ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«20» դեկտեմբերի 2024թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Նազիկ Աթոյանի,
Ագնետա Հակոբյանի,

մասնակցությամբ`
հանրային մեղադրող՝ Տիգրան Պողոսյանի,
պաշտպան՝ Համբարձում Հարությունյանի,
մեղադրյալ՝ Արևիկ Վարդանյանի,

դռնբաց դատական նիստում, համաձայնեցման վարույթի կարգով քննելով քրեական գործն ըստ մեղադրանքի`
Արևիկ Մարտինի Վարդանյանի՝
ծնված՝ 05.11.1981թ. Երևան քաղաքում, ազգությամբ հայ, Հայաստանի Հանրապետության քաղաքացի, բարձրագույն կրթությամբ, չամուսնացած, չի աշխատում, նախկինում չդատված, հաշվառված է՝ Երևան քաղաքի Բաշինջաղյան փակուղի թիվ 8 տանը, բնակվում է Երևան քաղաքի Շահումյան 5-րդ փողոցի 6/1 տանը ՀՀ քրեական օրենսգրքի 299-րդ հոդվածի 1-ին մասով,

ՊԱՐԶԵՑ

1. Քրեական գործի դատավարական նախապատմությունը.
2023 թվականի մարտի 29-ին ՀՀ քննչական կոմիտեի ՀԿԳ քննության գլխավոր վարչության մարդկանց թրաֆիքինգի, անչափահասների սեռական անձեռնմխելիության դեմ ուղղված և թմրամիջոցների ապօրինի շրջանառության հանցագործությունների քննության բաժնում ՀՀ քրեական օրենսգրքի 299-րդ հոդվածի 1-ին մասով նախաձեռնվել է թիվ 69108923 քրեական վարույթը, որը միացվել է թիվ 69101323 քրեական վարույթին։
2024 թվականի հոկտեմբերի 10-ին ՀՀ գլխավոր դատախազության մարդու դեմ ուղղված հանցագործությունների գործերով վարչության դատախազ Տիգրան Պողոսյանի որոշմամբ՝ թիվ 69101323 քրեական վարույթով Արևիկ Մարտինի Վարդանյանի նկատմամբ ՀՀ քրեական օրենսգրքի 299-րդ հոդվածի 1-ին մասով հարուցվել է հանրային քրեական հետապնդում:
2024 թվականի հոկտեմբերի 31-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/3059/01/24 քրեական գործն ըստ մեղադրանքի՝ Արևիկ Մարտինի Վարդանյանի՝ ՀՀ քրեական օրենսգրքի 299-րդ հոդվածի 1-ին մասով: Նույն օրը քրեական գործն էլեկտրոնային եղանակով մակագրվել և 2024 թվականի նոյեմբերի 01-ին հանձնվել է դատավոր Տաթևիկ Մուրադյանին:
2024 թվականի նոյեմբերի 04-ին Դատարանի կողմից որոշում է կայացվել թիվ ԵԴ1/3059/01/24 քրեական գործով վարույթ ստանձնելու և նախնական դատալսումներ նշանակելու մասին։
2024 թվականի դեկտեմբերի 10-ին թիվ ԵԴ1/3059/01/24 քրեական գործով նախնական դատալսումների ընթացքում Դատարանը որոշել է մեղադրյալ Արևիկ Մարտինի Վարդանյանի նկատմամբ մինչդատական վարույթում կիրառված խափանման միջոցը՝ բացակայելու արգելքը, թողնել անփոփոխ։

2. Մեղադրանքի փաստական նկարագրությունը.
Արևիկ Մարտինի Վարդանյանին մեղադրանք է ներկայացվել ՀՀ քրեական օրենսգրքի 299-րդ հոդվածի 1-ին մասով` այն բանի համար, որ «նա, տեղյակ լինելով Լիանա Սամվելի Նիկողոսյանի կողմից պոռնկությամբ զբաղվելու մասին, 2022 թվականի նոյեմբերից մինչև 2023 թվականի հունվարը իր կողմից փաստացի շահագործվող՝ Բագրատունյանց 43 հասցեում գործող «Սև քար» կոչվող հանրային հաստատությունում գործող հյուրանոցային համարները պոռնկությամբ զբաղվելու համար ժամավճարով պարբերաբար տրամադրել է Լիանա Սամվելի Նիկողոսյանին:»:

3. Համաձայնեցման վարույթը.
Նախնական դատալսումների ընթացքում մեղադրյալ Արևիկ Մարտինի Վարդանյանը և պաշտպան Համբարձում Հարությունյանը ներկայացրին համաձայնեցման վարույթ կիրառելու մասին միջնորդություն՝ մեղադրյալ Արևիկ Մարտինի Վարդանյանը հայտնեց, որ ամբողջությամբ համաձայն է իրեն մեղսագրվող արարքին, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է համաձայնեցման վարույթ կիրառելու բնույթը և հետևանքները:
Հանրային մեղադրող Տիգրան Պողոսյանը հայտնեց, որ չի առարկում համաձայնեցման վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 458-րդ հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 458-րդ հոդվածի 2-րդ մասով նախատեսված` համաձայնեցման վարույթի կիրառումը բացառող հանգամանքները, բավարարեց համաձայնեցման վարույթ կիրառելու մասին միջնորդությունը և ժամկետ սահմանեց կողմերի բանակցությունների համար։
Բանակցությունների արդյունքում կողմերը կազմել և Դատարանին են ներկայացրել համաձայնության մասին արձանագրություն՝ հետևյալ բովանդակությամբ.
 ԱՐՁԱՆԱԳՐՈՒԹՅՈՒՆ
ՀՀ քրեական դատավարության օրենսգրքի 460-րդ հոդվածով սահմանված
կարգով համաձայնության գալու վերաբերյալ
Սույն արձանագրությունը կազմվել է 2024 թվականի դեկտեմբերի 20-ին Երևան քաղաքի առաջին ատյանի ընդհանուր իրավասության քրեական դատարանում
/ք. Երևան, Նազարբեկյան թաղամաս 40/
մասնակցությամբ՝ ՀՀ գլխավոր դատախազության մարդու դեմ ուղղված հանցագործությունների գործերով վարչության ավագ դատախազ՝ Տիգրան Պողոսյանի, ամբաստանյալ Արևիկ Մարտինի Վարդանյանի (ծնված` 05․11․1981թ․ ք․Երևան, հայ, ՀՀ քաղաքացի, չդատված, միջնակարգ կրթություն, չի աշխատում, ամուսնացած չէ, խնամքին անձ չկա, մայրենի լեզուն հայերեն, հաշվառված է ք․Երևան, Բաշինջաղյան փակուղի թիվ 8 տանը, փաստացի բնակվում է ք.Երևան Շահումյան 5-րդ փողոցի 6/1 տանը) և ՀՀ փաստաբանների պալատի փաստաբան Համբարձում Հարությունյան (արտոնագիր թիվ 561)`
1. Արևիկ Մարտինի Վարդանյանի նկատմամբ ՀՀ քրեական օրենսգրքի 299-րդ հոդվածի 1-ին մասով հանրային քրեական հետապնդում է հարուցվել այն բանի համար, որ «(…) նա տեղյակ լինելով Լիանա Սամվելի Նիկողոսյանի կողմից պոռնկությամբ զբաղվելու մասին, 2022 թվականի նոյեմբերից մինչև 2023 թվականի հունվարը իր կողմից փաստացի շահագործվող՝ Բագրատունյանց 43 հասցեում գործող «Սև քար» կոչվող հանրային հաստատությունում գործող հյուրանոցային համարները պոռնկությամբ զբաղվելու համար ժամավճարով պարբերաբար տրամադրել է Լիանա Սամվելի Նիկողոսյանին (...)»:
2. Մեղադրյալ Արևիկ Վարդանյանի նկատմամբ որպես խափանման միջոց ընտրված՝ բացակայելու արգելքը ենթակա է վերացման դատավժիռն ուժի մեջ մտնելուց հետո: 2023 թվականի մարտի 30-ից մինչև 2023 թվականի մայիսի 30-ը գտնվել է արգելանքի տակ:
3. Մեղադրյալ Արևիկ Վարդանյանին մեղսագրվող արարքով տուժող և հատուցման ենթակա վնաս առկա չէ:
4. Նախաքննության ընացքում մեղադրյալ Արևիկ Վարդանյանի գույքի նկատմամբ արգելանք չի դրվել:
5. Հիմք ընդունելով ՀՀ քրեական դատավարության օրենսգրքի 460-րդ հոդվածի 4-րդ մասի 9-րդ կետը և ՀՀ քրեական օրենսգրքի 84-րդ հոդվածը՝ կողմերը համաձայնվում են մեղադրյալ Արևիկ Վարդանյանին մեղսագրվող արարքի համար հետևյալ պատժատեսակների և պատժաչափերի վերաբերյալ՝
5.1. ՀՀ քրեական օրենսգրքի 299-րդ հոդվածի 1-ին մասով նախատեսված հանցագործության կատարման համար մեղադրյալ Արևիկ Վարդանյանի նկատմամբ որպես պատիժ տուգանք՝ նվազագույն աշխատավարձի երեսնապատիկի չափով՝ 2250000 /երկու միլիոն երկու հարյուր հիսուն հազար/ ՀՀ դրամի չափով։
5.2. ՀՀ քրեական օրենսգքրքի 79-րդ հոդվածի 4-րդ մասի կիրառմամբ հաշվակցել մեղադրյալ Արևիկ Վարդանյանի սույն համաձայնագրի 2-րդ կետում նշված անազատության մեջ գտնվելու ժամանակահատվածը և նկատմամբ որպես պատիժ թողնել տուգանք՝ աշխատավարձի տասնհինգապատիկի չափով՝ 1125000 /մեկ միլիոն հարյուր քսանհինգ հազար/ ՀՀ դրամի չափով։
5.3. ՀՀ քրեական օրենսգքրքի 59-րդ հոդվածի 8-րդ մասի կիրառմամբ թույլարտրել Արևիկ Վարդանյանի նկատմամբ նշանակված տուգանքի մաս առ մաս վճարումը՝ 6 (վեց) ամսվա ընթացքում:
6. Իրեղեն ապացույցներ չկան:
Հանրային մեղադրող՝ Տիգրան Պողոսյան ստորագրություն
Մեղադրյալ՝ Արևիկ Վարդանյան ստորագրություն
Պաշտպան՝ Համբարձում Հարությունյան ստորագրություն»։
Դատարանը, հաշվի առնելով, որ բացակայում են ՀՀ քրեական դատավարության օրենսգրքի 461-րդ հոդվածի 2-րդ և 3-րդ մասերով նախատեսված` համաձայնեցման մասին արձանագրությունը չընդունելու հիմքերը, ընդունեց համաձայնության մասին արձանագրությունը և որոշում կայացրեց լրացուցիչ դատալսումներ անցկացնելու մասին։
Համաձայնեցման վարույթով լրացուցիչ դատալսումների ժամանակ հանրային մեղադրող Տիգրան Պողոսյանը հրապարակեց համաձայնության մասին արձանագրությունը։
Համաձայնության մասին արձանագրության հրապարակումից հետո մեղադրյալ Արևիկ Վարդանյանը հայտնեց, որ իրեն պարզ է կնքված համաձայնության բովանդակությունը, ինքը համաձայն է դրան, արտահայտել է իր իրական կամքը, գիտակցում է կնքված համաձայնության հետևանքները և պնդում է կնքված համաձայնությունը:
Պաշտպան Համբարձում Հարությունյանը և հանրային մեղադրող Տիգրան Պողոսյանը հայտնեցին, որ պնդում են կնքված համաձայնությունը։

4. Դատարանի իրավական վերլուծությունները, հետևությունները և որոշումները.
Համաձայնեցման վարույթ կիրառելու պայմաններում Դատարանն ապացուցված է համարում մեղադրյալ Արևիկ Մարտինի Վարդանյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալի արարքի նկատմամբ պետք է կիրառվի ՀՀ քրեական օրենսգրքի 299-րդ հոդվածի 1-ին մասը։
Համաձայնեցման վարույթ կիրառելու պայմաններում Դատարանը մեղադրյալ Արևիկ Մարտինի Վարդանյանի նկատմամբ պետք է նշանակի համաձայնության մասին արձանագրությամբ համաձայնեցված պատիժը (պատժատեսակն ու պատժաչափը)՝ տուգանք նվազագույն աշխատավարձի երեսնապատիկի՝ 2.250.000 երկու միլիոն երկու հարյուր հիսուն հազար ՀՀ դրամի չափով:
ՀՀ քրեական օրենսգրքի 79-րդ հոդվածի 4-րդ մասի կիրառմամբ Արևիկ Մարտինի Վարդանյանի նկատմամբ նշանակված պատիժը պետք է մեղմացնել և նրա նկատմամբ վերջնական պատիժ պետք է նշանակել տուգանք՝ 1․125․000 մեկ միլիոն հարյուր քսանհինգ հազար ՀՀ դրամի չափով:
Արևիկ Մարտինի Վարդանյանին պետք է թույլատրել որպես պատիժ նշանակված 1․125․000 մեկ միլիոն հարյուր քսանհինգ հազար ՀՀ դրամի չափով տուգանքը վճարել մաս առ մաս 6 (վեց) ամսվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը միաժամանակ արձանագրում է, որ ըստ համաձայնության մասին արձանագրության՝ բռնագրավման ենթակա գույք առկա չէ։
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-14-րդ կետերով նախատեսված հարցերին անդրադառնալու անհրաժեշտությունը սույն քրեական գործով բացակայում է։
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ Արևիկ Մարտինի Վարդանյանի նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Դատարանը գտնում է, որ վարութային ծախսերի հարցը պետք է համարել լուծված, քանի որ համաձայնեցման վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Արևիկ Մարտինի Վարդանյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 463-րդ հոդվածի 5-րդ մասի։
Ելնելով վերոգրյալից և ղեկավարվելով ՀՀ քրեական օրենսգրքի 77-րդ հոդվածով և ՀՀ քրեական դատավարության օրենսգրքի 347-350-րդ, 458-464-րդ հոդվածներով` Դատարանը

ՎՃՌԵՑ

Արևիկ Մարտինի Վարդանյանին մեղավոր ճանաչել ՀՀ քրեական օրենսգրքի 299-րդ հոդվածի 1-ին մասով նախատեսված հանցագործության կատարման մեջ, և նրա նկատմամբ պատիժ նշանակել տուգանք՝ նվազագույն աշխատավարձի երեսնապատիկի՝ 2.250.000 երկու միլիոն երկու հարյուր հիսուն հազար ՀՀ դրամի չափով:
ՀՀ քրեական օրենսգրքի 79-րդ հոդվածի 4-րդ մասի կիրառմամբ Արևիկ Մարտինի Վարդանյանի նկատմամբ նշանակված պատիժը մեղմացնել և նրա նկատմամբ վերջնական պատիժ նշանակել տուգանք՝ 1․125․000 մեկ միլիոն հարյուր քսանհինգ հազար ՀՀ դրամի չափով:
Արևիկ Մարտինի Վարդանյանին թույլատրել որպես պատիժ նշանակված 1․125․000 մեկ միլիոն հարյուր քսանհինգ հազար ՀՀ դրամի չափով տուգանքը վճարել մաս առ մաս 6 (վեց) ամսվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Արևիկ Մարտինի Վարդանյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ