ԵԴ1/3052/01/24


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«4» Դեկտեմբերի 2024թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԴԱՎԻԹ ՄԱՐԳԱՐՅԱՆԻ
մեղադրյալ՝ ՀԱՅԿ ՂԱԶԱՐՅԱՆԻ
պաշտպան՝ ՎԱՀԱԳՆ ՔԵՇԻՇՅԱՆԻ
դռնբաց դատական նիստում արագացված վարույթի կարգով քննելով Հայկ Հենրիկի Ղազարյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 1-ին մասով.







1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60-0351-24 քրեական վարույթով Հայկ Հենրիկի Ղազարյանին ՀՀ քրեական օրենսգրքի 344 հոդվածի 1-ին մասով մեղադրանք է ներկայացվել հետևյալ արարքի համար.
«ՀՀ ոստիկանության «Ճանապարհային ոստիկանություն» ծառայության կողմից 2023 թվականի մարտի 31-ին կայացված վարչական տույժ նշանակելու մասին թիվ 2316163791 որոշմամբ Հայկ Հենրիկի Ղազարյանի տրանսպորտային միջոցներ վարելու իրավունքը կասեցվել է 6 (վեց) ամիս ժամանակով՝ սկսած 2023 թվականի ապրիլի 28-ից մինչև 2023 թվականի հոկտեմբերի 28-ը, որի մասին վերջինս ծանուցվել է ինչպես փոստային առաքմամբ, այնպես էլ 2023 թվականի մայիսի 18-ին կազմված վարչական իրավախախտման վերաբերյալ թիվ 8180299467 արձանագրության միջոցով: Տեղյակ լինելով, որ իր տրանսպորտային միջոցներ վարելու իրավունքը կասեցված է, Հայկ Հենրիկի Ղազարյանը, կասեցման ժամկետը դեռ չլրացած, 2023 թվականի հունիսի 2-ին՝ ժամը 23:10-ի սահմաններում, Երևան քաղաքի Պռոշյան փողոցում վարել է «Ինֆինիտի» մակնիշի 30 BB 035 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկ Հակոբ Բադալյանի կողմից նույն օրը՝ ժամը 23:16-ին, կազմվել է վարչական իրավախախտման վերաբերյալ թիվ 8180252892 արձանագրությունը»։
2. ԱՐԱԳԱՑՎԱԾ ՎԱՐՈՒՅԹԸ.
2.1 Նախնական դատալսումների ընթացքում մեղադրյալ Հայկ Հենրիկի Ղազարյանը ներկայացրեց արագացված վարույթ կիրառելու միջնորդություն՝ հայտնելով, որ ներկայացված մեղադրանքն իրեն պարզ է, համաձայն է մեղադրանքի հետ, պնդում է արագացված վարույթ կիրառելու մասին միջնորդությունը, այն ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ և գիտակցում է արագացված վարույթ կիրառելու հետևանքները:
2.2 Հանրային մեղադրող Դավիթ Մարգարյանը չառարկեց արագացված վարույթ կիրառելու դեմ:
2.3 Դատարանը, համոզվելով, որ առկա է ՀՀ քրեական դատավարության օրենսգրքի 464.1 հոդվածի 1-ին մասով նախատեսված հիմքը և բացակայում են նույն հոդվածի 2-րդ մասով նախատեսված՝ արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց քրեական գործով լրացուցիչ դատալսումներ անցկացնելու մասին։
3. ԼՐԱՑՈՒՑԻՉ ԴԱՏԱԼՍՈՒՄՆԵՐԻ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ ԵՎ ՔՆՆԱՐԿՄԱՆ ԵՆԹԱԿԱ ՀԱՐՑԵՐԻ ՎԵՐԱԲԵՐՅԱԼ ԿՈՂՄԵՐԻ ԲԱՑԱՏՐՈՒԹՅՈՒՆՆԵՐԸ.
3.1 Դատվածությունների և հետախուզման առկայության Ձև 8 հարցման պատասխանի 4 կետի և թիվ ԵԴ/0424/01/23 քրեական գործի վերաբերյալ «DataLex» դատական տեղեկատվական համակարգում առկա տվյալների համաձայն՝
-Հայկ Հենրիկի Ղազարյանը թիվ ԵԴ/0424/01/23 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2023 թվականի մարտի 20-ի դատավճռով մեղավոր է ճանաչվել 2003 թվականի ապրիլի 18-ին ընդունված ՀՀ քրեական օրենսգրքի 243.1 հոդվածի 1-ին մասով նախատեսված հանցանքը կատարելու մեջ և նրա նկատմամբ պատիժ է նշանակվել տուգանք՝ 200.000 ՀՀ դրամի չափով:
-Որպես դատավճռի կատարման ամսաթիվ նշված է 2023 թվականի մայիսի 31-ը, իսկ տուգանքի վճարման ամսաթիվ՝ 2024 թվականի հունվարի 12-ը։
3.2 ՀՀ արդարադատության նախարարության պրոբացիայի ծառայության փաստաթղթաշրջանառության և հաշվառման բաժնի պետի 2024 թվականի նոյեմբերի 15-ի թիվ 29.1.4/49017-2024 գրության և դրան կից տեղեկանքի համաձայն՝
-Հայկ Հենրիկի Ղազարյանի վերաբերյալ թիվ ԱՐԱԴ2/0022/01/23 քրեական գործով դատավճիռն օրինական ուժի մեջ է մտել 2024 թվականի մայիսի 5-ին։
-Հայկ Ղազարյանը 2024 թվականի մայիսի 31-ին հաշվառվել է ՀՀ ԱՆ պրոբացիայի ծառայության Երևանի քաղաքային մարմնում և 2024 թվականի նոյեմբերի 15-ի դրությամբ թիվ ԱՐԱԴ2/0022/01/23 դատավճռով նշանակված 450.000 (չորս հարյուր հիսուն հազար) ՀՀ դրամ տուգանքից կատարել է ընդհանուր 75.000 (յոթանասունհինգ հազար) ՀՀ դրամի չափով վճարում:
-2024 թվականի սեպտեմբերի 6-ին տուգանքի չափին համարժեք գույք բռնագանձելու մասին միջնորդություն է ներկայացվել Երևան քաղաքի առաջին ատյանի ընդհանուր իրավասության քրեական դատարան:
-Թիվ ԵԴ1/0770/15/24 դատական վարույթով 2024 թվականի սեպտեմբերի 26-ին Երևան քաղաքի առաջին ատյանի ընդհանուր իրավասության քրեական դատարանը որոշել է Հայկ Հենրիկի Ղազարյանից բռնագանձել թիվ ԱՐԱԴ2/0022/01/23 քրեական գործով նշանակված 450.000 (չորս հարյուր հիսուն հազար) ՀՀ դրամ տուգանքի չվճարած մասի՝ 375.000 (երեք հարյուր յոթանասունհինգ հազար) ՀՀ դրամի չափին համարժեք գույք:
-Թիվ ԵԴ1/0770/15/24 դատական վարույթով Երևան քաղաքի առաջին ատյանի ընդհանուր իրավասության քրեական դատարանի որոշման հիման վրա տրված կատարողական թերթը 2024 թվականի հոկտեմբերի 22-ին ուղարկվել է ՀՀ ԱՆ հարկադիր կատարումն ապահովող ծառայություն, որտեղ 2024 թվականի հոկտեմբերի 24-ին հարուցվել է կատարողական վարույթ:
3.3 ՀՀ քաղաքացիական կացության ակտերի գրանցման տվյալների շտեմարանում միասնական էլեկտրոնային տեղեկատվական համակարգի միջոցով կատարված հարցմանն ի պատասխան ստացվել է ամուսնության պետական գրանցման թիվ 399 ակտը, համաձայն որի Հայկ Հենրիկի Ղազարյանը և Թեհմինե Մկրտչի Ջիլավյանն ամուսնացած են։
3.4 Թիվ ԱԲ 137600 ծննդյան վկայականի համաձայն՝ 2007 թվականի հունվարի 18-ին ծնված Սյուզաննա Հայկի Ղազարյանի հայրն է Հայկ Հենրիկի Ղազարյանը:
3.5 Թիվ ԱԲ 137351 ծննդյան վկայականի համաձայն՝ 2011 թվականի մայիսի 16-ին ծնված Հենրիկ Հայկի Ղազարյանի հայրն է Հայկ Հենրիկի Ղազարյանը:
3.6 Թիվ ԱԲ 624869 ծննդյան վկայականի համաձայն՝ 2018 թվականի ապրիլի 18-ին ծնված Ադրիանա Հայկի Ղազարյանի հայրն է Հայկ Հենրիկի Ղազարյանը:
3.7 ՀՀ պետական եկամուտների կոմիտեի հարկ վճարողների սպասարկման վարչությունից 2024 թվականի նոյեմբերի 8-ին ստացված գրության համաձայն՝ Հայկ Հենրիկի Ղազարյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Հայկ Հենրիկի Ղազարյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ։(2)
3.8 Պատժի վերաբերյալ հարցերը քննարկելիս հանրային մեղադրողը դատարանին խնդրեց Հայկ Հենրիկի Ղազարյանի նկատմամբ որպես պատիժ նշանակել հանցանքը կատարելու պահին նվազագույն աշխատավարձի վեցապատիկի չափով տուգանք:
3.9 Պաշտպանը Դատարանին խնդրեց Հայկ Հենրիկի Ղազարյանի նկատմամբ որպես պատիժ նշանակել հնգապատիկի չափով տուգանք՝ այն վճարելու համար սահմանելով 1 տարի ժամկետ։
3.10 Պատասխանելով Դատարանի հարցերին՝ մեղադրյալը հայտնեց, որ չի ցանկանում կատարել հանրային աշխատանքներ, ընդունվել է մշտական աշխատանքի և տուգանքի ձևով պատիժ նշանակելու դեպքում 1 տարվա ընթացքում հնարավորություն կունենա վճարել տուգանքը։
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐԸ ԵՎ ՈՐՈՇՈՒՄՆԵՐԸ.
4.1 Արագացված վարույթ կիրառելու պայմաններում վերագրվող փաստական հանգամանքները (արարքները), այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, սահմանելով, որ մեղադրյալի կատարած արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 1-ին մասը:
4.2 Հաստատված փաստական հանգամանքների հիման վրա Դատարանն արձանագրում է, որ Հայկ Հենրիկի Ղազարյանի պատասխանատվությունն ու պատիժը մեղմացնող ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքին երեք անչափահաս երեխաների առկայությունը։
Հայկ Ղազարյանի պատասխանատվությունն ու պատիժը մեղմացնող հանգամանք պետք է դիտել նաև ներկայացված մեղադրանքում իրեն լիովին մեղավոր ճանաչելը և կատարածի համար զղջալը, քանի որ մեղքն ընդունելը, կատարածի համար զղջալը, որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել է դրա համար:
Նկատի ունենալով, որ թիվ ԵԴ/0424/01/23 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2023 թվականի մարտի 20-ի դատավճիռը կատարման է ուղարկվել 2023 թվականի մայիսի 31-ին, և այդ դատավճռով հաստատված հանցանքի համար ազատությունից զրկելու հետ չկապված պատիժը (տուգանքը) Հայկ Հենրիկի Ղազարյանը կատարել է 2024 թվականի հունվարի 12-ին, Դատարանն արձանագրում է, որ ՀՀ քրեական օրենսգրքի 93 հոդվածի 5-րդ մասի 2-րդ կետի ուժով նշված հանցանքի համար նրա դատվածությունը մարվել է հենց այդ օրը, հետևաբար սույն դատավճռով հաստատված 2023 թվականի հունիսի 2-ի հանցանքը Հայկ Հենրիկի Ղազարյանը կատարել է դատվածություն ունենալու պայմաններում։ Այսինքն՝ առկա է Հայկ Հենրիկի Ղազարյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածի 1-ին մասի 1-ին կետով նախատեսված հանգամանքը:
4.3 Կատարած հանցանքի համար մեղադրյալ Հայկ Հենրիկի Ղազարյանը ենթակա է պատժի։
4.4 Պատժի տեսակն ու չափը որոշելիս Դատարանը, հաշվի է առնում հետևյալը՝
-Հայկ Հենրիկի Ղազարյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին,
-Հայկ Հենրիկի Ղազարյանի անձը բնութագրող տվյալները, պատասխանատվությունը և պատիժը մեղմացնող և ծանրացնող հանգամանքները, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Հայկ Հենրիկի Ղազարյանի կողմից կատարված հանցագործության բնույթին, վտանգավորության աստիճանին, այն կատարելու հանգամանքներին, ինչպես նաև հանցավորի անձին համաչափ պատիժ է վեցապատիկի չափով տուգանքը։
Հիմք ընդունելով ՀՀ քրեական օրենսգրքի 59 հոդվածի 5-րդ մասը, և հաշվի առնելով, մեղսագրվող հանցանքն ավարտվելու օրվան նախորդող 12 ամիսների ընթացքում Հայկ Հենրիկի Ղազարյանի եկամտի բացակայության վերաբերյալ դատավճռի 3.7 կետում նշված տվյալը՝ տուգանքի չափը պետք է հաշվարկել հանցանքը կատարելու պահին՝ 2023 թվականի հունիսի 2-ին, ՀՀ նվազագույն աշխատավարձի՝ 75.000 (յոթանասունհինգ հազար) ՀՀ դրամի չափով:
• Այսպիսով, ՀՀ քրեական օրենսգրքի 344 հոդվածի 1-րդ մասով նախատեսված հանցանքը կատարելու համար Հայկ Հենրիկի Ղազարյանի նկատմամբ որպես պատիժ պետք է նշանակել տուգանք՝ հանցանքը կատարելու պահին նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով։
• Միևնույն ժամանակ Դատարանն արձանագրում է, որ կատարած հանցանքի համար Հայկ Հենրիկի Ղազարյանի նկատմամբ լրացուցիչ պատիժ նշանակելու հիմքերն ու անհրաժեշտությունը տվյալ դեպքում բացակայում են։
4.5 Անդրադառնալով սույն քրեական գործով ՀՀ քրեական օրենսգրքի 75 հոդվածի կիրառման հնարավորությանը՝ Դատարանը գտնում է, որ նշված հոդվածի կանոններով Հայկ Հենրիկի Ղազարյանի նկատմամբ սույն դատավճռով նշանակված պատժին թիվ ԱՐԱԴ2/0022/01/23 քրեական գործով նշանակված պատիժը լրիվ կամ մասնակիորեն գումարելը բացասաբար կանդրադառնա այդ քրեական գործով տուգանքի ձևով նշանակված պատժի կատարման վրա, քանի որ այն արդեն իսկ գտնվում է կատարման մեկ այլ՝ «տուգանքի բռնագանձման» փուլում, իսկ պատիժները գումարելն անխուսափելիորեն կհանգեցնի այդ գործընթացի կասեցմանը։
Վերոգրյալի պայմաններում Դատարանը գտնում է, որ սույն քրեական գործով պատիժ նշանակելիս պետք է չկիրառել ՀՀ քրեական օրենսգրքի 75 հոդվածի 1-ին մասը և սույն դատավճռով նշանակվող պատժին պետք է չգումարել թիվ ԱՐԱԴ2/0022/01/23 քրեական գործով Հայկ Հենրիկի Ղազարյանի նկատմամբ տուգանքի ձևով նշանակված պատիժը:
4.6 Հայկ Հենրիկի Ղազարյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.7 Հիմք ընդունելով ՀՀ քրեական օրենսգրքի 59 հոդվածի 8-րդ մասը, հաշվի առնելով մեղադրյալ Հայկ Ղազարյանի եկամտի բացակայության վերաբերյալ տվյալը, ինչպես նաև տուգանքի վճարման համար ժամկետ սահմանելու մասին պաշտպանի և մեղադրյալի խնդրանքը՝ Դատարանը գտնում է, որ նշանակված տուգանքի վճարման ժամկետ պետք է սահմանել առավելագույնը՝ 1 (մեկ) տարի:
4.8 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է:
4.9 Հայկ Հենրիկի Ղազարյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար:
4.10 Վարութային ծախսերի հարցը պետք է համարել լուծված, քանի որ ՀՀ քրեական դատավարության օրենսգրքի 464.4 հոդվածի 3-րդ մասի համաձայն՝ արագացված վարույթ կիրառելու դեպքում ՀՀ քրեական դատավարության օրենսգրքի 167 հոդվածի 1-ին մաuով նախատեսված վարութային ծախսերը մեղադրյալից ենթակա չեն բռնագանձման։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 276, 347, 348, 349, 464.4 և 464.5 հոդվածներով՝ Դատարանը

Վ Ճ Ռ Ե Ց

1. Հայկ Հենրիկի Ղազարյանին մեղավոր ճանաչել ՀՀ քրեական օրենսգրքի 344 հոդվածի 1-ին մասով նախատեսված հանցանքը կատարելու մեջ և նրա նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով։
2. Տուգանքի վճարման ժամկետ սահմանել առավելագույնը՝ 1 (մեկ) տարի:
3. Հայկ Ղազարյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
4. Վարութային ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում, սակայն չի կարող բողոքարկվել ՀՀ քրեական դատավարության օրենսգրքի 373 հոդվածով և 375 հոդվածի 1-3-րդ մասերով նախատեսված հիմքերով:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ



(1)Ծնված՝ 1985 թվականի սեպտեմբերի 28-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երեք անչափահաս երեխա, թիվ ԱԴԱԴ2/0022/01/23 քրեական գործով դատապարտյալ, հաշվառված է և բնակվում է Երևան քաղաքի Սերո Խանզադյան փողոցի թիվ 56 տանը, որպես խափանման միջոց է կիրառված բացակայելու արգելքը:
(2)3.1-3.7 կետերի վերաբերյալ տե՛ս Դատարանում ստեղծված, ինչպես նաև Դատարանին տրամադրված նյութերը: