ԵԴ1/3016/01/24





ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈւԹՅԱՆ ԱՆՈւՆԻՑ

Երևան քաղաքի առաջին ատյանի ընդհանուր իրավասության քրեական դատարանը. (այսուհետ նաև` Դատարան),

Նախագահությամբ դատավոր Ն.Բաղդասարյանի

Քարտուղարությամբ Ա.Սարգսյանի

Մասնակցությամբ՝
Հանրային մեղադրող Ա.Մեժլումյանի
Մեղադրյալ Տ. Հովհաննիսյանի
Օրինական ներկայացուցիչ Ա.Հովհաննիսյանի
Պաշտպան Ա․ Վարոսյանի


2024 թվականի դեկտեմբերի 05-ին, Երևան քաղաքում, դռնփակ դատական նիստում, քննելով քրեական գործն ըստ մեղադրանքի`
Տիգրան Արայի Հովհաննիսյանի (ծնված՝ 25.12.2005թ., Երևան քաղաքում, ազգությամբ հայ, ՀՀ քաղաքացի, սովորում է Եվրոպական համալսարանի 2-րդ կուրսում, ամուրի, նախկինում չդատված, վատառողջ, չի աշխատում, հաշվառված և բնակվում է ք. Երևան, Օրբելի 18 բն. 45 հասցեում, մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով՝ եկու դրվագով, որպես խափանման միջոց է ընտրվել բացակայելու արգելքը,

Պ Ա Ր Զ Ե Ց`

Գործի դատավարական նախապատմությունը. 19.07.2024թ. ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60547024 քրեական վարույթը։
19.07.2024թ. ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60547124 քրեական վարույթը։
16․09․2024թ․ թիվ 60547124 քրեական վարույթը միացվել է թիվ 60547024 քրեական վարույթին։
26.09.2024թ. կայացվել է որոշում՝ Տիգրան Արայի Հովհաննիսյանի նկատմամբ երկու դրվագով ՀՀ քրեական օրենսգրքի 344-րդ հոդվածի 2-րդ մասով նախատեսված հանցանք կատարելու համար քրեական հետապնդում հարուցելու մասին, որը 09.10.2024թ ներկայացվել է վերջինիս:
27.10.2024թ. Տիգրան Արայի Հովհաննիսյանի նկատմամբ թիվ 60547024 քրեական վարույթով որպես խափանման միջոց է կիրառվել բացակայելու արգելքը:
2024 թվականի հոկտեմբերի 28-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի Տիգրան Արայի Հովհաննիսյանի՝ երկու դրվագով ՀՀ քրեական օրենսգրքի 344-րդ հոդվածի 2-րդ մասով։
Հիշյալ քրեական գործին շնորհվել է ԵԴ1/3016/01/24 դատական գործի համարը, որը նույն օրը մակագրվել և 2024 թվականի հոկտեմբերի 29-ին հանձնվել է դատավոր Ն. Բաղդասարյանին:
2024 թվականի հոկտեմբերի 30-ին որոշում է կայացվել վարույթ ստանձնելու և նախնական դատալսումներ նշանակելու մասին:
Դատարանի՝ 27․11․2024թ․ որոշմամբ Տիգրան Արայի Հովհաննիսյանի նկատմամբ կիրառված խափանման միջոց բացակայելու արգելքը թողնվել է անփոփոխ։
2024 թվականի դեկտեմբերի 05-ին մեղադրյալ Տիգրան Արայի Հովհաննիսյանի նկատմամբ կայացվել է մեղադրական վերդիկտ։

Մեղադրանքի փաստական նկարագրությունը.
Մեղադրյալ Տիգրան Արայի Հովհաննիսյանի նկատմամբ երկու դրվագով ՀՀ քրեական օրենսգրքի 344-րդ հոդվածի 2-րդ մասով քրեական հետապնդում է հարուցվել այն բանի համար, որ նա «չունենալով տրանսպորտային միջոցներ վարելու իրավունք, 2023 թվականի դեկտեմբերի 03-ին ժամը 22:35-ի սահմաններում, գտնվելով ոչ սթափ' 0,303 մգ/լ ալկոհոլի ազդեցության տակ, Երևան քաղաքի Միկոյան փողոցում վարել է «Լադա» մակնիշի 06 QG 660 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է թիվ 8180260366 արձանագրությունը:
Այսինքն' Տիգրան Արայի Հովհաննիսյանը կատարել է հանցավոր արարք, որը նախատեսված է ՀՀ քրեական օրենսգրքի 344֊րդ հոդվածի 2֊րդ մասով:
Բացի այդ՝
Տիգրան Արայի Հովհաննիսյանը չունենալով տրանսպորտային միջոցներ վարելու իրավունք, 2024 թվականի հուլիսի 08-ին ժամը 22:50֊ի սահմաններում, գտնվելով ոչ սթափ' 0.312 մգ/լ ալկոհոլի ազդեցության տակ, Երևան քաղաքի Աճառյան փողոցում վարել է «ԲՄՎ» մակնիշի 06 СО 666 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է թիվ 8180404461 արձանագրությունը:
Այսինքն' Տիգրան Արայի Հովհաննիսյանը կատարել է հանցավոր արարք, որը նախատեսված է ՀՀ քրեական օրենսգրքի 344֊րղ հոդվածի 2֊րդ մասով»:

Հիմնական դատալսումների ընթացքում հետազոտված թույլատրելի ապացույցները.
Սույն քրեական գործի դատաքննության ընթացքում հետազոտվել են հետևյալ գրավոր ապացույցները.
19.09.2024թ. զննում կատարելու մասին արձանագրությունը, համաձայն որի' 2023 թվականի դեկտեմբերի 03-ին' ժամը 22:45-ին, Երևան քաղաքի Միկոյան փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի ավագ պարեկ Արսեն Սարգսյանի /կրծքանշան թիվ 01224/ կողմից կազմվել է վարչական իրավախախտման վերաբերյալ թիվ 8180260366 արձանագրությունը, համաձայն որի' Տիգրան Արայի Հովհաննիսյանը (ծնված 25.12.2005թ., բնակվող' ք. Երևան, Օրբելի փողոց, 18 շենք, 45 բնակարան հասցեում) 2023 թվականի դեկտեմբերի 03-ին ժամը 22:35-ին' չունենալով տրանսպորտային միջոցներ վարելու իրավունք, ոչ սթափ վիճակում Երևան քաղաքի Միկոյան փողոցում վարել է «Լադա» մակնիշի 06 QG 660 հաշվառման համարանիշի տրանսպորտային միջոցը:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն և «Խմել եմ 1 բաժակ օղի, խնդրում եմ մեղմ վարվեք» գրառումը: Արձանագրությանը, իրավունքներին և պարտականություններին ծանոթանալու հատվածում առկա է ստորագրություն: Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված' 203.5 թիվը:
Ալկոհոլի պարունակության ստուգման կտրոնի զննության համաձայն՝ ստուգաչաւիման սարքի համարն է' 91100950, զննման համարը' 03019, զննման ամսաթիվը' 03.12.2023թ., զննման ժամը' 22:40:18, վերջին ստուգաչափման ամսաթիվը' 21.07,2023թ., դատարկ թեստ' 0.000 մգ/լ, ստուգաչափման ձևաչափը' ավտոմատ, ալկոհոլի պարունակությունը' 0.303 մղ/լ, վարորդի անունն է' Տիգրան, ազգանունը' Հովհաննիսյան, տրանսպորտային միջոցի համարանիշը' 06 QG 660, ՊԾ ազգանունը' Սարգսյան, կրծքանշանի համարը' 01224, ստորաբաժանումը' 2-րդ գումարտակ, 3-րդ վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ից կողմից տրված թիվ 102354 ստուգաչափման վկայականի զննության համաձայն՝ վկայականն ուժի մեջ է 2023 թվականի հուլիսի 21-ից մինչև 2024 թվականի հուլիսի 21-ը, ստուգաչաւիման սարքի գործարանային համարն է 91100950, տեսակը' Jupiter X/RP, չափման տիրույթը' 0.000-2.000մգ/լ, ճշտության դասը, կարգը /սխալանքը/ ±5-10%, արտադրողը' Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի' MU2835-2008 ստուգաչափող անվան դիմաց առկա է ստորագրություն և նշված է Ա.Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
Բացի այդ 2024 թվականի հուլիսի 08-ին' ժամը 23:00-ին, Երևան քաղաքի Աճառյան փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի կրտսեր պարեկ Մկրտիչ Ազիզյանի /կրծքանշան թիվ 07893/ կողմից կազմվել է վարչական իրավախախտման վերաբերյալ թիվ 8180404461 արձանագրությունը, համաձայն որի' Տիգրան Արայի Հովհաննիսյանը (ծնված 25.12.2005թ., բնակվող' ք. Երևան, Օրբելի փողոց, 18 շենք, 45 բնակարան հասցեում) 2024 թվականի հուլիսի 08-ին ժամը 22:50-ին' չունենալով տրանսպորտային միջոցներ վարելու իրավունք, ոչ սթափ վիճակում Երևան քաղաքի Աճառյան փողոցում վարել է «ԲՄՎ» մակնիշի 06 СО 666 հաշվառման համարանիշի տրանսպորտային միջոցը:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն և «Համաձայն եմ» գրառումը: Արձանագրությանը, իրավունքներին և պարտականություններին ծանոթանալու հատվածում առկա է ստորագրություն: Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված' 203.5 թիվը:
Ալկոհոլի պարունակության ստուգման կտրոնի զննության .^աաէսձայն ստուգաչափման սարքի համարն է' 91100950, զննման համար£Խ>\04135, զննման ամսաթիվը' 08.07.2024թ., զննման ժամը' 22:59:12, վերջին ստուգաչափման ամսաթիվը' 21.07,2023թ., դատարկ թեստ' 0.000 մգ/լ, ստուգաչափման ձևաչափը' ավտոմատ, ալկոհոլի պարունակությունը' 0.312 մց/լ, վարորդի անունն է' Տիգրան, ազգանունը' Հովհաննիսյան, տրանսպորտային միջոցի համարանիշը' 06 СО 666, ՊԾ ազգանունը Ազիզյան, կրծքանշանի համարը' 07893, ստորաբաժանումը' 4-րդ գումարտակ, 1-ին վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ֊ից կողմից տրված թիվ 102354 ստուգաչափման վկայականի զննության համաձայն՝ վկայականն ուժի մեջ է 2023 թվականի հուլիսի 21-ից մինչև 2024 թվականի հուլիսի 21-ը, ստուգաչաւիման սարքի գործարանային համարն է 91100950, ոեսակը' Jupiter X/RP, չափման տիրույթը' 0.000-2.ՕՕՕմգ/լ, ճշտության դասը, կարգը սխալանքը/ ±5-10%, արտադրողը' Չինաստան, պատկանում է ՀՀ ՊԾ-ին, ստուգաչափումը զատարվել է հետևյալ ստուգաչափման մեթոդիկայի անվանման նշագրի' MU2835-2008 ստուգաչափող անվան դիմաց առկա է ստորագրություն և նշված է ՍԼԳուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
ՀՀ ոստիկանության «ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության զննության համաձայն Տիգրան Արայի Հովհաննիսյանի /ծնված' 25.12.1979թ., ՀԾՀ' 3532050188/ անվամբ վարորդական իրավունքի վկայական առկա չէ:
/Վ.Թ. 27-29, դատական նիստի արձանագրություն/

Արտավարութային փաստաթուղթ ճանաչելու մասին 19.09.2024թ. որոշումը, համաձայն որի՝ 03.12.2023թ. վարչական իրավախախտման վերաբերյալ կազմված թիվ 8180260366 արձանագրության, ալկոհոլի պարունակության ստուգման թիվ 03019 կտրոնի, ստուգաչափման թիվ 102354 վկայականի, 08.07.2024թ. վարչական իրավախախտման վերաբերյալ կազմված թիվ 8180404461 արձանագրության, ալկոհոլի պարունակության ստուգման թիվ 04135 կտրոնի, ստուգաչափման թիվ 102354 վկայականի, Տիգրան Արայի Հովհաննիսյանի վերաբերյալ ճանապարհային ոստիկանության էլեկտրոնային ռեգիստրից արտատպված փաստաթղթի պատճենները ճանաչվել են արտավարութային փաստաթուղթ և կցվել քրեական վարույթին:
/Վ.Թ. 3, 4, 5, 6, 14, 15, 16, 30-31, դատական նիստի արձանագրություն/

Մեղադրյալ Տիգրան Հովհաննիսյանն առաջադրված մեղադրանքներում իրեն մեղավոր ճանաչեց, և օգտվելով իր սահմանադրական իրավունքից՝ հրաժարվեց դատաքննությամբ ցուցմունք տալուց:
Նախաքննության ընթացքում Տիգրան Հովհաննիսյանը ցուցմունք է տվել այն մասին, որ մեղավոր է ճանաչում առաջադրված մեղադրանքներում:
/Վ.Թ. 68-70, դատական նիստի արձանագրություն/

Դատարանի փաստական վերլուծությունները և հետազոտված ապացույցների հիման վրա դատարանի կողմից հաստատված փաստական հանգամանքները.
Հետազոտված թույլատրելի ապացույցների հիման վրա դատարանը հաստատված է համարում հետևյալ փաստական հանգամանքները.
Տիգրան Հովհաննիսյանը, չունենալով տրանսպորտային միջոցներ վարելու իրավունք, 2023 թվականի դեկտեմբերի 03-ին ժամը 22:35-ի սահմաններում, գտնվելով ոչ սթափ' 0,303 մգ/լ ալկոհոլի ազդեցության տակ, Երևան քաղաքի Միկոյան փողոցում վարել է «Լադա» մակնիշի 06 QG 660 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է թիվ 8180260366 արձանագրությունը:
Բացի այդ՝ Տիգրան Արայի Հովհաննիսյանը չունենալով տրանսպորտային միջոցներ վարելու իրավունք, 2024 թվականի հուլիսի 08-ին ժամը 22:50֊ի սահմաններում, գտնվելով ոչ սթափ' 0.312 մգ/լ ալկոհոլի ազդեցության տակ, Երևան քաղաքի Աճառյան փողոցում վարել է «ԲՄՎ» մակնիշի 06 СО 666 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է թիվ 8180404461 արձանագրությունը:

Դատարանի իրավական վերլուծությունները, հետևությունները և դրանց իրավական հիմնավորումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, դատարանը հանգում է հետևության, որ ապացուցված են Տիգրան Հովհաննիսյանին վերագրվող արարքները, այդ արարքի քրեական հակաիրավականությունը, այդ արարքները մեղադրյալի կողմից կատարելը, ինչպես նաև նրա մեղավորությունը տվյալ արարքների կատարման մեջ:
Դատարանը հանգում է այն հետևության, որ մեղադրյալ Տիգրան Հովհաննիսյանը կատարել է երկու դրվագով իրեն մեղսագրված արարքները, որոնց նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանն արձանագրում է նաև, որ թեև մեղադրանք ներկայացնելու պահին մեղադրյալը չափահաս է եղել, սակայն մեղսագրվող արարքներից մեկը մեղադրյալը կատարել է անչափահաս տարիքում, որպիսի պայմաններում օրինական ներկայացուցչի մասնակցությունը պարտադիր է, իսկ մինչդատական վարույթում մեղադրյալի այդ իրավունքն իրացված չի եղել: Այնուամենայնիվ, դատարանը փաստում է, որ այդ իրավունքն իրացվել է դատական քննության ընթացքում՝ ապահովելով մեղադրյալի օրինական ներկայացուցչի մասնակցությունը վարույթին:
Դատարանը հաստատված համարելով հանցագործության և դրա կատարման մեջ Տիգրան Հովհաննիսյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
ՀՀ քրեական օրենսգրքի 69-րդ հոդվածի 2-րդ մասի համաձայն՝
«Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:»:
Պատասխանատվությունն ու պատիժը մեղմացնող և ծանրացնող հանգամանքների վերաբերյալ Վճռաբեկ դատարանն իրավական դիրքորոշում է արտահայտել Ա.Ավետիսյանի գործով որոշման մեջ՝ արձանագրելով, որ «(...) պատասխանատվությունն ու պատիժը մեղմացնող և ծանրացնող հանգամանքները հնարավորություն են տալիս պատկերացում կազմել հանցագործության՝ հանրության համար վտանգավորության աստիճանի և բնույթի, հանցավորի անձնավորության մասին և յուրաքանչյուր կոնկրետ գործով անհատականացնել պատիժը: Պատիժը մեղմացնող և ծանրացնող հանգամանքների ցանկի վերլուծությունը ցույց է տալիս, որ քննարկվող հանգամանքները վերաբերում են ինչպես հանցագործությանը, այնպես էլ հանցավորի անձնավորությանը կամ միաժամանակ բնութագրում են հանցագործությունն ու հանցավորի անձնավորությունը: Այդ պատճառով էլ պատիժը մեղմացնող և ծանրացնող հանգամանքները պետք է դիտարկել որպես հանցակազմի սահմաններից դուրս հանգամանքներ, որոնք ուղղակի կամ անուղղակի վերաբերում են հանցագործությանը կամ հանցավորի անձնավորությանը, բարձրացնում կամ իջեցնում են հասարակական վտանգավորության աստիճանը և ազդում պատժի վրա: Դրանց գնահատմամբ է հնարավոր յուրաքանչյուր կոնկրետ գործով անհատական մոտեցում ցուցաբերել` ինչպես պատժի տեսակը և չափը որոշելիս, այնպես էլ այն կրելու նպատակահարմարության հարցը լուծելիս (...)» (տե՛ս Անդրանիկ Մեսրոպի Ավետիսյանի գործով Վճռաբեկ դատարանի 2011 թվականի հուլիսի 13-ի թիվ ԵԱՆԴ/0091/01/09 որոշման 20-րդ կետը)»:
Վճռաբեկ դատարանն Արարատ Ավագի Ավագյանի և Վահան Սերյոժայի Սահակյանի վերաբերյալ ԵԿԴ/0252/01/13 քրեական գործով 2014թ. հոկտեմբերի 31-ի որոշման մեջ արտահայտել է նաև հետևյալ իրավական դիրքորոշումը.
«(…) նշանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին (…):
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա (…)
Նշված նորմի վերլուծության հիման վրա դատարանն արձանագրում է, որ տվյալ հանցագործության վերաբերյալ գործերով պատժի անհատականացման սկզբունքի տեսանկյունից արարքի հանրային վտանգավորությունը որոշելիս դատարանը, ի թիվս այլնի, պետք է հաշվի առնի. (…)
դրա չափը (…),
արարքի կատարման նպատակն ու շարժառիթը (…):
Վկայակոչված հանգամանքները, այլ հանգամանքների հետ համակցությամբ ազդում են արարքի հանրային վտանգավորության վրա և պետք է իրենց համապատասխան գնահատականը ստանան յուրաքանչյուր գործով պատիժ նշանակելիս:
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով: Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս: Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն (…)»:
Մեղադրյալ Տիգրան Հովհաննիսյանի նկատմամբ, նրա կատարած հանցագործության համար պատիժ նշանակելիս՝ դատարանը հաշվի է առնում վերոհիշյալ նախադեպային որոշումներում արտահայտված իրավական դիրքորոշումները:
Դատարանը հաշվի է առնում նաև հանցագործության կատարման եղանակը, հանցավոր մտադրության իրականացման աստիճանը, հանցագործություն կատարելուց հետո հանցավորի դրսևորած վարքագիծը, խախտված հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը:
Մեղադրյալ Տիգրան Հովհաննիսյանի նկատմամբ պատիժ նշանակելիս դատարանը հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, դատարանը, որպես Տիգրան Հովհաննիսյանի անձը բնութագրող տվյալ հաշվի է առնում այն, որ նա երիտասարդ է, նախկինում դատված չի եղել։
Մեղադրյալ Տիգրան Հովհաննիսյանի կատարած հանցագործության համար պատիժ նշանակելիս՝ որպես նրա պատասխանատվությունը և պատիժը մեղմացնող հանգամանքներ դատարանը դիտում է կատարած արարքի համար զղջալը և մեղքն ընդունելը, ինչը որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել է դրա համար:
ՀՀ քրեական օրենսգրքի 344-րդ հոդվածի 2-րդ մասը նախատեսում է պատիժ՝ տուգանք՝ առավելագույնը քսանապատիկի չափով, կամ հանրային աշխատանքներ՝ ութսունից հարյուր հիսուն ժամ տևողությամբ, կամ կարճաժամկետ ազատազրկում՝ մեկից երկու ամիս ժամկետով, կամ ազատազրկում՝ առավելագույնը երկու տարի ժամկետով:
Վերոգրյալի հիման վրա, պատժի տեսակը և չափն ընտրելիս ղեկավարվելով պատիժ նշանակելու ընդհանուր սկզբունքներով, հաշվի առնելով մեղադրյալի կատարած հանցագործությունների բնույթը և հանրության համար վտանգավորության աստիճանը, դրանք կատարելու հանգամանքները, նրա անձը բնութագրող տվյալների և պատասխանատվությունն ու պատիժը մեղմացնող հանգամանքների համակցությունը, ինչպես նաև պատասխանատվությունն ու պատիժը ծանրացնող հանգամանքների բացակայությունը, դատարանը գտնում է, որ Տիգրան Հովհաննիսյանի կատարած ՀՀ քրեական օրենսգրքի 344-րդ հոդվածի 2-րդ մասով նախատեսված հանցավոր արարքներից յուրաքանչյուր դրվագով նրա նկատմամբ պետք է նշանակել պատիժ տուգանքի ձևով՝ հնգապատիկի չափով, քանի որ այն կարող է ապահովել պատժի նպատակները:
Միաժամանակ, անդրադառնալով մեղադրյալի նկատմամբ նշանակվող տուգանքի ձևով պատժի չափին՝ դատարանն արձանագրում է հետևյալը․
ՀՀ քրեական օրենսգրքի 59-րդ հոդվածի 5-րդ մասի համաձայն՝ «Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից»։
Նկատի ունենալով, որ մեղադրյալ Տիգրան Հովհաննիսյանը չունի եկամուտ՝ դատարանը գտնում է, որ նշանակվող տուգանքի չափի հաշվարկային հիմք պետք է ընդունել արարքի կատարման պահին գործող «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափը՝ 75.000 (յոթանասունհինգ հազար) ՀՀ դրամը:
ՀՀ քրեական օրենսգրքի 74-րդ հոդվածի համաձայն՝
1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:
...
9. Հանցագործությունների համակցության դեպքում մյուս պատիժները լրիվ կամ մասնակիորեն գումարելու դեպքում նշանակվող վերջնական պատիժը չի կարող գերազանցել սույն օրենսգրքի Ընդհանուր մասով պատժի տվյալ տեսակի համար սահմանված առավելագույն ժամկետը կամ չափը:
...
11. Պատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը և պատժի կրման սկիզբ է համարվում առաջին դատավճռով նշանակված պատժի կրման սկիզբը»:
Հիմք ընդունելով ՀՀ քրեական օրենսգրքի 74-րդ հոդվածի կանոնները, դատարանը գտնում է, որ Տիգրան Հովհաննիսյանի նկատմամբ պատիժ պետք է նշանակել ՀՀ քրեական օրենսգրքի 344-րդ հոդվածի 2-րդ մասով նախատեսված արարքներից յուրաքանչյուր դրվագով տուգանքի ձևով նշանակվող պատիժները լրիվ գումարելու միջոցով, մասնավորապես՝ պետք է նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով:
Դատարանը գտնում է, որ իր նկատմամբ նշանակված պատիժը մեղադրյալ Տիգրան Հովհաննիսյանը պետք է կրի, քանի որ դրան խոչընդոտող հանգամանքներ առկա չեն:
Դատարանն արձանագրում է, որ սույն գործով գույքային հայց չի հարուցվել, բռնագրավման ենթակա գույքի, ինչպես նաև գույքի արգելադրման վերաբերյալ տվյալներ գործում առկա չեն, սույն գործով վարութային ծախսեր չկան:
Քննարկելով ապացույցների պահպանման և տնօրինման հարցը, ղեկավարվելով ՀՀ քրեական դատավարության օրենսգրքի 99-րդ հոդվածով՝ դատարանը գտնում է, որ արտավարութային փաստաթուղթ ճանաչված՝ փաստաթղթերի պատճենները պետք է պահել վարույթի նյութերի հետ՝ դրանք պահելու ամբողջ ընթացքում:
Անդրադառնալով խափանման միջոցի հարցին, քննարկելով մեղադրյալի ներկայացրած միջնորդությունը՝ նրա նկատմամբ որպես խափանման միջոց կիրառված բացակայելու արգելքը վերացնելու և գրավ կիրառելու մասին, դատարանը գտնում է, որ Տիգրան Հովհաննիսյանի փախուստի ռիսկը բարձր չէ, և խափանման միջոց գրավն ի զորու է ապահովել մեղադրյալի պատշաճ վարքագիծը: Այսպիսով, նշված պատճառաբանությամբ դատարանը գտնում է, որ Տիգրան Հովհաննիսյանի նկատմամբ կիրառված խափանման միջոց բացակայելու արգելքը պետք է վերացնել և որպես խափանման միջոց կիրառել գրավը՝ գրավի գումարի չափը սահմանելով 750.000 (յոթ հարյուր հիսուն հազար) ՀՀ դրամի չափով:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 342-349-րդ հոդվածներով` դատարանը.

Վ Ճ Ռ Ե Ց՝

Մեղադրյալ Տիգրան Արայի Հովհաննիսյանին մեղավոր ճանաչել երկու դրվագով ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ, և նրա նկատմամբ նշանակել պատիժ՝
- ՀՀ քրեական օրենսգրքի 344-րդ հոդվածի 2-րդ մասով՝ առաջին դրվագով՝ տուգանքի` հնգապատիկի՝ 375.000 /երեք հարյուր յոթանասունհինգ հազար/ ՀՀ դրամ գումարի չափով:
- ՀՀ քրեական օրենսգրքի 344-րդ հոդվածի 2-րդ մասով՝ երկրորդ դրվագով՝ տուգանքի` հնգապատիկի՝ 375.000 /երեք հարյուր յոթանասունհինգ հազար/ ՀՀ դրամ գումարի չափով:
ՀՀ քրեական օրենսգրքի 74-րդ հոդվածի կիրառմամբ տուգանքի ձևով նշանակված պատիժները լրիվ գումարելու միջոցով, Տիգրան Արայի Հովհաննիսյանի նկատմամբ վերջնական պատիժ նշանակել՝ տուգանք 750․000 /յոթ հարյուր հիսուն հազար/ ՀՀ դրամի չափով։
Մեղադրյալ Տիգրան Արայի Հովհաննիսյանի նկատմամբ ընտրված խափանման միջոցը՝ բացակայելու արգելքը, վերացնել, որպես խափանման միջոց կիրառել գրավը՝ գրավի գումարի չափը սահմանելով 750000 (յոթ հարյուր հիսուն հազար) ՀՀ դրամ, որը ենթակա է վճարման Երևան քաղաքի առաջին ատյանի ընդհանուր իրավասության քրեական դատարանի թիվ 900013298014 դեպոզիտ հաշվին և այն թողնել անփոփոխ՝ մինչև դատավճռի օրինական ուժի մեջ մտնելը, իսկ դատավճիռն օրինական ուժի մեջ մտնելուց հետո գրավի գումարը վերադարձնել այն մուծած անձին։
Արտավարութային փաստաթուղթ ճանաչված փաստաթղթերի պատճենները պահել վարույթի նյութերի հետ՝ դրանք պահելու ամբողջ ընթացքում:
Դատավճիռը կարող է բողոքարկվել ՀՀ վերաքննիչ քրեական դատարան՝ ստանալու օրվանից՝ մեկամսյա ժամկետում:



ԴԱՏԱՎՈՐ՝ Ն. ԲԱՂԴԱՍԱՐՅԱՆ