ԵԴ1/2809/01/24
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ
ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2025թ․ ապրիլի <<29>> ք․Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

Նախագահող դատավոր Ա.Հովհաննիսյան
դատական նիստերի քարտուղար Մ․Հովհաննիսյան
հանրային մեղադրող Վ.Սամսոնյան

դռնբաց դատական նիստում քննեց քրեական վարույթն ըստ մեղադրանքի Մկրտիչ Սամվելի Աճեմյանի՝ ծնված 1987 թվականի ապրիլի 18-ին Երևան քաղաքում, ազգությամբ հայ, ՀՀ քաղաքացի, ամուսնացած, խնամքին մեկ անչափահաս երեխա, չի աշխատում, նախկինում չդատապարտված, միջնակարգ կրթությամբ, հաշվառված և բնակվող՝ Երևան քաղաքի Հաղթանակ թաղամասի 3-րդ փողոցի 16-րդ տանը: Հանրային քրեական հետապնդում է հարուցվել ՀՀ քրեական օրենսգրքի 344-րդ հոդվածի 2-րդ մասով՝ 2 դրվագ․ որպես խափանման միջոց է կիրառվել բացակայելու արգելքը:
Վարույթի դատավարական նախապատմությունը.
2024 թվականի մայիսի 3-ի ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Ն.Պետրոսյանի արձանագրությամբ ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել է թիվ 60508924 քրեական վարույթը։
2024 թվականի մայիսի 3-ի ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Ն.Պետրոսյանի արձանագրությամբ ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել է թիվ 60509024 քրեական վարույթը։
2024 թվականի հուլիսի 26-ի ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Ն.Պետրոսյանի որոշմամբ թիվ 60508924 քրեական վարույթը միացվել է թիվ 60509024 քրեական վարույթին և նախաքննությունը շարունակվել է թիվ 60508924 նախաքննական համարի ներքո:
2024 թվականի հոկտեմբերի 2-ի ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության ավագ դատախազ Վ.Սամսոնյանի որոշմամբ Մկրտիչ Սամվելի Աճեմյանի նկատմամբ հանրային քրեական հետապնդում է հարուցվել ՀՀ քրեական օրենսգրքով նախատեսված, պատժի սպառնալիքով արգելված, մեղավորությամբ կատարված այն հանցանքի կատարման համար, որ նա, չունենալով տրանսպորտային միջոցներ վարելու իրավունք, 2023 թվականի օգոստոսի 3-ին՝ ժամը 03:10-ի սահմաններում, Երևան քաղաքի Հաղթանակ փողոցում ոչ ստափ վիճակում՝ 0,292 մգ/լ պարունակությամբ ալկոհոլ օգտագործած վիճակում (հաշվի առնելով ստուգաչափման սարքի սխալանքը՝ +-10) վարել է <<Լադա>> մակնիշի 01 KK 045 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի կրտսեր պարեկ Գոռ Հրաչի Պետրոսյանի կողմից, որի կապակցությամբ կազմվել է վարչական իրավախախտման վերաբերյալ թիվ 8180258144 արձանագրությունը:
Այսինքն՝ Մկրտիչ Սամվելի Աճեմյանին մեղսագրվում է ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարում:
Բացի այդ՝ Մկրտիչ Սամվելի Աճեմյանը, չունենալով տրանսպորտային միջոցներ վարելու իրավաունք, 2023 թվականի հոկտեմբերի 21-ին՝ ժամը 02:55-ի սահմաններում, Երևան քաղաքի Լենինգրադյան փողոցում ոչ սթափ վիճակում՝ 0/618 մգ/լ պարունակությամբ ալկոհոլ օգտագործված վիճակում (հաշվի առնելով ստուգաչափման սարքի սխալանքը՝ +-10) վարել է <<Լադա>> մակնիշի, 01 KK 045 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի կրտսեր պարեկ Գնել Գևորգի Գրիգորյանի կողմից, որի կապակցությամբ կազմվել է վարչական իրավախախտման վերաբերյալ թիվ 8180260886 արձանագրությունը:
Այսինքն՝ Մկրտիչ Սամվելի Աճեմյանին մեղսագրվում է ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարում:
2024 թվականի հոկտեմբերի 2-ի ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնի քննիչ Ա.Վարոսյանի որոշմամբ Մկրտիչ Սամվելի Աճեմյանի նկատմամբ որպես խափանման միջոց է կիրառվել բացակայելու արգելքը։
2024 թվականի հոկտեմբերի 11-ին թիվ 60-5089-24 քրեական վարույթը մեղադրական եզրակացությամբ ուղարկվել են Երևան քաղաքի առաջին ատյանի ընդհանուր իրավասության քրեական դատարան։
Ապացույցների հետազոտումը և գնահատումը․
Հիմնական դատալսումների ընթացքում մեղադրյալ Մկրտիչ Աճեմյանը, օգտվելով իր քրեադատավարական իրավունքից, հրաժարվել է ցուցմունք տալ, ուստի որոշվել է հրապարակել վերջինի նախաքննական ցուցմունքը։
2024 թվականի սեպտեմբերի 24-ի վկայի հարցաքննության արձանագրության համաձայն. <<Տրանսպորտային միջոցներ վարելու իրավունքից զրկվելուց հետո այլևս իմ վարորդական իրավունքը չեմ վերականգնել, այս պահին ևս չունեմ վարորդական իրավունք: Վարորդական իրավունքից զրկման մասին հենց նույն ժամանակ իրազեկվել եմ:
Վարույթն իրականացնողի մարմնի կողմից հարցաքննվողին ներկայացվել է վարչական իրավախախտման վերաբերյալ արձանագրությունը՝ կազմված 2021 թվականի սեպտեմբերի 4-ին, որի տողերից մեկում առկա է՝ ստացա օրինակը, ստորագրություն: Վկան հայտարարել է, որ հենց այդ նույն ժամանակ էլ իրազեկվել է իրեն վարորդական իրավունքից զրկելու մասին։ 2023 թվականի օգոստոսի 3-ին և 2023 թվականի հոկտեմբերի 21-ին իրավախախտում կատարելիս իրազեկված է եղել, որ չունի վարորդական իրավունք: Նշված օրերին ինքը գտնվել է ալկոհոլ օգտագործած վիճակում: 2023 թվականի օգոստոսի 3-ին <<Լադա>> մակնիշի իր ընկերոջը պատկանող ավտոմեքենան է վարել, երբ պարեկային ծառայության աշխատակիցների կողմից կանգնեցվել է այն։ 2023 թվականի հոկտեմբերին Լենինգրադյան փողոցում պարեկային ծառայության աշխատակցի կողմից կանգնեցվել է <<Եվրոպա>> հյուրանոցի մոտակայքում, նշված հատվածում ավտոբոքսեր կան, գնացել էր ընկերոջ մեքենան բոքսից տուն տանելու: Այդ օրը օգտագործել է գարեջուր։ Զղջում է իր կատարած արարքների համար։ Միայն ցանկանում է նշել, որ ստուգաչափման սարքը կարծում է՝ հնարավոր է ինչ-որ չափով իր արտաշնչած օդում պարունակվող ալկոհոլի պարունակությունը սխալ ցույց տված լինի, օրինակ, հոկտեմբեր ամսին կատարած իրավախախտման դեպքում 0,618-ը կարծում է շատ է ցույց տվել, չի կարծում, որ այդքան հարբած վիճակում է գտնվել, քանի որ գարեջուր է միայն ինքը օգտագործում: Ավելացնելու այլ բան չունի>>:
2024 թվականի հոկտեմբերի 2-ի մեղադրյալի հարցաքննության արձանագրության համաձայն․ <<Ներկայացված մեղադրանքն ինձ համար ամբողջությամբ պարզ է, ինձ ներկայացված մեղադրանքում ընդունում եմ իմ մեղավորությունն ամբողջությամբ, զղջում կատարածի համար, խնդրում եմ պատժատեսակի և պատժաչափի նշանակման հարցում լինել ներողամիտ, ընտանիքի ֆինանսական բեռը ընկած է միայն ինձ վրա: Ինչ վերաբերում է ինձ ներկայացված մեղադրանքում նկարագրված արարքների կատարման մանրամասները ներկայացնելուն, ապա վկայի դատավարական կարգավիճակում ներկայացրել եմ այդ հանգամանքները՝ որքանով որ հիշում եմ, խնդրում եմ այդ ցուցմունքը ընդունել որպես հիմք, չեմ ցանկանում նորից դրանք ներկայացնել: Ինչպես այդ, այնպես էլ այս ցուցմունքիս ավելացնելու որևէ բան չունեմ: Նշեմ, որ նաև մասնակցել եմ 44-օրյա պատերազմին, <<Եղնիկներ>> կոչվող զորամասի կողմից պահպանվող պոստերում եմ կռվել, սակայն այդ ամենը փաստաթղթավորված չէ, կամավոր հիմունքներով իմ ավտոմեքենայով եմ գնացել այնտեղ>>։
2024 թվականի սեպտեմբերի 9-ի զննություն կատարելու մասին արձանագրության համաձայն՝ <<Վարչական իրավախախտման վերաբերյալ արձանագրություն>> թիվ 152222556 փաստաթղթի զննությամբ պարզվել է, որ այն սպիտակ թղթի վրա և թանաքով արտատպված ձևաթուղթ է՝ ինչպես տպագիր, այնպես էլ ձեռագիր ատամներով: Նշված փաստաթուղթը <<2023 թվականի հոկտեմբերի 21-ի>> թվագրմամբ է, որպես կազմման ժամ նշված է 03:00-ը։ Արձանագրության կազմման վայրը՝ Երևան քաղաքի Բադյան փողոցն է, այն կազմվել է ՀՀ ՆԳՆ ոստիկանության պարեկային առայության Երևան քաղաքի գնդի 2-րդ գումարտակի 1-ին վաշտի կրտսեր պարեկ Գնել Գևորգի Գիգորյանի կողմից: Նշված փաստաթղթի զննությամբ պարզվել է, որ Մկրտիչ Սամվելի Աճեմյանը (ծնված՝ 1987 թվականի ապրիլի 18-ին, բնակվող՝ Երևան քաղաքի Մալաթիա-Սեբաստիա 3-րդ փողոցի 16-րդ տուն հասցեում) 2023 թվականի հոկտեմբերի 21-ին՝ ժամը 02:55-ին, Երևան քաղաքի Լենինգրադյան փողոցում վարել է Արամ Դավթի Սարգսյանի անվամբ հաշվառված <<Նիվա>> մակնիշի 01 KK 045 հաշվառման համարանիշի ավտոմեքենան՝ չունենալով վարորդական իրավունք, ոչ սթափ վիճակում: Սույն ձևաթղթի <<Արձանագրությանը կցվում է>> տողում առկա է ձեռագիր գրվածք՝ 91101198, զնն. N00815: <<Վարչական իրավախախտում կատարած անձի բացատրությունը, դիտողությունը, ստորագրությունը>> բաժնում առկա է ձեռագիր գրառում՝ <<վարորդը հրաժարվեց ստորագրելուց, ծանոթանալուց>> բովանդակությամբ:
Սթափության վիճակի զննման թիվ 00815 կտրոնի զննությամբ պարզվել է, որ այն 2023 թվականի հոկտեմբերի 21-ի թվագրմամբ է, որպես զննման ժամ նշված է 02:55:07: Ստուգումը կատարվել է <<Ալկոտեստեր Jupiter X/RP>> մոդելի 91101198 համարի սարքով, որի վերջին ստուգաչափման ամսաթիվն է՝ 2023 թվականի հուլիսի 26-ը: Ստուգման ձևաչափը ավտոմատ է, ստուգումից առաջ թեստը եղել է դատարակ' 0.000 mg/L: Որպես վարորդի տվյալներ նշված են Մկրտիչ Սամվելի Աճեմյան: Տրանսպորտային միջոցի հաշվառման ամարանիշն է՝ 01 KK 045: Ալկոհոլի պարունակությունը կազմել է 0,618 մգ/լ:
Մկրտիչ Սամվելի Աճեմյանի անձի նշված տվյալներով ՀՀ ՆԳՆ ոստիկանության ճանապարհային ոստիկանության էլեկտրոնային ռեգիստրում կատարված որոնման արտատվածքի զննությամբ պարզվել է, որ Մկրտիչ Աճեմյանի տվյալներով թողարկված է RB515616 վարորդական վկայականը, որի թողարկման ժամանակահատվածն է՝ 2019 թվականի դեկտմեբերի 15-ը: <<Զրկումներ>> ենթաբաժնում առկա տվյալների համաձայն՝ զրկման սկիզբն է՝ 2021 թվականի սեպտեմբերի 9-ը, որպես զրկման ավարտ նշված է 2022 թվականի սեպտեմբերի 9-ը։ Կասեցումներ չեն գտնվել։
102334 ստուգաչափման վկայականի պատճենի զննմամբ պարզվել է, որ A4 ֆորմատի սպիտակ թղթի վրա տպված ձևաթուղթ է՝ տպագիր և ձեռագիր գրառումներով: Մասնավորապես՝ այդ վկայականի վերևում՝ գերբի երկու կողմերում առկա տպագիր <<Հայաստանի Հանրապետություն էկոնոմիկայի նախարարություն>>, <<Ստանդարտացման և չափագիտության ազգային մարմին>> ՓԲ ընկերություն տպագիր գրառումները, որից ներքև՝ մեջտեղում, առկա է <<Ստուգաչափման վկայական 102334>> տպագիր գրվածքը: Նշված վկայականի զննությամբ պարզվել է, որ այդ վկայականը տրված է 91101198 գործարանային համարով <<Ալկոտեստեր>> չափման միջոցի վերաբերյալ, որը ստուգաչափվել է 2023 թվականի հուլիսի 26-ին, ուժի մեջ է մինչև 2024 թվականի հուլիսի 26-ը: Չափման տիրույթը՝ նշված է 0,000-2,000-ը: Արտադրված է Չինաստանում, պատկանելիության դաշտում նշված է ՀՀ պարեկային ծառայություն: Ստուգաչափումը կատարվել է համաձայն՝ MU 235-2008:
Վարչական իրավախախտման վերաբերյալ արձանագրություն 8180014372 փաստաթղթի զննմամբ պարզվել է, որ այն 2021 թվականի սեպտեմբերի 4-ի թվագրմամբ է, կազմման ժամը՝ 03:25: Արձանագրությունը կազմվել է ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 3-րդ վաշտի կրտսեր պարեկ Ալբերտ Ավետիսյանի կողմից։ Կազմված է Մկրտիչ Սամվելի Աճեմյանի կողմից 2021 թվականի սեպտեմբերի 9-ի՝ ժամը 03:15-ին, Երևան քաղաքի Գուսան Շերամի փողոցում Էդգար Հովսեփյանի անվամբ հաշվառված <<Նիվա>> մակնիշի 60 MM 045 հաշվառման համարանիշի ավտոմեքենան ոչ սթափ վիճակում վարելու վերաբերյալ, մասնավորապես՝ արտաշնչած օդում մաքուր ալկոհոլի պարունակությունը գերազանցում է 0.5 միլիգրամը։ Նույն արձանագրության <<վարչական իրավախախտում կատարած անձի բացատրությունը, ստորագրությունը>> տողում առկա է ձեռագիր գրառում՝ <<ստացա որոշման օրինակը 04.09.21թ.>> բովանդակությամբ, առկա է նաև ստորագրություն: Նույն ստորագրությունն առկա է և արձանագրության ծանոթացման վերաբերյալ տողում: Նույն փաստաթղթի աջակողմյան հատվածում տպագիր և ձեռագիր գրառումներով վարչական րավախախտման գործով որոշում է, որի համաձայն՝ ոչ սթափ վիճակում ՏՄ վարելու համար քաղաքացի Մկրտիչ Սամվելի Աճեմյանը 1 տարի ժամկետով զրկվել է վարորդական իրավունքից։ <<Որոշման պատճենը և կատարման կարգի մասին քաղվածքն ստացա>> տպագիր գրառմամբ տողում առկա է ձեռագիր գրառում <<հասցեատերը հրաժարվեց ստանալ իր օրինակը>> բովանդակությամբ, սակայն խախտողի ստորագրությունը>> տողում առկա է ստորագրություն, և ձեռագիր՝ 2021 թվականի սեպտեմբերի 4 թվագրումը:
Քրեական գործում առկա <<Վարչական իրավախախտման վերաբերյալ արձանագրություն>> վերտառությամբ թիվ 8180258144 փաստաթուղթը ձեռագիր և տպագիր գրառումներով ձևաթուղթ է: Նշված փաստաթուղթը <<2023 թվականի օգոստոսի 3>> թվագրմամբ է, որպես կազմման ժամ նշված է 03:25-ը: Արձանագրության կազմման վայրը՝ Երևան քաաքի Հաղթանակ փողոց, այն կազմվել է ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի կրտսեր պարեկ Գոռ Պետրոսյանի կողմից: Նշված փաստաթղթի զննությամբ պարզվել է, որ Մկրտիչ Սամելի Աճեմյանը 2023 թվականի օգոստոսի 3-ին՝ ժամը 03:10-ին, Երևան քաղաքի Լենինգրադյան փողոցում վարել է Արամ Դավթի Սարգսյանի անվամբ հաշվառված <<Նիվա>> մակնիշի 01 KK 045 հաշվառման համարանիշի ավտոմեքենան՝ չունենալով վարորդական իրավունք, ոչ սթափ վիճակում: Սույն ձևաթղթի <<Արձանագությանը կցվում է>> տողում առկա է ձեռագիր գրվածք՝ 91101066, զնն. N00622: Վարչական իրավախախտում կատարած անձի բացատրությունը, դիտողությունը, ստորագրությունը>> բաժնում առկա է ստորագրություն:
Սթափության վիճակի զննման թիվ 00622 կտրոնի զննությամբ պարզվել է, որ այն 2023 թվականի օգոստոսի 3-ի թվագրմամբ է, որպես զննման ժամ նշված է 03:13:09: Ստուգումը հատավել է <<Ալկոտեստեր Jupiter X/RP>> մոդելի 91101066 համարի սարքով, որի վերջին ստուգաչափման ամսաթիվն է՝ 2023 թվականի հուլիսի 3-ը: Ստուգման ձևաչափը ավտոմատ է, ստուգումից առաջ թեստը եղել է դատարկ՝ 0.000 մգ/լ: Որպես վարորդի տվյալներ նշված են Մկրտիչ Սամվելի Աճեմյան: Տրանսպորտային միջոցի հաշվառման համարանիշն է 01 KK 045: Ալկոհոլի պարունակությունը կազմել է 0,292 մգ/լ:
099455 ստուգաչափման վկայականի պատճենի զննմամբ պարզվել է, որ A4 ֆորմատի սպիտակ թղթի վրա տպված ձևաթուղթ է՝ տպագիր և ձեռագիր գրառումներով: Մասնավորապես՝ այդ վկայականի վերևում՝ գերբի երկու կողմերում առկա է տպագիր <<Հայաստանի Հանրապետություն էկոնոմիկայի նախարարություն>>, <<Ստանդարտացման և չափագիտության ազգային մարմին>> ՓԲ ընկերության տպագիր գրառումները, որից ներքև՝ մեջտեղում, առկա է <<Ստուգաչափման վկայական 099455>> տպագիր գրվածքը։ Նշված վկայականի զննությամբ պարզվել է, որ այդ վկայականը տրված է 91101066 գործարանային համարով <<Ալկոտեստեր>> չափման միջոցի վերաբերյալ, որը ստուգաչափվել է 2023 թվականի հուլիսի 3-ին, ուժի մեջ է մինչև 2024 թվականի հուլիսի 3-ը։ Չափման տիրույթը՝ նշված է 0,000-2,000-ը: Սխալանքը՝ +-10 տոկոս: Արտադրված է Չինաստանում, պատկանելության դաշտում նշված է ՀՀ պարեկային ծառայություն։ Ստուգաչափումը կատարվել է համաձայն՝ MU 2835-2008:
Նշված փաստաթղթերի զննությամբ վարույթի համար նշանակություն ունեցող այլ տվյալներ ձեռք չեն բերվել:
2024 թվականի հոկտեմբերի 2-ի արտավարութային փաստաթուղթն ապացույց ճանաչելու մասին որոշման համաձայն՝ թիվ 60508924 քրեական վարույթում առկա զննության ենթարկված վարչական իրավախախտման վերաբերյալ արձանագրություն թիվ 8180260886 փաստաթղթի պատճենը, սթափության վիճակի զննման թիվ 00815 կտրոնի պատճենը, Մկրտիչ Սամվելի Աճեմյանի անձի նշված տվյալներով ՀՀ ՆԳՆ ոստիկանության ճանապարհային ոստիկանության էլեկտրոնային ռեգիստրում կատարված որոնմամբ արտատվածքը, 102334 ստուգաչափման վկայականի պատճենը, վարչական իրավախախտման վերաբերյալ արձանագրության թիվ 8180014372 փաստաթղթի պատճենը, վարչական իրավախախտման վերաբերյալ արձանագրության թիվ 8180258144 փաստաթղթի պատճենը, ստափության վիճակի զննման թիվ 00622 կտրոնը, 099455 ստուգաչափման վկայականի պատճենը ճանաչվել են արտավարույթային փաստաթուղթ:
ՀՀ ՆԳՆ ոստիկանության ինֆորմացիոն կենտրոնի պահանջագրի համաձայն՝ Մկրտիչ Սամվելի Աճեմյանը նախկինում արատավորված՝ դատապարված չի եղել:
Մեղադրական վերդիկտ․
Վերոնշյալ փաստերի հիման վրա Դատարանը գալիս է այն եզրահանգմանը, որ Մկրտիչ Սամվելի Աճեմյանը չունենալով տրանսպորտային միջոցներ վարելու իրավունք, 2023 թվականի օգոստոսի 3-ին՝ ժամը 03:10-ի սահմաններում, Երևան քաղաքի Հաղթանակ փողոցում ոչ ստափ վիճակում՝ 0,292 մգ/լ պարունակությամբ ալկոհոլ օգտագործած վիճակում (հաշվի առնելով ստուգաչափման սարքի սխալանքը՝ +-10) վարել է <<Լադա>> մակնիշի 01 KK 045 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի կրտսեր պարեկ Գոռ Հրաչի Պետրոսյանի կողմից, որի կապակցությամբ կազմվել է վարչական իրավախախտման վերաբերյալ թիվ 8180258144 արձանագրությունը:
Բացի այդ՝ Մկրտիչ Սամվելի Աճեմյանը, չունենալով տրանսպորտային միջոցներ վարելու իրավաունք, 2023 թվականի հոկտեմբերի 21-ին՝ ժամը 02:55-ի սահմաններում, Երևան քաղաքի Լենինգրադյան փողոցում ոչ սթափ վիճակում՝ 0/618 մգ/լ պարունակությամբ ալկոհոլ օգտագործված վիճակում (հաշվի առնելով ստուգաչափման սարքի սխալանքը՝ +-10) վարել է <<Լադա>> մակնիշի, 01 KK 045 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի կրտսեր պարեկ Գնել Գևորգի Գրիգորյանի կողմից, որի կապակցությամբ կազմվել է վարչական իրավախախտման վերաբերյալ թիվ 8180260886 արձանագրությունը, որպիսի պայմաններում հիմնավոր կասկածից վեր ապացուցողական չափանիշով ապացուցված է՝
1) մեղադրյալ Մկրտիչ Սամվելի Աճեմյանին վերագրվող փաստական հանգամանքները (արարքները),
2) ՀՀ քրեական օրենսգրքի 344-րդ հոդվածի 2-րդ մասով (2 դրվագ) նախատեսված արարքների քրեական հակաիրավականությունը,
3) մեղադրյալ Մկրտիչ Սամվելի Աճեմյանի կողմից այդ արարքները կատարելը,
4) մեղադրյալ Մկրտիչ Սամվելի Աճեմյանի մեղավորությունը տվյալ արարքները կատարելու մեջ,
Հ Ե Տ Ե Վ Ա Պ Ե Ս
ապացուցված է Մկրտիչ Սամվելի Աճեմյանի մեղավորությունը ՀՀ քրեական օրենսգրքի 344-րդ հոդվածի 2-րդ մասով (2 դրվագ) նախատեսված հանցավոր արարքների կատարման մեջ:
Դատարանի իրավական վերլուծությունները.
ՀՀ վճռաբեկ դատարանը 2010 թվականի օգոստոսի 27-ի թիվ ՍԴ/0293/01/09 որոշմամբ դիրքորոշում է հայտնել, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձը բնութագրող տվյալները և, քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ է և բավարար է այդ անձին ուղղելու և նրա կողմից նոր հանցանքի կատարումը կանխելու համար: Պատժի տեսակի և չափի որոշման ժամանակ դատարանը պետք է հաշվի առնի կատարված հանցագործության՝ հանրության համար վտանգավորության աստիճանն ու բնույթը, հանցավորի անձը բնութագրող տվյալները, այդ թվում՝ նրա պատասխանատվությունը մեղմացնող և (կամ) ծանրացնող հանգամանքները:
Դատարանը, ուսումնասիրելով Մկրտիչ Սամվելի Աճեմյանի պատասխանատվությունը և պատիժը մեղմացնող ու ծանրացնող հանգամանքները, վերասոցիալականացման և իրավահպատակ վարքագծի ձևավորման համար նշանակություն ունեցող տվյալները, եկավ հետևյալ եզրահանգման.
Մկրտիչ Սամվելի Աճեմյանի անձը բնութագրող հանգամանք է նախկինում արատավորված՝ դատապարտված չլինելը:
Դատարանը Մկրտիչ Սամվելի Աճեմյանի քրեական պատասխանատվություն ու պատիժը մեղմացնող հանգամանք է դիտում մեղքն ընդունելը և կատարածի համար զղջալը, ինչպես նաև՝ խնամքին անչափահաս երեխայի (Սիլվի Մկրտիչի Աճեմյան, ծնված՝ 2024 թվականի մայիսի 4-ին, վկայական՝ ԲԱ851845) առկայությունը։
Վերոնշյալ պատասխանատվությունն ու պատիժը մեղմացնող հանգամանքները երկու հանցագործություններով էլ առկա են:
Միևնույն ժամանակ, պետք է նկատել, որ Մկրտիչ Սամվելի Աճեմյանի պատասխանատվությունն ու պատիժը ծանրացնող հանգամանքներ առկա չեն:
Կատարված արարքների համար մեղադրյալ Մկրտիչ Սամվելի Աճեմյանը ենթակա է քրեական պատասխանատվության և պատժի։
Դատարանը, հաշվի առնելով Մկրտիչ Սամվելի Աճեմյանի կատարած արարքների բնույթը և հանրային վտանգավորության աստիճանը, մասնավորապես՝ այն, որ վերջինի կատարած հանցանքները հանդիսանում են ոչ մեծ ծանրության հանցագործություն, այդ թվում՝ նրա գործողությունների վտանգավորության աստիճանը, անձը բնութագրող, պատասխանատվությունն ու պատիժը մեղմացնող հանգամանքի առկայությունը, ծանրացնող հանգամանքների բացակայությունը, ինչպես նաև այն, որ մեղադրյալի կատարած արարքների համար քրեական օրենսգրքի համապատասխան հոդվածի սանկցիայով նախատեսված է պատիժ նաև հանրային աշխատանքների ձևով, գտնում է՝ Մկրտիչ Սամվելի Աճեմյանի նկատմամբ ՀՀ քրեական օրենսգրքի 344-րդ հոդվածի 2-րդ մասով որպես պատիժ պետք է նշանակել հանրային աշխատանքներ՝ 80 (ութսուն) ժամ տևողությամբ, իսկ ՀՀ քրեական օրենսգրքի 344-րդ հոդվածի 2-րդ մասով որպես պատիժ պետք է նշանակել հանրային աշխատանքներ՝ 80 (ութսուն) ժամ տևողությամբ:
ՀՀ քրեական օրենսգրքի 74-րդ հոդվածի 1-ին մասի կիրառմամբ՝ նշանակված պատիժները լրիվ գումարելու միջոցով Մկրտիչ Սամվելի Աճեմյանի նկատմամբ վերջնական պատիժ պետք է նշանակել հանրային աշխատանքներ՝ 160 ժամ տևողությամբ:
Ընդ որում, պատժի տեսակն ընտրելիս Դատարանի կողմից կարևորվում է նաև դատական նիստի ընթացքում մեղադրյալ Մկրտիչ Աճեմյանի հայտարարությունը, ըստ որի՝ իր խնամքին են գտնվում ընտանիքը և ծնողներից մեկն ունի հենաշարժողական խնդիրներ, ուստի չի կարող վճարել տուգանքի համար, հետևաբար՝ համաձայն է, որ իր նկատմամբ նշանակվի հանրային աշխատանքներ պատժատեսակը: Միևնույն ժամանակ, վերջինը նշել է, որ ունի ողնաշարի հետ կապված խնդիրներ, որի վերաբերյալ թեև որևէ փաստաթուղթ Դատարանին չի ներկայացվել, սակայն պատժի ի կատար ածման փուլում առողջական խնդիրների վերաբերյալ համապատասխան փաստաթղթերը Պրոբացիայի ծառայություն ներկայացվելու դեպքում պետք է հաշվի առնվի նրա նկատմամբ նշանակվող հանրային աշխատանքների տեսակն ընտրելիս, որպեսզի իրականացվող աշխատանքը համապատեղելի լինի հնարավոր առողջական խնդիրների հետ և այդ մասով բացասական ազդեցության չունենա:
Դատարանը գտնում է, որ Մկրտիչ Սամվելի Աճեմյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 167-րդ հոդվածի 1-ին մաuի 1-ին, 2-րդ և 4-7-րդ կետերով նախատեսված վարութային ծախսերը մեղադրյալ Մկրտիչ Սամվելի Աճեմյանի ենթակա չեն հատուցման, քանի որ նմանատիպ վարութային ծախսեր առկա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 276-րդ, 342-րդ, 347-349-րդ, 353-րդ, 364-րդ հոդվածներով` Դատարանը

Վ Ճ Ռ Ե Ց

Մկրտիչ Սամվելի Աճեմյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով՝ 2 դրվագ:
ՀՀ քրեական օրենսգրքի 344-րդ հոդվածի 2-րդ մասով պատիժ նշանակել հանրային աշխատանքներ՝ 80 (ութսուն) ժամ տևողությամբ:
ՀՀ քրեական օրենսգրքի 344-րդ հոդվածի 2-րդ մասով պատիժ նշանակել հանրային աշխատանքներ՝ 80 (ութսուն) ժամ տևողությամբ:
ՀՀ քրեական օրենսգրքի 74-րդ հոդվածի 1-ին մասի կիրառմամբ՝ նշանակված պատիժները լրիվ գումարելու միջոցով Մկրտիչ Սամվելի Աճեմյանի նկատմամբ պատիժ նշանակել հանրային աշխատանքներ՝ 160 (հարյուր վաթսուն) ժամ տևողությամբ:
Մկրտիչ Սամվելի Աճեմյանի նկատմամբ կիրառված խափանման միջոց՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` այն ստանալու օրվանից մեկամսյա ժամկետում:


ԴԱՏԱՎՈՐ Ա.ՀՈՎՀԱՆՆԻՍՅԱՆ