4355033930015353 թվերը, նույն հատվածում առկա է նաև Ա․Վարդապետյան։ Որպես գումար նշված է 220․000 AMD, իսկ որպես միջնորդավճար նշված է 220․00 AMD: Ամենավերջում գրառված է․ մանարամասներ «Վճարում՝ Ardshinbank card replenisment»: (տե՛ս դատական նիստի արձանագրությունը, ձայնագրության սկավառակը, քրեական վարույթի 4-րդ հատորի 17-18-րդ թերթերը)։
Զննում կատարելու մասին արձանագրությունը, համաձայն որի՝ զննման է ենթարկվել տուժող Արմենուհի Ղազարյանի կողմից ներկայացված կեղծ անդորրագրի պատճենը և պարզվել է, որ դրա ձախ վերևի հատվածում պատկերված է «Արդշինբանկ» ընկերության տարբերանշանը, որի վերևում հայերեն գրառված են գործարքի մանրամասները։ Այնուհետև որպես նույնականացուցիչ թվեր գրառված են 31872219, կատարման ամսաթիվ նշված է 05․09․2024թ՝ 23։16։38։ Որպես վճարողի հաշվեհամար նշված է 2470022669290010 թվերը, այուհետև առկա է / նշանը և գրառված է Ս․Ղազարյան։ Ծառայություն դաշտում գրառված է Արդշինբանկ իրավաբանական անձի հաշվից, ծառայության նույնականացուցիչ դաշտում գրառված է 1150018400200221 և /Ա․Ղազարյան։ Որպես գումար նշված է 355․000 AMD (տե՛ս դատական նիստի արձանագրությունը, ձայնագրության սկավառակը, քրեական վարույթի 4-րդ հատորի 9-րդ թերթը)։
Առգրավում կատարելու մասին արձանագրությունը, համաձայն որի՝ Մաքս Հովսեփյանից առգրավվել է «Այֆոն 11» մոդելի 356577101349527 գործարանային համարի բջջային հեռախոսը (տե՛ս դատական նիստի արձանագրությունը, ձայնագրության սկավառակը, քրեական վարույթի 1-ին հատորի 84-85-րդ թերթերը)։
Առգրավում կատարելու մասին արձանագրությունը, համաձայն որի՝ Արտակ Հայրապետյանից առգրավվել է «Այֆոն 11 պրո մաքս» մոդելի 35388710967454 գործարանային համարի բջջային հեռախոսը (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 25-26-րդ թերթերը)։
Առգրավում կատարելու մասին արձանագրությունը, համաձայն որի՝ Մարիաննա Քարամյանից առգրավվել է «Այֆոն 12 մինի 64 ԳԲ» մոդելի բջջային հեռախոսը (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 185-186-րդ թերթերը):
Առգրավում կատարելու մասին արձանագրությունը, համաձայն որի՝ Գեղամ Միրզոյանից առգրավվել է «Սամսունգ Գալաքսի Ս 23» մոդելի բջջային հեռախոսը (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 193-194-րդ թերթերը)։
Առգրավում կատարելու մասին արձանագրությունը, համաձայն որի՝ Միհրան Խուդոյանից առգրավվել է «Այֆոն 14 պրո մաքս» մոդելի 35336094145467 գործարանային համարով բջջային հեռախոսը (տե՛ս դատական նիստի արձանագրությունը, ձայնագրության սկավառակը, քրեական վարույթի 3-րդ հատորի 178-180-րդ թերթերը)։
Դատաապրանքագետ փորձագետի թիվ 309-ԱՊ-23 եզրակացությունը, համաձայն որի՝ փորձաքննությանը տրամադրված «Այֆոն 11 պրո մաքս» տեսակի, 256 GB ներքին հիշողության ծավալով բջջային հեռախոսի ֆունկցիոնալ աշխատունակ ապրանքային վիճակում միջին շուկայական արժեքը, 2023 թվականի հոկտեմբերի 7-ի դրությամբ, առկա արտաքին տեսքի և պատյանի հաշվառմամբ, գնահատվում է 170․000 ՀՀ դրամ (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 178-180-րդ թերթերը)։
Դատաապրանքագետ փորձագետի թիվ 135-ԱՊ-24 եզրակացությունը, համաձայն որի՝ փորձաքննությանը տրամադրված «Սամսունգ» տեսակի, «SM-S911U1» մոդելի բջջային հեռախոսի միջին շուկայական արժեքը, 2023 թվակակնի մայիսի 7-ի դրությամբ, առկա ապրանքային վիճակի հաշվառմամբ, գնահատվում է 220․000 ՀՀ դրամ։
Փորձաքննությանը տրամադրված «Այֆոն 12 մինի» տեսակի «A2399» մոդելի բջջային հեռախոսի միջին շուկայական արժեքը, 2023 թվականի հունիսի 9-ի դրությամբ, առկա ապրանքային վիճակի հաշվառմամբ, գնահատվում է 160․000 ՀՀ դրամ։
Փորձաքննությանը տրամադրված «Այֆոն 11» տեսակի «A2221» մոդելի բջջային հեռախոսի միջին շուկայական արժեքը, 2023 թվականի մայիսի 10-ի դրությամբ, առկա ապրանքային վիճակի հաշվառմամբ, գնահատվում է 120․000 ՀՀ դրամ։
Փորձաքննությանը ներկայացված «Այֆոն 14 պրո մաքս» տեսակի «A2651» մոդելի բջջային հեռախոսի միջին շուկայական արժեքը, 2023 թվականի նոյեմբերի 17-ի դրությամբ, առկա ապրանքային վիճակի հաշվառմամբ, գնահատվում է 380․000 դրամ (տե՛ս դատական նիստի արձանագրությունը, ձայնագրության սկավառակը, քրեական վարույթի 3-րդ հատորի 223-226-րդ թերթերը)։
Դատափաստաթղթաբան և դատակենսաբան փորձագետների թիվ 23-2531 համալիր եզրակացությունը, համաձայն որի՝ փորձաքննությանը ներկայացված 4 հատ 50 և 7 հատ 100 ԱՄՆ դոլար անվանական արժեքով թղթադրամների թղթերի բաղադրակազմի մեջ մտնում են փշատերև և լայնատերև ծառերի և բամբակի ցեյլյուլողա, որոնք իրենց ընդհանուր բաղադրակազմով չեն համապատասխանում ստանդարտ թողարկման 50 և 100 ԱՄՆ դոլար անվանական արժեքով թղթադրամների թղթերի բաղադրակազմին (տե՛ս դատական նիստի արձանագրությունը, ձայնագրության սկավառակը, քրեական վարույթի 4-րդ հատորի 204-210-րդ թերթերը)։
Տուժող Անահիտ Ղազարյանի մասնակցությամբ անձին լուսանկարով ճանաչում քննչական գործողություն կատարելու մասին արձանագրությունը, համաձայն որի՝ վերջինս ճանաչել է իրեն ներկայացված լուսանկարներում պատկերված անձանցից Վաչագան Բադալյանին և հայտնել է, որ վերջինիս հանդիսանում է իրենից հափշտակություն կատարած անձը (տե՛ս դատական նիստի արձանագրությունը, ձայնագրության սկավառակը, քրեական վարույթի 3-րդ հատորի 25-28-րդ թերթերը)։
Տուժող Արման Աբրահամյանի մասնակցությամբ անձին լուսանկարով ճանաչում քննչական գործողություն կատարելու մասին արձանագրությունը, համաձայն որի՝ վերջինս ճանաչել է իրեն ներկայացված լուսանկարներում պատկերված անձանցից Վաչագան Բադալյանին և հայտնել է, որ վերջինիս հանդիսանում է իրենից հափշտակություն կատարած անձը (տե՛ս դատական նիստի արձանագրությունը, ձայնագրության սկավառակը, քրեական վարույթի 3-րդ հատորի 97-100-րդ թերթերը)։
Տուժող Տաթևիկ Ղազարյանի մասնակցությամբ անձին լուսանկարով ճանաչում քննչական գործողություն կատարելու մասին արձանագրությունը, համաձայն որի՝ վերջինս ճանաչել է իրեն ներկայացված լուսանկարներում պատկերված անձանցից Վաչագան Բադալյանին և հայտնել է, որ վերջինիս հանդիսանում է իրենից հափշտակություն կատարած անձը (տե՛ս դատական նիստի արձանագրությունը, ձայնագրության սկավառակը, քրեական վարույթի 3-րդ հատորի 211-213-րդ թերթերը)։
Տուժող Գուրգեն Միքայելյանի մասնակցությամբ անձին լուսանկարով ճանաչում քննչական գործողություն կատարելու մասին արձանագրությունը, համաձայն որի՝ վերջինս ճանաչել է իրեն ներկայացված լուսանկարներում պատկերված անձանցից Վաչագան Բադալյանին և հայտնել է, որ վերջինիս է խաբեությամբ իրենից կատարել հափշտակություն (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 160-162-րդ թերթերը)։
Տուժող Հասմիկ Հակոբյանի մասնակցությամբ անձին լուսանկարով ճանաչում քննչական գործողություն կատարելու մասին արձանագրությունը, համաձայն որի՝ վերջինս ճանաչել է իրեն ներկայացված լուսանկարներում պատկերված անձանցից Վաչագան Բադալյանին և հայտնել է, որ վերջինիս հանդիսանում է իրենից խաբեությամբ հափշտակություն կատարած անձը։ (տե՛ս դատական նիստի արձանագրությունը, ձայնագրության սկավառակը, քրեական վարույթի 2-րդ հատորի 165-167-րդ թերթերը)։
Բոլոր դրվագներով տեղեկատվության պահանջների մասին հայցված տեղեկությունների զննման մասին արձանագրությունները, համաձայն որոնց՝ Վաչագան Վազգենի Բադալյանը հիմնականում իր անվամբ հաշվառված բջջային հեռախոսահամարներով հեռախոսզանագեր է կատարել վարույթով անցնող տուժողների կողմից օգտագործվող բջջային հեռախոսահամարներին (տե՛ս դատական նիստի արձանագրությունը, ձայնագրության սկավառակը, քրեական վարույթի 1-ին հատորի 164-170-րդ, 171-197-րդ, 201-226-րդ , 227-234-րդ թերեթրը, 2-րդ հատորի 141-1453-րդ, 145-147-րդ, 157-159-րդ, 241-242-րդ թերեթրը, 3-րդ հատորի 2-4-րդ, 105-107-րդ, 124-126-րդ, 131-132-րդ, 133-135-րդ, 166-168-րդ թերեթը, 4-րդ հատորի 101-103-րդ թերթերը)։
Իրեղեն ապացույց ճանաչելու մասին որոշումը, համաձայն որի՝ «Այֆոն 11 պրո մաքս» տեսակի, 256 GB ներքին հիշողության ծավալով բջջային հեռախոսը, «Սամսունգ» տեսակի, «SM-S911U1» մոդելի բջջային հեռախոսը, «Այֆոն 12 մինի» տեսակի «A2399» մոդելի բջջային հեռախոսը, «Այֆոն 11» տեսակի «A2221» մոդելի բջջային հեռախոսը, «Այֆոն 14 պրո մաքս» տեսակի «A2651» մոդելի բջջային հեռախոսը և 4 հատ 50, 7 հատ 100 ԱՄՆ անվանական արժեքով ստանդարտ թողարկմանը չհամապատասխանող թղթադրամները ճանաչվել են իրեղեն ապացույցներ (տե՛ս դատական նիստի արձանագրությունը, ձայնագրության սկավառակը, քրեական վարույթի 3-րդ հատորի 227-231-րդ թերթերը)։
Արտավարութային փաստաթուղթ ճանաչելու մասին որոշումը, համաձայն որի՝ Տաթև Ղազարյանի, Լուսինե Աթաբեկյանի, Գայանե Հովհաննիսյանի, Գուրգեն Միքայելյանի, Հասմիկ Հակոբյանի, Անահիտ Ղազարյանի և Արման Աբրահամյանի հաղորդումների հիման վրա նախաձեռնված վարույթներով տեղեկատվությունների պահանջների որոշումներով ստացված տեղեկությունները պարունակող լազերային սկավառակները ճանաչվել են որպես արտավարութային փաստաթուղթ (տե՛ս դատական նիստի արձանագրությունը, ձայնագրության սկավառակը, քրեական վարույթի 3-րդ հատորի 232-235-րդ թերթերը)։
Արտավարութային փաստաթուղթ ճանաչելու մասին որոշումը, համաձայն որի՝ Տաթև Տիգրանի Ղազարյանի, Լուսինե Սամվելի Աթաբեկյանի, Գայանե Արմենի Հովհաննիսյանի, Գուրգեն Արմենակի Միքայելյանի և Անահիտ Ռոբերտի Ղազարյանի կողմից վարույթն իրականացնող մարմին ներկայացված վճարման կեղծ անդորրագրերը ճանաչվել են որպես արտավարութային փաստաթուղթ (տե՛ս դատական նիստի արձանագրությունը, ձայնագրության սկավառակը, քրեական վարույթի 4-րդ հատորի 19-22-րդ թերթերը)։
Արտավարութային փաստաթուղթ ճանաչելու մասին որոշումը, համաձայն որի՝ Անահիտ Ղազարյանի կողմից վարույթն իրականացնող մարմին ներկայացված վճարման կեղծ անդորրագիրը ճանաչվել է որպես արտավարութային փաստաթուղթ (տե՛ս դատական նիստի արձանագրությունը, ձայնագրության սկավառակը, քրեական վարույթի 4-րդ հատորի 91-92-րդ թերթերը)։

Պատշաճ իրավական ընթացակարգի շրջանակներում հետազոտված վերոգրյալ ապացույցները վերլուծելով, դրանցից յուրաքանչյուրը համադրելով մյուսի հետ և գնահատելով գործի քննության ընթացքում ձեռք բերված օբյեկտիվ փաստական տվյալների համակցության լույսի ներքո` Դատարանը հարկ է համարում արձանագրել հետևյալը․
ՀՀ քրեական դատավարության օրենսգրքի 97-րդ հոդվածի համաձայն՝
«1. Վարույթի ընթացքում ձեռք բերված ապացույցները, ներառյալ վարույթի մասնավոր մասնակիցների ներկայացրած ապացույցները համարվում են թույլատրելի, քանի դեռ պատշաճ իրավական ընթացակարգով հակառակը չի հաստատվել:
2. Օրենքի էական խախտմամբ ստացված տվյալները, ինչպես նաև դրանց հիման վրա կատարված վարութային գործողությունների արդյունքով ձեռք բերված տվյալները ճանաչվում են անթույլատրելի և չեն կարող օգտագործվել որպես ապացույց:
(․․․)»։
ՀՀ վճռաբեկ դատարանը Սարիբեկ Վարազդատի Հարությունյանի գործով 2014 թվականի մայիսի 31-ի թիվ ԵԱՔԴ/0189/01/12 որոշմամբ իրավական դիրքորոշում է արտահայտել այն մասին, որ «(․․․) ապացույցների ձեռքբերման գործընթացում էական չեն կարող համարվել քննչական կամ այլ դատավարական գործողության կատարման կարգի այն խախտումները, որոնցով չեն սահմանափակվել դատավարության մասնակիցների` օրենքով երաշխավորված իրավունքները կամ այդ իրավունքներից նրանք չեն զրկվել, ինչպես նաև այն խախտումները, որոնք ստացված փաստական տվյալների հավաստիության վրա չեն ազդել կամ չէին կարող ազդել: Այլ խոսքով` քննչական կամ այլ դատավարական գործողությունների կատարման ժամանակ թույլ տրված քրեադատավարական օրենսդրության խախտումները պետք է գնահատվեն` ելնելով դրանց բնույթից, ծանրությունից և վերոնշյալ գործողությունների արդյունքում ստացված ապացուցողական նյութի որակի և հավաստիության վրա դրանց ազդեցության աստիճանից: Վճռաբեկ դատարանը գտնում է, որ ապացույցն անթույլատրելի ճանաչելը` որպես իրավական հետևանք, պետք է տեղի ունենա միայն քրեադատավարական օրենսդրության էական խախտման առկայության պարագայում: Հակառակ դեպքում ապացույցների թույլատրելիության հարցին կցուցաբերվի ձևական մոտեցում, ինչն էլ կհանգեցնի ապացուցողական նյութի անտեղի կորստի (․․․)»։
Վերը մեջբերված քրեադատավարական նորմերի և նախադեպային իրավական դիրքորոշումների լույսի ներքո գնահատելով սույն գործով դատալսումների ժամանակ հետազոտված ապացույցների թույլատրելիությունը՝ Դատարանն արձանագրում է, որ գործի քննության ընթացքում չի ստացվել որևէ օբյեկտիվ տվյալ, որը հիմք կտար փաստելու, թե նշված ապացույցների ձեռքբերման գործընթացում տեղ են գտել օրենքի էական խախտումներ, որոնցով սահմանափակվել են դատավարության մասնակիցների` օրենքով երաշխավորված իրավունքները կամ այդ իրավունքներից նրանք զրկվել են, ինչպես նաև՝ դրանք ազդել են կամ կարող էին ազդել ստացված փաստական տվյալների հավաստիության վրա։ Այլ խոսքով՝ վկայակոչված ապացույցները թույլատրելիության առումով կասկածի տակ առնելու հիմքերը բացակայում են, քանի որ դրանք ձեռք են բերվել քրեադատավարական օրենքի պահանջների պահպանմամբ, իսկ հակառակի մասին վկայող որևէ օբյեկտիվ տվյալ գործի քննության ընթացքում չի ստացվել։
Ինչ վերաբերում է դատալսումների ընթացքում պաշտպանության կողմի ներկայացրած միջնորդությանը՝ տուժող Արման Աբրահամյանի մասնակցությամբ կատարված լուսանկարով ճանաչման գործողության արձանագրությունը որպես ապացույց անթույլատրելի ճանաչելու մասին, ապա Դատարանը գտնում է, որ տվյալ գործողության ընթացքում քրեական դատավարության օրենսգրքի պահանջների էական խախտումներ չեն եղել, հետևաբար միջնորդությունը հիմնազուրկ է և ենթակա է մերժման։
Բացի այդ, վերը թվարկված յուրաքանչյուր ապացույց այս կամ այն չափով փաստական տվյալներ է պարունակում մեղադրանքներում նշված հանցավոր արարքների, գործի լուծման համար էական նշանակություն ունեցող այլ հանգամանքների վերաբերյալ։ Այս պայմաններում, Դատարանը գտնում է, որ թվարկված ապացույցները ոչ վերաբերելի ճանաչելու հիմքեր նույնպես առկա չեն:
Անդրադառնալով ապացույցների արժանահավատությանը՝ Դատարանն արձանագրում է նաև, որ հետազոտված փաստաթղթային ապացույցների, այդ թվում՝ փորձագիտական եզրակացությունների արժանահավատությունը կասկածի տակ դնելու հիմքեր առկա չեն, այդ ապացույցներում արտացոլված տվյալները ոչ միայն չեն հակասում, այլև փոխլրացնում են միմյանց։
Դատարանը հարկ է համարում արձանագրել նաև, որ սույն վարույթի դատալսումների ընթացքում հարցաքննված տուժողներ Գուրգեն Միքայելյանի, Հասմիկ Հակոբյանի, Անահիտ Ղազարյանի, Տաթևիկ Ղազարյանի, Արմենուհի Ղազարյանի, Գայանե Հովհաննիսյանի, Լուսինե Աթաբեկյանի և վկաներ Մաքս Հովսեփյանի, Գեղամ Միրզոյանի ցուցմունքների արժանահավատությունը կասկածի տակ առնելու օբյեկտիվ հիմքեր չկան։ Նշված անձինք գործի ողջ քննության ընթացքում ըստ էության տվել են նույնաբովանդակ ցուցմունքներ, իսկ տրված ցուցմունքների բովանդակությանը հակասող օբյեկտիվ տեղեկություններ դատարանին չեն ներկայացվել, ավելին՝ դրանք հաստատվել են ապացուցողական առավել բարձր որակով օժտված նյութերով։
Ինչ վերաբերում է տուժող Արման Աբրահամյանի դատաքննական և նախաքննական ցուցմունքների միջև առկա հակասություններին, ապա դրանք համադրելով և վերլուծելով այլ ապացույցների լույսի ներքո՝ Դատարանը ներքին համոզմամբ գտնում է, որ առավել արժանահավատ պետք է դիտարկվեն և դատավճռի հիմքում դրվեն Արման Աբրահամյանի նախաքննական ցուցմունքները, քանի որ դրանք հստակ են, հաստատվում են առավել արժանահավատ ապացույցներով, իսկ դատաքննության ժամանակ տուժողը որևէ ողջամիտ բացատրություն չի ներկայացրել իր ցուցմունքներում առկա հասկասությունների մասով։
Քննարկելով Վաչագան Բադալյանի ցուցմունքների արժանահավատության հարցը՝ Դատարանը գտնում է, որ մեղադրյալի ցուցմունքները չեն համապատասխանում իրականությանը և վերջինն այդպիսի ցուցմունքներ է տվել՝ իր կատարած արարքների համար ավելի մեղմ քրեական պատասխանատվության և պատժի հասնելու հիմքեր ստեղծելու նպատակով։ Մասնավորապես, Վաչագան Բադալյանի ցուցմունքներն այն մասին, որ առնչություն չունի Արման Աբրահամյանից կատարված հափշտակության դրվագին, իսկ մյուս դրվագներով հափշտակությունները կատարել է միայնակ, հերքվում են տուժողների ցուցմունքներով, որպիսիք կասկածի տակ առնելու հիմքեր չկան։
Այսպիսով, գործով ձեռք բերված ապացույցները գնահատելով վերաբերելիության, թույլատրելիության, արժանահավատության, իսկ ամբողջ ապացույցներն իրենց համակցությամբ՝ գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ Դատարանը հիմնավոր կասկածից վեր ապացուցողական չափանիշին համապատասխան հաստատված է համարում, որ Վաչագան Վազգենի Բադալյանը, խաբեության՝ դիտավորությամբ իրականությունը խեղաթյուրելու, իրական մտադրության մասին լռելու և վստահությունը չարաշահելու, ապագայում սպասվող իրադարձությունների կապակցությամբ անձին դիտավորությամբ մոլորության մեջ գցելու եղանակով, կատարել է ուրիշի գույքի մանր չափերի հափշտակություններ, այդ թվում՝ խմբի կազմում, ինչպես նաև իրացրել է կեղծ բովանդակությամբ վճարահաշվարկային փաստաթղթեր և կեղծ արտարժույթ։
Մասնավորապես, Վաչագան Բադալյանը 2023 թվականի մայիսի 15-ին ուրիշի գույքը խաբեությամբ հափշտակելու դիտավորությամբ «Լիստ.ամ» կայքում «Այփլ Վոտչ ՍԵ» մոդելի ժամացույցի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Տաթև Ղազարյանի հետ և պայմանավորվածություն ձեռք բերել ժամացույցը 85.000 ՀՀ դրամով գնելու շուրջ, որից հետո նույն օրը՝ ժամը 21:30-ի սահմաններում, Երևան քաղաքի Դրո փողոցի 15 հասցեում գտնվող «Հայփոստ» ՓԲ ընկերության մոտ հանդիպել է Տաթև Ղազարյանին և վերջինի «Վատսափ» հավելվածի հեռախոսահամարին է ուղարկել «Ինեկոբանկ» ՓԲ ընկերության անվամբ լրացված կեղծ բովանդակությամբ վճարահաշվարկային փաստաթուղթ հանդիսացող 230515026048000 գործարքի համարով անդորրագիրը՝ այդ կերպ խաբեության և վստահությունը չարաշահելու եղանակով հափշտակելով «Այփլ Վոտչ ՍԵ» մոդելի ժամացույցը՝ Տաթև Ղազարյանին պատճառելով մանր չափի՝ 85.000 ՀՀ դրամի գույքային վնաս:
Բացի այդ, Վաչագան Բադալյանը 2023 թվականի մայիսի 9-ին ուրիշի գույքը խաբեությամբ հափշտակելու դիտավորությամբ «Լիստ․ամ» կայքում «Այֆոն 11» մոդելի բջջային հեռախոսի վաճառքի վերաբերյալ տեղադրված հեռախոսահամարով կապ է հաստատել Լուսինե Աթաբեկյանի հետ և պայմանավորվածություն ձեռք բերել հեռախոսը 130.000 ՀՀ դրամով գնելու շուրջ, որից հետո 2023 թվականի մայիսի 10-ին՝ ժամը 22:10-ի սահմաններում, Երևան քաղաքի Դրոյի փողոցի 21-րդ շենքի 19 բնակարան հասցեում հանդիպել է Լուսինե Աթաբեկյանին և վերջինին ուղարկել «Արդշինբանկ» ՓԲ ընկերության անվամբ լրացված կեղծ բովանդակությամբ վճարահաշվարկային փաստաթուղթ հանդիսացող 3019719 նույնականացուցիչ համարով անդորրագիրը` այդ կերպ խաբեության և վստահությունը չարաշահելու եղանակով հափշտակելով «Այֆոն 11» մոդելի բջջային հեռախոսը՝ Լուսինե Աթաբեկյանին պատճառելով մանր չափի` 130.000 ՀՀ դրամի գույքային վնաս:
Բացի այդ, Վաչագան Բադալյանը և վարույթով չպարզված անձը խմբի կազմում խարդախությամբ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից նախաքննությամբ չպարզված անձը 2023 թվականի հոկտեմբերի 7-ին «Լիստ.ամ» կայքում «Այֆոն 11 պրո մաքս» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Գայանե Հովհաննիսյանի հետ և պայմանավորվածություն ձեռք բերել հեռախոսը 170.000 ՀՀ դրամով գնելու շուրջ, որից հետո նույն օրը՝ ժամը 22:00-22:30-ի սահմաններում, Վաչագան Բադալյանը և վարույթով չպարզված անձը Երևան քաղաքի Դրոյի փողոցի 8-րդ հասցեում հանդիպել են Գայանե Հովհաննիսյանին և վերջինին են ուղարկել «Արդշինբանկ» ՓԲ ընկերության անվամբ լրացված կեղծ բովանդակությամբ վճարահաշվարկային փաստաթուղթ հանդիսացող 331879921 նույնականացուցիչ համարով անդորրագիրը՝ այդ կերպ խաբեության և վստահությունը չարաշահելու եղանակով հափշտակելով «Այֆոն 11 պրո մաքս» մոդելի բջջային հեռախոսը՝ Գայանե Հովհաննիսյանին պատճառելով մանր չափի՝ 170.000 ՀՀ դրամի գույքային վնաս:
Բացի այդ, Վաչագան Բադալյանը և վարույթով չպարզված անձը խմբի կազմում խարդախությամբ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից նախաքննությամբ չպարզված անձը 2023 թվականի մայիսի 7-ին «Լիստ.ամ» կայքում «Սամսունգ գալաքսի Ս 23» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Գուրգեն Միքայելյանի հետ և պայմանավորվածություն ձեռք բերել հեռախոսը 270.000 ՀՀ դրամով գնելու շուրջ, որից հետո նույն օրը` ժամը 18:00-ի սահմաններում, Վաչագան Բադալյանը և վարույթով չպարզված անձը Երևան քաղաքի Ա.Ահարոնյան և Դրո փողոցների խաչմերուկում հանդիպել են Գուրգեն Միքայելյանին և վերջինիս «Վաթսափ» հավելվածի հեռախոսահամարին ուղարկել «Արդշինբանկ» ՓԲ ընկերության անվամբ լրացված կեղծ բովանդակությամբ վճարահաշվարկային փաստաթուղթ հանդիսացող 30197121 նույնականացուցիչ համարով անդորրագիրը՝ այդ կերպ խաբեության և վստահությունը չարաշահելու եղանակով հափշտակելով «Սամսունգ գալաքսի Ս 23» մոդելի բջջային hեռախոսը՝ Գուրգեն Միքայելյանին պատճառելով մանր չափի՝ 270.000 ՀՀ դրամի գույքային վնաս:
Բացի այդ, Վաչագան Բադալյանը և վարույթով չպարզված անձը խմբի կազմում խարդախությամբ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից նախաքննությամբ չպարզված անձը 2023 թվականի հունիսի 9-ին` ժամը 11:23–ի սահմաններում, «Լիստ.ամ» կայքում «Այֆոն 12 մինի 64 ԳԲ» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Հասմիկ Հակոբյանի հետ և պայմանավորվածություն ձեռք բերել հեռախոսը 130.000 ՀՀ դրամով գնելու շուրջ, որից հետո նույն օրը՝ ժամը 22:00-ի սահմաններում, Վաչագան Բադալյանը և վարույթով չպարզված անձը Երևան քաղաքի Էմինեմսկու 1-ին փողոց հասցեում հանդիպել են Հասմիկ Հակոբյանին և վերջինիս «Վաթսափ» հավելվածի հեռախոսահամարին ուղարկել բանկի անվամբ լրացված կեղծ բովանդակությամբ վճարահաշվարկային փաստաթուղթ հանդիսացող անդորրագիր՝ այդ կերպ խաբեության և վստահությունը չարաշահելու եղանակով հափշտակելով «Այֆոն 12 մինի 64 ԳԲ» մոդելի բջջային հեռախոսը՝ Հասմիկ Հակոբյանին պատճառելով մանր չափի՝ 130.000 ՀՀ դրամի գույքային վնաս:
Բացի այդ, Վաչագան Բադալյանը և վարույթով չպարզված անձը խմբի կազմում խարդախությամբ՝ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից նախաքննությամբ չպարզված անձը 2023 թվականի սեպտեմբերի 17-ին՝ ժամը 21։00-ի սահմաններում, «Լիստ.ամ» կայքում «Այֆոն 13» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Անահիտ Ղազարյանի հետ և պայմանավորվածություն ձեռք բերել հեռախոսը 220.000 ՀՀ դրամով գնելու շուրջ, որից հետո նույն օրը Վաչագան Բադալյանը և վարույթով չպարզված անձը Երևան քաղաքի Կ.Ուլնեցի 72 շենքի մոտ հանդիպել են Անահիտ Ղազարյանին և վերջինին են ուղարկել «Արդշինբանկ» ՓԲ ընկերության անվամբ լրացված կեղծ բովանդակությամբ վճարահաշվարկային փաստաթուղթ հանդիսացող 33187992 նույնականացուցիչ համարով անդորրագիրը` այդ կերպ խաբեության և վստահությունը չարաշահելու եղանակով հափշտակելով «Այֆոն 13» մոդելի բջջային հեռախոսը՝ Անահիտ Ղազարյանին պատճառելով մանր չափի՝ 220.000 ՀՀ դրամի գույքային վնաս:
Բացի այդ, Վաչագան Վազգենի Բադալյանը և վարույթով չպարզված անձը խմբի կազմում խարդախությամբ ուրիշի գույքը հափշտակելու դիտավորությամբ, նախնական համաձայնությամբ պայմանավորել են միմյանց գործողությունները և նրանցից նախաքննությամբ չպարզված անձը 2024 թվականի սեպտեմբերի 5-ին՝ ժամը 17:00-ից-18:00-ն ընկած ժամանակահատվածում, «Լիստ.ամ» կայքում «Այֆոն 14 պրո մաքս» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Արմենուհի Ղազարյանի հետ և պայմանավորվածություն ձեռք բերել հեռախոսը 355.000 ՀՀ դրամով գնելու շուրջ, որից հետո նույն օրը՝ ժամը 22:30-ի սահմաններում, Վաչագան Բադալյանը և վարույթով չպարզված անձը Երևան քաղաքի Ծարավ-Աղբյուր փողոցի 32/2 տանը հանդիպել են Արմենուհի Ղազարյանին և վերջինին են ուղարկել «Արդշինբանկ» ՓԲ ընկերության անվամբ լրացված կեղծ բովանդակությամբ վճարահաշվարկային փաստաթուղթ հանդիսացող 31872219 նույնականացուցիչ համարով անդորրագիրը՝ այդ կերպ խաբեության և վստահությունը չարաշահելու եղանակով հափշտակելով «Այֆոն 14 պրո մաքս» մոդելի բջջային հեռախոսը՝ Արմենուհի Ղազարյանին պատճառելով մանր չափի՝ 355.000 ՀՀ դրամի գույքային վնաս:
Բացի այդ, Վաչագան Բադալյանը 2023 թվականի նոյեմբերի 17-ին՝ ժամը 22:54-ի սահմաններում, ուրիշի գույքը խաբեությամբ հափշտակելու դիտավորությամբ «Լիստ.ամ» կայքում «Այֆոն 14 պրո մաքս» մոդելի բջջային հեռախոսի վաճառքի վերաբերյալ հայտարարությամբ տեղադրված հեռախոսահամարով կապ է հաստատել Արման Աբրահամյանի հետ և պայմանավորվածություն ձեռք բերել հեռախոսը 900 ԱՄՆ դոլարով գնելու շուրջ, որից հետո նույն օրը Երևան քաղաքի Կ.Ուլնեցի 62 շենքի մոտ հանդիպել է Արման Աբրահամյանին և վերջինիս է տվել «MB 94335804 D», «MB 94337745 D», «MB 94337599 D», «MB 94335800 D», «PF 98737257 H», «PF 98730565 H», «PF 27524234 B», «PF 27524198 B», «PF 16049892 8», «PF 98735766 H», «PF 275242269 B» անվանական արժեքով քննությամբ չպարզված հանգամանքներում պատրաստված 4 հատ 50 և 7 հատ 100 ԱՄՆ դոլար կեղծ արտարժույթ՝ այդ կերպ խաբեության և վստահությունը չարաշահելու եղանակով հափշտակելով «Այֆոն 14 պրո մաքս» մոդելի բջջային հեռախոսը՝ Արման Աբրահամյանին պատճառելով մանր չափի՝ 900 ԱՄՆ դոլարին համարժեք 362.169 ՀՀ դրամի գույքային վնաս:

4. Դատարանի իրավական վերլուծությունները.
ՀՀ քրեական օրենսգրքի 50-րդ հոդվածի 2-րդ մասի համաձայն՝ «Հանցանքը համարվում է մի խումբ անձանց կողմից նախնական համաձայնությամբ կատարված, եթե հանցագործությանը մասնակցել են այնպիսի համակատարողներ, որոնք նախքան հանցանքն սկսելը պայմանավորվել են հանցանքը համատեղ կատարելու մասին»։
ՀՀ քրեական օրենսգրքի 255-րդ հոդվածի համաձայն՝
«1. Խարդախությունը՝ խաբեության կամ վստահությունը չարաշահելու եղանակով հափշտակությունը՝
պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ ազատության սահմանափակմամբ՝ առավելագույնը երկու տարի ժամկետով, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:
2. Խարդախությունը, որը կատարվել է՝
1) մի խումբ անձանց կողմից նախնական համաձայնությամբ,
(․․․)
պատժվում է տուգանքով` քսանապատիկից հիսնապատիկի չափով, կամ հանրային աշխատանքներով՝ հարյուր հիսունից երկու հարյուր յոթանասուն ժամ տևողությամբ, կամ ազատության սահմանափակմամբ՝ մեկից երեք տարի ժամկետով, կամ ազատազրկմամբ` երկուսից հինգ տարի ժամկետով:
(․․․)»։
ՀՀ քրեական օրենսգրքի 267-րդ հոդվածի համաձայն՝
«1. Իրացնելու նպատակով կեղծ արժույթ, արտարժույթ, արժեթուղթ, վճարահաշվարկային այլ փաստաթուղթ կամ վճարային գործիք պատրաստելը, պահելը, տեղափոխելը, առաքելը կամ ձեռք բերելը կամ դրանք իրացնելը՝
պատժվում է ազատության սահմանափակմամբ՝ մեկից երեք տարի ժամկետով, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ երկուսից հինգ տարի ժամկետով:
2. Սույն հոդվածի 1-ին մասով նախատեսված արարքը, որը կատարվել է՝
1) մի խումբ անձանց կողմից նախնական համաձայնությամբ,
(․․․)
պատժվում է ազատազրկմամբ՝ չորսից ութ տարի ժամկետով:
(․․․)»։
Վճարահաշվարկային համակարգերի և վճարահաշվարկային կազմակերպությունների մասին ՀՀ օրենքի 3-րդ հոդվածի «գ» ենթակետի համաձայն՝ «Սույն օրենքի իմաստով և սույն օրենքի հիման վրա ընդունված իրավական ակտերի իմաստով՝ վճարահաշվարկային փաստաթուղթը Հայաստանի Հանրապետության օրենքներով, Կենտրոնական բանկի նորմատիվ իրավական ակտերով և դրանց համապատասխան` բանկային կանոններով սահմանված կարգով կազմված և հավաստված (վավերացված) ցանկացած թղթային կամ էլեկտրոնային փաստաթուղթն է, որը պարունակում է կարգադրություն վճարահաշվարկային համակարգի մասնակցին` դրամական միջոցները մուտքագրելու, ելքագրելու կամ փոխանցելու վերաբերյալ»։
Մեջբերված իրավադրույթների լույսի ներքո գնահատելով սույն վարույթով հաստատված փաստական հանգամանքները, ղեկավարվելով անմեղության կանխավարկածով և հիմնվելով պատշաճ ապացուցման արդյունքների վրա՝ Դատարանն ապացուցված է համարում Վաչագան Բադալյանին վերագրվող փաստական հանգամանքները, այդ արարքների քրեական հակաիրավականությունը, մեղադրյալի կողմից այդ արարքները կատարելը, ինչպես նաև՝ նրա մեղավորությունը տվյալ արարքները կատարելու մեջ։
Դատարանը գտնում է նաև, որ Վաչագան Բադալյանի արարքներն ամբողջությամբ համապատասխանում են ՀՀ քրեական օրենսգրքի 255-րդ հոդվածի 1-ին մասով՝ երեք դրվագով, 267-րդ հոդվածի 1-ին մասով՝ երեք դրվագով, 255-րդ հոդվածի 2-րդ մասի 1-ին կետով՝ հինգ դրվագով, 267-րդ հոդվածի 2-րդ մասի 1-ին կետով՝ հինգ դրվագով նախատեսված հանցագործությունների հատկանիշներին, որոնց համար նա ենթակա է քրեական պատախանատվության և պատժի:
Անդրադառնալով նշանակվելիք պատժի հարցին՝ Դատարանը փաստում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի Ընդհանուր մասի մի շարք դրույթներով:
Մասնավորապես, ՀՀ քրեական օրենսգրքի 55-րդ հոդվածի համաձայն`
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»:
ՀՀ քրեական օրենսգրքի 69-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
(․․․)»:
ՀՀ վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և այն կատարող անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, այն կատարող անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (ի թիվս այլնի տե՛ս ՀՀ վճռաբեկ դատարանի թիվ ԵՇԴ/0029/01/08, ԱՎԴ2/0059/01/08, ԵԱՔԴ/0078/01/09 ԵԿԴ/0042/01/11 որոշումները)։
Անդրադառնալով հանցագործության հանրության համար վտանգավորության աստիճանին և բնույթին՝ Դատարանն արձանագրում է, որ
ա) արարքի հանրային վտանգավորության բնույթը որոշվում է այնպիսի փաստական տվյալների ամբողջությամբ, որոնք բնութագրում են մեղքի ձևը և տեսակը, հանցագործության նպատակը և շարժառիթը, քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակությունը,
բ) արարքի հանրային վտանգավորության աստիճանը որոշվում է այնպիսի փաստական տվյալների ամբողջությամբ, որոնք բնութագրում են հանցագործությամբ պատճառված վնասի չափը և բնույթը (հանրորեն վտանգավոր հետևանքներ), հանցագործության կատարման եղանակը, գործիքներն ու միջոցները, հանցավոր մտադրության իրականացման աստիճանը (տե՛ս Գարուշ Մադաթյանի գործով ՀՀ վճռաբեկ դատարանի 2009 թվականի փետրվարի 17-ի թիվ ԵՇԴ/0029/01/08 որոշումը):
Վերոգրյալի լույսի ներքո քննարկելով Վաչագան Բադալյանի արարքները, հաշվի առնելով քրեական օրենսդրությամբ պահպանվող հասարակական հարաբերությունների` հանցանքի կատարման պահին ունեցած սոցիալական նշանակությունը, մեղքի ձևը և տեսակը, հանցագործության նպատակը և շարժառիթը, դրանց կատարման եղանակը, հանցավոր մտադրության իրականացման աստիճանը և մյուս վերաբերելի հանգամանքները՝ Դատարանը փաստում է, որ Վաչագան Բադալյանի կատարած հանցագործություններն օժտված են հանրության համար վտանգավորության բարձր աստիճանով և բնույթով։
Որպես Վաչագան Բադալյանի անձը բնութագրող տվյալներ Դատարանը հաշվի է առնում այն, որ արարքները կատարելու պահին դատվածություն չի ունեցել, մասնակիորեն ընդունել է իր մեղքը։
Դատարանն արձանագրում է նաև, որ քրեական վարույթի նյութերում Վաչագան Բադալյանի պատասխանատվությունն ու պատիժը մեղմացնող և ծանրացնող հանգամանքների մասին վկայող տվյալներ առկա չեն:
Հաշվի առնելով վերը շարադրվածը՝ Դատարանը գտնում է, որ մեղադրյալ Վաչագան Բադալյանի կատարած արարքների համար նրա նկատմամբ ՀՀ քրեական օրենսգրքի 267-րդ հոդվածի 2-րդ մասի 1-ին կետով՝ յուրաքանչյուր դրվագով՝ պետք է նշանակվի պատիժ ազատազրկման ձևով՝ 4 (չորս) տարի ժամկետով, 255-րդ հոդվածի 2-րդ մասի 1-ին կետով՝ յուրաքանչյուր դրվագով՝ պետք է նշանակվի պատիժ ազատազրկման ձևով՝ 2 (երկու) տարի ժամկետով, 267-րդ հոդվածի 1-ին մասով՝ յուրաքանչյուր դրվագով՝ պետք է նշանակվի պատիժ ազատազրկման ձևով՝ 2 (երկու) տարի ժամկետով և 255-րդ հոդվածի 1-ին մասով՝ յուրաքանչյուր դրվագով՝ պետք է նշանակվի պատիժ կարճաժամկետ ազատազրկման ձևով՝ 1 (մեկ) ամիս ժամկետով։
ՀՀ քրեական օրենսգրքի 74-րդ հոդվածի կարգով՝ հանցանքների համակցությամբ նշանակված պատիժները գումարելու միջոցով, Վաչագան Բադալյանի նկատմամբ ՀՀ քրեական օրենսգրքի 267-րդ հոդվածի 2-րդ մասի 1-ին կետով՝ առաջին դրվագով նշանակված պատժին անհրաժեշտ է գումարել 267-րդ հոդվածի 2-րդ մասի 1-ին կետով, 255-րդ հոդվածի 2-րդ մասի 1-ին կետով, 267-րդ հոդվածի 1-ին մասով մյուս դրվագներով նշանակված պատիժներից 3-ական ամիս ժամկետով ազատազրկումը, 255-րդ հոդվածի 1-ին մասով՝ երեք դրվագով նշանակված պատիժներն ամբողջությամբ և Վաչագան Վազգենի Բադալյանի նկատմամբ վերջնական պատիժ պետք է սահմանել ազատազրկումը՝ 7 (յոթ) տարի 3 (երեք) ամիս ժամկետով, ինչն անհրաժեշտ և բավարար է պատժի նպատակներն իրագործելու համար:
ՀՀ քրեական օրենսգրքի 84-րդ հոդվածի համաձայն`
«1. Եթե դատարանը հանցանք կատարած անձի նկատմամբ կարճաժամկետ ազատազրկման, կարգապահական գումարտակում պահելու կամ ազատազրկման ձևով պատիժ նշանակելիս հանգում է հետևության, որ պատժի նպատակների իրականացումը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին:
(․․․)։
4. Պատիժը պայմանականորեն չկիրառելու վերաբերյալ որոշում կայացնելիս դատարանը պետք է հաշվի առնի հետևյալ հանգամանքները.
1) անձին մեղսագրվող հանցանքի բնույթն ու վտանգավորությունը,
2) պատիժը մեղմացնող և ծանրացնող հանգամանքները,
3) հանցանք կատարածի անձը,
4) պատճառած վնասը հատուցելու կամ այլ կերպ հարթելու պահանջի բացակայությունը կամ այն հատուցած կամ այլ կերպ հարթած լինելու հանգամանքը, եթե հանցագործությամբ վնաս է պատճառվել:
(․․․)»:
ՀՀ վճռաբեկ դատարանն իր մի շարք որոշումներում անդրադառնալով պատիժը պայմանականորեն չկիրառելու հարցին, դիրքորոշում է հայտնել այն մասին, որ դատարանի համոզվածությունը, վստահությունն այն մասին, որ ամբաստանյալի ուղղվելը հնարավոր է առանց իրական պատիժ կրելու, պետք է հիմնվի օբյեկտիվ գոյություն ունեցող այնպիսի տվյալների համակողմանի վերլուծության վրա, որոնք բնութագրում են արարքը, հանցավորի անձը և վկայում պատիժը պայմանականորեն չկիրառելու հիմքերի առկայության մասին։ Այս կապակցությամբ Վճռաբեկ դատարանը բազմիցս փաստել է, որ թեև պատիժը պայմանականորեն չկիրառելու հետ կապված ՀՀ քրեական օրենսգիրքն ինչպես հանցագործությունների, այնպես էլ անձանց շրջանակի որևէ սահմանափակում չի նախատեսում, սակայն դատարանի հետևությունները պետք է, ի թիվս այլոց, հիմնված լինեն նաև հանցագործության հանրային վտանգավորության աստիճանի և բնույթի ամբողջական գնահատման վրա` հաշվի առնելով այնպիսի գործոններ, ինչպիսիք են օրենքով պահպանվող հասարակական հարաբերության բնույթը, մեղքի ձևը և տեսակը, պատճառված վնասի չափը, պատաuխանատվությունը և պատիժը մեղմացնող ու ծանրացնող հանգամանքները, հանցագործության հանգամանքները, եղանակը, գործիքներն ու միջոցները, նպատակներն ու շարժառիթները և այլն (տե՛ս Սամսոն Ամիրխանյանի գործով 2012 թվականի նոյեմբերի 1-ի թիվ ԵԱԴԴ/0034/01/12, Արսեն Մկրտչյանի գործով 2012 թվականի դեկտեմբերի 5-ի թիվ ԼԴ/0093/01/12, Վանյա Բեգյանի գործով 2013 թվականի հոկտեմբերի 18-ի թիվ ՏԴ/0018/01/13, Արամայիս Հովհաննիսյանի գործով 2015 թվականի փետրվարի 27-ի թիվ ԳԴ/0014/01/14 և այլ որոշումներ)։
Սույն դեպքում, հաշվի առնելով մեղադրյալի կատարած արարքների բնույթն ու հանրային վտանգավորության աստիճանը, պատասխանատվությունն ու պատիժը մեղմացնող հանգամանքների բացակայությունը, հանցագործությամբ պատճառված նյութական վնասները հատուցված չլինելու հանգամանքը, ինչպես նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը՝ Դատարանը գտնում է, որ Վաչագան Բադալյանը պետք է կրի իր նկատմամբ նշանակված պատիժը, այն պայմանականորեն չկիրառելու հիմքերը բացակայում են և միայն ազատազրկման ձևով նշանակված պատիժը ռեալ կրելու պայմաններում է հնարավոր ապահովել պատժի նպատակները:
ՀՀ քրեական օրենսգրքի 79-րդ հոդվածի 3-րդ մասի համաձայն` «Մինչև դատավճռի օրինական ուժի մեջ մտնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը հաշվակցվում է կարճաժամկետ ազատազրկման, կարգապահական գումարտակում պահելու, ազատազրկման ձևով նշանակված պատժին` 1 օրը հաշվելով 1 օրվա դիմաց (․․․)»:
Դատարանն արձանագրում է, որ սույն վարույթով Վաչագան Բադալյանն անընդմեջ կալանքի տակ է գտնվում 2024 թվականի հոկտեմբերի 29-ից, հետևաբար պատիժը կրելու սկիզբը պետք է հաշվել այդ օրվանից՝ այդպիսով կատարելով հաշվակցումը։
Քննության առնելով Վաչագան Բադալյանի նկատմամբ ընտրված խափանման միջոց կալանքի հարցը՝ Դատարանը հանգում է հետևության, որ այն պետք է թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
ՀՀ քրեական դատավարության օրենսգրքի 159-րդ հոդվածի համաձայն՝
«1. Քրեական վարույթի ընթացքում հատուցման ենթակա են մեղադրյալին վերագրվող արարքի հետևանքով պատճառված հետևյալ վնասները․
1) անմիջականորեն պատճառված գույքային վնասը.
(․․․)»։
ՀՀ քրեական դատավարության օրենսգրքի 162-րդ հոդվածի 1-ին մասի համաձայն՝ «Գույքային հայցը լուծվում է եզրափակիչ դատական ակտով` լրիվ կամ մասնակի բավարարվում է, ներառյալ հաշտության համաձայնության տեսքով, մերժվում է կամ թողնվում առանց լուծման»։
Գույքային հայցի հիմքին և առարկային վերաբերող հարցերը ՀՀ վճռաբեկ դատարանը համակարգային վերլուծության է ենթարկել Ա.Մկրտչյանի և Ա.Ստեփանյանի վերաբերյալ գործերով կայացված որոշումներում:
Մասնավորապես, Ա.Մկրտչյանի գործով որոշման մեջ Վճռաբեկ դատարանն իրավական դիրքորոշում է ձևավորել այն մասին, որ «(․․․) քրեական դատավարությունում քաղաքացիական հայցի առարկան է կազմում հանցագործությամբ անմիջականորեն պատճառված գույքային վնասը, որի հատուցման մասին պահանջը հայցվորը ներկայացնում է մեղադրյալին կամ նրա գործողությունների համար պատասխանատվություն կրող անձին: Քաղաքացիական հայցի առարկայի որոշման համար անհրաժեշտ է, որպեսզի վնասն անմիջականորեն հանցագործությամբ պատճառված լինի: (․․․)» (տե՛ս Ավետիս Մկրտչյանի գործով Վճռաբեկ դատարանի 2007 թվականի նոյեմբերի 30-ի թիվ ՎԲ-150/07 որոշումը):
Ա.Ստեփանյանի գործով որոշման մեջ Վճռաբեկ դատարանն իրավական դիրքորոշում է ձևավորել այն մասին, որ «(․․․) քրեական դատավարությունում մեղադրյալի կամ մեղադրյալի գործողությունների համար պատասխանատվություն կրող անձի դեմ քաղաքացիական հայց կարող է ներկայացվել և, համապատասխանաբար, դատարանում քննության առարկա լինել բացառապես հանցագործությամբ պատճառված և քրեական դատավարության կարգով հատուցման ենթակա գույքային վնասի առկայության պարագայում: Քրեական դատավարությունում քաղաքացիական հայցի քննության հիմքում ընկած է միասնական իրավաբանական փաստը` հանցագործությունը, որի կատարման համար անձը ենթարկվում է ինչպես քրեական, այնպես էլ քաղաքացիաիրավական պատասխանատվության այն դեպքերում, երբ առկա է հանցագործությամբ պատճառված գույքային վնաս: (․․․) դատարանը, ապացուցված համարելով հանցագործության մեջ մեղադրվող անձի մեղքը, ինչպես նաև հանցավոր արարքի և հասցված վնասի միջև պատճառական կապը, լուծում է նաև քաղաքացիական հայցը` գնահատելով ներկայացված հայցադիմումի հիմքերի ու չափի ապացուցված լինելու հանգամանքը» (տե՛ս Ալվարդ Չուբարի Ստեփանյանի գործով Վճռաբեկ դատարանի 2011 թվականի հոկտեմբերի 20-ի թիվ ԼԴ/0327/01/10 որոշման 21-րդ կետը):
Սույն դեպքում, Դատարանն արձանագրում է, որ քրեական վարույթի քննության ընթացքում հետազոտված ապացույցներով հաստատվում է, որ Վաչագան Բադալյանի արարքների հետևանքով Անահիտ Ղազարյանին, Արմենուհի Ղազարյանին, Գուրգեն Միքայելյանին, Արման Աբրահամյանին և Տաթև Ղազարյանին անմիջականորեն պատճառվել են գույքային վնասներ, որոնցից որևէ հատուցում չի կատարվել։
Առկա պայմաններում Դատարանը գտնում է, որ ներկայացված գույքային հայցերը պետք է բավարարել ամբողջությամբ և Վաչագան Բադալյանից հօգուտ Անահիտ Ղազարյանի բռնագանձել 220․000 (երկու հարյուր քսան հազար) ՀՀ դրամ, հօգուտ Արմենուհի Ղազարյանի բռնագանձել 335․000 (երեք հարյուր երեսունհինգ հազար) ՀՀ դրամ, հօգուտ Գուրգեն Միքայելյանի բռնագանձել 270․000 (երկու հարյուր յոթանասուն հազար) ՀՀ դրամ, հօգուտ Արման Աբրահամյանի բռնագանձել 362․000 (երեք հարյուր վաթսուներկու հազար) ՀՀ դրամ և հօգուտ Տաթև Ղազարյանի բռնագանձել 85․000 (ութսունհինգ հազար) ՀՀ դրամ՝ որպես հանցագործությամբ պատճառված վնասի հատուցում։
ՀՀ քրեական դատավարության օրենսգրքի 100-րդ հոդվածով նախատեսված կարգավորումների համաձայն՝ Դատարանը գտնում է, որ մինչդատական վարույթն իրականացնող մարմնի որոշմամբ իրեղեն ապացույց ճանաչված՝ Գայանե Արմենի Հովհաննիսյանին պահպանության հանձնված Այֆոն 11 պռո մաքս, Հասմիկ Միշայի Հակոբյանին պահպանության հանձնված Այֆոն 12 մինի և Լուսինե Սամվելի Աթաբեկյանին պահպանության հանձնված Այֆոն 11 մոդելների բջջային հեռախոսները դատավճիռն օրինական ուժի մեջ մտնելուց հետո պետք է թողնել նրանց տնօրինությանը։
ՀՀ քրեական դատավարության օրենսգրքի 167-րդ հոդվածի 1-ին մասի 6-րդ կետի համաձայն` դատավճիռ կայացնելիս դատարանը լուծում է նաև վարութային ծախսերի հարցը:
Տվյալ դեպքում, Դատարանն արձանագրում է, որ քրեական վարույթի քննության ընթացքում 252․000 (երկու հարյուր հիսուներկու հազար) ՀՀ դրամ ծախսվել է փորձաքննությունների կատարման համար, որը որպես դատական ծախս ենթակա է բռնագանձման Վաչագան Բադալյանից:
Անդրադառնալով մյուս վարույթային ծախսերի հարցին և հաշվի առնելով, որ դրանց վերաբերյալ տվյալները բացակայում են, ավելին՝ գործի քննության ընթացքում նման պահանջ չի ներկայացվել, Դատարանը հանգում է հետևության, որ այդ հարցը պետք է համարել լուծված։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33-34-րդ, 99-100-րդ, 167-րդ, 347-350-րդ, 364-րդ հոդվածներով՝ Դատարանը

ՎՃՌԵՑ

Վաչագան Վազգենի Բադալյանին մեղավոր ճանաչել ՀՀ քրեական օրենսգրքի 267-րդ հոդվածի 2-րդ մասի 1-ին կետով՝ հինգ դրվագով նախատեսված հանցագործությունների կատարման մեջ և նրա նկատմամբ յուրաքանչյուր դրվագով պատիժ նշանակել ազատազրկումը՝ 4 (չորս) տարի ժամկետով։
Վաչագան Վազգենի Բադալյանին մեղավոր ճանաչել ՀՀ քրեական օրենսգրքի 255-րդ հոդվածի 2-րդ մասի 1-ին կետով՝ հինգ դրվագով նախատեսված հանցագործությունների կատարման մեջ և նրա նկատմամբ յուրաքանչյուր դրվագով պատիժ նշանակել ազատազրկումը՝ 2 (երկու) տարի ժամկետով։
Վաչագան Վազգենի Բադալյանին մեղավոր ճանաչել ՀՀ քրեական օրենսգրքի 267-րդ հոդվածի 1-ին մասով՝ երեք դրվագով նախատեսված հանցագործությունների կատարման մեջ և նրա նկատմամբ յուրաքանչյուր դրվագով պատիժ նշանակել ազատազրկումը՝ 2 (երկու) տարի ժամկետով։
Վաչագան Վազգենի Բադալյանին մեղավոր ճանաչել ՀՀ քրեական օրենսգրքի 255-րդ հոդվածի 1-ին մասով՝ երեք դրվագով նախատեսված հանցագործությունների կատարման մեջ և նրա նկատմամբ յուրաքանչյուր դրվագով պատիժ նշանակել կարճաժամկետ ազատազրկումը՝ 1 (մեկ) ամիս ժամկետով։
ՀՀ քրեական օրենսգրքի 74-րդ հոդվածի կարգով՝ հանցանքների համակցությամբ նշանակված պատիժները գումարելու միջոցով, Վաչագան Վազգենի Բադալյանի նկատմամբ ՀՀ քրեական օրենսգրքի 267-րդ հոդվածի 2-րդ մասի 1-ին կետով՝ առաջին դրվագով նշանակված պատժին գումարել 267-րդ հոդվածի 2-րդ մասի 1-ին կետով, 255-րդ հոդվածի 2-րդ մասի 1-ին կետով, 267-րդ հոդվածի 1-ին մասով մյուս դրվագներով նշանակված պատիժներից 3-ական ամիս ժամկետով ազատազրկումը, 255-րդ հոդվածի 1-ին մասով՝ երեք դրվագով նշանակված պատիժներն ամբողջությամբ և Վաչագան Վազգենի Բադալյանի նկատմամբ վերջնական պատիժ սահմանել ազատազրկումը՝ 7 (յոթ) տարի 3 (երեք) ամիս ժամկետով։
Պատիժը կրելու սկիզբը հաշվել 2024 թվականի հոկտեմբերի 29-ից։
Վաչագան Վազգենի Բադալյանի նկատմամբ որպես խափանման միջոց կիրառված կալանքը թողնել անփոփոխ՝ մինչև դատավճիռն օրինական ուժի մեջ մտնելը, որից հետո վերացնել:
Տուժողների գույքային հայցերը բավարարել․
Վաչագան Վազգենի Բադալյանից հօգուտ Անահիտ Ռոբերտի Ղազարյանի բռնագանձել 220․000 (երկու հարյուր քսան հազար) ՀՀ դրամ՝ որպես հանցագործությամբ պատճառված վնասի հատուցում։
Վաչագան Վազգենի Բադալյանից հօգուտ Արմենուհի Համլետի Ղազարյանի բռնագանձել 335․000 (երեք հարյուր երեսունհինգ հազար)ՀՀ դրամ՝ որպես հանցագործությամբ պատճառված վնասի հատուցում։
Վաչագան Վազգենի Բադալյանից հօգուտ Գուրգեն Արմենակի Միքայելյանի բռնագանձել 270․000 (երկու հարյուր յոթանասուն հազար) ՀՀ դրամ՝ որպես հանցագործությամբ պատճառված վնասի հատուցում։
Վաչագան Վազգենի Բադալյանից հօգուտ Արման Վահանի Աբրահամյանի բռնագանձել 362․000 (երեք հարյուր վաթսուներկու հազար) ՀՀ դրամ՝ որպես հանցագործությամբ պատճառված վնասի հատուցում։
Վաչագան Վազգենի Բադալյանից հօգուտ Տաթև Տիգրանի Ղազարյանի բռնագանձել 85․000 (ութսունհինգ հազար) ՀՀ դրամ՝ որպես հանցագործությամբ պատճառված վնասի հատուցում։
Իրեղեն ապացույց ճանաչված՝ Գայանե Արմենի Հովհաննիսյանին պահպանության հանձնված Այֆոն 11 պռո մաքս, Հասմիկ Միշայի Հակոբյանին պահպանության հանձնված Այֆոն 12 մինի և Լուսինե Սամվելի Աթաբեկյանին պահպանության հանձնված Այֆոն 11 մոդելների բջջային հեռախոսները դատավճիռն օրինական ուժի մեջ մտնելուց հետո թողնել նրանց տնօրինությանը։
Վաչագան Վազգենի Բադալյանից հօգուտ Հայաստանի Հանրապետության բռնագանձել 252․000 (երկու հարյուր հիսուներկու հազար) ՀՀ դրամ՝ որպես դատական ծախս։
Մյուս ծախսերի և վերաբերելի հարցերը համարել լուծված։
Դատավճիռը կարող է բողոքարկվել ՀՀ վերաքննիչ քրեական դատարան` ստանալու օրվանից հետո մեկամսյա ժամկետում:


ԴԱՏԱՎՈՐ՝ Հ.ԱՎԱԳՅԱՆ