ԵԴ1/2942/01/24




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«06» նոյեմբերի 2024թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ`
հանրային մեղադրող՝ Դավիթ Ներսիսյանի,
պաշտպան՝ Արսեն Խառատյանի,
մեղադրյալ՝ Հասսան Ահմեդի,
թարգմանիչ՝ Մարալ Զաքարյանի,

դռնբաց դատական նիստում, արագացված կարգով քննելով քրեական գործն ըստ մեղադրանքի`
Հասսան Թհաբեթ Մոհամեդ Ահմեդի`
ծնված՝ 15.08․1991թ․ Եգիպտոսի Արաբական Հանրապետության Գիզա քաղաքում, ազգությամբ արաբ, Եգիպտոսի Արաբական Հանրապետության քաղաքացի, բարձրագույն կրթությամբ, ամուսնացած, խնամքին մեկ անչափահաս երեխա, ըստ իր հայտարարության՝ խնամքին ունի ևս մեկ մանկահասակ երեխա, ՀՀ–ում աշխատանք չունի, նախկինում չդատված, ՀՀ-ում մշտական բնակության վայր չունի, ըստ իր հայտարարության՝ բնակվում է Երևան քաղաքի Տիգրան Մեծ 10 հասցեում գտնվող «Օլիմպիկ» հյուրանոցում ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով,

ՊԱՐԶԵՑ
1. Քրեական գործի դատավարական նախապատմությունը.
2024 թվականի սեպտեմբերի 05-ին ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության չորրորդ վարչությունում ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նախաձեռնվել է թիվ 58220124 քրեական վարույթը:
2024 թվականի սեպտեմբերի 05-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության դատախազ Դավիթ Ներսիսյանի որոշմամբ՝ թիվ 58220124 քրեական վարույթով Հասսան Թհաբեթ Մոհամեդ Ահմեդի նկատմամբ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով հարուցվել է հանրային քրեական հետապնդում:
2024 թվականի հոկտեմբերի 21-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/2942/01/24 քրեական գործն ըստ մեղադրանքի Հասսան Թհաբեթ Մոհամեդ Ահմեդի՝ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով։
Թիվ ԵԴ1/2942/01/24 քրեական գործն էլեկտրոնային եղանակով մակագրվել և 2024 թվականի հոկտեմբերի 22-ին հանձնվել է Երևան քաղաքի առաջին ատյանի ընդհանուր իրավասության քրեական դատարանի դատավոր Տաթևիկ Մուրադյանին:
2024 թվականի հոկտեմբերի 24-ին դատավոր Տաթևիկ Մուրադյանի կողմից որոշում է կայացվել թիվ ԵԴ1/2942/01/24 քրեական գործով վարույթն ստանձնելու և նախնական դատալսումներ նշանակելու մասին։
2024 թվականի նոյեմբերի 05-ին թիվ ԵԴ1/2942/01/24 քրեական գործով նախնական դատալսումների ընթացքում Դատարանը որոշել է մեղադրյալ Հասսան Թհաբեթ Մոհամեդ Ահմեդի նկատմամբ որպես խափանման միջոց կիրառել վարչական հսկողությունը՝ համակցված բացակայելու արգելք խափանման միջոցի հետ։

2. Մեղադրանքի փաստական նկարագրությունը.
Հասսան Թհաբեթ Մոհամեդ Ահմեդին մեղադրանք է ներկայացվել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով՝ այն բանի համար, որ «նա ՀՀ պետական սահմանն ապօրինի հատելու դիտավորությամբ, ապօրինի՝ առանց սահմանված փաստաթղթերի և պատշաճ թույլտվության, դեռևս չպարզված ժամանակ և հանգամանքներում ձեռք է բերել պետական մարմնի կողմից տրվող, իրավաբանական նշանակություն ունեցող փաստ հավաստող, իրավունք վերապահող փաստաթուղթ հանդիսացող իր անվամբ և լուսանկարով Իսպանիայի Թագավորության թիվ E23377498 սերիա–համարի կացության կեղծ քարտ, և վերը նշված կեղծ փաստաթուղթը 2024 թվականի սեպտեմբերի 5-ին՝ ժամը 02։36–ին, օգտագործելով՝ ներկայացնելով սահմանային վերահսկողության աշխատակիցներին, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, ապօրինի՝ առանց սահմանված փաստաթղթերի ու պատշաճ թույլտվության փորձել է հատել ՀՀ պետական սահմանը, սակայն նրա դիտավորության մեջ ընդգրկված հանցագործությունը նրա կամքից անկախ հանգամանքներում չի իրագործվել, քանի որ վերը ներկայացված կացության քարտի կեղծ լինելու հանգամանքը պարզվել է ՀՀ ԱԱԾ ՍԶ աշխատակիցների կողմից։»:

3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Հասսան Թհաբեթ Մոհամեդ Ահմեդը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Հանրային մեղադրողը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-րդ հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի 2024 թվականի սեպտեմբերի 05-ի Ձև 8 տեղեկանքը, համաձայն որի` Հասսան Թհաբեթ Մոհամեդ Ահմեդի վերաբերյալ ՀՀ ոստիկանության ինֆորմացիոն կենտրոնում տվյալներ չկան,
- Մեղադրյալի կողմից դատական նիստի ժամանակ ներկայացված՝ իր անչափահաս երեխայի ծննդյան վկայականի պատճենը և իր ամուսնության վկայականի պատճենը, համաձայն այդ փաստաթղթերը թարգմանչի կողմից բանավոր թարգմանության՝ մեղադրյալն ամուսնացած է, խնամքին ունի 17.02.2015թ․ ծնված երեխա։
4. Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
Հասսան Թհաբեթ Մոհամեդ Ահմեդը ՀՀ-ում նախկինում դատված չի եղել, ներկայացված մեղադրանքում իրեն լիովին մեղավոր է ճանաչել և զղջացել կատարածի համար, խնամքին ունի մեկ անչափահաս երեխա:

5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Հասսան Թհաբեթ Մոհամեդ Ահմեդին վերագրվող փաստական հանգամանքները (արարքները), այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, ինչպես նաև գտնում է, որ մեղադրյալ Հասսան Թհաբեթ Մոհամեդ Ահմեդի արարքների նկատմամբ պետք է կիրառվի ՀՀ քրեական օրենսգրքի 457-րդ հոդվածի 1-ին մասը և ՀՀ քրեական օրենսգրքի 44-469-րդ հոդվածի 1-ին մասը:
Դատարանի կողմից հաստատված փաստական հանգամանքների հիման վրա Դատարանը գտնում է, որ Հասսան Թհաբեթ Մոհամեդ Ահմեդի անձը բնութագրող հանգամանք է նախկինում դատված չլինելը:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Հասսան Թհաբեթ Մոհամեդ Ահմեդի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը), ինչպես նաև խնամքին մեկ անչափահաս երեխայի առկայությունը։
Դատարանը միաժամանակ արձանագրում է, որ Հասսան Թհաբեթ Մոհամեդ Ահմեդի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Դատարանը գտնում է, որ կատարած հանցանքների համար մեղադրյալ Հասսան Թհաբեթ Մոհամեդ Ահմեդը ենթակա է պատժի։
Դատարանը, հաշվի առնելով Հասսան Թհաբեթ Մոհամեդ Ահմեդի կատարած հանցանքների հանգամանքները, նրա անձը բնութագրող տվյալը, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 457-րդ հոդվածի 1-ին մասի և ՀՀ քրեական օրենսգրքի 44-469-րդ հոդվածի 1-ին մասի սանկցիաներով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործությունների կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 457-րդ հոդվածի 1-ին մասով հիմնական պատիժ պետք է նշանակել տուգանք՝ նվազագույն աշխատավարձի տասնապատիկի՝ 750.000 յոթ հարյուր հիսուն հազար ՀՀ դրամի չափով, իսկ ՀՀ քրեական օրենսգրքի 44-469-րդ հոդվածի 1-ին մասով հիմնական պատիժ պետք է նշանակել տուգանք՝ նվազագույն աշխատավարձի երեսնապատիկի՝ 2.250.000 երկու միլիոն երկու հարյուր հիսուն հազար ՀՀ դրամի չափով և և լրացուցիչ պատիժ՝ Հայաստանի Հանրապետության տարածքից վտարել իր մշտական բնակության երկիր և նրան արգելել գտնվել Հայաստանի Հանրապետությունում՝ 10 (տասը) տարի ժամկետով:
Դատարանը գտնում է, որ ՀՀ քրեական օրենսգրքի 74-րդ հոդվածի 1-ին մասի կիրառմամբ նշանակված պատիժները լրիվ գումարելու միջոցով Հասսան Թհաբեթ Մոհամեդ Ահմեդի նկատմամբ պետք է վերջնական պատիժ նշանակել տուգանք՝ 3.000.000 երեք միլիոն ՀՀ դրամի չափով՝ Հայաստանի Հանրապետության տարածքից վտարելով իր մշտական բնակության երկիր և նրան արգելելով գտնվել Հայաստանի Հանրապետությունում՝ 10 (տասը) տարի ժամկետով:
Հիմք ընդունելով ՀՀ քրեական օրենսգրքի 79-րդ հոդվածի 4-րդ մասը և հաշվի առնելով, որ մեղադրյալ Հասսան Թհաբեթ Մոհամեդ Ահմեդի 2024 թվականի սեպտեմբերի 05-ից մինչև 2024 թվականի նոյեմբերի 05-ը գտնվել է անազատության մեջ՝ Դատարանը գտնում է, որ նրա նկատմամբ նշանակված պատիժը պետք է մեղմացնել՝ վերջնական պատիժ նշանակելով տուգանք՝ 1.500.000 (մեկ միլիոն հինգ հարյուր հազար) ՀՀ դրամի չափով՝ Հայաստանի Հանրապետության տարածքից վտարելով իր մշտական բնակության երկիր և նրան արգելելով գտնվել Հայաստանի Հանրապետությունում՝ 10 (տասը) տարի ժամկետով:
Մեղադրյալի նկատմամբ հիմնական և լրացուցիչ պատիժ նշանակելիս, Դատարանը հաշվի է առնում հանցանքների բնույթը, մասնավորապես՝ դրանք ներառված են կառավարման կարգի դեմ ուղղված հանցագործությունների շարքում, ընդ որում՝ դրանցից մեկը հանդիսանում է միջին ծանրության հանցանք, և ոտնձգում են պետական կառավարման բնականոն գործունեության ապահովմանն ուղղված հասարակական հարաբերություններին, մեղադրյալի Եգիպտոսի Արաբական Հանրապետության քաղաքացի հանդիսանալը, Հայաստանի Հանրապետությունում մշտական բնակության վայր չունենալու, հյուրանոցում բնակվելու, գրանցված որևէ տեղ չաշխատելու հանգամանքները և Եգիպտոսի Արաբական Հանրապետությունում հաշվառման և մշտական բնակության վայր ունենալու հանգամանքը: Հարկ է նաև արձանագրել, որ Հասսան Թհաբեթ Մոհամեդ Ահմեդը Հայաստանի Հանրապետությունում փախստականի կամ ապաստան ստացածի կարգավիճակ չունի, ինչպես նաև բացակայում են վերջինիս Հայաստանի Հանրապետությունից վտարելուն խոչընդոտող՝ ՀՀ քրեական օրենսգրքի 62-րդ հոդվածի 6-րդ մասով նախատեսված հանգամանքները։
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-13-րդ կետերով նշված հարցերին անդրադառնալու անհրաժեշտությունը սույն քրեական վարույթով բացակայում է։
Ղեկավարվելով ՀՀ քրեական դատավարության օրենսգրքի 100-րդ հոդվածով՝ Դատարանը գտնում է, որ դատավճիռն օրինական ուժի մեջ մտնելուց հետո IPHONE 8 մոդելի բջջային հեռախոսը պետք է վերադարձնել մեղադրյալ Հասան Թհաբեթ Մոհամեդ Ահմեդին, իսկ E23377498 սերիա-համարի Իսպանիայի Թագավորության կացության քարտը պետք է պահել սույն քրեական վարույթի հետ միասին:
Դատարանը գտնում է, որ Հասան Թհաբեթ Մոհամեդ Ահմեդի նկատմամբ ընտրված խափանման միջոց վարչական հսկողությունը՝ համակցված բացակայելու արգելք խափանման միջոցի հետ պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4 հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 100-րդ, 347-350-րդ, 352-353-րդ, 364-րդ, 464.4 և 464.5 հոդվածներով` Դատարանը

ՎՃՌԵՑ

Հասան Թհաբեթ Մոհամեդ Ահմեդին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նախատեսված հանցանքներում:
ՀՀ քրեական օրենսգրքի 457-րդ հոդվածի 1-ին մասով նախատեսված հանցագործության կատարման համար Հասան Թհաբեթ Մոհամեդ Ահմեդի նկատմամբ պատիժ նշանակել տուգանք՝ նվազագույն աշխատավարձի տասնապատիկի՝ 750.000 յոթ հարյուր հիսուն հազար ՀՀ դրամի չափով:
ՀՀ քրեական օրենսգրքի 44-469-րդ հոդվածի 1-ին մասով նախատեսված հանցագործության կատարման համար Հասան Թհաբեթ Մոհամեդ Ահմեդի նկատմամբ պատիժ նշանակել տուգանք՝ նվազագույն աշխատավարձի երեսնապատիկի՝ 2.250.000 երկու միլիոն երկու հարյուր հիսուն հազար ՀՀ դրամի չափով՝ Հայաստանի Հանրապետության տարածքից վտարելով իր մշտական բնակության երկիր և նրան արգելելով գտնվել Հայաստանի Հանրապետությունում՝ 10 (տասը) տարի ժամկետով:
ՀՀ քրեական օրենսգրքի 74-րդ հոդվածի 1-ին մասի կիրառմամբ նշանակված պատիժները լրիվ գումարելու միջոցով Հասան Թհաբեթ Մոհամեդ Ահմեդի նկատմամբ վերջնական պատիժ նշանակել տուգանք՝ 3.000.000 երեք միլիոն ՀՀ դրամի չափով՝ Հայաստանի Հանրապետության տարածքից վտարելով իր մշտական բնակության երկիր և նրան արգելելով գտնվել Հայաստանի Հանրապետությունում՝ 10 (տասը) տարի ժամկետով:
ՀՀ քրեական օրենսգրքի 79-րդ հոդվածի 4-րդ մասի կիրառմամբ Հասան Թհաբեթ Մոհամեդ Ահմեդի նկատմամբ նշանակված պատիժը մեղմացնել և վերջնական պատիժ նշանակել տուգանք՝ 1.500.000 (մեկ միլիոն հինգ հարյուր հազար) ՀՀ դրամի չափով՝ Հայաստանի Հանրապետության տարածքից վտարելով իր մշտական բնակության երկիր և նրան արգելելով գտնվել Հայաստանի Հանրապետությունում՝ 10 (տասը) տարի ժամկետով:
Հասան Թհաբեթ Մոհամեդ Ահմեդի նկատմամբ ընտրված խափանման միջոց վարչական հսկողությունը՝ համակցված բացակայելու արգելք խափանման միջոցի հետ թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ IPHONE 8 մոդելի բջջային հեռախոսը վերադարձնել մեղադրյալ Հասան Թհաբեթ Մոհամեդ Ահմեդին։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված՝ E23377498 սերիա-համարի Իսպանիայի Թագավորության կացության քարտը պահել սույն քրեական վարույթի հետ միասին:
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ