ԵԴ1/2817/01/24

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

03 դեկտեմբերի 2024թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան),

Նախագահությամբ՝ դատավոր Մ.Մելքոնյանի,
քարտուղարությամբ` Մ.Մկրտչյանի,
մասնակցությամբ`
մեղադրող Ա․Դավթյանի,
մեղադրյալ Կ․Հակոբջանյանի,

Դռնբաց դատական նիստում քննության առնելով քրեական վարույթն ըստ մեղադրանքի Կարեն Մարտինի Հակոբջանյանի (ծնված՝ 02.12.1996թ. ազգությամբ հայ, ՀՀ քաղաքացի, բարձրագույն կրթությամբ, նախկինում դատված, բնակվող՝ ք.Երևան, Նազարբեկյան փ., 4-րդ շենք, 32 բն.) ՀՀ քրեական օրենսգրքի 344-րդ հոդվածի 1-ին մասով

Պ Ա Ր Զ Ե Ց

1. Գործի դատավարական նախապատմությունը.
1.1 2023 թվականի հոկտեմբերի 20-ին ՀՀ ՔԿ ԵՔՔՎ ՃՏՀ քննության բաժնի ավագ քննիչ Ավետիք Թովմասյանը կազմել է արձանագրություն ՀՀ քրեական օրենսգրքի 344-րդ հոդվածի 1-ին մասով թիվ 60-0518-23 քրեական վարույթը նախաձեռնելու մասին:
1.2 2023 թվականի նոյեմբերի 10-ին ՀՀ ՔԿ ԵՔՔՎ ՃՏՀ քննության բաժնի ավագ քննիչ Ավետիք Թովմասյանը որոշում է կայացրել թիվ 60051823 քրեական վարույթով ՀՀ ոստիկանության պարեկային ծառայության Երևան քաղաքի գնդից Կարեն Մարտինի Հակոբջանյանի վերաբերյալ ստացված ՀՀ ոստիկանության պարեկային ծառայության Երևա քաղաքի գնդի 3-րդ գումարտակի 2-րդ վաշտի կրտսեր պարեկ Վոլոդյա Թադևոսյանի կողմից 21.10.2022 թվականին կազմված վարչական իրավախախտման վերաբերյալ արձանագրությունը, 21.10.2022 թվականին կայացված վարչական իրավախախտման գործով թիվ 8180164577 որոշումը, ալկոհոլի պարունակության ստուգման թիվ 00706 կտրոնը, ստուգաչափման թիվ 073347 վկայականը, ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից արտատպված զրկված վարորդական իրավունքի վերաբերյալ քաղվածքը, ՀՀ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի կրտսեր պարեկ Արամո Մարգարյանի կողմից 01.04.2023 թվականին կազմված վարչական իրավախախտման վերաբերյալ արձանագրությունը որպես արտավարութային փաստաթուղթ ապացույց ճանաչելու մասին:
1.3 2023 թվականի նոյեմբերի 27-ին ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանը որոշում է կայացրել թիվ 60051823 քրեական վարույթով ՀՀ ՔԿ ԵՔՔՎ ՃՏՀ քննության բաժնի ավագ քննիչ Ա.Թովմասյանի միջնորդությունը՝ Կարեն Մարտինի Հակոբջանյանի նկատմամբ ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին, մերժելու մասին:
1.4 2024 թվականի փետրվարի 26-ին թիվ 60051823 քրեական վարույթի նախաքննությունը հանձնարարվել է ՀՀ ՔԿ ԵՔՔՎ ՃՏՀ քննության բաժնի քննիչ Վ.Բաբաջանյանին:
1.5 2024 թվականի օգոստոսի 06-ին թիվ 60051823 քրեական վարույթի նախաքննությունը փոխանցվել է ՀՀ ՔԿ ԵՔՔՎ Մալաթիա-Սեբաստիա վարչական շրջանի քննչական բաժին, որտեղ նախաքննության կատարումը հանձնարարվել է նույն բաժնի ավագ քննիչ Լ.Վարդանյանին:
1.6 2024 թվականի սեպտեմբերի 20-ին ՀՀ ՔԿ ԵՔՔՎ Մալաթիա-Սեբաստիա վարչական շրջանի քննչական բաժնի ավագ քննիչ Լ.Վարդանյանը որոշում է կայացրել թիվ 60051823 քրեական վարույթով ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրից Կարեն Մարտինի Հակոբջանյանի տվյալներով վարորդական վկայականի որոնման արդյունքում արտատպված ձևաթղթի, ՀՀ ՆԳՆ ոստիկանության պարեկային ծառայության Երևանի քաղաքի գնդի 3-րդ գումարտակի 2-րդ վաշտի կրտսեր պարեկ Վոլոդյա Արշավիրի Թադևոսյանի կողմից կազմված վարչական իրավախախտման վերաբերյալ թիվ 8180164577 և ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի կրտսեր պարեկ Արամո Մարգարյանի կողմից կազմված վարչական իրավախախտման վերաբերյալ թիվ 8180248475 արձանագրությունների պատճենները որպես արտավարութային փաստաթուղթ ապացույց ճանաչելու մասին:
1.7 2024 թվականի սեպտեմբերի 20-ին ՀՀ ՔԿ ԵՔՔՎ Մալաթիա-Սեբաստիա վարչական շրջանի քննչական բաժնի ավագ քննիչ Լ.Վարդանյանը որոշում է կայացրել թիվ 60051823 քրեական վարույթով Դատալեքս դատական տեղեկատվական համակարգից արտատպված թիվ ԵԴ1/0243/01/23 դատական գործի պատճենը որպես արտավարութային փաստաթուղթ ապացույց ճանաչելու մասին:
1.8 2024 թվականի սեպտեմբերի 27-ին ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանը որոշում է կայացրել թիվ 60051823 քրեական վարույթով Կարեն Մարտինի Հակոբջանյանի նկատմամբ ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին:
1.9 2024 թվականի սեպտեմբերի 30-ին ՀՀ ՔԿ ԵՔՔՎ Մալաթիա-Սեբաստիա վարչական շրջանի քննչական բաժնի ավագ քննիչ Լ.Վարդանյանը որոշում է կայացրել թիվ 60051823 քրեական վարույթով մեղադրյալ Կարեն Մարտինի Հակոբջանյանի նկատմամբ որպես խափանման միջոց բացակայելու արգելք կիրառելու մասին:
1.10 2024 թվականի հոկտեմբերի 11-ին թիվ 60051823 քրեական վարույթը, հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարանում, որը ստանալով թիվ ԵԴ1/2817/01/24 դատական համարը, մակագրվել և ստացվել է նույն դատարանի դատավոր Մասիս Մելքոնյանի աշխատակազմում:
1.11 2024 թվականի հոկտեմբերի 14-ին Երևան քաղաքի առաջին ատյանի ընդհանուր իրավասության քրեական դատարանը, նախագահությամբ դատավոր Մասիս Մելքոնյանի, որոշում է կայացրել թիվ ԵԴ1/2817/01/24 վարույթ ընդունելու և նախնական դատալսումներ նշանակելու մասին:
2 Մեղադրանքի փաստական նկարագրությունը.
2.1 2024 թվականի սեպտեմբերի 27-ին ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանը որոշում է կայացրել թիվ 60051823 քրեական վարույթով Կարեն Մարտինի Հակոբջանյանի նկատմամբ ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին այն հանցանքի կատարման համար, որ նա, զրկված լինելով տրանսպորտային միջոցներ վարելու իրավունքից, 2023 թվականի ապրիլի 01-ին՝ ժամը 01:20-ի սահմաններում, Երևան քաղաքի Հրազդանի կիրճում վարել է «Վազ » մակնիշի 37 SX 808 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի կրտսեր պարեկ Արամո Հրաչիկի Մարգարյանի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180248475 արձանագրությունը:
3.Դատաքննության ընթացքում հետազոտված թույլատրելի ապացույցները.
3.1 2024 թվականի դեկտեմբերի 03-ին տեղի ունեցած դատական նիստում մեղադրյալ Կարեն Մարտինի Հակոբջանյանը հրաժարվել է ցուցմունք տալուց և հարցերին պատասխանելուց:
(դատական նիստի արձանագրություն՝ 03.12.2024թ.)
3.2 Դատարանը, հաշվի առնելով այն հանգամանքը, որ մեղադրյալ Կարեն Մարտինի Հակոբջանյանը, օգտվելով իր իրավունքից, հրաժարվել է ցուցմունք տալուց, որոշում է կայացրել հրապարակել մեղադրյալ Կարեն Մարտինի Հակոբջանյանի նախաքննական ցուցմունքը:
(դատական նիստի արձանագրություն՝ 03.12.2024թ.)
3.3 Նախաքննության ընթացքում 2024 թվականի սեպտեմբերի 30-ին մեղադրյալ Կարեն Մարտինի Հակոբջանյանը ցուցմունք է տվել այն մասին, որ տրանսպորտային միջոց վարելու իրավունքից զրկված վիճակում վարել է ավտոմեքենա երկու անգամ, առաջին դրվագով գործն ուղարկվել է դատարան, իսկ երկրորդ անգամ վարել է «Վազ» մակնիշի ավտոմեքենան Հրազդանի կիրճում, շարժվել դեպի Հալաբյան փողոց: Ընկերոջ հետ է եղել, վերջինս իրեն վատ է զգացել, խնդրել է իրեն վարել ավտոմեքենան, ուշ ժամ է եղել, հեռու չէին գնալու, դրա համար էլ համաձայնել է: Այդ մասին պարեկային ծառայողներին հայտնել է, երբ վերջիններս վարչական իրավախախտման արձանագրություն են կազմել: Արձանագրությունն ինքն է ստորագրել, տեղյակ է եղել, որ զրկված է տրանսպորտային միջոցներ վարելու իրավունքից 1 տարի ժամկետով: Մեղքն ընդունել է, զղջացել կատարած արարքի համար:
(Հատոր 1, Գ.Թ. 62-66)
Զննություն կատարելու մասին արձանագրության համաձայն՝ զննվել են ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրից Կարեն Մարտինի Հակոբջանյանի տվյալներով վարորդական վկայականի որոնման արդյունքում արտատպված ձևաթղթի, ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի կրտսեր պարեկ Վոլոդյա Արշավիրի Թադևոսյանի կողմից կազմված վարչական իրավախախտման վերաբերյալ թիվ 8180164577 և ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի կրտսեր պարեկ Արամո Հրաչիկի Մարգարյանի կողմից կազմված վարչական իրավախախտման վերաբերյալ թիվ 8180248475 արձանագրությունների պատճենները:
Առաջին փաստաթուղթը ՀՀ ոստիկանության Ճանապարհային ոստիկանության էլեկտրոնային ռեգիստրից Կարեն Մարտինի Հակոբջանյանի տվյալներով վարորդական վկայականի որոնման արդյունքում արտատպված ձևաթղթի պատճենն է, որն արտատպված է սև թանաքով A4 ֆորմատի սպիտակ գույնի թղթի մի երեսին: Կարեն Մարտինի Հակոբջանյանի վարորդական վկայականի համարն է՝ RR413618, վարորդական վկայականի տվյալներում նշված է վարորդական վկայականի B և C կարգեր, կարգավիճակը՝ զրկված, թողարկված է 2018 թվականի հոկտեմբերի 26-ին, զրկման սկիզբը՝ 2022 թվականի հոկտեմբերի 21, իսկ զրկման ավարտը՝ 2023 թվականի՝ հոկտեմբերի 23: Կասեցումներ չեն գտնվել:
Երկրորդ փաստաթուղթը ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի կրտսեր պարեկ Վոլոդյա Արշավիրի Թադևոսյանի կողմից կազմված վարչական իրավախախտման վերաբերյալ թիվ 8180164577 արձանագրության պատճենն է, որն արտատպված է սև թանաքով A4 ֆորմատի սպիտակ գույնի թղթի մի երեսին: Այն իրենից ներկայացնում է պայմանական երեք մասի բաժանված ձևաթուղթ, համաձայն որի՝ Կարեն Մարտինի Հակոբջանյանը 2022 թվականի հոկտեմբերի 21-ին՝ ժամը 04:34-ի սահմաններում, վարել է «Վազ» մակնիշի 55 ՍO 010 հաշվառման համարանիշի ավտոմեքենան, որը հայտնաբերվել է ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի կրտսեր պարեկ Վոլոդյա Արշավիրի Թադևոսյանի կողմից, ինչի կապակցությամբ կազմվել է վարչական իրավախախտումների վերաբերյալ թիվ 8180164577 արձանագրությունը: Ծանուցումը ստացա հատվածում առկա է ստորագրություն: Մյուս սյունակում՝ որոշում հատվածում, Կարեն Մարտինի Հակոբջանյանը 1 տարի ժամկետով զրկվել է տրանսպորտային միջոց վարելու իրավունքից: Որոշման պատճենը և կատարման կարգի մասին քաղվածքը ստացա հատվածում առկա է ստորագրություն, դրա կրկնօրինակը բացակայում է:
Երրորդ փաստաթուղթը ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի կրտսեր պարեկ Արամո Հրաչիկի Մարգարյանի կողմից կազմված վարչական իրավախախտման վերաբերյալ թիվ 8180248475 արձանագրության պատճենն է, որն արտատպված է սև թանաքով A4 ֆորմատի սպիտակ գույնի թղթի մի երեսին: Այն իրենից ներկայացնում է պայմանական երեք մասի բաժանված ձևաթուղթ, համաձայն որի՝ Կարեն Մարտինի Հակոբջանյանը 2023 թվականի ապրիլի 01-ին՝ ժամը 01:20-ի սահմաններում, Երևան քաղաքի Հրազդանի կիրճում վարել է «Վազ» մակնիշի 37 SX 808 հաշվառման համարանիշի ավտոմեքենան, որը հայտնաբերվել է ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի կրտսեր պարեկ Արամո Հրաչիկի Մարգարյանի կողմից, ինչի կապակցությամբ կազմվել է վարչական իրավախախտումների վերաբերյալ թիվ 8180248475 արձանագրությունը: Արձանագրության վրա առկա է հայատառ ձեռագիր «Հակոբջանյան» գրառումը և ստորագրություն:
(Հատոր 1, Գ.Թ. 43-44)
Զննություն կատարելու մասին արձանագրության համաձայն՝ զննվել է Դատալեքս դատական տեղեկատվական համակարգից արտատպված ԵԴ1/0243/01/23 դատական գործի պատճենը: ԵԴ1/0243/01/23 դատական գործի պատճենի զննությամբ պարզվեց, որ թիվ 60174223 քրեական վարույթի շրջանակներում Կարեն Մարտինի Հակոբջանյանին մեղադրանք է առաջադրվել այն բանի համար, որ նա, զրկված լինելով տրանսպորտային միջոց վարելու իրավունքից հարբած /ոչ սթափ/ վիճակում վարել է տրանսպորտային միջոց: Կարեն Մարտինի Հակոբջանյանը, թիվ 8180164577 որոշմամբ տրանսպորտային միջոց վարելու իրավունքից 1 տարի ժամկետով՝ 2022 թվականի հոկտեմբերի 21-ից մինչև 2023 թվականի հոկտեմբերի 23-ը զրկված վիճակում, այդ մասին պատշաճ ծանուցված լինելով, ոչ սթափ վիճակում՝ 1 լիտր արտաշնչած օդի մեջ մաքուր ալկոհոլի պարունակությունը՝ 0.225մգ/լ, 2022 թվականի դեկտեմբերի 14-ին՝ ժամը 03:50-ին, Երևան քաղաքի Արտաշատի խճուղում վարել է «Վազ» մակնիշի 55 ՍՕ 010 հաշվառման համարանիշի տրանսպորտային միջոց, որը հայտնաբերվել է ՀՀ ոստիկանության պարեկային ծառայության պարեկի կողմից և կազմել է վարչական իրավախախտման թիվ 8180168064 արձանագրությունը:
(Հատոր 1, Գ.Թ. 45)
Արտավարութային փաստաթուղթ ապացույց ճանաչելու մասին որոշման համաձայն՝ որպես արտավարութային փաստաթուղթ ապացույց է ճանաչվել ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրից Կարեն Մարտինի Հակոբջանյանի տվյալներով վարորդական վկայականի որոնման արդյունքում արտատպված ձևաթղթի, ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի կրտսեր պարեկ Վոլոդյա Արշավիրի Թադևոսյանի կողմից կազմված վարչական իրավախախտման վերաբերյալ թիվ 8180164577 և ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի կրտսեր պարեկ Արամո Հրաչիկի Մարգարյանի կողմից կազմված վարչական իրավախախտման վերաբերյալ թիվ 8180248475 արձանագրությունների պատճենները:
(Հատոր 1, Գ.Թ. 46-48)
Արտավարութային փաստաթուղթ ապացույց ճանաչելու մասին որոշման համաձայն՝ որպես արտավարութային փաստաթուղթ ապացույց է ճանաչվել Դատալեքս դատական տեղեկատվական համակարգից արտատպված ԵԴ1/0243/01/23 դատական գործի պատճենը:
(Հատոր 1, Գ.Թ. 49-50)
4.Դատարանի իրավական վերլուծությունները.
4.1. Վերլուծելով մեղադրյալ Կարեն Մարտինի Հակոբջանյանին ներկայացված մեղադրանքը և հիմնվելով հետազոտված թույլատրելի ապացույցների վրա` Դատարանը գտնում է, որ.
• ապացուցված է մեղադրյալ Կարեն Մարտինի Հակոբջանյանին վերագրվող փաստական հանգամանքները, մասնավորապես՝ մեղադրյալ Կարեն Մարտինի Հակոբջանյանի կողմից տրանսպորտային միջոցներ վարելու իրավունքից զրկված լինելով կրկին տրանսպորտային միջոց վարելու փաստը և տրանսպորտային միջոցներ վարելու իրավունքից զրկված անձի կողմից ոչ սթափ վիճակում տրանսպորտային միջոց վարելու փաստը.
• ապացուցված է վերոգրյալ արարքի քրեական հակաիրավականությունը, որը նախատեսված է 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 1-ին մասով.
• ապացուցված է մեղադրյալ Կարեն Մարտինի Հակոբջանյանի կողմից 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 1-ին մասով նախատեսված վերոգրյալ արարքները կատարելը.
• ապացուցված է մեղադրյալ Կարեն Մարտինի Հակոբջանյանի մեղավորությունը 2021 թվականի մայիսի 05-ին ընդունված ՀՀ քրեական օրենսգրքի 344-րդ հոդվածի 1-ին մասով նախատեսված արարքները կատարելու մեջ:
4.2. Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
4.3. ՀՀ Սահմանադրության 71-րդ հոդվածի համաձայն՝ 1. Հանցանք կատարած անձի պատժի հիմքը նրա մեղքն է: 2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին:
4.4. ՀՀ քրեական օրենսգրքի 7-րդ հոդվածի 1-ին մասի համաձայն`
Հանցանք կատարած անձին քրեական պատասխանատվության «պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին հանցավորի անձնավորությանը:
4.5. ՀՀ քրեական օրենսգրքի 55-րդ հոդվածի 2-րդ մասի համաձայն՝
1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ: 2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
4.6. ՀՀ քրեական օրենսգրքի 69-րդ հոդվածի համաձայն`
Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները: 2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները: 4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ: Պատիժ նշանակելը քրեական գործով արդարադատության իրականացման վճռական պահն է, որը պետք է դառնա կատարված հանցանքի հասարակական վտանգավորության գնահատման լիարժեք չափանիշ, պատժի ենթարկվող անձին վերասոցիալականացնելու, ինչպես մեղադրյալի, այնպես էլ այլ անձանց կողմից հանցագործությունները կանխելու գործուն միջոց: Արդարության և պատասխանատվության անհատականացման սկզբունքը պատժի տեսակը և չափը որոշելու բազմաթիվ դրույթների ու չափանիշների հետ մեկտեղ անխզելիորեն կապված է պատասխանատվությունը և պատիժը մեղմացնող ու ծանրացնող հանգամանքները հետազոտելու և հաշվի առնելու հետ: ՀՀ քրեական դատավարության օրենսգրքի 102-րդ հոդվածում թվարկված են յուրաքանչյուր քրեական գործով ապացուցման ենթակա փաստական հանգամանքները: Այդ հոդվածի 5-րդ կետի համաձայն՝ քրեական օրենքով նախատեսված պատասխանատվությունը մեղմացնող կամ խստացնող հանգամանքները հաստատվում են միայն ապացույցների հիման վրա: Ընդ որում, անձի պատասխանատվությունը և պատիժը մեղմացնող ու ծանրացնող հանգամանքների գնահատումը յուրաքանչյուր կոնկրետ գործով պատիժ նշանակելիս հնարավորություն է տալիս դատարանին պատկերացում կազմել հանցանքի հանրության համար վտանգավորության աստիճանի, բնույթի, ինչպես նաև հանցավորի անձնավորության մասին և յուրաքանչյուր կոնկրետ գործով անհատականացնել պատիժը: Պատժի անհատականացման կարևորությունն այն է, որ դա լուրջ երաշխիք է ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակների իրականացման համար:
4.7. Վերոհիշյալ իրավադրույթների և ՀՀ վճռաբեկ դատարանի որոշումների համատեքստում, ուսումնասիրելով մեղադրյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մեղադրյալ Կարեն Մարտինի Հակոբջանյանի նկատմամբ, նրա կատարած հանցանքի համար պատիժ նշանակելիս` Դատարանը հաշվի է առնում հանցանքի բնույթն ու հանրության համար վտանգավորության աստիճանը, հանցավորի անձը բնութագրող հանգամանքները, այն, որ նա դատվածություն չունի:
4.8. Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալի պատասխանատվությունը և պատիժը մեղմացնող հանգամանք, հաշվի է առնում այն, որ նա ներկայացված մեղադրանքում իրեն լիովին մեղավոր է ճանաչել և տվել է խոստովանական ցուցմունք:
Մեղադրյալի պատասխանատվությունն ու պատիժը ծանրացնող հանգամանքներ Դատարանը չի արձանագրում:
4.9. Դատարանը, քննարկելով մեղադրյալ Կարեն Մարտինի Հակոբջանյանի նկատմամբ պատժի նշանակման հարցը, գտնում է, որ մեղադրյալ Կարեն Մարտինի Հակոբջանյանի նկատմամբ անհրաժեշտ է տուգանքի չափ նշանակել նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով, որով կապահովվի ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը, ավելին՝ այն անհրաժեշտ և բավարար է սոցիալական արդարությունը վերականգնելու, պատժի ենթարկված անձին վերասոցիալականացնելու և հանցագործությունները կանխելու համար: Միաժամանակ Դատարանը գտնում է, որ մեղադրյալ Կարեն Մարտինի Հակոբջանյանի նկատմամբ սույն դատավճռով նշանակված պատժին դատավճիռների համակցությամբ պետք է մասնակի գումարել թիվ ԵԴ1/0243/01/23 քրեական գործով Երևան քաղաքի առաջին ատյանի ընդհանուր իրավասության քրեական դատարանի 17.11.2023թ.-ի դատավճռով նշանակված 340.000 ՀՀ դրամ տուգանքի չվճարված մասի՝ 161.000 ՀՀ դրամի չափով տուգանքը և Կարեն Մարտինի Հակոբջանյանի նկատմամբ վերջնական պատիժ սահմանել տուգանքը 530․000 /հինգ հարյուր երեսուն հազար/ՀՀ դրամի չափով: Միևնույն ժամանակ, հաշվի առնելով մեղադրյալի գույքային դրությունը՝ դատարանը գտնում է, Կարեն Մարտինի Հակոբջանյանի նկատմամբ նշանակված տուգանքի` 530․000 /հինգ հարյուր երեսուն հազար/ ՀՀ դրամ գումարի վճարումը պետք է տարաժամկետել, դրա վճարման ժամկետ սահմանել 12 (տասներկու) ամիս:
4.10. ՀՀ քրեական դատավարության 348-րդ հոդվածի համաձայն դատավճռում պետք է շարադրվեն նաև հետևյալ հարցերի պատասխանները.
• գույքային հայցը ենթակա է արդյոք բավարարման, ում օգտին և ինչ չափով, ինչպես նաև պատճառված գույքային վնասը ենթակա է արդյոք հատուցման, եթե գույքային հայց չի հարուցվել.
• որ գույքն է ենթակա բռնագրավման, ինչ չափով և ինչպիսի հիմքով,
վերացվելու է արդյոք կիրառված գույքի արգելադրումը, իսկ եթե այդպիսին կիրառված չէ, ապա ենթակա է արդյոք կիրառման,
• ինչպես պետք է պահպանվեն և տնօրինվեն ապացույցները,
• դատապարտված մեղադրյալի նկատմամբ վերացվելու, փոխվելու կամ կիրառվելու է արդյոք որևէ խափանման միջոց.
• ում վրա և ինչ չափով պետք է դրվեն վարութային ծախսերը։
4.11. Քննարկելով մեղադրյալի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
4.12. Նկատի ունենալով, որ սույն քրեական գործով գույքային հայց, գույք բռնագրավելու անհրաժեշտություն, արգելադրված գույք, վարույթային ծախսերի վերաբերյալ հարցեր առկա չեն, Դատարանը այդ հարցերին չի անդրադառնում:
4.13. Քննարկելով ապացույցների պահպանման և տնօրինման հարցը, ղեկավարվելով ՀՀ քրեական դատավարության օրենսգրքի 99-րդ հոդվածով՝ Դատարանը գտնում է, որ որպես արտավարութային փաստաթուղթ ապացույց ճանաչված և հիմնական դատալսումների ժամանակ հետազոտված փաստաթղթերը պետք է պահվեն վարույթային նյութերի հետ դրանց ամբողջ ընթացքում:
4.14. Քննարկելով մեղադրյալ Կարեն Մարտինի Հակոբջանյանի նկատմամբ որպես խափանման միջոց ընտրված բացակայելու արգելքին՝ Դատարանը գտնում է, որ այն պետք է թողնել անփոփոխ մինչև սույն դատավճռի օրինական ուժի մեջ մտնելը, իսկ դրանից հետո՝ կիրառված սահմանափակումները ենթակա են վերացման:
Ելնելով վերոգրյալից և ղեկավարվելով Հայաստանի Հանրապետության քրեական դատավարության օրենսգրքի 30-31-րդ, 100-րդ, 167-րդ, 347-350-րդ, 352-353-րդ, 364-րդ հոդվածներով, Դատարանը`

Վ Ճ Ռ Ե Ց

1. Կարեն Մարտինի Հակոբջանյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցանք կատարելու համար և նրա նկատմամբ այդ արարքը կատարելու համար պատիժ նշանակել տուգանք՝ հանցանքը կատարելու պահին գործող նվազագույն աշխատավարձի հնգապատկի չափով 375․000 ՀՀ դրամի չափով:
2. Նշանակված պատժին դատավճիռների համակցությամբ մասնակի գումարել թիվ ԵԴ1/0243/01/23 քրեական գործով Երևան քաղաքի առաջին ատյանի ընդհանուր իրավասության քրեական դատարանի 17.11.2023թ.-ի դատավճռով նշանակված 340.000 ՀՀ դրամ տուգանքի չվճարված մասի՝ 161.000 ՀՀ դրամի չափով տուգանքը և Կարեն Մարտինի Հակոբջանյանի նկատմամբ վերջնական պատիժ սահմանել տուգանքը 530․000 /հինգ հարյուր երեսուն հազար/ՀՀ դրամի չափով։
3. Դատավճիռն օրինական ուժի մեջ մտնելուց հետո թույլատրել Կարեն Մարտինի Հակոբջանյանին դատավճռով նշանակված 530․000 /հինգ հարյուր երեսուն հազար/ ՀՀ դրամը վճարել մաս առ մաս` 12 /տասներկու/ ամսվա ընթացքում:
4. Կարեն Մարտինի Հակոբջանյանին նկատմամբ ընտրված խափանման միջոց բացակայելու արգելքը թողնել անփոփոխ՝ մինչև դատավճռի օրինական ուժի մեջ մտնելը:
5. Ապացույց ճանաչված արտավարութային փաստաթղթերը պահել քրեական գործի նյութերում:
6. Դատավճիռը կարող է բողոքարկվել ՀՀ վերաքննիչ քրեական դատարան այն ստանալու օրվանից հետո` մեկամսյա ժամկետում:

ԴԱՏԱՎՈՐ ՄԱՍԻՍ ՄԵԼՔՈՆՅԱՆ