Գործ ԵԴ1/2998/01/24


Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

15.11.2024 թվական ք.Երևան

ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ
ՔՐԵԱԿԱՆ ԴԱՏԱՐԱՆ

ԴԱՏԱՎՈՐ՝ Դ. ԲԱԼԱՅԱՆ
ՆԻՍՏԻ ՔԱՐՏՈՒՂԱՐՆԵՐ՝ Ա.ՄԱԼՈՅԱՆ, Տ.ԵՐԱՆՈՍՅԱՆ
ՅՈՒ.ՀԱՐՈՒԹՅՈՒՆՅԱՆ
ՄԱՍՆԱԿՑՈՒԹՅԱՄԲ՝
ՀԱՆՐԱՅԻՆ ՄԵՂԱԴՐՈՂ՝ Բ.ՂԱԶԻՆՅԱՆ
ՄԵՂԱԴՐՅԱԼ՝ Մ.ԱՍՐՅԱՆ

Դռնբաց դատական նիստերում քննության առնելով վարույթն ըստ մեղադրանքի Մարտին Համլետի Ասրյանի ՝ ծնված 29.03.1986 թվականին Երևան քաղաքում,
ազգությամբ հայ, ՀՀ քաղաքացի, բարձրագույն կրթությամբ, գտնվում է փաստական ամուսնական հարաբերությունների մեջ, խնամքին երեք անձ, չի աշխատում, չդատված, ֆիզիկապես առողջ, բնակվում է քաղաք Երևան, Ավան Առինջ 2-րդ միկրոշրջան, 2/7 շենք, 10-րդ բնակարան հասցեում, որպես խափանման միջոց է ընտրված բացակայելու արգելքը, 14.11.2024 թվականին կայացվել է մեղադրական վերդիկտ ՀՀ քրեական օրենսգրքի 344-րդ հոդվածի 2-րդ մասով՝ երկու դրվագով

I.Գործի դատավարական նախապատմությունը.

2024 թվականի փետրվարի 18-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Հ.Գրիգորյանը կազմել է արձանագրություն ՀՀ քրեական օրենսգրքի 344-րդ հոդվածի 2-րդ մասի հատկանիշներով թիվ 06-0695-24 քրեական վարույթը նախաձեռնելու վերաբերյալ /հատոր 1-ին գ.թ. 8-9/:
2024 թվականի ապրիլի 26-ին քննիչ Հ.Գրիգորյանը կազմել է արձանագրություն ՀՀ քրեական օրենսգրքի 344-րդ հոդվածի 2-րդ մասի հատկանիշներով թիվ 06-1632-24 քրեական վարույթը նախաձեռնելու վերաբերյալ /հատոր 1-ին գ.թ. 14-15/:
2024 թվականի հուլիսի 08-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Գ.Խաչատրյանը որոշում է կայացրել թիվ 06-0695-24 քրեական վարույթը թիվ 06-1632-24 քրեական վարույթին միացնելու և նախաքննությունը 06-0695-24 համարով շարունակելու մասին /հատոր 1-ին գ.թ. 29-30/:
2024 թվականի սեպտեմբերի 30-ին Երևան քաղաքի Աջանփնյակ և Դավթաշեն վարչական շրջանների դատախազության դատախազ Բ.Ղազինյանը որոշում է կայացրել Մարտին Ասրյանի նկատմամբ հանրային քրեական հետապնդում հարուցելու մասին. «/…/ այն հանցանքի կատարման համար, որ նա, չունենալով տրանսպորտային միջոց վարելու իրավունք, 2024 թվականի փետրվարի 17-ին ժամը 23.40-ի սահմաններում Երևան քաղաքի Տիգրան Պետրոսյան փողոցում հարբած (ոչ սթափ) վիճակում՝ արտաշնչած մեկ լիտր օդի մեջ ալկոհոլի պարունակությունը կազմել է 0.340 մգ/լ, վարել է Միցուբիշի մակնիշի 77NH001 հաշվառման համարանիշի տրանսպորտային միջոցը, ինչը հայտնաբերվել է ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի ծառայողների կողմից, ովքեր Մարտին Համլետի Ասրյանին ձերբակալել և ներկայացրել են ՀՀ ՆԳՆ ոստիկանության ԵՔՎ Մաշտոցի բաժնի Դավթաշենի բաժանմունք:
Այսինքն՝ Մարտին Համլետի Ասրյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 344-րդ հոդվածի 2-րդ մասով:
Բացի այդ, Մարտին Համլետի Ասրյանը, չունենալով տրանսպորտային միջոցներ վարելու իրավունք, 2024 թվականի մարտի 02-ին ժամը 00.05-ի սահմաններում Երևան քաղաքի Անաստաս Միկոյան փողոցում հարբած (ոչ սթափ) վիճակում՝ արյան մեկ լիտրի մեջ ալկոհոլի պարունակությունը կազմել է 1.4 գ/լ, վարել է Միցուբիշի մակնիշի 77NH001 հաշվառման համարանիշի տրանսպորտային միջոցը, որպիսի փաստն արձանագրվել է ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի ծառայողների կողմից կազմված՝ վարչական իրավախախտման վերաբերյալ թիվ 8180405906 արձանագրությամբ:
Այսինքն՝ Մարտին Համլետի Ասրյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 344-րդ հոդվածի 2-րդ մասով:» /հատոր 1-ին գ.թ. 75-77/:
Նույն օրը Մարտին Ասրյանին ներկայացվել է մեղադրանքը և պարզաբանվել մեղադրյալի իրավունքներն ու պարտականությունները: Վերջինիս նկատմամբ որպես խափանման միջոց է ընտրվել բացակայելու արգելքը /հատոր 1-ին գ.թ. 81-83, 84, 85-86/:
2024 թվականի հոկտեմբերի 18-ին կազմվել է մեղադրական եզրակացությունը /հատոր 1-ին գ.թ. 105-119/:
2024 թվականի հոկտեմբերի 23-ին դատախազ Բ.Ղազինյանը որոշում է կայացրել մեղադրական եզրակացությունը հաստատելու մասին /հատոր 1-ին գ.թ. 122/:
2024 թվականի հոկտեմբերի 24-ին քրեական գործը մուտք է եղել դատարան, էլեկտրոնային եղանակով մակագրվել և հաջորդ օրը հանձնվել է դատավոր Դ.Բալայանին /հատոր 1-ին գ.թ. 121, 123-124/:
2024 թվականի հոկտեմբերի 28-ին որոշում է կայացվել քրեական գործը վարույթ ստանձնելու և նախնական դատալսումներ նշանակելու մասին /հատոր 1-ին գ.թ. 125/:
2024 թվականի նոյեմբերի 14-ին մեղադրյալ Մարտին Ասրյանի նկատմամբ ՀՀ քրեական օրենսգրքի 344-րդ հոդվածի 2-րդ մասով՝ երկու դրվագով, կայացվել է մեղադրական վերդիկտ /հատոր 1-ին գ.թ. 55/:

II. Հիմնական դատալսումների ընթացքում հետազոտված թույլատրելի ապացույցները.

Ճանապարհային ոստիկանության էլեկտրոնային ռեգիստրի տվյալների համաձայն Մարտին Համլետի Ասրյանը 21.06.2006 թվականին ձեռք է բերել BC կարգի վարորդական իրավունքի վկայական, որը 16.09.2016 թվականին վերաթողարկվել է: Մ.Ասրյանը 22.02.2022 թվականից մինչև 22.02.2023 թվականը զրկվել է տրանսպորտային միջոցներ վարելու իրավունքից /հատոր 1-ին գ.թ. 22/։
Վարչական իրավախախտման վերաբերյալ թիվ 8180098171 արձանագրության պատճենի համաձայն՝ Մարտին Ասրյանը 2022 թվականի փետրվարի 05-ին Երևան քաղաքի Դավթաշեն թաղամասում ոչ սթափ վիճակում վարել է տրանսպորտային միջոց: Մարտին Ասրյանը զրկվել է տրանսպորտային միջոցներ վարելու իրավունքից 1 տարի ժամկետով /հատոր 1-ին գ.թ. 23/:
Սթափության վիճակի ստուգման կտրոնի պատճենի համաձայն՝ Մարտին Ասրյանի սթափության վիճակի ստուգումը կատարվել է թիվ 93000778 «Alcovisor-Jupiter X/RP» տեսակի ստուգաչափման սարքով, ստուգումը կատարվել է 05.02.2022 թվականին՝ ժամը 02:08:40-ին, ալկոհոլի պարունակությունը կազմել է 0.382 մգ/լ /հատոր 1-ին գ.թ. 24/:
ՀՀ Էկոնոմիկայի նախարարության «Ստանդարտաֆիկացման և չափագիտության ազգային մարմին» ՓԲԸ-ն կողմից տրված թիվ N102578 ստուգաչափման վկայականի պատճենի համաձայն՝ «Ալկոտեստեր» անվանման, «Jupiter X/RP» տեսակի ստուգաչափման՝ թիվ 93000778 սարքը, ստուգաչափում է անցել 07.01.2022 թվականին և ուժի մեջ է մինչև 07.01.2022 թվականը, դրա չափման տիրույթը 0,000-1.200 մգ/լ է, իսկ ճշտության դասը /սխալանքը/ +- 10% է /հատոր 1-ին գ.թ. 44/:
Սթափության վիճակի ստուգման կտրոնի պատճենի համաձայն՝ Մարտին Ասրյանի սթափության վիճակի ստուգումը կատարվել է թիվ 91100999 «Alcovisor-Jupiter X/RP» տեսակի ստուգաչափման սարքով, ստուգումը կատարվել է 17.02.2024 թվականին՝ ժամը 23:54:20-ին, ալկոհոլի պարունակությունը կազմել է 0.340 մգ/լ /հատոր 1-ին գ.թ. 4/:
Մարտին Համլետի Ասրյանի ձերբակալման արձանագրության համաձայն՝ 2024 թվականի փետրվարի 18-ին՝ ժամը 00:08-ին, Երևան քաղաքի Դավթաշեն 2-րդ թաղամասի 34-րդ շենքի մոտից ՀՀ ՆԳՆ պարեկային ծառայության Երևան քաղաքի գնդի ծառայողների կողմից ՀՀ քրեական օրենսգրքի 344-րդ հոդվածի 2-րդ մասի կասկածանքով ձերբակալվել է Մարտին Ասրյանը /հատոր 1-ին գ.թ. 5/։
ՀՀ Էկոնոմիկայի նախարարության «Ստանդարտաֆիկացման և չափագիտության ազգային մարմին» ՓԲԸ-ն կողմից տրված թիվ N102578 ստուգաչափման վկայականի պատճենի համաձայն՝ «Ալկոտեստեր» անվանման, «Jupiter X/RP» տեսակի ստուգաչափման՝ թիվ 91100999 սարքը, ստուգաչափում է անցել 17.08.2023 թվականին և ուժի մեջ է մինչև 17.08.2024 թվականը, դրա չափման տիրույթը 0,000-2.000 մգ/լ է, իսկ ճշտության դասը /սխալանքը/ +- 10% է /հատոր 1-ին գ.թ. 43/:
Վարչական իրավախախտման վերաբերյալ թիվ 8180405906 արձանագրության պատճենի համաձայն՝ Մարտին Ասրյանը՝ չունենալով տրանսպորտային միջոցներ վարելու իրավունք, 2024 թվականի մարտի 02-ին՝ ժամը 00:05-ին, Երևան քաղաքի Անաստաս Միկոյան փողոցում ոչ սթափ վիճակում վարել է տրանսպորտային միջոց /հատոր 1-ին գ.թ. 27/:
Բուժհաստատությունների կողմից վարորդի սթափության վիճակի զննության թիվ 90 արձանագրության համաձայն՝ 2024 թվականի մարտի 02-ին՝ ժամը 00:50-ին արյան միջոցով ստուգվել է Մարտին Համլետի Ասրյանի սթափությունը և վերջինիս օրգանիզմում ալհոհոլի պարունակությունը կազմել է 1.4 մգ/լ: Զննության ընթացքում Մարտին Ասրյանը հայտարարել է, որ վերջին անգամ ալկոհոլ է օգտագործել մոտ 4-5 ժամ առաջ /հատոր 1-ին գ.թ. 21/։
ՀՀ Էկոնոմիկայի նախարարության «Ստանդարտաֆիկացման և չափագիտության ազգային մարմին» ՓԲԸ-ն կողմից տրված թիվ N130255 ստուգաչափման վկայականի պատճենի համաձայն՝ «բ/ք անալիզատոր» անվանման, «CYAN Smart CY009» տեսակի BS6MJO22 գործարանային համարի ստուգաչափման սարքը, ստուգաչափում է անցել 21.07.2023 թվականին և ուժի մեջ է մինչև 21.07.2024 թվականը /հատոր 1-ին գ.թ. 43/:
Քննիչի 24.09.2024 թվականին որոշմամբ որպես արտավարույթային փաստաթուղթ է ճանաչվել վարչական իրավախախտման վերաբերյալ թիվ 8180098171 և 8180405906 արձանագրությունները, սթափության վիճակի ստուգման կտրոնները, բուժհաստատությունների կողմից վարորդի սթափության վիճակի զննության թիվ 90 արձանագրությունը, թիվ 062516, 102578 ստուգաչափման վկայականները, ՀՀ ՆԳՆ ոստիկանության ճանապարհային ոստիկանության ծառայության էլեկտրոնային ռեգիստրից արտատպված տեղեկանքը /հատոր 1-ին գ.թ. 52-54/:
Քննիչի 28.09.2024 թվականին որոշմամբ որպես արտավարույթային փաստաթուղթ է ճանաչվել թիվ 101654 ստուգաչափման վկայականի պատճենը /հատոր 1-ին գ.թ. 68-69/
Մեղադրյալ Մարտին Ասրյանը հայտնեց, որ ներկայացված մեղադրանքում իրեն մեղավոր է ճանաչում, ցուցմունք տվեց, որ 2022 թվականի փետրվարին մեկ տարի ժամկետով զրկվել է տրանսպորտային միջոց վարելու իրավունքից, որից հետո նման իրավունք ձեռք չի բերել: 2024 թվականի փետրվարի 17-ին գտնվելով ոչ սթափ վիճակում վարել է իրեն պատկանող «Միցուբիշի» մակնիշի 77NH001 հաշվառման համարանիշի ավտոմեքենան և այն կայանելով Երևան քաղաքի Տիգրան Պետրոսյան փողոցում իջել է ավտոմեքենայից ու քիչ անց կրկին մոտեցել ավտոմեքենային: Այդ պահին իրեն են մոտեցել պարեկային ծառայության աշխատակիցները և հայտարարել են, որ ականատես են եղել դրանից առաջ իր կողմից ավտոմեքենան վարելու հանգամանքին: Նրանց հայտնել է, որ իրեն մոտենալու ժամանակ ինքն ավտոմեքենա չի վարել և նրանք չեն կարող ապացուցել այդ հանգամանքը, որից հետո պարեկային ծառայողը հայտնել է, որ իրավասու է իրեն ձերբակալել՝ ոչ սթափ վիճակում ավտոմեքենան վարելու կասկածանքով, ինչը և տեղի է ունեցել: Իրեն ձերբակալելուց հետո տեղափախել են ոստիկանության Դավթաշենի բաժանմունք այնուհետև քննչական բաժին: Դրանից մի քանի օր անց, արդեն մարտի 02-ին՝ գիշերվա ժամի, Երևան քաղաքի Անաստաս Միկոյան փողոցում իր նույն ավտոմեքենան կանգնեցրել են պարեկային ծառայության աշխատակիցները և տեսնելով, որ կրկին գտնվում է ոչ սթափ վիճլկում իր հարբածությունը ստուգելու նպատակով իրեն տեղափոխել են Երևան քաղաքի Աճառյան փողոցում գտնվող բժշկական հաստատություն, որտեղ արյուն է հանձնել: Նշեց, որ երկու դեպքում էլ հանգամանքների բերումով է, որ ոչ սթափ վիճակում վարել է ավտոմեքենան, կատարածի համար զղջում է /դատական նիստի արձանագրություն/:

III.Դատարանի պատճառաբանությունը և եզրահանգումները.

Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, դատարանը հանգում է այն հետևության, որ մեղադրյալ Մարտին Ասրյանը մեղավորությամբ կատարել է իրեն մեղսագրված արարքները և նրա կողմից կատարած յուրաքանչյուր արարքի նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը՝ հաստատված համարելով հանցագործությունների և դրանց կատարման մեջ Մարտին Ասրյանի մեղքի ապացուցված լինելը, գտնում է, որ նա ենթակա է պատժի կատարածի համար:
Դատարանը դատապարտված մեղադրյալի նկատմամբ պատիժ նշանակելիս հաշվի է առնում ինչպես նրա կատարած հանցագործության բնույթը, եղանակն ու նպատակը, դիտավորության աստիճանը, հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությունը, այնպես էլ նրա անձը բնութագրող տվյալները, այն որ երիտասարդ է, դատված չի եղել, հարևանների կողմից բնութագրվում է բացառապես դրական հատկանիշներով /հատոր 1-ին գ.թ. 48, 138-139/:
Դատարանը ղեկավարվելով ՀՀ քրեական օրենսգրքի 70-րդ հոդվածի 1-ին մասի 4-րդ կետով, որպես մեղադրյալի պատասխանատվությունը և պատիժը մեղմացնող հանգամանքներ հաշվի է առնում, նրա խնամքին գտնվող անչափահաս երեխաների՝ 15.10.2010 թվականին ծնված Նատալի Մարտին Ասրյանի, 20.09.2018 թվականին ծնված Հայկ Մարտին Ասրյանի, ինչպես նաև 11.02.1951 թվականին ծնված հաշմանդամության երրորդ կարգ ունեցող Նինա Աղաբեկի Մարտիրոսյանի առկայությունը /հատոր 1-ին գ.թ. 91, 93, 136/:
Դատարանն արձանագրում է, որ դատապարտված մեղադրյալի պատասխանատվությունը կամ պատիժը ծանրացնող հանգամանքներ առկա չեն:
Դատարանը՝ հաշվի առնելով Մարտին Ասրյանի անձը բնութագրող տվյալները, նրա պատասխանատվությունն ու պատիժը մեղմացնող հանգամանքների առկայությունը և ծանրացնող հանգամանքի բացակայությունն ու ղեկավարվելով ՀՀ քրեական օրենսգրքի 7-րդ հոդվածի 1-ին, 55-րդ և 69-րդ հոդվածներով գտնում է, որ նրա նկատմամբ յուրաքանչյուր արարքով որպես պատիժ պետք է նշանակել ՀՀ քրեական օրենսգրքի 344-րդ հոդվածի 2-րդ մասի սանկցիայով նախատեսված ամենամեղմ պատժատեսակը՝ տուգանքը, քանի որ սույն գործով տուգանք նշանակելու պարագայում կարելի է հասնել պատժի նպատակների իրագործմանը: Դատարանը՝ հաշվի առնելով այն հանգամանքը, որ մեղադրյալն չունի աշխատանք և եկամուտ, արձանագրում է, որ տուգանքի չափի հաշվարկը պետք է իրականացվի ՀՀ քրեական օրենսգրքի 59-րդ հոդվածի 5-րդ մասով սահմանված կարգով՝ «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափով: Հիմք ընդունելով, որ «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն ՀՀ-ում ամսական նվազագույն աշխատավարձը սահմանված է 75.000 ՀՀ դրամը՝ դատարանը գտնում է, որ մեղադրյալի նկատմամբ առաջին արարքով պետք է պատիժ սահմանել նվազագույն աշխատավարձի հնգապատիկի՝ 375.000 ՀՀ դրամի չափով, իսկ երկրորդ արարքով՝ ութապատիկի՝ 600.000 ՀՀ դրամի չափով:
Միևնույն ժամանակ ղեկավարվելով ՀՀ քրեական օրենսգրքի 74-րդ հոդվածի 1-ին մասի կանոնով և հիմք ընդունելով ՀՀ քրեական օրենսգրքի 59-րդ հոդվածի 3-րդ մասով սահմանված տուգանք պատժատեսակի նվազագույն չափը, դատարանը գտնում է, որ հանցագործությունների համակցությամբ տուգանքի ձևով նշանակված պատիժները մասնակի գումարելու սկզբունքով, Մարտին Ասրյանի նկատմամբ որպես պատիժ պետք է նշանակել տուգանք՝ 750.000 ՀՀ դրամի չափով:
Սրա հետ մեկտեղ, դատարանը՝ հաշվի առնելով, մեղադրյալի գույքային դրությունը, նրա խնամքին գտնվող անձանց առկայությունը և կանոնավոր վաստակ չունենալու հանգամանքը, գտնում է, որ վերջինս ի վիճակի չէ անհապաղ և ամբողջությամբ վճարել տուգանքը: ՀՀ քրեական օրենսգրքի 59-րդ հոդվածի 8-րդ մասի համաձայն՝ եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Դատարանը գտնում է, որ կոնկրետ դեպքում մեղադրյալի նկատմամբ նշանակված տուգանքը վճարելու համար պետք է սահմանել 12 ամիս ժամկետ՝ յուրաքանչյուր ամիս 62.500 ՀՀ դրամ վճարելու պայմանով:
Քննության առնելով դատապարտված մեղադրյալի նկատմամբ ընտրված խափանման միջոցի հարցը՝ դատարանը գտնում է, որ այն պետք է վերացնել մինչ դատավճռի օրինական ուժի մեջ մտնելը:
Դատարանը արձանագրում է նաև, որ դատապարտված մեղադրյալից բռնագանձման ենթակա չեն ՀՀ քրեական դատավարության օրենսգրքի 167-րդ հոդվածի 1-ին մասի 1-7-րդ կետերով նախատեսված վարութային ծախսերը՝ նկատի ունենալով այն հանգամանքը, որ նույն հոդվածի 2-րդ մասի համաձայն՝ հանրային մեղադրանքով վարութային ծախսերը վճարվում են պետական միջոցների հաշվին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 347-349-րդ հոդվածներով, դատարանը

Վ Ճ Ռ Ե Ց

Մարտին Համլետի Ասրյանին մեղավոր ճանաչել երկու արարքում, որոնցից յուրաքանչյուրը նախատեսված է ՀՀ քրեական օրենսգրքի 344-րդ հոդվածի 2-րդ մասով և պատիժ նշանակել տուգանք՝
1-ին արարքով՝ /2024 թվականի փետրվարի 17-ի կատարած հանցանք/ նվազագույն աշխատավարձի հնգապատիկի՝ 375.000 ՀՀ դրամի չափով,
2-րդ արարքով՝ /2024թ. մարտի 02-ին կատարած հանցանք/ տուգանք՝ նվազագույն աշխատավարձի ութապատիկի՝ 600.000 ՀՀ դրամի չափով:
ՀՀ քրեական օրենսգրքի 74-րդ հոդվածի 1-ին մասի կանոնով՝ նշանակված պատիժները մասնակի գումարելու միջոցով, վերջնական պատիժ նշանակել տուգանք 750.000 ՀՀ դրամի չափով:
Տուգանքը վճարելու համար սահմանել 12 ամիս ժամկետ՝ յուրաքանչյուր ամսում 62.500 ՀՀ դրամ վճարելու պայմանով:
Մարտին Ասրյանի նկատմամբ ընտրված խափանման միջոցը՝ բացակայելու արգելքը, վերացնել՝ մինչ դատավճռի օրինական ուժի մեջ մտնելը:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան ստանալու օրվանից հետո՝ մեկամսյա ժամկետում:


ԴԱՏԱՎՈՐ Դ.ԲԱԼԱՅԱՆ