Գործ թիվ ԵԷԴ/0198/01/11
2012թ.

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղար Շուշանիկ Միքայելյան
Մասնակցությամբ`
Մեղադրող Արիստակես Բարսեղյան
Ամբաստանյալ Սոնա Ասլանյան
Ամբաստանյալի պաշտպան Արթուր Ղարիբյան
Տուժող Արմինե Գևորգյան


2012թ-ի մայիսի 15-ին դատարանում.
Դռնբաց դատական նիստում քննության առավ քրեական գործն ըստ մեղադրանքի՝
Սոնա Կարապետի Ասլանյանի - ծնված 17.01.1972թ. Երևան քաղաքում, ազգությունը հայ, Հայաստանի Հանրապետության քաղաքացի, ամուսնալուծված, խնամքին մինչև 14 տարեկան մեկ երեխա` ծնված 09.05.2001թ., կրթությունը բարձրագույն, չի աշխատում, նախկինում չդատված, բնակվում է Երևանի Արցախի փողոցի 22 շենքի 15 բնակարանում, մեղադրվում է ՀՀ քրեական օրենսգրքի 117-րդ հոդվածով, խափանման միջոցը` ստորագրություն չհեռանալու մասին,
առաջադրված մեղադրանքում իրեն մեղավոր չի ճանաչել։

1. Գործի դատավարական նախապատմությունը.
Ամբաստանյալ Սոնա Ասլանյանը և տուժող Արմինե Գևորգյանը բնակվում են Արցախի փողոցի թիվ 22 շենքի միևնույն մուտքում, ընդ որում` տուժողի թիվ 18 բնակարանը գտնվում է 3-րդ հարկում` 2-րդ հարկում բնակվող ամբաստանյալի թիվ 15 բնակարանի անմիջապես վերևում։
Տուժողը և ամբաստանյալը չեն աշխատել, վարել են մեկուսացված կենցաղ, հարևանների հետ չեն շփվել։
Ամբաստանյալ Սոնա Ասլանյանի և տուժող Արմինե Գևորգյանի փոխհարաբերությունները 2005 թվականից սկսած կրել են անհաշտ, կոնֆլիկտային բնույթ` պայմանավորված լինելով այն հանգամանքով, որ սանհանգույցի կոյուղատար խողովակի հաճախակի խցանումների արդյունքում տուժողի բնակարանից ջուր է լցվել ամբաստանյալի բնակարան, պատճառված վնասի փոխհատուցման հարցով դատական ատյաններում համապատասխան քաղաքացիական գործ է քննվել։
Նշված պատճառով 15.02.2006թ. ժամը 07-ի սահմաններում կողմերի միջև ծագել է հերթական վիճաբանությունը, որի ընթացքում Արմինե Գևորգյանի բնակարանում ամբաստանյալի մայրը` Անահիտ Վարդանյանը, հեռախոսի լսափողով հարվածել է Արմինե Գևորգյանի գլխին, վերջինս իր հերթին նույն լսափողով հարվածել է Անահիտ Վարդանյանի դեմքին և քաշել-պատռել է նրա կաշվե բաճկոնը։ Արմինե Գևորգյանի բնակարան է եկել Սոնա Ասլանյանը և չպարզված սուր կտրող գործիքով հարվածել է Արմինե Գևորգյանի պարանոցին, որից հետո վիճաբանությանը միջամտած` նույն շենքի 1-ին հարկի տնտեսական խանութի տնօրեն Հրաչյա Հակոբյանը Սոնա Ասլանյանին դուրս է հանել Արմինե Գևորգյանի բնակարանից։ Արմինե Գևորգյանը շտապ օգնության մեքենայով տեղափոխվել է «Էրեբունի» բժշկական կենտրոն։ Դատաբժշկական փորձագետի եզրակացության համաձայն` Արմինե Գևորգյանի ստացած մարմնական վնասվածքը` պարանոցի շրջանի կտրած վերքի ձևով, հասցվել է սուր կտրող գործիքի ներգործությամբ և դասվել է առողջության կարճատև քայքայումով թեթև վնասվածքների շարքին։
Արմինե Գևորգյանը հայտնել է փորձագետին այն մասին, որ Սոնա Ասլանյանն իրեն հարվածել է կացնի սուր մասով։
15.03.2006թ. որոշմամբ ոստիկանության Էրեբունու բաժնի կողմից նյութերով քրեական գործի հարուցումը մերժվել է՝ տուժած անձի բողոքի բացակայության հիմքով։
2010թ. հուլիս ամսին Արմինե Գևորգյանի դիմումի կապակցությամբ ոստիկանության Էրեբունու բաժնի կողմից գրավոր պարտավորագրեր են վերցվել Արմինե Գևորգյանից և Սոնա Ասլանյանից` միմյանց չանհանգստացնելու մասին։ Իր հերթին Սոնա Ասլանյանը պատճառաբանել է, որ Արմինե Գևորգյանն իր պատշգամբից վաղ առավոտյան մշտապես դիտավորյալ ջուր է լցնում իր լուսամուտի վրա, որի ձայնից խանգարվում է իր և անչափահաս որդու հանգիստը։
Դրանից հետո փոխադարձ հակակրանքը շարունակվել է։ 2011թ. հունիս ամսվա սկզբին տուժող Արմինե Գևորգյանը գրել և իրենց շենքի մուտքում` էլեկտրավահանակի վրա և այլ վայրերում թռուցիկների տեսքով թղթերի վրա գրված երկտողեր է փակցրել ի տես բոլորի հետևյալ բովանդակությամբ. «շենքում հոգեկան հիվանդ կա բն.15», դրանով իսկ մատնացույց անելով ամբաստանյալ Սոնա Ասլանյանին որպես հոգեկան հիվանդի։ Նշված վարկաբեկիչ բովանդակության թղթի կտորները գրավել են հարևանների ուշադրությունը, վկա, 1939թ. ծնված հարևանուհի Դոնյա Գևորգյանը պատռել և մի կողմ է գցել իր հայտնաբերած գրություններից մեկը։
18.06.2011թ. ժամը 13.30-ի սահմաններում տուժող Արմինե Գևորգյանը մուտքի աստիճաններից իջնելիս, երբ անցել է ամբաստանյալի բնակարանի հարթակից և իջել է 3-4 աստիճան, հանկարծ հետնամասից գլխի ծոծրակային շրջանում հարված է զգացել, շրջվել և տեսել է ամբաստանյալ Սոնա Ասլանյանին, որն իր աջ ձեռքին ինչ-որ գործիք է ունեցել։ Այնուհետև Սոնա Ասլանյանը շտապ մտել է իր բնակարան և իր հետևից փակել է բնակարանի դուռը։
Տուժող Արմինե Գևորգյանի գլխից առատ արյունահոսություն է սկսվել, նա թակել է նույն հարթակի թիվ 13 բնակարանի դուռը և մուտք գործելով բնակարան, հարևանուհի Դոնյա Գևորգյանից ու նրա հարս Սեդա Գալստյանից օգնություն է խնդրել, նրանց հայտնելով, որ Սոնա Ասլանյանն է կացնով հարվածել իր գլխին, այնուհետև զանգահարել է ոստիկանության Էրեբունու բաժին և շտապ օգնություն։ Նշված ծառայությունները եկել են դեպքի վայր, Արմինե Գևորգյանը շտապ օգնության մեքենայով տեղափոխվել է «Էրեբունի» բժշկական կենտրոն, որտեղ նրան անհետաձգելի բուժօգնություն է ցուցաբերվել։ Արմինե Գևորգյանը դեպքի առթիվ 18.06.2011թ. հայտարարություն է տվել ՀՀ ոստիկանության Էրեբունու բաժին։
Դատաբժշկական փորձագետի 01.07.2011թ. թիվ 1800 եզրակացության համաձայն Արմինե Գևորգյանի մարմնական վնասվածքը` աջ ծոծրակային շրջանի սալջարդ վերքի, ներկայիս` սպիի ձևով, հասցվել է բութ, կոշտ առարկայով, հնարավոր է` փորձաքննություն նշանակելու որոշման մեջ նշված ժամկետում և հանգամանքներում, Արմինե Գևորգյանին պատճառվել է առողջությանը թեթև վնաս` առողջության կարճատև քայքայումով։
22.07.2011թ. որոշում է կայացվել նյութերն ըստ քննչական ենթակայության ուղարկելու մասին։
ՀՀ ոստիկանության ՔԳՎ Էրեբունու քննչական բաժնի քննիչի 05.09.2011թ. որոշմամբ փաստի առթիվ ՀՀ քրեական օրենսգրքի 117-րդ հոդվածի հատկանիշներով հարուցվել է թիվ 12132411 քրեական գործը և նախաքննություն է կատարվել։
21.12.2011թ. որոշում է կայացվել Սոնա Կարապետի Ասլանյանին որպես մեղադրյալ ներգրավելու մասին, նրան մեղադրանք առաջադրելով ՀՀ քրեական օրենսգրքի 117-րդ հոդվածով։ Որպես խափանման միջոց կիրառվել է ստորագրություն չհեռանալու մասին։
Մեղադրական եզրակացությունը հաստատվել է 27.12.2011թ.։
Քրեական գործը 30.12.2011թ. մուտքագրվել է Երևանի Էրեբունի և Նուբարաշեն վարչական շրջանների ընդհանուր իրավասության դատարան։

2. Դատաքննությամբ հետազոտված ապացույցները։
Դատաքննությամբ հետազոտվել են այն բոլոր ապացույցները, որոնք նախաքննական մարմնի կողմից դրվել են առաջադրված մեղադրանքի հիմքում։ Դատաքննության ընթացքում գործով հարցաքննվել են այլ վկաներ, նշանակվել է լրացուցիչ դատաբժշկական փորձաքննություն։
Ամբաստանյալ Սոնա Ասլանյանը ՀՀ քրեական օրենսգրքի 117-րդ հոդվածով առաջադրված մեղադրանքում իրեն մեղավոր չի ճանաչել և ցուցմունք է տվել այն մասին, որ թեև իր և տուժող Արմինե Գևորգյանի հարաբերությունները լարված են եղել, ինքը թեև դեպքի պահին` 18.06.2011թ. ժամը 13.30-ին գտնվել է իր բնակարանում, սակայն ինքը տանից դուրս չի եկել և որևէ գործիքով, այդ թվում` կացնի բութ հատվածով տուժող Արմինե Գևորգյանի գլխին չի հարվածել և նրան մարմնական վնասվածք չի պատճառել։ Արմինե Գևորգյանը հիպերտոնիկ է, ունի արյան բարձր ճնշում, բուժվել է թիվ 2 պոլիկլինիկայում, հնարավոր է` ընկել է աստիճանների վրա, վնասվածք է ստացել, որը վերագրում է իրեն։
Ամբաստանյալը ցուցմունքում հայտնել է նաև, որ դեպքի վայր եկած ոստիկանները եկել են իր տուն, իր համաձայնությամբ ստուգել են բնակարանը, այդ թվում` խորդանոցը /չուլան/, սակայն կացին կամ արյան հետքերով որևէ գործիք չեն հայտնաբերել։ Տուժողի և իր հարաբերությունները լարված են, տուժողն իրեն զրպարտում է։

հատոր 1 Գ. Թ. 54-56, 60-62, 140
դատաքննության արձանագրություն

Դատարանը գտնում է, որ ամբաստանյալի պատճառաբանություններն անհիմն են, պատասխանատվությունից և պատժից խուսափելու նպատակ են հետապնդում և հերքվում են դատաքննությամբ հետազտված հետևյալ ապացույցներով.
Տուժող Արմինե Գևորգյանը ցուցմունք է տվել այն մասին, որ 2005 թվականից սկսած իր և ամբաստանյալ Սոնա Ասլանյանի փոխհարաբերությունները կրել են անհաշտ բնույթ։ Յուրաքանչյուր անգամ իրեն տեսնելիս փողոցում կամ շենքում Սոնա Ասլանյանն առիթը բաց չի թողել իրեն վիրավորելու, անպատվելու կամ նվաստացնելու համար։ Այդ պատճառով ինքը երկտողեր է գրել և փակցրել շենքի մուտքում այն մասին, որ թիվ 15 բնակարանում հոգեկան հիվանդ է ապրում։ 2011թ. հունիսի 18-ին ժամը 13.30-ի սահմաններում իր բնակարանից` 3-րդ հարկից աստիճաններով իջել է ներքև` խանութ գնալու նպատակով։ 2-րդ հարկի հարթակից իջնելու պահին զգացել է, որ բացվել է Սոնա Ասլանյանի բնակարանի մուտքի դուռը, և այն պահին, երբ քայլել է հարթակից ներքև 3-րդ կամ 4-րդ աստիճանների վրա, հետևից ծոծրակային շրջանում գլխին հարվածներ է զգացել։ Շուռ է եկել և տեսել Սոնա Ասլանյանին` կացնին նմանվող երկար կոթով ինչ-որ իր ձեռքին, Սոնա Ասլանյանն արագ մտել է իր բնակարան և դուռը փակել է ներսից։ Իր գլխից առատ արյունահոսություն է սկսվել, արյունը լցվել է հագուստների վրա։ Ինքը թակել է հարևանուհի Դոնյա Գևորգյանի բնակարանի դուռը, որը 2-րդ հարթակի վրա Սոնա Ասլանյանի դիմաց ապրող 13 համարի բնակարանի հարևանուհին է։ Դոնյա Գևորգյանից ու նրա հարս Սեդա Գալստյանից օգնություն է խնդրել, նրան պատմելով, որ մարմնական վնասվածքն իրեն պատճառել է Սոնա Ասլանյանը։ Նրանք բնակարանի միջանցքում իրեն աթոռ են տվել նստելու, դեղ են տվել խմելու, օգնություն են ցույց տվել իրեն, ինքը զանգահարել է ոստիկանության Էրեբունու բաժին և հայտնել է դեպքի մասին, շտապ օգնություն են կանչել, եկել են ոստիկաններն ու շտապ օգնության աշխատակիցները, ինքը նրանց պատմել է, որ իր գլխին կացնով հարվածել է Սոնա Ասլանյանը։ Իրեն տեղափոխվել են «Էրեբունի» բժշկական կենտրոն, որտեղ իր վերքը մշակել են, կարել են այն, որոշ ժամանակ անց ինքը եկել է տուն։ Տուժող Արմինե Գևորգյանն իր ցուցմունքը պնդել է ամբաստանյալ Սոնա Ասլանյանին առերես, որպես տուժող հայտնել է, որ չի հաշտվել ամբաստանյալի հետ և խնդրել է նրան պատասխանատվության կանչել իր կատարած հանցանքի համար։

հատոր 1 Գ. Թ. 52, 58-89, 60-62, 91-93
դատաքննության արձանագրություն

Գործով որպես վկա հարցաքննված Ռոմիկ Մկրտչյանը ցուցմունք է տվել այն մասին, որ ինքն Արմինե Գևորգյանի ընկերն է։ 2011թ. հունիսի 18-ին ժամը 20.00-ի սահմաններում գնացել է Արմինե Գևորգյանի տուն, Արմինեին տեսել է մահճակալին պառկած և գլուխը վիրակապված վիճակում։ Արմինե Գևորգյանը պատմել է իրեն, որ նույն օրը ժամը 13.30-ի սահմաններում ցանկացել է գնալ մթերային խանութ` գնումներ կատարելու։ 2-րդ հարկի աստիճաններից իջնելու ժամանակ Սոնա Ասլանյանը դուրս է եկել իր բնակարանից և ձեռքին ունեցած ինչ-որ իրով, հավանաբար՝ կացնով, հետևից հարվածել է իր գլխին և շտապ մտել է իր բնակարան, գլխից արյունահոսություն է սկսվել, դիմել է հարևանների օգնությանը։ Հրավիրել են շտապ օգնություն, իրեն տեղափոխել են հիվանդանոց, գլխի վերքը կարել են։
Վկան ցուցմունք է տվել նաև այն մասին, որ ինքն իմացել է, որ տուժող Արմինե Գևորգյանի և ամբաստանյալ Սոնա Ասլանյանի փոխհարաբերությունները լարված բնույթ են կրում։ Նախկինում Սոնա Ասլանյանը կացնով ջարդել էր Արմինե Գևորգյանի բնակարանի դռան փայտե երեսապատման մասը, ինքն այն փոխել և վերանորոգել է, սակայն նոր դռան փայտե հատվածում նորից կացնով հարվածներ հասցնելու հետքեր են առկա, համոզված է, որ այն նորից ամբաստանյալն է վնասել։

հատոր 1 Գ. Թ. 75-77
դատաքննության արձանագրություն

Վկաներ, Երևանի Արցախի փողոցի 22 շենքի 13-րդ բնակարանի բնակիչներ Դոնյա Գևորգյանը և նրա հարս Սեդա Գալստյանը ցուցմունք են տվել այն մասին, որ տարիներ շարունակ ականատես են եղել հարևանուհիներ Սոնա Ասլանյանի և Արմինե Գևորգյանի անհաշտ հարաբերություններին, որի պատճառը Արմինե Գևորգյանի բնակարանի կոյուղատար խողովակից Սոնա Ասլանյանի բնակարան ջուր լցվելն է եղել, որի վերաբերյալ վեճը քննվել է դատարանում։
2011թ.հունիսի 18-ին ժամը 13.30-ի սահմաններում իրենք գտնվել են տանը, երբ իրենց բնակարան է եկել Արմինե Գևորգյանը։ Նրա գլխի ծոծրակային շրջանն առատ արյունահոսել է, հագուստներն արյունոտվել են։ Արմինեն հուզված պատմել է, որ աստիճաններից իջնելիս Սոնա Ասլանյանը կացնին նմանվող իրով հարվածել է իր գլխին և մարմնական վնասվածք է պատճառել։ Իրենք միջանցքում աթոռ են տվել տուժողին նստելու,նրան օգնություն են ցույց տվել, Արմինե Գևորգյանը զանգահարել է ոստիկանություն, շտապ օգնություն են կանչել, Արմինեին տեղափոխել են հիվանդանոց։

հատոր 1 Գ/Թ 47-48, 103-104
դատաքննության արձանագրություն

Վկաներ, ամուսիններ Երևանի Արցախի փողոցի 22 շենքի 22 բնակարանի բնակիչներ Սարգիս Հովսեփյանը և Գայանե Առաքելյանը ցուցմունք են տվել այն մասին, որ 18.06.2011թ. ժամը 13.30-ի սահմաններում աստիճաններով իջնելիս 2-րդ հարկի հարթակում տեսել են, որ Սեդա Գալստյանի թիվ 13 բնակարանի դուռը բաց է, ներսից ձայներ են լսվում, զգացվել է օգտագործած դեղորայքի հոտ։ Շենքի մուտքի մոտ տեսել են շտապ օգնության մեքենան, մի քանի րոպե անց տեսել են Արմինե Գևորգյանին` գլուխը վիրակապած, նա նստել է շտապ օգնության մեքենան։ Հարևանուհի Սեդա Գալստյանից լսել են, որ Արմինե Գևորգյանին մարմնական վնասվածք է պատճառել հարևանուհի Սոնա Ասլանյանը։ Իրենք որպես հարևանուհի իմացել են տուժողի և ամբաստանյալի միջև տարիներ շարունակ տևող անբարյացակամ փոխհարաբերությունների մասին։

հատոր 1 Գ/Թ 96-97
դատաքննության արձանագրություն

Գործով վկաներ հարցաքննված շտապ օգնության թիվ 43 բրիգադի բժշկուհի Անահիտ Սարգսյանի և բուժքույր Մանուշակ Եղիկյանի ցուցմունքներով այն մասին, որ 18.06.2011թ. ժամը 14.00-ի սահմաններում կանչով ժամանել են Երևանի Արցախի փողոցի 22 շենքի 13-րդ բնակարան, որտեղ առաջին բուժօգնությունն են ցույց տվել Արմինե Գևորգյանին ու նրան տեղափոխել են «Էրեբունի» բժշկական կենտրոն։ Տուժողի մոտ գլխի ծոծրակային շրջանում առկա է եղել առատ արյունահոսող կտրած վերք։ Արմինե Գևորգյանը հայտարարել է, որ հարևանուհին կացնով հարվածել է իր գլխին, ինչի հետևանքով ստացել է նշված մարմնական վնասվածքը։

հատոր 1 Գ/Թ 115-116, 117
դատաքննության արձանագրություն

Դատաբժշկական փորձաքննության սկզբնական 01.07.2011թ. թիվ 1800 և դատարանի որոշմամբ իրականացված լրացուցիչ դատաբժշկական փորձաքնության 23.04.2012թ. թիվ 454/հ եզրակացությունների համաձայն.
«Արմինե Գևորգյանի մարմնական վնասվածքը` աջ ծոծրակային շրջանի` սալջարդ վերքի, ներկայիս սպիի ձևով, հասցվել է` բութ, կոշտ առարկայով, հնարավոր է` նշված ժամկետում և հանգամանքներում, այդ թվում նաև` կացնի բութ հատվածի եզրային մասի մեկ հարվածի արդյունքում, հնարավոր չէ առաջանար վայր ընկնելու հետևանքով` ելնելով վնասվածքի տեղակայումից, և պատճառվել է առողջությանը թեթև վնաս` առողջության կարճատև քայքայումով, նկատի ունենալով վնասվածքի հետ անմիջական պատճառական կապի մեջ եղած հետևանքների տևողությունը` ոչ պակաս 6 օրից և ոչ ավելի 21 օրից։ Դատողություններ անել վնասվածքը պատճառող գործիքի կամ առարկայի արտահայտված առանձնահատկության մասին հնարավոր չէ, քանի որ փորձաքննության պահին վնասվածքը ենթարկված է եղել վիրաբուժական մշակման, իսկ ներկայացված բժշկական փաստաթղթերում վերջինիս նկարագրությունը տեղեկատվական չէ։ Վնասվածք ստանալու պահին Ա. Գևորգյանը աջ ծոծրակային շրջանով ուղղված է եղել դեպի վնասվածք պատճառող գործիքը կամ առարկան։ Վերոնշյալ վնասվածքի պատճառումը հնարավոր էր, երբ տուժողը մուտքի հարթակից իջած լիներ 3-4 աստիճան, իսկ հարվածը հասցվեր անմիջապես հարթակից` 3-4 աստիճան բաձրությունից։ Համաձայն «Գրիգոր Նարեկացի բժշկական կենտրոն» ՓԲԸ-ից տրված կոնսուլտացիոն պատասխանի` Ա. Գևորգյանի մոտ զարկերակային հիպերտենզիա չի հայտնաբերվել»։

հատոր 1 Գ/Թ 16-17
դատաքննության արձանագրություն

Նույնաբովանդակ ցուցմունք է տվել դատաբժշկական փորձագետ Ռիգել Վարդանյանը նախաքննության և դատաքննության ժամանակ։

հատոր 1 Գ/Թ 113
դատաքննության արձանագրություն

Դատաքննության ընթացքում որպես վկա հարցաքննված ՀՀ ոստիկանության Էրեբունու բաժնի նախկին հետաքննիչ Աշոտ Ղազարյանը ցուցմունք է տվել այն մասին, որ ոստիկանության Էրեբունու բաժնում ահազանգ ստանալու կապակցությամբ օպերատիվ խմբով մեկնել է դեպքի վայր` Երևանի Արցախի փողոցի 22 շենք, որի 13-րդ բնակարանում` հարևանի տանը, տեսել է տուժող Ամինե Գևորգյանին` գլուխը վնասված, արյունահոսող վերքով։ Եկել է շտապ օգնության բրիգադը, տուժողին բուժօգնություն է ցույց տվել։ Արմինե Գևորգյանը հայտարարություն է տվել այն մասին, որ աստիճաններից իջնելու պահին նույն շենքի 15 բնակարանի բնակչուհի Սոնա Ասլանյանը կացնով հարվածել է իր գլխին` ծոծրակային մասում և պատճառել է մարմնական վնասվածք։ Վկան հայտնել է, որ Սոնա Ասլանյանը գտնվել է տանը, նա ժխտել է տուժողին մարմնական վնասվածք պատճառելու հանգամանքը։

դատաքննության արձանագրություն

Դեպքի վայրի տեղազննության արձանագրությամբ, դրան կից սխեմայով և ֆոտոաղյուսակով այն մասին, որ տուժող Արմինե Գևորգյանը ցույց է տվել աստիճանավանդակը և հայտարարել, որ աստիճաններից իջնելիս Սոնա Ասլանյանը հետևից կացնանման ինչ-որ իրով հարվածել է իր գլխին և պատճառել է մարմնական վնասվածք։

հատոր 1 Գ/Թ 81-86

12.11.2011թ. Արմինե Գևորգյանի կողմից քննիչին ներկայացված բաց կապտագույն շրջազգեստի զննության արձանագրությամբ այն մասին, որ շրջազգեստի հետևի և առջևի մասերում առկա են բազմաթիվ արնանման հետքեր։ Տուժող Արմինե Գևորգյանը հայտնել է, որ դեպքի պահին նշված հագուստն եղել է իր հագին։

հատոր 1 Գ/Թ 111

Նշված շրջազգեստը ճանաչվել է իրեղեն ապացույց։

հատոր 1 Գ/Թ 112

1. Դատարանի իրավական վերլուծությունը
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Սոնա Կարապետի Ասլանյանի մեղքը ՀՀ քրեական օրենսգրքի 117-րդ հոդվածով նախատեսված հանցանքի կատարման մեջ հիմնավորված է և նշված հոդվածի սանկցիայով նրա նկատմամբ պետք է քրեական պատիժ կիրառվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ կոնկրետ դեպքով ամբաստանյալ Սոնա Կարապետի Ասլանյանի պատասխանատվությունը և պատիժը ծանրացնող հանգամանքներ առկա չեն։
Որպես պատասխանատվությունը և պատիժը մեղմացնող հանգամանք դատարանը հաշվի է առնում ամբաստանյալի կողմից դատվածություն չունենալը, խնամքին մինչև 14 տարեկան՝ 09.05.2001թ. ծնված երեխա ունենալը։
Դատարանը հաշվի է առնում այն հանգամանքը, որ մասնավոր մեղադրանքի սույն գործով տուժողը չի հաշտվել ամբաստանյալի հետ և առկա է նրա բողոքը։
ՀՀ քրեական օրենսգրքի 48-րդ հոդվածի 2-րդ մասով ամրագրված՝ պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Սոնա Կարապետի Ասլանյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, տվյալ գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացության, որ ամբաստանյալի նկատմամբ որպես պատիժ անհրաժեշտ է նշանակել տուգանք նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամ գումարի չափով, որի կատարումը ՀՀ քրեակատարողական օրենսգրքի 24-րդ հոդվածի համաձայն՝ ապահովում է ամբաստանյալի բնակության վայրի քրեակատարողական ծառայության տարածքային մարմինը՝ ազատությունից զրկելու հետ չկապված պատիժների կատարման ստորաբաժանումը։
Մինչև դատավճիռն օրինական ուժի մեջ մտնելը ամբաստանյալ Սոնա Ասլանյանի նկատմամբ որպես խափանման միջոց ընտրված չհեռանալու մասին ստորագրությունը անհրաժեշտ է թողնել անփոփոխ։
Դատավճիռն օրինական ուժի մեջ մտնելուց հետո իրեղեն ապացույց ճանաչված հագուստը ենթակա է վերադարձման տուժող Արմինե Գևորգյանին։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 369-372, 376, 3761, 379-րդ հոդվածների և ՀՀ դատական օրենսգրքի 20-րդ հոդվածի պահանջներով, դատարանը

Վ Ճ Ռ Ե Ց

Ամբաստանյալ Սոնա Կարապետի Ասլանյանին մեղավոր ճանաչել ՀՀ քրեական օրենսգրքի 117-րդ հոդվածով նախատեսված հանցանքի կատարման մեջ և նշված հոդվածի սանկցիայով նրա նկատմամբ քրեական պատիժ կիրառել` դատապարտել տուգանքի նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամ գումարի չափով։
Պատժի կատարումը հանձնարարել ամբաստանյալի բնակության վայրի քրեակատարողական ծառայության մարմնին` ազատությունից զրկելու հետ չկապված պատիժների կատարման ստորաբաժանմանը։
Մինչև դատավճռի օրինական ուժի մեջ մտնելը ամբաստանյալ Սոնա Կարապետի Ասլանյանի նկատմամբ որպես խափանման միջոց կիրառված չհեռանալու մասին ստորագրությունը թողնել անփոփոխ։
Դատավճիռն օրինական ուժի մեջ մտնելուց հետո իրեղեն ապացույց ճանաչված հագուստը վերադարձնել տուժող Արմինե Գևորգյանին։
Դատավարության մասնակիցների կողմից դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում։

ԴԱՏԱՎՈՐ Վ. Թ. ԳՐԻԳՈՐՅԱՆ