Գործ ԵԴ1/2703/01/24


Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
24.12.2024 թվական ք.Երևան

ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ
ՔՐԵԱԿԱՆ ԴԱՏԱՐԱՆ

ԴԱՏԱՎՈՐ՝ Դ. ԲԱԼԱՅԱՆ
ՆԻՍՏԻ ՔԱՐՏՈՒՂԱՐ՝ Ա.ՄԱԼՈՅԱՆ
ՄԱՍՆԱԿՑՈՒԹՅԱՄԲ՝
ՀԱՆՐԱՅԻՆ ՄԵՂԱԴՐՈՂ՝ Ա.ԴԱՎԹՅԱՆ
ՄԵՂԱԴՐՅԱԼ՝ Ն.ԽԱՉԱՏՐՅԱՆ

Դռնբաց դատական նիստերում քննության առնելով վարույթն ըստ մեղադրանքի Նարեկ Սպարտակի Խաչատրյանը ՝ ծնված 27.01.1988 թվականին Երևան քաղաքում,
ազգությամբ հայ, ՀՀ քաղաքացի, ութամյա կրթությամբ, գտնվել է փաստական ամուսնական հարաբերությունների մեջ որոնք դադարել են, ըստ իր հայտնածի խնամքին է անչափահաս երեխա, չի աշխատում, չդատված, ֆիզիկապես առողջ, բնակվում է քաղաք Երևան, Արշակունյաց 2-րդ նրբանցք, 1-ին շենք, 5-րդ բնակարան հասցեում, որպես խափանման միջոց է ընտրված բացակայելու արգելքը, 03.12.2024 թվականին կայացվել է մեղադրական վերդիկտ ՀՀ քրեական օրենսգրքի 344-րդ հոդվածի 2-րդ մասով՝ երկու դրվագով

I.Գործի դատավարական նախապատմությունը.

2024 թվականի ապրիլի 17-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Հ.Կիրակոսյանը կազմել է արձանագրություններ ՀՀ քրեական օրենսգրքի 344-րդ հոդվածի 2-րդ մասի հատկանիշներով թիվ 60-1341-24 և թիվ 60-1345-24 քրեական վարույթները նախաձեռնելու վերաբերյալ /հատոր 1-ին գ.թ. 9-10, 23-24/:
2024 թվականի ապրիլի 18-ին որոշում է կայացվել թիվ 60134524 քրեական վարույթը թիվ 60134124 քրեական վարույթին միացնելու և նախաքննությունը 60134124 համարով շարունակելու մասին /հատոր 1-ին գ.թ. 14-15/:
2024 թվականի օգոստոսի 27-ին Երևան քաղաքի Մալաթիա-Սեբաստիա վարչական շրջանի դատախազության դատախազ Ա.Դավթյանը որոշում է կայացրել Նարեկ Խաչատրյանի նկատմամբ հանրային քրեական հետապնդում հարուցելու մասին. «/…/ այն հանցանքի կատարման համար, նա չունենալով տրանսպորտային միջոցներ վարելու իրավունք, 2023 թվականի հունիսի 30-ին՝ ժամը 21:50-ի սահմաններում, Երևան քաղաքի Ծովակալ Իսակովի պողոտայում ոչ սթափ վիճակում՝ 0,1746 մգ/լ պարունակությամբ ալկոհոլ օգտագործած (հաշվի առնելով ստուգաչափման սարքի սխալանքը՝ ±10), վարել է «Նիսսան» մակնիշի 36 XO 057 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի կրտսեր պարեկ Աշոտ Մինասյանի կողմից, և ինչի կապակցությամբ կազմվել է վարչական իրավախախտման վերաբերյալ թիվ8180149706 արձանագրությունը:
Այսինքն՝ Նարեկ Սպարտակի Խաչատրյանին մեղսագրվում է ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարում:
Բացի այդ՝ Նարեկ Սպարտակի Խաչատրյանը, չունենալով տրանսպորտային միջոցներ վարելու իրավունք, 2023 թվականի դեկտեմբերի 3-ին՝ ժամը 02:40-ի սահմաններում, Երևան քաղաքի Ծովակալ Իսակովի պողոտայում ոչ սթափ վիճակում՝ 0,432 մգ/լ պարունակությամբ ալկոհոլ օգտագործած (հաշվի առնելով ստուգաչափման սարքի սխալանքը՝ ±10), վարել է «Օփել» մակնիշի 96 DK 996 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի կրտսեր պարեկ Էդվարդ Մկրտչյանի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180267643 արձանագրությունը:
Այսինքն՝ Նարեկ Սպարտակի Խաչատրյանին մեղսագրվում է ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարում /հատոր 1-ին գ.թ. 41-42/:
Նույն օրը Նարեկ Խաչատրյանի նկատմամբ որպես խափանման միջոց է ընտրվել բացակայելու արգելքը /հատոր 1-ին գ.թ. 44-45/:
2024 թվականի սեպտեմբերի 10-ին Նարեկ Խաչատրյանին ներկայացվել է մեղադրանքը և պարզաբանվել մեղադրյալի իրավունքներն ու պարտականությունները /50-51, 52, 53/:
2024 թվականի սեպտեմբերի 30-ին կազմվել է մեղադրական եզրակացությունը /հատոր 1-ին գ.թ. 60-69/:
2024 թվականի հոկտեմբերի 07-ին դատախազ Ա.Դավթյանը որոշում է կայացրել մեղադրական եզրակացությունը հաստատելու մասին /հատոր 1-ին գ.թ. 72/:
2024 թվականի հոկտեմբերի 08-ին քրեական գործը մուտք է եղել դատարան, էլեկտրոնային եղանակով մակագրվել և հաջորդ օրը հանձնվել է դատավոր Դ.Բալայանին /հատոր 1-ին գ.թ. 71, 73-74/:
2024 թվականի հոկտեմբերի 11-ին որոշում է կայացվել քրեական գործը վարույթ ստանձնելու և նախնական դատալսումներ նշանակելու մասին /հատոր 1-ին գ.թ. 75/:
2024 թվականի դեկտեմբերի 03-ին մեղադրյալ Նարեկ Խաչատրյանի նկատմամբ ՀՀ քրեական օրենսգրքի 344-րդ հոդվածի 2-րդ մասով՝ երկու դրվագով, կայացվել է մեղադրական վերդիկտ /հատոր 1-ին գ.թ. 82/:

II. Հիմնական դատալսումների ընթացքում հետազոտված թույլատրելի ապացույցները.
1. Վարչական իրավախախտման վերաբերյալ թիվ 8180149706 արձանագրության պատճենի համաձայն՝ Նարեկ Խաչատրյանը 2023 թվականի հունիսի 30-ին Երևան քաղաքի Մալաթիա-Սեբաստիա վարչական շրջանի Իսկովի պողոտայուն ոչ սթափ վիճակում վարել է տրանսպորտային միջոց /հատոր 1-ին գ.թ. 3/:
2. Սթափության վիճակի ստուգման կտրոնի պատճենի համաձայն՝ Նարեկ Խաչատրյանի սթափության վիճակի ստուգումը կատարվել է թիվ 91100941 «Alcovisor-Jupiter X/RP» տեսակի ստուգաչափման սարքով, ստուգումը կատարվել է 30.06.2023 թվականին՝ ժամը 21:50:32-ին, ալկոհոլի պարունակությունը կազմել է 0.194 մգ/լ /հատոր 1-ին գ.թ. 4/:
3. ՀՀ Էկոնոմիկայի նախարարության «Ստանդարտաֆիկացման և չափագիտության ազգային մարմին» ՓԲԸ-ն կողմից տրված թիվ N1083663 ստուգաչափման վկայականի պատճենի համաձայն՝ «Ալկոտեստեր» անվանման, «Jupiter X/RP» տեսակի ստուգաչափման՝ թիվ 91100941 սարքը, ստուգաչափում է անցել 15.11.2022 թվականին և ուժի մեջ է մինչև 15.11.2023 թվականը, դրա չափման տիրույթը 0,000-0.200 մգ/լ է, իսկ ճշտության դասը /սխալանքը/+- 5 - +- 10% է /հատոր 1-ին գ.թ. 5-6/:
4. Ճանապարհային ոստիկանության էլեկտրոնային ռեգիստրի տվյալների համաձայն՝ Նարեկ Սպարտակի Խաչատրյանը չի ունեցել տրանսպորտային միջոցներ վարելու իրավունք /հատոր 1-ին գ.թ. 7/։
5. Վարչական իրավախախտման վերաբերյալ թիվ 8180267643 արձանագրության պատճենի համաձայն՝ Նարեկ Խաչատրյանը՝ չունենալով տրանսպորտային միջոցներ վարելու իրավունք, 2023 թվականի դեկտեմբերի 03-ին՝ ժամը 02:51-ին, Երևան քաղաքի Իսակովի պողոտայում ոչ սթափ վիճակում վարել է տրանսպորտային միջոց /հատոր 1-ին գ.թ. 18/:
6. Սթափության վիճակի ստուգման կտրոնի պատճենի համաձայն՝ Նարեկ Խաչատրյանի սթափության վիճակի ստուգումը կատարվել է թիվ 91101151 «Alcovisor-Jupiter X/RP» տեսակի ստուգաչափման սարքով, ստուգումը կատարվել է 03.12.2023 թվականին՝ ժամը 02:49:12-ին, ալկոհոլի պարունակությունը կազմել է 0.480 մգ/լ /հատոր 1-ին գ.թ. 19/:
7. ՀՀ Էկոնոմիկայի նախարարության «Ստանդարտաֆիկացման և չափագիտության ազգային մարմին» ՓԲԸ-ն կողմից տրված թիվ N110947 ստուգաչափման վկայականի պատճենի համաձայն՝ «Ալկոտեստեր» անվանման, «Jupiter X/RP» տեսակի ստուգաչափման՝ թիվ 91101151 սարքը, ստուգաչափում է անցել 15.11.2023 թվականին և ուժի մեջ է մինչև 15.11.2024 թվականը, դրա չափման տիրույթը 0,000-2.000 մգ/լ է, իսկ ճշտության դասը /սխալանքը/ +- 10% է /հատոր 1-ին գ.թ. 20/:
8. 18.06.2024 թվականին զննություն կատարելու մասին կազմված արձանագրության համաձայն՝ քննիչը զննության է ենթարկել սույն դատական ակտի 1-7-րդ կետերում թվարկված փաստաթղթերը, որոնք ճանաչվել են որպես արտավարութային ապացույց /հատոր 1-ին գ.թ. 30-32, 33-34/:
Մեղադրյալ Նարեկ Խաչատրյանը հայտնեց, որ ներկայացված մեղադրանքում իրեն մեղավոր է ճանաչում, սակայն չցանկացավ ցուցմունք տալ /դատական նիստի արձանագրություն/:

III.Դատարանի պատճառաբանությունը և եզրահանգումները.

Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, դատարանը հանգում է այն հետևության, որ մեղադրյալ Նարեկ Խաչատրյանը մեղավորությամբ կատարել է իրեն մեղսագրված արարքները և նրա կողմից կատարած յուրաքանչյուր արարքի նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը՝ հաստատված համարելով հանցագործությունների և դրանց կատարման մեջ Նարեկ Խաչատրյանի մեղքի ապացուցված լինելը, գտնում է, որ նա ենթակա է պատժի կատարածի համար:
Դատարանը դատապարտված մեղադրյալի նկատմամբ պատիժ նշանակելիս հաշվի է առնում ինչպես նրա կատարած հանցագործության բնույթը, եղանակն ու նպատակը, դիտավորության աստիճանը, հանցավորի վերասոցիալականացման և իրավահպատակ վարքագծի ձևավորման գործընթացի վրա ազդեցությունը, այնպես էլ նրա անձը բնութագրող տվյալները, այն որ երիտասարդ է, դատված չի եղել /հատոր 1-ին գ.թ. 48, 138-139/:
Դատարանն արձանագրում է, որ դատապարտված մեղադրյալի պատասխանատվությունը կամ պատիժն ինչպես մեղմացնող, այնպես էլ ծանրացնող հանգամանքներ առկա չեն:
Դատարանը՝ հաշվի առնելով Նարեկ Խաչատրյանի անձը բնութագրող տվյալները, նրա պատասխանատվությունն ու պատիժը մեղմացնող հանգամանքների առկայությունը և ծանրացնող հանգամանքի բացակայությունն ու ղեկավարվելով ՀՀ քրեական օրենսգրքի 7-րդ հոդվածի 1-ին, 55-րդ և 69-րդ հոդվածներով գտնում է, որ նրա նկատմամբ յուրաքանչյուր արարքով որպես պատիժ պետք է նշանակել ՀՀ քրեական օրենսգրքի 344-րդ հոդվածի 2-րդ մասի սանկցիայով նախատեսված ամենամեղմ պատժատեսակը՝ տուգանքը, քանի որ սույն գործով տուգանք նշանակելու պարագայում կարելի է հասնել պատժի նպատակների իրագործմանը: Դատարանը՝ հաշվի առնելով այն հանգամանքները, որ մեղադրյալը չունի աշխատանք և ՀՀ պետական եկամուտների կոմիտեում առկա տեղեկատվության համաձայն Նարեկ Խաչատրյանի աշխատավարձի և դրան հավասարեցված այլ վճարումների վերաբերյալ տեղեկատվության համաձայն վերջինիս ամսական եկամտի՝ հանցանքն ավարտվելու օրվան նախորդող 12 ամիսների ընթացքում ստացած միջին ամսական եկամտի 35 տոկոսը, հաշվարկի արդյունքով պակաս է ստացվում նվազագույն աշխատավարձի չափից, արձանագրում է, որ տուգանքի չափի հաշվարկը պետք է իրականացվի ՀՀ քրեական օրենսգրքի 59-րդ հոդվածի 5-րդ մասով սահմանված կարգով՝ «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափով /հատոր 1-ին գ.թ. 89-91, 92-95/:
Հիմք ընդունելով, որ «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն ՀՀ-ում ամսական նվազագույն աշխատավարձը սահմանված է 75.000 ՀՀ դրամը՝ դատարանը գտնում է, որ մեղադրյալի նկատմամբ առաջին արարքով պետք է պատիժ սահմանել նվազագույն աշխատավարձի հնգապատիկի 375.000 ՀՀ դրամի չափով, իսկ երկրորդ արրքով՝ վեցապատիկի՝ 450.000 ՀՀ դրամի չափով:
Միևնույն ժամանակ ղեկավարվելով ՀՀ քրեական օրենսգրքի 74-րդ հոդվածի 1-ին մասի կանոնով և հիմք ընդունելով ՀՀ քրեական օրենսգրքի 59-րդ հոդվածի 3-րդ մասով սահմանված տուգանք պատժատեսակի նվազագույն չափը, դատարանը գտնում է, որ հանցագործությունների համակցությամբ պատիժները լրիվ գումարելու միջոցով վերջնական պատիժ պետք է նշանակել տուգանք 825.000 ՀՀ դրամի չափով:
Սրա հետ մեկտեղ, դատարանը՝ հաշվի առնելով, մեղադրյալի գույքային դրությունը, և կանոնավոր վաստակ չունենալու հանգամանքը, գտնում է, որ վերջինս ի վիճակի չէ անհապաղ և ամբողջությամբ վճարել տուգանքը: ՀՀ քրեական օրենսգրքի 59-րդ հոդվածի 8-րդ մասի համաձայն՝ եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Դատարանը գտնում է, որ կոնկրետ դեպքում մեղադրյալի նկատմամբ նշանակված տուգանքը վճարելու համար պետք է սահմանել 12 ամիս ժամկետ՝ յուրաքանչյուր ամիս 68.750 ՀՀ դրամ վճարելու պայմանով:
Քննության առնելով դատապարտված մեղադրյալի նկատմամբ ընտրված խափանման միջոցի հարցը՝ դատարանը գտնում է, որ այն պետք է վերացնել դատավճռի օրինական ուժի մեջ մտնելուց հետո:
Դատարանը արձանագրում է նաև, որ դատապարտված մեղադրյալից բռնագանձման ենթակա չեն ՀՀ քրեական դատավարության օրենսգրքի 167-րդ հոդվածի 1-ին մասի 1-7-րդ կետերով նախատեսված վարութային ծախսերը՝ նկատի ունենալով այն հանգամանքը, որ նույն հոդվածի 2-րդ մասի համաձայն՝ հանրային մեղադրանքով վարութային ծախսերը վճարվում են պետական միջոցների հաշվին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 347-349-րդ հոդվածներով, դատարանը

Վ Ճ Ռ Ե Ց

Նարեկ Սպարտակի Խաչատրյանին մեղավոր ճանաչել երկու արարքում, որոնցից յուրաքանչյուրը նախատեսված է ՀՀ քրեական օրենսգրքի 344-րդ հոդվածի 2-րդ մասով և պատիժ նշանակել տուգանք՝
1-ին արարքով՝ /2023 թվականի հունիսի 30-ի կատարած հանցանք/ նվազագույն աշխատավարձի հնգապատիկի՝ 375.000 ՀՀ դրամի չափով,
2-րդ արարքով՝ /2023 թվականի դեկտեմբերի 03-ին կատարած հանցանք/ տուգանք՝ նվազագույն աշխատավարձի վեցապատիկի՝ 450.000 ՀՀ դրամի չափով:
ՀՀ քրեական օրենսգրքի 74-րդ հոդվածի 1-ին մասի կանոնով՝ նշանակված պատիժները լրիվ գումարելու միջոցով, վերջնական պատիժ նշանակել տուգանք 825.000 ՀՀ դրամի չափով:
Տուգանքը վճարելու համար սահմանել 12 ամիս ժամկետ՝ յուրաքանչյուր ամսում 68.750 ՀՀ դրամ վճարելու պայմանով:
Նարեկ Խաչատրյանի նկատմամբ ընտրված խափանման միջոցը՝ բացակայելու արգելքը, պահպանել մինչ դատավճռի օրինական ուժի մեջ մտնելը:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան ստանալու օրվանից հետո՝ մեկամսյա ժամկետում:



ԴԱՏԱՎՈՐ Դ.ԲԱԼԱՅԱՆ