ԵԷԴ/0187/01/11

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ` Ա. ԳԱԲՐԻԵԼՅԱՆ
ՔԱՐՏՈւՂԱՐՈւԹՅԱՄԲ` Ք. ԲԱԴԱԼՅԱՆ

Մասնակցությամբ`

ՄԵՂԱԴՐՈՂ` Գ. ԱԹԱՆԵՍՅԱՆ
ՊԱՇՏՊԱՆ` Ս. ՀԱՐՈւԹՅՈւՆՅԱՆ

2013թ. փետրվարի 28-ին դատարանում
Դռնբաց դատական նիստում քննեց քրեական գործն ըստ մեղադրանքի`
1. Հոմերոս Շմավոնի Նազարյանի, ծնված 19.02.1960թ., ք.Սիսիան, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում դատված`
ա) Երևանի Կենտրոն և Նորք-Մարաշ համայնքների ընդհանուր իրավասության դատարանի 25.06.2009թ. ԵԿԴ/0084/01/08 դատավճռով ՀՀ քր. օր-ի 178 հոդվածի 2-րդ մասի 3-րդ կետով դատապարտվել է ազատազրկման` 3 տարի ժամկետով, ՀՀ ԱԺ «Համաներում հայտարարելու մասին» 19.06.2009թ. որոշման 1-ին կետի 1-ին ենթակետի կիրառմամբ ազատվել է պատիժը կրելուց,
բ) Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 06.12.2011թ. ԵԷԴ/0124/01/11 դատավճռով ՀՀ քր. օր-ի 325 հոդվածի 1-ին մասով դատապարտվել է ազատազրկման` 1 տարի ժամկետով, բնակվել է ք.Երևան Ներքին Շենգավիթ 4 փողոց, 47 տանը։
Մեղադրվում է ՀՀ քր. օր-ի 38-205 հոդվածի 1-ին մասով։
Սույն գործով կալանքի տակ է 23.11.2011թ.։
2. Վահագն Հոմերոսի Նազարյանի, ծնված 20.01.1985թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, չամուսնացած, նախկինում չդատված, բնակվում է ք.Երևան Ներքին Շենգավիթ 4 փողոց, 47 տանը։
Մեղադրվում է ՀՀ քր. օր-ի 205 հոդվածի 1-ին մասով։
Սույն գործով կալանքի տակ չի եղել։
Դատաքննությամբ և գործի տվյալներով պարզվեց հետևյալը.
Նախաքննական մարմինն ամբաստանյալներ Հոմերոս Շմավոնի Նազարյանին` ՀՀ քր. օր-ի 38-205 հոդվածի 1-ին մասով, իսկ Վահագն Հոմերոսի Նազարյանին` ՀՀ քր. օր-ի 205 հոդվածի 1-ին մասով մեղադրանք է առաջադրել այն բանի համար, որ Հոմերոս Նազարյանն իր անվամբ ձեռնարկատիրական գործունեություն չիրականացնելու և հարկերի վճարումից խուսափելու դիտավորությամբ 07.10.2009թ. ՀՀ իրավաբանական անձանց պետական ռեգիստրի գործակալության Էրեբունու բաժնում «Հապ Գրիգ» ՍՊ ընկերության նախկին տնօրեն Վրեժ Պողոսյանից ձեռք բերելով ընկերության 10% բաժնետոմսերը, գրանցել է իր որդու` ամբաստանյալ Վահագն Նազարյանի անվամբ` նախորոք իմանալով, որ ընկերության փաստացի գործունեությունը պետք է ղեկավարի ինքը։ 07.10.2009թ. մինչև 27.05.2011թ. ընկած ժամանակահատվածում այդ ընկերության միջոցով Հոմերոս Նազարյանը ՀՀ տարածքում իրականացրել է շահույթ հետապնդող առևտրային գործունեություն, մասնավորապես` 2009-2010թ. ընթացքում «Պատմամշակութային արգելոց-թանգարանների և պատմական միջավայրի պաշտպանության ծառայություն» ՊՈԱԿ-ի շենքում և նկուղային հարկի երկու պահասենյակներում իրականացրել է վերանորոգման և մասնակի կահավորման աշխատանքներ` 8.345.400 դրամ ընդհանուր արժողությամբ և 2010թ. սեպտեմբերին «Արփա Սևան» ԲԲ ընկերությանը մատակարարել է 864.000 դրամ ընդհանուր արժողությամբ պողպատյա թիթեղներ։ Նշված ընկերությունները գումարները վճարել են բանկային եղանակով` «Հապ Գրիգ» ՍՊ ընկերության բանկային հաշվին։ Հանդիսանալով ՊԵԿ Էրեբունու հարկային տեսչությունում հաշվառված «Հապ Գրիգ» ՍՊ ընկերության տնօրեն և պատասխանատու լինելով օրենքով սահմանված կարգով հաշվառման վայրի հարկային մարմնին ընկերության գործունեության վերաբերյալ հարկման համար հիմք հանդիսացող հաշվարկներ ու հաշվետվություններ ներկայացնելու, դրանցում արդյունքները ճիշտ արտացոլելու և հարկերը վճարելու համար, Վահագն Նազարյանը Հոմերոս Նազարյանի կազմակերպմամբ` հարկերը վճարելուց խուսափելու դիտավորությամբ, հարկային մարմնին օրենսդրությամբ նախատեսված հարկման համար հիմք հանդիսացող հաշվարկներ և հաշվետվություններ չներկայացրելու եղանակով չարամտորեն խուսափել են խոշոր չափի` 6.165.230 դրամ հարկերի վճարումից։
Դատաքննությամբ առաջադրված մեղադրանքում Հոմերոս Նազարյանն իրեն մեղավոր ճանաչեց և ցուցմունք տվեց այն մասին, որ 2009թ. որոշել է զբաղվել շինարարական աշխատանքներով։ Դրա համար անհրաժեշտ է եղել հիմնադրել կազմակերպություն և ստանալ շինարարական աշխատանքներով զբաղվելու թույլտվություն։ Հետևաբար որոշել է գնել այնպիսի կազմակերպություն, որը արդեն իսկ ունի նման աշխատանքներով զբաղվելու թույլտվություն։ Այդ ժամանակ իր ծանոթ Վրեժ Պողոսյանից տեղեկացել է, որ վերջինս վաճառում է իրեն պատկանող «Հապ Գրիգ» ընկերությունը։ Քանի որ ինքը չունի ՀՀ անձնագիր, իր որդուն` Վահագն Նազարյանին է առաջարկել ստանձնել այդ կազմակերպության հիմնադրի և տնօրենի պարտականությունները։ 13.10.2009թ. ՀՀ Իրավաբանական անձանց պետական ռեգիստրի գործակալության Էրեբունու բաժնում «Հապ Գրիգ» ՍՊ ընկերության նախկին տնօրեն Վրեժ Պողոսյանից ձեռք են բերել 100 տոկոս բաժնետոմսերը և գրանցել Վահագն Նազարյանի անվամբ։ 07.10.2009թ. մինչև 27.05.2011թ. ընկած ժամանակահատվածում այդ ընկության միջոցով իրականացրել է շահույթ հետապնդող առևտրային գործունեություն, մասնավորապես` կատարել է «Պատմամշակութային արգելոց-թանգարանների և պատմական միջավայրի պաշտպանության ծառայություն» ՊՈԱԿ-ի շենքի և նկուղային հարկի երկու պահասենյակների վերանորոգման և մասնակի կահավորման աշխատանքները և «Արփա Սևան» ԲԲ ընկերությանը մատակարարել է պողպատյա թիթեղներ։ «Հապ Գրիգ» ՍՊ ընկերության գործունեությունը փաստացի իրականացվել է իր կողմից և իր կարգադրությամբ է ընկերության տնօրեն Վահագն Նազարյանը ՊԵԿ Էրեբունու հարկային տեսչություն հաշվետվություններ չի ներկայացրել ու հարկեր չի վճարել։
Դատաքննությամբ առաջադրված մեղադրանքում Վահագն Նազարյանն իրեն մեղավոր ճանաչեց և ցուցմունք տվեց այն մասին, որ 2009թ. հոկտեմբեր ամսի սկզբներին իր հայրը` Հոմերոս Նազարյանը, քանի որ ՀՀ անձնագիր չունի, առաջարկել է իր անվամբ գրանցել շինարարական աշխատանքներ կատարելու թույլտվություն ունեցող կազմակերպություն և զբաղվել շինարակական աշխատանքներով։ 13.10.2009թ. ՀՀ Իրավաբանական անձանց պետական ռեգիստրի գործակալության Էրեբունու բաժնում «Հապ Գրիգ» ՍՊ ընկերության նախկին տնօրեն Վրեժ Պողոսյանից ձեռք են բերել 100 տոկոս բաժնետոմսերը և գրանցել իր անվամբ։ Թեև ինքն է հանդիսացել ընկերության տնօրենը, սակայն կնիքը գտնվել է հոր մոտ և փաստացի Հոմերոս Նազարյանն է իրականացրել ընկերության գործունեությունը։ Ինքը բազմիցս դիմել է հորը «Հապ Գրիգ» ընկերության գործունեության վերաբերյալ հաշվետվություններ ներկայացնել հարկային տեսչություն, սակայն վերջինս հրաժարվել է և իրենք պետ. բյուջե վճարումներ չեն կատարել։
Վկա` Պարթև Հակոբյանը ցուցմունք տվեց այն մասին, որ հանդիսանում է «Արփա Սևան» ԲԲ ընկերության մատակարարման տեղամասի պետը։ 2010թ. սեպտեմբեր ամսին իրենց ընկերություն է այցելել Հոմերոս Նազարյանը և առաջարկել է պողպատյա թիթեղներ` շուկայականից ավելի մատչելի գներով։ Ինքը նրան ասել է, որ առանց հաշիվ-ապրանքագրերի չեն համաձայնվի իրականացնել ոչ մի գործարք։ Հոմերոս Նազարյանը իրեն ասել է, որ հանդիսանում է «Հապ Գրիգ» ընկերության փոխտնօրենը և այդ կազմակերպության միջոցով են իրականացնելու նշված ապրանքների մատակարարումը։ Քանի որ առաջարկվող ապրանքների գները մատչելի են եղել և ներկայացվելու է նաև հաշիվ-ապրանքագրեր, ինքը համաձայնվել է։ Մի քանի օր անց Հոմերոս Նազարյանը` հաշիվ-ապրանքագրերի հետ միասին, ուղարկել է պողպատյա թիթեղները` ընդհանուր 864.000 ՀՀ դրամ արժողությամբ, որի արժեքը իրենք փոխանցել են «Հապ Գրիգ» ընկերության բանկային հաշվեհամարին։
Վկա` Վլադիմիր Պողոսյանը ցուցմունք տվեց այն մասին, որ հանդիսանում է «Պատմամշակութային արգելոց-թանգարանների և պատմական միջավայրի պաշտպանության ծառայություն» ՊՈԱԿ-ի տնօրենը։ 2009-2010թթ. ընթացքում «Հապ Գրիգ» ՍՊ ընկերության հետ կնքված պայմանագրի համաձայն, ընկերության աշխատակիցները` Հոմերոս Նազարյանի ղեկավարությամբ, իրականացրել են թանգարանի շենքի և նկուղային հարկի երկու պահասենյակների վերանորոգման և մասնակի կահավորման աշխատանքները` ընդհանուր 8.345.400 ՀՀ դրամ արժողությամբ, որի արժեքը իրենք փոխանցել են «Հապ Գրիգ» ընկերության բանկային հաշվեհամարին։
Վկա` Ավետիք Իսրայելյանը ցուցմունք տվեց այն մասին, որ 2009թ. վերջերին ծանոթացել է «Հապ Գրիգ» ՍՊ ընկերության ներկայացուցիչ Հոմերոս Նազարյանի հետ։ Վերջինիս առաջարկով 2009թ. դեկտեմբեր ամսից կատարել է «Պատմամշակութային արգելոց-թանգարանների և պատմական միջավայրի պաշտպանության ծառայություն» ՊՈԱԿ-ի շենքի ներքին հարդարման աշախատանքները, որի դիմաց Հոմերոս Նազարյանն իրեն վճարել է 30.000 ՀՀ դրամ։
Դատաքննությամբ փորձագետ Վասիլ Առուստամյանը հայտնեց դատարանին, որ սույն գործով իրենք իրականացրել են դատահաշվապահական փորձաքննություն, որի վերաբերյալ տրվել է համապատասխան եզրակացություն։ Իրենք բոլոր եզրակացությունների վերջում նշում են կատարում այն մասին, որ հաշվարկները կատարված են ներկայացված փաստաթղթերի` ելակետային դրույթների, հիման վրա, հետագայում լրացուցիչ փաստաթղթեր, տեղեկություններ, տվյալներ ներկայացվելու դեպքում, եզրակացությունը ենթակա է վերահաշվարկման, քանի որ առանց լրացուցիչ համադրման որևէ կերպ չես կարող ասել այն արդեն իսկ կատարված հաշվարկի վրա ազդեցություն կունենա, թե ոչ։ Կոնկրետ այս գործով ամբաստանյալները որևէ հարկային հաշվետվություններ չեն ներկայացրել, հետևաբար և գործով փաստաթղթեր չկան, ուստի նման դեպքերում, քանի որ հաշվառումը կոպիտ ձևով է տարվել, որը դժվարացնում է սահմանված կարգով հարկվող օբյեկտը որոշելուն, հաշվարկը կատարվում է «Հարկերի մասին» ՀՀ օրենքի դրույթներով։
Դատաքննությամբ փորձագետ Շիրակ Հարությունյանը հայտնեց դատարանին, որ աշխատում է պետական եկամուտների կոմիտեի օպերատիվ վարչությունում որպես ավագ օպեր-լիազոր։ Իրենց կողմից «Հապ Գրիգ» ՍՊ ընկերությունում կատարված ստուգման արդյունքում հայտնաբերել է հարկային իրավախախտում, որի վերաբերյալ «Հարկերի մասին» օրենքի հիման վրա կազմվել է ակտ այն մասին, որ ընկերությունը իրականացրել է շահույթ հետապնդող առևտրային գործունեություն, սակայն որևէ փաստաթղութ չի ներկայացրել հարկային մարմիններին։ Հարկային պարտավության հաշվարկները կատարում են տեսուչները, որից հետո համակարգչային բազայի միջոցով ստուգում են տվյալ կազմակերպության անձնական հաշիվ-քարտը։ Եթե կազմակերպության կողմից վճարումներ կատարվել են, ապա անպայման անձնական հաշիվ-քարտում դրանք երևում են և այդքան մասով ակտի գումարը նվազեցվում է։ Կատարվող յուրաքանչյուր գործողություն երևում է անձնական հաշիվ-քարտում, մասնավորապես` ընկերությունը գերավճար ունի, թե ոչ, որ օրը ինչ մուտքեր են արվել, որ օրը ինչ հարկային պարտավորություն է առաջացել և այլն։ «Հապ Գրիգ» ՍՊ ընկերության հաշիվ-քարտում ակտը կազմելու օրվա դրությամբ որևէ հարկային շարժ չի երևացել, հետևաբար Հոմերոս Նազարյանը, եթե հետագայում ինչ որ գումարներ վճարել է, ապա շատ հավանական է, որ այն հանվել է նախկինում եղած հարկային պարտավորություններից և իր կողմից կազմված ակտի հետ այն որևէ առնչություն չունի, քանի որ եթե խախտումը հայտնաբերելու ժամանակ գերավճար լիներ, ապա ինքը որևէ ակտ չէր կազմի։ «Հապ Գրիգ» ՍՊ ընկերությունը ոչ մի հաշվետվություն չի ներկայացրել հարկային մարմիններին, ուստի և վերջիններս չեն կարող ասել ընկերությունը վնասով է աշխատել, թե ոչ։
Դատաքննությամբ փորձագետ Հրաչյա Բանդուանյանը հայտնեց դատարանին, որ իրենց կողմից կատարված լրացուցիչ դատահաշվապահական փորձաքննության եզրակացությամբ հիմնավորվել է, որ Վահագն Նազարյանի տնօրինության ընթացքում «Հապ Գրիգ» ՍՊ ընկերության լրացուցիչ հարկային պարտավորությունները` ըստ առանձին հարկատեսակների, տույժ և տուգանքներով հանդերձ, 07.10.2009թ. մինչև 27.05.2011թ. ընկած ժամանակահատվածում կազմել են ընդհանուր 9.037.614 դրամ, որից հարկեր` 4.222.732 դրամ, տույժ և տուգանք` 4.814.882 դրամ։
Դատարանի կողմից հետազոտվեց վկաներ` Ռոմիկ և Կարեն Խուդոյանների նախաքննությամբ տրված նույնաբովանդակ ցուցմունքները այն մասին, որ 2009թ. սեպտեմբերին Հոմերոս Նազարյանի առաջարկով իրենց հոր` Ռոբերտ Խուդոյանի հետ միասին, Երևան քաղաքի Թաիրովի 15 հասցեում գտնվող «Պատմամշակութային արգելոց-թանգարանների և պատմական միջավայրի պաշտպանության ծառայություն» ՊՈԱԿ-ի շենքում իրականացրել են ներքին հարդարման աշախատանքները, որը տևել է մոտ 2 ամիս, սակայն շինարարական աշխատանքներն ավարտելուց հետո Հոմերոս Նազարյանի կողմից վարձատրվել են մասնակի, իսկ գումարի մնացած մասը մինչ օրս չեն ստացել։
ՀՀ «Փորձաքննությունների ազգային բյուրո» ՊՈԱԿ-ի կողմից 15.09.2011թ. տրված դատահաշվապահական փորձաքննության թիվ 11-1596 եզրակացությունը, համաձայն որի Վահագն Նազարյանի տնօրինության ընթացքում «Հապ Գրիգ» ՍՊ ընկերության լրացուցիչ հարկային պարտավորությունները` ըստ առանձին հարկատեսակների, տույժ և տուգանքներով հանդերձ, 07.10.2009թ. մինչև 27.05.2011թ. ընկած ժամանակահատվածում կազմել են ընդհանուր 12.377.029 դրամ, որից շահութահարկ` 4.765.380 դրամ, ԱԱՀ` 1.399.850 դրամ, տուգանք` 4.264.883 դրամ և տույժեր` 1.946.916 դրամ։
ՀՀ «Փորձաքննությունների ազգային բյուրո» ՊՈԱԿ-ի կողմից 09.01.2013թ. տրված լրացուցիչ դատահաշվապահական փորձաքննության թիվ 12-3781 եզրակացությունը, համաձայն որի Վահագն Նազարյանի տնօրինության ընթացքում «Հապ Գրիգ» ՍՊ ընկերության լրացուցիչ հարկային պարտավորությունները` ըստ առանձին հարկատեսակների, տույժ և տուգանքներով հանդերձ, 07.10.2009թ. մինչև 27.05.2011թ. ընկած ժամանակահատվածում կազմել են ընդհանուր 9.037.614 դրամ, որից հարկեր` 4.222.732 դրամ, տույժ և տուգանք` 4.814.882 դրամ։
«Հապ Գրիգ» ՍՊ ընկերության կողմից «Արփա Սևան» ԲԲ ընկերության և «Պատմամշակութային արգելոց-թանգարանների և պատմական միջավայրի պաշտպանության ծառայություն» ՊՈԱԿ-ի անվամբ դուրս գրված թվով 4 հաշիվ ապրանքագրերը, թվով 7 վճարման հանձնարարագրերը, ՀՀ ԿԱ ՊԵԿ ՕՀ վարչության աշխատակիցների կողմից 06.06.2011թ. կազմված հ.1014119 ստուգման ակտը, ՀԴՄ կտրոնները, հաշիվ-ֆակտուրաները և այլ փաստաթղթերը, «Հապ Գրիգ» ՍՊ ընկերության հարկային գործի պատճենը, անձնական հաշվի հաշվառման քարտերը, ինչպես նաև գործով ձեռք բերված այլ փաստական տվյալները։
Դատաքննությամբ նշանակված լրացուցիչ դատահաշվապահական փորձաքննության եզրակացությունը և փորձագետի ցուցմունքը հաշվի առնելով, համաձայն որոնց Վահագն Նազարյանի տնօրինության ընթացքում «Հապ Գրիգ» ՍՊ ընկերության լրացուցիչ հարկային պարտավորությունների չափը պետբյուջեի հանդեպ կազմել է ընդհամենը 9.037.614 դրամ, այդ թվում հարկեր` 4.222.732 դրամ և տույժ և տուգանքներ` 4.814.882 դրամ, մեղադրող-դատախազ Գ. Աթանեսյանը 22.02.2013թ. որոշմամբ ամբաստանյալ Վահագն Նազարյանի և Հոմերոս Նազարյանի նկատմամբ առաջադրված մեղադրանքը փոփոխեց, նոր մեղադրանք առաջադրեց և դատարանում մեղադրանքը պաշտպանեց Վահագն Նազարյանի նկատմամբ` ՀՀ քր. օր-ի 205 հոդվածի 1-ին մասով, իսկ Հոմերոս Նազարյանի նկատմամբ` ՀՀ քր. օր-ի 38-205 հոդվածի 1-ին մասով, պատճառաբանելով, որ պետությանը պատճառված վնասը կազմել է 4.222.732 դրամ։
Մեղադրող-դատախազ Գ.Աթանեսյանը ամբաստանյալ Վահագն Հոմերոսի Նազարյանի նկատմամբ դատարանում մեղադրանքը պաշտպանեց ՀՀ քր. օր-ի 205 հոդվածի 1-ին մասով, այն է` նա իր հոր` Հոմերոս Շմավոնի Նազարյանի կազմակերպմամբ 2009թ. հոկտեմբերի 7-ին ՀՀ իրավաբանական անձանց պետական ռեգիստրի գործակալության Էրեբունու բաժնում ձեռք է բերել «Հապ Գրիգ» ՍՊ ընկերության 100 տոկոս բաժնեմասը և գրանցել իր անվամբ, ու հանդիսանալով ՊԵԿ Էրեբունու հարկային տեսչությունում հաշվառված «Հապ Գրիգ» ՍՊ ընկերության տնօրենը և պատասխանատու լինելով օրենքով սահմանված կարգով հարկման հիմք հանդիսացող հաշվարկներ և հաշվետվություններ ներկայացնելու, դրանցում արդյունքները ճիշտ արտացոլելու համար, 2009-2010թթ. ընթացքում Հոմերոս Նազարյանի ղեկավարմամբ ՀՀ տարածքում իրականացրել է շահույթ հետապնդող առևտրային գործունեություն, որն արտահայտվել է նրանում, որ ապրանքանյութական արժեքներ է ձեռք բերել ու մատակարարել մի շարք կազմակերպությունների, իրականացրել է շինարարական աշխատանքներ, այսինքն` կատարված գործարքների դիմաց ստացել է համապատասխան հասույթ, սակայն Հոմերոս Նազարյանի կազմակերպմամբ հարկերը վճարելուց խուսափելու դիտավորությամբ, հարկային մարմնին օրենսդրությամբ նախատեսված հարկման հիմք հանդիսացող հաշվարկներ և հաշվետվություններ չի ներկայացրել և այդ եղանակով չարամտորեն խուսափել է խոշոր չափի` 4.222.732 դրամ հարկերը վճարելուց։
Մեղադրող-դատախազ Գ.Աթանեսյանը ամբաստանյալ Հոմերոս Շմավոնի Նազարյանի նկատմամբ դատարանում մեղադրանքը պաշտպանեց ՀՀ քր. օր-ի 38-205 հոդվածի 1-ին մասով, այն է` «Հապ Գրիգ» ՍՊ ընկերության նախկին տնօրեն Վրեժ Պողոսյանից 2009թ. հոկտեմբերի 7-ին ձեռք բերելով ընկերության 100 տոկոս բաժնեմասը, գրանցել է որդու` Վահագն Հոմերոսի Նազարյանի անվամբ, և 2009-2010թթ. ընթացքում ընկերության միջոցով ՀՀ տարածքում իրականացրել է շահույթ հետապնդող գործունեություն, որն արտահայտվել է նրանում, որ ապրանքանյութական արժեքներ է ձեռք բերել ու մատակարարել մի շարք կազմակերպությունների, իրականացրել է շինարարական աշխատանքներ, սակայն հարկերի վճարումից խուսափելու դիտավորությամբ, ՊԵԿ Էրեբունու հարկային տեսչություն հարկման հիմք հանդիսացող հաշվարկներ և հաշվետվություններ չներկայացնելու միջոցով չարամտորեն խուսափել է խոշոր չափի` 4.222.732 դրամ հարկերը վճարելուց։
Դատարանը նույնպես գտնում է, որ ամբաստանյալ Հոմերոս Նազարյանի և Վահագն Նազարյանի կատարած արարքներին տրվել է ճիշտ իրավական որակում, քանի որ դատաքննությամբ հետազոտված բոլոր ապացույցները վկայում են, որ ամբաստանյալներ Հոմերոս Նազարյանի և Վահագն Նազարյանի կատարած քրեորեն հետապնդելի բոլոր գործողություններով, այն է` չարամտորեն խուսափել են հարկերի վճարումից, պետությանը պատճառվել է ոչ թե 6.165.230 ՀՀ դրամի վնաս, այլ` 4.222.732 ՀՀ դրամի վնաս։
Այսպիսով, դատարանը ապացուցված համարեց, որ Հոմերոս Շմավոնի Նազարյանը կատարել է արարք, որը նախատեսված է ՀՀ քր. օր-ի 38-205 հոդվածի 1-ին մասով, իսկ Վահագն Հոմերոսի Նազարյանը` ՀՀ քր. օր-ի 205 հոդվածի 1-ին մասով, որով և պետք է ենթարկվեն քրեական պատասխանատվության։
Պատիժ նշանակելիս դատարանը հաշվի է առնում արարքի հանրության համար վտանգավորությունը, աստիճանը և բնույթը, ամբաստանյալների անձը բնութագրող տվյալները, նրանց պատասխանատվությունը և պատիժը մեղմացնող և ծանրացնող հանգամանքները։
Դատարանն ամբաստանյալ Հոմերոս Նազարյանի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս զղջացել է կատարած արարքի համար և ընդունել մեղքը։
Ամբաստանյալ Հոմերոս Նազարյանի պատասխանատվությունը և պատիժը ծանրացնող հանգամանք է դիտվում հանցանքը կատարելու ռեցիդիվը։
Դատարանը, հաշվի առնելով Հ. Նազարյանի կողմից կատարած հանցանքի հասարակական վտանգավորությունը և գործի հանգամանքները, գտնում է, որ Հոմերոս Նազարյանի նկատմամբ պատիժ պետք է սահմանվի ազատազրկման ձևով, որը նա պետք է կրի։
Հոմերոս Նազարյանը Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 06.12.2011թ. ԵԷԴ/0124/01/11 դատավճռով ՀՀ քր. օր-ի 325 հոդվածի 1-ին մասով դատապարտվել է ազատազրկման` 1 տարի ժամկետով։ Նոր հանցանքը կատարել է նախքան առաջին գործով դատավճիռ կայացնելը, հետևաբար դատարանը գտնում է, որ նրա նկատմամբ պատիժ պետք է նշանակել ՀՀ քրեական օրենսգրքի 66 հոդվածի կանոններով նախատեսված հանցանքների համակցությամբ։
Քննարկելով խափանման միջոցի հարցը, դատարանը գտնում է, որ ամբաստանյալ Հոմերոս Նազարյանի նկատմամբ ընտրված կալանք խափանման միջոցը վերացնելու կամ փոխելու հիմքեր չկան և պատժի սկիզբը պետք է հաշվել Երևան քաղաքի Էրեբունի և նուբարաշեն վարչական շրջանների ընդհանուր իրավասության դատարանի 06.12.2011թ. ԵԷԴ/0124/01/11 դատավճռով որպես պատժի սկիզբ ընտրված` 22.07.2011թ.-ից։
Դատարանն ամբաստանյալ Վահագն Նազարյանի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարում այն, որ վերջինս երիտասարդ է, նախկինում արատավորված չի եղել, զղջացել է կատարած արարքի համար և ընդունել մեղքը։
Ամբաստանյալ Վահագն Նազարյանի պատասխանատվությունը և պատիժը ծանրացնող հանգամանքներ չկան։
Դատարանը, հաշվի առնելով Վ. Նազարյանի կողմից կատարած հանցանքի հասարակական վտանգավորությունը և գործի հանգամանքները, գտնում է, որ Վահագն Նազարյանի նկատմամբ պատիժ պետք է սահմանվի ազատազրկման ձևով։
ՀՀ Ազգային Ժողովի կողմից 26.05.2011թ. ընդունվել է «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշումը։
Նշված որոշման 15-րդ կետի համաձայն` սույն որոշումը կիրառվում է այն անձանց նկատմամբ, որոնք հանցագործություն են կատարել մինչև 2011թ. մայիսի 1-ը ներառյալ, իսկ 9-րդ կետի 2-րդ ենթակետի համաձայն` համաներումը չկիրառել կրկին դիտավորյալ հանցանք կատարած այն անձանց նկատմամբ, որոնց հանդեպ վերջին տասը տարվա ընթացքում պատիժը կրելուց ազատել են Հայաստանի Հանրապետության Ազգային ժողովի` համաներում հայտարարելու մասին որոշման հիման վրա։
Նկատի ունենալով, որ ամբաստանյալ Հոմերոս Նազարյանը կրկին կատարել է դիտավորյալ հանցանք, նրա նկատմամբ Երևանի Կենտրոն և Նորք-Մարաշ համայնքների ընդհանուր իրավասության դատարանի 25.06.2009թ. ԵԿԴ/0084/01/08 դատավճռով ՀՀ քր. օր-ի 178 հոդվածի 2-րդ մասի 3-րդ կետով նախատեսված արարքի համար կիրառվել է ՀՀ ԱԺ «Համաներում հայտարարելու մասին» 19.06.2009թ. որոշման 1-ին կետի 1-ին ենթակետը և ազատվել է պատիժը կրելուց, դատարանը գտնում է, որ Հ. Նազարյանի նկատմամբ կիրառելի չէ ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման դրույթները։
Համաձայն ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման 1-ին կետի 1-ին ենթակետի` պատժից ազատել, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի` առավելագույնը երեք տարի ժամկետով ազատությունից զրկելու հետ կապված պատիժների դատապարտված անձանց։
Նկատի ունենալով, որ ամբաստանյալ Վահագն Նազարյանը արարքը կատարել է մինչև 2011թ. մայիսի 1-ը և նրան մեղսագրվել է արարք` ՀՀ քր. օր-ի 205 հոդվածի 1-ին մասով, իսկ համաձայն ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման` ՀՀ քր. օր-ի 205 հոդվածի 1-ին մասով հանցավոր արարք կատարած անձանց նկատմամբ կիրառելի է համաներման ակտը, հետևաբար դատարանը գտնում է, որ Վահագն Հոմերոսի նազարյանի նկատմամբ պետք է կիրառել ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման դրույթները։
Քննարկելով խափանման միջոցի հարցը, դատարանը գտնում է, որ ամբաստանյալ Վագան Նազարյանի նկատմամբ ընտրված ստորագրություն չհեռանալու մասին խափանման միջոցը պետք է վերացնել։
Անդրադառնալով գույքային վնասի հատուցման հարցին, և նկատի ունենալով, որ ՀՀ գլխավոր դատախազությունը քաղաքացիական հայց է ներկայացրել ընդդեմ Հոմերոս Շմավոնի Նազարյանի և Վահագն Հոմերոսի Նազարյանի և խնդրել է Հոմերոս Շմավոնի Նազարյանից և Վահագն Հոմերոսի Նազարյանից հօգուտ պետ. բյուջեի բռնագանձել 6.165.230 ՀՀ դրամ որպես հանցագործությամբ պատճառված վնասի հատուցում, գտնում է, որ ներկայացրած քաղաքացիական հայցը հիմնավոր է, սակայն այն պետք է բավարարել մասնակիորեն, քանի որ լրացուցիչ դատահաշվապահական փորձաքննության եզրակացության համաձայն` պետությանը պատճառված վնասի չափը կազմել է ոչ թե 6.165.230 ՀՀ դրամ, այլ 4.222.732 ՀՀ դրամ։
Քննարկելով դատական ծախսերի հարցը` դատարանը գտնում է« որ ամբաստանյալներ Հոմերոս Շմավոնի Նազարյանից և Վահագն Հոմերոսի Նազարյանից համապարտության կարգով հօգուտ ՀՀ պետական բյուջեի բռնագանձման է ենթակա դատահաշվապահական և լրացուցիչ դատահաշվապահական փորձաքննությունների կատարման արժեք հանդիսացող` ընդհանուր 164.880/հարյուր վաթսունչորս հազար ութ հարյուր ութսուն/ ՀՀ դրամ գումար` որպես դատական ծախսեր։
Անդրադառնալով ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո քրեական գործին կցված և ապացույց ճանաչված այլ փաստաթուղթ հանդիսացող` 06.06.2011թ. կազմված հ.1014119 ստուգման ակտը, «Հապ Գրիգ» ՍՊ ընկերության 07.10.2009թ. բաժնեմասերի առուծախի պայմանագիրը, ՀԴՄ կտրոնները, հաշիվ-ֆակտուրաները և այլ փաստաթղթերը, պետք է թողնել քրեական գործում, իսկ «Հապ Գրիգ» ՍՊ ընկերության հարկային գործի պատճենը և անձնական հաշվի հաշվառման քարտերը` վերադարձնել ՀՀ ԿԱ ՊԵԿ Էրեբունու հարկային տեսչություն։
Ելնելով վերոգրյալից և ղեկավարվելով ՀՀ քր. դատ. օր-ի 357-360 հոդվածներով և ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման 1-ին կետի 1-ին ենթակետով և 13-րդ կետի 1-ին ենթակետով, դատարանը.

Վ Ճ Ռ Ե Ց

1. Հոմերոս Շմավոնի Նազարյանին մեղավոր ճանաչել ՀՀ քր. օր-ի 38-205 հոդվածի 1-ին մասով և դատապարտել ազատազրկման` 3/երեք/ տարի ժամկետով։
ՀՀ քր. օր-ի 66 հոդվածի 3-րդ մասի կիրառմամբ` նոր նշանակված և Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի 06.12.2011թ. ԵԷԴ/0124/01/11 դատավճռով ազատազրկման ձևով նշանակված պատիժները մասնակիորեն գումարելու միջոցով, վերջնական պատիժ նշանակել ազատազրկում` 3/երեք/ տարի 6/վեց/ ամիս ժամկետով։
Պատիժը պետք է կրի ՀՀ ԱՆ համապատասխան քրեակատարողական հիմնարկում։
Պատժի սկիզբը` 22.07.2011թ.։
Հոմերոս Նազարյանի նկատմամբ ընտրված կալանք խափանման միջոցը թողնել անփոփոխ մինչև դատավճռի օրինական ուժի մեջ մտնելը։

2. Վահագն Հոմերոսի Նազարյանին մեղավոր ճանաչել ՀՀ քր. օր-ի 205 հոդվածի 1-ին մասով և դատապարտել ազատազրկման` 2/երկու/ տարի 6/վեց/ ամիս ժամկետով։
Կիրառել ՀՀ ԱԺ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 26.05.2011թ. որոշման 1-ին կետի 1-ին ենթակետը և Վահագն Հոմերոսի Նազարյանին ազատել նշանակված պատժից։
Վահագն Նազարյանի նկատմամբ ընտրված խափանման միջոցը` ստորագրություն չհեռանալու մասին, վերացնել։
Հոմերոս Շմավոնի Նազարյանից և Վահագն Հոմերոսի Նազարյանից համապարտության կարգով հօգուտ պետ. բյուջեի բռնագանձել 4.222.732/չորս միլիոն երկու հարյուր քսաներկու հազար յոթ հարյուր երեսուներկու/ ՀՀ դրամ որպես հանցագործությամբ պատճառված վնասի հատուցում։

Հոմերոս Շմավոնի Նազարյանից և Վահագն Հոմերոսի Նազարյանից համապարտության կարգով հօգուտ պետ. բյուջեի բռնագանձել 164.880/հարյուր վաթսունչորս հազար ութ հարյուր ութսուն/ ՀՀ դրամ գումար` որպես դատական ծախսեր։
Քրեական գործին կցված և ապացույց ճանաչված այլ փաստաթուղթ հանդիսացող` 06.06.2011թ. կազմված հ.1014119 ստուգման ակտը, «Հապ Գրիգ» ՍՊ ընկերության 07.10.2009թ. բաժնեմասերի առուծախի պայմանագիրը, ՀԴՄ կտրոնները, հաշիվ-ֆակտուրաները և այլ փաստաթղթերը, թողնել քրեական գործում, իսկ «Հապ Գրիգ» ՍՊ ընկերության հարկային գործի պատճենը և անձնական հաշվի հաշվառման քարտերը` վերադարձնել ՀՀ ԿԱ ՊԵԿ Էրեբունու հարկային տեսչություն։
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից մեկամսյա ժամկետում։


ԴԱՏԱՎՈՐ Ա. ԳԱԲՐԻԵԼՅԱՆ