ԵԴ1/2810/01/24


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«30» Հոկտեմբերի 2024թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԱՐԱ ԴԱՎԹՅԱՆԻ
մեղադրյալ՝ ԳԱՌՆԻԿ ԱՎԵՏԻՍՅԱՆԻ
դռնբաց դատական նիստում քննելով քրեական գործն ըստ մեղադրանքի՝ Գառնիկ Ռոբերտի Ավետիսյանի(1) ՀՀ քրեական օրենսգրքի 344 հոդվածի 1-ին մասով.






1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ
2024 թվականի սեպտեմբերի 30-ին ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանի որոշմամբ՝ թիվ 60112224 քրեական վարույթով Գառնիկ Ռոբերտի Ավետիսյանի նկատմամբ ՀՀ քրեական օրենսգրքի 344 հոդվածի 1-ին մասով հարուցվել է հանրային քրեական հետապնդում:
Մասնավորապես՝
Գառնիկ Ռոբերտի Ավետիսյանին ՀՀ քրեական օրենսգրքի 344 հոդվածի 1-ին մասով մեղադրանք է ներկայացվել հետևյալ արարքի համար. «նա, տրանսպորտային միջոցներ վարելու իրավունքից մեկ տարի ժամկետով՝ 2023 թվականի օգոստոսի 26-ից մինչև 2024 թվականի օգոստոսի 26-ը զրկված լինելու և այդ մասին նախապես տեղյակ լինելու պայմաններում, 2024 թվականի հունվարի 28-ին՝ ժամը 00:55-ի սահմաններում, Երևան քաղաքի Աթենքի փողոցում, վարել է «ԲՄՎ» մակնիշի 55 JI 515 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 3-րդ վաշտի պարեկ Վահե Գևորգյանի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180268972 արձանագրությունը»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 2022 թվականի սեպտեմբերի 28-ի «զննության արձանագրության» համաձայն. «Զննվեց Գառնիկ Ռոբերտի Ավետիսյանի վարչական իրավախախտման վերաբերյալ թիվ 8180268972 ակտը, որը կազմվել է 28.01.2024թ-ին` ժամը 01:10-ին, ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 3-րդ վաշտի պարեկ Վահե Վարդանի Գևորգյանի կողմից Գառնիկ Ռոբերտի Ավետիսյանի նկատմամբ՝ վերջինիս կողմից նշված օրը՝ ժամը 00:55-ին Երևան քաղաքի Աթենքի փողոցում «ԲՄՎ» մակնիշի 55 JI 515 հաշվառման համարանիշի տրանսպորտային միջոցը տրանսպորտային միջոցներ վարելու իրավունքը զրկված վիճակում վարելու համար:
Զննվեց Գառնիկ Ռոբերտի Ավետիսյանի վարչական իրավախախտման վերաբերյալ թիվ 8180257777 ակտը, որը կազմվել է 24.07.2023թ-ին` ժամը 02:00-ին, ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 3-րդ վաշտի կրտսեր պարեկ Արթուր Վազգենի Համբարձումյանի կողմից Գառնիկ Ռոբերտի Ավետիսյանի նկատմամբ՝ վերջինիս կողմից նշված օրը՝ ժամը 01:40-ին, Երևան քաղաքի Վրացյան փողոցում Մերսեդես մակնիշի 17VD717 հաշվառման համարանիշի տրանսպորտային միջոցը վարել է ոչ սթափ վիճակում և Գառնիկ Ավետիսյանը 1 տարի ժամկետով զրկվել է տրանսպորտային միջոցներ վարելու իրավունքից:
Զննվեց ճանապարհային ոստիկանության էլեկտրոնային ռեգիստրում առկա Գառնիկ Ռոբերտի Ավետիսյանի քաղվածքը, որի համաձայն զրկման սկիզբ է 26.08.2023թ, ավարտը՝ 26.08.2024թ.:
Զննվեց Հայ փոստի ծանուցման պատճենը, որի վրա առկա է 26.08.2023թ., ստորագրություն գրառումը ծանուցագիրը ստանալու մասին:
Զննվեց հարթակից օգտվելու և էլեկտրոնային եղանակով ծանուցումների վերաբերյալ տեղեկանքը Գառնիկ Ռոբերտի Ավետիսյանի վերաբերյալ համաձայն որի վերջինիս 098-94-74-74 բջջային հեռախոսահամարին 31.08.2023թ-ին ուղարկվել է հաղորդագրություն, որ վարորդական վկայականը զրկվել է»:(2)
2.2 Գառնիկ Ռոբերտի Ավետիսյանը ներկայացված մեղադրանքում իրեն մեղավոր ճանաչեց և, ըստ էության, ցուցմունք տվեց այն մասին, որ դատաքննության ընթացքում հետազոտված զննության արձանագրության մեջ նշված տվյալները համապատասխանում են իրականությանը և ինքը 2024 թվականի հունվարի 28-ին չունենալով տրանսպորտային միջոցներ վարելու իրավունք, տաքսի ծառայություն մատուցելու նպատակով վարել է «ԲՄՎ» մակնիշի 55 JI 515 հաշվառման համարանիշի ավտոմեքենան։

ԼՐԱՑՈՒՑԻՉ ԴԱՏԱԼՍՈՒՄՆԵՐ

2.3 Դատվածությունների և հետախուզման առկայության Ձև 8 հարցման պատասխանի համաձայն՝ Գառնիկ Ռոբերտի Ավետիսյանը նախկինում դատապարտված չի եղել:
2.4 ՀՀ քաղաքացիական կացության ակտերի գրանցման տվյալների շտեմարանում միասնական էլեկտրոնային տեղեկատվական համակարգի միջոցով կատարված հարցմանն ի պատասխան ստացվել է.
-ծննդի պետական գրանցման թիվ 119 ակտը, համաձայն որի՝ 2018 թվականի հունվարի 21-ին ծնված Միլենա Գառնիկի Ավետիսյանի հայրն է Գառնիկ Ռոբերտի Ավետիսյանը:
-ծննդի պետական գրանցման թիվ 36146 ակտը, համաձայն որի՝ 2022 թվականի դեկտեմբերի 14-ին ծնված Էլինա Գառնիկի Ավետիսյանի հայրն է Գառնիկ Ռոբերտի Ավետիսյանը:
2.5 ՀՀ պետական եկամուտների կոմիտեի հարկ վճարողների սպասարկման վարչության պետի գրության համաձայն՝ Գառնիկ Ռոբերտի Ավետիսյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Գառնիկ Ռոբերտի Ավետիսյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ։(3)
Քննարկման ենթակա հարցերի վերաբերյալ կողմերի դիրքորոշումները.
2.6 Պատժի վերաբերյալ հարցերը քննարկելիս հանրային մեղադրողը նշեց, որ Գառնիկ Ռոբերտի Ավետիսյանի նկատմամբ արդարացի պատիժը կլինի տուգանքը՝ հանցանքը կատարելու պահին նվազագույն աշխատավարձի հնգապատիկի չափով:
2.7 Պատժի վերաբերյալ հարցերը քննարկելիս մեղադրյալ Գագիկ Ավետիսյանը խնդրեց տուգանքի ձևով պատժի նշանակման դեպքում վճարման ժամկետը տարաժամկետել մինչև 1 տարի, քանի որ հնարավորություն չի ունենա մի անգամից և ամբողջությամբ վճարել այն:

3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանն արձանագրում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարել, որ Գառնիկ Ռոբերտի Ավետիսյանը, տեղեկացված լինելով 2023 թվականի օգոստոսի 26-ից մինչև 2024 թվականի օգոստոսի 26-ը տրանսպորտային միջոցներ վարելու իրավունքից զրկված լինելու մասին, 2024 թվականի հունվարի 28-ին՝ ժամը 00:55-ի սահմաններում Երևան քաղաքի Աթենքի փողոցում վարել է «ԲՄՎ» մակնիշի 55 JI 515 հաշվառման համարանիշի տրանսպորտային միջոցը։
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Գառնիկ Ավետիսյանը նախկինում դատապարտված չի եղել, և նրա խնամքին են երկու անչափահաս երեխաներ։
-մեղսագրվող հանցանքն ավարտվելու օրվան նախորդող 12 ամիսների ընթացքում Գառնիկ Ավետիսյանի ստացած եկամտի վերաբերյալ տվյալներ առկա չեն։
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2024 թվականի հոկտեմբերի 30-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Գառնիկ Ռոբերտի Ավետիսյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ դատապարտված մեղադրյալի արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 1-ին մասը։
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ Գառնիկ Ռոբերտի Ավետիսյանի պատասխանատվությունն ու պատիժը մեղմացնող ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքի տակ երկու անչափահաս երեխաների առկայությունը:
Դատարանն արձանագրում է, որ Գառնիկ Ավետիսյանի պատասխանատվությունն ու պատիժը մեղմացնող հանգամանք պետք է դիտել նաև ներկայացված մեղադրանքում իրեն լիովին մեղավոր ճանաչելը և կատարածի համար զղջալը, քանի որ մեղքն ընդունելը, կատարածի համար զղջալը, որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը, զղջացել է դրա համար: Մեղքն ընդունելու պարագայում քրեական պատժի նպատակների իրացումը, այդ թվում՝ պատժի ենթարկված անձին ուղղելու հավանականությունը, զգալիորեն բարձրանում է:
Դատարանն արձանագրում է, որ Գառնիկ Ռոբերտի Ավետիսյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքի համար մեղադրյալ Գառնիկ Ռոբերտի Ավետիսյանը ենթակա է պատժի։
4.4 Պատժի տեսակն ու չափը որոշելիս՝ Դատարանը հաշվի է առնում հետևյալը՝
-Գառնիկ Ռոբերտի Ավետիսյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին։
-Գառնիկ Ռոբերտի Ավետիսյանի անձը բնութագրող տվյալները, պատասխանատվությունը և պատիժը մեղմացնող հանգամանքների առկայությունն ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Գառնիկ Ռոբերտի Ավետիսյանի կողմից ՀՀ քրեական օրենսգրքի 344 հոդվածի 1-ին մասով կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է հնգապատիկի չափով տուգանքը:
Հիմք ընդունելով ՀՀ քրեական օրենսգրքի 59 հոդվածի 5-րդ մասը, և հաշվի առնելով, այն որ մեղսագրվող հանցանքն ավարտվելու օրվան նախորդող 12 ամիսների ընթացքում Գառնիկ Ռոբերտի Ավետիսյանի եկամտի բացակայության վերաբերյալ տվյալները՝ տուգանքի չափը պետք է հաշվարկել հանցանքը կատարելու պահին՝ 2024 թվականի հունվարի 28-ին ՀՀ նվազագույն աշխատավարձի՝ 75.000 (յոթանասունհինգ հազար) ՀՀ դրամի չափով:
• Այսպիսով, Դատարանը գտնում է, որ ՀՀ քրեական օրենսգրքի 344 հոդվածի 1-ին մասով նախատեսված հանցանքի կատարման համար Գառնիկ Ռոբերտի Ավետիսյանի նկատմամբ պատիժ պետք է նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
Դատարանը գտնում է, որ կատարած հանցանքի համար Գառնիկ Ռոբերտի Ավետիսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
4.5 Գառնիկ Ռոբերտի Ավետիսյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.6 Հիմք ընդունելով ՀՀ քրեական օրենսգրքի 59 հոդվածի 8-րդ մասը, հաշվի առնելով մեղադրյալ Գառնիկ Ռոբերտի Ավետիսյանի եկամտի բացակայության վերաբերյալ ստացված տվյալը, ինչպես նաև տուգանքի վճարման համար ժամկետ սահմանելու մասին վերջինի խնդրանքը՝ Դատարանը գտնում է, որ նշանակված տուգանքի վճարման ժամկետ պետք է սահմանել առավելագույնը՝ 1 (մեկ) տարի:
4.7 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.8 Գառնիկ Ռոբերտի Ավետիսյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.9 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը
Վ Ճ Ռ Ե Ց

1. Գառնիկ Ռոբերտի Ավետիսյանին մեղավոր ճանաչել ՀՀ քրեական օրենսգրքի 344 հոդվածի 1-ին մասով նախատեսված հանցանքը կատարելու մեջ և նրա նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
2. Տուգանքի վճարման ժամկետ սահմանել առավելագույնը՝ 1 (մեկ) տարի:
3. Գառնիկ Ավետիսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
4. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ


(1)Ծնված՝ 1992 թվականի մայիսի 4-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, նախկինում չդատապարտված, ամուսնացած, խնամքին՝ երկու անչափահաս երեխա, հաշվառված է Երևան քաղաքի Կ.Ուլնեցու փողոցի 51 շենքի 71 բնակարանում, բնակվում է Երևան քաղաքի Թումանյան թաղամասի 7/1 շենքի 5 բնակարանում, որպես խափանման միջոց է կիրառված բացակայելու արգելքը:
(2)Տե՛ս, քրեական գործ, հատոր 1, թերթ 37:
(3)2.3-2.5 կետերի վերաբերյալ տե՛ս Դատարանում ստեղծված նյութերը: