ԵԴ1/3175/01/24

Ո Ր Ո Շ ՈՒ Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

16 սեպտեմբերի 2025թ․ ք.Երևանում

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

նախագահությամբ
դատավոր՝ Մ․Արամյանի
քարտուղարությամբ՝ Մ.Գևորգյանի
մասնակցությամբ`
հանրային մեղադրող՝ Հ․Թորոսյանի
մեղադրյալ՝ Է․Խանզադյանի
պաշտպան՝ Մ․Պողոսյանի

դռնբաց դատական նիստում քննարկման առարկա դարձրեց Էդգար Յուրիի Խանզադյանի (ծնված՝ 1977 թվականի մարտի 23-ին՝ Երևան քաղաքում, ազգությամբ հայ, ՀՀ քաղաքացի, հաշվառված՝ Երևան քաղաքի Կիևյան փողոցի 3/4 շենքի 31-րդ բնակարանում, բնակվում է Երևան քաղաքի Նալբանդյան փողոցի 31-րդ շենքի 5-րդ բնակարանում, բարձրագույն կրթությամբ, ամուսնացած, աշխատում է «Պրես Ստենդ» ՍՊ ընկերությունում որպես տնօրեն, նախկինում դատապարտված չէ) նկատմամբ իրականացվող քրեական հետապնդումը՝ արարքի վաղեմության ժամկետը անցած լինելու հիմքով, դադարեցնելու հարցը։

Պ Ա Ր Զ Ե Ց

Գործի դատավարական նախապատմությունը․
02.07.2018 թվականին հարուցվել է թիվ 83160718 քրեական վարույթը։
19.11.2019 թվականին հարուցվել է թիվ 83182419 քրեական վարույթը «Դիսթրիմէքս» ՍՊ ընկերության վերաբերյալ 18.04.2003 թվականին ընդունված ՀՀ քրեական օրենսգրքի 205-րդ հոդվածի 2-րդ մասի հատկանիշներով։
21.11.2019 թվականին թիվ 83182419 քրեական վարույթը միացվել է թիվ 83165124 քրեական վարույթին։
06.08.2024 թվականին 18.04.2003թ. ընդունված Հայաստանի Հանրապետության քրեական օրենսգրքի 38-178-րդ հոդվածի 3-րդ մասի 1-ին կետով /2 դրվագ/, 190-րդ հոդվածի 3-րդ մասի 1-ին կետով /8 դրվագ/, 310-րդ հոդվածով /31 դրվագ/, 195-րդ հոդվածի 2-րդ մասի 3-րդ կետով /1 դրվագ/, 38-325-րդ հոդվածի 2-րդ մասով /1 դրվագ/, 189-րդ հոդվածի 1-ին մասով /2 դրվագ/, 38-205-րդ հոդվածի 2-րդ մասով /3 դրվագ/, 311.2 հոդվածի 4-րդ մասի 2-րդ կետով /2 դրվագ/, 312-րդ հոդվածի 3-րդ մասի 1-ին կետով /1 դրվագ/, 223-րդ հոդվածի 3-րդ մասով (համապատասխանում է ՀՀ գործող քրեական օրենսգրքի 46-255-րդ հոդվածի 3-րդ մասի 3-րդ կետին՝ 2 դրվագ, 296-րդ հոդվածի 3-րդ մասի 3-րդ կետին՝ 8 դրվագ, 442-րդ հոդվածի 1-ին մասին՝ 31 դրվագ, 284-րդ հոդվածի 3-րդ մասի 3-րդ կետին՝ 1 դրվագ, 46-457-րդ հոդվածի 2-րդ մասին՝ 1 դրվագ, 285-րդ հոդվածի 2-րդ մասի 1-ին և 3-րդ կետերին՝ 2 դրվագ, 46-290-րդ հոդվածի 3-րդ մասի 2-րդ կետին՝ 3 դրվագ, 438-րդ հոդվածի 3-րդ մասի 2-րդ կետին՝ 2 դրվագ, 436-րդ հոդվածի 3-րդ մասի 2-րդ կետին՝ 1 դրվագ և 318-րդ հոդվածի 2-րդ մասի 1-ին կետին, 319-րդ հոդվածի 1-ին մասին) նախաձեռնվել է թիվ 83153724 քրեական վարույթը։
06.08.2024 թվականին թիվ 83153724 քրեական վարույթը միացվել է թիվ 83160718 քրեական վարույթին։
01.11.2024 թվականին թիվ 83160718 քրեական վարույթից անջատվել է նոր՝ թիվ 83165124 քրեական վարույթը։
14.08.2024 թվականին որոշում է կայացվել Էդգար Յուրիի Խանզադյանի նկատմամբ 18.04.2003 թվականին ընդունված ՀՀ քրեական օրենսգրքի 205-րդ հոդվածի 2-րդ մասով հանրային քրեական հետապնդում հարուցելու մասին։
16.08.2024 թվականին մեղադրյալ Էդգար Յուրիի Խանզադյանի նկատմամբ խափանման միջոց ընտրվել է բացակայելու արգելքը։
2024 թվականի նոյեմբերի 07-ին ՀՀ գլխավոր դատախազությունից Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 83165124 նախաքննական համարով քրեական գործն ըստ մեղադրանքի Էդգար Յուրիի Խանզադյանի՝ 18.04.2003 թվականին ընդունված ՀՀ քրեական օրենսգրքի 205-րդ հոդվածի 2-րդ մասով /որը համապատասխանում է գործող ՀՀ քրեական օրենսգրքի 290-րդ հոդվածի 3-րդ մասի 2-րդ կետին/։
2024 թվականի նոյեմբերի 07-ին դատավորների միջև գործերի բաշխման էլեկտրոնային մակագրության համակարգի միջոցով թիվ ԵԴ1/3175/01/24 քրեական գործը մակագրվել է ինձ:
Գործը ինձ է հանձնվել 2024 թվականի նոյեմբերի 08-ին:
Էդգար Յուրիի Խանզադյանին մեղադրանք է առաջադրվել հանրորեն վտանգավոր այն արարքների կատարման համար որ նա «2011-2014 թվականներին հանդիսանալով «Դիսթրիմէքս» ՍՊ ընկերության տնօրենը, Միքայել Մինասյանի, Լեոնիդ Արևշատյանի և Արմեն Պետրոսյանի կազմակերպմամբ առանձնապես խոշոր չափերով հարկեր վճարելուց խուսափելու նպատակով նշված ՍՊ ընկերության հաշվետվություններում և հաշվարկներում մտցրել է խեղաթյուրված տվյալներ:
Այսպես.
Միքայել Մինասյանը, 2005 թվականի հունիսի 2-ից մինչև 2016 թվականի ապրիլ ամիսը հանդիսանալով ծխախոտային արտադրանքի` Հայաստանի Հանրապետության տարածք ներմուծման և իրացման գործունեությամբ զբաղվող «Դիսթրիմէքս» ՍՊ ընկերության միակ մասնակիցը, փաստացի ղեկավարելով ընկերության գործունեությունը, ընկերության գործունեության փաստացի պատասխանատուներ Լեոնիդ Արևշատյանի և Արմեն Պետրոսյանի հետ միասին, տիրապետելով «Դիսթրիմէքս» ՍՊ ընկերության՝ 2011-2013 թվականների ընթացքում համախառն եկամուտի և հարկվող շահույթի իրական տվյալներին, ընկերության վարձու աշխատողների վերաբերյալ տվյալներին, նրանց վճարված եկամուտներին, հանձնարարել են ընկերության տնօրեն Էդգար Խանզադյանին՝ հարկային մարմին ներկայացնել դրանց վերաբերյալ ակնհայտ խեղաթյուրված տվյալներ, խուսափել առանձնապես խոշոր չափերով հարկեր վճարելուց, և ղեկավարել են նշված հանցանքի կատարումը:
Հանցավոր մտադրությունն իրականացնելու նպատակով Էդգար Խանզադյանը խախտել է «Շահութահարկի մասին» ՀՀ օրենքի 7-րդ հոդվածի 1-ին մասի և 2-րդ մասի «ա» կետի պահանջները՝ հարկային մարմին ներկայացված՝ 2011 թվականի շահութահարկի հաշվարկով տվյալ տարվա համախառն եկամուտը ցույց է տրվել 6.639.145.657 ՀՀ դրամ (այդ թվում՝ ապրանքների իրացումից հասույթը՝ 6.525.898.975 ՀՀ դրամ): Համախառն եկամտից նվազեցումներ կատարելուց հետո տարվա հարկվող շահույթը ցույց է տրվել 359.622.219 ՀՀ դրամ, որից հաշվարկվել է 71.924.444 ՀՀ դրամ շահութահարկ: Այնինչ, ընկերության 2011-2013 թվականների հիմնական ցուցանիշների մասին հաշվետվությունում առկա տվյալներով 2011 թվականին ընկերության կողմից ծխախոտի վաճառքից (ապրանքների իրացումից) ստացված հասույթը կազմել է 6.919.208.240 ՀՀ դրամ, կամ ապրանքների իրացումից ստացված եկամուտը պակաս է ցույց տրվել 393.309.265 ՀՀ դրամի չափով (6.919.208.240 - 6.525.898.975), ինչի արդյունքում նույն չափով պակաս է ցույց տրվել 2011 թվականի համախառն եկամուտը: Արդյունքում, չի վճարվել 78.661.853 ՀՀ դրամ լրացուցիչ շահութահարկ:
Բացի այդ, հարկային մարմին ներկայացված՝ 2012 թվականի շահութահարկի հաշվարկով տվյալ տարվա համախառն եկամուտը ցույց է տրվել 6.081.608.912 ՀՀ դրամ (այդ թվում՝ ապրանքների իրացումից հասույթը՝ 5.810.601.599 ՀՀ դրամ): Համախառն եկամտից նվազեցումներ կատարելուց հետո տարվա հարկվող շահույթը ցույց է տրվել 365.709.213 ՀՀ դրամ, որից հաշվարկվել է 73.141.843 ՀՀ դրամ շահութահարկ: Այնինչ, ընկերության 2011-2013 թվականների հիմնական ցուցանիշների մասին հաշվետվությունում առկա տվյալներով 2012 թվականին ընկերության կողմից ծխախոտի վաճառքից (ապրանքների իրացումից) ստացված հասույթը կազմել է 6.232.942.229 ՀՀ դրամ, կամ ապրանքների իրացումից ստացված եկամուտը պակաս է ցույց տրվել 422.340.630 ՀՀ դրամի չափով (6.232.942.229 - 5.810.601.599), ինչի արդյունքում նույն չափով պակաս է ցույց տրվել 2012 թվականի տարվա համախառն եկամուտը: Արդյունքում՝ տվյալ տարվա հարկվող շահույթը պակաս է ցույց տրվել 422.340.630 ՀՀ դրամի չափով և չի վճարվել 84.468.126 ՀՀ դրամ լրացուցիչ շահութահարկ:
Բացի այդ, Էդգար Խանզադյանը և Արմեն Պետրոսյանը խախտել են «Եկամտային հարկի մասին» ՀՀ օրենքի 12-րդ հոդվածի 1-ին մասի ու նույն օրենքի 25-րդ հոդվածի 5-րդ մասի «ա» կետի պահանջները, 2013-2014 թվականների ընթացքում ընկերության «Եկամտային հարկի և սոցիալական վճարի ամսական» ամփոփ հաշվարկներում մտցվել են խեղաթյուրված տվյալներ՝ եկամտային հարկի գումարները հաշվարկվել են պակաս և երկու աշխատակիցների աշխատանքի ընդունումը ՀՀ օրենսդրությամբ սահմանված կարգով գրավոր չի ձևակերպվել, ինչի արդյունքում չի վճարվել առանձնապես խոշոր չափերով հարկ: Մասնավորապես, ընկերության 22 առաքիչների միջին ամսական ընդհանուր աշխատավարձը կազմել է 2013 թվականին՝ 8.630.129 ՀՀ դրամ և 2014 թվականին՝ 8.460.124 ՀՀ դրամ, կամ տարվա կտրվածքով նրանց հաշվեգրված եկամուտները կազմել են համապատասխանաբար 102.239.392 ՀՀ դրամ և 95.000.190 ՀՀ դրամ, այնինչ նույն տարիների համար հարկային մարմին ներկայացված եկամտային հարկի ամսական հաշվարկներով նույն առաքիչներից 20-ի համար հաշվեգրված միջին ամսական ընդհանուր աշխատավարձը կազմել է 2013 թվականին՝ 1.585.551 ՀՀ դրամ և 2014 թվականին՝ 1.933.985 ՀՀ դրամ, կամ տարվա կտրվածքով նրանց հաշվեգրված եկամուտները կազմել են համապատասխանաբար՝ 18.695.213 ՀՀ դրամ և 21.274.645 ՀՀ դրամ: Այսինքն՝ ընկերությունը վարձու աշխատողներին վճարված եկամուտները թերհայտարարագրել է համապատասխանաբար 83.544.179 ՀՀ դրամի և 73.725.545 ՀՀ դրամի չափով: Թերհայտարարագրված եկամուտներից «Եկամտային հարկի մասին» ՀՀ օրենքի 10-րդ հոդվածի 1-ին մասի 1-ին կետի համաձայն՝ 2013 թվականի համար Էդգար Խանզադյանի կողմից չի վճարվել 21.521.410 ՀՀ դրամ, իսկ Արմեն Պետրոսյանի կողմից 2014 թվականի համար՝ 19.040.556 ՀՀ դրամ լրացուցիչ եկամտային հարկ: Միաժամանակ, ընկերության վարձու աշխատողներից երկուսի՝ Գևորգ Տերզիկյանի և Աննա Իսրաելյանի աշխատանքի ընդունումը ՀՀ օրենսդրությամբ սահմանված կարգով ընկերության կողմից չի ձևակերպվել, որոնք 2013 և 2014 թվականներին աշխատել են ընկերությունում որպես առաքիչ, ինչի համար նույն օրենքի 25-րդ հոդվածի 5-րդ մասով սահմանված կարգով չի վճարվել 120.000 ՀՀ դրամ եկամտային հարկ:
Արդյունքում, Միքայել Մինասյանի, Լեոնիդ Արևշատյանի և Արմեն Պետրոսյանի կազմակերպմամբ, օրենսդրությամբ նախատեսված հաշվետվություններում և հաշվարկներում ակնհայտ խեղաթյուրված տվյալներ մտցնելու միջոցով, «Դիսթրիմէքս» ՍՊ ընկերության տնօրեն Էդգար Խանզադյանը խուսափել է առանձնապես խոշոր չափերով՝ ընդհանուր 163.129.979 ՀՀ դրամ շահութահարկ, 21.521.410 ՀՀ դրամ և 120.000 ՀՀ դրամ եկամտային հարկ վճարելուց:
Այսպիսով, Էդգար Յուրիի Խանզադյանին մեղսագրվում է 18.04.2003 թվականին ընդունված ՀՀ քրեական օրենսգրքի 205-րդ հոդվածի 2-րդ մասով նախատեսված հանցանքի կատարում, որը համապատասխանում է գործող ՀՀ քրեական օրենսգրքի 290-րդ հոդվածի 3-րդ մասի 2-րդ կետով նախատեսված հանցանքին»։
2025 թվականի մայիսի 15-ին մեղադրյալ Էդգար Յուրիի Խանզադյանի նկատմամբ նախաքննության ընթացքում ընտրված բացակայելու արգելք խափանման միջոցը փոփոխվել է և որպես խափանման միջոց է կիրառվել գրավ 11.000.000 ՀՀ դրամի չափով։
2025 թվականի սեպտեմբերի 16-ին դատական նիստի ընթացքում մեղադրյալը միջնորդեց իր նկատմամբ իրականացվող քրեական հետապնդումը դադարեցնել ոչ արդարացնող հիմք հանդիսացող՝ արաքի վաղեմության ժամկետը անցած լինելու հիմքով, թեպետ մեղադրյալը հայտնեց, որ մեղքը չի ընդունում, սակայն միջնորդում է քրեական հետապնդումը վկայակոչված հիմքով դադարեցնել:
Պաշտպանը միացավ իր պաշտպանյալի միջնորդությանը:
Հանրային մեղադրողը չառարկեց միջնորդության դեմ:
Հետազոտվեց Էդգար Խանզադյանի դատվածության վերաբերյալ Ձև8 տեղեկանքը, ըստ որի առկա չէ որևէ արարքի համար դատապարտված լինելու վերաբերյալ տեղեկատվություն:

Դատարանի իրավական վերլուծությունները.
Քննարկելով մեղադրյալի նկատմամբ քրեական հետապնդումը հանցանքը կատարելու վաղեմության ժամկետը անցած լինելու հիմքով դադարեցնելու միջնորդությունը Դատարանը արձանագրում է.
01.07.2022 թվականին ընդունված ՀՀ քրեական օրենսգրքի 9-րդ հոդվածը սահմանում է, որ՝ «1. Արարքի հանցավորությունը սահմանող, պատիժը խստացնող կամ հանցանք կամ քրեական օրենսդրությամբ նախատեսված արարք կատարած անձի վիճակն այլ կերպ վատթարացնող օրենսդրությունը հետադարձ ուժ չունի»:Դատարանը արձանագրում է, որ գործող օրենսդրությունը ի համեմատ նախկինի անձի վիճակը վատթարացնող է վաղեմության ժամկետի ինստիտուտի առումով, հետևաբար սույն պարագայում պետք է հաշվի առնվի արարքը կատարելու պահին գործող օրենսդրությունը։
18.04.2003 թվականին ընդունված ՀՀ քրեական օրենսգրքի 19-րդ հոդվածի 3-րդ մասի համաձայն` «4. Ծանր հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում տասը տարի ժամկետով ազատազրկումը:»:
18.04.2003 թվականին ընդունված ՀՀ քրեական օրենսգրքի 75-րդ հոդվածը նախատեսում է, որ /․․․/1. Անձն ազատվում է քրեական պատասխանատվությունից, եթե հանցանքն ավարտված համարելու օրվանից անցել են հետևյալ ժամկետները.
/.../3) տասը տարի՝ ծանր հանցանքն ավարտված համարելու օրվանից../․․․/։
Գործող ՀՀ քրեական օրենսգրքի 83-րդ հոդվածի 1-ին մասը նախատեսում է, որ /…/1. Անձն ազատվում է քրեական պատասխանատվությունից, եթե հանցանքն ավարտվելուն հաջորդող օրվանից անցել են հետևյալ ժամկետները.
1) 5 տարի՝ ոչ մեծ ծանրության հանցանքի դեպքում.
2) 10 տարի՝ միջին ծանրության հանցանքի դեպքում.
3) 15 տարի՝ ծանր հանցանքի դեպքում.
4) 20 տարի՝ առանձնապես ծանր հանցանքի դեպքում: /…/:
Սույն պարագայում արձանագրվում է, որ արարքը կատարելու պահին գործող ՀՀ քրեական օրենսգիրքը վաղեմության ժամկետների առումով նախատեսում է ավելի բարելավող պայման, ուստի անձի նկատմամբ կիրառելի է հանցանք կատարելու պահին գործող կարգավորումները:
2003 թվականի ապրիլի 18-ին ընդունված ՀՀ քրեական օրենսգրքի 205-րդ հոդվածի 2-րդ մասի համաձայն` «2. Նույն արարքը, որը կատարվել է առանձնապես խոշոր չափերով՝ պատժվում է ազատազրկմամբ՝ հինգից տասը տարի ժամկետով՝ գույքի բռնագրավմամբ:»:
2022 թվականի հուլիսի 1-ին ուժի մեջ մտած ՀՀ քրեական դատավարության օրենսգրքի 12-րդ հոդվածի համաձայն` «1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե` (...)12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից.(...)»:
2022 թվականի հուլիսի 1-ին ուժի մեջ մտած ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետի համաձայն՝ «1. Քրեական վարույթը ենթակա է կարճման, եթե`(...) 3) կայացվել է անձի նկատմամբ քրեական հետապնդում չհարուցելու կամ մեղադրյալի նկատմամբ քրեական հետապնդումը դադարեցնելու մասին որոշում, և սպառվել են վարույթը շարունակելու բոլոր հնարավորությունները(...)»:.
Մեջբերված նորմերի վերլուծությունից հետևում է, որ օրենսդիրը վաղեմության ժամկետն անցնելը դիտում է որպես քրեական հետապնդումը բացառող հանգամանք` սահմանելով, որ քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե անցել են վաղեմության ժամկետները։
Միակ բացառություն օրենսդիրը դիտարկում է մեղադրյալի կամահայտնությունը քրեական գործի քննությունը շարունակելու առումով, մասնավորապես, եթե մեղադրյալը առարկի իր նկատմամբ իրականացվող քրեական հետապնդումը դադարեցնելու դեմ այն հիմնավորմամբ, որ չի կատարել իրեն մեղսագրվող արարքը:Նշված բացառությունը Դատարանի կարծիքով նախատեսվել է որպիսի հնարավորություն տրվի մեղադրյալին ապացուցել իր անմեղությունը, իսկ եթե մեղադրյալը չի առարկում իր նկատմամբ իրականացվող քրեկան հետապնդումը դադարեցնելու դեմ, թեպետ չնդունելով իր մեղքը, Դատարանի կարծիքով այս հանգամանքը չի կարող համարվել խոչնդոտ անձի նկատմամբ իրականացվող քրեկան հետապնդումը դադարեցնելու համար, քանի որ փաստացի անձը հրաժարվում է իր անմեղությունը ապացուցելու իրավունքից և հենց ինքն է միջնորդում իր նկատմամբ իրականացվող քրեական հետապնդումը դադարեցնել:
Հետևաբար սույն պարագայում Դատարանը չի դիտարկում վկայակոչված նորմի կիրառմամբ Է.Խանզադյանի նկատմամբ իրականացվող քրեական հետապնդումը դադարեցնելու հարցը քննարկելու արգելք:
Սույն գործի նյութերի ուսումնասիրությունից երևում է, որ 2003 թվականի ապրիլի 18-ին ընդունված ՀՀ քրեական օրենսգրքի 205-րդ հոդվածի 2-րդ մասով նախատեսված արարքը կատարվել է 2011-2013 թվականների ընթացքում:
Արձանագրվում է, որ բացակայում են այն սահմանափակումները, որոնք կարող են արգելք հանդիսանալ վաղեմության ժամկետներն անցնելու հիմքով անձին քրեական պատասխանատվությունից ազատելու համար, մեղադրյալն է պաշտպանի հետ միասին միջնորդել իր նկատմամբ իրականացվող քրեական հետապնդումը դադարեցնել՝ ոչ արդարացնող հիմքերից՝ վաղեմության ժամկետը անցնելու հիմքով:
Էդգար Խանզադյանին 2003 թվականի ապրիլի 18-ին ընդունված ՀՀ քրեական օրենսգրքի 205-րդ հոդվածի 2-րդ մասով մեղսագրված արարքի՝ որպես ծանր հանցանքի համար նույն օրենսգրքի 75-րդ հոդվածի 1-ին մասի 3-րդ կետով նախատեսված քրեական պատասխանատվության ենթարկելու 10 ամյա վաղեմության ժամկետը լրանալու օրվա դրությամբ վաղեմության ժամկետը ընդհատված չի եղել (հիմք Ձև8 տեղեկանք), ուստի նրա նկատմամբ ՀՀ քրեական օրենսգրքի 205-րդ հոդվածի 2-րդ մասի քրեական հետապնդումը պետք է դադարեցնել՝ քրեական պատասխանատվության ենթարկելու վաղեմության ժամկետն անցած լինելու պատճառաբանությամբ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 12-րդ, 13-րդ հոդվածներով, ՀՀ քրեական օրենսգրքի 9-րդ, 83-րդ հոդվածներով` Դատարանը

Ո Ր Ո Շ Ե Ց

1.Թիվ ԵԴ1/3175/01/24 քրեական գործով մեղադրյալ Էդգար Յուրիի Խանզադյանի նկատմամբ 18.04.2003 թվականին ընդունված ՀՀ քրեական օրենսգրքի 205-րդ հոդվածի 2-րդ մասով /որը համապատասխանում է գործող ՀՀ քրեական օրենսգրքի 290-րդ հոդվածի 3-րդ մասի 2-րդ կետին/ իրականացվող քրեական հետապնդումը դադարեցնել՝ հանցանքի վաղեմության ժամկետներն անցնելու հիմքով։
2.Թիվ ԵԴ1/3175/01/24 քրեական գործով վարույթը կարճել՝ ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետի հիմքով:
3․Որոշումը օրինական ուժի մեջ մտնելուց հետո մեղադրյալ Էդգար Խանզադյանի նկատմամբ ընտրված խափանման միջոց 11․000․000 ՀՀ դրամ գրավը վերադարձնել այն մուծած անձին։
4.Ներկայացված գույքային հայցը թողնել առանց լուծման:
5․Որոշումը կարող է բողոքարկվել Հայաստանի Հանրապետության վերաքննիչ քրեական դատարան` ստանալու օրվանից մեկամսյա ժամկետում:



ԴԱՏԱՎՈՐ՝ ՄՈՒՇԵՂ ԱՐԱՄՅԱՆ