Գործ թիվ ԵԷԴ/0143/01/11
2011թ.

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղարությամբ Արմինե Արղամանյան
Արմինե Կարապետյան
Մասնակցությամբ`
Մեղադրող Վահագն Ավագյան
Ամբաստանյալ Անդրանիկ Պետրոսյան

2011 թվականի նոյեմբերի 15-ին Երևանի Էրեբունի և Նուբարաշեն վարչական շրջանների ընդհանուր իրավասության դատարանում, դռնբաց դատական նիստում քննեց քրեական գործն ըստ մեղադրանքի՝
Անդրանիկ Գրիգորի Պետրոսյանի ծնված 28.08.1982թ. Երևան քաղաքում, ազգությունը հայ, Հայաստանի Հանրապետության քաղաքացի, բարձրագույն կրթությամբ, ամուսնացած, խնամքին մեկ երեխա ծնված 08.11.2007թ., նախկինում չդատված, ՀՀ ՊՆ 68617 զորամասի 1-ին հրաձգային գումարտակի 3-րդ վաշտի 1-ին դասակի հրամանատար, զինվորական կոչումը` ավագ լեյտենանտ, բնակվում է Երևան, Հաղթանակ թաղամաս 7-րդ փողոց 2-րդ նրբանցք 2 տանը, մեղադրվում է ՀՀ քրեական օրենսգրքի 361-րդ հոդվածի 3-րդ մասով, խափանման միջոցը` ստորագրություն չհեռանալու մասին, առաջադրված մեղադրանքում իրեն լիովին մեղավոր է ճանաչել։

1. Գործի դատավարական նախապատմությունը։
Ամբաստանյալ Անդրանիկ Գրիգորի Պետրոսյանը 2003թ. ավարտել է Վ. Սարգսյանի անվան Ռազմական ինստիտուտը։ ՀՀ Գլխավոր շտաբի պետի 08.02.2010թ. թիվ 195 ա/վ հրամանով նշանակվել է ՀՀ ՊՆ 68617 զորամասի 1-ին հրաձգային գումարտակի 3-րդ հրաձգային վաշտի 1-ին հրաձգային դասակի հրամանատար, ունի զինվորական ավագ լեյտենանտի կոչում։
Իր ծառայողական և կանոնադրական պարտականությունները կատարել է անբարեխղճորեն, այն է` որպես զորամասի սպա 2011 թվականի օգոստոսի 27-ի ժամը 0815-ից մինչև սեպտեմբերի 03-ը ժամը 1130-ը, սեպտեմբերի 05-ի ժամը 0830-ից մինչև սեպտեմբերի 07-ը ժամը 1800-ն և սեպտեմբերի 08-ի ժամը 0900-ից մինչև սեպտեմբերի 09-ը ժամը 2130-ը և սեպտեմբերի 29-ի ժամը 0815-ից մինչև հոկտեմբերի 01-ը ժամը 1720-ը այն է` երեք օրից ավելի, բայց մեկ ամսից ոչ ավելի տևողությամբ, երեք ամսվա ընթացքում երեք և ավելի անգամ մինչև երեք օր տևողությամբ առանց հարգելի պատճառների ծառայության վայր չի ներկայացել։
Փաստի առթիվ 13.09.2011թ. Երևանի Կայազորի զինվորական դատախազության կողմից ՀՀ քրեական օրենսգրքի 361-րդ հոդվածի 3-րդ մասով հարուցվել է 90205111 քրեական գործը։
15.09.2011թ. քրեական գործն ընդունվել է ՀՀ ՊՆ քննչական ծառայության 4-րդ կայազորային քննչական բաժնի վարույթ։
01.10.2011թ. ժամը 1800-ին Անդրանիկ Պետրոսյանը կամովին ներկայացել է քննչական բաժին։
Նույն օրը` 01.10.2011թ. որոշում է կայացվել Անդրանիկ Գրիգորի Պետրոսյանին ՀՀ քրեական օրենսգրքի 361-րդ հոդվածի 3-րդ մասով որպես մեղադրյալ ներգրավելու մասին, խափանման միջոց է կիրառվել ստորագրություն չհեռանալու մասին։
Մեղադրական եզրակացությունը հաստատվել է 12.10.2011թ.։
Քրեական գործը մեղադրական եզրակացությամբ 13.10.2011թ. ստացվել է Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանում։

2. Դատաքննությամբ հետազոտված ապացույցները։
Դատաքննությամբ հետազոտվել են այն բոլոր ապացույցները, որոնք նշված են մեղադրական եզրակացության մեջ։
Ամբաստանյալ Անդրանիկ Պետրոսյանը ՀՀ քրեական օրենսգրքի 361-րդ հոդվածի 3-րդ մասով առաջադրված մեղադրանքում իրեն լիովին մեղավոր է ճանաչել և ցուցմունք է տվել այն մասին, որ իրոք, 2011թվականի օգոստոսի 27-ից մինչև սեպտեմբերի 3-ը, սեպտեմբերի 5-ից մինչև նույն ամսվա 7-ը, սեպտեմբերի 8-ից մինչև նույն ամսվա 9-ը, այնուհետև սեպտեմբերի 29-ից մինչև հոկտեմբերի 1-ն ինքնակամ, առանց համապատասխան թույլտվության և առանց հարգելի պատճառների երեք օրից ավելի, բայց մեկ ամսից ոչ ավելի տևողությամբ, ինչպես նաև` երեք ամսվա ընթացքում երեք և ավելի անգամ մինչև երեք օր տևողությամբ թողել է զորամասը կամ ծառայության չի ներկայացել, քանի որ ունեցել է ընտանեկան խնդիրներ` կինը հեռացել է տանից ու գնացել իր ծնողների տուն, ինքը ցանկացել է վերամիավորել իր ընտանիքը, այդ պատճառով չի կարողացել ներկայանալ ծառայության վայր, իր բացակայությունների համար ղեկավարությունից թույլտվություն չի ունեցել, զղջում է իր կատարածի համար, ինքը զորամասում ծառայություն իրականացնելու հարցում խնդիրներ չի ունեցել, որևէ մեկի հետ ոչ կանոնադրական հարաբերությունների մեջ չի գտնվում, որպիսիք խոչընդոտեին իր կողմից իր ծառյողական պարտականությունների կատարմանը։

հատոր 1 Գ.Թ. 46-47
դատաքննության արձանագրություն

Գործով վկա, ՀՀ ՊՆ 68617 զորամասի հրամանատարի սոցիալ-իրավական գծով ավագ օգնական ավագ լեյտենանտ Արսեն Քաղքցյանը ցուցմունք է տվել այն մասին, որ ավագ լեյտենանտ Անդրանիկ Պետրոսյանը 2011 թվականի օգոստոսի 27-ից մինչև սեպտեմբերի 3-ը, այնուհետև` սեպտեմբերի 5-ից մինչև նույն ամսվա 7-ը, սեպտեմբերի 8-ից մինչև նույն ամսվա 9-ը, ինչպես նաև` սեպտեմբերի 29-ից մինչև հոկտեմբերի 1-ն ընկած ժամանակահատվածներում առանց հարգելի պատճառների ծառայության վայր չի ներկայացել։ Ինքը զրուցել է Անդրանիկ Պետրոսյանի հետ, վերջինս հայտնել է, որ զորամասը լքելու կամ զորամաս չներկայանալու պատճառներն անձնական են, պայմանավորված են ընտանեկան հանգամանքներով և կնոջ հետ ունեցած տարաձայնություններով, որոնց մանրամասնություններից ինքը տեղյակ չէ։
հատոր 1 Գ.Թ. 34-35

Գործով վկա ՀՀ ՊՆ թիվ 68617 զորամասի զինծառայող, ավագ լեյտենանտ Դավիթ Ղաբուզյանը ցուցմունք է տվել այն մասին, որ Անդրանիկ Պետրոսյանը պարբերաբար առանց թույլտվության լքել է ծառայության վայրը կամ ծառայության չի ներկայացել։ Այդ կապակցությամբ նա հայտնել է իրեն, որ պատճառները խիստ անձնական են, պայմանավորված են ընտանեկան բնույթի խնդիրներով։

հատոր 1 Գ.Թ. 35
դատաքննության արձանագրություն

Գործով վկա Օֆելյա Խաչատրյանը ցուցմունք է տվել նախաքննության ընթացքում այն մասին, որ Անդրանիկ Պետրոսյանն իր ամուսինն է, համատեղ ամուսնական կյանքում ունեցել են մեկ երեխա, 2011թ. սեպտեմբերին իրենց ընտանիքում անձնական բնույթի խնդիրներ են ծագել, ինքը գնացել է Աշտարակ` ծնողների մոտ, ամուսինը պարբերաբար եկել է Աշտարակ` ուղիներ փնտրելով իր հետ անձնական հարաբերությունները հարթելու համար։ Հետո ամուսնուց լսել է, որ այդ օրերին նա պարբերաբար ծառայության չի ներկայացել։

հատոր 1 Գ.Թ. 61

Քննիչի որոշմամբ ՀՀ քրեական դատավարության օրենսգրքի 122-րդ հոդվածի հիմքով ապացույց ճանաչված` զեկուցագրերով, տեղեկանքներով և մյուս փաստաթղթերով այն մասին, որ ամբաստանյալ Անդրանիկ Պետրոսյանը լքել է ծառայության վայրը կամ չի ներկայացել ծառայության և հետագայում հայտնաբերվել կամ բերման է ենթարկվել։

հատոր 1 Գ.Թ. 60, 5-10, 15-19,
21-22, 25-29, 36-38

ՀՀ ՊՆ թիվ 68617 զորամասի հրամանատարի 22.02.2010թ. թիվ 36 հրամանի քաղվածքի համաձայն` ՀՀ Զինված ուժերի Գլխավոր շտաբի պետի 08.02.2010թ. թիվ 195 ա/վ հրամանով ավագ լեյտենանտ Անդրանիկ Գրիգորի Պետրոսյանը նշանակվել է ՀՀ ՊՆ թիվ 68617 զորամասի 1-ին հրաձգային գումարտակի 3-րդ հրաձգային վաշտի 1-ին հրաձգային դասակի հրամանատար։

հատոր 1 Գ.Թ. 13

Ծառայողական բնութագրով և ծառայողական քարտի տվյալներով ավագ լեյտենանտ Անդրանիկ Պետրոսյանը բնութագրվել է բացասական, այն է` զորամասում ծառայության ընթացքում պարբերաբար խախտել է զինվորական կարգապահությունը, ինքնակամ լքել է ծառայության վայրը, հաճախակի գտնվել է անսթափ վիճակում, բազմիցս ենթարկվել է կարգապահական տույժերի։

հատոր 1 Գ.Թ. 14,55-59

ՀՀ ՊՆ թիվ 68617 զորամասի հրամանատարի տեղեկանքով պարզվել է, որ առանց հարգելի պատճառների զորամասն ինքնագլուխ թողնելու կամ ծառայության վայր չներկայնալու համար սպա Անդրանիկ Պետրոսյանը զորամասի հրամանատարի կողմից ենթարկվել է կարգապահական տույժի` երեք օր մեկուսացումով 2011 թվականի սեպտեմբերի 10-ից մինչև 13-ն ընկած ժամանակահատվածում, որը կրել է ՀՀ ՊՆ ռազմական ոստիկանության Երևանի կայազորի կարգապահական մեկուսարանում։

3. Դատարանի իրավական վերլուծությունը։
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Անդրանիկ Գրիգորի Պետրոսյանի մեղքը ՀՀ քրեական օրենսգրքի 361-րդ հոդվածի 3-րդ մասով նախատեսված հանցանքը կատարելու մեջ հիմնավորված է և նշված հոդվածի սանկցիայով նրա նկատմամբ պետք է քրեական պատիժ կիրառվի։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալի անձնավորությունը ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության հարցը։
Դատարանը գտնում է, որ գործով ամբաստանյալ Անդրանիկ Գրիգորի Պետրոսյանի նկատմամբ պատասխանատվությունը և պատիժը ծանրացնող հանգամանքներ առկա չեն։
Որպես մեղմացուցիչ հանգամանքներ դատարանը հաշվի է առնում ամբաստանյալի անկեղծորեն զղջալը, այն, որ ամբաստանյալը նախկինում դատված չի եղել, խնամքին ունի մինչև 14 տարեկան 1 անչափահաս երեխա` ծնված 08.11.2007թ.։
Դատարանը հաշվի է առնում այն հանգամանքը, որ թիվ 68617 զորամասի հրամանատարության կողմից սպա Անդրանիկ Պետրոսյանը բնութագրվել է բացասական, այն է` իրեն դրսևորել է որպես անկարգապահ զինծառայող, ով պարբերաբար թույլ է տվել մի շարք կարգապահական խախտումներ, հակում է դրսևորել ալկոհոլի նկատմամբ, բազմիցս ենթարկվել է կարգապահական տույժերի, նրա անձնական վարքագիծը իր ենթակա ժամկետային զինծառայողների նկատմամբ ունեցել է հակադաստիարակչական բնույթ։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալ Անդրանիկ Պետրոսյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է անձին ուղղելու և նրա կողմից նոր հանցանք կատարելը կանխելու համար։
Դատարանը հաշվի է առնում այն հանգամանքը, որ զորամասն ինքնագլուխ թողնելու համար ՀՀ ՊՆ թիվ 68617 զորամասի հրամանատարի հրամանով սպա, ավագ լեյտենանտ Անդրանիկ Պետրոսյանի նկատմամբ որպես կարգապահական տույժ կիրառվել է կալանք 3 օր ժամկետով, որը նա կրել է 2011թ. սեպտեմբերի 10-ից 13-ն ընկած ժամանակահատվածում ՀՀ ՊՆ ռազմական ոստիկանության Երևանի կայազորի կարգապահական մեկուսարանում։
ՀՀ քրեական օրենսգրքի 10-րդ հոդվածի 2-րդ մասի և 69-րդ հոդվածի 3-րդ մասի հիմքով դատարանը գտնում է, որ միևնույն արաքի համար նշված 3 օր անազատության մեջ կարգապահական մեկուսարանում պահելու ժամկետը պետք է հաշվակցվի նշանակված պատժի ժամկետի մեջ։
Նույնպիսի պահանջ է դրվել ՀՀ վճռաբեկ դատարանի 12.02.2010թ. ՏԴ/0100/01/09 նախադեպային որոշմամբ Գագիկ Մելքոնյանի վերաբերյալ քրեական գործով։
Գնահատելով վերոշարադրյալը, քրեական գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր եզրակացության, որ ամբաստանյալ Անդրանիկ Գրիգորի Պետրոսյանի նկատմամբ որպես պատիժ պետք է կիրառվի ազատազրկում որոշակի ժամկետով, որը նա պետք է կրի ՀՀ ԱՆ ՔԿՎ համապատասխան ՔԿ հիմնարկում։
Դատարանը գտնում է, որ ինչև դատավճիռն օրինական ուժի մեջ մտնելը ամբաստանյալ Անդրանիկ Գրիգորի Պետրոսյանի նկատմամբ որպես խափանման միջոց ընտրված չհեռանալու մասին ստորագրությունն անհրաժեշտ է թողնել անփոփոխ։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 369-372, 376, 3761, 379-րդ, ՀՀ դատական օրենսգրքի 20-րդ հոդվածների պահանջներով, դատարանը.

Վ Ճ Ռ Ե Ց

Ամբաստանյալ Անդրանիկ Գրիգորի Պետրոսյանին մեղավոր ճանաչել ՀՀ քրեական օրենսգրքի 361-րդ հոդվածի 3-րդ մասով նախատեսված հանցանքի կատարման մեջ և նրա նկատմամբ քրեական պատիժ կիրառել` դատապարտելով ազատազրկման 4 /չորս/ ամիս ժամկետով, ՀՀ քրեական օրենսգրքի 69-րդ հոդվածի հիմքով նշանակված պատժի մեջ հաշվակցել նույն արարքի համար ՀՀ ՊՆ թիվ 68617 զորամասի հրամանատարի հրամանով նշանակված և փաստացի կրած 3 օր կալանքի ժամկետը և ամբաստանյալ Անդրանիկ Գրիգորի Պետրոսյանի նկատմամբ վերջնական պատիժ նշանակել ազատազրկում 3 /երեք/ ամիս 27 /քսանյոթ/ օր ժամկետով, որը նա պետք է կրի ՀՀ ԱՆ ՔԿՎ համապատասխան ՔԿ հիմնարկում։
Մինչև դատավճռի օրինական ուժի մեջ մտնելը ամբաստանյալ Անդրանիկ Գրիգորի Պետրոսյանի նկատմամբ որպես խափանման միջոց կիրառված չհեռանալու մասին ստորագրությունը թողնել անփոփոխ։
Դատավարության մասնակիցների կողմից դատավճիռը կարող է բողոքարկվել ՀՀ քրեական վերաքննիչ դատարան` հրապարակման պահից մեկ ամսվա ընթացքում։

ԴԱՏԱՎՈՐ Վ. Թ. ԳՐԻԳՈՐՅԱՆ