Գործ թիվ ԵԷԴ/0149/01/11
2011թ.

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Շուշանիկ Միքայելյան
Մասնակցությամբ`
Մեղադրող Արիստակես Բարսեղյան
Ամբաստանյալ Շահեն Մուրադյան
Տուժող՝ Աղավնի Կարապետյան

2011 թվականի դեկտեմբերի 05-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի

Շահեն Հովհաննեսի Մուրադյանի - ծնված 08.09.1960թ., ք. Երևան, ազգությունը հայ, Հայաստանի Հանրապետության քաղաքացի, կրթությունը` միջնակարգ, ամուսնացած, խնամքին ոչ ոք, չի աշխատում, 19.03.2010թ. հաշվառված է «Հոգեբուժական բժշկական կենտրոն» ՓԲԸ Նարկոլոգիական կլինիկայում «հոգեկան և վարքային խանգարումներ ալկոհոլի գործածման հետևանքով» ախտորոշմամբ, նախկինում դատված
1. Օրջոնիկիձեի շրջանի ժողդատարանի 09.01.1984թ. դատավճռով ՀՀ քրեական օրենսգրքի 109-րդ հոդվածի 1-ին մասով և 222-րդ հոդվածի 1-ին մասով քրեական օրենսգրքի 37 հոդվածի կիրառմամբ ազատազրկման 1 տարի ժամկետով,
2. Շենգավիթի շրջանի ժողդատարանի 11.08.1993թ. դատավճռով ՀՀ քրեական օրենսգրքի 88-րդ հոդվածի 2-րդ մասով և 229-րդ հոդվածի 3-րդ մասով 37-րդ հոդվածի կիրառմամբ ազատազրկման 8 տարի 6 ամիս ժամկետով,
3. Էրեբունի և Նուբարաշեն համայնքների առաջին ատյանի դատարանի 20.03.2000թ. դատավճռով ՀՀ քրեական օրենսգրքի 109-րդ հոդվածի 1-ին մասով և 110-րդ հոդվածի 2-րդ մասով ազատազրկման 3 տարի ժամկետով,
4. Էրեբունի և Նուբարաշեն համայնքների առաջին ատյանի դատարանի 24.01.2003թ. դատավճռով ՀՀ քրեական օրենսգրքի 109-րդ հոդվածի 1-ին մասով և 223-րդ հոդվածով 37, 38 և 39-րդ հոդվածների կիրառմամբ ազատազրկման 1 տարի 8 ամիս ժամկետով,
դատվածությունը մարված, բնակվում է Երևան, Կռիլովի փողոցի 17 տանը,
մեղադրվում է ՀՀ քրեական օրենսգրքի 137-րդ հոդվածի 1-ին մասով, խափանման միջոցը` ստորագրություն չհեռանալու մասին, առաջադրված մեղադրանքում իրեն մեղավոր չի ճանաչել։

1. Գործի դատավարական նախապատմությունը.
Ամբաստանյալ Շահեն Հովհաննեսի Մուրադյանը բնակվել է Երևանի Կռիլովի 17 տանը, տարիներ շարունակ չարաշահել է ալկոհոլը և թմրամիջոցը, չի աշխատել, բազմիցս դատապարտվել է, այդ թվում` ալկոհոլ օգտագործած վիճակում իր ծնողներին, կնոջը և այլ հարազատներին ծեծելու, մարմնական վնասվածք պատճառելու և սպանության սպառնալիք տալու համար։
Նաև Էրեբունու քննչական բաժնի վարույթում ՀՀ քրեական օրենսգրքի 137-րդ և 118-րդ հոդվածներով հարուցված թիվ 12150310 քրեական գործը կարճվել է 15.01.2010թ. ՀՀ քրեական օրենսգրքի 35-րդ հոդվածի 1-ին մասի 4-րդ կետի հիմքով` տուժողի բողոքի բացակայության պատճառով։ Բոլոր դեպքերով հանցագործությունները կատարել է դանակի գործադրմամբ։
Ամբաստանյալը 19.03.2010թ.-ից «Հոգեկան և վարքային խանգարումներ ալկոհոլի գործածման հետևանքով» ախտորոշմամբ հաշվառման մեջ է կանգնած «Հոգեբուժական բժշկական կենտրոն» ՓԲԸ նարկոլոգիական կլինիկայում, սույն քրեական գործով հանձնաժողովի կողմից ճանաչվել է որպես խրոնիկ ալկոհոլիկ, որը հարկադիր բուժման կարիք ունի։
Ամբաստանյալ Շահեն Մուրադյանը իր ընտանիքի անդամներին և շրջակայքում բնակվող հարազատներին մշտապես պահել է վախի ու սարսափի մեջ, դրսևորել է անկանխատեսելի և նախահարձակ վարքագիծ, միշտ իր մոտ է պահել խոհանոցային դանակը, յուրաքանչյուր առիթով սպառնալով ընտանիքի անդամներին և հատկապես կնոջը` գործով տուժող Աղավնի Կարապետյանին, նրանց սպանել այդ դանակով։ Այսպես.
Երևան քաղաքի Կռիլովի 17 տան բնակիչ, 08.09.1960թ. ծնված Շահեն Հովհաննեսի Մուրադյանը 27.06.2011թ. առավոտյան ժամը 0800-ի սահմաններում, գտնվելով ալկոհոլի ազդեցության տակ, կենցաղային հարցերի շուրջ վիճաբանել է իր եղբորորդի Մհեր Մուրադյանի հետ, որի ընթացքում խոհանոցային դանակով հարվածել է վերջինիս կրծքավանդակի առաջային մակերեսին` վերջինիս առողջությանը պատճառելով թեթև վնաս։ Մհեր Մուրադյանը դեպքի մասին հայտարարություն է տվել ոստիկանության Էրեբունու բաժին։
2011թ. հունիսի 28-ին ժամը 2330-ի սահմաններում, գտնվելով ալկոհոլի ազդեցության տակ, իրենց տանը կենցաղային հարցերի շուրջ վիճաբանել է կնոջ` Աղավնի Կարապետյանի հետ, որի ընթացքում տաբատի հետին գրպանից հանել է խոհանոցային դանակը և սպառնացել նրան` ունենալով սպառնալիքն իրականացնելու իրական հնարավորություն։ Սակայն Ա. Կարապետյանն իր քրոջ` Լենա Կարապետյանի օգնությամբ Շ. Մուրադյանի ձեռքից վերցրել են դանակը և կատարվածի մասին հայտնել ոստիկանություն։
Այնուհետև, 2011թ. հուլիսի 13-ին ժամը 2300-ի սահմաններում Շ. Մուրադյանը, գտնվելով ալկոհոլի ազդեցության տակ, կենցաղային հարցերի շուրջ վիճաբանել է Աղավնի Կարապետյանի հետ, որի ընթացքում վերցրել է խոհանոցային դանակը և սպառնացել սպանել վերջինիս ու վազել նրա հետևից։ Ա. Կարապետյանը Շ. Մուրադյանի կողմից տրվող սպառնալիքներից վախենալով և նրա հետապնդումներից խուսափելու համար պտտվել է հյուրասենյակում գտնվող սեղանի շուրջ և հարմար առիթ գտնելով` փախել է տանից ու կատարվածի մասին հայտնել ոստիկանություն։
Դրանից հետո, 2011թ. հուլիսի 17-ին, ժամը 2300-ի սահմաններում Շահեն Մուրադյանը, գտնվելով ալկոհոլի ազդեցության տակ, կենցաղային հարցերի շուրջ կրկին վիճաբանել է Աղավնի Կարապետյանի հետ, որի ընթացքում խոհանոցային դանակով սպառնացել է սպանել վերջինիս ու վազել նրա հետևից։ Ա. Կարապետյանը նրա հետապնդումներից խուսափելու նպատակով մի քանի անգամ պտտվել է հյուրասենյակի սեղանի շուրջը և մի կերպ դուրս է եկել տանից և հայտարարություն տվել ոստիկանության Էրեբունու բաժնին։
20.07.2011թ. ՀՀ ոստիկանության ՔԳՎ Էրեբունու քննչական բաժնի կողմից ՀՀ քրեական օրենսգրքի 117-րդ հոդվածի և 137-րդ հոդվածի 1-ին մասի հատկանիշներով հարուցվել է թիվ 12124111 քրեական գործը և նախաքննություն է կատարվել։
Նախաքննության ընթացքում տուժող Մհեր Մուրադյանը ցուցմունք է տվել այն մասին, որ բողոք չունի հորեղբոր` Շահեն Մուրադյանի նկատմամբ, 12.10.2011թ. որոշում է կայացվել ՀՀ քրեական օրենսգրքի 35-րդ հոդվածի 1-ին մասի 3-րդ և 4-րդ կետերի, 183-րդ և 185-րդ հոդվածների հիմքով Շահեն Մուրադյանի կողմից Մհեր Մուրադյանին դանակի գործադրմամբ առողջությանը թեթև վնաս պատճառելու մասով կարճել և նրա նկատմամբ ՀՀ քրեական օրենսգրքի 117-րդ հոդվածի քրեական հետապնդումը դադարեցնել` դիմողի բողոքի բացակայության հիմքով։
30.08.2011թ. որոշում է կայացվել Շահեն Մուրադյանին ՀՀ քրեական օրենսգրքի 137-րդ հոդվածի 1-ին մասով որպես մեղադրյալ ներգրավելու մասին, խափանման միջոց է ընտրվել ստորագրություն չհեռանալու մասին։
Մեղադրական եզրակացությունը հաստատվել է 18.10.2011թ.։
Քրեական գործը 24.10.2011թ. ստացվել է Երևանի Էրեբունի և Նուբարաշեն վարչական շրջանների ընդհանուր իրավասության դատարանում։
05.12.2011թ. կայացած դատական նիստի ժամանակ մեղադրողը ՀՀ քր. դատ. օր-ի 3091 հոդվածի կարգով ներկայացվել է առաջադրված մեղադրանքը ՀՀ քր. օր-ի 20-րդ հոդվածում շարադրված փոփոխությունների հիմքով փոփոխելու մասին, նույն դրվագներից յուրաքանչյուրը որակելով ՀՀ քր. օր-ի 137 հոդվածի 1-ին մասով։

2. Դատաքննությամբ հետազոտված ապացույցները
Դատաքննությամբ հետազոտվել են այն բոլոր ապացույցները, որոնք նշված են մեղադրական եզրակացության մեջ։
ՀՀ քրեական օրենսգրքի 137-րդ հոդվածի 1-ին մասով առաջադրված մեղադրանքում ամբաստանյալ Շահեն Մուրադյանն իրեն մեղավոր է ճանաչել նախաքննության ընթացքում, իսկ դատաքննության ընթացքում իրեն մեղավոր չի ճանաչել և ցուցմունք է տվել այն մասին, որ ինքը նշված հանցանքները չի կատարել, կինն իրեն զրպարտում է։ Ճիշտ է, ինքը ոգելից խմիչք օգտագործում է, սակայն կնոջը դանակով չի սպառնացել։
գթ 15-16,20-21,77
Դատարանը, վերլուծելով և գնահատելով դատաքննությամբ ձեռք բերված ու հետազոտված ապացույցները, գտնում է, որ նշված պատճառաբանությամբ ամբաստանյալ Շահեն Մուրադյանը նպատակ է հետապնդում խուսափել կատարած հանցանքների համար նախատեսված քրեական պատասխանատվությունից և պատժից։
Դատարանը Շահեն Մուրադյանի հանցանքը հիմնավորված է համարում հետևյալ ապացույցներով.
Գործով տուժող Աղավնի Կարապետյանը ցուցմունք է տվել այն մասին, որ ամբաստանյալ Շահեն Մուրադյանն իր ամուսինն է, նա մշտապես բուռն ու անդիմադրելի հակում է ունեցել ալկոհոլի նկատմամբ, որի օգտագործումից հետո դառնում է ագրեսիվ ու անկառավարելի, ձեռքն է գցում խոհանոցային դանակն ու սպառնում սպանել իրեն ու ընտանիքի մյուս անդամներին, նրա սպառնալիքները կրել են իրական բնույթ, այդ սպառնալիքներն իրագործելու իրական վտանգ է եղել, մի կերպ ինքը տանից փախուստի է դիմել կամ այլ անձանց միջամտությամբ դանակը նրա ձեռքից վերցվել է, այլապես Շահեն Մուրադյանը կարող էր իրագործել իր սպառնալիքները։ Թեև ամուսինը բազմիցս բուժվել է նարկոդիսպանսերում, սակայն այդ բուժումներն արդյունավետ չեն եղել, դիսպանսերից վերադառնալուց մի քանի օր անց նա վերստին տրվել է խմիչքին և ահաբեկել իրեն, չնչին առիթ փնտրել` վիճաբանություն սարքելու, իրեն ծեծելու և դանակով սպառնալու համար։
28.06.2011թ. ժամը 2330-ի սահմաններում կենցաղային բնույթի չնչին հարցերը պատրվակ բռնելով, ոգելից խմիչքի ազդեցության տակ Շահեն Մուրադյանը վիճաբանել է իր հետ, այնուհետև տաբատի գրպանից հանելով կենցաղային օգտագործման դանակը, հարձակվել է իր վրա` սպառնալով սպանել իրեն։ Իր քրոջ` Լենա Կարապետյանի օգնությամբ մի կերպ հաջողվել է դանակը խլել նրա ձեռքից, որից հետո տանից դուրս է փախել։ 13.07.2011թ. ժամը 2300-ի սահմաններում աշխատանից տուն է վերադարձել, Շահեն Մուրադյանը խմիչք օգտագործած վիճակում վերստին վիճաբանելով իր հետ, վերցրել է խոհանոցային դանակը և հարձակվել է իր վրա։ Ինքը մի կերպ խուսափելով նրանից, մի քանի անգամ պտույտ է գործել հյուրասենյակում գտնվող սեղանի շուրջ, և մի պահ հարմար պահ գտնելով, տանից դուրս է փախել և գնացել է քրոջ տուն, այնուհետև կատարվածի մասին հայտարարություն է տվել ոստիկանության Էրեբունու բաժնին։
Այնուհետև 17.07.2011թ. ժամը 2300-ի սահմաններում կրկին Շահեն Մուրադյանն իրենց տանը վիճաբանություն է սարքել իր հետ, նորից վերցրել է խոհանոցային դանակն ու սպառնացել է իրեն սպանել։ Նորից տան մեջ փախնելով նրա հետապնդումից, հարմար պահ գտնելով, փախել է տանից, գնացել է քրոջ տուն և կատարվածի մասին հայտարարություն տվել ոստիկանության Էրեբունի բաժնին։
Տուժող Աղավնի Կարապետյանը չի հաշտվել ամբաստանյալի հետ և դատարանին միջնորդել է ամբաստանյալ Շահեն Մուրադյանին ենթարկել պատասխանատվության։

Գ. Թ. 50-51, 89
Դատաքննության արձանագրություն

Տուժող Ա. Կարապետյանի քույր, գործով որպես վկա Լենա Կարապետյանի ցուցմունքով այն մասին, որ բնակվում է քրոջ` Աղավնի Կարապետյանի տան հարևանությամբ։ Ա. Կարապետյանի ամուսին Շահեն Մուրադյանը տառապում է խրոնիկ ալկոհոլամոլությամբ, ամեն օր ալկոհոլ է գործածել և շատ հաճախ մանր առիթներից վիճաբանություն սարքել Աղավնու հետ։ 28.06.2011թ. ժամը 2400-ի սահմաններում Աղավնու տանից ինքը աղմուկ է լսել և գնացել այնտեղ և տեսել, որ Շահենը ձեռքում դանակ բռնած սպառնացել է սպանել Աղավնուն և նրանից գումար պահանջել։ Ինքը կարողացել է դժվարությամբ հանդարտեցնել Շահենին, նրա ձեռքից վերցնել դանակը, որից հետո Աղավնու հետ գնացել են իրենց տուն և զանգել ոստիկանություն։
Դրանից հետո եղել են դեպքեր, որ Շահենը կրկին վիճաբանել է Աղավնու հետ, սպառնացել դանակով սպանել նրան։ Փախնելով ամուսնու հետապնդումներից, Աղավնի Կարապետյանն ահաբեկված եկել է իրենց տուն, դեպքերի մասին հայտարարություն է տվել ոստիկանության բաժնին։

Գ. Թ. 56-57
Դատաքննության արձանագրություն

Տուժող Աղավնի Կարապետյանը և վկա Լենա Կարապետյանն իրենց ցուցմունքները պնդել են ամբաստանյալին առերես։

Դատաքննության արձանագրություն

Անձի սթափության վիճակի զննության վերաբերյալ «Շտապ բուժօգնություն» ՊՓԲԸ արձանագրություններով այն մասին, որ յուրաքանչյուր դեպքից հետո պարզվել է, որ Շահեն Մուրադյանը գտնվել է ալկոհոլային հարբածության վիճակում

Գ. Թ. 8, 28

ՀՀ ԱՆ «Հոգեբուժական բժշկական կենտրոն» ՓԲԸ Նուբարաշենի կլինիկայի և ՀՀ ԱՆ «Հոգեբուժական բժշկական կենտրոն» ՓԲԸ Ավանի նարկոլոգիական կլինիկայի հաղորդումներով պարզվել է, որ Շահեն Մուրադյանը նշված կլինիկաներում հաշվառված է «Հոգեկան և վարքային խանգարումներ ալկոհոլի օգտագործման հետևանքով» ախտորոշմամբ և նախկինում բազմիցս ստացիոնար բուժում է ստացել։

Գ. Թ. 16, 74

Դատահոգեբուժական և նարկոլոգիական թիվ 142 ստացիոնար փորձաքննության եզրակացությամբ պարզվել է, որ իրեն մեղսագրվող արարքի նկատմամբ Շահեն Մուրադյանը մեղսունակ է, տառապում է խրոնիկական ալկոհոլիզմ հիվանդությամբ, որի համար հարկադիր բուժման կարիք ունի և դրա համար հակացուցումներ չկան։ Շահեն Մուրադյանը հոգեբուժարանում ստացիոնար հետազոտության մեջ է գտվել 2011թ. սեպտեմբերի 05-ից մինչև սեպտեմբերի 26-ը` 22 օր։

Գ. Թ. 96-98

Հանցագործության գործի դանակը ճանաչվել է իրեղեն ապացույց, դատաքրեագիտական փորձաքննության թիվ 2016 եզրակացության համաձայն` այն տնտեսական նշանակության դանակ է, սառը զենք չի հանդիսանում։

Գ. Թ. 108, 106-107, 90

3. Դատարանի իրավական վերլուծությունը.
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Շահեն Հովհաննեսի Մուրադյանի մեղքը ՀՀ քրեական օրենսգրքի 137-րդ հոդվածի 1-ին մասով նախատեսված հանցանքը կատարելու մեջ հիմնավորված է և նշված հոդվածի սանկցիայով նրա նկատմամբ պետք է քրեական պատիժ կիրառվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ ամբաստանյալ Շահեն Հովհաննեսի Մուրադյանի նկատմամբ պատասխանատվությունը և պատիժը ծանրացնող հանգամանք է հանդիսանում հանցանքն ալկոհոլի ազդեցության տակ կատարելը։
Որպես մեղմացուցիչ հանգամանք դատարանը հաշվի է առնում ամբաստանյալի անկեղծորեն զղջալը։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Շահեն Հովհաննեսի Մուրադյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Գնահատելով վերոշարադրյալը, քրեական գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացության, որ ամբաստանյալի նկատմամբ որպես պատիժ պետք է նշանակվի ազատազրկում որոշակի ժամկետով։
Ամբաստանյալ Շահեն Մուրադյանը մեղադրվել է ՀՀ քրեական օրենսգրքի 137-րդ հոդվածի 1-ին մասով, մեղադրանքի ծավալում ընդգրկվել են հանցանքների 3 դրվագներ` կատարված 2011թ. հունիսի 28-ին, հուլիսի 13-ին և հուլիսի 17-ին։ Դրանցից յուրաքանչյուրն առանձին վերցված ավարտված հանցագործություն է։
ՀՀ քրեական օրենսգրքի 66-րդ հոդվածի /23.05.2011թ. խմբագրությամբ/ 1-ին մասի համաձայն` հանցանքների համակցությամբ յուրաքանչյուր հանցագործության համար առանձին պատիժ/ հիմնական և լրացուցիչ նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով։ Նույն հոդվածի 2-րդ մասի համաձայն` եթե հանցանքների համակցությունն ընդգրկում է միայն ոչ մեծ ծանրության հանցանքներ, ապա վերջնական պատիժը նշանակվում է պատիժները լրիվ կամ մասնակիորեն գումարելու միջոցով։ Ընդ որում, գումարելիս վերջնական պատիժը չի կարող գերազանցել 5 տարին։
Դատարանը միաժամանակ գտնում է, որ ՀՀ քրեական օրենսգրքի 97 և 102-րդ հոդվածների, ՀՀ քրեակատարողական օրենսգրքի 123-124, 126-րդ հոդվածների կարգով պատիժ կիրառելու հետ պետք է կիրառվեն պատժի կատարման հետ միացված բժշկական բնույթի հարկադրանքի միջոցներ խրոնիկ ալկոհոլամոլության դեմ, որը պետք է իրականացվի պատիժը կրելու ընթացքում և որի ժամկետը պետք է հաշվակցվի պատժի ժամկետին։ Քանի որ նախաքննության ընթացքում ամբաստանյալ Շահեն Հովհաննեսի Մուրադյանը ստացիոնար հետազոտության մեջ է գտնվել Նուբարաշենի հոգեբուժական կլինիկայում 22 օր տևողությամբ` 2011թվականի սեպտեմբերի 05-ից մինչև 26-ն ընկած ժամանակահատվածում, նշված ժամկետը ՀՀ քրեական օրենսգրքի 69-րդ հոդվածի 3-րդ մասի հիմքով անհրաժեշտ է հաշվակցել նշանակված պատժի ժամկետի մեջ։
Դատարանը հաշվի է առնում նաև այն հանգամանքը, որ տուժողը չի հաշտվել ամբաստանյալի հետ։
Գործով իրեղեն ապացույց ճանաչված տնտեսական դանակը ենթակա է ոչնչացման։
Նկատի ունենալով նաև այն հանգամանքը, որ քրեական գործը դատարանի վարույթ ընդունելուց հետո ամբաստանյալը հարբած վիճակում ընտանիքում շարունակել է իր հակաօրինական գործողությունները, դատարանը գտնում է, որ ամբաստանյալ Շահեն Հովհաննեսի Մուրադյանի նկատմամբ որպես խափանման միջոց կիրառված չհեռանալու մասի ստորագրությունն անհրաժեշտ է փոխել, որպես խափանման միջոց կիրառել կալանավորումը և ամբաստանյալին կալանքի վերցնել դատական նիստերի դահլիճում, նշված օրվանից հաշվելով նրա պատժի սկիզբը, որն ամբաստանյալը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 369-372, 376, 3761, 379-րդ, ՀՀ դատական օրենսգրքի 20-րդ հոդվածների պահանջներով, դատարանը.

Վ Ճ Ռ Ե Ց

Ամբաստանյալ Շահեն Հովհաննեսի Մուրադյանին մեղավոր ճանաչել ՀՀ քրեական օրենսգրքի 137-րդ հոդվածի 1-ին մասով նախատեսված հանցանքը կատարելու մեջ և նրա նկատմամբ որպես քրեական պատիժ կիրառել, նշանակելով ազատազրկում
- 2011թ. հունիսի 28-ի դրվագով հանցանքը կատարելու համար` ազատազրկում 9 /ինը/ ամիս ժամկետով,
- 2011թ. հուլիսի 13-ի դրվագով հանցանքը կատարելու համար` ազատազրկում 6 /վեց/ ամիս ժամկետով,
- 2011թ. հուլիսի 17-ի դրվագով հանցանքը կատարելու համար` ազատազրկում 6 /վեց/ ամիս ժամկետով։
ՀՀ քրեական օրենսգրքի 66-րդ հոդվածի 2-րդ մասի հիմքով` նշանակված պատիժները լրիվ կամ մասնակիորեն գումարելու միջոցով վերջնական պատիժ նշանակվել` դատապարտելով ազատազրկման 1 /մեկ/ տարի ժամկետով։
Նշանակված պատժի ժամկետի մեջ ՀՀ քրեական օրենսգրքի 69-րդ հոդվածի 3-րդ մասի հիմքով հաշվակցել Նուբարաշենի հոգեբուժական հիվանդանոցում ստացիոնար հետազոտության մեջ գտնվելու 22 օր ժամկետը և վերջնական պատիժ նշանակել ազատազրկում 11 /տասնմեկ/ ամիս 2 /երկու/ օր ժամկետով, որը պետք է կրի ՀՀ ԱՆ ՔԿՎ համապատասխան ՔԿ հիմնարկում, պատժի կրման ժամկետը հաշվելով 2011թ. դեկտեմբերի 05-ից։
ՀՀ քրեական օրենսգրքի 97 և 102-րդ հոդվածների, ՀՀ քրեակատարողական օրենսգրքի 123-124, 126-րդ հոդվածների կարգով պատիժ կիրառելու հետ մեկտեղ նշանակել պատժի կատարման հետ միացված բժշկական բնույթի հարկադրանքի միջոցներ խրոնիկ ալկոհոլամոլության դեմ, որը պետք է իրականացվի պատիժը կրելու ընթացքում և որի ժամկետը պետք է հաշվակցվի պատժի ժամկետին։
Ամբաստանյալ Շահեն Հովհաննեսի Մուրադյանի նկատմամբ որպես խափանման միջոց կիրառված չհեռանալու մասին ստորագրությունը փոխել, նրա նկատմամբ որպես խափանման միջոց կիրառել կալանավորումը և Շահեն Հովհաննեսի Մուրադյանին կալանավորել դատական նիստերի դահլիճում։
Գործով իրեղեն ապացույց ճանաչված տնտեսական նշանակության դանակը դատավճիռն օրինական ուժի մեջ մտնելուց հետո՝ ոչնչացնել։
Դատավարության մասնակիցների կողմից դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում։

ԴԱՏԱՎՈՐ Վ. Թ. ԳՐԻԳՈՐՅԱՆ