ԵԴ1/2916/01/24


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«20» Նոյեմբերի 2024թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ՆԱՐԵԿ ԹՈՓՈՒԶՅԱՆԻ
մեղադրյալ՝ ԿԱՐԵՆ ՄԻՔԱՅԵԼՅԱՆԻ
դռնբաց դատական նիստում քննելով քրեական գործն ըստ մեղադրանքի՝ Կարեն Արմենի Միքայելյանի(1) ՀՀ քրեական օրենսգրքի 344 հոդվածի 1-ին մասով և 344 հոդվածի 2-րդ մասով.




1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60216123 քրեական վարույթով (որին միացվել է թիվ 60019423 քրեական վարույթը) Կարեն Արմենի Միքայելյանին ՀՀ քրեական օրենսգրքի 344 հոդվածի 2-րդ մասով և 344 հոդվածի 1-ին մասով մեղադրանք է ներկայացվել հետևյալ արարքների համար.
«[Նա] 1 տարի ժամկետով զրկված լինելով տրանսպորտային միջոցներ վարելու իրավունքից, 2023 թվականի հունվարի 28-ին՝ ժամը՝ 23:19-ի սահմաններում, գտնվելով 0.433 մգ/լ ալկոհոլային խմիչք օգտագործած, ոչ սթափ վիճակում, Երևան քաղաքի Գայի պողոտայում վարել է «Տոյոտա» մակնիշի 10 AM 010 հաշվառման համարանիշի տրասնպորտային միջոցը, ինչի վերաբերյալ կազմվել է վարչական իրավախախտման վերաբերյալ թիվ 8180243897 արձանագրությունը։
(...)
Բացի այդ, Կարեն Արմենի Միքայելյանը 1 տարի ժամկետով զրկված լինելով տրանսպորտային միջոցներ վարելու իրավունքից, 2023 թվականի սեպտեմբերի 1-ին՝ ժամը՝ 17:50-ի սահմաններում, Երևան քաղաքի Բագրևանդ փողոցում վարել է «Տոյոտա» մակնիշի 10 AM 010 հաշվառման համարանիշի տրասնպորտային միջոցը, ինչի վերաբերյալ կազմվել է վարչական իրավախախտման վերաբերյալ թիվ 8180264533 արձանագրությունը»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Զննում կատարելու մասին» 2024 թվականի օգոստոսի 13-ի արձանագրության համաձայն.
«2022 թվականի հոկտեմբերի 13-ին՝ ժամը 14:26-ին, Երևան քաղաքի Գայի պողոտայում ՀՀ ՆԳՆ ոստիկանության պարեկային ծառայության Երևան քաղաքի գնդի ավագ պարեկ Ռոբերտ Եղիազարյանի /կրծքանշան թիվ 07983/ կողմից կազմվել է վարչական իրավախախտման վերաբերյալ թիվ 8200323477 արձանագրությունը, համաձայն որի՝ Կարեն Արմենի Միքայելյանը (ծնված 10.12.1997թ., բնակվող՝ ք.Երևան, Նոր-Նորք, Ն.Ստեփանյան 59 փողոց 11 տուն հասցեում) 2022 թվականի հոկտեմբերի 13- ին ժամը 14:20-ին՝ «ԲՄՎ» մակնիշի 36 DT 902 հաշվառման համարանիշի տրանսպորտային միջոցը երթևեկել է անվտանգության գոտիով չամրակապված:
Քաղաքացին ստորագրել է և ստացել որոշման իր օրինակը։
Նույն որոշմամբ Կարեն Արմենի Միքայելյանը զրկվել է տրանսպորտային միջոց վարելու իրավունքից 1 տարի ժամկետով։
2023 թվականի հունվարի 28-ին՝ ժամը 23:24-ին, Երևան քաղաքի Մոլդավական փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի պարեկ Վարդան Խոցանյանի կողմից կազմվել է վարչական իրավախախտման վերաբերյալ թիվ 8180243897 արձանագրությունը, համաձայն որի՝ Կարեն Արմենի Միքայելյանը (ծնված 10.12.1997թ., բնակվող՝ ք.Երևան, Նոր-Նորք, Ն.Ստեփանյան 59 փողոց 11 տուն հասցեում) 2023 թվականի հունվարի 28-ին՝ ժամը 23:19-ի սահմաններում, տրանսպորտային միջոցներ վարելու իրավունքից զրկված և ոչ սթափ վիճակում վարել է «Տոյոտա» մակնիշի 10 AM 010 հաշվառման համարանիշի տրանսպորտային միջոցը:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
Արձանագրությանը, իրավունքների և պարտականությունների ծանոթանալու հատվածում առկա է ստորագրություն և «Միքայելյան» գրառումը:
Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված՝ 68 թիվը:
Ալկոհոլի պարունակության ստուգման կտրոնի զննությամբ պարզվեց, որ ստուգաչափման սարքի համարն է՝ 91101095, զննման համարը՝ 00129, զննման ամսաթիվը՝ 28.01.2023թ., զննման ժամը՝ 23:20:47, վերջին ստուգաչափման ամսաթիվը՝ 07.12.2022թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0,433 մգ/լ, վարորդի անունն է՝ Կարեն, ազգանունը՝ Միքայելյան, տրանսպորտային միջոցի համարանիշը՝ 10 AM 010, ՃՈ տեսուչի ազգանունը՝ Պողոսյան, կրծքանշանի համարը՝ 05490, ստորաբաժանումը՝ 3-րդ գումարտակ, 3-րդ վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ի կողմից տրված թիվ 085661 ստուգաչափման վկայականի զննությամբ պարզվեց, որ վկայականն ուժի մեջ է 2022 թվականի դեկտեմբերի 7-ից մինչև 2023 թվականի դեկտեմբերի 7-ը, ստուգաչափման սարքի գործարանային համարն է 91101095, տեսակը՝ Jupiter X/RP, չափման տիրույթը՝ 0.000÷0.200մգ/լ, ճշտության դասը, կարգը /սխալանքը/ 5-±10%, արտադրողը՝ Չինաստան, պատկանում է «ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU 2835-2008 MП, ստուգաչափող անվան դիմաց առկա է ստորագրություն և նշված է Ա.Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
2023 թվականի սեպտեմբերի 1-ին՝ ժամը 17:55-ին, Երևան քաղաքի Բագրևանդի փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 2-րդ վաշտի կրտսեր պարեկ Վահե Մարտոյանի կողմից կազմվել է վարչական իրավախախտման վերաբերյալ թիվ 8180264533 արձանագրությունը, համաձայն որի՝ Կարեն Արմենի Միքայելյանը (ծնված 10.12.1997թ., բնակվող` ք.Երևան, Նոր-Նորք, Ն.Ստեփանյան 59 փողոց 11 տուն հասցեում) 2023 թվականի սեպտեմբերի 1-ին` ժամը 17:50-ի սահմաններում, տրանսպորտային միջոցներ վարելու իրավունքից զրկված վիճակում վարել է «Տոյոտա» մակնիշի 10 AM 010 հաշվառման համարանիշի տրանսպորտային միջոցը։
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
Արձանագրությանը, իրավունքներին և պարտականություններին ծանոթանալու հատվածում առկա է ստորագրություն:
Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված՝ 201.1 թիվը:
ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության զննությամբ պարզվեց, որ Կարեն Արմենի Միքայելյանի ՀԾՀ 2012970818/ անվամբ վարորդական իրավունքի վկայական եղել է զրկված կարգավիճակում 2022 թվականի նոյեմբերի 14-ից մինչև 2023 թվականի նոյեմբերի 14-ը և մինչև իրավախախտման արձանագրումը գործող վարորդական իրավունքի վկայական առկա չէ։
Զննությամբ քննությանը հետաքրքրություն ներկայացնող այլ տվյալներ չհայտնաբերվեցին»:(2)
2.2 Կարեն Արմենի Միքայելյանը ներկայացված մեղադրանքում իրեն մեղավոր ճանաչեց և, օգտվելով իր սահմանադրական իրավունքից, հրաժարվեց դատարանում ցուցմունք տալուց: Կարեն Միքայելյանը հրաժարվեց նաև նախաքննության ընթացքում պաշտպանի բացակայությամբ տված ցուցմունքներից:
ԼՐԱՑՈՒՑԻՉ ԴԱՏԱԼՍՈՒՄՆԵՐ

2.3 Դատվածությունների և հետախուզման առկայության Ձև 8 հարցման պատասխանի համաձայն՝ Կարեն Արմենի Միքայելյանը նախկինում դատապարտված չի եղել։
2.4 ՀՀ պետական եկամուտների կոմիտեի հարկ վճարողների սպասարկման վարչության պետի 2024 թվականի հոկտեմբերի 25-ի գրության համաձայն՝ Կարեն Արմենի Միքայելյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Կարեն Արմենի Միքայելյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ։
2.5 Պատժի վերաբերյալ հարցերը քննարկելիս հանրային մեղադրող Նարեկ Թոփուզյանը Դատարանին խնդրեց Կարեն Միքայելյանի նկատմամբ 2023 թվականի սեպտեմբերի 1-ին կատարված հանցանքի համար որպես պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի չափով:
2.6 Մեղադրյալն, ըստ էության, հրաժարվեց հանրային աշխատանքներ կատարելուց և Դատարանին խնդրեց տուգանքի ձևով պատժի նշանակելու դեպքում դրա վճարումը տարաժամկետել 1 տարով:
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանն արձանագրում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարել, որ.
ա) Կարեն Արմենի Միքայելյանը 1 տարի ժամկետով զրկված լինելով տրանսպորտային միջոցներ վարելու իրավունքից, 2023 հունվարի 28-ին՝ ժամը 23:19-ի սահմաններում, Երևան քաղաքի Գայի պողոտայում վարել է «Տոյոտա» մակնիշի 10 AM 010 հաշվառման համարանիշի տրանսպորտային միջոցը։
բ) Կարեն Արմենի Միքայելյանը 1 տարի ժամկետով զրկված լինելով տրանսպորտային միջոց վարելու իրավունքից՝ 2023 թվականի սեպտեմբերի 1-ին՝ ժամը 17։50-ի սահմաններում, Երևան քաղաքի Բագրևանդ փողոցում վարել է «Տոյոտա» մակնիշի 10 AM 010 հաշվառման համարանիշի տրանսպորտային միջոցը։
3.2 Հիմնական դատալսումների ընթացքում հետազոտված ապացույցները ստուգելու և գնահատելու արդյունքում՝ Դատարանը հաստատված չի համարում Կարեն Արմենի Միքայելյանի կողմից 2023 հունվարի 28-ին՝ ժամը 23։19-ի սահմաններում, տրանսպորտային միջոցը ոչ սթափ վիճակում վարելու հանգամանքը, քանի որ Jupiter X/RP տեսակի 91101095 համարի ալկոմետրի միջոցով իրականացված սթափության վիճակի ստուգմամբ նրա արտաշնչած 1 լիտր օդի մեջ ալկոհոլի պարունակությունը կազմել է 0.433 մգ/լ, մինչդեռ, թիվ 085661 ստուգաչափման վկայականի համաձայն՝ Jupiter X/RP 91101095 ալկոմետրի չափման տիրույթի առավելագույն շեմը եղել է 0.200 մգ/լ-ը։ Ավելին՝ թիվ 085661 ստուգաչափման վկայականի վրա առկա չէ ստուգաչափողի եւ ստորաբաժանման ղեկավարի կողմից կնիքով վավերացված՝ ստուգաչափման վկայականում հայտնաբերված սխալների փոփոխության վերաբերյալ նշում:(3)
Հիմնական դատալսումների ընթացքում ստուգաչափող սարքի վերաբերյալ հետազոտված ապացույցն (ապացույցի հատվածն) արժանահավատ չէ, դրա ճշմարտացիությունը կասկած է հարուցում, քանի որ Jupiter X/RP 91101095 ալկոմետրով արձանագրվել է դրա ստուգաչափման տիրույթն ավելի քան երկու անգամ գերազանցող ցուցանիշ, որը 91101095 համարի ալկոմետրն արձանագրել չէր կարող. այն սխալ է, ինչը նշանակում է, որ հնարավոր չէ ասել, թե 2023 հունվարի 28-ին՝ ժամը 23։19-ի սահմաններում, որքան է կազմել Կարեն Արմենի Միքայելյանի արտաշնչած 1 լիտր օդի մեջ ալկոհոլի պարունակությունը և արդյոք այն գերազանցել է «Վարչական իրավախախտումների վերաբերյալ» ՀՀ օրենսգրքի 126 հոդվածի 9-րդ մասով սահմանված թույլատրելի շեմը։
ՀՀ քրեական դատավարության օրենսգրքի 17 հոդվածի 4-րդ մասի համաձայն.
«Մեղադրանքն ապացուցված լինելու վերաբերյալ բոլոր ողջամիտ կասկածները, որոնք չեն փարատվել սույն օրենսգրքի դրույթներին համապատասխան պատշաճ իրավական ընթացակարգի շրջանակներում, մեկնաբանվում են հօգուտ մեղադրյալի»։
Վերոգրյալի հիման վրա Դատարանն արձանագրում է, որ հիմնական դատալսումներում պատշաճ իրավական ընթացակարգերի շրջանակներում ապացույցների հետազոտումից հետո Կարեն Միքայելյանի կողմից 2023 հունվարի 28-ին՝ ժամը 23։19-ի սահմաններում, տրանսպորտային միջոցը ոչ սթափ՝ հարբած վիճակում վարելու վերաբերյալ մեղադրանքի ապացուցվածության վերաբերյալ կասկածները շարունակում են պահպանվել, հետևաբար դրանք պետք է մեկնաբանել հօգուտ մեղադրյալի:
3.3 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-ներկայացված մեղադրանքում Կարեն Արմենի Միքայելյանն իրեն լիովին մեղավոր է ճանաչել:
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2024 թվականի նոյեմբերի 20-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Կարեն Արմենի Միքայելյանին վերագրվող արարքները (2023 թվականի հունվարի 28-ի արարքն առանց հարբած վիճակի), այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ սահմանելով, որ 2023 թվականի սեպտեմբերի 1-ին Կարեն Միքայելյանի կատարած արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 1-ին մասը։
Դատարանը 2024 թվականի նոյեմբերի 20-ին կայացված մեղադրական վերդիկտի հիման վրա փոխել է մեղադրյալին մեղսագրված՝ 2023 թվականի հունվարի 28-ին կատարված արարքին ՀՀ քրեական օրենսգրքի 344 հոդվածի 2-րդ մասով տրված իրավական գնահատականը՝ քանի որ այդ մասով Դատարանի կողմից հաստատված փաստական հանգամանքները՝ Կարեն Արմենի Միքայելյանի կողմից 1 տարի ժամկետով զրկված լինելով տրանսպորտային միջոցներ վարելու իրավունքից, 2023 հունվարի 28-ին՝ ժամը 23:19-ի սահմաններում, Երևան քաղաքի Գայի պողոտայում «Տոյոտա» մակնիշի 10 AM 010 հաշվառման համարանիշի տրանսպորտային միջոցը վարելը, դուրս չեն մեղադրանքի հիմքում դրված փաստական հանգամանքների շրջանակից, տվյալ հարցը պատշաճ իրավական ընթացակարգի շրջանակներում քննարկվել է կողմերի հետ, իսկ դատավճռի 3.2 կետում նշված վերլուծությունների, ինչպես նաև Դատարանի կողմից հերքված փաստական հանգամանքների պայմաններում Կարեն Արմենի Միքայելյանին վերագրվող ապացուցված այդ արարքի նկատմամբ ևս ենթակա է կիրառման ՀՀ քրեական օրենսգրքի 344 հոդվածի 1-ին մասը։
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ Կարեն Արմենի Միքայելյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը, քանի որ մեղքն ընդունելը, որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը, զղջացել է դրա համար: Մեղքն ընդունելու պարագայում քրեական պատժի նպատակների իրացումը, այդ թվում` պատժի ենթարկված անձին ուղղելու հավանականությունը, զգալիորեն բարձրանում է:
Դատարանն արձանագրում է, որ Կարեն Արմենի Միքայելյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքների համար մեղադրյալ Կարեն Արմենի Միքայելյանը ենթակա է պատժի։
4.4 Դատապարտված մեղադրյալի նկատմամբ նշանակվող պատժի տեսակն ու չափը որոշելիս՝ Դատարանը հաշվի է առնում հետևյալը՝
-Կարեն Արմենի Միքայելյանի կատարած հանցանքների հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքները դասվում են ոչ մեծ ծանրության հանցագործությունների շարքին։
-Կարեն Արմենի Միքայելյանի անձը բնութագրող տվյալները, պատասխանատվությունը և պատիժը մեղմացնող հանգամանքի առկայությունն ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Կարեն Արմենի Միքայելյանի կողմից կատարված հանցագործությունների բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է՝ ՀՀ քրեական օրենսգրքի 344 հոդվածի 1-ին մասով նախատեսված հանցանքներից յուրաքանչյուրի համար հնգապատիկի չափով տուգանքը։
Հիմք ընդունելով ՀՀ քրեական օրենսգրքի 59 հոդվածի 5-րդ մասը, և հաշվի առնելով մեղսագրվող հանցանքն ավարտվելու օրվան նախորդող 12 ամիսների ընթացքում Կարեն Արմենի Միքայելյանի եկամտի վերաբերյալ դատավճռի 2.4 կետում նշված տվյալները՝ տուգանքի չափը պետք է հաշվարկել հանցանքները կատարելու պահին՝ 2023 թվականի հունվարի 28-ին և 2023 թվականի սեպտեմբերի 1-ին, ՀՀ նվազագույն աշխատավարձի՝ 75.000 (յոթանասունհինգ հազար) ՀՀ դրամի չափով:
Այսպիսով,
-ՀՀ քրեական օրենսգրքի 344 հոդվածի 1-ին մասով նախատեսված 2023 թվականի հունվարի 28-ին կատարված հանցանքի համար Կարեն Միքայելյանի նկատմամբ պետք է պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով,
-ՀՀ քրեական օրենսգրքի 344 հոդվածի 1-ին մասով նախատեսված 2023 թվականի սեպտեմբերի 1-ին կատարված հանցանքի համար Կարեն Միքայելյանի նկատմամբ պետք է պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
• ՀՀ քրեական օրենսգրքի 74 հոդվածով սահմանված կարգով՝ նշանակվող պատիժները պետք է լրիվ գումարել և Կարեն Արմենի Միքայելյանի նկատմամբ վերջնական պատիժ նշանակել տուգանք՝ 750.000 (յոթ հարյուր հիսուն հազար) ՀՀ դրամի չափով:
Հիմք ընդունելով ՀՀ քրեական օրենսգրքի 59 հոդվածի 8-րդ մասը, հաշվի առնելով մեղադրյալ Կարեն Արմենի Միքայելյանի եկամտի վերաբերյալ ստացված տվյալը, ինչպես նաև տուգանքի վճարման համար ժամկետ սահմանելու մասին վերջինի խնդրանքը՝ Դատարանը գտնում է, որ նշանակված տուգանքի վճարման ժամկետ պետք է սահմանել առավելագույնը՝ 1 (մեկ) տարի:
• Միևնույն ժամանակ, Դատարանն արձանագրում է, որ կատարած հանցանքների համար Կարեն Միքայելյանի նկատմամբ լրացուցիչ պատիժ նշանակելու հիմքերն ու անհրաժեշտությունը տվյալ դեպքում բացակայում են։
4.5 Կարեն Արմենի Միքայելյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.6 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.7 Կարեն Արմենի Միքայելյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.8 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Կարեն Արմենի Միքայելյանին մեղավոր ճանաչել ՀՀ քրեական օրենսգրքի 344 հոդվածի 1-ին մասով նախատեսված թվով երկու հանցանքները կատարելու մեջ։
-ՀՀ քրեական օրենսգրքի 344 հոդվածի 1-ին մասով նախատեսված 2023 թվականի հունվարի 28-ին կատարված հանցանքի համար Կարեն Միքայելյանի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
-ՀՀ քրեական օրենսգրքի 344 հոդվածի 1-ին մասով նախատեսված 2023 թվականի սեպտեմբերի 1-ին կատարված հանցանքի համար Կարեն Միքայելյանի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
2. Նշանակված պատիժները լրիվ գումարել և Կարեն Միքայելյանի նկատմամբ վերջնական պատիժ նշանակել տուգանք՝ 750.000 (յոթ հարյուր հիսուն հազար) ՀՀ դրամի չափով:
3. Տուգանքի վճարման ժամկետ սահմանել առավելագույնը՝ 1 (մեկ) տարի:
4. Կարեն Միքայելյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
5. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ


(1)Ծնված՝ 1997 թվականի դեկտեմբերի 10-ին Երևան քաղաքում, ազգությամբ հայ, ՀՀ քաղաքացի, միջին մասնագիտական կրթությամբ (ըստ իր հայտարարության սովորել է զարդարվեստի քոլեջում), չամուսնացած, նախկինում չդատապարտված, ըստ իր հայտարարության մասնակցում է ընտանեկան ձեռնարկատիրական գործունեությանը և ամսական վաստակում է շուրջ 150.000 ՀՀ դրամ, հաշվառված է և բնակվում է Երևան քաղաքի Նոր Նորքի 2-րդ զանգվածի Նելսոն Ստեփանյան փողոցի 11 շենքի 59 բնակարանում, որպես խափանման միջոց է կիրառված բացակայելու արգելքը:
(2)Տե՛ս, քրեական գործ, հատոր 1, թերթեր 31-33:
(3)Տե՛ս ՀՀ տնտեսական զարգացման և ներդրումների նախարարի 2018 թվականի փետրվարի 19-ի թիվ 133-Ն հրամանի 3-րդ կետի 1-ին ենթակետով հաստատված՝ չափման միջոցի ստուգաչափման կազմակերպման և իրականացման կարգի 29 կետը։