Գործ թիվ ԵԷԴ/0141/01/11
2012թ.


Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

Նախագահող դատավոր Վլադիմիր Գրիգորյան
Քարտուղար Արմինե Կարապետյան
Մասնակցությամբ`
Մեղադրող Հայկ Մովսեսյան
Ամբաստանյալներ Արամ Մարկոսյան
Առաքել Մարտիկյան
Ամբաստանյալների պաշտպաններ Հրանտ Գևորգյան Ինեսա Պետրոսյան

2012թվականի փետրվարի 08-ին դատարանում.
Դռնբաց դատական նիստում քննեց քրեական գործն ըստ մեղադրանքի՝
1.Արամ Պուշկինի Մարկոսյանի - ծնված 24.07.1967թ., ք. Երևան, ազգությունը հայ, Հայաստանի Հանրապետության քաղաքացի, ութամյա կրթությամբ, ամուսնացած, չի աշխատել, 2-րդ խմբի հաշմանդամ, չդատված, բն. Երևան, Նոր Արեշ 3-րդ փողոց, տուն 10, ձերբակալվել է 16.04.2011թ., խափանման միջոցը կալանավորում է կիրառվել 19.04.2011թ., ՀՀ ԱՆ ,,Նուբարաշեն,, Քկ հիմնարկի կալանավոր, մեղադրվում է ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով, առաջադրված մեղադրանքում իրեն մեղավոր չի ճանաչել։

2.Առաքել Արմենակի Մարտիկյանի - ծնված 09.04.1957թ., ք.Երևան, ազգությունը հայ, Հայաստանի Հանրապետության քաղաքացի, միջնակարգ կրթությամբ, ամուսնացած, խնամքին մինչև 14 տարեկան 2 երեխա` ծնված 15.04.2001թ. և 12.07.2002թ., չի աշխատել, դատված՝
1. Երևանի Օրջոնիկիձեի շրջանի ժողդատարանի 16.06.1977թ. դատավճռով ՀՀ քրեական օրենսգրքի 143-րդ հոդվածի 2-րդ մասով դատապարտվել է ազատազրկման 2 տարի ժամկետով,
2. Աբովյանի ժողդատարանի 22.10.1980թ. դատավճռով ՀՀ քրեական օրենսգրքի 146-րդ հոդվածի 2-րդ մասով դատապարտվել է ազատազրկման 10 տարի ժամկետով, ՀՀ քրեական օրենսգրքի 38-39-րդ հոդվածների կիրառմամբ վերջնական պատիժ է նշանակվել ազատազրկում 10 տարի 3 ամիս ժամկետով, դատվածությունը մարված, որպես խափանման միջոց կիրառվել է կալանավորումը, դատարանի 20.05.2011թ. որոշմամբ, հայտարարվել է հետախուզում։ Հայտնաբերվել և բերման է ենթարկվել 30.05.2011թ., ՀՀ ԱՆ ,,Նուբարաշեն,, քկ հիմնարկի կալանավոր, մեղադրվում է ՀՀ քր. օր-ի 266-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով, առաջադրված մեղադրանքում իրեն մեղավոր է ճանաչել մասնակիորեն։
1. Գործի դատավարական նախապատմությունը.
2011թ. ապրիլի 15-ին ՀՀ ոստիկանության Էրեբունու բաժին բերման ենթարկված Վահան Էդուարդի Շաբոյանի անձնական խուզարկությամբ հայտնաբերվել և առգրավվել է 0,62 գրամ քաշով խոշոր չափի «ափիոն» տեսակի թմրամիջոց և մեկանգամյա օգտագործման ներարկիչ` լիցքավորված 0,8 մլ ծավալով պրեկուրսոր հանդիսացող քացախաթթվի անհիդրիդով։
Նույն օրը ՀՀ ոստիկանության Էրեբունու բաժին բերման է ենթարկվել Արամ Պուշկինի Մարկոսյանը, որի անձնական խուզարկությամբ հայտնաբերվել և առգրավվել են երկու հատ 10.000 ՀՀ թղթադրամներ։ Արամ Մարկոսյանը հայտարարել է, որ նշված գումարը նույն օրը` 15.04.2011թ. ժամը 16-ի սահմաններում իրեն է տվել Երևանի Էրեբունի փողոցի 28 շենքի բնակիչ Վահան Շաբոյանը, որի դիմաց ինքը նրան է հանձնել «ափիոն» տեսակի թմրամիջոց և քացախաթթվի անհիդրիդ։
Փաստի առթիվ ՀՀ ոստիկանության ՔԳՎ Էրեբունու քննչական բաժնի կողմից 16.04.2011թ. ՀՀ քրեական օրենսգրքի 266-րդ հոդվածի 2-րդ մասի 2-րդ կետով, 266-րդ հոդվածի 4-րդ մասով և 268-րդ հոդվածի 2-րդ մասի 2-րդ կետով հարուցվել է 12112611 քրեական գործը և նախաքննություն է կատարվել։
16.04.2011թ. ժամը 1610-ին Արամ Պուշկինի Մարկոսյանը ձերբակալվել է։
16.04.2011թ. ժամը 1730-ին Վահան Էդուարդի Շաբոյանը ձերբակալվել է։
19.04.2011թ. որոշում է կայացվել Արամ Պուշկինի Մարկոսյանին ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով որպես մեղադրյալ ներգրավելու մասին։
Արամ Պուշկինի Մարկոսյանը մեղադրվել է այն բանի համար, որ նա 2011թ. ապրիլի 15-ին ժամը 1430-ի սահմաններում Երևանի Նոր Արեշ 3-րդ փողոցի 3-րդ տան մոտ իրացնելու նպատակով Առաքել Արմենակի Մարտիկյանից ապօրինի ձեռք է բերել խոշոր չափի` 0,62 գրամ քաշով «ափիոն» տեսակի թմրամիջոց և պրեկուրսոր հանդիսացող 0,8 մլ ծավալի քացախաթթվի անհիդրիդ, որը նույն օրը ժամը 1500-ի սահմաններում Նոր Արեշի 3-րդ փողոցի 10 տան դիմաց 20.000 ՀՀ դրամով իրացրել է Վահան Էդուարդի Շաբոյանին։
19.04.2011թ. Արամ Պուշկինի Մարկոսյանի նկատմամբ որպես խափանման միջոց կիրառվել է կալանավորումը։
19.04.2011թ. որոշում է կայացվել Վահան Էդուարդի Շաբոյանին ՀՀ քրեական օրենսգրքի 268-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով որպես մեղադրյալ ներգրավելու մասին։
Վահան Էդուարդի Շաբոյանը մեղադրվել է այն բանի համար, որ նա առանց իրացնելու նպատակի 2011թ. ապրիլի 15-ին ժամը 1500-ի սահմաններում Նոր Արեշի 3-րդ փողոցի 10-րդ տան դիմաց Արամ Պուշկինի Մարկոսյանից 20.000 ՀՀ դրամով գնելու եղանակով ապօրինի ձեռք է բերել խոշոր չափի` 0.62 գրամ քաշով «ափիոն» տեսակի թմրամիջոց և պրեկուրսոր հանդիսացող 0,8 մլ ծավալի քացախաթթվի անհիդրիդ, որոնք նույն օրը Վ. Շաբոյանի անձնական խուզարկությամբ հայտնաբերվել են ՀՀ ոստիկանության Էրեբունու բաժնի աշխատակիցների կողմից։
19.04.2011թ. Վահան Էդուարդի Շաբոյանի նկատմամբ որպես խափանման միջոց կիրառվել է կալանավորումը։
20.05.2011թ. որոշում է կայացվել Առաքել Արմենակի Մարտիկյանին ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով որպես մեղադրյալ ներգրավելու մասին։
Առաքել Արմենակի Մարտիկյանը մեղադրվել է այն բանի համար, որ նա չպարզված անձից և հանգամանքներում, իրացնելու նպատակով ապօրինի ձեռք է բերել և իր մոտ պահել խոշոր չափերի հասնող «ափիոն» տեսակի թմրամիջոց և պրեկուրսոր հանդիսացող քացախաթթվի անհիդրիդ։ Վահան Էդուարդի Շաբոյանին իրացնելու նպատակով, նախնական համաձայնության գալով վերջինիս և Արամ Պուշկինի Մարկոսյանի հետ, 2011թ. ապրիլի 15-ին ժամը 1400-ի սահմաններում Երևանի Նոր Արեշ 3-րդ փողոցի 3-րդ տան մոտ Ա. Մարկոսյանին է հանձնել խոշոր չափի` 0,62 գրամ քաշով «ափիոն» տեսակի թմրամիջոց և պրեկուրսոր հանդիսացող 0,8 մլ ծավալի քացախաթթվի անհիդրիդ` այն 20.000 ՀՀ դրամ գումարով Վ. Շաբոյանին փոխանցելու համար։
20.05.2011թ. Առաքել Արմենակի Մարտիկյանի նկատմամբ հայտարարվել է հետախուզում։
20.05.2011թ. Առաքել Արմենակի Մարտիկյանի նկատմամբ որպես խափանման միջոց կիրառվել է կալանավորումը։
30.05.2011թ. Առաքել Արմենակի Մարտիկյանը հայտնաբերվել և կալանավորվել է։
Նույն օրը Երևանի Էրեբունի և Նուբարաշեն վարչական շրջանների ընդհանուր իրավասության դատարանի որոշմամբ վերահաստատվել է Առաքել Արմենակի Մարտիկյանի նկատմամբ որպես խափանման միջոց կալանավորման կիրառումը։
Դատախազի 08.06.2011թ. որոշմամբ վերացվել է Վահան Էդուարդի Շաբոյանի նկատմամբ որպես խափանման միջոց կիրառված կալանավորումը, իսկ քննիչի 13.06.2011թ. որոշմամբ թիվ 12112611 քրեական գործը Վահան Էդուարդի Շաբոյանի նկատմամբ կարճվել և քրեական հետապնդումը դադարեցվել է` հիմք ընդունելով ՀՀ ԱԺ կողմից 26.05.2011թ. ընդունված «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշման 6-րդ կետի 2-րդ ենթակետը։
08.08.2011թ. որոշում է կայացվել 12112611 քրեական գործի նյութերով ՀՀ քրեական օրենսգրքի 215-րդ հոդվածի 1-ին մասով 12127111 քրեական գործ հարուցելու և այն առանձին վարույթում առանձնացնելու մասին` Դավիթ Նարեկի Ստեփանյանի կողմից մաքսանենգ ճանապարհով «դիազեպամ» տեսակի հոգեմետ դեղահաբեր ներկրելու փաստի առթիվ։
04.10.2011թ. որոշում է կայացվել 12112611 քրեական գործից առանձնացնել նյութեր և դրանով ՀՀ քրեական օրենսգրքի 266-րդ հոդվածի հատկանիշներով հարուցել 12136511 քրեական գործը` ինքնությունը չպարզված անձի կողմից Առաքել Մարտիկյանին թմրամիջոցն ապօրինի իրացնելու փաստի առթիվ։
Մեղադրական եզրակացությունը հաստատվել է 07.10.2011թ.։
Քրեական գործը 07.10.2011թ. մուտք է եղել Երևանի Էրեբունի և Նուբարաշեն վարչական շրջանների ընդհանուր իրավասության դատարան։

2. Դատաքննությամբ հետազոտված ապացույցները.
Դատաքննությամբ հետազոտվել են այն բոլոր ապացույցները, որոնք նախաքննական մարմինը շարադրել է մեղադրական եզրակացության մեջ։
ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով առաջադրված մեղադրանքում ամբաստանյալ Առաքել Արմենակի Մարտիկյանն իրեն մեղավոր է ճանաչել մասնակիորեն` այն բանի համար, որ 0,62 գրամ «ափիոն» տեսակի թմրամիջոցն ու պրեկուրսոր հանդիսացող քացախաթթվի անհիդրիդը ինքը տվել է ամբաստանյալ Արամ Մարկոսյանին` Վահան Շաբոյանին հանձնելու համար, սակայն ինքն Արամ Մարկոսյանին չի հայտնել, որ փաթեթի մեջ թմրամիջոց և պրեկուրսոր կա։

դատաքննության արձանագրություն

Ամբաստանյալ Առաքել Մարտիկյանը նախաքննության և դատաքննության ընթացքում տվել է իրարամերժ և հակասական ցուցմունքներ թմրամիջոցը և պրեկուրսորը ամբաստանյալ Արամ Մարկոսյանին հանձնելու և վկա Վահան Շաբոյանին իրացնելու վերաբերյալ։ Այսպես. նախաքննության ընթացքում առաջադրված մեղադրանքում իրեն մասնակիորեն մեղավոր ճանաչելով, նա ցուցմունք է տվել այն մասին, որ 15.04.2011թ. ժամը 14.00-ի սահմաններում ինքը գտնվել է տանը, եկել է հարևան Արամ Մարկոսյանը և իր անձնական օգտագործման համար «ափիոն» տեսակի թմրամիջոց խնդրել, ասելով, որ ոտքի շրջանում ցավեր ունի։ Ինքը նրան չի մերժել և մեկ «չեկ» «ափիոն» տեսակի թմրամիջոց և քացախաթթվի անհիդրիդ է տվել նրան անհատույց։
Վահան Շաբոյանն իրենից թմրամիջոց չի ուզել, նրան հանձնելու համար ինքը Արամ Մարկոսյանին թմրամիջոց չի տվել։

հատոր 2, Գ. Թ. 5-6, 187-190

Դատաքննության ընթացքում ամբաստանյալ Առաքել Մարկոսյանը ցուցմունք է տվել այն մասին, որ ինքը այժմ հանգուցյալՎարդանից թմրամիջոց է ձեռք բերել, քանի որ ցավեր ունի` արյան շրջանառության և անոթային սնուցման գծով։
Ինքը գիտի, որ Արամ Մարկոսյանն էլ է վատառողջ` վիրահատություն է տարել, ոսկրային ցավեր ունի, ցավազրկող դեղեր էր օգտագործում։ Արամ Մարկոսյանը 15.04.20111թ. եկել է իրենց տուն, գանգատվել է, որ ցավեր ունի։ Այդ օրն իր աղջկա ծնունդն էր, մարդիկ էին տուն գալու, այլապես ինքը թմրամիջոցը կպատրաստեր և կներարկեր Արամ Մարկոսյանին, ինչպես բազմիցս նախկինում վարվել է, այդ պատճառով նրան «ափիոն» տեսակի թմրամիջոց ու քացախաթթվի անհիդրիդ է տվել` տանն օգտագործելու համար, իր օգտագործման համար պահելով որոշակի չափաբաժին։ Որոշ ժամանակ անց իմանալով, որ Արամ Մարկոսյանին տարել են ոստիկանություն, իր ունեցած չափաբաժին թմրամիջոցը պատրաստել ու ներարկվել է, այնուհետև հեռացել է տանից։
Ինքը ճանաչել է Վահան Շաբոյանին որպես թմրամոլի, ով ազատվել է պատիժը կրելուց։ Վահան Շաբոյանն ու Արամ Մարկոսյանը նույնպես ճանաչել են միմյանց` որպես միևնույն թաղի բնակիչներ։ Ինքը Արամ Մարկոսյանին թմրամիջոց է տվել` նրա անձնական օգտագործման համար, նշված թմրամիջոցը նախատեսված չի եղել Վահան Շաբոյանին հանձնելու համար։

դատաքննության արձանագրություն

Այնուհետև փոխելով ցուցմունքը, ամբաստանյալ Առաքել Մարտիկյանը հայտնել է. «կներեք սուտ ասելու համար։ Ես թմրամիջոցն ու քացախաթթվի անհիդրիդը տվել են Արամին, որպեսզի հանձնի Վահան Շաբոյանին։ Արամ Մարկոսյանը չի իմացել, որ փաթեթում թմրամիջոց և քացախաթթվի անհիդրիդ կա»։

դատաքննության արձանագրություն

Ամբաստանյալ Արամ Մարկոսյանը ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով առաջադրված մեղադրանքում իրեն մեղավոր չի ճանաչել և դատաքննության ժամանակ ցուցմունք է տվել այն մասին, որ 15.04.2011թ. գնացել է ամբաստանյալ Առաքել Մարտիկյանի տուն, քանի որ ցավեր ուներ, իր օգտագործած դիքլոֆենակ տեսակի դեղորայքն այլևս չէր օգնում իրեն, ցանկանում էր Առաքելի տանը թմրամիջոց ներարկվել։ Սակայն Առաքելի աղջկա ծնունդն էր, այդ պատճառով Առաքելն իրեն թմրամիջոց և քացախաթթվի անհիդրիդ է տվել։ Գալով իր տուն, բաղնիքում այն պատրաստել ու ներարկվել է։ Միաժամանակ Առաքել Մարտիկյանն իրեն փաթեթ է տվել` ծխախոտի տուփ, որպեսզի տա Վահանին, չասելով, թե տուփն ինչ պարունակություն ունի, ինքը չի իմացել, որ տուփում թմրամիջոց կա։ Տուփը հանձնել է Վահանին, նրանից 20.000 ՀՀ դրամ չի վերցրել։ Իր անձնական խուզարկությամբ հայտնաբերված 20.000 ՀՀ դրամն իր անձնական գումարն էր, որը նախատեսված է եղել իրենց վնասված անձնական օգտագործման ավտոմեքենան վերանորոգելու ծախսերը հոգալու համար։ Երբ Վահանն իրեն հանդիպել է, ասել է` «ինձ բան պետք է տաս, տուր», ինքն էլ փաթեթը հանձնել է Վահանին։

Դատաքննության արձանագրություն

Նախաքննության ընթացքում Արամ Մարկոսյանը ցուցմունք է տվել այն մասին, որ ամբաստանյալ Առաքել Մարտիկյանն իրեն խնդրել է իրենց ընդհանուր ծանոթ Վահան Շաբոյանին փոխանցել «ափիոն» տեսակի թմրամիջոց և քացախաթթվի անհիդրիդ և դրա դիմաց նրանից վերցնել 20.000 ՀՀ դրամ գումար։ Ինքը չի մերժել Առաքել Մարտիկյանին, նրանից վերցրել է «ափիոն» տեսակի թմրամիջոցը և քացախաթթվի անհիդրիդը, դրանք նույն օրը ժամը 15.00-ի սահմաններում Երևանի Նոր-Արեշ3-րդ փողոցի 10-րդ տան դիմաց հանձնել է Վահան Շաբոյանին և նրանից ստացել է 20.000 ՀՀ դրամ գումար, որը հայտնաբերվել է իր անձնական խուզարկությամբ։

հատոր 1 Գ. Թ. 93

Գնահատելով ամբաստանյալներ Առաքել Մարտիկյանի և Արամ Մարկոսյանի նշված իրարամերժ ցուցմունքները, դատարանը գտնում է, որ վերոնշվածով ամբաստանյալները նպատակ են հետապնդում խուսափել իրենց կողմից կատարված ծանր հանցագործությունների համար օրենքով նախատեսված պատասխանատվությունից։
Ամբաստանյալներ Առաքել Մարտիկյանի և Արամ Մարկոսյանի կատարած հանցանքը դատարանը հիմնավորված է համարում դատաքննությամբ հետազոտված հետևյալ ապացույցներով.
Գործով որպես վկա հարցաքննված Վահան Շաբոյանը ցուցմունք է տվել և ամբաստանյալներ Առաքել Մարտիկյանին և Արամ Մարկոսյանին առերես պնդել է, որ ինքը թմրամոլ է, տևական ժամանակով թմրամիջոց է օգտագործել։ Գործով ամբաստանյալներ Առաքել Մարտիկյանին և Արամ Մարկոսյանին ճանաչում է վաղուց` որպես հարակից փողոցի բնակիչների։ Իմացել է, որ Առաքել Մարտիկյանը թմրամիջոց է վաճառում, իմացել է նրա բջջային հեռախոսի համարը։ Իր անձնական օգտագործման համար թմրամիջոց ձեռք բերելու նպատակով 15.04.2011թ. ժամը 1242-ին իր բջջային 077-12-96-73 հեռախոսահամարից զանգահարել է Առաքել Մարտիկյանի 094-48-74-19 հեռախոսահամարին, Առաքել Մարտիկյանից խնդրել է իրեն վաճառել մեկ «չեկ» չափի «ափիոն» տեսակի թմրամիջոց։ Ամբաստանյալ Առաքել Մարտիկյանը համաձայնվել է թմրամիջոց իրացնել։ Կարճ ժամանակ անց Առաքել Մարտիկյանն իրեն զանգահարել և հայտնել է, որ թմրամիջոցն ու քացախաթթվի անհիդրիդն արդեն փոխանցել է իրենց ընդհանուր ծանոթ` մյուս ամբաստանյալ Արամ Մարկոսյանին, որից կարող է դրանք գնել` վճարելով 20.000 ՀՀ դրամ գումարը։ Թմրամիջոցը գնելու նպատակով նույն օրը ժամը 1500-ի սահմաններում Երևանի Նոր Արեշ փողոց է գնացել իր ծանոթ Մարտին Կիրակոսյանի անձնական օգտագործման ԲՄՎ մակնիշի 03 ՍԼ 616 պետհամարանիշի ավտոմեքենայով` Մարտին Կիրակոսյանին չհայտնելով թմրամիջոց ձեռք բերելու իր մտադրության մասին։ Երևանի Նոր Արեշ 3-րդ փողոցին հարակից տարածք հասնելով` ինքն իջել է ավտոմեքենայից, ոտքով գնացել է Նոր Արեշի 3-րդ փողոցի 10-րդ տան դիմաց և հանդիպելով Արամ Մարկոսյանին, նրան վճարել է ընդամենը 20.000 ՀՀ դրամ գումար` 2 հատ 10.000-ական ՀՀ դրամ և նրանից ստացել է մեկ «չեկ» չափաբաժին «ափիոն» տեսակի թմրամիջոց ու 0,8 մլ ծավալի քացախաթթվի անհիդրիդ հանդիսացող պրեկուրսոր, գնացել և նստել է ավտոմեքենան, մի քանի հարյուր մետր հեռանալով, իրենց կանգնեցրել են ոստիկանության աշխատակիցները, իրեն բերման են ենթարկել ՀՀ ոստիկանության Էրեբունու բաժին, որտեղ անձնական խուզարկությամբ իր մոտից հայտնաբերել և առգրավվել են թմրամիջոցն ու պրեկուրսորը։

հատոր 1 Գ. Թ. 58-59, 78-79, 101, 168
հատոր 2 Գ. Թ. 46-47, 191-192

Գործով վկա Մարտին Կիրակոսյանը ցուցմունք է տվել այն մասին, որ 2011թ. ապրիլի 15-ին, օրվա 2-րդ կեսին իր ծանոթ Վահան Շաբոյանը հեռախոսով ինչ-որ մեկի հետ զրուցելուց հետո խնդրել է իրեն տանել Նոր-Արեշ թաղամաս։ Իր անձնական օգտագործման ԲՄՎ մակնիշի 03 ՍԼ 616 պետհամարանիշի ավտոմեքենայով գնացել են Նոր-Արեշ թաղամաս։ Ինքը չի իմացել, որ Վահան Շաբոյանը ցանկացել է թմրամիջոց ձեռք բերել։ Իջնելով ավտոմեքենայից, Վահան Շաբոյանը ոտքով ինչ-որ տեղ է գնացել և որոշ ժամանակ անցնելուց հետո վերադարձել, նստել է ավտոմեքենան, խնդրել է իրեն տանել Էրեբունի 28 շենքի մոտ։ Նշված վայրից շուրջ 300 մ հեռանալուց հետո իրենց անսպասելի կանգնեցել են ոստիկանության աշխատակիցները, իրենց բերման ենթարկել ոստիկանության Էրեբունու բաժին, ոտեղ իմացել է որ Վահան Շաբոյանի մոտ` նրա անձնական խուզարկությամբ, թմրամիջոց ու պրեկուրսոր է հայտնաբերվել և առգրավվել։ Մինչև ոստիկանների կողմից իրենց բերման ենթարկելը Վահան Շաբոյանն իրեն պահում էր շատ տարօրինակ և անծանոթի հետ հանդիպելուց և ավտոմեքենայի մոտ վերադառնալուց հետո ուշադիր ուսումնասիրում էր շրջապատը, իսկ ավտոմեքենայի մեջ նստած ժամանակ անընդհատ նայում էր դեպի ետ։

հատոր 1 Գ. Թ. 9-10, 61-62
դատաքննության արձանագրություն

Վահան Շաբոյանին անձնական խուզարկության ենթակելու մասին 15.04.2011թ. արձանագրությամբ այն մասին, որ ժամը 1725-ին նրա կապույտ ջինսե անդրավարտիքի աջ գրպանից հայտնաբերվել է «Նոկիա-1200» տեսակի բջջային հեռախոս 077-12-96-73 հեռախոսաքարտով, իսկ ձախ գրպանից` սպիտակ գույնի պոլիէթիլենից փաթեթում 0,8 գրամ ափիոնանման մուգ շագանակագույն զանգված և 2 մլ տարողության մեկանգամյա օգտագործման ներարկիչ` լիցքավորված 1,0 մլ ծավալի յուրահատուկ սուր հոտ ունեցող հեղուկով։ Նշվածը առգրավվել, փաթեթավորվել և կնքվել են։

հատոր 1, Գ. Թ. 4

Արամ Մարկոսյանին անձնական խուզարկության ենթարկելու մասին արձանագրությամբ այն մասին, որ 15.04.2011թ. ժամը 1745-ին Արամ Մարկոսյանի սպորտային անդրավարտիքի աջ գրպանից հայտնաբերվել է «Նոկիա-2700» տեսակի բջջային հեռախոս 091-50-27-29 հեռախոսային քարտով, իսկ ձախ գրպանից հայտնաբերվել են 2 հատ 10.000 ՀՀ դրամանոց կ-09148236 և կ-11476606 դրամանիշերով թղթադրամներ։ Արամ Մարկոսյանը հայտարարել է, որ նշված 20.000 ՀՀ դրամ գումարը նույն օրը` 15.04.2011թ. ժամը 1600-ի սահմաններում իրեն է տվել Վահան Շաբոյանը, նշված գումարի դիմաց ինքը Վահան Շաբոյանին է տվել «ափիոն» տեսակի թմրամիջոց և քացախաթթվի անհիդրիդ։ Հայտնաբերվածն առգրավվել, փաթեթավորվել և կնքվել է։

հատոր 1, Գ. Թ. 13


0,62 գրամ քաշով «ափիոն» տեսակի թմրամիջոցը, պրեկուրսոր հանդիսացող 0,8 մլ ծավալի քացախաթթվի անհիդրիդը և 10.000-ական ՀՀ դրամանոց կ-09148236 և կ-11476606 դրամանիշերով թղթադրամները ճանաչվել են իրեղեն ապացույց և կցվել են քրեական գործին։

հատոր 2, Գ. Թ. 250

Դատաքիմիական փորձաքննության 16.04.2011թ. թիվ 141 եզրակացությամբ այն մասին, որ փորձաքննությանը ներկայացված 0,62 գրամ հաստատուն քաշով նյութը հանդիսանում է «ափիոն» տեսակի թմրամիջոց, այն պատրաստված է տնայնագործական եղանակով։
Փորձաքննությանը ներկայացված մեկանգամյա օգտագործման ներարկիչի հատվածում առկա 0,8 մլ ծավալով հեղուկը հանդիսանում է քացախաթթվի անհիդրիդ` պրեկուրսոր։

հատոր 1 Գ. Թ. 34-36

Տոքսիկոքիմիական փորձաքննության թիվ 11-1027 եզրակացության համաձայն Վահան Շաբոյանից վերցված մեզի և մազի փորձանմուշներում հայտնաբերվել են ափիոնի խմբին պատկանող թմրամիջոցի թմրալկալոիդներ։

հատոր 1, Գ. Թ. 208-210

Տոքսիկոքիմիական փորձաքննության թիվ 11-1028 եզրակացության համաձայն ամբաստանյալ Արամ Մարկոսյանից վերցված մեզի և մազի փորձանմուշներում հայտնաբերվել են ափիոնի խմբին պատկանող թմրամիջոցի թմրալկալոիդներ։

հատոր 1, Գ. Թ. 211-213

Տոքսիկոքիմիական փորձաքննության թիվ 11-1479 եզրակացության համաձայն ամբաստանյալ Առաքել Մարտիկյանից վերցված մեզի և մազի փորձանմուշներում հայտնաբերվել են ափիոնի խմբին պատկանող թմրամիջոցի թմրալկալոիդներ։

հատոր 2, Գ. Թ. 33-35

Դատանարկոլոգիական փորձաքննության 25.05.2011թ. թիվ 0110-11 եզրակացության համաձայն` ամբաստանյալ Արամ Պուշկինի Մարկոսյանի մոտ թմրամիջոցների գործածումը կրում է էպիզոդիկ բնույթ, ուստի նա հարկադիր բուժման կարիք չունի։

հատոր 2, Գ. Թ. 75-76

Դատանարկոլոգիական փորձաքննության 25.05.2011թ. թիվ 0109-11 եզրակացության համաձայն` Վահան Էդուարդի Շաբոյանը տառապում է «ափիոնային թմրամոլություն» ախտորոշմամբ և ունի հարկադիր բուժման կարիք, որի համար հակացուցումներ չկան։

հատոր 2 Գ. Թ. 77-78


Դատանարկոլոգիական փորձաքննության 15.06.2011թ. թիվ 0130-11 եզրակացության համաձայն` ամբաստանյալ Առաքել Արմենակի Մարտիկյանը տառապում է «ափիոնային թմրամոլություն» ախտորոշմամբ, ունի հարկադիր բուժման կարիք, որի համար հակացուցումներ չկան։

հատոր 2, 169-170

ՀՀ քրեական դատավարության օրենսգրքի 122-րդ հոդվածի կարգով որպես ապացույցներ ճանաչված «Ղ-Տելեկոմ» և «ԱրմենՏել» ՓԲԸ ստացված վերծանումներով այն մասին, որ դեպքի օրը` 2011թ. ապրիլի 15-ին ամբաստանյալներ Արամ Մարկոսյանի 091-50-27-29, Առաքել Մարտիկյանի 094-48-74-79 և վկա Վահան Շաբոյանի 077-12-96-73 բջջային հեռախոսահամարների միջև փոխադարձ բազմաթիվ ելքային և մուտքային հեռախոսազանգեր են կատարվել, ընդ որում հեռախոսազանգերը փոխադարձ բնույթ են կրել Առաքել Մարտիկյանի և Վահան Շաբոյանի միջև, Առաքել Մարտիկյանի և Արամ Մարկոսյանի միջև, մինչդեռ Արամ Մարկոսյանի և Վահան Շաբոյանի միջև հեռախոսային կապ տեղի չի ունեցել։

հատոր 1, Գ. Թ. 216-238,
հատոր 2, Գ. Թ. 125-135

3. Դատարանի իրավական վերլուծությունը.
Դատաքննությամբ բազմակողմանի և օբյեկտիվ ստուգելով գործով ձեռք բերված ապացույցները, դրանք միմյանց հետ համադրելով և գնահատելով իրենց վերաբերելիության, թույլատրելիության և իրենց համակցությամբ` գործի լուծման համար բավարարության տեսանկյունից և հիմնված ներքին համոզմամբ, դատարանը գտնում է, որ ամբաստանյալ Առաքել Արմենակի Մարտիկյանի մեղքը ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով նախատեսված հանցանքները կատարելու մեջ հիմնավորված է և նշված հոդվածների սանկցիաներով նրա նկատմամբ պետք է քրեական պատիժ կիրառվի, իսկ ամբաստանյալ Արամ Պուշկինի Մարկոսյանին նախաքննական մարմնի կողմից մեղսագրված հանցանքների քրեաիրավական որակումը ենթակա է փոփոխման, այն է` Արա Պուշկինի Մարկոսյանի մեղքը հիմնավորված է ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով և 38-266-րդ հոդվածի 4-րդ մասով նախատեսված հանցանքների կատարման մեջ և նշված հոդվածների սանկցիայով նրա նկատմամբ պետք է քրեական պատիժ կիրառվի։
Դատարանի նշված եզրահանգումը պատճառաբանվում է հետևյալով.
ամբաստանյալներ Առաքել Մարտիկյանին և Արամ Մարկոսյանին առաջադրված մեղադրանքում առկա են էական հակասություններ թմրամիջոցի իրացման հետ առնչվող անձանց շրջանակի, ամբաստանյալներից յուրաքանչյուրի գործողությունների բնույթի և նրանցից յուրաքանչյուրի սուբյեկտիվ դիտավորության հարցերում։ Այսպես.
Առաքել Արմենակի Մարտիկյանին առաջադրված մեղադրանքի շարադրանքից բխում է, որ նա է գործով չպարզված անձից և հանգամանքներում, իրացնելու նպատակով, ապօրինի ձեռք բերել և իր մոտ պահել խոշոր չափերի «ափիոն» տեսակի թմրամիջոց և պրեկուրսոր հանդիսացող քացախաթթվի անհիդրիդ։ Փաստորեն Առաքել Մարտիկյանն է հանդիսացել թմրամիջոցի և պրեկուրսորի տիրապետողը և տնօրինողը։
Առաքել Մարտիկյանին որպես մեղադրյալ ներգրավելու որոշմամբ և մեղադրական եզրակացությամբ նշվել է, որ իրացման հարցում նախնական համաձայնություն է կայացվել Առաքել Մարտիկյանի, Վահան Շաբոյանի և Արամ Մարկոսյանի հետ, այդ նպատակով նա՝ Առաքել Մարտիկյանը, Արամ Մարկոսյանին հանձնել է խոշոր չափի` 0,62 գրամ քաշով «ափիոն» տեսակի թմրամիջոց և պրեկուրսոր հանդիսացող 0,8 մլ ծավալի քացախաթթվի անհիդիդ` այն 20.000 ՀՀ դրամ գումարով Վահան Շաբոյանին փոխանցելու համար։
Մինչդեռ Արամ Մարկոսյանին առաջադրված մեղադրանքի ծավալում նշված է, որ Արամ Մարկոսյանն իրացնելու նպատակով Առաքել Մարտիկյանից ձեռք է բերել խոշոր չափի` 0,62 գրամ քաշով «ափիոն» տեսակի թմրամիջոց և պրեկուրսոր հանդիսացող 0,8 մլ քացախաթթվի անհիդիդ, որը 20.000 ՀՀ դրամ գումարի դիմաց իրացրել է Վահան Շաբոյանին։
Մինչդեռ գործի նախաքննությամբ և դատաքննությամբ ձեռք բերված և հետազոտված ապացույցներով հիմնավորվել է, որ
1. թմրամիջոցն ու պրեկուրսորը գտնվել են ամբաստանյալ Առաքել Մարտիկյանի տնօրինության ու տիրապետման տակ,
2. Առաքել Մարտիկյանն է հեռախոսային խոսակցություններ վարել Վահան Շաբոյանի հետ և նրա հետ պայմանավորվածություն ձեռք բերելով՝ նրան խոստացել է իրացնել իր ունեցած թմրամիջոցն ու պրեկուրսորը, որի չափի և գնի շուրջ երկուսով եկել են փոխադարձ համաձայնության,
3. Առաքել Մարտիկյանն է Արամ Մարկոսյանին տվել թմրամիջոցն ու պրեկուրսորը` Վահան Շաբոյանին 20.000 ՀՀ դրամ գումարի դիմաց փոխանցելու համար,
4. Առաքել Մարտիկյանը Վահան Շաբոյանին հեռախոսով հայտնել է, որպեսզի նա գնա և Արամ Մարկոսյանից ստանա իր ուղարկած թմրամիջոցն ու պրեկուրսորը։ Մինչդեռ Արամ Մարկոսյանի և Վահան Շաբոյանի միջև հեռախոսային կապ տեղի չի ունեցել։
5. Առաքել Մարտիկյանը, նախկինում բազմիցս դատապարտված լինելով, զգուշություն դրսևորելով, իր անձնական կոնսպիրացիայի համար է Արամ Մարկոսյանին որպես միջնորդ օղակ օգտագործել, իսկ Արամ Մարկոսյանը հնազանդորեն կատարել է Առաքել Մարտիկյանի կամքը, քանի որ որոշակի կախվածություն է ունեցել նրանից` այն է` իր տանը հաճախակի Առաքել Մարտիկյանը ներարկման միջոցով անհատույց թմրամիջոց է հյուրասիրել Արամ Մարկոսյանին, վերջինիս դնելով իրենից հոգեբանական կախվածության մեջ։
6. Ի հակասություն մեղադրանքի շարադրանքի` Արամ Մարկոսյանի հետ նախնական հանցավոր համաձայնության գալու, այսինքն` խումբ կազմելու վերաբերյալ, Առաքել Մարտիկյանը նախաքննական մարմնի կողմից չի մեղադրվել նաև ՀՀ քրեական օրենսգրքի 266-րդ հոդվածի 2-րդ մասի 1-ին կետով,
7. Արամ Մարկոսյանին առաջադրված մեղադրանքում բացակայում է Առաքել Մարտիկյանի հետ նախնական հանցավոր համաձայնության գալու մասին նախաքննական մարմնի գնահատականը, որպիսին հակասում է Առաքել Մարտիկյանի մեղադրանքի շարադրանքին,
8. Վերոնշվածի պայմաններում միևնույն անձանց` և Արամ Մարկոսյանի, և Առաքել Մարտիկյանի արարքներն առանձին-առանձին միևնույն դեպքով շարադրվել և որակվել են որպես Վահան Շաբոյանին միևնույն թմրամիջոցի իրացման երկու տարբեր հանցանքներ, որպիսին ճիշտ չէ, քանի որ Արամ Մարկոսյանին առաջադրված մեղադրանքում նշված է, որ նա թմրամիջոցն ու պրեկուրսորը ձեռք է բերել իրացնելու նպատակով Առաքել Մարտիկյանից և իրացրել է Վահան Շաբոյանին, իսկ Առաքել Մարտիկյանին առաջադրված մեղադրանքում նշված է, որ Վահան Շաբոյանի հետ ունեցած նախնական համաձայնության պայմաններում` նրան թմրամիջոց իրացնելու հարցի շուրջ Առաքել Մարտիկյանը թմրամիջոցն ու պրեկուրսորը հանձնել է Արամ Մարկոսյանին` Վահան Շաբոյանին փոխանցելու համար, այսինքն՝ իրացնողը հանդիսացել է Առաքել Մարտիկյանը։
ՀՀ քրեական օրենսգրքի 37-րդ հոդվածով հանցակցություն է համարվում երկու և ավելի անձանց դիտավորյալ համատեղ մասնակցությունը դիտավորյալ հանցագործությանը։
ՀՀ քրեական օրենսգրքի 38-րդ հոդվածի համաձայն` կատարողի հետ մեկտեղ հանցակիցներ են համարվում կազմակերպիչը, դրդիչը և օժանդակողը։
Օժանդակող է համարվում այն անձը, ով հանցագործությանն օժանդակել է խորհուրդներով, տեղեկատվություն կամ միջոցներ, գործիքներ տրամադրելով կամ խոչընդոտները վերացնելով, ինչպես նաև այն անձը, ով նախապես խոստացել է պարտակել հանցագործին, հանցագործության միջոցները կամ գործիքները, հանցագործության հետքերը կամ հանցավոր ճանապարհով ձեռք բերված առարկաները, ինչպես նաև այն անձը, ով նախապես խոստացել է ձեռք բերել կամ իրացնել այդպիսի առարկաները։
Դատաքննությամբ հիմնավորվել է, որ թմրամիջոցի և պրեկուրսորի իրացման և դրանց ձեռքբերման պայմանների և գնի հարցով հանցավոր պայմանավորվածությունը կայացել է իրացնողի` Առաքել Մարտիկյանի և ձեռք բերողի` Վահան Շաբոյանի միջև։ Ամբաստանյալ Առաքել Մարտիկյանն իր` թմրամիջոց իրացնողի ինքնաբացահայտումը բացառելու կոնսպիրատիվ նպատակներով թմրամիջոցն ուղարկել է Արամ Մարկոսյանի միջոցով, օգտագործելով իրենից նրա կախվածությունը։ Վերջինս միայն թմրամիջոցն իրացնողի և գնորդի միջև նախնական պայմանավորվածության առկայության պայմաններում կապավորի դեր է կատարել, իմանալով, որ իրացնողից իր վերցրածը և պայմանավորված վայրում այն գնորդին հանձնածը թմրամիջոց և պրեկուրսոր է։ Ամբաստանյալ Արամ Մարկոսյանն, ըստ էության, գործելով թմրամիջոցն իրացնողի` Առաքել Մարտիկյանի շահերից և իր անձնական մասնակցությամբ` թմրամիջոցը վերցնելով, պայմանավորված վայր տանելով, գնորդին հանձնելով և իրացնողի և գնորդի միջև նախապես պայմանավորված գինը` 20.000 ՀՀ դրամը գնորդից վերցնելով, ըստ էության, վերացրել է իրացման խոչընդոտները, կատարելով Առաքել Մարտիկյանի պատվերը, դրանով իսկ՝ աջակցելով թմրամիջոցի իրացմանը, տվյալ դեպքում չունենալով տվյալ թմրամիջոցն ու պրեկուրսորն ունենալու և այն ինքնուրույն տնօրինելու իրավունք, ինչպես սխալմամբ նախաքննական մարմնի կողմից նշվել է նրան առաջադրված մեղադրանքում։
Նախաքննական մարմինը Վահան Շաբոյանի վերաբերյալ դատավարական բոլոր որոշումներով հաստատված է համարել Առաքել Մարտիկյանի հետ հանցավոր համաձայնությամբ Վահան Շաբոյանի կողմից թմրամիջոցի և պրեկուրսորի ձեռքբերումը` Արամ Մարկոսյանի միջոցով։
Հետևաբար, դատարանը գտնում է, որ Արամ Պուշկինի Մարկոսյանի մեղքը հիմնավորված է ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով և 38-266-րդ հոդվածի 4-րդ մասով նախատեսված հանցանքները կատարելու մեջ։
Վերոնշվածի կապակցությամբ առկա է նաև ՀՀ վճռաբեկ դատարանի 23.12.2010թ. թիվ ԵԷԴ/0125/01/09 նախադեպային որոշումը Անդրանիկ Ասլանյանի վերաբերյալ քրեական գործով, որտեղ նշված է, որ «Համակատարում չէ հանցագործությանն այնպիսի մասնակցությունը, երբ հանցակիցներից մեկը տվյալ հանցագործության օբյեկտիվ կողմը կազմող ոչ մի գործողություն չի կատարել, այլ միայն օժանդակել է հանցագործությանը, այսինքն` եղել է օժանդակող ՀՀ քրեական օենսգրքի 38-րդ հոդվածի 5-րդ մասի իմաստով։
Այսպիսով, օժանդակողը կատարողից տարբերվում է նրանով, որ նա հանցագործության օբյեկտիվ կողմն անմիջականորեն չի կատարում, այլ կամ հանցագործությունը նախապատրաստելու ընթացքում կամ դրա ավարտման փուլում աջակցություն է ցույց տալիս կատարողին` ստեղծելով հանցագործության ավարտման իրական հնարավորություններ»։
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում ՀՀ քրեական օրենսգրքի 62-րդ և 63-րդ հոդվածներով նախատեսված` պատասխանատվությունը և պատիժը մեղմացնող ու ծանրացնող հանգամանքները։ Դրանք բնութագրելով ամբաստանյալների անձնավորության ու կատարված հանցագործության հանրային վտանգավորության աստիճանը, հնարավորություն են տալիս անհատական մոտեցում ցուցաբերելով` որոշել նշանակվող պատժի տեսակն ու չափը և լուծել այն կրելու նպատակահարմարության աստիճանը։
Դատարանը գտնում է, որ ամբաստանյալ Արամ Պուշկինի Մարկոսյանի վերաբերյալ պատասխանատվությունը և պատիժը ծանրացնող հանգամանքներ առկա չեն, իսկ որպես մեղմացուցիչ հանգամանքներ են հանդիսանում նախկինում դատվածություն չունենալը, դրական բնութագրվելը, անկեղծորեն զղջալը, ինչպես նաև այն, որ նա 2-րդ խմբի հաշմանդամ է, նախկինում տարել է կոնք-ազդրային հոդի ծանր վիրահատություն և ներկայումս վատառողջ է։
Ամբաստանյալ Առաքել Արմենակի Մարտիկյանի վերաբերյալ պատասխանատվությունը և պատիժը ծանրացնող հանգամանքներ առկա չեն, իսկ որպես մեղմացուցիչ հանգամանքներ են հանդիսանում խնամքին մինչև 14 տարեկան` 15.04.2001թ. և 12.07.2002թ. ծնված 2 երեխա ունենալը, անկեղծորեն զղջալը։
Դատարանը հաշվի է առնում նաև այն հանգամանքը, որ ամբաստանյալ Առաքել Արմենակի Մարտիկյանը տառապում է «ափիոնային թմրամոլություն» ախտորոշմամբ, հարկադիր բուժման կարիք ունի, հակացուցումներ չկան։ Դատարանը գտնում է, որ ՀՀ քրեական օրենսգրքի 97-րդ և 102-րդ հոդվածների, ՀՀ քրեակատարողական օրենսգրքի 123-124, 126-րդ հոդվածների կարգով պատիժ կիրառելու հետ Առաքել Արմենակի Մարտիկյանի նկատմամբ պետք է կիրառվեն պատժի կատարման հետ միացված բժշկական բնույթի հարկադրանքի միջոցներ ափիոնային թմրամոլության դեմ, որը պետք է իրականացվի պատիժը կրելու ընթացքում և որի ժամկետը պետք է հաշվակցվի պատժի ժամկետին։
ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում քննարկելով հարցը, այն է` պատժի նպատակն է վերականգնել սոցիալական արդարությունը, ուղղել պատժի ենթարկված անձին և կանխել հանցագործությունները, դատարանը գտնում է, որ ամբաստանյալներ Առաքել Մարտիկյանի և Արամ Մարկոսյանի նկատմամբ անհրաժեշտ է նշանակել այնպիսի պատիժ, որը բխում է ՀՀ քրեական օրենսգրքի 10-րդ և 61-րդ հոդվածներից, այն է` արդարադատության արդյունավետության շահերից և պատասխանատվության անհատականացման սկզբունքից, որն անհրաժեշտ և բավարար է ամբաստանյալներից յուրաքանչյուրին ուղղելու և նրանց կողմից նոր հանցանք կատարելը կանխելու համար։
Գնահատելով վերոշարադրյալը և քրեական գործով անհատական մոտեցում ցուցաբերելով, պատժի տեսակը և չափը որոշելիս և այն կրելու նպատակահարմարության հարցը լուծելիս դատարանը հանգում է այն հիմնավոր հետևության, որ ամբաստանյալների նկատմամբ որպես պատիժ պետք է նշանակվի ազատազրկում որոշակի ժամկետով։ Պատիժը պետք է կրեն ՀՀ ԱՆ ՔԿՎ համապատասխան ՔԿ հիմնարկում։ Պատժի կրման սկիզբը պետք է հաշվել ամբաստանյալներին ձերբակալելու օրվանից։
Պատիժ նշանակելիս անհրաժեշտ է ղեկավարվել ՀՀ քրեական օրենսգրքի 66-րդ հոդվածի դրույթներով։
Դատարանը գտնում է, որ ամբաստանյալների նկատմամբ կիրառելի չէ ՀՀ ԱԺ կողմից 26.05.2011թ. ընդունված «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» որոշումը` նշված որոշման 9-րդ կետի 7-րդ և 8-րդ ենթակետի դրույթների հիմքով։
Դատավճիռն օրինական ուժի մեջ մտնելուց հետո գործով իրեղեն ապացույց ճանաչված խոշոր չափի 0,62 գրամ «ափիոն» տեսակի թմրամիջոցը և պրեկուրսոր հանդիսացող 0,8 մլ ծավալի քացախաթթվի անհիդրիդը ենթակա են ոչնչացման, իսկ 20.000 ՀՀ դրամ գումարը` բռնագրավման հօգուտ պետբյուջեի, իսկ ամբաստանյալ Առաքել Մարտիկյանի զինգրքույկն ու ամբաստանյալ Արամ Մարկոսյանի բջջային հեռախոսը ենթակա են վերադարձման ամբաստանյալների հարազատներին։
Մինչև դատավճռի օրինական ուժի մեջ մտնելն ամբաստանյալներ Առաքել Արմենակի Մարտիկյանի և Արամ Պուշկինի Մարկոսյանի նկատմամբ որպես խափանման միջոց ընտրված կալանավորումն անհրաժեշտ է թողնել անփոփոխ։
Հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի 41, 44, 357-358, 360, 365, 369-372, 376, 3761, 379-րդ, ՀՀ դատական օրենսգրքի 20-րդ հոդվածների պահանջներով, դատարանը.

Վ Ճ Ռ Ե Ց

1. Ամբաստանյալ Արամ Պուշկինի Մարկոսյանին մեղավոր ճանաչել ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով և 38-266-րդ հոդվածի 4-րդ մասով նախատեսված հանցանքները կատարելու մեջ և նշված հոդվածների սանկցիայով նրա նկատմամբ քրեական պատիժ կիրառել, դատապարտելով
ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով` ազատազրկման 5 /հինգ/ տարի ժամկետով` առանց գույքի բռնագրավման և ՀՀ քրեական օրենսգրքի 38-266-րդ հոդվածի 4-րդ մասով տուգանք նվազագույն աշխատավարձի հիսնապատիկի` 50.000 ՀՀ դրամ գումարի չափով։
ՀՀ քրեական օրենսգրքի 66-րդ հոդվածի 4-րդ մասի կիրառմամբ վերջնական պատիժ նշանակել ազատազրկում 5 /հինգ/ տարի ժամկետով` առանց գույքի բռնագրավման և տուգանք` նվազագույն աշխատավարձի հիսնապատիկի` 50.000 ՀՀ դրամ գումարի չափով, որը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Պատժի կրման ժամկետը հաշվել 16.04.2011թ.։
2.Ամբաստանյալ Առաքել Արմենակի Մարտիկյանին մեղավոր ճանաչել ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով նախատեսված հանցանքները կատարելու մեջ և նշված հոդվածների սանկցիայով նրա նկատմամբ քրեական պատիժ կիրառել, դատապարտելով
ՀՀ քրեական օրենսգրքի 266-րդ հոդվածի 2-րդ մասի 2-րդ կետով` ազատազրկման 6 /վեց/ տարի ժամկետով` առանց գույքի բռնագրավման և
ՀՀ քրեական օրենսգրքի 266-րդ հոդվածի 4-րդ մասով տուգանք նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամ գումարի չափով։
ՀՀ քրեական օրենսգրքի 66-րդ հոդվածի 4-րդ մասի կիրառմամբ վերջնական պատիժ նշանակել ազատազրկում 6 /վեց/ տարի ժամկետով` առանց գույքի բռնագրավման և տուգանք նվազագույն աշխատավարձի հարյուրապատիկի` 100.000 ՀՀ դրամ գումարի չափով, որը պետք է կրի ՀՀ ԱՆ ՔԿՎ համապատասխան ՔԿ հիմնարկում։
Ամբաստանյալ Առաքել Արմենակի Մարտիկյանի նկատմամբ ՀՀ քրեական օրենսգրքի 97 և 102-րդ հոդվածների և ՀՀ քրեակատարողական օրենսգրքի 123-124, 126-րդ հոդվածների կարգով պատիժ կիրառելու հետ նշանակել պատժի կատարման հետ միացված բժշկական բնույթի հարկադրանքի միջոցներ ափիոնային թմրամոլության դեմ, որը պետք է իրականացվի պատիժը կրելու ընթացքում և որի ժամկետը պետք է հաշվակցվի պատժի ժամկետին։
Պատժի կրման սկիզբը հաշվել 30.05.2011թ.։
Մինչև դատավճռի օրինական ուժի մեջ մտնելը ամբաստանյալներ Առաքել Արմենակի Մարտիկյանի և Արամ Պուշկինի Մարկոսյանի նկատմամբ որպես խափանման միջոց կիրառված կալանավորումը թողնել անփոփոխ։
Դատավճիռն օրինական ուժի մեջ մտնելուց հետո իրեղեն ապացույց ճանաչված խոշոր չափի 0,62 գրամ քաշով «ափիոն» տեսակի թմրամիջոցը և պրեկուրսոր հանդիսացող 0,8 մլ ծավալի քացախաթթվի անհիդրիդը ոչնչացնել, իսկ 20.000 ՀՀ դրամ գումարը բռնագանձել հօգուտ պետբյուջեի, իսկ ամբաստանյալ Առաքել Մարտիկյանի զինգրքույկն ու ամբաստանյալ Արամ Մարկոսյանի բջջային հեռախոսը վերադարձնել ամբաստանյալների հարազատներին։
Դատավարության մասնակիցների կողմից դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում։

ԴԱՏԱՎՈՐ Վ. Թ. ԳՐԻԳՈՐՅԱՆ