Գործ ԵԴ1/2828/01/24





Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆԸ

նախագահությամբ՝ դատավոր Ս.ՅՈՒԶԲԱՇՅԱՆԻ
քարտուղարությամբ՝ Լ.ՂԱԶԱՐՅԱՆԻ
մասնակցությամբ`
հանրային մեղադրողներ՝ ՀՀ գլխավոր դատախազության
սահմանադրական կարգի հիմունքների,
պետության և հասարակական
անվտանգության դեմ ուղղված
հանցագործությունների գործերով
վարչության դատախազ
Ա.ԴԱՆԻԵԼՅԱՆԻ
պաշտպաններ Ս.ՍԱՀԱԿՅԱՆԻ
Ա.ԱՍԱՏՐՅԱՆԻ
մեղադրյալ Մ.ԴԱԼԼԱՀԻ
թարգմանիչ Մ.ԶԱՔԱՐՅԱՆԻ

2025 թվականի մարտի 31-ին, Երևան քաղաքում, դռնբաց դատական նիստում քննության առնելով քրեական գործն ըստ մեղադրանքի՝
Մոհամադ Ադնանի Աբոու Դալլահի՝ ծնված՝ 02.04.1996թ., ազգությամբ արաբ, Լիբանանի Հանրապետության քաղաքացի, միջնակարգ կրթությամբ, չի աշխատում, չամուսնացած, խնամքին ոչ ոք, դատվածություն չունեցող, հաշվառված և բնակվող՝ Լիբանանի Հանրապետություն, Յարին գյուղի 57 հասցեում, մեղադրվում է ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով, որպես խափանման միջոց է կիրառված կալանքը:

1. Գործի դատավարական նախապատմությունը.
1.1 2024 թվականի օգոստոսի 31-ին կազմվել է Մոհամադ Ադնանի Աբոու Դալլահի ձերբակալման արձանագրությունը /հատոր 1-ին, գ.թ. 13-18/:
1.2 Նույն օրը ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչությունում ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով նախաձեռնվել է թիվ 58219724 քրեական վարույթը /հատոր 1-ին, գ.թ. 21-22/:
1.3 Նույն օրը որոշում է կայացվել հանցանք կատարած լինելու անմիջականորեն ծագած կասկածի առկայության դեպքում է Մ.Դալլահին ձերբակալելու մասին /հատոր 1-ին, գ.թ. 31-32/:
1.4 2024 թվականի օգոստոսի 31-ին թիվ 58219724 քրեական վարույթով Մոհամադ Ադնանի Աբոու Դալլահի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով ու նույն օրը նրան մեղադրանք է ներկայացվել /հատոր 1-ին, գ.թ. 47-49, 51-56/:
1.5 2024 թվականի սեպտեմբերի 02-ին Դատարանի թիվ ԵԴ1/1401/06/24 որոշմամբ Մոհամադ Ադնանի Աբոու Դալլահի նկատմամբ որպես խափանման միջոց է կիրառվել կալանքը /հատոր 1-ին, գ.թ. 86-102/:
1.6 2024 թվականի հոկտեմբերի 02-ին կազմվել է թիվ 58219724 քրեական վարույթով մեղադրական եզրակացությունը /հատոր 1-ին, գ.թ. 180-192/։
1.7 2024 թվականի հոկտեմբերի 11-ին որոշում է կայացվել մեղադրական եզրակացությունը հաստատելու մասին։
1.8 2024 թվականի հոկտեմբերի 11-ին թիվ 58219724 քրեական գործը մուտք է եղել դատարան, էլեկտրոնային եղանակով նույն օրը թիվ ԵԴ1/2828/01/24 համարի ներքո մակագրվել և նույն թվականի հոկտեմբերի 14-ին հանձնվել է դատավոր Ս.Յուզբաշյանին։
1.9 2024 թվականի հոկտեմբերի 15-ին որոշում է կայացվել քրեական գործով վարույթն ստանձնելու և նախնական դատալսումներ նշանակելու մասին։
1.10 2024 թվականի հոկտեմբերի 31-ին որոշում է կայացվել մեղադրյալ Մոհամադ Ադնանի Աբոու Դալլահի նկատմամբ որպես խափանման միջոց կիրառված կալանքը 3 /երեք/ ամիս ժամկետով՝ մինչև 2025 թվականի հունվարի 31-ը երկարաձգելու մասին:
1.11 2024 թվականի հոկտեմբերի 31-ին որոշում է կայացվել հիմնական դատալսումներ նշանակելու մասին:
1.12 2025 թվականի հունվարի 21-ին որոշում է կայացվել մեղադրյալ Մոհամադ Ադնանի Աբոու Դալլահի նկատմամբ որպես խափանման միջոց կիրառված կալանքը 3 /երեք/ ամիս ժամկետով՝ մինչև 2025 թվականի ապրիլի 30-ը երկարաձգելու մասին:
1.13 2025 թվականի մարտի 31-ին կայացվել է մեղադրական վերդիկտ և նույն օրը որոշում է կայացվել լրացուցիչ դատալսումներ նշանակելու մասին:

2. Մեղադրանքի փաստական նկարագրությունը.
2.1 Մոհամադ Ադնանի Աբոու Դալլահին ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով մեղադրանք է ներկայացվել պատժի սպառնալիքով արգելված, մեղավորությամբ կատարված այն արարքների կատարման համար, որ նա, «2024 թվականի օգոստոսի 27-ին Լիբանանի քաղաքացու, իր տվյալներով LR3635048 համարի անձնագրով մուտք գործելով Հայաստանի Հանրապետություն և նպատակ ունենալով կեղծ փաստաթղթերի օգտագործմամբ և առանց սահմանված փաստաթղթերի Հայաստանի Հանրապետության պետական սահմանն ապօրինի հատելու եղանակով 2024 թվականի օգոստոսի 31-ին Երևանից մեկնել Վիեննա, քրեական վարույթով չպարզված ժամանակ և հանգամանքներում ձեռք է բերել պետական հողմից տրվող, իրավաբանական նշանակություն ունեցող փաստ հավաստող, իրավունք վերապահող փաստաթուղթ հանդիսացող 02.04.1996թ. ծնված Մոհամադ Ադնանի Աբոու Դալլահ տվյալներով Իսպանիայի Թագավորության E21909534 համարի կեղծ կացության քարտը, ապա նշված կեղծ կացության քարտն օգտագործելու եղանակով ՀՀ պետական մարմանն ապօրինի հատելու դիտավորությամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, 2024 թվականի օգոստոսի 31-ին` ժամը 04:17-ին, Երևան-Վիեննա թիվ 9828 չվերթով մեկնելիս «Զվարթնոց» սահմանային անցակետում ուղևորների սահմանային վերահսկողության ժամանակ, ներկայացրել է վերը նշված կեղծ կացության քարտը և այդ կերպ օգտագործելով կեղծ փաստաթուղթը, փորձել է առանց սահմանված փաստաթղթի և պատշաճ թույլտվության ապօրինի հատել Հայաստանի Հանրապետության պետական սահմանը, սակայն կացության քարտի կեղծ լինելու հանգամանքը հայտնաբերվել է և վերջինիս դիտավորության մեջ ընդգրկված ՀՀ պետական սահմանն ապօրինի հատելը նրա կամքից անկախ հանգամանքներով չի իրագործվել, քանի որ նշված հանցանքը կանխվել է սահմանային վերահսկողության իրականացնող ՀՀ ԱԱԾ աշխատակիցների կողմից»:

3. Հիմնական դատալսումների ընթացքում հետազոտված թույլատրելի ապացույցները.
3.1 Փորձագետի 2024 թվականի հոկտեմբերի 04-ի թիվ 28002401 եզրակացությունը, համաձայն որի՝ փորձաքննությանը տրամադրված Մոհամադ Ադնանի Աբոու Դալլահի /ABOU DALLAH MOHAMAD ADNAN/ անվամբ լրացված Լիբանանի Հանրապետության քաղաքացու «LR3635048» սերիական համարն ունեցող անձնագիրը համապատասխանում է Լիբանանի Հանրապետության պետական ստանդարտ թողարկմանը: Փորձաքննությանը տրամադրված Մոհամադ Ադնանի Աբոու Դալլահի /ABOU DALLAH MOHAMAD ADNAN/ անվամբ լրացված Լիբանանի Հանրապետության քաղաքացու «LR3635048» սերիական համարն ունեցող անձնագրի 46-րդ էջին, ինչպես նաև 13-րդ էջին՝ ՀՀ մուտքի արտոնագրի հատվածում տեղավորված ուղղանկյունաձև կնիքների դրոշմները թողնվել են ժամանակակից սարքավորումների և տեխնիկական միջոցների օգտագործմամբ պատրաստված կնիքներով: Փորձաքննությանը տրամադրված Մոհամադ Աբոու Դալլահի /ABOU DALLAH Mohamad/ անվամբ լրացված Իսպանիայի Թագավորության «E21909534» սերիական համարն ունեցող կացության քարտը չի համապատասխանում Իսպանիայի Թագավորության պետական ստանդարտ թողարկմանը: Փորձաքննությանը տրամադրված Մոհամադ Աբոու Դալլահի /ABOU DALLAH Mohamad/ անվամբ լրացված Իսպանիայի Թագավորության «E21909534» սերիական համարն ունեցող կացության քարտի ձևաթուղթը կատարվել է օֆսեթ տպագրության, իսկ լուսանկարը, քաղաքացու անձնական տվյալները նշող տպագիր գրառումները, քարտի սերիական և հերթական համարները նշող գրառումները, դիմերեսի ստորին մասում՝ «REZIDENCE PERMIT/TITRE DE SEJOUR» տպագիր գրառման վերին հատվածում տեղավորված ստորագրությունը, դիմերեսի վերին մասում կատարված «PERMISO DE RESSIDENCE» տպագիր գրառումը, դարձերեսին կատարված՝ ձևաթղթի մասը չկազմող տպագիր գրառումներն ու վերի անկյունում գտնվող լուսանկարը, ինչպես նաև դարձերեսի ստորին մասում առկա տպագիր գրառումը՝ լազերային փորագրության եղանակով /հատոր 1-ին գ.թ. 4, դատական նիստի արձանագրություն/:
3.2 Զննում կատարելու մասին 2024 թվականի սեպտեմբերի 02-ի արձանագրությունը և կից հավելվածները, համաձայն որի՝ «Մոհամադ Աբոու Դալլահի անձնագիրը», «Իսպանական կացության քարտը» համանուն փաթեթները բացելուց հետո դրանից դուրս բերվեցին համապատասխանաբար Աբոու Դալլահ Մոհամադ Ադնանի, ծնված 02.04.1996թ. Լիբանանի Հանրապետության քաղաքացու LR3635048 համարի անձնագիրը և Աբոու Դալահ Մոհամադ, ծնված 02.04.1996թ. Իսպանիայի Թագավորության E21909534 համարի կացության քարտը: Հիշյալ փաստաթղթերի հետաքրքրություն ներկայացնող թերթերը պատճենահանվեցին և «Հավելված 1»-ի տեսքով կցվեցին սույն արձանագրությանը:
«Հավելված 1»-ի զննությամբ պարզվեց, որ 2024 թվականի հուլիսի 19-ին Աբոու Դալլահին Մոհամադ Ադնանիին՝ ծնված 02.04.1996թ., Լիբանանի Հանրապետության Յարին գյուղում, տրվել է Լիբանանի Հանրապետության LR3635048 համարի անձնագիրը, որը վավերական է մինչև 2034 թվականի հուլիսի 18-ը՝ 10 տարի ժամկետով: Անձնագրի 12-րդ էջում առկա է հայկական վիզա, համաձայն որի՝ Աբոու Դալլահ Մոհամադը 2024 թվականի օգոստոսի 27-ին մուտք է գործել ՀՀ և նրան ՀՀ-ում գտնվելու ժամկետ է սահմանվել մինչև 16/09/2024թ.՝ 21 օր: Անձնագրի 46-րդ էջում առկա կնիքներից էլ պարզ է դառնում, որ հիշյալ անձնագրով 2024 թվականի օգոստոսի 10-ին մուտք է գրանցվել Վրաստանի Հանրապետություն, իսկ նույն թվականի օգոստոսի 27-ին դրվել է Վրաստանից ելքի կնիք: Առկա է նաև Լիբանանից 2024 թվականի օգոստոսի 9-ին ելքի կնիք: Պարզվեց նաև, որ Աբոու Դալլահ Մոհամադ՝ ծնված 02.04.1996թ., Լիբանանի Հանրապետության Յարին գյուղում, տվյալներով 2023 թվականի նոյեմբերի 15-ին թողարկվել է Իսպանիայի Թագավորության E21909534 սերիայի, NXEX8498527-X անհատականացնող և 456432 համարների, կացության քարտը, որը վավերական է մինչև 2028 թվականի նոյեմբերի 14-ը՝ 5 տարի: Կացության քարտը տրված է Իսպանիայի Թագավորության Մադրիդ քաղաքի, վերոհիշյալ տվյալներով բնակչին: Անձնագրում և կացության քարտում առկա են նմանվող անձանց լուսանկարներ: Զննությունից հետո Լիբանանի Հանրապետության LR3635048 համարի անձնագիրը և Իսպանիայի Թագավորության E21909534 համարի կացության քարտը փաթեթավորվեցին մեկ փաթեթում, որը կնքվեց «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՆՆՉԱԿԱՆ ԿՈՄԻՏԵ 815» կլոր կնիքով, իսկ փաթեթ որպես հավելված կցվեց քրեական վարույթի նյութերին:
«Նստեցման կտրոնը և 7000 ՀՀ դրամ գումարը» համանուն փաթեթը բացելուց հետո դրանում հայտնաբերվեցին նստեցման կտրոն, մեկ հատ նոր նմուշի 5000 ՀՀ դրամանոց և երկու հատ նոր նմուշի 1000 ՀՀ դրամանոց թղթադրամներ, որոնք պատճենահանվեցին և «Հավելված 2»-ի տեսքով կցվեցին սույն արձանագրությանը:
«Հավելված 2»-ի զննությամբ պարզվեց, որ Մոհամադ Աբոու Դալլահը 2024 թվականի օգոստոսի 31-ին գրանցվել է Երևան-Վիեննա W42892 245 համարի թռիչքով մեկնելու համար, ստացել 5-րդ շարքի է դասում նստելու կտրոնը, և հնարավորություն ունեցել 2-րդ մուտքով մուտք գործել օդանավակայան, որի փակման ժամը 03:45-ին է իսկ թռիչքի ժամ է սահմանվել 04:15-ը: Պարզվեց նաև, որ ծրարում առկա են համապատասխանաբար ԳԱ04718122 համարի նոր նմուշի 5000 ՀՀ դրամանոց և uuo1077270 ու ԱԱ02673982 համարների նոր նմուշի 1000 ՀՀ դրամանոց թղթադրամները՝ ընդհանուր 7000 ՀՀ դրամ գումար:
«3930 ՀՀ մետաղադրամները» համանուն փաթեթը բացելուց հետո դրանում հայտնաբերվեցին 1 հատ 500 դրամանոց, 14 հատ 200 դրամանոց, 4 հատ 100 դրամանոց, 2 հատ 50 դրամանոց, 3 հատ 20 դրամանոց և 7 հատ 10 դրամանոց մետաղադրամներ՝ ընդհանուր 3930 ՀՀ դրամ գումար, ինչպես նաև 1 հատ «1», 2 հատ 50», 4 հատ «20», 7 հատ «10» և 9 հատ «5» գրառումով, ամենայն հավանականությամբ վրացական մետաղադրամներ:
Նստեցման կտրոնը փաթեթավորվեց մեկ փաթեթում, իսկ մետաղադրամներն ու թղթադրամները՝ մեկ փաթեթու, որոնք կնքվեցին «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՆՆՉԱԿԱՆ ԿՈՄԻՏԵ 815» կլոր կնիքով, որոնք կցվեցին սույն քրեական վարույթի նյութերին:
«1 հատ ոսկեգույն, 2 հատ արծաթագույն վզնոցները» համանուն փաթեթում հայտնաբերվեցին մեկ հատ գնդիկավոր և մեկ հատ վանդակավոր, արծաթագույն շղթաներ, ինչպես նաև մեկ հատ ոսկեգույն անկյունային/գլանաձև տեսակի շղթա, որոնք նույնությամբ փաթեթավորվեցին առանձին փաթեթում և կնիքվեցին «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՆՆՉԱԿԱՆ ԿՈՄԻՏԵ 815» կլոր կնիքով, որը կցվեց սույն քրեական վարույթի նյութերին /հատոր 1-ին գ.թ. 110-119, դատական նիստի արձանագրություն/:
3.3 Տեղեկատվության պահանջի և դրա հիման վրա ստացված զննում կատարելու մասին 2024 թվականի սեպտեմբերի 06-ի արձանագրությունը, համաձայն որի՝ ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչության ավագ քննիչ, արդարադատության երրորդ գասի խորհրդական, թիվ 58219724 քրեական վարույթով քննչական խմբի ղեկավար Սիսակ Հայրապետյանս, նախաքննության կատարումն իմ կողմից իրականացվող թիվ 5319724 քրեական վարույթով, պահպանելով ՀՀ քրեական դատավարության օրենսգրքի 8-րդ, 41-րդ, 208-րդ, 209-րդ, 210-րդ, 215- րդ, 216-րդ, 226-րդ և 232-րդ հոդվածների պահանջները, Երևան քաղաքի Մամիկոնյանց 48 հասցեում ՀՀ քննչական կոմիտեի վարչական շենքի թիվ 16 աշխատասենյակում, կազմեցի սույն արձանագրությունն այն մասին, որ սույն քրեական վարույթի համար նշանակություն ունեցող հանգամանքների մասին տեղեկություններ ստանալու համար սույն թվականի սեպտեմբերի 3-ին 04/04/ 271654-2024 թվակիր գրությամբ տեղեկատվության պահանջ եմ ուղարկել ՀՀ ՆԳՆ ոստիկանության ՀՀ-ում ինտերպոլի ազգային կենտրոնական բյուրոյի պետին, որտեղից 06.09.2024 թվականին ստացել եմ ՀՀ ՆԳՆ ոստիկանության ՀՀ-ում ինտերպոլի ազգային կենտրոնական բյուրոյի պետի' AG24/309/24 թվակիր պատասխան գրությունը (1 թերթ), որը կցեցի սույն արձանագրությանը' որպես «Հավելված 1»:
«Հավելվածի 1»-ի զննությամբ պարզվեց, որ Մոհամադ Աբոու Դալլահի վերաբերյալ 2024 թվականի սեպտեմբերի 6-ի դրությամբ ինտերպոլի գլխավոր քարտուղարության հաշվառումներում որևէ տեղեկատվություն առկա չէ: Իսպանիայի Թագավորությունում Ինտերպոլի ԱԿԲ կատարված հարցմամբ պարզվել է, որ թիվ 22909534 սերիայի կացության քարտը որևէ անձի չի անվամբ չի տրվել և այն կեղծված է /հատոր 1-ին գ.թ. 140-141, դատական նիստի արձանագրություն/:
3.4 Զննում կատարելու մասին 2024 թվականի հոկտեմբերի 05-ի արձանագրությունը, համաձայն որի՝ 1. 3-րդ թերթում առկա փաստաթուղթը ՀՀ ԱԱԾ ՍԶ հետախուզական բաժնի պետի տեղակալի զեկուցագիրն է ըստ վերադասության, համաձայն որի՝ 2024 թվականի օգոստոսի 31-ին, «Զվարթնոց» օդանավակայանում Լիբանանի քաղաքացի Մոհամադ Աբոու Դալլահը Երևան-Վիեննա թիվ 9828 չվերթ իրականացնու «Վիզ էյր» ավիաընկերության աշխատակցին ներկայացրել է իր լուսանկարով և անվամբ գրանցված իրավունք վերապահող Իսպանիայի Թագավորության E21909534 համարի կացության քարտ և հաշվառվել է նշված չվերթին, ստացել նստեցման կտրոն, իսկ նույն օրը՝ ժամը 04:17-ին, թիվ 9828 չվերթի ուղևորների սահմանային վերահսկողություն անցնելու ընթացքում ՀՀ ԱԱԾ ՍԶ աշխատակցին ներկայացրել է Լիբանանի քաղաքացու՝ Մոհամադ Աբոու Դալլահ /ծնված 02.04.1996թ/ տվյալներով LR3635048 անձնագիրն ու նույն տվյալներով Իսպանիայի Թագավորության E21909534 համարի կացության քարտը, որի ստուգմամբ պարզվել է, որ այն ունի մասնակի կեղծման հատկանիշներ:
2. 4-րդ թերթում առկա փաստաթուղթը «Անձանց և փաստաթղթերի հատուկ ստուգման ենթարկելու» մասին թիվ 1/310802 ակտն է, համաձայն որի՝ 2024 թվականի օգոստոսի 31-ին՝ ժամը 04:17-ից մինչև 05:30-ն ընկած ժամանակահատվածում հատուկ ստուգման է ենթարկվել Մոհամադ Աբոու Դալլահի /ծնված 02.04.1996թ./ կողմից ներկայացված Իսպանիայի Թագավորության E21909534 համարի կացության քարտը, առերևույթ հայտնաբերվել են ամբողջական կեղծման հատկանիշներ:
3. 8-րդ թերթում առկա փաստաթուղթը «Սահմանահատման պատմության» մասին տեղեկանքն է, համաձայն որի՝ Մոհամադ Աբոու Դալլահը /ծնված 02.04.1996թ/ 2024 թվականի օգոստոսի 27-ին՝ ժամը 21:40-ին, որպես ունևոր Թբիլիսի-Երևան թիվ 3F 584 չվերթով «Զվարթնոց» օդանավակայանի անցակետով ժամանել է ՀՀ, որի ժամանակ ներկայացրել է Լիբանանի քաղաքացու LR3635048 սերիա-համարի անձնագիրը, իսկ 2024 թվականի օգոստոսի 31-ին՝ ժամը 04:17-ին, որպես ուղևոր «Զվարթնոց» օդանավակայանի անցակետով՝ Երևան-Վիեննա չվերթով փորձել է հատել ՀՀ պետական սահմանը:
4. 13-18-րդ թերթերում առկա փաստաթուղթն անձին ձերբակալելու մասին արձանագրությունն է, ըստ որի՝ 2024 թվականի օգոստոսի 31-ին՝ ժամը 05:50-ին, Երևան քաղաքի «Զվարթնոց» օդանավակայանի սահմանային վերահսկողության հսկիչ-անցագրային կետից, հանցանք կատարած լինելու անմիջականորեն ծագած հիմնավոր կասկածի առկայության հիմքով ձերբակալվել է Մոհամադ Աբոու Դալլահը, ով հայտարարել է, որ իր մուր հայտնաբերված կացության քարտը Լիբանանում ձեռք է բերել հայրը՝ Հայաստանից Եվրոպա գնալու նպատակով /հատոր 1-ին գ.թ. 163-164, դատական նիստի արձանագրություն/:
3.5 Որպես արտավարութային փաստաթուղթ ճանաչված և քրեական վարույթին կցված՝ Մոհամադ Աբոու Դալլահի անձնական խուզարկությամբ հայտնաբերված նստեցման կտրոնը, ՀՀ ՆԳՆ ոստիկանության ՀՀ-ում ինտերպոլի ազգային կենտրոնական բյուրոյի պետի՝ AG/24/309/24 թվակիր պատասխան գրությունը, ՀՀ ԱԱԾ ՍԶ հետախուզական բաժնի պետի տեղակալի զեկուցագիրը, «Անձանց և փաստաթղթերի հատուկ ստուգման ենթարկելու» մասին թիվ 1/310802 ակտը, «Սահմանահատման պատմության» մասին տեղեկանքը, անձին ձերբակալելու մասին արձանագրությունը /հատոր 1-ին գ.թ. 3-4, 8, 13-18, 118, 141, 165-175, դատական նիստի արձանագրություն/:
3.6 Իրեղեն ապացույց ճանաչված՝ Մուհամադ Աբոու Դալլահի անվամբ լրացված Իսպանիայի Թագավորության քաղաքացու «E21909534» սերիական համարի կացության քարտը և Լիբանանի Հանրապետության քաղաքացու «LR3635048» սերիական համարի անձնագիրը /դատական նիստի արձանագրություն/:
3.7 Վկա Մարինե Սարգսյանը ցուցմունք տվեց այն մասին, որ 2005 թվականից աշխատում է Զվարթնոց օդանավակայանում: Մեղադրյալին Մ.Դալահին հանդիպել է օդանավակայնում՝ վերջինիս կողմի ՀՀ-ից մեկնելու ժամանակ: Նա մեկնելիս է եղել Վիեննա, սակայն նրա անձնագրում բացակայել է շենգենյան երկրների մուտքի արտոնագիր։ Այդ կապակցությամբ Մ.Դալահին ասել է, որ կամ պետք է ունենա վիզա կամ կացության քարտ ներկայացնի, որից հետո մեղադրյալն ինքնակամ ներկայացրել է Իսպանիայի կացության քարտ: Նշված քարտի որակից և այլ տարբերակիչ հատկանիշներից հասկացել է, որ այն կեղծ է։ Կացության քարտը հետազոտել է նաև համապատասխան տեխնիկայի միջոցով և հանձնվել ավագին /դատական նիստի արձանագրություն/:
3.8 Մեղադրյալ Մոհամադ Դալլահը ցուցմունք տվեց այն մասին, որ Լիբանանի Հանրապետության քաղաքացու անձնագիր ստանալու համար դիմել է Լիբանանի ընդհանուր անվտանգության ծառայությանը, սակայն անձնագիրը վերցնելու համար այնտեղ հայրն է գնացել: Անձնագրի համար վճարել է միայն պետական տուրքի գումար։ Իսպանիայի թագավորության կացության քարտն ստանալու համար որևէ պետական կառույցի չի դիմել, այլ «Ֆեյսբուք» սոցիալական կայքում հայտարարություն է տեսել, ըստ որի՝ վաճառքի համար առկա են եղել կացության քարտեր և անձնագրեր, սակայն, քանի որ անձնագրի համար բավարար գումար չի ունեցել, ինքը դիմել է կացության քարտ ստանալու համար: Քարտի համար վճարել է 5000 ԱՄՆ դոլլար գումար։ Ինքն ունի միջնակարգ կրթություն, սակայն տեղյակ չի եղել, որ կացության քարտը կեղծ է: Եթե ինքն այդ մասին տեղեկացված լիներ, ապա այդ քայլին չէր գնա, ավելին օդանավակայանում աշխատակցին չէր ներկայացնի։ Փաստացի օդանավակայանում է տեղեկացել կացության քարտի կեղծ լինելու մասին: Լիբանանից այլ երկրներ մեկնել է ու տեղյակ է, որ համապատասխան երկրի կացության քարտ կարող է տրամադրել միայն տվյալ երկիրը, սակայն Լիբանանում առկա են եղել բազմաթիվ գրասենյակներ, որտեղ անձնագրեր և կացության քարտեր են վաճառվել, ուստի իր մոտ կասկած չի առաջացել: Զղջում է իր կատարած արարքի համար։ Գիտակցում է, որ օրենք է խախտել։ Լիբանան վերադառնալու դեպքում, իրեն որևէ վտանգ չի սպառնում, այնտեղ են ապրում իր ընտանիքի բոլոր անդամներն ու հարազատները /դատական նիստի արձանագրություն/:

4. Լրացուցիչ դատալսումներ.
4.1 Լրացուցիչ դատալսումների ընթացքում հետազոտվեցին՝
- ՀՀ ոստիկանության ինֆորմացիոն կենտրոնի ձև 8 տեղեկանքը, որի համաձայն՝ Մոհամադ Ադնանի Աբոու Դալլահի վերաբերյալ որևէ տվյալ առկա չէ /հատոր 1-ին, գ.թ. 45, դատական նիստի արձանագրություն/,
4.2 Մեղադրյալը հայտնեց, որ ինքը ցանկանում է վերադառնալ Լիբանանի Հանրապետություն՝ ընտանիքի մոտ /դատական նիստի արձանագրություն/:

5. Դատարանի պատճառաբանությունը և եզրահանգումները.
5.1 Հիմնական դատալսումների ընթացքում պատշաճ իրավական ընթացակարգով հետազոտված թույլատրելի ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանն ապացուցված է համարում Մոհամադ Ադնանի Աբոու Դալլահի կողմից ՀՀ քրեական օրենսգրքի 457-րդ հոդվածի 1-ին մասը և 44-469-րդ հոդվածի 1-ին մասով նախատեսված հանցանքների կատարումը:
Դատարանն արձանագրում է, որ ապացույցի արժանահավատության հատկանիշը վերաբերում է ապացույցի բովանդակային գնահատմանը: Արժանահավատ է այն ապացույցը, որի ճշմարտացիությունը կասկած չի հարուցում: Ապացույցն արժանահավատության տեսանկյունից գնահատելիս դատարանը պետք է հիմք ընդունի հետևյալ հանգամանքները.
ա) ապացույցի աղբյուրի հատկանիշները (օրինակ` փորձագետի ձեռնհասությունը, ցուցմունք տվող անձի շահագրգռվածությունը, որոշ դեպքերում հոգեբանական և ֆիզիոլոգիական հատկանիշները, վիճակը, ինչպես նաև անձին վերաբերող այլ հատկանիշներ, որոնք կարող են ազդեցություն ունենալ այդ անձի կողմից գործի համար նշանակություն ունեցող հանգամանքներն ընկալելու, մտապահելու, վերարտադրելու գործընթացի վրա),
բ) ապացույցի ձևավորման հանգամանքները (օրինակ` վկայի կողմից կոնկրետ հանգամանքն ընկալելու պայմանները, պաշտպանի, ներկայացուցչի ներկայությունը և այլն),
գ) ապացուցողական տեղեկությունը ձեռք բերելու միջոցը,
դ) ապացույցի բովանդակությունը կազմող տեղեկությունը հաստատող կամ հերքող հանգամանքների առկայությունը,
ե) նույն տեղեկության ստացումն այլ աղբյուրից:
5.2 Վերոշարադրվածի լույսի ներքո, գնահատելով քրեական գործով հետազոտված թույլատրելի ապացույցները՝ փորձագետի թիվ 28002401 եզրակացությունը, Մոհամադ Աբոու Դալլահի Լիբանանի Հանրապետության անձնագիրը, իսպանական կացության քարտը և նստեցման կտրոնը զննում կատարելու մասին 2024 թվականի սեպտեմբերի 02-ի արձանագրությունը, տեղեկատվության պահանջը և դրա հիման վրա ստացված զննում կատարելու մասին 2024 թվականի սեպտեմբերի 06-ի արձանագրությունը, փաստաթղթերի զննում կատարելու մասին 2024 թվականի հոկտեմբերի 05-ի արձանագրությունը, որպես արտավարութային փաստաթուղթ ճանաչված և քրեական վարույթին կցված փաստաթղթերը, որպես իրեղեն ապացույց ճանաչված առարկաները, վկա Մարինե Սարգսյանի ցուցմունքը Դատարանը հաստատված է համարում հետևյալը.
- Մոհամադ Ադնանի Աբոու Դալլահը 2024 թվականի օգոստոսի 31-ին Երևան-Վիեննա թիվ 9828 չվերթով մեկնելիս «Զվարթնոց» սահմանային անցակետում ուղևորների սահմանային վերահսկողության ժամանակ, ներկայացրել է իր տվյալներով Իսպանիայի Թագավորության E21909534 համարի կեղծ կացության քարտ,
- Մոհամադ Ադնանի Աբոու Դալլահը օգտագործել է նշված կեղծ փաստաթուղթը՝ փորձելով առանց սահմանված փաստաթղթի և պատշաճ թույլտվության ապօրինի հատել Հայաստանի Հանրապետության պետական սահմանը,
- Մոհամադ Ադնանի Աբոու Դալլահի դիտավորության մեջ ընդգրկված՝ ՀՀ պետական սահմանն ապօրինի հատելը, նրա կամքից անկախ հանգամանքներով չի իրագործվել, քանի որ կացության քարտի կեղծ լինելու հանգամանքը հայտնաբերվել է:
Ընդ որում` Դատարանն արձանագրում է, որ նշված փաստական հանգամանքներն ամրագրող վերոթվարկյալ ապացույցները համադրվում են միմյանց հետ, չեն հակասում և ունեն ներքին տրամաբանություն:
Անդրադառնալով մեղադրյալ Մոհամադ Ադնանի Աբոու Դալլահի ցուցմունքի մեջ նշված այն հանգամանքին, իբրև վերջինս տեղեկացված չի եղել իր տվյալներով՝ Իսպանիայի Թագավորության E21909534 համարի կացության քարտի կեղծ լինելու մասին, ապա Դատարանը գտնում է, որ այն արժանահավատ չէ, քանի որ հակասում է հենց իր ցուցմունքով հայտնած այլ փաստական տվյալներին, ըստ որի՝ Մ.Դալլահը տեղյակ է եղել, որ կոնկրետ երկրի կացության քարտ կարող է տրամադրել միայն այդ երկիրը, սակայն ինքը նշված փաստաթուղթը ձեռք է բերել «Ֆեյսբուք» սոցիալական կայքի հայտարարությամբ՝ ինչ-որ գրասենյակից՝ գումարի դիմաց:
Միևնույն ժամանակ, ՀՀ քրեական օրենսգրքի 23-րդ հոդվածի 3-րդ մասի համաձայն՝ «Սույն օրենսգիրքը հիմնվում է արարքի հակաիրավականությունը գիտակցելու կամ դա գիտակցելու կարողության կանխավարկածի վրա»: Տվյալ դեպքում, մեղադրյալ Մ.Դալլահը ունեցել է միջնակարգ կրթություն և բացակայում են իր արարքի հակաիրավականությունը չգիտակցելը վկայող տվյալներ:
5.3 Այսպիսով, Դատարանն ապացուցված է համարում, որ Մոհամադ Ադնանի Աբոու Դալլահը, 2024 թվականի օգոստոսի 27-ին Լիբանանի քաղաքացու, իր տվյալներով LR3635048 համարի անձնագրով մուտք գործելով Հայաստանի Հանրապետություն և նպատակ ունենալով կեղծ փաստաթղթերի օգտագործմամբ և առանց սահմանված փաստաթղթերի Հայաստանի Հանրապետության պետական սահմանն ապօրինի հատելու եղանակով 2024 թվականի օգոստոսի 31-ին Երևանից մեկնել Վիեննա, քրեական վարույթով չպարզված ժամանակ և հանգամանքներում ձեռք է բերել պետական հողմից տրվող, իրավաբանական նշանակություն ունեցող փաստ հավաստող, իրավունք վերապահող փաստաթուղթ հանդիսացող 02.04.1996թ. ծնված Մոհամադ Ադնանի Աբոու Դալլահ տվյալներով Իսպանիայի Թագավորության E21909534 համարի կեղծ կացության քարտը, ապա նշված կեղծ կացության քարտն օգտագործելու եղանակով ՀՀ պետական մարմանն ապօրինի հատելու դիտավորությամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, 2024 թվականի օգոստոսի 31-ին` ժամը 04:17-ին, Երևան-Վիեննա թիվ 9828 չվերթով մեկնելիս «Զվարթնոց» սահմանային անցակետում ուղևորների սահմանային վերահսկողության ժամանակ, ներկայացրել է վերը նշված կեղծ կացության քարտը և այդ կերպ օգտագործելով կեղծ փաստաթուղթը, փորձել է առանց սահմանված փաստաթղթի և պատշաճ թույլտվության ապօրինի հատել Հայաստանի Հանրապետության պետական սահմանը, սակայն կացության քարտի կեղծ լինելու հանգամանքը հայտնաբերվել է և վերջինիս դիտավորության մեջ ընդգրկված ՀՀ պետական սահմանն ապօրինի հատելը նրա կամքից անկախ հանգամանքներով չի իրագործվել, քանի որ նշված հանցանքը կանխվել է սահմանային վերահսկողության իրականացնող ՀՀ ԱԱԾ աշխատակիցների կողմից:
Այլ կերպ, Դատարանը հանգում է այն հետևության, որ մեղադրյալ Մոհամադ Ադնանի Աբոու Դալլահը մեղավորությամբ կատարել է իրեն մեղսագրված արարքները, որոնց համար կիրառելի են ՀՀ քրեական օրենսգրքի 457-րդ հոդվածի 1-ին մասը և 44-469-րդ հոդվածի 1-ին մասը:
5.4 Հաստատված համարելով մեղադրյալ Մոհամադ Ադնանի Աբոու Դալլահի մեղավորությունը ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով նախատեսված հանցանքների կատարման մեջ՝ Դատարանը գտնում է, որ մեղադրյալը ենթակա է քրեական պատասխանատվության և պատժի:
Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ քրեական օրենսգրքի 7-րդ հոդվածի 1-ին մասի համաձայն՝
Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը։
ՀՀ քրեական օրենսգրքի 44-րդ հոդվածի համաձայն՝
«1. Հանցափորձ է համարվում դիտավորյալ այն գործողությունը կամ անգործությունը, որն անմիջականորեն ուղղված է հանցանք կատարելուն և պարունակում է սույն օրենսգրքի Հատուկ մասով նախատեսված հանցակազմի հատկանիշներ, սակայն անձի դիտավորության մեջ ընդգրկված հանցագործությունը նրա կամքից անկախ հանգամանքներով չի իրագործվում տվյալ հանցակազմի որևէ հատկանիշի բացակայության հետևանքով:
2. Եթե հանցափորձի ժամանակ հանցավորի դիտավորության մեջ ընդգրկված վնասից ավելի փոքր վնաս է պատճառվում, քան ընդգրկված էր դիտավորության մեջ, ապա դա կլանվում է անձի դիտավորության մեջ:
3. Եթե հանցափորձն իրականացնելիս հանցավորի դիտավորության մեջ ընդգրկված օբյեկտին անզգուշությամբ ավելի մեծ վնաս է պատճառվում, քան ընդգրկված էր դիտավորության մեջ, կամ անզգուշությամբ կամ անուղղակի դիտավորությամբ վնաս է պատճառվում մեկ այլ օբյեկտի, ապա արարքը որակվում է հանցագործությունների համակցությամբ:
4. Հանցափորձը լինում է ավարտված և չավարտված:
5. Հանցափորձը համարվում է ավարտված, եթե անձը կատարում է այն արարքը, որն անհրաժեշտ ու բավարար էր դիտավորության մեջ ընդգրկված հանցագործությունն ավարտին հասցնելու համար, և գիտակցում է, որ հանցագործությունն ավարտին է հասել, կամ հանցագործությունն ավարտելու համար արարքը շարունակելու անհրաժեշտություն չկա:
6. Հանցափորձը համարվում է չավարտված, եթե անձը գիտակցում է, որ հանցագործությունն ավարտին հասցնելու համար անհրաժեշտ է շարունակել սկսած արարքի կատարումը կամ նոր արարք կատարել»:
ՀՀ քրեական օրենսգրքի 55-րդ հոդվածի համաձայն՝
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»:
ՀՀ քրեական օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե Դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ:»:
ՀՀ քրեական օրենսգրքի 74-րդ հոդվածի համաձայն՝
«1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:
/…/
3. Եթե հանցագործությունների համակցությունն ընդգրկում է միայն միջին ծանրության կամ միջին և ոչ մեծ ծանրության հանցանքներ կամ անզգուշությամբ կատարված ծանր հանցանքներ, ապա ազատազրկման ձևով վերջնական պատիժը նշանակվում է պատիժները լրիվ կամ մասնակիորեն գումարելու միջոցով: Գումարելիս ազատազրկման ձևով վերջնական պատիժը չի կարող գերազանցել 10 տարին::
/.../»:
ՀՀ քրեական օրենսգրքի 78-րդ հոդվածի համաձայն՝
«1. Հանցանքների համակցությամբ և դատավճիռների համակցությամբ պատիժները լրիվ կամ մասնակիորեն գումարելիս ազատազրկման 1 օրվան համապատասխանում է՝
1) կարճաժամկետ ազատազրկման 1 օրը,
/…/»:
ՀՀ քրեական օրենսգրքի 457-րդ հոդվածի համաձայն՝
«1.Պետական կամ տեղական ինքնակառավարման մարմնի կամ դրանց կազմակերպության, առևտրային կամ այլ կազմակերպության, անհատ ձեռնարկատիրոջ, նոտարի, աուդիտորի կամ փաստաթուղթ կազմելու, տալու կամ դրա իսկությունը հավաստելու համար լիազորված այլ անձի կողմից տրվող իրավաբանական նշանակություն ունեցող փաստ հավաստող կամ իրավունք վերապահող կամ պարտականությունից կամ պատասխանատվությունից ազատող փաստաթուղթ կեղծելը՝ կեղծողի կողմից անձամբ կամ այլ անձի կողմից այն օգտագործելու կամ իրացնելու նպատակով, կամ այդպիսի փաստաթուղթ իրացնելը կամ նույն նպատակով կեղծ դրոշմ, կնիք կամ ձևաթուղթ պատրաստելը կամ իրացնելը, ինչպես նաև կեղծ փաստաթուղթ օգտագործելը՝
պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:
/…/»:
ՀՀ քրեական օրենսգրքի 469-րդ հոդվածի համաձայն՝
«1. Առանց սահմանված փաստաթղթի կամ պատշաճ թույլտվության Հայաստանի Հանրապետության պետական սահմանը հատելը՝
պատժվում է տուգանքով՝ տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ կարճաժամկետ ազատազրկմամբ` առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով:
/.../»:
5.5 Դատարանը ՀՀ քրեական օրենսգրքի հոդվածների համապատասխան Մոհամադ Ադնանի Աբոու Դալլահի նկատմամբ նշանակվող պատժի տեսակը և չափը որոշելիս հաշվի է առնում կատարված հանցագործությունների եղանակը, շարժառիթն ու նպատակը, քրեական պատասխանատվությունն ու պատիժը մեղմացնող և ծանրացնող հանգամանքները, նրա անձը բնութագրող տվյալները, ինչպես նաև նշանակվող պատժի` մեղադրյալի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցության հանգամանքը:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես Մոհամադ Ադնանի Աբոու Դալլահի պատասխանատվությունը կամ պատիժը մեղմացնող հանգամանք է արձանագրում մեղքն ընդունելն ու անկեղծորեն զղջալը:
Մեղքն ընդունելը որպես մեղմացնող հանգամանք դիտարկելիս Դատարանը հաշվի է առնում արագացված վարույթի կիրառմամբ պայմանավորված մեղադրյալի դիրքորոշումը, ինչպես նաև այդ կապակցությամբ ՀՀ վճռաբեկ դատարանի մոտեցումն, ըստ որի՝ «/.../ մեղքն ընդունելը կամ չընդունելն անձի սուբյեկտիվ իրավունքն է, որը նախատեսված և երաշխավորված է ՀՀ Սահմանադրության 21-րդ և 22-րդ հոդվածներով։ Հետևաբար, մեղքը չընդունելը չի կարող պատիժ նշանակելիս հաշվի առնվել և հակառակը` մեղքն ընդունելը և կատարածի համար անկեղծորեն զղջալը ՀՀ քրեական օրենսգրքի շրջանակներում բարենպաստ քրեաիրավական նշանակություն ունեցող հանգամանք է և կարող է կատարել պատասխանատվությունը և պատիժը մեղմացնող հանգամանքի դեր։ Վճռաբեկ դատարանը փաստում է, որ մեղքն ընդունելը և կատարածի համար անկեղծորեն զղջալը, որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը, զղջացել է դրա համար։ Մեղքն ընդունելու պարագայում քրեական պատժի նպատակների իրացումը, այդ թվում` պատժի ենթարկված անձին ուղղելու հավանականությունը, զգալիորեն բարձրանում է /.../ (տե՛ս Սերոբ Ֆրունզիկի Սարգսյանի գործով 2012 թվականի նոյեմբերի 01-ի թիվ ՍԴ/0109/01/12 որոշման 27 կետը):
Դատարանը, ղեկավարվելով ՀՀ քրեական օրենսգրքի 71-րդ հոդվածով, արձանագրում է, որ Մոհամադ Ադնանի Աբոու Դալլահի պատասխանատվությունը կամ պատիժը ծանրացնող հանգամանքներ չկան:
Դատարանը, որպես Մոհամադ Ադնանի Աբոու Դալլահի անձը բնութագրող հանգամանք է արձանագրում ՀՀ-ում դատվածություն չունենալը:
5.6 Պատժի տեսակների միջև ճիշտ ընտրություն կատարելու և արարքի բնույթն ու հանրային վտանգավորության աստիճանը գնահատելու հարցերին ՀՀ վճռաբեկ դատարանն անդրադարձել է Գ.Մադաթյանի գործով որոշման մեջ, որտեղ իրավական դիրքորոշում է հայտնել այն մասին, որ. «(…) այլընտրանքային սանկցիաների միջև ընտրություն կատարելիս պատժի արդարացիության սկզբունքի ապահովման հիմնական երաշխիքը դատարանների կողմից յուրաքանչյուր գործի քննության ժամանակ այնպիսի հանգամանքների բացահայտումն է, որոնք ազդել են անձի կողմից կատարված արարքի հանրային վտանգավորության բնույթի և աստիճանի վրա:
Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը: (…)» (տե՛ս Գարուշ Նորիկի Մադաթյանի վերաբերյալ 2009 թվականի փետրվարի 17-ի թիվ ԵՇԴ/0029/01/08 որոշումը):
Գոռ Գագիկի Ավետիսյանի և Արմեն Իշխանի Հովակիմյանի գործով 2010թ. նոյեմբերի 5-ին կայացված թիվ ԵԱՔԴ/0164/01/09 որոշման մեջ անդրադառնալով նշանակվող պատժի արդարացիության պահանջին՝ ՀՀ վճռաբեկ դատարանը նշել է, որ՝ «(…) հանցանք կատարած անձի նկատմամբ նշանակված պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, հանցագործության` հանրության համար վտանգավորության աստիճանն ու բնույթը, հանցավորի անձը բնութագրող տվյալները, ինչպես նաև պատիժն ու պատասխանատվությունը մեղմացնող ու ծանրացնող հանգամանքները և, ելնելով քրեական օրենքով նախատեսված պահանջներից, ղեկավարվելով պատիժ նշանակելու ընդհանուր սկզբունքներով, նշանակում է այնպիսի պատիժ, որն անհրաժեշտ և բավարար է այդ անձին ուղղելու, նրա կողմից նոր հանցանքի կատարումը կանխելու համար: Հետևաբար, ակնհայտ մեղմ կամ ակնհայտ խիստ լինելու պատճառով անարդարացի կլինի այնպիսի պատիժը, որը նշանակվել է առանց պատիժ նշանակելու ընդհանուր սկզբունքների պահպանման»:
5.7 Դատարանը, հիմք ընդունելով 4.1 և 5.5 կետերում արձանագրված հանգամանքները և ղեկավարվելով 5.4 կետում մեջբերված նորմերով ու 5.6 կետերում մեջբերված իրավական դիրքորոշումներով, գտնում է, որ Մոհամադ Ադնանի Աբոու Դալլահի նկատմամբ՝
- ՀՀ քրեական օրենսգրքի 457-րդ հոդվածի 1-ին մասով պետք է պատիժ նշանակել կարճաժամկետ ազատազրկում՝ 1 /մեկ/ ամիս ժամկետով:
- ՀՀ քրեական օրենսգրքի 44-469-րդ հոդվածի 1-ին մասով պետք է պատիժ նշանակել ազատազրկում՝ 10 /տասը/ ամիս ժամկետով՝ վտարելով Հայաստանի Հանրապետության տարածքից Լիբանանի Հանրապետություն՝ 5 /հինգ/ տարի ժամկետով:
ՀՀ քրեական օրենսգրքի 78-րդ և 74-րդ հոդվածների կիրառմամբ՝ հանցագործությունների համակցությամբ, նշանակված պատիժները մասնակի գումարելու միջոցով, Մոհամադ Ադնանի Աբոու Դալլահի նկատմամբ վերջնական պատիժ պետք է նշանակել ազատազրկում՝ 10 /տասը/ ամիս 15 /տասնհինգ/ օր ժամկետով՝ վտարելով Հայաստանի Հանրապետության տարածքից Լիբանանի Հանրապետություն՝ 5 /հինգ/ տարի ժամկետով:
Մեղադրյալի նկատմամբ հիմնական և լրացուցիչ պատիժ նշանակելիս, Դատարանը հաշվի է առնում հանցանքների բնույթը, մասնավորապես՝ դրանք ներառված են կառավարման կարգի դեմ ուղղված հանցագործությունների շարքում, որոնք հանդիսանում են միջին ծանրության և ոչ մեծ ծանրության հանցանքներ, և ոտնձգում են պետական կառավարման նորմալ գործունեության ապահովմանն ուղղված հասարակական հարաբերություններին, մեղադրյալի Լիբանանի Հանրապետության քաղաքացի հանդիսանալն ու ՀՀ-ում մշտական բնակության վայր չունենալու հանգամանքը: Ընդ որում, Դատարանն ընդգծում է, որ ՀՀ-ն չի հանդիսացել մեղադրյալի ժամանման վերջնակետը, այլ վերջինս նպատակադրվել է մեկնել ՀՀ-ից: Վերոգրյալ հանգամանքներն, իրենց ընդհանրության մեջ, բացառում են մեղադրյալի նկատմամբ առավել մեղմ պատժատեսակների կիրառման հնարավորությունը: Միևնույն ժամանակ, կատարված հանցագործությունների բնույթով պայմանավորված, նկատի ունենալով, որ արդեն իսկ բացահայտվել է Մոհամադ Ադնանի Աբոու Դալլահի դիտավորությունը, լրացուցիչ պատժի կիրառումը միտված է կանխելու ՀՀ տարածքում նմանատիպ հանցագործությունների կատարումը:
ՀՀ քրեական օրենսգրքի 79-րդ հոդվածի համաձայն՝
«/.../
3. Մինչև դատավճռի օրինական ուժի մեջ մտնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը հաշվակցվում է կարճաժամկետ ազատազրկման, կարգապահական գումարտակում պահելու, ազատազրկման ձևով նշանակված պատժին` 1 օրը հաշվելով 1 օրվա դիմաց, ազատության սահմանափակման ձևով նշանակված պատժին՝ 1 օրը հաշվելով 2 օրվա դիմաց, իսկ հանրային աշխատանքների դեպքում՝ 1 օրը 8 ժամի դիմաց:
/.../»:
Դատարանն արձանագրում է, որ Մոհամադ Ադնանի Աբոու Դալլահը 2024 թվականի օգոստոսի 31-ին ձերբակալվել է և նույն թվականի սեպտեմբերի 02-ին նրա նկատմամբ որպես խափանման միջոց է ընտրվել կալանքը, որի ժամկետը հետագայում երկարաձգվել է, այսինքն՝ մեղադրյալ Մ.Դալլահն անընդմեջ գտնվում է կալանքի տակ, հետևաբար պատժի սկիզբը պետք է հաշվել 2024 թվականի օգոստոսի 31-ից` այդպիսով կատարելով հաշվակցումը:
Անդրադառնալով նշանակված պատիժը կրելու հարցին, հաշվի առնելով կատարված հանցանքների հանրային վտանգավորության բնույթն ու աստիճանը, Դատարանը գտնում է, որ պատժի նպատակների իրականացումը հնարավոր չէ առանց մեղադրյալ Մոհամադ Ադնանի Աբոու Դալլահի կողմից պատիժը կրելու:
5.8 Քննության առնելով մեղադրյալ Մոհամադ Ադնանի Աբոու Դալլահի նկատմամբ որպես խափանման միջոց կիրառված կալանքի հարցը՝ Դատարանը գտնում է, որ այն պետք է թողնել անփոփոխ մինչև դատավճռի մեջ օրինական ուժի մեջ մտնելը, որից հետո այն վերացնել:
5.9 Քննության առնելով որպես իրեղեն ապացույց ճանաչված Մուհամադ Աբոու Դալլահի անվամբ լրացված Իսպանիայի Թագավորության քաղաքացու «E21909534» սերիական համարի կացության քարտի, Լիբանանի Հանրապետության քաղաքացու «LR3635048» սերիական համարի անձնագրի և որպես արտավարութային փաստաթուղթ ապացույց ճանաչված ու քրեական գործին կցված փաստաթղթերի տնօրինման հարցը, Դատարանը գտնում է, որ դատավճռի օրինական ուժի մեջ մտնելուց հետո Լիբանանի Հանրապետության քաղաքացու «LR3635048» սերիական համարի անձնագիրը պետք է հանձնել մեղադրյալ Մոհամադ Ադնանի Աբոու Դալլահի տնօրինմանը, նրա անվամբ լրացված Իսպանիայի Թագավորության քաղաքացու «E21909534» սերիական համարի կացության քարտը՝ ոչնչացնել, իսկ որպես արտավարութային փաստաթուղթ ապացույց ճանաչված փաստաթղթերը՝ պահել գործի հետ միասին՝ վերջինիս պահելու ամբողջ ժամանակամիջոցում
5.10 Քննության առնելով 180.000 /հարյուր ութսուն հազար/ ՀՀ դրամ չափով վարույթային ծախսերի (սույն քրեական գործող փորձաքննության արժեքը) բռնագանձման հարցը, Դատարանը, նկատի ունենալով, որ Մոհամադ Ադնանի Աբոու Դալլահը ՀՀ-ում չունի աշխատանք, ինչպես նաև չի հիմնավորվել վերջինիս վճարունակ լինելը և հաշվի առնելով ՀՀ քրեական օրենսգրքի 167-րդ հոդվածի 3-րդ մասի իրավակարգավորումները, գտնում է, որ վարույթային ծախսերը մեղադրյալից ենթակա չեն բռնագանձման:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 99-100-րդ, 167-րդ, 347-350-րդ, 352-353-րդ, 364-րդ հոդվածներով, Դատարանը.

Վ Ճ Ռ Ե Ց

Մոհամադ Ադնանի Աբոու Դալլահին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նախատեսված արարքներում:
Մոհամադ Ադնանի Աբոու Դալլահի նկատմամբ ՀՀ քրեական օրենսգրքի 457-րդ հոդվածի 1-ին մասով պատիժ նշանակել կարճաժամկետ ազատազրկում՝ 1 /մեկ/ ամիս ժամկետով:
Մոհամադ Ադնանի Աբոու Դալլահի նկատմամբ ՀՀ քրեական օրենսգրքի 44-469-րդ հոդվածի 1-ին մասով պատիժ նշանակել ազատազրկում՝ 10 /տասը/ ամիս ժամկետով՝ վտարելով Հայաստանի Հանրապետության տարածքից Լիբանանի Հանրապետություն՝ 5 /հինգ/ տարի ժամկետով:
ՀՀ քրեական օրենսգրքի 74-րդ հոդվածի կիրառմամբ՝ հանցագործությունների համակցությամբ, նշանակված պատիժները մասնակի գումարելու միջոցով, Մոհամադ Ադնանի Աբոու Դալլահի նկատմամբ վերջնական պատիժ նշանակել ազատազրկում՝ 10 /տասը/ ամիս 15 /տասնհինգ/ օր ժամկետով՝ վտարելով Հայաստանի Հանրապետության տարածքից Լիբանանի Հանրապետություն՝ 5 /հինգ/ տարի ժամկետով:
Ազատազրկման ձևով պատժի սկիզբը հաշվել 2024 թվականի օգոստոսի 31-ից:
Դատավճռի օրինական ուժի մեջ մտնելուց հետո որպես իրեղեն ապացույց ճանաչված Լիբանանի Հանրապետության քաղաքացու «LR3635048» սերիական համարի անձնագիրը հանձնել մեղադրյալ Մոհամադ Ադնանի Աբոու Դալլահի տնօրինմանը, իսկ նրա անվամբ լրացված Իսպանիայի Թագավորության քաղաքացու «E21909534» սերիական համարի կացության քարտը՝ ոչնչացնել:
Դատավճռի օրինական ուժի մեջ մտնելուց հետո որպես արտավարութային փաստաթուղթ ապացույց ճանաչված և քրեական վարույթին կցված փաստաթղթերի պատճենները պահել գործի հետ միասին՝ վերջինիս պահելու ամբողջ ժամանակամիջոցում:
Մոհամադ Ադնանի Աբոու Դալլահի նկատմամբ կիրառված կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը:
Վարույթային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում։


ԴԱՏԱՎՈՐ Ս.ՅՈՒԶԲԱՇՅԱՆ