ԵԴ1/2802/01/24




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«11» մարտի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ`
հանրային մեղադրող՝ Արա Դավթյանի,
պաշտպան՝ Տաթևիկ Հակոբյանի,
մեղադրյալ՝ Արմեն Հոխոյանի,

դռնբաց դատական նիստում, արագացված կարգով քննելով քրեական գործն ըստ մեղադրանքի`
Արմեն Դերենիկի Հոխոյանի`
ծնված՝ 19.01.1974թ., ազգությամբ հայ, ՀՀ քաղաքացի, ամուսնացած, միջնակարգ կրթությամբ, չի աշխատում, նախկինում դատապարտված, դատվածությունը չմարված, հաշվառված և բնակվում է՝ Կոտայքի մարզի Ջրառատ գյուղի 2-րդ փողոցի 19 տուն հասցեում ՀՀ քրեական օրենսգրքի 344-րդ հոդվածի 1-ին մասով,

ՊԱՐԶԵՑ

1. Քրեական գործի դատավարական նախապատմությունը.
2022 թվականի նոյեմբերի 08-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության հատկանիշներով նախաձեռնվել է թիվ 60853822 քրեական վարույթը:
2022 թվականի դեկտեմբերի 16-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 1-ին մասով նախաձեռնվել է թիվ 60896822 քրեական վարույթը:
2022 թվականի դեկտեմբերի 30-ին նախաքննության մարմնի որոշմամբ թիվ 60896822 քրեական վարույթը միացվել է թիվ 60853822 քրեական վարույթին և նախաքննությունը շարունակվել է թիվ 60853822 քրեական վարույթի հերթական համարի ներքո:
2024 թվականի սեպտեմբերի 30-ին ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության դատախազ Ա. Դավթյանի որոշմամբ՝ թիվ 60853822 քրեական վարույթով Արմեն Դերենիկի Հոխոյանի նկատմամբ ՀՀ քրեական օրենսգրքի 344-րդ հոդվածի 1-ին մասով հարուցվել է հանրային քրեական հետապնդում:
Նախաքննության մարմնի 2024 թվականի հոկտեմբերի 01-ի որոշմամբ Արմեն Դերենիկի Հոխոյանի նկատմամբ որպես խափանման միջոց է կիրառվել բացակայելու արգելքը։
2024 թվականի հոկտեմբերի 01-ին ՀՀ դատախազության Երևան քաղաքի Մալաթիա-Սեբաստիա վարչական շրջանի դատախազության դատախազ Ա. Դավթյանի որոշմամբ՝ թիվ 60853822 քրեական վարույթով Արմեն Դերենիկի Հոխոյանի նկատմամբ 18.04.2003թ. ընդունված ՀՀ քրեական օրենսգրքի 243.1 հոդվածի 1-ին մասով հանրային քրեական հետապնդում չի հարուցվել՝ 18.04.2003թ. ընդունված ՀՀ քրեական օրենսգրքի 75-րդ հոդվածի 1-ին մասի՝ վաղեմության ժամկետն անցնելու հետևանքով քրեական պատասխանատվությունից ազատվելու հիմքով։
2024 թվականի հոկտեմբերի 10-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի Արմեն Դերենիկի Հոխոյանի՝ ՀՀ քրեական օրենսգրքի 344-րդ հոդվածի 1-ին մասով, որին շնորհվել է ԵԴ1/2802/01/24 համարը:
Նույն օրը քրեական գործն էլեկտրոնային եղանակով մակագրվել և 2024 թվականի հոկտեմբերի 11-ին հանձնվել է դատավոր Տաթևիկ Մուրադյանին:
2024 թվականի հոկտեմբերի 14-ին Դատարանի կողմից որոշում է կայացվել թիվ ԵԴ1/2802/01/24 քրեական գործի վարույթն ստանձնելու և նախնական դատալսումներ նշանակելու մասին։

2. Մեղադրանքի փաստական նկարագրությունը.
Արմեն Դերենիկի Հոխոյանին մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով` այն հանցանքի կատարման համար, որ «նա, տրանսպորտային միջոցներ վարելու իրավունքից մեկ տարի ժամկետով՝ 2022 թվականի օգոստոսի 3-ից մինչև 2023 թվականի օգոստոսի 3-ը, զրկված լինելու և այդ մասին նախապես տեղյակ լինելու պայմաններում, 2022 թվականի հոկտեմբերի 11-ին՝ ժամը 12:10-ի սահմաններում, Երևան քաղաքի Մամիկոնյանց-Շիրվանզադե փողոցների խաչմերուկում, վարել է «Օփել» մակնիշի 36 FT 820 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի ավագ պարեկ Արամ Կարապետյանի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180159643 արձանագրությունը։»։

3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում պաշտպան Տաթևիկ Գևորգյանը և մեղադրյալ Արմեն Հոխոյանը հայտնեցին, որ ունեն արագացված վարույթ կիրառելու մասին միջնորդություն:
Մեղադրյալ Արմեն Հոխոյանը հայտնեց, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Հանրային մեղադրող Արա Դավթյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-րդ հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Արմեն Հոխոյանն ունի դատվածություն:
 Միասնական էլեկտրոնային տեղեկատվական համակարգում կատարված հարցման պատասխանը, համաձայն որի՝ հանցանքը կատարելուն նախորդող տասներկու ամիսների ընթացքում Արմեն Հոխոյանի եկամուտների վերաբերյալ տվյալներ առկա չեն։
 ՀՀ ԱՆ պրոբացիայի ծառայություն կատարված հարցման պատասխանը, համաձայն որի Արմեն Հոխոյանը թիվ ԿԴ/0498/01/24 դատավճռով նշանակված 900.000 ինը հարյուր ՀՀ դրամ տուգանքից 05.03.2025թ. դրությամբ վճարումներ չեն կատարվել, իսկ 80 ութսուն ժամ հանրային աշխատանքները փաստացի կատարվել է 07.03.2025թ.-ին և Արմեն Հոխոյանը հանվել է հաշվառումից։

4. Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
Արմեն Դերենիկի Հոխոյանն ունի նախկին դատվածություն, ներկայացված մեղադրանքում իրեն լիովին մեղավոր է ճանաչել և զղջացել կատարածի համար:
Մեղսագրվող հանցանքն ավարտվելու օրվան նախորդող 12 ամիսների ընթացքում Արմեն Հոխոյանի ստացած եկամուտների վերաբերյալ տեղեկատվություն առկա չէ:

5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Արմեն Դերենիկի Հոխոյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալ Արմեն Դերենիկի Հոխոյանի արարքի նկատմամբ պետք է կիրառվի ՀՀ քրեական օրենսգրքի 344-րդ հոդվածի 1-ին մասը:
Դատարանի կողմից հաստատված փաստական հանգամանքների հիման վրա Դատարանը գտնում է, որ Արմեն Դերենիկի Հոխոյանի անձը բնութագրող հանգամանք է նախկինում նույնասեռ արարքների կատարման համար դատապարտված լինելը:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Արմեն Դերենիկի Հոխոյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը)։
Դատարանը միաժամանակ արձանագրում է, որ Արմեն Դերենիկի Հոխոյանի պատասխանատվությունն ու պատիժը ծանրացնող հանգամանք պետք է դիտել ՀՀ քրեական օրենսգրքի 71-րդ հոդվածի 1-ին մասով նախատեսված՝ հանցանքը դատվածություն ունեցող անձի կողմից կատարելը:
Դատարանը գտնում է, որ կատարած հանցանքի համար մեղադրյալ Արմեն Դերենիկի Հոխոյանը ենթակա է պատժի։
Դատարանը, հաշվի առնելով Արմեն Դերենիկի Հոխոյանի կատարած հանցանքի հանգամանքները, նրա անձը բնութագրող տվյալները, պատասխանատվությունն ու պատիժը մեղմացնող և պատասխանատվությունն ու պատիժը ծանրացնող հանգամանքները, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 1-ին մասի սանկցիայով որպես հիմնական պատիժ է նախատեսված նաև հանրային աշխատանքների ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործության կատարման համար առավել խիստ պատիժ նշանակելու անհրաժեշտությունը բացակայում է, իսկ առավել մեղմ պատիժ նշանակելու անհրաժեշտությունը բացակայում է հաշվի առնելով այն, որ մեղադրյալը չունի եկամուտներ և չի առարկել իր նկատմամբ հանրային աշխատանքներ պատիժ նշանակվելու դեպքում այն կատարելու դեմ, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 1-ին մասով հիմնական պատիժ պետք է նշանակել հանրային աշխատանքներ՝ 80 ութսուն ժամ տևողությամբ:
Հիմք ընդունելով մեղադրյալի հայտարարությունը՝ թիվ ԿԴ/0498/01/24 դատավճռով իր նկատմամբ նշանակված 900.000 ինը հարյուր ՀՀ դրամ տուգանքը վճարելու անհնարինությամբ պայմանավորված իր գույքի բռնագանձման ընթացակարգ սկսված լինելու մասին՝ Դատարանը գտնում է, որ պատիժ նշանակելիս դատավճիռների համակցության ՀՀ քրեական օրենսգրքի 75-րդ հոդվածով սահմանված կարգը պետք է չկիրառել։
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-14-րդ կետերով նշված հարցերին անդրադառնալու անհրաժեշտությունը սույն քրեական վարույթով բացակայում է։
Դատարանը գտնում է, որ Արմեն Դերենիկի Հոխոյանի նկատմամբ ընտրված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Արմեն Դերենիկի Հոխոյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4 հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության 347-350-րդ, 464.1-464.5 հոդվածներով` Դատարանը


ՎՃՌԵՑ

Արմեն Դերենիկի Հոխոյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ, և նրա նկատմամբ պատիժ նշանակել հանրային աշխատանքներ՝ 80 (ութսուն) ժամ տևողությամբ։
Արմեն Դերենիկի Հոխոյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ` մինչև դատավճռի օրինական ուժի մեջ մտնելը, իսկ դրանից հետո վերացնել։
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ